ഓവുലേഷൻ എന്നത് സ്ത്രീ ശരീരത്തിൽ നടക്കുന്ന സ്വാഭാവിക പ്രക്രിയയാണ്. പ്രത്യുൽപാദനപരമായ സ്ത്രീ ശരീരത്തിലെ പല പ്രക്രിയകളിൽ ഒന്ന്. ഓവുലേഷൻ അഥവാ അണ്ഡവിസർജനം പൂർണവളർച്ച പ്രാപിച്ച ഓവം അഥവാ അണ്ഡം ഓവറിയിൽ നിന്നും പുറന്തള്ളപ്പെട്ട് ഫെല്ലോപിയൻ ട്യൂബിൽ എത്തുന്ന പ്രക്രിയയാണ്. ഇവിടെ വച്ച് ഈ അണ്ഡത്തിന് ബീജവുമായി സംയോജിയ്ക്കാനുള്ള സാഹചര്യമുണ്ടാകുമ്പോഴാണ് ഗർഭധാരണം സംഭവിയ്ക്കുന്നത്. ആർത്തവശേഷം അടുത്ത ആർത്തവത്തിന് പകുതി ദിവസങ്ങൾ ശേഷിയ്ക്കുമ്പോഴാണ് ഓവുലേഷൻ സാധാരണ നടക്കുന്നത്. അതായത് 28 ദിവസത്തെ ആർത്തവചക്രത്തിൽ 14-ാമത്തെ ദിവസമാകും സാധാരണ ഗതിയിൽ ഓവുലേഷൻ നടക്കുന്നത്. ആർത്തവ ചക്രത്തിന്റെ നീളം കുറയുന്നതും കൂടുന്നതും അനുസരിച്ച് ഇതിലും വ്യത്യാസം വരുന്നു. ഓവുലേഷനും ഗർഭധാരണവും ഗർഭധാരണം നടക്കാനുള്ള ശരീരത്തിന്റെ മുന്നൊരുക്കം എന്ന് ഇതിനെ പറയാം. ഓവുലേഷൻ കൃത്യമായ നിർണയിക്കേണ്ടത് ഗർഭധാരണത്തിന് പ്രധാനമാണ്. കാരണം ഈ സമയം സ്ത്രീ ശരീരത്തിൽ ബീജമെത്തിയാലേ ഗർഭധാരണം നടക്കൂ. കൂടിയാൽ 24-48 മണിക്കൂർ വരെ മാത്രമാണ് ഓവം അഥവാ അണ്ഡത്തിന് ജീവനുള്ളൂ. ഈ സമയത്ത് മാത്രമാണ് ഒരു മാസം സ്ത്രീയിൽ ഗർഭധാരണ സാധ്യതയും ഉളളത്. ഗർഭധാരണത്തിന് ശ്രമിയ്ക്കുന്നവർ ഓവുലേഷൻ കൃത്യമായി അറിഞ്ഞ് ബന്ധപ്പെടേണ്ടത് പ്രധാനമാണ്. പ്രത്യേകിച്ചും ആർത്തവവും ഓവുലേഷനും ക്രമരഹിതമായി നടക്കുന്നവരിൽ. #👩 Women's Health #💪ഹെല്‍ത്ത് ടിപ്സ് #💪Health advice