ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/6ODbXz4?d=n&ui=v64j8rk&e1=c💞ദേവനന്ദിനി... Part 83💞 താലിയണിയിച്ചു തന്റെ പത്നിയാക്കിയ ഗൗരിയുടെ കൈ പിടിച്ചു അഗ്നിയെ മൂന്ന് തവണ വലം വച്ചതിനു ശേഷം രുദ്രനും ഗൗരിയും പാജിയുടെ അടുത്തെത്തി അദ്ദേഹത്തിന്റെ കാലിൽ വീണനുഗ്രഹം വാങ്ങി. ഇരുവരുടെയും ശിരസ്സുകൾക്ക് മുകളിൽ കൈ വച്ചു നിറഞ്ഞ മനസ്സോടെ അനുഗ്രഹം ചൊരിയുമ്പോൾ പാജിയുടെ മിഴികളിൽ നിന്നുമശ്രു കണങ്ങൾ ഒഴുകിക്കൊണ്ടിരുന്നു. ഇത് കണ്ടു നിന്ന ബേബേ നിറഞ്ഞു തുളുമ്പിയ തന്റെ മിഴികൾ തുടച്ചു കൊണ്ട് അവർക്കടുത്തെത്തി... അനുഗ്രഹം വാങ്ങി എഴുന്നേറ്റ രുദ്രനും ഗൗരിയും നിറമിഴികളുമായി നിൽക്കുന്ന പാജിയേയും ബേബേയേയും കണ്ട് അമ്പരന്നു... "പാജി... നിങ്ങളെല്ലാവരും കാത്തിരുന്ന സന്തോഷം നിറഞ്ഞൊരു ദിവസമായിട്ടു പാജിയും ബേബേയും കരയുകയാണോ"...? പാജിയുടെയും ബേബേയുടെയും മുഖഭാവങ്ങൾ കണ്ടപ്പരപ്പോടെ രുദ്രനിരുവരോടുമായി തിരക്കി... "സന്തോഷം കൊണ്ടാണ് മക്കളെ... കുടുംബത്തിൽ പല വിവാഹചടങ്ങുകൾക്കും പോകുമ്പോൾ വരന്റെയും വധുവിന്റെയും അച്ഛനമ്മമാരുടെ സന്തോഷവും ആനന്ദകണ്ണീരുമൊക്കെ കാണുമ്പോൾ ആശിച്ചു പോയിട്ടുണ്ട് പലപ്പോഴും ഇത് പോലെയൊക്കെ അനുഭവങ്ങൾ പകരുവാൻ ഞങ്ങൾക്ക് ഒരു മകളോ മകനോ ഇല്ലെന്ന് . പക്ഷേ ഇന്ന് നന്ദുമോളുടെ അച്ഛന്റെ സ്ഥാനത്ത് നിന്നവളുടെ കൈ പിടിച്ചു നിന്നെയേല്പിക്കുമ്പോൾ ഞങ്ങളനുഭവിച്ചത് ആ സന്തോഷമാണ്. തന്റെ മകൾ സുമംഗലിയാവുന്നതും കന്യാദാനം നിർവഹിക്കുകയും ചെയ്തപ്പോൾ ഇത്രയും കാലമൊരിക്കലെങ്കിലും മനസ്സിൽ ആഗ്രഹിച്ചത് നടന്നതിന്റെ സായൂജ്യമായിരുന്നു മനസ്സ് നിറയെ. ഈ ജന്മം മുഴുവനോർമ്മിക്കുവാനുള്ള ഓർമ്മകൾ പകർന്നു ഈ വിവാഹദിനവും ഈ ചടങ്ങും..." ആമോദചിത്തനായി പാജി രുദ്രന് മറുപടി കൊടുക്കുമ്പോൾ അറിയാതെ അദ്ദേഹം വികാരധീനനായി മിഴികൾ തുടച്ചു കൊണ്ടിരുന്നു... ഒരു മന്ദഹാസത്തോടെ നിറമിഴികൾ തുടച്ചു തന്റെ സംഭാഷണം പൂർത്തിയാക്കിയ പാജി രുദ്രനെയും ഗൗരിയേയും തന്റെ നെഞ്ചിലേക്ക് ചേർത്ത് പിടിച്ചു ഇരുവരുടെയും മൂർദ്ധാവിൽ ചുംബനങ്ങൾ പകർന്നു... ഈ രംഗങ്ങൾക്കെല്ലാം സാക്ഷ്യം വഹിച്ചു കൊണ്ട് നിന്ന ബേബേ പുഞ്ചിരിയോടെ തന്റെ മിഴികൾ തൂത്ത് കൊണ്ട് ഗൗരിയെ തന്നോട് ചേർത്ത് പിടിച്ചു അവളുടെ കവിളിൽ ചുംബിച്ചു.... "എന്റെ മോള് ദീർഘസുമംഗലിയായിരിക്കട്ടെ..." ഗൗരിയുടെ കവിളിൽ ചുംബനം നൽകിയതിന് ശേഷം ബേബേയൊരു മന്ദഹാസത്തോടെ അനുഗ്രഹപൂർവം മൊഴിഞ്ഞു... "ബേബേ.... ബേബേയ്ക്ക് കരയാറായിട്ടില്ല.. ബേബേയുടെ സീൻ പിന്നീട് വരാൻ പോകുന്നെ ഉള്ളൂ".... എല്ലാവരുടെയും കൂട്ടത്തിൽ നിന്നുമവരുടെ അടുത്തെത്തിയ ബൽക്കാർ ബേബേയെ നോക്കി ചിരിച്ചു കൊണ്ട് പറഞ്ഞു... "പോടാ അവിടുന്ന് "... ബേബേ ബൽക്കാറിനെ നോക്കിയൊരു ചിരിയോടെയവനെ ശാസിച്ചു... ബേബേയുടെയും ബൽക്കാറിന്റെയും സംസാരം കേട്ട് എല്ലാവരുമൊന്ന് ചിരിച്ചു... തുടർന്ന് രുദ്രനും ഗൗരിയും ആയിയുടെ കാലിൽ തൊട്ട് അനുഗ്രഹം വാങ്ങി.... "അളിയാ... നിങ്ങൾ വിവാഹം കഴിച്ചപ്പോൾ ആശയക്കുഴപ്പത്തിലായത് ഞാനാണ്"...ബൽക്കാർ രുദ്രനെ നോക്കികൊണ്ട് പറഞ്ഞു... രുദ്രനും ഗൗരിയും അതെന്തിനാണെന്ന് ആംഗ്യത്തിലൂടെ തിരക്കി.... "ഇത്രയും കാലം ബാബി എന്ന് വിളിച്ച ഞാനിനി എന്താണ് വിളിക്കേണ്ടത്. ബാബിയെന്നോ അതോ ദീദിയെന്നോ"...? ആശയക്കുഴപ്പം നിറഞ്ഞ മുഖഭാവത്തോടെ ബൽക്കാർ ഗൗരിയോട് തിരക്കി.... "ബല്ലു... നിനക്കിഷ്ടമുള്ളത് വിളിച്ചോ നീ. എന്ത് വിളിച്ചാലും എനിക്ക് കുഴപ്പമില്ല"...വദനത്തിലണിഞ്ഞ പുഞ്ചിരിയോടെ ഗൗരി ബൽക്കാറിനു മറുപടി നൽകി... "എന്നാലും ബാബി... ഒരു സംശയം"..? ബൽക്കാർ ഗൗരിയെയും രുദ്രനെയും നോക്കിക്കൊണ്ട് ചോദിച്ചു... ഗൗരി എന്താണെന്ന് തിരക്കി... "ബാബി... ബാബിയ്ക്കെങ്ങനെ ഈ വട്ടനോട് പ്രണയം തോന്നി"...? ബൽക്കാർ രുദ്രനെ നോക്കിക്കളിയാക്കിച്ചിരിച്ചു കൊണ്ട് ഗൗരിയോട് ചോദിച്ചു... ബൽക്കാറിന്റെ ചോദ്യമെല്ലാവരിലും ചിരിയുണർത്തിയപ്പോൾ രുദ്രൻ ബൽക്കാറിനെ നോക്കിയൊന്ന് കണ്ണുരുട്ടി. ബൽക്കാറവനെ നോക്കി ചിരിച്ചു കൊണ്ടിരുന്നു.... "ബല്ലു.. ബുരി വഖ്ത് കഭി കഭി ഗാഡി മേ ഭി ആയേഗി ലേക്കിൻ മേരി ബുരി നസീബ് ഗാലി ലേക്കെ ആഗയീ ( കാലക്കേട് ചിലപ്പോൾ വണ്ടിയിലും വരും എന്നാലെന്റെ ജീവിതത്തിൽ അത് കൊണ്ട് വന്നത് തെറിയാണ് )"... ഗൗരി ചിരിച്ചു കൊണ്ട് ബൽക്കാറിനു മറുപടി നൽകി. രുദ്രനത് കേട്ട് ഗൗരിയുടെ കൈത്തണ്ടയിലൊന്ന് നുള്ളി. ഗൗരിയതൊന്നും ശ്രദ്ധിക്കാതെ കോളേജിൽ വച്ചു ആദ്യമായി രുദ്രനെ ചെന്നിടിച്ചതും അവൻ ചീത്ത പറഞ്ഞതും തുടർന്ന് പ്രണയബന്ധത്തിലായതുമായ കഥ ബൽക്കാറിനോട് വിവരിച്ചു.... ഗൗരിയുടെ വിവരണം അവസാനിക്കുമ്പോഴേക്കും അവൾ ഉറക്കെച്ചിരിച്ചു പോയിരുന്നു. കൂടെയുള്ളവരും അത് കേട്ടുറക്കെ ചിരിച്ചു... "എടാ അളിയാ... എന്നാലും ബാബിയുടെ ഐശ്വര്യം നിറഞ്ഞ ഈ മുഖത്ത് നോക്കി നിനക്കെങ്ങനെ തെറി വിളിക്കുവാൻ തോന്നി"..? "ഒരു വിധത്തിൽ പെട്ട മനുഷ്യർക്കൊക്കെ തോന്നുമോ അങ്ങനെയൊക്കെ"...? ബൽക്കാർ തന്റെ തലയിൽ കൈ വച്ചു കൊണ്ട് അതിശയത്തോടെ രുദ്രനോട്‌ ചോദിച്ചു.... "അളിയാ... അന്നങ്ങനെ പറ്റിപ്പോയി..അളിയൻ ക്ഷമിയ്ക്ക് "...രുദ്രൻ ചമ്മലടക്കിക്കൊണ്ട് ബൽക്കാറിനു മറുപടി നൽകി.. "നന്ദുമോളെ... ഇവനന്നങ്ങനെ വിളിച്ചതിനു മോളിവനെ സ്വന്തം സാരിത്തുമ്പിൽ പിടിച്ചു കെട്ടിയിട്ടേക്കണം"... ഗൗരിയുടെ താടിത്തുമ്പിൽ പിടിച്ചു കൊണ്ടൊരു വാത്സല്യം നിറഞ്ഞ ചിരിയോടെ ആയി ഗൗരിയോട് മൊഴിഞ്ഞു... ഗൗരി രുദ്രനെ നോക്കിയൊരു കള്ളച്ചിരിയോടെ നോക്കിക്കൊണ്ട് തലയാട്ടി.... തുടർന്ന് നവദമ്പതികളുടെ കൂടെയുള്ള ഫോട്ടോഷൂട്ടിന്റെ ബഹളമായിരുന്നു സ്റ്റേജിൽ. ബന്ധുക്കളുടെ കൂടെയും , രുദ്രന്റെ ചില സഹപ്രവർത്തകരുടെ കൂടെയുമുള്ള ഫോട്ടോകളും, രുദ്രന്റെയും ഗൗരിയുടെയും ഒരുമിച്ചുള്ള ഫോട്ടോകളും, ഇരുവരുടെയും തനിച്ചുള്ള ഫോട്ടോകളും ഫോട്ടോഗ്രാഫർമാർ എടുത്ത് കൊണ്ടിരുന്നു.... "അപ്പോൾ ഇവിടുത്തെ പരിപാടിയെല്ലാം കഴിഞ്ഞെങ്കിൽ നമുക്കെല്ലാവർക്കും കൂടി ഈ ദിനത്തിന്റെ പ്രധാന ഐറ്റത്തിലോട്ട് കടക്കാം".... കൂട്ടത്തിൽ നിന്നു കൊണ്ടെല്ലാം ശ്രദ്ധിച്ചു നിന്ന മാമുവും മൊയ്‌തൂട്ടിക്കയും ഒരേ സ്വരത്തിൽ എല്ലാവരോടുമായി പറഞ്ഞു.... ഇരുവരുടെയും വാക്കുകൾ അംഗീകരിച്ചു എല്ലാവരും ഹാളിൽ ഒരുക്കി വച്ചിരിക്കുന്ന ടേബിളുകളുടെയും കസേരകളുടെയും അടുത്തേക്ക് നീങ്ങി.... ഗൗരിയുടെ കൈ കോർത്തു പിടിച്ചു കൊണ്ട് രുദ്രനും.... ================================== തങ്ങൾക്കായൊരുക്കിയ മേശയിൽ നവദമ്പതികളായ രുദ്രനും ഗൗരിയും ചേർന്ന് ഇരുന്നു... അല്പനിമിഷങ്ങൾക്കകം കാറ്ററിംഗ് ജോലിക്കാർ വിവാഹസദ്യ വിളമ്പുവാൻ തുടങ്ങി. എല്ലാമടങ്ങിയ തനതായ മറാത്ത വിവാഹ താലിയായിരുന്നു കാറ്ററിംഗുകാർ വച്ചത്.... കാറ്ററിംഗ് ജോലിക്കാർ വച്ച താലിയിലേക്കും അത് കൂടാതെ വച്ച മറ്റ് വിഭവങ്ങളിലേക്കും ഗൗരിയൊരു അമ്പരപ്പോടെ മിഴികളയച്ചു. ഘോട്ടിയിൽ വന്നിട്ടിത്ര നാളായെങ്കിലും ഗൗരിയിത് വരെ മഹാരാഷ്ട്ര താലിയോ മറ്റോ ഇത് വരെ കഴിച്ചിട്ടില്ല. എല്ലാമവൾക്കൊരു പുതുമയായിരുന്നു... തന്റെ മുമ്പിൽ വച്ച വിഭവങ്ങളിലേക്ക് ഗൗരിയൊന്ന് മിഴികളെറിഞ്ഞു.... വലിയൊരു പ്ളേറ്റിൽ ഒന്ന് രണ്ട് വട, ചെറിയ ബൗളുകളിലായിട്ട് എന്തോ പകോടകൾ, വെജിറ്റബ്ൾസ്, ഉരുളക്കിഴങ്ങ് മസാല, വഴുതനങ്ങ കൊണ്ടുള്ള എന്തോ കറി, കുറച്ച് പച്ചരിച്ചോറ്, ദാൽ, ഗുലാബ് ജാമുൻ, എന്നിവ കൂടാതെ പ്ളേറ്റിന്റെ ഒരു വശത്ത് മൂന്നാല് പൂരി യും ഒരു ചപ്പാത്തിയും മറ്റൊരു വശത്ത് വെളുത്ത കളറിലുള്ള ഒന്ന് രണ്ട് ലഡ്ഡു, ഒരു പപ്പടവും പിന്നെ പ്ളേറ്റിന്റെ ഒത്ത നടുക്കായ് ഇളംചുവപ്പ് നിറത്തിലുള്ള എന്തോ റൈസ് ഐറ്റംവും. പ്ളേറ്റിനു പുറത്ത് ഒരു ചെറിയ ജാറുകളിൽ ലസ്സി പോലെ കട്ടിയുള്ള ഒരു പാനീയം, മോര് പിന്നെ ചെറിയ കട്ടോരികളിലായി ചുവപ്പും പച്ചയും നിറത്തിലുള്ള ചട്ണികളും വച്ചിരിക്കുന്നു. ഗുജറാത്തിലെയും രാജസ്ഥാനിലെയും താലിയിലെ വിഭവങ്ങളെ പോലെ എന്തു കൊണ്ടുണ്ടാക്കിയ വിഭവങ്ങളാണെന്ന് മനസ്സിലാക്കുവാൻ ബുദ്ധിമുട്ടില്ല. എന്നാലും ഇതിൽ പേര് മിക്കതിന്റെയും അറിയില്ല. ആകെ പച്ചരിച്ചോറും, പൂരിയും, വടയും, മനസ്സിലാവുന്നുണ്ട്... കണ്ണുകൾ മിഴിച്ചു താലിയിലേക്ക് നോട്ടമയച്ചു കൊണ്ട് ഗൗരി ചിന്തിച്ചു.... ഗൗരിയുടെ മുഖഭാവം രുദ്രന്റെയുള്ളിൽ ചിരിയുണർത്തി.... "നന്ദൂ... ഇങ്ങനെ മിഴിച്ചു നോക്കി താനാ വലിയ കണ്ണുകൾ തള്ളിയിടേണ്ട താലിയിലോട്ട്. നമ്മുടെ വിവാഹസദ്യയാണിത്"... ഉള്ളിൽ നിന്നും തികട്ടി വന്ന ചിരിയടക്കിക്കൊണ്ട് രുദ്രൻ ഗൗരിയോട് മൊഴിഞ്ഞു..... "ദേവേട്ടാ... സ്വന്തം വിവാഹത്തിന് മുന്നിൽ വിളമ്പിയ വിഭവങ്ങളുടെ പേരറിയാത്ത ലോകത്തെ അപൂർവം ചില വധുക്കളിൽ ഒരാൾ ഞാനായിരിക്കും. നോക്കി നിൽക്കാതെ ഇതിന്റെയൊക്കെ പേര് പറഞ്ഞു താടാ ഭർത്താവേ"... രുദ്രൻ തന്നെ മനസ്സിൽ കളിയാക്കുകയാണെന്ന് അറിഞ്ഞ ഗൗരിയൊരു പരിഭവത്തോടെ അവനോട്‌ മൊഴിഞ്ഞു... "എടോ ഭാര്യേ...പൂരി സബ്ജിയും, പച്ചരിച്ചോറും ദാലും വടയും നിനക്ക് മനസ്സിലായല്ലോ അല്ലെ"...? രുദ്രൻ ഗൗരിയോട് തിരക്കി.. ഗൗരി അതൊക്കെ മനസ്സിലായെന്ന് തലകുലുക്കി... "നന്ദൂ.. ആ ബൗളിൽ ഉള്ള പകോട സവാള, ചീരയില പിന്നെ ഉരുളക്കിഴങ്ങ് എല്ലാം ചേർത്തുള്ള ഫ്രൈ ആണ്. പിന്നെ ആ വഴുതനങ്ങ സബ്ജിയുടെ പേര് ഭർലി വാങ്കി, പിന്നെ ഇളം ചുവപ്പ് നിറത്തിലുള്ള റൈസ് മസാല ഭാട്ട് എന്ന് വച്ചാൽ ഒരു തരം പുലാവ്, പിന്നെ റവ ലഡ്ഡു, ഗുലാബ് ജാമുൻ, പിന്നെ ചെറിയ ജാറിൽ ഉള്ള ലസ്സി പോലെയുള്ള ഐറ്റം ഷ്രീകന്ത് തൈരും പഞ്ചസാരയും കൂടെ ചില നട്സും ഫ്രൂട്ട്സും കുങ്കുമപ്പൂവും ഏലക്കയും ചേർത്തത്. ഒരു തരം ലസ്സി തന്നെ".... രുദ്രൻ ഗൗരിയ്ക്ക് എല്ലാം വിവരിച്ചു കൊടുത്തു.... "ദേവേട്ടാ.... ഇവിടുത്തെ എല്ലാ വിവാഹങ്ങൾക്കും ഇത്രയും വിഭവങ്ങൾ കാണുമോ"....? രുദ്രന്റെ വിവരണം കേട്ട ഗൗരി തന്റെ സംശയമുന്നയിച്ചു... "ഇത്രയും വിഭവങ്ങൾ ചിലപ്പോൾ കാണില്ല. പിന്നെ കാറ്ററിംഗ് ടീമിന് അനുസരിച്ചിരിക്കും ഇതൊക്കെ. കാറ്ററിംഗ് ടീമിന്റെ സദ്യയിൽ ഇത്രയും വിഭവങ്ങൾ കണ്ടേക്കും. അല്ലാതെ വീടുകളിൽ നടക്കുമ്പോൾ പൂരി സബ്ജി, ഭർലി വാംഗി, പകോടകൾ, മസാല ഭാട്ട് അല്ലെങ്കിൽ ദാൽ ചാവൽ, പിന്നെ പപ്പടം, ലഡ്ഡു, ഷ്രീകന്ത് ഇതൊക്കെയാണ് സാധാരണ കാണാറുള്ളത്. പിന്നെ മഹാരാഷ്ട്രയുടെ തന്നെ കിഴക്കൻ ഭാഗമായ വിദർഭയിലും, മധ്യ ഭാഗമായ മറാത്ത്വാട പ്രദേശങ്ങളിലും ഒക്കെ ഇത് പോലെ ആയെക്കില്ല. അതിന്റെതായ വ്യത്യാസം കാണും"... രുദ്രനൊന്ന് പറഞ്ഞു നിർത്തി.... "നന്ദുമോളുടെ സംശയങ്ങളൊക്കെ തീർന്നെങ്കിൽ ആ ബൗളിലെ ചൊറിലേക്ക് ദാൽ ഒഴിച്ചു സ്പൂൺ കൊണ്ട് കഴിച്ചു തുടങ്ങിക്കെ"... രുദ്രൻ ഗൗരിയോട് അവളെ നോക്കിയൊന്ന് കണ്ണിറുക്കിച്ചിരിച്ചു കൊണ്ട് പറഞ്ഞു... "ദേവേട്ടാ... എന്റെ കലിപ്പന് സൗത്തിലെ ഏതെങ്കിലും സ്റ്റേറ്റിലോട്ട് നാട് വിടാൻ മേലായിരുന്നോ. എന്നാൽ ഈ പേരറിയാത്ത ബുദ്ധിമുട്ടൊന്നും അധികമുണ്ടാകില്ലായിരുന്നു"... ഗൗരിയൊരു ചിണുങ്ങലോടെ രുദ്രനോട് മൊഴിഞ്ഞു... "ദേ യക്ഷീ... എന്നെക്കൊണ്ട് ഒന്നും പറയിപ്പിക്കരുത്. കല്യാണദിവസം തന്നെ അടിയുണ്ടാക്കാനായി ഇറങ്ങിയേക്കുവാണോ"...? രുദ്രനൊരു പുച്ഛത്തോടെ ഗൗരിയോട് ചോദിച്ചു... "യക്ഷിയാണല്ലേ.... ഇന്ന് രാത്രി ഈ കലിപ്പന്റെ ചോര ഞാനൂറ്റിക്കുടിക്കും. നോക്കിക്കോ...കൊരങ്ങൻ"...ഗൗരി തന്റെ മുഖമൊന്നു കൂർപ്പിച്ചു കൊണ്ട് രുദ്രനോട് മൊഴിഞ്ഞു... "കൊള്ളാം... കല്യാണദിവസം തന്നെ ഭർത്താവിനെ കുരങ്ങനെന്ന് വിളിക്കുന്ന നീയാണെടീ ധർമ്മപത്നി... മിണ്ടാതെ ഇരുന്ന് മുന്നിൽ വിളമ്പിയത് കഴിക്കാൻ നോക്ക്"...രുദ്രനൊരു പുച്ഛത്തോടെ ഗൗരിയെ നോക്കിച്ചിരിച്ചു കൊണ്ട് പറഞ്ഞു.. മറുപടിയായി ഗൗരിയവനെ നോക്കിയൊന്ന് കൊഞ്ഞനം കുത്തി.... തുടർന്നവൾ മുന്നിലുള്ള വിഭവങ്ങൾ ഓരോന്നായി ആസ്വദിച്ചു കഴിക്കുവാൻ തുടങ്ങി.... രുദ്രനും കഴിച്ചു കൊണ്ടിരുന്നു.... രുദ്രനുള്ളിൽ നിറഞ്ഞൊരു പുഞ്ചിരിയോടെ ഗൗരി ആസ്വദിച്ചു കൊണ്ട് കഴിക്കുന്നത് ഇടയ്ക്കിടെ ഒളികണ്ണിട്ട് നോക്കിക്കൊണ്ടിരുന്നു... "ദേവേട്ടാ"... ഇടയ്ക്ക് ഗൗരിയുടെ വദനത്തിൽ നിന്നും മിഴികളെടുത്ത് താൻ കഴിക്കുന്നതിലേക്ക് ശ്രദ്ധ കേന്ദ്രീകരിച്ച രുദ്രനെ ഗൗരി വിളിച്ചു... രുദ്രൻ ഗൗരിയുടെ മുഖത്തേക്ക് നോക്കിക്കൊണ്ട് എന്താണെന്ന് കണ്ണുകളാൽ തിരക്കി.... "ദേവേട്ടാ... ഐ ലവ് യൂ...." പാനീയരുഹനയനങ്ങളിൽ നിറഞ്ഞ പ്രണയമയൂഖങ്ങൾ രുദ്രന് നേരെയെറിഞ്ഞു കൊണ്ട് ഗൗരി പ്രണയർദ്രയായി മൊഴിഞ്ഞു... രുദ്രനവളെ നോക്കിയൊന്ന് പുഞ്ചിരിച്ചു... "ദേവേട്ടാ... എനിക്കിന്ന് എന്തൊക്കെയാ ചെയ്യേണ്ടതെന്ന് അറിയില്ല. ഇത് പോലൊരു ചടങ്ങും സദ്യ കഴിക്കുന്നതുമൊന്നും ഒരിക്കൽ പോലും നമ്മൾ ചിന്തിച്ചിട്ടില്ലല്ലോ. എനിക്ക് സന്തോഷത്താൽ എന്തൊക്കെയോ ചെയ്യുവാൻ തോന്നുന്നു".... ഗൗരിയുടെ വാക്കുകളിൽ അവളെത്രത്തോളം ആമോദചിത്തയാണെന്ന് രുദ്രൻ ഊഹിച്ചു.... ഗൗരി രുദ്രനെ നോക്കി തന്റെ മാതളയല്ലിയധരങ്ങളാലൊരു ചുംബനമയച്ചു..... ആനന്ദനിർവൃതിയുടെ അത്യുന്നതിയിലിരുന്ന രുദ്രനൊരു ചുംബനം അവൾക്ക് നേരെയും എയ്ത് വിട്ടു.... തുടരും NB : മഹാരാഷ്ട്രയിൽ വട എന്ന് പറയുന്നത് നമ്മുടെ നാട്ടിലെ ബോണ്ടയ്ക്ക് ഉരുട്ടിയത് ചെറുതാക്കി കടലമാവിൽ മുക്കിയെടുത്ത് എണ്ണയിലിട്ട് വറുത്തെടുക്കുന്നതാണ്... കട്ടോരി എന്ന് പറയുന്നത് കുഞ്ഞൻ പാത്രത്തിനാണ്. അതിന് മലയാളത്തിൽ എന്ത് പേരാണ് പറയുന്നതെന്ന് എനിക്കറിയില്ല. ഞാൻ അങ്ങനെ തന്നെയാണ് പറയാറ്.... 🙂 കണ്ണൂർകാരൻ ❤️❤️❤️❤️ #📔 കഥ #✍ തുടർക്കഥ #📙 നോവൽ #💞 പ്രണയകഥകൾ #📚 ട്വിസ്റ്റ് കഥകൾ