എനിക്കായ് വീണ്ടും.. പാർട്ട്‌ 2. വാതിൽ തുറന്ന് തന്റെ മുന്നിൽ നിൽക്കുന്ന ആളെ കണ്ട ജെറിക്ക് സ്വന്തം കണ്ണുകളെ വിശ്വസിക്കാനായില്ല. അത് അവളായിരുന്നു! വർഷങ്ങൾക്കു മുൻപ് ആ പഴയ മൈതാനത്ത് വെച്ച് താൻ എന്നും നോക്കി നിന്നിരുന്ന അതേ പെൺകുട്ടി. ​ഇതൊരു സ്വപ്നമാണോ അതോ തോന്നലാണോ എന്ന് അവൻ ഒരു നിമിഷം സംശയിച്ചു. അവന്റെ ഉള്ളിലെ ആ പഴയ പ്രണയവും ഇപ്പോഴത്തെ ഞെട്ടലും കൂടി കലർന്നപ്പോൾ ബാലൻസ് തെറ്റി കയ്യിലുണ്ടായിരുന്ന ഫോൺ നിലത്തേക്ക് വീണു. ​"ആരാ... എന്താ വേണ്ടത്?" ​നിലത്തു വീണ ഫോൺ എടുത്തു അവന് നേരെ നീട്ടിക്കൊണ്ട് അവൾ ചോദിച്ചു. പക്ഷേ ജെറിക്ക് മറുപടി പറയാൻ വാക്കുകൾ കിട്ടുന്നില്ലായിരുന്നു. അവന്റെ നാവൊട്ടിപ്പോയി. ദൂരത്തു മാത്രം കണ്ടിരുന്ന ആ രൂപം യാഥാർത്ഥ്യമായി മുന്നിൽ നിൽക്കുമ്പോൾ എന്ത് പറയണമെന്ന് അവന് നിശ്ചയമില്ലായിരുന്നു. ​ജെറി യാന്ത്രികമായി തന്റെ കയ്യിലുണ്ടായിരുന്ന പൂച്ചെണ്ട് അവൾക്ക് നേരെ നീട്ടി. അവൾ അത് വാങ്ങിയിട്ട് സംശയത്തോടെ അവനെ നോക്കി. ​"ഇത്... റോസി നൽകിയതാ..." അവളുടെ നോട്ടം കണ്ടതും അവൻ സ്റ്റക്ക് ആയതു പോലെയായി.. അവൾ എന്തോ തിരിച്ചു ചോദിക്കാൻ തുടങ്ങിയതും ജെറി വെപ്രാളത്തോടെ പറഞ്ഞു: ​"അത്... എന്റെ പൂച്ച പ്രസവിച്ചു! എനിക്ക് എത്രയും പെട്ടെന്ന് അതിനെ കാണാൻ പോകണം. സമയം വൈകി!" ​ഒന്നും ചിന്തിക്കാതെ വായിൽ വന്നത് വിളിച്ചുപറഞ്ഞ് അവൻ തിരിഞ്ഞോടി. അവിടെ ഇപ്പോൾ എന്താണ് നടന്നതെന്നോ ഈ വന്നത് ആരാണെന്നോ മനസ്സിലാകാതെ, അവന്റെ ഫോണും കയ്യിൽ പിടിച്ച് അന്തംവിട്ടു നിൽക്കുകയായിരുന്നു അന്ന. ...... ​തന്റെ മുറിയിൽ എത്തിയിട്ടും ആ ഷോക്കിൽ നിന്ന് ജെറി മോചിതനായിരുന്നില്ല. ​നടന്ന കാര്യങ്ങളൊക്കെ മേരിയോട് പറയാനായി ഫോൺ എടുക്കാൻ നോക്കിയപ്പോഴാണ് അവന് കാര്യം ഓർമ്മ വന്നത്. വെപ്രാളത്തിനിടയിൽ ഫോൺ അവളുടെ കയ്യിൽ തന്നെയാണല്ലോ വെച്ചത്! ​ആ രാത്രി ജെറിക്ക് ഒട്ടും ഉറക്കം വന്നില്ല. അന്നയുടെ മുഖവും അവളുടെ കയ്യിലുള്ള തന്റെ ഫോണും എല്ലാം കൂടി അവന്റെ ഉറക്കം കെടുത്തി. എങ്ങനെയൊക്കെയോ നേരം വെളുപ്പിച്ചു രാവിലെ തന്നെ അവൻ പൂക്കടയിലേക്ക് ഓടി.... രാവിലെ തന്നെ ജെറി ഷോപ്പിലെത്തി. വല്ലാത്തൊരു വെപ്രാളത്തിലായിരുന്നു അവൻ. ഷോപ്പ് തുറന്ന് ഓരോ പൂക്കളും അടുക്കി വെക്കുമ്പോഴും അവന്റെ ഉള്ളിൽ തലേദിവസം കണ്ട ആ മുഖമായിരുന്നു. അപ്പോഴാണ് മേരി തന്റെ ഊന്നുവടിയിൽ താങ്ങി പതിയെ നടന്നു വന്നത്. ​"എത്ര നേരമായി... ഇപ്പോഴാണോ വരുന്നത്?" അവളെ കണ്ടപാടെ ജെറി അക്ഷമയോടെ ചോദിച്ചു. ​"അതിന് ടൈം ആയില്ലല്ലോ ജെറി... " അവൾ കയ്യിലെ വാച്ചിലേക്ക് നോക്കി ശാന്തമായി പറഞ്ഞു. ​"അതെ, എനിക്ക് നിന്നോട് അത്യാവശ്യമായി ഒരു കാര്യം പറയാനുണ്ട്!" ജെറി അവളുടെ കൈ പിടിച്ചു അടുത്തുണ്ടായിരുന്ന സീറ്റിൽ നിർബന്ധിച്ചിരുത്തി. ​മേരി അവനെ ഒന്ന് സൂക്ഷിച്ചു നോക്കി. "ഡാ, എന്താ നിനക്ക് പറ്റിയത്? നീയെന്താ ഇങ്ങനെ വിയർക്കുന്നത്? ഇന്നലെ ഞാൻ നിന്നെ എത്ര തവണ വിളിച്ചെന്ന് അറിയാമോ? ഫോൺ എടുത്തു, പക്ഷേ ഒന്നും മിണ്ടുന്നില്ല. ഞാൻ എത്ര പ്രാവശ്യം 'ഹലോ ഹലോ' എന്ന് വിളിച്ചു... നീയെന്താ മറുപടി പറയാതിരുന്നത്?" ​മേരിയുടെ ചോദ്യം കേട്ട് ജെറി സ്തംഭിച്ചുപോയി. "ഇന്നലെ ഞാൻ ഫോൺ എടുത്തെന്നോ? ഡീ, അതിന് ഞാൻ..." ​ജെറി  പറയാൻ തുടങ്ങിയപ്പോഴാണ് പുറത്ത് ഒരു ബൈക്ക് വന്നു നിന്നത്. സംസാരം പാതിവഴിയിൽ നിർത്തി അവർ രണ്ടാളും വാതിലിലേക്ക് നോക്കി. ഗുഡ് മോർണിംഗ് ചേട്ടാ..." അവൻ വിനയത്തോടെ വിളിച്ചു. ​"ഗുഡ് മോർണിംഗ്... " ജെറി അവനെ നോക്കി പറഞ്ഞു. ​"അതെ, എനിക്കൊരു സഹായം ചെയ്തുതരുമോ?" ​"നീ പറ..." ജെറി കൗണ്ടറിന് അരികിലേക്ക് നീങ്ങിനിന്നു. ​"എനിക്ക് ഒരു കൊച്ചിനെ ഭയങ്കര ഇഷ്ടമാണ്... പക്ഷേ ഇതുവരെ പ്രൊപ്പോസ് ചെയ്തിട്ടില്ല. എങ്ങനെ പറയണം എന്ന് അറിയില്ല. പൂവ് കൊടുത്ത് പ്രൊപ്പോസ് ചെയ്യുമ്പോൾ നമ്മുടെ മനസ്സിലെ ഫീലിംഗ്സ് അവർക്ക് വേഗത്തിൽ മനസ്സിലാകുമെന്ന് എന്റെ ഫ്രണ്ട് പറഞ്ഞു. അതാ... എനിക്ക് ഒരാളോട് ക്രഷ് ആണെന്ന് തോന്നിപ്പിക്കാൻ ഏത് പൂവാണ് കൊടുക്കേണ്ടത്?" ​അത് കേട്ടതും ജെറിയുടെ മുഖത്ത് ഒരു ചിരി വിരിഞ്ഞു. "അതിന് റോസാപ്പൂക്കൾ തന്നെ വേണം. പിങ്ക് റോസോ യെല്ലോ റോസോ അങ്ങനെ ഏതെങ്കിലും കൊടുത്താൽ മതി." ​"എന്നാ എനിക്ക് പിങ്ക് റോസിന്റെ ഒരു മനോഹരമായ ബൊക്കെ തരുമോ?" അവൻ ആകാംക്ഷയോടെ ചോദിച്ചു. ​"പിന്നെന്താ, തരാമല്ലോ. എപ്പോഴത്തേക്കാണ് വേണ്ടത്?" ​"വൈകുന്നേരം..." ​"സെറ്റ്! ഞാൻ റെഡിയാക്കി വെക്കാം," . "ഓക്കേ ചേട്ടാ," എന്നും പറഞ്ഞ് അവൻ സന്തോഷത്തോടെ കടയിൽ നിന്നിറങ്ങി നടന്നുനീങ്ങി. ​അവൻ ദൂരേയ്ക്ക് പോകുന്നത് നോക്കി മേരി ചോദിച്ചു, "ഡാ ജെറി, അവൻ ഇതിന് മുന്നിലുള്ള ടെക്സ്റ്റൈൽ ഷോപ്പിൽ നിൽക്കുന്ന പയ്യനല്ലേ?" ​"അതെ... കണ്ടില്ലേ, പിള്ളേർക്ക് വരെ ലൈൻ സെറ്റ് ആകുന്നു! നീയിവിടെ ഇങ്ങനെ മൂത്തുനരച്ച് ഇരുന്നോ," ജെറി അവളെ കളിയാക്കി. ​"അപ്പോൾ സാറോ? എന്നോ മിസ്സായ ഒരു പെൺകുട്ടിയെയും കാത്തിരിക്കുകയല്ലേ?" മേരി തിരിച്ചു കൊടുത്തു. ​മേരിയുടെ ആ തമാശ കേട്ടപ്പോഴാണ് ജെറിക്ക് പെട്ടെന്ന് ആ കാര്യം ഓർമ്മ വന്നത്. അവന്റെ മുഖം പെട്ടെന്ന് മാറി. "അതെ, നീ അത് പറഞ്ഞപ്പോഴാ എനിക്ക് ആ കാര്യം ഓർമ്മ വന്നത്..." ​അവന്റെ മുഖത്തെ ഗൗരവം കണ്ട് മേരി ആകാംക്ഷയോടെ ചോദിച്ചു, "എന്താ... എന്താ ഉണ്ടായത്?" #📙 നോവൽ #📔 കഥ #💞 പ്രണയകഥകൾ #📝 ഞാൻ എഴുതിയ വരികൾ