സോറി മേഡം. ഇനിയും ഇതുപോലെ തുടരാൻ ആണെങ്കിൽ ഞങ്ങൾക്ക് ബുദ്ധിമുട്ടുണ്ട്. നിങ്ങൾ മറ്റൊരു സ്കൂൾ നോക്കുന്നത് തന്നെയാണ് നല്ലത്. " ഓഫീസ് മുറിയിൽ മുഴങ്ങി കേൾക്കുന്ന ശബ്ദത്തിന് മുന്നിൽ ഇനി എന്ത് പറയണമെന്നറിയാതെ അവൾ ഇരുന്നു. " ഇങ്ങനെ ഒന്നും പറയാതെ ഇരുന്നാൽ എങ്ങനെയാണ്. ഇത് ആദ്യമായിട്ട് അല്ലല്ലോ ഞാൻ ഇതേ കാര്യം പറയുന്നതും മേഡം ഇങ്ങനെ കേട്ട് നിക്കുന്നതും. ഇത്രയും നാൾ കുട്ടികളോട് ആയിരുന്നെങ്കിൽ ഇപ്പോൾ ദേ പഠിപ്പിക്കുന്ന ടീച്ചറിനെ ചോക്ക് എടുത്ത് എറിഞ്ഞിരിക്കുന്നു. ഇങ്ങനെ ആണോ ഒരു കുട്ടി പെരുമാറേണ്ടത്. " " മാം അത്.. ഈ ഒരു വട്ടം കൂടി.. " " റിയലി സോറി മേഡം. ഇനി ആദ്യയെ ഈ സ്കൂളിൽ പഠിപ്പിക്കാൻ കഴിയില്ല. യുകെജിയിൽ പഠിക്കുന്ന ഒരു കുട്ടിയുടെ വികൃതി ഞങ്ങൾക്ക് മനസിലാവും. പക്ഷെ ഇത്.... ഇപ്പോഴേ ഇങ്ങനെ ആണെങ്കിൽ ഇനി മുന്നോട്ട് പോകുമ്പോൾ ഈ കുട്ടി എങ്ങനെ ആയിരിക്കും. അതുകൊണ്ട് ഞങ്ങളുടെ സ്കൂളിന്റെ നിലവാരം കളയാൻ ഞങ്ങൾക്ക് ഒട്ടും താല്പര്യം ഇല്ല. മേഡം കുട്ടിയുമായി മെയിൻ ബ്ലോക്കിൽ ചെന്നാൽ മതി. പേപ്പേഴ്സ് എല്ലാം അവിടെ റെഡി ആണ്. " ഇനി പറഞ്ഞിട്ട് ഒരു കാര്യവും ഇല്ലെന്ന് അവൾക്ക് മനസിലായി. മുന്നിൽ ഇരിക്കുന്ന പ്രിൻസിപ്പലിന്റെയും ഒപ്പം നിൽക്കുന്ന അധ്യാപികയുടെ മുഖത്തുനിന്ന് അത് വ്യക്തമാണ്. അവരെ ഒന്ന് നോക്കി അവൾ മടിയിലിരുന്ന ഹാൻഡ് ബാഗ് എടുത്ത് തോളിൽ ഇട്ട് ഓഫീസ് റൂമിന്റെ പുറത്തേക്ക് നടന്നു. അവളെ കാത്ത് ഒരാൾ അവിടെ രണ്ട് കൈയും കെട്ടി നിൽക്കുന്നുണ്ട്. രാവിലെ ഇട്ട് കൊണ്ട് വന്ന വെള്ള യൂണിഫോമിന്റെ കളർ ഉച്ച ആയപ്പോഴേ മഞ്ഞ ആയിട്ടുണ്ട്. രണ്ട് സൈഡിലും റിബൺ ഇട്ട് കെട്ടിയ മുടിയിൽ ഒരെണ്ണം അഴിഞ്ഞു തോളിലേക്ക് കിടക്കുന്നു. ഒരെണ്ണം കാണാനും ഇല്ല. " അമ്മ എന്റെ ചൗന്ദര്യം നോക്കുവാനോ. " " ചൗന്ദര്യം... എന്നെകൊണ്ട് ഒന്നും പറയിപ്പിക്കരുത് ആദി നീ... വാ ഇവിടെ കിട്ടാൻ ഉള്ളതെല്ലാം വാങ്ങി വീട്ടിൽ പോകാം. " ആ പൂച്ചക്കണ്ണിൽ നോക്കി അവൾ അത്രയും പറഞ്ഞു മുന്നോട്ട് നടന്നു. തൊട്ട് പിറകെ ബാർബിഡോളിന്റെ ബാഗ് തൂക്കി ആദിയും. മെയിൻ ബ്ലോക്കിൽ ചെന്ന് പേപ്പേഴ്സ് എല്ലാം വാങ്ങി അവർ രണ്ട് പേരും സ്കൂളിന്റെ മുന്നിലെ ബസ് സ്റ്റോപ്പിലേക്ക് വന്നിരുന്നു. തന്നോട് ഒരു വാക്ക് പോലും പറയാതെ റോഡിലേക്ക് നോക്കി ഇരിക്കുന്ന അമ്മയെ ആദി ഇടം കണ്ണിട്ട് നോക്കി. അവസാനം രണ്ട് പേരുടെയും നടുവിൽ ഇരുന്ന ബാഗെടുത്ത് മാറ്റി അവൾ അമ്മയോട് ചേർന്നിരുന്നു. " എന്നെ ആരും ഒട്ടി ഇരിക്കേണ്ട. " " അമ്മേ.. " " ആദി.. ഞാൻ എത്ര വട്ടം പറഞ്ഞിട്ടുണ്ട് ക്ലാസ്സിൽ എങ്ങനെയാ പെരുമാറേണ്ടതെന്ന്. ഇത്രയും നാൾ പിള്ളേരുമായിട്ടുള്ള പ്രശ്നങ്ങൾ ആയിരുന്നു. ഇപ്പോൾ ദേ.. ആ ദിവ്യ ടീച്ചറിനെ നീ ചോക്കെടുത്തെറിഞ്ഞോ. " " മ്മ്... എന്നെ പോക്കിരിന്ന് വിലിച്ചിറ്റാ. " " എന്റെ കുഞ്ഞേ.. നിന്നെ കൊണ്ട് ഞാൻ തോറ്റു. നേരത്തെ പിള്ളേരെ അടിക്കുവേം പിച്ചുവേം ഒക്കെ ആരുന്നു. ഇപ്പോൾ ദേ ടീച്ചറിനെ ആയി. പിന്നെങ്ങനെയാ അവര് പറഞ്ഞു വിടാതിരിക്കുന്നത്. " " എന്നെ പറഞ്ഞു വിറ്റൊ. ഇനി അപ്പോ എനിച്ച് സൂലിൽ പോന്റെ... " " എന്തൊരു സന്തോഷം... ഇനി അവിടേക്ക് പോകേണ്ടി വരില്ല. അതാ ഇപ്പോൾ വാങ്ങി കൊണ്ട് വന്ന പേപ്പർ എല്ലാം. ഇനി വേറെ വല്ല സ്കൂളും നോക്കണം. " " എന്റിനാ അമ്മേ ഈ സൂലൊക്കെ. നാൻ വീട്ടിൽ ഇരുന്ന് പച്ചോളാം. " " നിന്നെ ഞാൻ വീട്ടിൽ ഇരുത്തിക്കാം. ആദ്യം തല്ലി പൊളിക്കേണ്ടത് ആ ടീവിയാ. അതിൽ ഓരോന്ന് കണ്ട് സ്കൂളിൽ പോയി കാണിക്കും. കഴിഞ്ഞ ദിവസം ആ ആരോമലിനെ നീ പോയി എന്തുവാ വിളിച്ചത്. " " ബാലവീരേന്ന്. അവനെ കാനാൻ അയ്പോലെ തന്നെയാ അമ്മേ. പച്ചെ അവൻ മമ്മീന്ന് പഞ്ഞു ഒറ്റ കരച്ചിൽ ആരുന്നു. നാൻ പേച്ചു പോയി. പിന്നെ ദിയ ടീച്ചർ വന്നു അവനോട് ചോയിച്ചപ്പോൾ അവൻ പരയുവാ നാൻ അവനെ തെരി പഞ്ഞെന്നു. തെരി എന്റുവാ അമ്മേ. " " അതൊക്കെ ചീത്ത വാക്കുകളാ. നല്ല മക്കൾ അതൊന്നും പറയൂല. നീ ഓരോന്ന് കണ്ടിട്ട് അതൊക്കെ പോയ്‌ വിളിച്ചിട്ടല്ലേ. ആ പ്രിൻസിപ്പൽ എന്നെ ഇനി പറയാൻ ബാക്കി ഒന്നുവില്ല. " " നമുക്ക് ചോട്ടാബീനെ വിട്ട് ഇടിപ്പിക്കാം. " " ആരോടാ ഞാൻ ഇതൊക്കെ പറയുന്നത്. വാ ഇവിടെ ഇരുന്നിട്ട് എന്തിനാ. " അവൾ സ്റ്റോപ്പിൽ നിന്ന് ഇറങ്ങി വെളിയിലായി പാർക്ക് ചെയ്ത സ്കൂട്ടറിന്റെ അടുത്തേക്ക് നടന്നു. ഹെൽമെറ്റ്‌ വെച്ച് വണ്ടി സ്റ്റാർട്ട്‌ ചെയ്തു. ആദി കയറിയതും അവരുടെ വണ്ടി ഒരു ഇരമ്പലോടെ റോഡിലേക്ക് കയറി. ************ വണ്ടി പാർക്കിങ്ങിൽ നിർത്തി അവർ ഫ്ലാറ്റിലേക്ക് നടന്നു. " ഇന്നെന്ത്‌ പറ്റി അമ്മയും മോളും നേരത്തെ. ആദിക്കൊച്ച് വൈകിട്ട് സ്കൂൾ ബസിൽ അല്ലെ വരുന്നത്. " ശബ്ദം കേട്ടിടത്തേക്ക് നോക്കിയപ്പോൾ കണ്ടത് അവരുടെ അടുത്തേക്ക് വരുന്ന സെക്യൂരിറ്റിയെ ആണ്. " ഇനി ആ ബസിൽ ആദിയെ നോക്കേണ്ട മുരളിച്ചേട്ടാ. എന്റെ മോൾക്ക് എന്തോ ആ സ്കൂൾ അങ്ങോട്ട് പിടിക്കുന്നില്ല. അതുകൊണ്ട് ഞങ്ങൾ ആ പോക്ക് അങ്ങ് നിർത്തി. " അയാൾ മനസിലാവത്തത് പോലെ അവളെ നോക്കി. " ഇന്നും അപ്പോൾ എന്തേലും കുഴപ്പം ഒപ്പിച്ച് കാണുമല്ലേ.. " " ഒപ്പിച്ചെന്ന് മാത്രം അല്ല. അവിടെ ഇനി പഠിപ്പിക്കാൻ ഒക്കില്ലെന്ന് പറഞ്ഞു അവര് പറഞ്ഞും വിട്ടു. " അയാൾ ആദിയെ നോക്കി മൂക്കത്ത് വിരൽ വെച്ചു. " എന്നാലും എന്റെ കുഞ്ഞേ.. നീ കൊള്ളാലോ.. " " ചേട്ടന്റെ പരിചയത്തിൽ നല്ലപോലെ തല്ലി പഠിപ്പിക്കുന്ന ഏതേലും സ്കൂൾ ഉണ്ടേൽ പറയു. ഇനി അതേ നടക്കൂ. ഞാൻ പറഞ്ഞു പറഞ്ഞു തോറ്റിരിക്കുവാ. " അയാളോട് അത്രയും പറഞ്ഞു അവൾ ആദിയെയും കൊണ്ട് അകത്തേക്ക് കയറി. ലിഫ്റ്റിൽ കയറി മൂന്നാം നിലയിൽ ഇറങ്ങി സ്കൂൾ ബാഗ് മായി അവൾ നടക്കുമ്പോൾ തൊട്ട് പിറകെ പാട്ടും പാടി ചെറിയ ആളും ഉണ്ട്. അവർ ചെന്ന് നിന്നത് റൂം നമ്പർ 21 ന് മുന്നിലാണ്. അവിടേക്ക് എത്തിയതും ആദി ഓടിച്ചെന്നു ഡോറിൽ തട്ടാൻ തുടങ്ങി. " വിസനാതന്റെ വീടാണോ... ഇവിടെ ആരുല്ലേ.. " " എന്റെ കുഞ്ഞേ ഒന്ന് പതുക്കെ അടുത്തൊക്കെ വേറെ ആൾക്കാർ ഉള്ളതാ. ആ ഡോർ ഇന്ന് നീ തല്ലി പൊളിക്കുവോ. " അമ്മ പറഞ്ഞത് കേൾക്കാതെ അവൾ ചെയ്ത് കൊണ്ടിരുന്ന പ്രവർത്തി തുടർന്നു. ഒട്ടും താമസം ഇല്ലാതെ അവർക്ക് മുന്നിൽ ആ ഡോർ തുറന്നു. ഡോർ തുറന്ന ആളെ തള്ളി മാറ്റി ആദി അകത്തേക്ക് ഓടി. " നിങ്ങൾ എന്താ ഈ സമയത്ത്. ആദിക്കിന്ന് സ്കൂൾ ഇല്ലാരുന്നോ. " " നാൻ ഇനി പോനില്ല അപ്പൂപ്പാ.. വീറ്റിൽ ഇന്ന് പച്ചാ മതീന്ന് പഞ്ഞു. " സോഫയിൽ കയറി ചമ്രംപടിഞ്ഞിരുന്ന് അയാളോടായി ആദി വിളിച്ചു പറഞ്ഞു. ആ മറുപടി കേട്ടതും അവൾ ആദിയെ കണ്ണുരുട്ടി നോക്കി. " അപ്പുപ്പനല്ലേ കൊച്ചുമോൾക്ക് എല്ലാത്തിനും സപ്പോർട്ട്.. പൊന്നുമോളെ പഴയ സ്കൂളിൽ നിന്ന് പറഞ്ഞു വിട്ടു. ഒരുകാര്യം ചെയ്യ്, നാളെ രണ്ട് പേരും കൂടി രാവിലെ ഇറങ്ങിക്കോ എന്നിട്ട് പുതിയ സ്കൂൾ കണ്ട് പിടിച്ചിട്ട് ഇവിടേക്ക് വന്നാൽ മതി. " " പറഞ്ഞു വിട്ടെന്നോ.. അതിന് നീ എന്തുവാ വാവേ ചെയ്തത്. " " നാൻ ഒന്നും ചെയ്തില്ല. ആ ദിവ്യ ടീച്ചർ എന്നെ പോക്കിരീന്ന് വിച്ചു. " " ആഹാ.. എന്റെ കൊച്ചിനെ പോക്കിരി എന്ന് വിളിച്ചതും പോരാ. സ്കൂളീന്ന് പറഞ്ഞു വിട്ടല്ലേ. ഇത് അങ്ങനെ വിട്ടാൽ പറ്റില്ലലോ. ആ പ്രിൻസിപ്പലിന്റെ നമ്പർ നീ ഇങ്ങ് തന്നെ എനിക്ക് അവരോട് രണ്ട് സംസാരിക്കണം. " " പോക്കിരീന്ന് വിളിച്ചപ്പോൾ.... ബാക്കി കൂടി പറഞ്ഞു കൊടുക്ക്. ആ ടീച്ചറിനെ നീ ചോക്ക് എടുത്തെറിഞ്ഞില്ലേ. ഏതേലും പിള്ളേർ ചെയ്യുമോ അങ്ങനെ. " " എന്നെയാ ടീച്ചർ ആദ്യം ചോക്ക് എഞ്ഞേ. നാൻ അതെത്തു ടീച്ചറിനെ തിരിച്ചെഞ്ഞു. " " ആ അപ്പോൾ തെറ്റ് എന്റെ കൊച്ചിന്റെ അല്ല. ആ ടീച്ചറിന്റെയാ. അവർക്കെതിരെ ഒരു പരാതി കൊടുത്താലോ. ഇത്രയും ചെറിയ കാര്യത്തിനാണോ സ്കൂളീന്ന് പറഞ്ഞു വിട്ടത്. " " ഇതൊക്കെ നേരത്തെ അവര് തീരുമാനിച്ചതാ. ആദിയുടെ പേരിൽ പരാതി വരുന്നത് ആദ്യമായിട്ട് ആല്ലല്ലോ. പിന്നെ എന്റെ മോള് പഠിത്തത്തിൽ മിടുക്കി ആയത് കൊണ്ട് ആ കാര്യത്തിലും അവർക്ക് പ്രതീക്ഷ ഇല്ല. അതുകൊണ്ട് അവര് ഈ കാര്യത്തിൽ പിടിച്ചു തൂങ്ങി. " " മ്മ്.. അല്ലേലും നിന്നോട് അന്നേ ഞാൻ പറഞ്ഞതാ അവിടെ ഒന്നും വിടേണ്ട എന്ന്. ഞാൻ ആ രഘുവിനോട് ഒന്ന് ചോദിക്കട്ടെ നല്ല സ്കൂൾ ഏതാ ഉള്ളതെന്ന്. അല്ല നീ അപ്പോൾ കോളേജിൽ പോയില്ലേ. " " ഉച്ച വരെ എക്സാം ഡ്യൂട്ടി ആയിരുന്നു. അത് കഴിഞ്ഞു സ്റ്റാഫ്‌ റൂമിലേക്ക് കയറിയപ്പോഴാ സ്കൂളീന്ന് വിളി വന്നത്. പിന്നെ ലീവും പറഞ്ഞു അവിടേക്ക് പോയി. " " അമ്മാ.. നോക്ക് ബാലവീര്.. ആരോമലിനെ പോലെ ഇല്ലേ.. " " ഒരു ബാലവീറ്.. എത്ര വട്ടം പറഞ്ഞിട്ടുണ്ട് ആദി സ്കൂളീന്ന് വന്നാൽ അതേപടി കയറി ഇരിക്കരുതെന്ന്. ആ യൂണിഫോമിലേക്ക് നോക്ക്. സ്കൂളിലെ മുഴുവൻ ചളിയും ഉണ്ട്. നീ അവിടെ കിടന്ന് ഉരുളുവാരുന്നോ. അവരെ എങ്ങനെയാ കുറ്റം പറയുന്നത് ഇതല്ലേ സ്വഭാവം. എണീക്ക് പോയി.. ഉടുപ്പ് മാറ്.. " " ഇന്നൂടി അല്ലെ അവൾക്കത് ഇടാൻ പറ്റൂ. അതുകൊണ്ടാ അല്ലേടാ വാവേ. " " അതേ.. ഇനി എനിക്ക് ആ സൂലിൽ പോവാൻ പറ്റൂല്ലല്ലോ.. അതോന്റാ നാൻ മാറ്റാഞ്ഞേ.. " " ആരോട് പറയാൻ.. എന്താണെന്ന് വെച്ചാൽ കാണിക്ക്. അപ്പൂപ്പനും മോളും കൂടി സ്കൂളിലും പോകാതെ ബാലവീറിനെയും കണ്ടോണ്ട് ഇരിക്ക്. " അവൾ പിറുപിറുത്ത് കൊണ്ട് സോഫയിൽ ഇരുന്ന ഹാൻഡ് ബാഗുമായി മുറിയിലേക്ക് നടന്നു. ഈ പറഞ്ഞത് ഞങ്ങളെ അല്ലെന്ന ഭാവത്തിൽ അപ്പോഴും രണ്ട് പേർ ബാലവീറിനെ കണ്ട് അവിടെ ഇരുന്നു. " വാവേ.. അമ്മ കലിപ്പിൽ ആണോ.. " " കുറച്ച്.. സാരല്ല.. അതൊക്കെ നാൻ മാറ്റിക്കോളാം. അപ്പുപ്പാ ഇനി എനിക്ക് നല്ല സ്കൂള് തരണേ. " " പിന്നല്ലാതെ. അപ്പൂപ്പൻ നല്ല സൂപ്പർ സ്കൂള് കണ്ട് പിടിച്ചു തരില്ലേ.. " അത് കേട്ടതും ആദി ഒരു ചിരിയോടെ അപ്പൂപ്പന് കവിളിൽ ഉമ്മ കൊടുത്തു. ഇത് കാണുന്ന അവളിലും അറിയാതെ ഒരു ചിരി വിരിഞ്ഞു. ********* ഇവരാണ് നമ്മുടെ കഥാപാത്രങ്ങൾ. കൂട്ടത്തിലെ കുട്ടി കുറുമ്പി ആദ്യ എന്ന എല്ലാവരുടെയും ആദി അപ്പൂപ്പന്റെ മാത്രം വാവ. ആളിപ്പോൾ UKG യിലാണ്. ബാക്കി കാര്യങ്ങൾ കണ്ടില്ലേ, അതാണ് കയ്യിലിരുപ്പ്. വിശ്വനാഥൻ ആദിയുടെ അപ്പുപ്പൻ. ആദിയേക്കാൾ കുരുത്തക്കേടിന് ഒരുപടി മുന്നിൽ ഈ അപ്പുപ്പൻ ആണ്. ഇനിയുള്ളത് നമ്മുടെ നായിക.. ആദിയുടെ അമ്മ.. വൈഗ... " ആദി... എണീക്ക് മതി ഉറങ്ങിയത്. " " കുറച്ചൂടി നേരം... പ്ലീഷ്.. സൂലിൽ പോന്റാലോ.. " " ഒരു നേരവും ഇല്ല. അപ്പൂപ്പനെ പോയി എണീപ്പിക്ക്. " " അപ്പൂപ്പൻ ഒങ്ങിക്കോറ്റെ അമ്മേ. പാവല്ലേ.. " "കൊഞ്ചാതെ എണീക്ക് കണ്ണാ.. അപ്പൂപ്പനെ ഏഴുനേൽപ്പിച്ചു രണ്ടാളും കൂടി ഒന്ന് നടന്നിട്ട് വാ. " " നാനും പൊക്കോറ്റെ. " " ആ.. പോവുന്നെ ഒക്കെ കൊള്ളാം. അപ്പൂപ്പന്റെ കൂടെ നടന്നോണം. " " ഓക്കേ.. " ******** " അപ്പുപ്പാ.. എനീച്ച് നമുക്ക് പോന്റെ. എനീച്ച്.. " " എവിടെ പോവാനാ.. നാളെ പോവാം. " " ഓ നാലെ അല്ല ഇന്ന്. എനീ ച്ച്.. " " എന്തുവാ വാവേ.. ഒന്ന് ഉറങ്ങാൻ വിടെടി.. " " വേന്റ. നമുച്ച് നക്കാൻ പോവാം. നാനും ഒന്റ്. " " എവിടെ നടക്കാൻ ആ.. എനിക്കെങ്ങും വയ്യാ... " " അമ്മേ... ഈ അപ്പുപ്പൻ വരന്നില്ല.. " " അയ്യോ.. പതിയെ പറയ്.... നിന്റെ അമ്മ എന്നെ ഓടിച്ചു വിടും. " " അത് തന്നെയാ ചെയ്യാൻ പോകുന്നെ. എന്നും ഉള്ളെയാ ഈ മടി. ഒരഞ്ചാറു ദിവസം അടുപ്പിച്ചു എണീറ്റ് അങ്ങ് പോയാൽ ഇതങ്ങു മാറും. " വൈഗ അവിടേക്ക് വന്നു പറഞ്ഞു. " ഈ നടക്കുന്നത് ഒക്കെ എന്തിനാടി. ഈ പ്രായത്തിൽ വേണ്ടത്ര ആരോഗ്യം എനിക്കിപ്പോൾ ഉണ്ട്. " " ഉണ്ട്.. ഉണ്ട്.. കൂട്ടത്തിൽ ഇല്ലാത്ത അസുഖങ്ങൾ വല്ലതും ഉണ്ടോ. ദേ പുതിയൊരാളെ കൂടി കൂട്ടിന് വിടുന്നുണ്ട്. രണ്ട് പേരും കൂടി പോയിട്ട് വന്നേ. " " വാ അപ്പുപ്പാ.. " ആദി അപ്പൂപ്പന്റെ കയ്യിൽ പിടിച്ചു വലിച്ചു. " ഇവളുമായി പോവുന്നതിലും നല്ലത് ഞാൻ ഒറ്റക്ക് പോകുന്നതാ. ഒരിടത്തു അടങ്ങി നിക്കില്ലെടി. " " അത് തന്നെയാ വേണ്ടത്. അല്ലെങ്കിൽ അവിടെ എവിടേലും പോയി ഇരുന്നുറങ്ങാൻ അല്ലെ. ആദി... അപ്പൂപ്പനെ നോക്കിക്കോണം, ഇപ്പൊ സമയം ആറ്, ഈ വാച്ച് കെട്ടിക്കോ. ഇതിൽ എട്ട് എന്ന് എഴുതി കാണിക്കുമ്പോൾ അപ്പൂപ്പനെ ഇവിടോട്ട് കൊണ്ട് വന്നാൽ മതി കേട്ടോ. അതുവരെ നടക്കാൻ പറഞ്ഞോണം. നടന്നില്ലെങ്കിൽ എന്താ ചെയ്യേണ്ടത് എന്നറിയാലോ.. " " എല്ലാം നാൻ നോക്കിച്ചൊലാം. അപ്പുപ്പാ.. വാ പോവാം. " " ഇതിലും നല്ലത് നീ വല്ല കൊട്ടേഷനും കൊടുക്കുന്നത് ആരുന്നു. " വൈഗയെ നോക്കി അത്രയും പറഞ്ഞു കട്ടിലിൽ എണീറ്റിരുന്ന അയാളെ ആദി എളിയിൽ കൈ കുത്തി നോക്കി. " നോക്കി പേടിപ്പിക്കേണ്ട ഞാൻ വരുവാ. " അവർ രണ്ട് പേരും പുറത്തേക്ക് പോയതും വൈഗ പതിവ് ജോലികളിലേക്ക് കടന്നു. ************* " അപ്പുപ്പാ നാളെ നാനും പാന്റും സൂവും ഒക്കെ ഇടും. " " നാളെ വേണോ വാവേ. നമുക്ക് ഒരു ദിവസം ഇടവിട്ട് പോവാം. " " പറ്റൂലാ.. വാ ആ വയിൽ പോവാം. " " ഇന്നിത്രയും മതി. ബാക്കി നാളെ. " " അമ്മ പറഞ്ഞെ എട്ട് എന്നല്ലേ. ഇപ്പൊ ഏഴ് പൂജ്യം ആറ് ആയതേ ഒള്ളു. ഇനിയും ഉണ്ട് സമയം. " " ഇനി അമ്മ ഓടിക്കുമ്പോൾ ഒളിക്കാൻ വേണ്ടി എന്റെ അടുത്തേക്ക് വാ. മൈൻഡ് ചെയ്യില്ല ഞാൻ. " " അപ്പൂപ്പനും മോളും കൂടി കാലത്തെ നടക്കാൻ ഇറങ്ങിയത് ആണോ. " " എന്നെ ഈ കാന്താരി നടത്തിക്കുവാണെന്ന് പറയ്. അല്ല വിജയനെ ഇപ്പോൾ കാണാനേ ഇല്ലല്ലോ. " " ഓ എന്തോ പറയാനാ. മോൻ ദുബായീന്ന് വിളിയോട് വിളി അവിടെ അവർക്ക് രണ്ടാൾക്കും ജോലി ഉള്ളതല്ലേ. അവര് പോയി കഴിഞ്ഞാൽ കുഞ്ഞിനെ നോക്കാൻ ആരുമില്ല. അതുകൊണ്ട് ഞാനും സുമതിയും കൂടി അവിടേക്ക് ചെല്ലാൻ. അതിന്റെ ഓട്ടത്തിൽ ആരുന്നു. " " അപ്പോൾ രണ്ടാളും പോവാണോ. " " ആലോചിച്ചപ്പോൾ അതാ നല്ലതെന്ന് ഞങ്ങൾക്കും തോന്നി. ഇവിടെ ഇങ്ങനെ ഞങ്ങൾ രണ്ടാളും ഒറ്റക്ക് താമസിക്കുന്നതിലും നല്ലത് അതല്ലേ. അവിടെ ആകുമ്പോൾ എല്ലാവരെയും കാണാം. ഉടനെ എന്തായാലും പോകും. " " അപ്പോൾ തിരിച്ച് ഇവിടേക്ക് ഇല്ലെന്ന് സാരം. " " അവസാനകാലം മക്കളുടെയും കൊച്ചുമക്കളുടെയും കൂടെ ആവുന്നതല്ലിയോടോ നല്ലത്. എന്തായാലും ഫ്ലാറ്റ് കൊടുക്കാൻ തീരുമാനിച്ചു. തന്റെ പരിചയത്തിൽ ആരേലും ഉണ്ടേൽ പറയ്. " " എന്റെ പരിചയത്തിൽ ഉള്ളത് ദേ ഇവളാ. ആദിയെ നമുക്ക് അങ്ങ് വാങ്ങിയാലോ. എന്ത് പറയുന്നു. " " വാങ്ങാം. എന്റെ പാവ വെക്കാനെ മുറിയിൽ സലമില്ല. നമുക്ക് അവിടെ കൊണ്ട് വെക്കാം. " " ആണോ എന്നാൽ ആദിക്കുട്ടിക്ക് തരാം അതങ്ങ്. ആട്ടെ എനിക്ക് എത്ര രൂപ തരും. " " എന്റെ കയ്യിൽ ആനേടെ വഞ്ചി ഉണ്ട്. നാൻ അതിൽ ഉള്ളതെല്ലാം തരാം. അത് മതിയോ. " " പിന്നേ ധാരാളം. ആദിക്ക് തന്നെ ഫ്ലാറ്റ്. " അയാൾ അവളുടെ കവിളിൽ കൈ ചേർത്ത് പറഞ്ഞു. " എന്നാൽ അപ്പൂപ്പന്റെയും മോളുടെയും പണി നടക്കട്ടെ.. വൈകിട്ട് ഞാനും അവളും അവിടേക്ക് ഇറങ്ങാം. " " ശരിയഡോ.. " " അപ്പുപ്പാ.. നടക്ക്.. " " വാവേ ഇന്നിത് മതിയെടാ.. " " പറ്റൂലാ.. നടക്ക്. " " ഓ എന്റെ തലവിധി അല്ലാതെ എന്ത്. എവിടൊക്കെ അപ്പുപ്പൻമാർക്ക് എന്തോരം നല്ല കൊച്ചു മക്കളെ കിട്ടുന്നു. എനിക്കും കിട്ടി ഒരെണ്ണത്തിനെ. " " എന്റേലും പഞ്ഞോ.. " " ഞാൻ ഒന്നും പറഞ്ഞില്ലേ. നടക്കുവാന്നു പറഞ്ഞതാ. " ************** " അയ്യോ.. എന്നെ കൊണ്ട് ഇനി ഒന്നിനും വയ്യേ.. " " ആ വന്നോ.. എങ്ങനെ ഉണ്ടാരുന്നു. ". " ശൂപ്പർ ആരുന്നു അമ്മ. അപ്പൂപ്പനെ നാൻ നിക്കാനെ സമ്മതിച്ചില്ല. " " നിക്കാനോ ശ്വാസം വിടാൻ സമ്മതിച്ചില്ല എന്ന് പറയ്. എന്റേ മോളെ.. എന്നെ കൊണ്ട് വയ്യെടി.. " സോഫയിൽ മലർന്നു കിടക്കുന്ന അപ്പൂപ്പനെ കണ്ട് അപ്പുറത്ത് ഇരുന്ന ആളും അതേപോലെ കിടന്നു. " നീ എന്തിനാ ഇപ്പോൾ കിടക്കുന്നെ. " " എനിച്ചും ഷീണം കാണില്ലേ. " " പിന്നെ.. ക്ഷീണം.. നാളെ തൊട്ട് ഞാൻ ഒറ്റക്ക് പൊയ്ക്കോളാം. ക്ഷീണം ഉള്ള ആള് ഇവിടെ ഇരുന്നാൽ മതി. " " നാനും വരും. ഇല്ലേ അപ്പുപ്പൻ നടക്കൂല. " " ഇതെന്നെയും കൊണ്ടേ പോകൂ. " " അമ്മേ.. നാൻ പുതിയ ഫാറ്റ് വാങ്ങാൻ പോവാ. എന്റേ പാവ ഒക്കെ ഇനി അവിടെ വെക്കാവേ. " ആദിക്കൊച്ച് ആവേശത്തിൽ പറഞ്ഞു. " ഫ്ലാറ്റോ... " " അത് ആ വിജയൻ ഇല്ലേ. അവര് രണ്ട് പേരും മോന്റെ അടുത്തേക്ക് പോകുവാ. അപ്പോൾ ഫ്ലാറ്റ് വിക്കാൻ ആണെന്ന് പറഞ്ഞു. " " നാനാ അത് വാങ്ങാൻ പോവുന്നെ. അമ്മേ നമുക്ക് അപ്പൂപ്പനെ അവിടെ ആക്കാം. എന്നിട്ട് നാനും അമ്മയും ഇവിടെ. " " എന്തിനാ.. എന്നിട്ട് രാത്രിയിൽ അപ്പൂപ്പനെ കള്ളൻ കൊണ്ടോവും എന്നും പറഞ്ഞു കൂടെ പോയി കിടക്കാൻ അല്ലെ. ഇപ്പോൾ ആണേൽ എനിക്ക് ഡോർ തുറന്നാൽ മതി. ഇനി വേറെ ഫ്ലാറ്റ് ആണേൽ ഞാൻ അവിടേക്ക് പോണ്ടേ. " അതിന് ആദി അമ്മക്ക് വളിച്ച ഒരു ചിരി കൊടുത്തു. അത് കണ്ടപ്പോൾ അവരിലും ചിരി വിരിഞ്ഞു. " വന്നേ.. നിന്നെ കുളിപ്പിച്ചിട്ട് വേണം എനിക്ക് കോളേജിൽ പോവാൻ. " " നാനും വരട്ടെ കോലേജിൽ. മിണ്ടാതെ അടങ്ങി നാൻ ഇരുന്നോളാം. ശല്യപ്പെടുത്തത്തെ ഇല്ല. " " അയ്യോ... വേണ്ടായേ ഒരിക്കൽ ഇതുപോലെ അഭിനയിച്ചിട്ട് നിന്നെ അവിടെ കൊണ്ട് പോയതല്ലേ. എന്നിട്ട് അവിടെ വന്നു ആ തലതിരിഞ്ഞ പിള്ളേരോട് എല്ലാം ഞാൻ വീട്ടിൽ അങ്ങനെയാണ് ഇങ്ങനെയാണ് എന്നും പറഞ്ഞു ക്ലാസ്സായ ക്ലാസ്സ്‌ മുഴുവൻ കയറി ഇറങ്ങി. പിള്ളേർക്ക് എന്നോടുള്ള പേടിയും പോയി. " " അന്ന് നാൻ കുഞ്ഞ് വാവ അല്ലെ. അതോണ്ടാ. ഇന്ന് നാൻ വലിയ കുട്ടിയ. അടങ്ങി ഇരുന്നോളാം. " " എന്ന്.. കഴിഞ്ഞ മാസത്തെ കാര്യമാ ഞാൻ ഈ പറഞ്ഞത്. അന്ന് കുഞ്ഞ് ഇന്ന് നീ വലിയ കുട്ടിയായല്ലേ. അപ്പൂപ്പനും കൊച്ചുമോളും കൂടി ഇവിടെ ഇരുന്നാൽ മതി. " " ഹും.. വാ അപ്പുപ്പാ നമുക്ക് ബാലവീരിനെ കാണാം. ആ പന്ന കോലേജിൽ ആര് പോവുന്നു. " " നിന്റെ നാക്ക് ഇത്തിരി കൂടുന്നുണ്ട് കേട്ടോ. ഇങ്ങോട്ട് വന്നേ കുളിച്ചിട്ട് പോയാൽ മതി. " " ചെല്ല് വാവേ അമ്മ കുളിപ്പിക്കും. അപ്പോഴേക്കും അപ്പൂപ്പനും കുളിച്ച് വരാം. " വൈഗ ആദിയെ കുളിപ്പിച്ചു ആഹാരവും കൊടുത്തു. " ഞാൻ ഇറങ്ങുവാണെ. രണ്ട് പേരെയും കൂടി ഒന്നിച്ചിരുത്തി പോവുവാ. വല്ല കുരുത്തക്കേടും ഒപ്പിച്ചാൽ. " " അപ്പൂപ്പനെ നാൻ നോക്കിക്കോളാം. " " നിന്നെ അപ്പോൾ ആര് നോക്കും. " " അപ്പുപ്പൻ " " ദേ.. ഞാൻ പോയിക്കഴിഞ്ഞാൽ അടുക്കളയിൽ കയറി പാത്രം വലിച്ചു നോക്കേണ്ട. മധുരമുള്ളതെല്ലാം മാറ്റി വെച്ചിട്ടാ പോകുന്നത്. രണ്ടിനും മധുരം തീറ്റി ഇത്തിരി കൂടുതലാ. " അത് കേട്ടതും രണ്ടാളുടെയും മുഖം മങ്ങി. " ഇവിടെ ഉണ്ടാവണം കേട്ടല്ലോ. എങ്ങോട്ടും പോയേക്കരുത്. " വൈഗ പോയതും ആദി അപ്പൂപ്പനെ നോക്കി. " ഇനി ഇപ്പൊ ഇവിടെ ഇരിച്ചണെ എന്റിനാ. ശോ.. മുട്ടായീം ഇല്ല. " " നീ എന്തിനാ ഇങ്ങനെ മുഖം വീർപ്പിക്കുന്നത്. ഞാൻ ആണോ അതെല്ലാം മാറ്റിയത്. നിന്റെ അമ്മയോട് തന്നെ പറയാരുന്നില്ലേ. നീ ഇവിടെ ഇരുന്നിട്ടാ. അല്ലേൽ അവള് ഒന്നും മാറ്റി വെക്കില്ല. അതെങ്ങനെയാ സ്കൂളിലും കയറ്റില്ല. കുരുത്തക്കേടും കാണിച്ചു നടക്കുവാ. " " നാനോ.. " " പിന്നെ ആരാ ഞാനോ. " " എന്നെ കുത്തക്കേട് ഒക്കെ പഠിപ്പിക്കുന്നെ ആരാ.. അപ്പുപ്പൻ അല്ലെ. ഇവിടെ ചൂഗറ് ആർക്കാ. എനിച്ചാണോ. " " ആ ഇനി എന്നെ പറയ്. " " നമ്മൾ ഇനി എന്റാ ചെയ്യാ. ഒരു മുട്ടായി ഏലും വേണം. " " മ്മ്... നീ വാ നമുക്ക് അടുക്കളയിൽ ഒന്ന് പോയി നോക്കാം. " " ഓച്ചെ. ഫിഡ്ജിൽ കാനുവോ. " " ഓ ഇതിൽ ഒന്നുവില്ല. ആ മുകളിൽ ഇരിക്കുന്ന പാത്രത്തിൽ അല്ലെ അവള് എല്ലാം എടുത്ത് വെക്കാറ്. അതിൽ ഒന്ന് നോക്കാം. " അയാൾ അത് തുറന്നു. അതിൽ പലഹാരം ഇരിക്കുന്നത് കണ്ടതും അപ്പൂപ്പന്റെയും മോളുടെയും കണ്ണിൽ തിളക്കം വന്നു. രണ്ട് പേർക്കും ആവശ്യത്തിന് ഉള്ളത് എടുത്ത് അയാൾ അത് അതേപോലെ അടച്ചു മുകളിൽ ആയി വെച്ചു. " അമ്മയോട് പറയല്ലേ.. " " ഇല്ല... പരയൂലാ.. " ആദി ഫുൾ സപ്പോർട്ട് ഓടെ തല രണ്ടും കുലുക്കി. ഉച്ചക്ക് ആഹാരം കഴിച്ചതിനുശേഷം ഒന്ന് മയങ്ങാൻ കിടന്നതാണ് അപ്പുപ്പനും കൊച്ചുമോളും. അപ്പുപ്പൻ ഉറങ്ങി എന്ന് തോന്നിയതും ആദി പതിയെ തലപൊക്കി നോക്കി. നല്ല ഉറക്കമാണ് എന്ന് ബോധ്യപ്പെട്ടതും അവൾ പതിയെ ശബ്ദം ഉണ്ടാക്കാതെ അടുക്കളയിലേക്ക് നടന്നു. അടുക്കളയിൽ ചെന്ന് നേരത്തെ അപ്പുപ്പൻ മുകളിൽ എടുത്ത് വെച്ച പത്രത്തിലേക്ക് നോക്കി. " മുട്ടായി എക്കാൻ എന്റ ചെയ്യാ. അപ്പുപ്പൻ എനീക്കുവോ. ഏയ്‌ ഇല്ല. എങ്ങനെയാ ഇപ്പൊ മോളിൽ കേരുന്നേ. " ചുറ്റിനും നോക്കിയപ്പോൾ കണ്ടു അടുക്കളയുടെ സൈഡിൽ ആയി മാറ്റി ഇട്ടിരിക്കുന്ന കസേര. അത് പതിയെ വലിച്ചതും കുഞ്ഞൊരു ശബ്ദം പുറത്തേക്ക് വന്നു. ഓടി കതകിന്റെ പിറകിൽ നിന്ന് ഒളിഞ്ഞു നോക്കിയപ്പോൾ അപ്പുപ്പൻ അതേ കിടപ്പ് ആണെന്ന് കണ്ടതും അവൾ നെഞ്ചിൽ കൈ വെച്ച് എന്നിട്ട് വീണ്ടും വന്നു കസേര വലിച്ചു. പക്ഷെ അതേ ശബ്ദം പിന്നെയും വന്നു. " ശോ.. നീ എനിച്ചു തല്ല് വാങ്ങി തരുവോ. മിണ്ടാതെ പതിയെ വായോ. " പിന്നെ പതിയെ പതിയെ ഒച്ച ഉണ്ടാക്കാതെ കൗണ്ടർ ടോപ്പിനോട് അടുപ്പിച്ചു കസേര ഇട്ടു. കസേരയുടെ പടിയിൽ ചവിട്ടി അതിൽ നിന്ന് പിന്നീട് കൗണ്ടർ ടോപ്പിലേക്ക് കയറി. അവിടെ നിന്ന് മുകളിൽ ഇരിക്കുന്ന പാത്രത്തിലേക്ക് കൈ എത്തിക്കാൻ നോക്കി. പക്ഷെ എത്ര എത്തിയിട്ടും അത് നടന്നില്ല. " ശോ.. എനിച്ചു മിട്ടായി വേണം. നാൻ എടുത്തിട്ടേ പോവൂ. " കുറേ നേരം എത്തി നോക്കിയെങ്കിലും നടക്കില്ല എന്ന് മനസിലായതും ദേഷ്യം കൊണ്ട് കാന്താരിയുടെ മുഖം ചുമന്നു. പിന്നീട് ചാടി എടുക്കാൻ ആയി അടുത്ത നീക്കം. രണ്ട് മൂന്ന് വട്ടം ചാടിയപ്പോൾ പാത്രത്തിൽ കൈ എത്തിയതും ആവേശത്തിൽ ഒരു ചാട്ടം കൂടി കൊടുത്തു. പാത്രത്തിൽ കൈ കിട്ടിയതും ചാടിയ ആവേശത്തിൽ അതിൽ പിടിച്ചു ചായിച്ചു. പക്ഷെ കൈയിൽ കിട്ടിയ പാത്രത്തിൽ അരിപ്പൊടി ആരുന്നെന്ന് മാത്രം. അടപ്പ് തുറന്ന് അതിൽ ഉണ്ടായിരുന്ന പൊടി എല്ലാം ആശാട്ടിയുടെ തലയിൽ കൂടി കമന്നു. 📖 കഥയുടെ ബാക്കി ഭാഗങ്ങൾ ഇവിടെ വായിക്കാം: 👉 https://share.aksharathalukal.in/s/50682/view വായിച്ചിട്ട് അഭിപ്രായം പറയണേ 🥰 #💞 പ്രണയകഥകൾ #📔 കഥ #📙 നോവൽ