ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/6eDW8Aw?d=n&ui=v64j8rk&e1=cശിക്ഷാർഹം പാർട്ട്‌ 26 “ഷാജി... ” ആൽബിയുടെ സ്വരം വിറച്ചു. “വാട്ട്സാപ്പ് മെസേജ് കണ്ടാരുന്നില്ലേ ? ഞാൻ കുറച്ചു ഫോട്ടോസ് അയച്ചിരുന്നു.” “വാട്ട് ഡു യൂ വാണ്ട് ഷാജി ? പ്ലീസ്, എന്തിനാണ് നിങ്ങൾ എന്നെത്തന്നെ ഇങ്ങനെ ടാർഗറ്റ് ചെയ്ത്-” “ആരു ടാർഗറ്റ് ചെയ്യുന്നു ആൽബി ? താനല്ലെങ്കിൽ വേറൊരു മണ്ടൻ. അത്രേയുള്ളൂ. എന്റെ നോട്ടം ആ യൂണിഫോമിലായിരുന്നു. നിന്റെ തോളിലെ ആ നക്ഷത്രങ്ങൾ മാത്രം കണ്ട് പുറകേ കൂടിയതാണ്. കുറേ കാലമായി നിന്റെ ചുവടൊന്നു പിഴക്കാനായി കാത്തിരുന്നിട്ട്, ഒടുക്കം അവസരം വീണു കിട്ടിയപ്പോൾ ചാടി വീണു ഞാൻ. അത്ര തന്നെ.” “ഓക്കെ. എന്താണ് വേണ്ടത് നിനക്ക് ? അത് പറയൂ.” “അതൊക്കെ ഞാൻ പറയാം. പക്ഷേ നീയിപ്പൊ ആ പോത്തന്റെ അടുത്തല്ലേ ആൽബി ? അവന്മാരു കേട്ടോണ്ടു നില്ക്കുവല്ലേ ? ” ഷാജി അടക്കിച്ചിരിക്കുന്ന ശബ്ദം കേട്ടു. “നമുക്കാദ്യം ആ കാര്യത്തിന് ഒരു തീരുമാനമുണ്ടാക്കണം. അതും കൂടി കഴിഞ്ഞാൽ സർക്കിൾ സാറു മെരുങ്ങും. മെരുങ്ങിയേ തീരൂ. ഓക്കേ ? ഞാൻ ആ ഫോട്ടോസ് ആൻസിക്കുട്ടിക്ക് അയച്ചു കൊടുക്കാൻ പോകുകയാണ്. ചുമ്മാ, ഒരു വാണിങ്ങ്. അവൾക്കൊന്നും മനസ്സിലാകില്ല. പേടിക്കണ്ട. പക്ഷേ നീ ഈ കളി നിർത്തി ഇപ്പൊ തന്നെ അവിടുന്നിറങ്ങിപ്പോന്നില്ലെങ്കിൽ, എന്റെ കയ്യിൽ ഇനിയും ഫോട്ടോസ് ഉണ്ട്. നീ നമ്മടെ ഡെയ്സീടെ കൂടെ കിടക്കുന്നതു വരെ ഉണ്ട് എന്റെ കയ്യിൽ. മറക്കരുത്. തല്ക്കാലം ഈ തെറ്റു ഞാൻ ക്ഷമിക്കാം. പക്ഷേ ഇനിയും ആവർത്തിക്കരുത്. ഇനിയും ഇതിന്റെ പേരിൽ ജീവനെടുക്കേണ്ടി വരരുതെനിക്ക്. പ്ലീസ്. ആൻസിക്കുട്ടിയും മാളൂട്ടിയും-“ ”ഡാ! ! ! “ ആൽബി പരിസരം മറന്ന് അലറിപ്പോയി. ”ടെൻഷനാകല്ലേ ആൽബി. തല്ക്കാലം പോത്തന്റെ വീട്ടിൽ നിന്നിറങ്ങ്. അയാളു വിചാരിച്ചാലൊന്നും ഒന്നും നടക്കാൻ പോകുന്നില്ല മാൻ. നീ നല്ല ബെസ്റ്റായിട്ടു കുടുങ്ങി. ഇപ്രാവശ്യം ഞാൻ രണ്ടും കല്പ്പിച്ചു തന്നാ. സോ, യൂ ഡൂ ദാറ്റ്. എന്നിട്ട് ഞാൻ നിന്നെ ഒരിക്കൽ കൂടി വിളിക്കാം. ബൈ ദ വേ, ആൻസിക്കുട്ടി ഇപ്പൊ നല്ല ഉറക്കമായിരിക്കും അല്ലേ ? ഇപ്പൊ മെസേജ് അയച്ചിട്ടു കാര്യമില്ലല്ലോ ? നാളെ രാവിലെയാകട്ടെ. ഗുഡ് ബൈ ആൽബി.“ ഫോൺ കട്ടായി. ഞെട്ടി വിറങ്ങലിച്ച് പോത്തനെ നോക്കിയ ആൽബി കിതക്കുന്നുണ്ടായിരുന്നു. പോത്തനാകട്ടെ അക്ഷോഭ്യനായി കാണപ്പെട്ടു. ഒരു ചെറു ചിരിയോടു കൂടി അയാൾ ആൽബിയെ കയ്യാട്ടി അടുത്തേക്കു വിളിച്ചു. ”ദിസ് വാസ് എ ബാഡ് ഐഡിയ...“ ആൽബി പിറുപിറുത്തു. അയാൾ വല്ലാതെ തളർന്നു പോയിരുന്നു. ”ടെൻഷനാകല്ലേ ആൽബി.“ പോത്തൻ അയാളെ സമാധാനിപ്പിച്ചു. ”താൻ കരുതുന്നത്ര സ്മാർട്ടല്ല അവൻ.“ ”തനിക്കതു പറയാം! “ ആൽബി പൊട്ടിത്തെറിച്ചു. ”എന്റെ ഫാമിലി വരെ ഇപ്പൊ അപകടത്തിലായി. അവൻ പറഞ്ഞത് കേട്ടതല്ലേ നിങ്ങൾ ? “ ”ആൽബി...“ പോത്തൻ അവന്റെ തോളിൽ കൈ വെച്ചു. ”പോത്തനാണ് പറയുന്നത്. ഞാൻ ജീവിച്ചിരിക്കുമ്പോൾ ഒരുത്തനും നിന്റെ ഫാമിലിയെ തൊടില്ല! 100% വിശ്വസിക്കാം നിനക്കെന്നെ. എന്നു മാത്രമല്ല, അവൻ, ആ ഷാജി ആരാണെന്ന് മിക്കവാറും ഇന്നു രാത്രി പുലരുന്നതിനു മുൻപ് നമ്മൾ കണ്ടുപിടിച്ചിരിക്കും! “ മനസ്സു കുളിർപ്പിക്കുന്ന ആ വാക്കുകൾ കേട്ടിട്ടും ആൽബിയുടെ മുഖത്തെ ടെൻഷൻ അശേഷം മാറിയില്ല. ”ഓക്കെ! നമുക്ക് ജോലി തുടങ്ങാം.“ പോത്തൻ മറ്റുള്ളവർക്കു നേരേ തിരിഞ്ഞു. ”നോ നോ... ഞാനിനി ഇവിടെ നിന്നാൽ... അവർ എന്റെ ഓരോ നീക്കവും വാച്ചു ചെയ്യുന്നുണ്ട്.“ ”അവനോട് പോകാൻ പറയെഡേ! “ പോത്തൻ ഒരു കസേര വലിച്ചിട്ട് ഇരുന്ന് ലാപ്ടോപ്പ് തന്റെ നേരേ തിരിച്ചു വെച്ചു. രൂപേഷ് സ്ക്രീനിലേക്കു ചൂണ്ടി വിശദമാക്കിക്കൊടുത്തു. ”പഴയ ‘നോക്കിയ 3310’ ഫോണാണ്. നെറ്റ് കണക്ഷനില്ല. വെട്ടുകാട് സിറ്റിയിലുള്ള ‘ഐഡിയ’ ടവറാണ്. അടുത്തെങ്ങും വേറേ ഐഡിയ ടവറില്ല. സോ, നാലര കിലോമീറ്റർ ചുറ്റളവിൽ എവിടെ നിന്നു വേണമെങ്കിലുമാകാം അവൻ വിളിച്ചത്. ട്രേസ് ചെയ്യുക അസാധ്യമാണ്. നെറ്റ് കണക്ഷനുണ്ടായിരുന്നെങ്കിൽ-“ ”അതില്ലല്ലോ. സോ, ഉള്ള കാര്യങ്ങളെപ്പറ്റി പറയൂ.“ പോത്തൻ പരുഷമായിട്ടാണ് സംസാരിച്ചത്. ഉള്ളിൽ ടെൻഷനുണ്ടെങ്കിലും പുറത്തു കാണിക്കാതിരിക്കുകയാണയാളെന്നു വ്യക്തമായിരുന്നു. “നമ്പർ റെജിസ്റ്റർ ചെയ്തിരിക്കുന്നത് മറ്റൊരു ആസാം സ്വദേശിയുടെ പേരിൽ. സാരംഗ് സനു. പിന്നെ... അയാൾ എന്തോ വോയ്സ് ചേഞ്ചിങ്ങ് ഡിവൈസ് ഉപയോഗിക്കുന്നുണ്ട്.” ആ പറഞ്ഞത് എല്ലാവരുടേയും ശ്രദ്ധയാകർഷിച്ചു. “നോക്കിയ 3310 ഫോണിൽ വോയ്സ് ചേഞ്ചിങ്ങ് ഒക്കെ പറ്റുമോ? ” ജയിംസ് ആണ് ചോദിച്ചത്. “ഫോണിലായിരിക്കില്ല. ഒരു എക്സ്റ്റേണൽ ഡിവൈസ്. ദാ നമുക്കൊന്നുകൂടി കേട്ടു നോക്കാം.” രൂപേഷ്, ഷാജിയുടെ സംഭാഷണം റെക്കോർഡ് ചെയ്തിരുന്നത് ഒന്നുകൂടി പ്ലേ ചെയ്തു. “ശ്രദ്ധിച്ചേ, ഹൈ പിച്ച് വരുന്നിടത്തെല്ലാം, സംസാരം ജമ്പാകുന്നുണ്ട്. ഓട്ടോ ട്യൂണിങ്ങ് പോലെ. ഇത് ഒരു വോയ്സ് ചേഞ്ചർ ഉപയോഗിക്കുമ്പോൾ ശ്രദ്ധിച്ചില്ലെങ്കിൽ പറ്റുന്ന അബദ്ധമാണ്. നോർമ്മലായി സംസാരിക്കുമ്പോൾ പ്രശ്നമില്ല. നമുക്ക് നമ്മുടെ സ്വരം യേശുദാസിന്റേതു പോലെ വേണമെങ്കിൽ ആക്കാനാകും. പക്ഷേ, പെട്ടെന്ന് സംസാരത്തിന്റെ പിച്ച് കൂടിയാൽ ഇങ്ങനെയൊരു കുഴപ്പമുണ്ട്.” “സോ, അയാൾ ഈ ഡിവൈസിന്റെ മൈക്കിലാണ് സംസാരിക്കുന്നത്. ഡിവൈസ് ഫോണുമായി കണക്റ്റ് ചെയ്തിരിക്കുന്നു. അല്ലേ ? ” പോത്തൻ ഉറപ്പാക്കാനായി ചോദിച്ചു. “എക്സാക്റ്റ്ലി സർ! ” “വളരെ നല്ല ഇൻഫർമേഷനാണ് രൂപേഷ്. അവനെ നമ്മൾ പൂട്ടും... പറ്റിയാൽ ഇന്നു രാത്രി തന്നെ. താൻ ബാക്കി കൂടി പറ എന്നിട്ടു വേണം എനിക്ക് ആൽബിയോട് കുറച്ചു കാര്യങ്ങൾ ചോദിക്കാൻ.” “ഇത്രയൊക്കെ തന്നെയേ ഉള്ളു സർ.ആ കോൾ കൊണ്ട് വേറേ പ്രത്യേകിച്ചു വലിയ ഗുണമൊന്നുമുണ്ടായില്ല.“ ”ആണോ ആൽബി ? “ പോത്തൻ ആൽബിയുടെ മുഖത്തേക്കു നോക്കി. ”ആ കോൾ കൊണ്ട് പ്രത്യേകിച്ച് ഗുണമൊന്നുമുണ്ടായില്ലേ ? “ ”മനസ്സിലായില്ല.“ അവന്റെ നെറ്റിയിൽ ചുളിവുകൾ വീണു. ”ആർക്കും ഒന്നും തോന്നിയില്ലേ ആ ഷാജിയുടെ സംസാരം കേട്ടിട്ട് ? “ പോത്തൻ തിരിഞ്ഞ് രൂപേഷിനെയും ജയിംസിനെയും നോക്കി. എല്ലാവരും നിശബ്ദരായി നിന്നതേയുള്ളൂ. എന്തോ പ്രധാനപ്പെട്ട ഒരു തുമ്പ് കിട്ടിയിട്ടുണ്ട് പോത്തന്. ”കഷ്ടം തന്നെ എന്റെ ആൽബി. താൻ ടെൻഷനിലായിരുന്നു. സമ്മതിക്കുന്നു. പക്ഷേ ഇത്രയും ഇന്ററസ്റ്റിങ്ങായ ഒരു ഡീറ്റയിൽ താൻ വിട്ടുപോകുമെന്ന് ഞാനൊരിക്കലും കരുതിയില്ല. ഞാൻ ഒരു ചോദ്യം ചോദിക്കട്ടെ. തന്റെ മോൾ മെലിൻഡയെ വീട്ടിൽ എന്താണ് വിളിക്കാറ് ? “ ”മാളൂട്ടി“ ആ വാക്കുച്ചരിച്ചതും ആൽബിക്ക് തന്റെ തലക്കുള്ളിൽ ഒരു മിന്നലുണ്ടായതു പോലെ തോന്നി.വായ് പിളർന്നു പോയി അവന്റെ. ”എന്തു പറ്റി ആൽബി ? “ പോത്തൻ ചിരിച്ചു. ”ഞാൻ പറഞ്ഞില്ലേ ? താൻ കരുതുന്നത്ര സ്മാർട്ടോ അപകടകാരിയോ ഒന്നുമല്ല ഈ ഷാജി. ഏതൊരു മനുഷ്യനും പറ്റുന്ന അബദ്ധങ്ങളും മണ്ടത്തരങ്ങളും അവനും പറ്റും. തന്റെ മോളെ ചെല്ലപ്പേരു വിളിക്കുന്ന... തന്റെ വൈഫിനെ ആൻസിക്കുട്ടി എന്നു വിളിക്കുന്ന, എത്ര പേരുണ്ടെഡോ ആൽബി ? “ ആൽബി ചിന്തിക്കുകയായിരുന്നു. ”സമയമില്ല ആൽബി. നമുക്ക് എല്ലാം ആദ്യം മുതൽ ഒന്നു അനലൈസ് ചെയ്യാം. താൻ അതിനിടക്ക് നന്നായി ആലോചിച്ച് താനുമായി ക്ലോസായിട്ടുള്ളവരുടെയെല്ലാം ഒരു ലിസ്റ്റെടുക്കാൻ നോക്ക്. ഓർമ്മ വരുന്നതെല്ലാം ഒരു പേപ്പറിൽ കുറിക്കണം. ഞാനിപ്പൊ വരാം“ പോത്തൻ ബെഡ് റൂമിലേക്കു കയറിപ്പോയി നിമിഷങ്ങൾക്കുള്ളിൽ ഒരു ബോർഡുമായി ഇറങ്ങി വന്നു. ”എത്ര ഭീകരന്മാരെ പൊക്കിയ മുതലാണെന്നറിയാമോ ? നിങ്ങടെ ഈ സൈബറും സെല്ലുമൊക്കെ വരുന്നേനു മുൻപ് ഇങ്ങനായിരുന്നു ഇൻവെസ്റ്റിഗേഷൻ.“ അയാൾ അത് ഡൈനിങ്ങ് ടേബിളിനു പുറകിൽ ഭിത്തിയിലുറപ്പിച്ചുകൊണ്ടു പറഞ്ഞു. ”അപ്പൊ തുടങ്ങാം.“ അയാൾ ബോർഡിൽ 1 എന്നൊരക്കമെഴുതി. ”1. ആൽബി സാബുവിനെ പിക്ക് ചെയ്യാൻ ജയിലിലെത്തുന്നു, ജയിലർ മൃതപ്രായനായ സാബുവിനെ ആൽബിയെ ഏല്പ്പിക്കുന്നു.“ സംസാരത്തിലെ പ്രധാന പോയിന്റുകൾ പോത്തൻ അപ്പപ്പോൾ ബോർഡിൽ കുറിച്ചിട്ടു. ”അയാളെ എനിക്കു നല്ല സംശയമുണ്ട്. ആ ജയിലറെ.“ ആൽബി ഇടപെട്ടു. ”ചുമ്മാതാ. എനിക്കു പണ്ടേ അറിയാവുന്ന ആളാണ് രാജശേഖരൻ നായർ. ഈ ഷാജി ഇടിക്കുളയല്ല, അവന്റെ അപ്പൻ ഇടിക്കുള വിചാരിച്ചാൽ പോലും ആ ജയിലറെ മാനിപ്പുലേറ്റ് ചെയ്യാനൊക്കില്ല. അയാളും ഗാർഡ്സും കൂടി സാബുവിനെ മർദ്ദിച്ചിട്ടുണ്ടെങ്കിൽ, അതവരുടെ മാത്രം തീരുമാനമാണ്. ഷാജി അതിൽ ഇൻവോൾവ്ഡല്ല. പിന്നെ, സാബുവിനെ ചോദ്യം ചെയ്യാനും മറ്റുമായി താൻ പല പ്രാവശ്യം ജയിലിൽ പോയിട്ടുണ്ടാകുമല്ലോ, അയാൾ ശ്രദ്ധിച്ചുകാണും. താൻ ആദ്യം തന്നെ കേറി എല്ലാം ഒപ്പിട്ടു കൊടുക്കുന്ന മിടുക്കനാണെന്ന് അയാൾക്ക് മനസ്സിലായിക്കാണും.“ പോത്തൻ ചിരിച്ചു. ആൽബി തല കുമ്പിട്ടിരുന്നു. ആ നശിച്ച ദിവസം … “2. കോൺസ്റ്റബിൾ മാണി. എനിക്ക് നല്ല സംശയമുണ്ടായിരുന്നു ഈ കക്ഷിയെ. ഒരു പഠിച്ച കള്ളന്റെ എല്ലാ ലക്ഷണങ്ങളുമുണ്ട്. അമിതമായ വിനയം, അനവസരത്തിലുള്ള പേടി... എല്ലാമുണ്ട്. അതാണ് ഞാൻ അവനെ പോയി ചോദ്യം ചെയ്യാൻ കാരണം. പക്ഷേ ഞാനുദ്ദേശിച്ചതുപോലുള്ള ഒരു ഡീറ്റയിലും വീണു കിട്ടിയില്ല. പക്ഷേ അവനെ നമുക്ക് പെൻഡിങ്ങിൽ വെക്കാം. അവൻ ഷാജിയാണെന്നല്ല, സാബുവിനെ ഷൂട്ട് ചെയ്ത കൃത്യം സമയവും സ്ഥലവും ഷാജിക്ക് കിട്ടിയതിൽ അവനെന്തോ ഇടപാടുണ്ട്. എന്റെ വിശ്വാസം, ഈ ഷാജിയുടെ ആൾക്കാർ സാബു ഷൂട്ടിങ്ങ് കണ്ടിട്ടു തന്നെയുണ്ടാകില്ല. കേട്ടറിവു മാത്രമേ കാണൂ. അല്ലെങ്കിൽ പണ്ടേ ആ ദൃശ്യങ്ങൾ വാട്ട്സാപ്പിൽ വന്നേനെ. സോ, കോൺസ്റ്റബിൾ മാണി - പെൻഡിങ്ങ്.” ആൽബിയുടെ മുഖത്തെ മസിലുകൾ മുറുകി. “3. ഹ്യൂമൻ റൈറ്റ്സ് പ്രവർത്തകൻ സായ് നാരായണൻ.” പോത്തൻ എഴുത്ത് തുടർന്നു. “ഇവനെ നമുക്കെല്ലാം അറിയാം. വിട്ടുകളയാം. 4. ഷാജി ആദ്യമായി പ്രത്യക്ഷപ്പെടുന്നു. സായ് മാഷെ കൊലപ്പെടുത്തണമെന്നാവശ്യപ്പെട്ടുകൊണ്ടുള്ള ആദ്യ കോൾ. ആൽബിയുമായി അവൻ ആദ്യമായി തെറ്റുന്നു. ശരിയല്ലേ ? ” ആൽബി തലയാട്ടി. “തുടർന്ന് 5. ആൽബിയുടെ കുഞ്ഞിനെ സ്കൂളിൽ ചേർക്കാൻ പോകുമ്പോൾ പുതിയൊരു കഥാപാത്രം പ്രത്യക്ഷപ്പെടുന്നു. ഡെയ്സി സെബാസ്റ്റ്യൻ! “ പോത്തൻ എഴുത്തു നിർത്തി തിരിഞ്ഞു നിന്നു. ”ഇതിൽ മൊത്തം ഒരു നല്ല പ്ലാനിങ്ങ് കാണാം. ആദ്യം കുഞ്ഞിന് അഡ്മിഷൻ നിഷേധിക്കപ്പെടുന്നു. ഡെയ്സി ഇടപെടുന്നു. കുഞ്ഞിനെ സ്കൂളിൽ സ്വീകരിക്കുന്നു. അതോടെ ആൽബിയുടെ ജീവിതത്തിൽ ഒരു പ്രധാന റോളിൽ ഡെയ്സി പ്രവേശിക്കുകയാണ്. ഈ സമയത്തെല്ലാം, ഷാജി നിശബ്ദനാണെന്നോർക്കണം. കാരണം അവന്റെ തന്നെ പ്ലാൻ ആണ് ഡെയ്സിയുടെ ഈ ഇടപെടൽ.“ എല്ലാവരും ശ്രദ്ധയോടെ കേട്ടുകൊണ്ടിരിക്കുകയാണ്. ”തുടർന്ന്, 6. ആൽബിയെ ഒന്നു നിരീക്ഷിച്ച് റിപ്പോർട്ട് കൊടുക്കാനായി എന്നെ ഏല്പ്പിക്കുന്നു. വീണ്ടും ഷാജി പ്രത്യക്ഷപ്പെടുന്നു. ശരിയല്ലേ ആൽബി ? “ ”യെസ്! “ ”പിന്നീട് നടന്നത് ആൽബി പറഞ്ഞു. ഡെയ്സിയുടെ വീട്ടിൽ പോയതും, അവരുമായി ഒരു അഫയറിൽ അതവസാനിച്ചതും എല്ലാം. ഷാജി ഇത്തിരി മുൻപ് പറഞ്ഞതു പ്രകാരം,നിങ്ങൾ ശാരീരിക ബന്ധത്തിലേർപ്പെടുന്നത് അവർ ക്യാമറയിൽ പകർത്തിയിട്ടുണ്ടാകണം. ഇനി ഞാൻ എന്റെ ഒരു നിഗമനം പറയാൻ പോകുകയാണ്. മിക്കവാറും ഇതു തന്നെയായിരിക്കും നടന്നിട്ടുണ്ടാകുക. സ്വർണ്ണ കള്ളക്കടത്തു നടത്തുന്ന, ഷാജി ഇടിക്കുള എന്ന പേരിൽ അറിയപ്പെടുന്ന ഒരു വ്യക്തി. അയാൾക്ക് തുടരെത്തുടരെയുണ്ടാകുന്ന ക്രിമിനൽ കേസുകൾ കൈകാര്യം ചെയ്യാനായി ഒരു പോലീസ് ഉദ്യോഗസ്ഥൻ-ഒരു സർക്കിൾ ഇൻസ്പെക്ടർ- പോക്കറ്റിൽ വേണമെന്നാഗ്രഹിക്കുന്നു. ആൽബി ചിത്രത്തിൽ വരുന്നു. പണം കൊണ്ടോ മറ്റേതെങ്കിലും പ്രലോഭനത്തിലൂടെയോ ആൽബിയെ സ്വാധീനിക്കാനാകില്ല എന്നു തിരിച്ചറിഞ്ഞ അയാൾ ബ്ലാക്ക്മെയിലിങ്ങിലൂടെ ഇൻസ്പെക്ടറെ വരുതിയിലാക്കാമെന്നു തീരുമാനിക്കുന്നു. അതിനു വേണ്ടി ഒരവസരം നോക്കിയിരിക്കുമ്പോഴാണ് അയാൾക്ക് സാബു ഷൂട്ടിങ്ങിനെപ്പറ്റിയുള്ള ഒരു അറിവു കിട്ടുന്നത്. അവിടെ അന്ന് യഥാർത്ഥത്തിൽ നടന്നതെന്താണെന്ന് വെളിയിലായാൽ ആൽബി അപകടത്തിലാകുമെന്നറിയാവുന്ന അയാൾ, ആദ്യം ആ ഇൻഫർമേഷൻ വെച്ച് ആൽബിയെ ഭീഷണിപ്പെടുത്താൻ ശ്രമിക്കുന്നു. പക്ഷേ ആൽബി വഴങ്ങുന്നില്ല. അയാളുടെ കയ്യിൽ തെളിവുകളൊന്നുംതന്നെ ഉണ്ടാകാൻ വഴിയില്ല. അതുകൊണ്ടു തന്നെ മറ്റു വഴികളിലൂടെ വീണ്ടും അയാൾ ബ്ലാക്ക്മെയിലിങ്ങ് അറ്റംറ്റ് തുടരുന്നു.ഡെയ്സി സെബാസ്റ്റ്യൻ എന്ന മദാലസയായ സ്ത്രീയെ കാണിച്ച് ആൽബിയെ മയക്കി, ആ വഴിയിലൂടെ അയാൾ ശ്രമം തുടരുന്നു. പക്ഷേ അപ്പോഴും അയാളുടെ പ്രതീക്ഷകളെ തകിടം മറിച്ചുകൊണ്ടാണ് ആൽബി പെരുമാറിയത്. അവൻ ഡെയ്സിയെ കണ്ട് മടങ്ങുന്ന വഴിയിൽ, തന്റെ സുഹൃത്ത് അഡ്വൊക്കേറ്റ് ജയകുമാറുമായി സംസാരിച്ച് സകലതും തുറന്നു പറയുന്നു.അവിടം മുതലാണ് കേസ് കൈവിട്ടു പോയിത്തുടങ്ങിയത്. ഈ അഡ്വൊക്കേറ്റും ഡെയ്സിയുമായി മുൻപ് എന്തോ രഹസ്യ ബന്ധമുണ്ടായിരുന്നിരിക്കണം. ഒരു പക്ഷേ സെക്ഷ്വൽ. അങ്ങനെ തന്നെയായിരിക്കും അയാളെയും അവർ വരുതിക്കു നിർത്തിയിരുന്നത്. അവരുടെ കേസുകൾ കൈകാര്യം ചെയ്യാനായിട്ട് ഒരു പേഴ്സണൽ അഡ്വൊക്കേറ്റ്. അയാൾ എന്നെങ്കിലും ഇടം തിരിഞ്ഞു പോയാൽ ബ്ലാക്ക് മെയിൽ ചെയ്യാനായി ഡെയ്സി. അങ്ങനെയെന്തോ ഇടപാട്. ആൽബി ഡെയ്സിയുമായുണ്ടായത് പറഞ്ഞതോടെ വക്കീൽ അസ്വസ്ഥനാകുന്നു. തന്നെപ്പോലെ തന്നെ ആൽബിയും അപകടത്തിലേക്ക് പോകുകയാണെന്നു മനസ്സിലാക്കിയ അയാൾ, നേരെ ഡെയ്സിയെ ചെന്നു കാണുന്നു. ഒരു പക്ഷേ അവർ തമ്മിൽ തെറ്റുന്നു. അവരുടെ രഹസ്യങ്ങൾ വെളിപ്പെടുത്തുമെന്ന് ഭീഷണിപ്പെടുത്തുന്നു...ഇതൊക്കെ ഞാൻ ഊഹിക്കുന്നതാണ് കേട്ടോ... അതോടെ മറ്റു വഴിയില്ലാതെ ഷാജിയും കൂട്ടരും ജയനെ കൊലപ്പെടുത്തുന്നു. ഷാജിക്ക് അപ്രതീക്ഷിതമായുണ്ടായ അടി. പക്ഷേ എന്നിട്ടും അയാൾ നിർത്തുന്നില്ല. ഇനി എന്തായാലും ആൽബിയെ കീഴ്പ്പെടുത്തിയേ തീരൂ എന്നു തീരുമാനിക്കുന്ന അയാൾ അടുത്ത മാർഗ്ഗവുമായി ഇറങ്ങുന്നു. ഡ്രൈവറുടെ ആത്മഹത്യ. സൂയിസൈഡ് നോട്ടിൽ ആൽബിയുടെ പേരുണ്ട്. അതു വെച്ച് ബ്ലാക്ക്മെയിൽ ചെയ്യാനായി അടുത്ത ശ്രമം. പക്ഷേ അതും പരാജയപ്പെടുന്നു. അതിനിടയിൽ, ഡെയ്സി ഒരബദ്ധം കാണിക്കുന്നു. അവരുടെ സാമ്പർത്തിക ക്രമക്കേടു കണ്ടു പിടിച്ച സീ ഏ ക്കാരൻ അനന്തരാമയ്യർ അവളെ ഭീഷണിപ്പെടുത്തുന്നു. ആ ദേഷ്യത്തിൽ അവൾ അയാളെ കാറിടിച്ചു കൊലപ്പെടുത്തുന്നു. സ്വതവേ, എല്ലാതും വളരെ പ്ലാൻ ചെയ്ത് കൃത്യമായി ചെയ്യാറുള്ള ഷാജിക്ക് പറ്റിയ ഏറ്റവും വലിയ ചതി. എത്ര ശ്രമിച്ചാലും, അന്വേഷണം ഡെയ്സിയിലെത്തും എന്നയാൾക്കു മനസ്സിലായി. കാരണം അവളുടെ ശ്രദ്ധക്കുറവ്. ബെൻസ് കാർ. കാറിനു പുറകിൽ അവളുടെ കമ്പനി ലോഗോ... എല്ലാം കൊണ്ടും ഒരു ശുദ്ധ അബദ്ധം! ഷാജിക്ക് ഒരിക്കലും പൊറുക്കാനാകാത്ത ഗുരുതരമായൊരു തെറ്റ്. അയാൾ ചിന്തിക്കുന്നു, ഒരു വെടിക്ക് രണ്ടു പക്ഷിയെ വീഴ്ത്താൻ പറ്റിയ അവസരം! അയാൾ കൂട്ടാളികളെ അയക്കുന്നു. ഡെയ്സിയെ വകവരുത്തുന്നു. ആൽബി കുടുങ്ങുന്നു. പെർഫക്റ്റ് ക്രൈം! “ പോത്തൻ പറഞ്ഞു നിർത്തി. “ഹോ! വല്ലാത്ത ട്വിസ്റ്റുകൾ. തല കറങ്ങുന്നു.” എൽസി മാഡമാണത് പറഞ്ഞത്. “നിങ്ങൾക്കിതു കേൾക്കണ്ട വല്ല കാര്യോമൊണ്ടോ എൽസീ ? പോയി കിടക്കൂ.” പോത്തൻ മുഖം ചുളിച്ചുകൊണ്ടാണത് പറഞ്ഞത്. “അതെ! ഇനി കെടന്നാ ഉറക്കം വന്നതു തന്നെ ! നന്നായിട്ടുണ്ട്.” അവർ ഒരു കസേര വലിച്ചിട്ട് ഇരിപ്പുറപ്പിച്ചു. “കുറച്ചു കാര്യങ്ങളു കൂടി പറയട്ടെ, ഇയാൾ, ഈ ഷാജി എന്നു പറയുന്നവൻ, ഒരു സൈക്കോ ഒന്നുമല്ല. കൊലപാതകം ഒരു ഹരമായി കൊണ്ടു നടക്കുന്നവനല്ല ഇവൻ. യാതൊരു നിവൃത്തിയുമില്ലാതെ വരുമ്പോൾ മാത്രമാണ് ഇവൻ ഒരാളെ വകവരുത്തുക. കാരണം നമുക്ക് ചിന്തിച്ചാൽ തന്നെ അറിയാം, ഒരു സാധാരണ കുറ്റകൃത്യം പോലല്ല കൊലപാതകം. എത്രയൊക്കെ ശ്രമിച്ചാലും, എത്ര ബുദ്ധിപരമായി പ്ലാൻ ചെയ്താലും രക്ഷപെടാൻ ബുദ്ധിമുട്ടാണ്. കാരണം, ഒന്നോ രണ്ടോ പേരല്ല ഒരു കൊലപാതകമന്വേഷിക്കുക. നമ്മൾ കേരളാ പോലീസ് അത്ര നിസ്സാരക്കാരുമല്ല. എത്ര വൈകിയിട്ടാണെങ്കിലും, ഒരിക്കൽ നമ്മളവനെ പൊക്കിയിരിക്കും. അതുകൊണ്ടു തന്നെ വളരെ സൂക്ഷിച്ചായിരിക്കും അവന്റെ ഓരോ നീക്കവും.വളരെ ബുദ്ധിപരമായിരിക്കും അവനെടുക്കുന്ന ഓരോ തീരുമാനങ്ങളും. പക്ഷേ... എത്ര മിടുക്കനായാലും, ദാ ഇത്തിരിമുൻപ് പറ്റിയതു പോലുള്ള ഒരു ചെറിയ ഇൻസിഗ്നിഫിക്കന്റ് വാക്ക് മതി എല്ലാം തകർന്നു തരിപ്പണമാകാൻ.“ “എന്റെ ഫാമിലിയെ വെച്ചാണ് അവൻ വിലപേശുന്നത്.” ആൽബിയുടെ സ്വരം ദുർബലമായിരുന്നു. “ഇനിയും ഞാനിവിടെ കണ്ടിന്യൂ ചെയ്താൽ ഒരുപക്ഷേ-” “ഓക്കേ! ഇനി നമുക്ക് ഷാജി ആരാണെന്ന് നോക്കാം.” പോത്തൻ ആൽബിയെ പൂർത്തിയാക്കാനനുവദിച്ചില്ല. “ആൽബിക്കേ അതു പറയാനൊക്കൂ. അതുകൊണ്ട് ഞാൻ നേരത്തെ ചോദിച്ച കാര്യം ആലോചിച്ചു നോക്കൂ.” “എന്റെ കുടുംബവുമായി ക്ലോസായിട്ടുള്ളവർ...” ആൽബി തന്റെ കയ്യിലിരുന്ന ശൂന്യമായ പേപ്പറിലേക്കു നോക്കി. പോത്തന്റെ സംസാരം കേട്ടിരുന്നതിനിടക്ക് അവന് ചിന്തിക്കാൻ പോലും സമയം കീട്ടിയിരുന്നില്ല. “ബന്ധുക്കളുമായിട്ടെങ്ങനാണ് ? ” എൽസിയാണത് ചോദിച്ചത്. “പ്രത്യേകിച്ച്, ഇൻലോസുമായിട്ടൊക്കെ എങ്ങനാ ? ” “പറയത്തക്ക ബന്ധുക്കളൊന്നുമില്ല മാഡം. ആരുമായിട്ടും അങ്ങനെ ക്ലോസല്ല. യൂ സീ, എന്നെ കല്യാണം കഴിക്കുന്നതിനു മുൻപ്, ആൻസിയുടെ പേര് ശ്രീദേവി എന്നായിരുന്നു. ശ്രീദേവി നമ്പ്യാർ. ബാക്കി നിങ്ങൾക്കൂഹിക്കാമല്ലോ.” “ഇന്റെറസ്റ്റിങ്ങ്...” പിറുപിറുത്തുകൊണ്ട് പോത്തൻ കസേരയിലിരുന്നു. “സോ, താൻ ആൻസിയെ അടിച്ചു മാറ്റിക്കൊണ്ടു വന്ന് മതം മാറ്റിയെടുത്തതാണ്. വെരി ഇന്ററസ്റ്റിങ്ങ്...” “നിങ്ങൾ കരുതുന്നതെന്താണെന്നെനിക്കു മനസ്സിലാകും. പക്ഷേ അവളുടെ ഫാമിലിക്ക് ഇതിലൊക്കെ എന്തെങ്കിലും പങ്കുണ്ടായിരിക്കുമെന്ന് ചിന്തിക്കുന്നതു തന്നെ മണ്ടത്തരമാണ്.കോളേജിൽ പഠിക്കുന്ന കാലം മുതലേ എനിക്കറിയാവുന്നതാണ് ആൻസിയെ. ഒരു തനി നാട്ടിൻപുറത്തുകാരി. ആകെ ആ കുടുംബത്തിൽ ഒരല്പ്പമെങ്കിലും തണ്ടും തടിയുമുള്ളത് അവളുടെ ആങ്ങളക്കാണ്. പക്ഷേ അവൻ ദുബായിലാണ്. എന്നോടവന് ഇഷ്ടക്കുറവുണ്ടായിരുന്നു. ശരിയാണ്. പക്ഷേ അതൊക്കെ ആദ്യത്തെ ഒരു വർഷം കൊണ്ടു തന്നെ മാറി. ഞങ്ങൾ പിന്നീട് പലപ്പോഴും സംസാരിച്ചിട്ടുണ്ട്. ഈയടുത്ത് സാബു കേസ് വന്നതിനു ശേഷം, ഞാൻ അവരെയൊക്കെ വീട്ടിലേക്ക് വിളിക്കുകയുമുണ്ടായിട്ടുണ്ട്.“ പോത്തന്റെ മുഖം തെളിഞ്ഞില്ല. “ഇനി അഥവാ, അവൻ തന്നെയാണ് ഷാജി എങ്കിൽ, ഒരിക്കലും അവൻ അവളെ ആൻസിക്കുട്ടി എന്നു സംബോധന ചെയ്യില്ല. അവന് അവളെ ഇപ്പോഴും ‘ദേവി’ എന്നു തന്നെയാണ് വിളിക്കാറ്.” “ഓ... ദാറ്റ്സ് എ ഗുഡ് പോയിന്റ്! ” പോത്തൻ ഒന്നു ചിരിച്ചു. “കണ്ടോ, പോത്തന്റെ കൂടെ കൂടി ആൽബി സാറിന്റെ ബ്രെയിൻ കൊറേശേ വർക്കു ചെയ്തു തുടങ്ങി.” “പിന്നെ, അവളെ അങ്ങനെ വിളിക്കുന്നത് എന്റെ സുഹൃത്തുക്കളാണ്. പക്ഷേ എനിക്കങ്ങനെ അധികം സുഹൃത്തുക്കളില്ലെന്നറിയാമല്ലോ. ആകെ ഉണ്ടായിരുന്ന ക്ലോസ് ഫ്രണ്ട്... ” ആൽബിയുടെ തൊണ്ടയിടറി. “പിന്നെ കുറേ അയൽപക്കക്കാരുണ്ട്. ഞാനുമായിട്ടങ്ങനെ ക്ലോസല്ലെങ്കിലും, ആൻസിയുമായി അവർക്കൊക്കെ നല്ല കണക്ഷനാണ്. ഈ അസോസിയേഷനും മറ്റുമൊക്കെയായി.” “ഓക്കെ! ” പോത്തൻ മുഖമൊന്നമർത്തിത്തുടച്ചു. “ഞാനൊരു കാര്യം പറയാം. 100% ഉറപ്പൊന്നും ഞാൻ പറയില്ല. പക്ഷേ കേട്ടു നോക്ക്. ഈ ഷാജി ഇടിക്കുള എന്ന കഥാപാത്രം, തന്റെ വീടിരിക്കുന്ന ആ റെസിഡൻഷ്യൽ കോമ്പ്ലക്സിൽ തന്നെയാണ് താമസം! താനുമായി... തന്റെ കുടുംബവുമായി വളരെയേറെ അടുപ്പമുള്ള ഒരു ‘നല്ല’ അയല്ക്കാരൻ! ” “വാട്ട്! ” ആൽബി നിവർന്നിരുന്നു. “ഷാജിയുടെ കോൾ വന്ന ടവർ, അതുപോലെ, തന്റെ ഭാര്യയെയും മോളെയും സംബോധന ചെയ്ത രീതി... പിന്നെ, എന്റെ രൂപേഷ് മോൻ പറഞ്ഞത് ശരിയാണെങ്കിൽ, ശബ്ദം മാറ്റി തന്നെ വിളിക്കണ്ട ആവശ്യമെന്താണ് ? ആലോചിച്ചേ... നീ കേട്ടാൽ തിരിച്ചറിയുന്ന സ്വരമാണയാൾക്ക്! ഇനി ആൽബി സാറ് പോയിരുന്ന് നന്നായിട്ടൊന്ന് ആലോചിക്ക് ! ” പോത്തന്റെ കണ്ണുകൾ തിളങ്ങുന്നുണ്ടായിരുന്നു. ആൽബിയുടെ മനസ്സിൽ തന്റെ അയല്പക്കക്കാർ ഓരോരുത്തരുടേയും മുഖം മിന്നിമറഞ്ഞു. ഏതാണ്ട് 10 മിനിട്ടോളം ആരും ഒന്നും സംസാരിച്ചില്ല. എല്ലാവരും ആൽബിയുടെ മുഖത്തേക്കു തന്നെ സൂക്ഷിച്ചു നോക്കിക്കൊണ്ടിരുന്നു. പതിയെ പതിയെ അവന്റെ മുഖം തെളിഞ്ഞു വന്നു. കണ്ണുകൾ പതിയെ പ്രകാശം വീണ്ടെടുത്തു. അവിശ്വസനീയതയും, ദേഷ്യവും, പകയുമെല്ലാം കൂടിക്കലർന്ന ഒരു വല്ലാത്ത ഭാവമായിരുന്നു അവന്റെ മുഖത്ത്. പെട്ടെന്ന്! ഫോൺ ബെല്ലടിക്കാൻ തുടങ്ങി. “അവൻ തന്നെയാ! ഷാജി! എടുത്തോളൂ.” രൂപേഷ് ലാപ്ടോപ്പ് സ്ക്രീനിൽ നോക്കി പറഞ്ഞു. “ഹലോ! ” ഒരു കടുവ മുരളുന്നതു പോലെയായിരുന്നു ആൽബിയുടെ സ്വരം. “നീ ഇനിയും എന്റെ ക്ഷമ പരീക്ഷിക്കുവാണോ സർക്കിളേ ? ഇതുവരെ നീ ആ കോപ്പന്റെ വീട്ടീന്നെറങ്ങീല്ലേ ? എന്നെക്കൊണ്ട് നീ ഇനീം വേണ്ടാതീനം ചെയ്യിപ്പിക്കുവോ ? ” “ഷാജീ...” ഒരു പുഞ്ചിരി തെളിഞ്ഞിരുന്നു ആൽബിയുടെ മുഖത്ത്. “എനിക്കങ്ങനെ പെട്ടെന്നിവിടുന്നിറങ്ങാനാകില്ലല്ലോ ഷാജീ...” ആത്മവിശ്വാസത്തോടെയുള്ള തന്റെ സ്വരം കേട്ടതും, അപ്പുറത്തെ പരിഭ്രാന്തി ആൽബി തിരിച്ചറിഞ്ഞു. അവന്റെ പുഞ്ചിരി അൽപ്പം കൂടി തെളിഞ്ഞു. “നിനക്കറിയാമോ, അൽപ്പം മുൻപ് മിസ്റ്റർ പോത്തൻ ഒരു കാര്യം പറഞ്ഞു. നാളെ നേരം പുലരും മുൻപ് നീയാരാണെന്ന് കണ്ടുപിടിച്ച് തരാമെന്ന്. സോ... ഞാൻ വെയ്റ്റ് ചെയ്തു ഷാജി. ക്ഷമയോടെ, ഓരോ കൊച്ചു കൊച്ചു ഡീറ്റയിലുകളും അനലൈസ് ചെയ്ത് ഞങ്ങൾ ഒരിത്തിരി മെനക്കെടാൻ തന്നെ തീരുമാനിച്ചു. ക്ഷമിക്കണം. നേരം വെളുത്താലുടൻ ഇവിടുന്നിറങ്ങിക്കോളാം. എന്താ ? ” “പന്നക്കഴുവേറീ! ” ഒരലർച്ചയുടെ സ്വരത്തിലായിരുന്നു മറുപടി. ” നിനക്കു കുഞ്ഞുകളിക്കാൻ പറ്റിയ പാർട്ടിയല്ല ഞാൻ! കുടുംബത്തോടെ തീർത്തുകളയും! നിനക്കറിയില്ല ഷാജിയെ! .” “അവിടെയാണ് നിനക്ക് തെറ്റിയത് മോനേ ഷാജി... എനിക്കറിയില്ലായിരുന്നു നിന്നെ ശരിയാണ്... അൽപ്പം മുൻപു വരെ ഷാജി ഇടിക്കുള എന്ന ഭീരുവിനെ എനിക്കറിയില്ലായിരുന്നു.. പക്ഷേ, ഇപ്പോ അങ്ങനെയല്ല. നീയാരാണെന്നും, എവിടെ വന്നാൽ നിന്നെ പൊക്കാമെന്നും ഒക്കെ ഇപ്പോ എനിക്കറിയാം.“ അതു കേട്ടതും, പോത്തന്റെ മുഖം തെളിഞ്ഞു. അയാൾ തന്റെ സഹപ്രവർത്തകരെ നോക്കി ഒരു ചിരി ചിരിച്ചു. വിജയശ്രീലാളിതനായ ഒരുവന്റെ ചിരി! തുടരും കണ്ണൂർകാരൻ ❤️❤️❤️❤️ #📔 കഥ #📚 ട്വിസ്റ്റ് കഥകൾ #📙 നോവൽ #💞 പ്രണയകഥകൾ #✍ തുടർക്കഥ