ശിക്ഷാർഹം Part 13 ബാലൻസ് അവരുടെ കാര്യസാധ്യത്തിനുപയോഗിക്കാം. അവനൊരു പോലീസ് സർക്കിൾ ഇൻസ്പെക്ടറാണ് . കളി അറിയാവുന്ന ഒരു ക്രിമിനലിന് ഇങ്ങനൊരുത്തനെ കിട്ടിയാൽ എന്തൊക്കെയാ ചെയ്തു കൂടാത്തത്.” “ശരിയാണ്. തന്റെ ഊഹമൊക്കെ സത്യമാണെങ്കിൽ മാത്രം.” “രണ്ടാമത് സംഭവിച്ച കാര്യം, ഈ ആൽബിയും ഒരു സ്ത്രീയുമായി എന്തോ ഇടപാടുണ്ട്. ഞാൻ അവനെ പിൻതുടരാൻ ഒരുത്തനെ ഏല്പ്പിച്ചിരുന്നു എന്നു പറഞ്ഞില്ലേ ? ” “ആ... ഞാനോർക്കുന്നു. ഏതോ ഡെയ്സിയോ മറ്റോ അല്ലേ ? ” “യെസ് സർ! ഡെയ്സീസ് ഗ്രൂപ്പ് ഓഫ് കമ്പനീസിന്റെ ഓണർ. ഡെയ്സി സെബാസ്റ്റ്യൻ.” “ഓക്കെ. അവർക്കിതിലെന്തു കാര്യം ? ” “നമ്മുടെ ഒരു പഴയ കേസിലെ ഒരു മിസ്റ്ററി കഥാപാത്രം ഈ ഡെയ്സി ആണോ എന്നെനിക്ക് നല്ല സംശയമുണ്ട്. വളരെ വിവാദമായൊരു പഴയ കൊലക്കേസ്.” എസ്.പി.യുടെ നെറ്റിയിൽ ചുളിവുകൾ വീണു. “കേസ് നമ്പർ CB-CD-2645/2015 ! വിവാദമായ കൊടുവള്ളൂർ കൊലക്കേസ്. സർ ഓർക്കുന്നില്ലേ ? “ ”പോത്താ... ഉറപ്പില്ലാതെ താൻ ഇതൊന്നും പൊക്കിക്കൊണ്ടു വരില്ല എന്നെനിക്കറിയാം. പക്ഷേ-“ ”മുഴുവൻ പറയട്ടെ സർ. കൊടുവള്ളൂർ കേസിൽ എന്താണ് സംഭവിച്ചത് ? വയനാട് ചുരമിറങ്ങി വരികയായിരുന്ന ടയോട്ട ഇന്നോവ കാർ കയറ്റം കയറി ചെല്ലുന്ന ഒരു ചരക്കു ലോറിയുമായി കൂട്ടിയിടിക്കുന്നു. അപകടത്തിൽ, കാർ യാത്രക്കാരായ യാസിർ സക്കീറും കുടുംബവും കൊല്ലപ്പെടുന്നു. ഭാര്യയും മൂന്നു മക്കളുമടക്കം, അഞ്ചു മരണങ്ങൾ. യാസിർ മദ്യപിച്ചിരുന്നു എന്ന് പോസ്റ്റ്മോർട്ടം റിപ്പോർട്ട്. ജീവിതത്തിൽ ഇന്നുവരെ ഒരു തുള്ളി പോലും മദ്യപിച്ചിട്ടില്ലാത്ത യാസിർ അന്ന് മദ്യപിച്ച് നില തെറ്റിയ അവസ്ഥയിലായിരുന്നു. അമിത വേഗത്തിൽ റോങ്ങ് സൈഡിൽ ചെന്നിടിക്കുകയായിരുന്നു എന്ന് ദൃൿസാക്ഷികളുടേയും, ട്രക്ക് ഡ്രൈവറുടെയും മൊഴി. “ ”യെസ്. എനിക്ക് നല്ല ഓർമ്മയുണ്ട്.“ ”കേസ് കൊലപാതകമാകമാണെന്ന് ലോക്കൽ പോലീസ് സംശയം പ്രകടിപ്പിച്ചിരുന്നു. എന്നാൽ തെളിവുകളുടെ അഭാവത്തിൽ ലോറി ഡ്രൈവർ രക്ഷപ്പെട്ടു പോയി. പക്ഷേ ബന്ധുക്കളും നാട്ടുകാരും വെറുതേയിരുന്നില്ല. കേസ് ക്രൈംബ്രാഞ്ചിനു കിട്ടി. എന്റെ ജീവിതത്തിൽ എന്നെ ഏറ്റവുമധികം വേദനിപ്പിച്ച ഒരു കേസ്! 3 മാസം മുതൽ 6 വയസ്സു വരെയുള്ള മൂന്നു പിഞ്ചു കുഞ്ഞുങ്ങളാണ് മരിച്ചത്. കൊലപാതകമാണെന്ന് എനിക്ക് 100% ഉറപ്പ്! പക്ഷേ... മുന്നോട്ടു പോകാൻ ഒരു പിടിവള്ളി പോലുമില്ലാതിരുന്ന ഒരു കേസ്.“ ”ഇതൊക്കെ ആൽബർട്ടുമായി എങ്ങനാഡോ... എനിക്കൊന്നും മനസ്സിലാകുന്നില്ല.“ ”ഇനി ഞാൻ എനിക്കു മാത്രം അറിയാവുന്ന ചില കാര്യങ്ങൾ പറയാം. അന്ന്, ആ കേസന്വേഷണവുമായി ഞാൻ എത്തിപ്പെട്ടത് ഒരു അഡ്വൊക്കേറ്റിനടുത്താണ്. ഒരു മിസ്റ്റർ രമേഷ് അയ്യർ. മരിച്ച യാസിറിന്റെ വക്കീൽ. അയ്യർ & അസോസിയേറ്റ്സ് എന്നൊരു സ്ഥാപനം നടത്തുകയാണയാൾ. യാസിറിന് മൂന്ന് സ്വർണ്ണക്കടകളുണ്ടായിരുന്നു. കൊടുവള്ളൂരിൽ തന്നെ. അതുമായി ബന്ധപ്പെട്ട എന്തോ ഡിസ്പ്യൂട്ടുമായി അയാൾ ഈ അയ്യരുമായി സ്ഥിരമായി ബന്ധപ്പെട്ടിരുന്നത്രേ. ഞാൻ പക്ഷേ എത്ര ശ്രമിച്ചിട്ടും വക്കീൽ ഒരക്ഷരം മിണ്ടിയില്ല. നിയമപ്രകാരം, കക്ഷികളുടെ ഒരു വിവരവും വെളിപ്പെടുത്താനാവില്ല എന്നയാൾ തീർത്തു പറഞ്ഞു. പോരാത്തതിന്, യാസിർ ഒരു പോലീസ് സ്റ്റേഷനിലും ക്രിമിനൽ കേസുകളൊന്നും റെജിസ്റ്റർ ചെയ്തിരുന്നില്ല. എന്തോ, കോടതിക്കു വെളിയിലുള്ള സെറ്റില്മെന്റായിരുന്നു ഉദ്ദേശം. കൂടുതൽ വിശദ വിവരങ്ങൾ എനിക്കറിയില്ല. പക്ഷേ അന്ന് ആ സ്ഥാപനത്തിലെ ഒരു ജൂനിയർ അഡ്വക്കേറ്റായിരുന്ന ഒരു മിസ്റ്റർ ജയകുമാർ മേനോൻ എന്നോട് ചില കാര്യങ്ങൾ പറഞ്ഞു. സ്വർണ്ണക്കള്ളക്കടത്താണ് സംഭവം. യാസിറിന് സ്ഥിരമായി സ്വർണ്ണം എത്തിച്ചു കൊടുത്തിരുന്ന ഒരു ഏജന്റ് അയാളെ ചതിച്ചതാണ് സംഭവങ്ങളുടെ തുടക്കം. സ്വർണ്ണം ശുദ്ധമായിരുന്നില്ല. ഏതാണ്ട് രണ്ടര കോടിയുടെ ബിസ്കറ്റുകളാണ് അവർ കൈമാറിയത്. പക്ഷേ യാസിർ അത് അവരുടെ വർക്ക്‌ഷോപ്പിലെത്തിച്ചപ്പോഴാണ്‌ ചതി മനസ്സിലായത്. ഏതെങ്കിലും തരത്തിൽ ലീഗലായി നീങ്ങാനാകുമോ എന്നറിയാനാണ് അയാൾ വക്കീലിനടുത്തെത്തിയത്. പക്ഷേ... കള്ളക്കടത്തു സ്വർണ്ണമല്ലേ. എന്തു ചെയ്യാനൊക്കും ? രമേഷ് അയ്യർ പക്ഷേ ശ്രമിക്കാമെന്നേറ്റു. അയാൾ ഈ ഏജന്റുമായി ബന്ധപ്പെട്ടു. ഒരു സ്ത്രീയാണ്. പേരൊന്നുമറിയില്ല. ഒരു ഒത്തുതീർപ്പു ചർച്ചയായിരുന്നു ലക്ഷ്യം. പക്ഷേ ആ സ്ത്രീ കേസുമായി മുൻപോട്ടു പൊയ്ക്കോളാൻ പറഞ്ഞത്രേ. യാതൊരു കാരണവശാലും യാസിർ കേസ് കൊടുക്കില്ല എന്നായിരുന്നിരിക്കണം അവർ കരുതിയിരുന്നത്. കാരണം, കള്ളക്കടത്ത് സ്വർണ്ണം വാങ്ങുനതും വില്ക്കുന്നതും ഒരു പോലെ കുറ്റകരമാണല്ലോ. എന്നാൽ യാസിർ വല്ലാതെ ഇൻസൾട്ടഡായിരുന്നു. താൻ പിടിക്കപ്പെട്ടാലും, തന്നെ ചതിച്ചവരെ വെറുതേ വിടില്ല എന്ന് തീരുമാനിച്ച അയാൾ ഒരു കേസ് ഫയൽ ചെയ്യാനൊരുങ്ങി. അതോടെ വക്കീൽ അയാളെ കൈ വിട്ടു. കാരണം നിയമപ്രകാരം, അയാളെ സഹായിക്കുന്നതു പോലും കുറ്റകരമാണല്ലോ. പിറ്റേന്ന് പുലർച്ചെ 4 മണിക്കാണ് യാസിറും കുടുംബവും കൊല്ലപ്പെടുന്നത്.” ”ഈ വിവരമൊക്കെ ആ ജൂനിയർ വക്കീൽ തന്നോടു പറഞ്ഞിരുന്നോ ? “ ”യെസ്! വളരെ അപകടകാരിയാണ് ഈ സ്ത്രീ. ചിലപ്പോൾ കൊന്നു കളയാനും മടിക്കില്ല എന്നു തന്നെ അവൻ എന്നോടു പറഞ്ഞിരുന്നു. പക്ഷേ അവരാരാണെന്ന് ജയകുമാറിനും അറിയില്ലായിരുന്നു. ഫോൺ സംഭാഷണങ്ങളിലൂടെയുള്ള പരിചയം മാത്രം. കൂടാതെ അയ്യർ പറഞ്ഞിട്ടുള്ള അറിവുകളും. പക്ഷേ എനിക്കൊരു കേസാക്കാനുള്ള മെറ്റീരിയലൊന്നും കിട്ടിയില്ല. ആരാണ് ഏതാണ് എന്നൊന്നുമറിയാതെ നമ്മൾ എങ്ങനെ പ്രൊസീഡ് ചെയ്യാനാണ്? “ ”താൻ കരുതുന്നത് ആ മിസ്റ്ററി ലേഡിയാണ് ഈ ഡെയ്സി എന്നാണോ ? “ ”എനിക്കതിൽ സംശയമൊന്നുമില്ല സർ. പക്ഷേ ഒരു ഇന്റ്യൂഷൻ മാത്രമാണ്. സോളിഡ് എവിഡൻസൊന്നുമില്ല. ഞാൻ ബാക്കി കൂടി പറയാം. ഈ അഡ്വൊക്കേറ്റ് ജയകുമാർ മേനോൻ, നമ്മുടെ ആൽബിയുടെ ഏറ്റവുമടുത്ത ഒരു സുഹൃത്താണ്.“ ”ഇന്റെറെസ്റ്റിങ്ങ്...“ എസ്.പി. സിഗരറ്റ് ചുണ്ടിൽ വെച്ചു. ”രണ്ടു മൂന്ന് ദിവസം മുൻപ് ആൽബി എന്റെ ഓഫീസിൽ വന്നിരുന്നല്ലോ. ഇന്റർവ്യൂവിന്. അന്ന് അവൻ എന്റെ ഓഫീസിൽ നിന്നും ഞാനുമായി തെറ്റിയാണ് ഇറങ്ങിയത്. ഞാൻ എന്തൊക്കെ പറഞ്ഞാലും, എതിർത്തു സംസാരിക്കുന്ന ഒരു പ്രകൃതമായിരുന്നു. കള്ള ലക്ഷണമാണ്. ആ സെക്കൻഡിൽ തന്നെ ഞാൻ അവനെ നോട്ട് ചെയ്തതാണ്. അന്നത്തെ ദിവസം മുഴുവൻ ഞാനവനെ വിടാതെ പിൻതുടർന്നു. ഞാനും എന്റെ കുറച്ച് ഓഫീസേഴ്സും. അവന്റെ സകല ചെയ്തികളിലും ഒരു രഹസ്യ സ്വഭാവമുണ്ടെന്നു തോന്നി. ഒരു ഫോൺ ചെയ്യാനായി വിജനമായ ആ വെറ്റിനറി യൂണിവേഴ്സിറ്റി കോമ്പൗണ്ടിൽ കയറി. അവിടെ നിന്നും നേരെ ഇറങ്ങി ഡെയ്സിയുടെ വീട്ടിലേക്ക്. ഏതാണ്ട് 2 മണിക്കൂറുകളാണ് അവൻ അവിടെ ചിലവഴിച്ചത്. ഇനി ഞാൻ പറയുന്നത് സർ തെറ്റിദ്ധരിക്കരുത്, അങ്ങോട്ടു കയറിപ്പോയതു പോലല്ല, അവന്റെ ഡ്രസ്സും മുടിയും എല്ലാം അലങ്കോലമായിരുന്നു എന്നാണ് എന്റെ ഓഫീസർ പറഞ്ഞത്. അതെന്തുമായ്ക്കോട്ടെ, നമ്മുടെ വിഷയമല്ല. പിന്നെ അവൻ അന്നു മുഴുവൻ വെറുതേ ബൈക്കിൽ കറങ്ങി നടന്നു. പോയ വഴികളിലെല്ലാം നമ്മുടെ പയ്യന്മാരുണ്ടായിരുന്നു. ഒടുവിൽ അന്നു വൈകിട്ടായപ്പോൾ, അവൻ നമ്മുടെ ഗാന്ധി പാർക്കിനടുത്ത് ചെന്ന് നിന്ന് ജയകുമാറിനെ വിളിച്ചു വരുത്തി.“ ”യൂ മീൻ ആ ജൂനിയർ വക്കീൽ.“ ”യെസ് സർ! ഞാൻ പാർക്കിനുള്ളിൽ തന്നെയുണ്ടായിരുന്നു. ഇവരുടെ മീറ്റിങ്ങ് ഒക്കെ വളരെ വിചിത്രമായി തോന്നി. തികച്ചും വിജനമായ ഒരു ഇരുണ്ട മൂലയിലിരുന്നാണ് അവർ സംസാരിച്ചത്. ഞാൻ ദൂരെയായിരുന്നു. എനിക്ക് കാര്യമായി ഒന്നും മനസ്സിലായില്ല. പക്ഷേ അവർ സംസാരിച്ചു കുറച്ചു കഴിഞ്ഞപ്പോഴേക്കും ജയൻ വയലന്റായി. ഞാൻ, എന്താണ് ഏതാണ് എന്നൊക്കെ അന്വേഷിച്ചു വന്നപ്പോഴേക്കും, അയാൾ ആൽബിയുമായി പിണങ്ങി ഇറങ്ങി പോയിക്കഴിഞ്ഞിരുന്നു . ആൽബി പല വട്ടം വിളിച്ചിട്ടും നിന്നില്ല. എന്തോ ഗുരുതരമായ പ്രശ്നമായിരിക്കണം എന്നു ഞാൻ ഊഹിച്ചു. ഞാൻ ഇന്നലെ മുതൽ ഈ വിഷയവുമായി ആൽബിയുടെ പുറകേ നടക്കുകയായിരുന്നു. എന്താണ് അന്ന് സംഭവിച്ചതെന്നറിയാൻ. പക്ഷേ അവൻ പഠിച്ച കള്ളനാണ്. ഓരോ തവണ ചോദിക്കുമ്പോഴും അവൻ ഓരോ കള്ളമാണ് പറഞ്ഞത്. അതും ആരും വിശ്വസിച്ചു പോകുന്ന തരം നുണകൾ! പക്ഷേ സാറിനറിയാമോ ? എന്റെ ഊഹം ശരിയാണെങ്കിൽ, ആൽബി ഡെയ്സിയെപ്പറ്റിയാണ് ജയനോട് സംസാരിച്ചത്. എനിക്കു തോന്നുന്നത് ഡെയ്സിയും ആൽബിയും തമ്മിൽ എന്തോ ഒരു സംഭവമുണ്ട്. അതിനെപ്പറ്റി ഉറ്റ സുഹൃത്തിനോട് ചർച്ച ചെയ്യാൻ വന്നതാകാനാണ് സാധ്യത.“ ”How did you know that ? “ എസ്.പി.ക്ക് അവസാനം പറഞ്ഞത് വിശ്വസനീയമായി തോന്നിയില്ല എന്ന് മുഖഭാവത്തിൽ തന്നെ വ്യക്തമായിരുന്നു. “വെൽ...സർ ഞാൻ രണ്ടു പേരെ വിട്ടു. ഒരാളെ ആൽബിയുടെ പുറകെയും, മറ്റെയാളെ ജയന്റെ പുറകെയും. ആൽബി നേരേ അവന്റെ വീട്ടിലേക്കാണ് പോയത്. പിന്നെ വേറേ സ്റ്റോപ്പ് ഒന്നുമുണ്ടായിരുന്നില്ല. പക്ഷേ ജയകുമാർ... അവൻ അവിടെനിന്നിറങ്ങി നേരെ പോയത് സാക്ഷാൽ ഡെയ്സി സെബാസ്റ്റ്യന്റെ വീട്ടിലേക്കായിരുന്നു! എന്റെ പയ്യൻ അവിടെ ഏതാണ്ട് 3 മണിക്കൂറുകൾ വെയ്റ്റ് ചെയ്തു. ഒടുവിൽ വക്കീൽ പുറത്തു വരുന്ന ലക്ഷണമൊന്നും കാണാതായപ്പോൾ, ഞാൻ അവനോട് നിർത്തി പോന്നോളാൻ പറഞ്ഞു. ” പോത്തനിൽ നിന്നും ഒരു ദീർഘനിശ്വാസമുതിർന്നു. ഇനി കൂടുതൽ ചോദ്യങ്ങൾ വേണ്ട. ഉടനെ തന്നെ പോത്തൻ ഈ ദുരൂഹതയുടെ ചുരുളഴിക്കും എന്ന് എസ്.പി.ക്ക് മനസ്സിലായി. ചെറിയൊരു നിശബ്ദതക്കു ശേഷമാണ് പോത്തൻ വീണ്ടും സംസാരിച്ചു തുടങ്ങിയത്. സ്വരം താഴ്ന്നിരുന്നു. “അഡ്വൊക്കേറ്റ് ജയകുമാർ മേനോൻ, അന്നു രാത്രി 11:55ന് ഒരു ആക്സിഡന്റിൽ കൊല്ലപ്പെട്ടു സർ.” “വാട്ട്! ! ” എസ്.പി. ഞെട്ടിപ്പോയി. “തീർന്നില്ല ! ആ ആക്സിഡന്റിന്റെ ഡീറ്റയിൽസ് കേൾക്കണോ സാറിന് ? ജയകുമാർ, മദ്യപിച്ച് ലക്കു കെട്ട് അമിത വേഗത്തിൽ, റോങ്ങ് സൈഡിൽ ചെന്ന് നിർത്തിയിട്ടിരുന്ന ഒരു ടിപ്പർ ലോറിയിൽ ചെന്നിടിക്കുകയായിരുന്നത്രെ! ” എസ്.പി. സ്തബ്ധനായി നിന്നു കേൾക്കുകയാണ്. ചുണ്ടിലെ സിഗരറ്റിനു തീ കൊടുക്കാൻ പോലുമാകാതെ. “ഇനി സാറിനു സംശയമുണ്ടോ ? ഡെയ്സി തന്നെയല്ലേ അവൾ ? നമ്മുടെ മിസ്റ്ററി ലേഡി ? “ എസ്.പി. ഒരു ദീർഘനിശ്വാസത്തോടെ സിഗരറ്റ് തിരിച്ച് പാക്കറ്റിലാക്കി. “ഇപ്പൊ എന്താ സിറ്റുവേഷൻ ? ” “ജയകുമാറിന്റെ മരണം മർഡറായി സ്റ്റാർട്ട് ചെയ്തു. ഇത്തിരി മുൻപ്. ടിപ്പറിന്റെ ഡ്രൈവറെ അറസ്റ്റ് ചെയ്യാനായി എസ്. ഐ. പുറപ്പെട്ടിട്ടുണ്ട്. ആൽബിയെ ഞാൻ ആ അയ്യരുടെ ഓഫീസിലേക്ക് വിട്ടിട്ടുണ്ട്. പ്രയോജനമൊന്നുമുണ്ടായിട്ടല്ല. എന്നാലും.” “ആൽബിയെ താൻ വിട്ടോ ? അതെങ്ങനെ ? താനെങ്ങനാഡോ അവരുടെ കേസന്വേഷിക്കുന്നെ ? ” പോത്തൻ ചിരിച്ചു. “ആൽബിയുണ്ടല്ലോ സർ. എന്റെയീ വിരൽ തുമ്പിൽ കെട്ടിയിട്ടിരിക്കുകയാണ് ഞാനവനെ. അവനറിയുന്നില്ലെന്നേയുള്ളൂ. I am playing that stupid, like a fiddle! ” തുടരും കണ്ണൂർകാരൻ ❤️❤️❤️❤️ #💞 പ്രണയകഥകൾ #✍ തുടർക്കഥ #📙 നോവൽ #📚 ട്വിസ്റ്റ് കഥകൾ #📔 കഥ