51അയലത്തെ അമ്പിളി തിരികെ വീട്ടിലേക്കുള്ള യാത്രയിൽ ആയിരുന്നു രുഗ്മിണി അമ്മയും മകളും മരുമകനും. " നിന്റെ കൂടെ ഞങ്ങൾ വരുമെന്ന് നിന്നോട് ആര് പറഞ്ഞു? നീ സ്വയം അതങ്ങു തീരുമാനിച്ചാൽ മതിയോ? " രുഗ്മിണി അമ്മ മുന്നിൽ കോ ഡ്രൈവർ സീറ്റിൽ ഇരിക്കുന്ന മകളെ നോക്കി. അതും നല്ല ദേഷ്യത്തിൽ തന്നെ.... " പിന്നെ എന്താ അമ്മേടെ ഉദ്ദേശം? ഇനിയും വീട്ടു ജോലിക്ക് പോകാനാണോ? എനിക്ക് അത് ഇഷ്ടമല്ല. എത്ര നാളായി ഞാൻ ഇത് പറയുന്നു? " ശ്വേതയും ദേഷ്യത്തിൽ തന്നെ തിരിഞ്ഞു നോക്കി. " ഇപ്പോ നിനക്കത് കുറച്ചിൽ ആണല്ലേ? നീയും നിന്റെ അനിയത്തിയും വലിയ ജോലിക്കാരായത് കൂലിപ്പണിയും അടുക്കളപ്പണിയും ഒക്കെ എടുത്തു ഞാനും നിന്റെ അച്ഛനും കൂടി ഉണ്ടാക്കിയ പൈസ കൊണ്ടാണെന്ന് എന്റെ മോള് മറന്ന് പോകരുത്. " രുഗ്മിണിയമ്മയുടെ ഒച്ച ഉയർന്നു. " അത് ഓർമ്മ ഉള്ളത് കൊണ്ടാ ഈ വയസ്സ് കാലത്ത് ജോലിക്ക് ഒന്നും വിടാതെ നിങ്ങളെ രണ്ടാളെയും നോക്കി കൊള്ളാമെന്ന് ഞങ്ങൾ പറയുന്നത്. അതെന്താ അമ്മക്ക് മനസ്സിലാവാത്തത്? നിങ്ങൾ സന്തോഷമായിട്ട് ഇരിക്കണമെന്നേ ഞങ്ങൾക്ക് ഉള്ളൂ. " ശ്വേതയും തിരിച്ചടിച്ചു. " ഞങ്ങടെ സന്തോഷം ഇവിടെ, ഞങ്ങൾ ജനിച്ച് വളർന്ന ഈ നാട്ടിൽ കഴിയണത് ആണെങ്കിലോ? " " അതെന്താ? എന്നേം ശുഭയേം നിങ്ങൾ എഴുതി തള്ളിയോ? " ശ്വേതക്ക് ദേഷ്യം വന്നു. രുഗ്മിണിയമ്മ ഒന്നും മിണ്ടിയില്ല. ശ്വേത ഒരു നെടുവീർപ്പോടെ തിരിഞ്ഞിരുന്നു. " കഴിഞ്ഞ മാസം ശുഭ ഒന്ന് അടുക്കളയിൽ വീണിരുന്നു. " അങ്ങനെയേ ഇരുന്ന് കൊണ്ട് ശ്വേത പറഞ്ഞു. രുഗ്മിണിയമ്മ ഞെട്ടി. " ഈശ്വരാ.... എന്നിട്ട്.... എന്നിട്ടെന്റെ കുഞ്ഞിന് എന്തെങ്കിലും പറ്റിയോടി? " അവരൊരു ഏക്കത്തോടെ മുന്നോട്ട് ആഞ്ഞിരുന്നു. ശ്വേതയും ശുഭയും അടുത്തടുത്ത ഫ്ലാറ്റുകളിൽ ആണ് താമസം. ശ്വേതയുടെ ഭർത്താവിനും ശുഭയുടെ ഭർത്താവിനും ഒരേ കമ്പനിയിലാണ് ജോലി. വിദേശത്ത് ആണെങ്കിലും അവർ ഇരുവരും ഒരുമിച്ചു ആണല്ലോ എന്നൊരു ആശ്വാസം ഉണ്ട് രുഗ്മിണി അമ്മയ്ക്കും ഭർത്താവിനും. ശുഭ രണ്ടാമത്തെ കുഞ്ഞിനെ ഗർഭിണി ആണ്. ഇപ്പൊ ആറ് മാസം കഴിഞ്ഞിട്ടുണ്ട്. മൂത്ത കുട്ടിക്ക് ആറ് വയസ്സാക്കുന്നു. അപ്പുമോളുടെ പ്രായം.... ആറ് മാസം ആയ ഗർഭിണി വീണു എന്ന് കേട്ടാൽ രുഗ്മിണി അമ്മക്ക് എങ്ങനെ ആശ്വാസം തോന്നാനാണ്? അവർക്ക് വല്ലാത്ത വെപ്രാളം തോന്നി. " കുഞ്ഞിന് ഒന്നും പറ്റിയില്ല. പക്ഷെ ചെറിയ ഒരു കുഴപ്പം ഉണ്ട്. വളരെ സൂക്ഷിക്കണം എന്നാ ഡോക്ടർ പറഞ്ഞത്. പ്രസവം വരെ റസ്റ്റ്‌ വേണം. ഒരു ജോലിക്കാരിയെ ഏർപ്പാട് ചെയ്തിരുന്നു. ആര് നോക്കിയാലും നമ്മൾ നോക്കുന്നത് പോലെ ആവോ അമ്മാ? ആദിയെ ഗർഭിണി ആയിരുന്നപ്പോ എനിക്കും ഇത് പോലെ പറ്റിയതല്ലേ? അന്ന് ഞാൻ നാട്ടിൽ ആയിരുന്നോണ്ട് എന്റെ എല്ലാ കാര്യങ്ങളും നോക്കാൻ അമ്മ ഉണ്ടായിരുന്നു. ഇപ്പഴോ? എനിക്ക് ലീവ് എടുത്തു നിന്ന് അവളെ നോക്കാൻ പറ്റോ? ജോലിക്ക് പോണ്ടേ? അതാ അമ്മേ കൂടെ കൊണ്ട് പോകാന്നു കരുതിയത്. വീട്ടിലെ എല്ലാ ജോലിക്കും ആള് വരും. അച്ഛനെ നോക്കാനും ആരേലും ഏർപ്പാടാക്കാം. അമ്മ അവളുടെ കാര്യം മാത്രം നോക്കിയാ മതി. അങ്ങനെ വിചാരിച്ചാ ഞങ്ങള്..... അമ്മക്ക് പക്ഷെ ഞങ്ങളെ കാട്ടിലും വലുത് രുദ്രേട്ടനും കുഞ്ഞും ആണെന്ന് ഞാൻ അറിഞ്ഞില്ലല്ലോ? " പരിഭവത്തോടെ ആണ് ശ്വേത പറഞ്ഞു നിർത്തിയത്. " കൊച്ചിന് വയ്യാതായിട്ട് നീ എന്നോട് പറഞ്ഞോ? അവള് പോലും പറഞ്ഞില്ലല്ലോ? " രുഗ്മിണിയമ്മക്ക് ദേഷ്യമോ സങ്കടമോ ഒക്കെ തോന്നി. മകൾക്ക് നൊന്താൽ അമ്മക്ക് നോവാതിരിക്കുമോ? " അമ്മക്ക് സങ്കടം ആവണ്ട എന്ന് കരുതിയാ പറയാതിരുന്നത്. " " നിങ്ങടെ കൂടെ ഞാൻ വരാം മക്കളേ... ഇനി ശുഭയെ കാണാതെ എനിക്കൊരു സമാധാനവും കിട്ടില്ല. " ഇത്തവണ സമ്മതം പറയാൻ രുഗ്മിണി അമ്മക്ക് ഒന്ന് കൂടി ആലോചിക്കേണ്ടി വന്നതേയില്ല. രുദ്രന്റെയോ അപ്പുവിന്റെയോ കാര്യം അന്നേരം അവർ ഓർത്തതുമില്ല 🌜 രാവിലെ രുദ്രൻ ഉണർന്നത് വല്ലാത്തൊരു മടുപ്പോടെയാണ്. ഇന്നലെ ഓരോന്നൊക്കെ ചിന്തിച്ചു കിടന്ന് ഉറങ്ങിയത് തന്നെ വളരെ വൈകിയാണ്. രുഗ്മിണിയമ്മ പോയാൽ എല്ലാം അവതാളത്തിൽ ആകുമല്ലോ എന്നുള്ള ചിന്ത അവന്റെ ഉറക്കത്തെ ഏറെകുറേ അപഹരിച്ചു കളഞ്ഞിരുന്നു.. ഒന്ന് തൊഴുതു പ്രാർത്ഥിച്ചു കണ്ണും തിരുമ്മി ബെഡിൽ എഴുന്നേറ്റിരുന്നു രുദ്രൻ. അപ്പോഴും ചരിഞ്ഞു കിടന്ന് ഉറങ്ങുന്ന അപ്പുവിനെ ഒന്ന് നോക്കി അവൻ കൈ എത്തിച്ചു ടേബിളിന് മുകളിൽ ഇരുന്ന മൊബൈൽ കയ്യിൽ എടുത്തു. ഒരു മിസ്സ്ഡ് കാൾ വന്ന് കിടപ്പുണ്ട്. അമ്പിളിയാണ്. അവൻ ഉടനെ തന്നെ തിരികെ വിളിച്ചു. " രുദ്രേട്ടാ ഇപ്പൊ എണീറ്റെ ഉള്ളോ? " " ഹ്മ്മ്... ഉറങ്ങിപ്പോയെടി.... " രുദ്രൻ ഒന്ന് കൊട്ടുവായിട്ടു. ഉറക്കം ശെരിയാകാത്തത് കൊണ്ടാകും ആകെ ഒരു കിറുക്കം. " അപ്പൂസ് എണീറ്റില്ലേ? " രണ്ട് മൂന്ന് വട്ടം ആശുപത്രിയിൽ പോയപ്പോ രുദ്രൻ അപ്പുവിനെയും ഒപ്പം കൂട്ടിയിരുന്നു. മൂന്നോ നാലോ വട്ടമേ കണ്ടിട്ടുള്ളൂ എങ്കിലും ആ സമയത്തിനുള്ളിൽ അപ്പുവും അമ്പിളിയും തമ്മിൽ നല്ല കൂട്ടായിട്ടുണ്ട്. രുദ്രനെ എപ്പോൾ വിളിച്ചാലും കണ്ടാലും അമ്പിളി ഇപ്പോൾ ആദ്യം അന്വേഷിക്കുന്നത് അപ്പുവിനെയാണ്. " ഇല്ല. അവൾ ഉറക്കവാ. രാവിലത്തേക്ക് കാപ്പിയും ഉച്ചയ്ക്കുള്ള ചോറും കറിയും ഒക്കെ ഉണ്ടാക്കി വച്ചിട്ട് വേണം അവളെ വിളിക്കാൻ. ഉണർന്നാൽ പിന്നേ എന്നെ ഒന്നും ചെയ്യാൻ സമ്മതിക്കില്ല അവള്. അല്ല നീയെന്താ രാവിലെ വിളിച്ചത്? " " ഇന്നലെ രാത്രി നോക്കാൻ വന്നപ്പോ വൈദ്യര് പറഞ്ഞു ഇന്ന് വീട്ടിൽ പൊക്കോളാൻ. ഇനി ഒരു രണ്ട് മാസം കഴിഞ്ഞു ഉഴിച്ചിലോ പിഴിച്ചിലോ എന്തൊക്കെയോ ഉണ്ട്. അപ്പോ വന്നാൽ മതിയെന്ന്. " " ആഹാ... അത് എന്തായാലും നന്നായി. എത്ര നാള് കൊണ്ട് അവിടെ കിടക്കുന്നതാ? നീ ഇങ്ങോട്ട് തന്നല്ലേ വരുന്നത്? " " മ്മ്.... " അമ്പിളി ശക്തി ഇല്ലാതെ ഒന്ന് മൂളി. " എന്താ അമ്പിളി? അച്ഛനല്ലേ? എന്തിനാ നിനക്ക് ഇത്രേം പിണക്കം? " എത്ര ചോദിച്ചിട്ടും അവൾ അത് മാത്രമാണ് പറയാത്തത്. മാമനോടുള്ള പിണക്കത്തിന്റെ കാരണം.... " അതൊന്നും ഇല്ല രുദ്രേട്ടാ. ഞാൻ അങ്ങോട്ട് തന്നെയാ വരുന്നത്. " അതേക്കുറിച്ച് കൂടുതൽ സംസാരിക്കാൻ താല്പര്യം ഇല്ലാത്തത് പോലെ അമ്പിളി പെട്ടെന്ന് പറഞ്ഞു. " ഞാനേ അപ്പുവിനെ സ്കൂളിൽ വിട്ടിട്ട് അങ്ങോട്ട് വരാം. അപ്പോഴല്ലേ ഡിസ്ചാജിന്റെ കാര്യങ്ങൾ ഒക്കെ റെഡിയാകൂ.? " " രുദ്രേട്ടൻ രാവിലെ ഓടിപ്പിടിച്ചു വരുവൊന്നും വേണ്ട. വിഷ്ണുവേട്ടൻ വരും. ആംബുലൻസ് ഒക്കെ ഇവര് തന്നെ ഏർപ്പാട് ചെയ്തു തരും. രുദ്രേട്ടനോട് ഞാൻ ഇതൊന്ന് പറയാൻ വേണ്ടി വിളിച്ചെന്നെ ഉള്ളൂ. " " ഹ്മ്മ്. എന്നാൽ ശരി. എന്തെങ്കിലും ആവശ്യം ഉണ്ടെങ്കിൽ നീ വിളിക്ക്. " രുദ്രൻ കാൾ കട്ടാക്കി. ബാത്ത് റൂമിൽ കയറി ഒന്ന് ഫ്രഷ് ആയി അവൻ അടുക്കളയിലേക്ക് നടന്നു. ദോശയും ചമ്മന്തിയും ഉണ്ടാക്കി, തലേന്ന് റൈസ് കുക്കറിൽ വച്ചിരുന്ന അരി ഏതാണ്ട് വെന്തിരിപ്പുണ്ട്. അത് ഒന്ന് കൂടി തിളപ്പിച്ച്‌ വെള്ളം വാർത്തു എടുത്തു. ഒരു മെഴുക്കു വരട്ടിയും ഉണ്ടാക്കി കഴിഞ്ഞപ്പോഴേക്കും അപ്പു ഉണർന്നു. പിന്നീട് അവളെ ഒന്ന് അടക്കി ഇരുത്തി, ഒരു ഒഴിക്കാനും ഉണ്ടാക്കി പപ്പടവും വറുത്തെടുക്കാൻ രുദ്രന് കുറച്ചു കഷ്ടപ്പെടേണ്ടി വന്നു. വല്ല വിധേനെയും അപ്പുവിനെ കുളിപ്പിച്ച് ഒരുക്കി ടിഫിനും ലഞ്ചും ബാഗിലാക്കി രുദ്രനും തയ്യാറായി ഇറങ്ങുമ്പോഴേക്കും മണി ഒൻപത് കഴിഞ്ഞിരുന്നു. രുഗ്മിണി അമ്മ ഇല്ലാതായാൽ തന്റെ കാര്യം ഏതാണ്ട് അവതാളത്തിൽ ആകുമെന്ന് രുദ്രൻ അതോടെ ഉറപ്പിച്ചു. 🌜 സ്മിതയുടെ കാർ ശ്രീധരന്റെ വീടിന്റെ ഗേറ്റിനു മുന്നിൽ വന്നു നിൽക്കുമ്പോൾ സമയം ഉച്ചയോട് അടുത്തിരുന്നു. ഡ്രൈവർ ഇറങ്ങി വന്ന് പിന്നിലെ ഡോർ തുറന്നു കൊടുക്കുന്നത് വരെയും കാവ്യ അനങ്ങിയില്ല. കാവ്യ പുറത്തേക്കിറങ്ങിയതും ഡ്രൈവർ ഒന്നും മിണ്ടാതെ കാറിലേക്ക് കയറി ഓടിച്ചു പോയി. ഗേറ്റിന്റെ അഴികൾക്ക് ഇടയിലൂടെ കാണുന്ന ഒറ്റനില വീട്ടിലേക്ക് നോക്കി ബാഗും നെഞ്ചിലേക്ക് ചേർത്ത് പിടിച്ചു കാവ്യ അങ്ങനെയേ നിന്നു. 🌜 🌜 🌜 🌜 🌜 കാവ്യ ലാൻഡഡ്. ശ്രീധരൻ അവളെ ഇറക്കി വിടുമോ? അതോ 🫣 #📙 നോവൽ #💞 പ്രണയകഥകൾ #📚 ട്വിസ്റ്റ് കഥകൾ #📔 കഥ #✍ തുടർക്കഥ