രുദ്രദൃഷ്ടി ഭാഗം 19 രക്തബിന്ദുവിന്റെ അട്ടഹാസം കാശിയിലെ ആകാശത്തെ കീറിമുറിച്ചു. ഓരോ നിമിഷവും അവന്റെ ശക്തി വർദ്ധിക്കുകയാണ്. ഇന്ദ്രജിത്ത് തന്റെ ശൂലം മുറുക്കെപ്പിടിച്ചു. അവന്റെ ജ്ഞാനദൃഷ്ടിയിൽ രക്തബിന്ദുവിന്റെ ശരീരത്തിലെ ഓരോ ഞരമ്പും ചോര തിളയ്ക്കുന്ന അഗ്നിപർവ്വതങ്ങളെപ്പോലെയാണ് കാണപ്പെട്ടത്. ഇന്ദ്രജിത്ത് മുന്നോട്ട് കുതിച്ചു. പക്ഷേ രക്തബിന്ദുവിന് നേരെ ശൂലം എറിയുന്നതിന് പകരം അവൻ വായുവിൽ ഒരു മുദ്ര വരച്ചു…. "ഓം സംഹാര ഭൈരവായ നമ:"... അവന്റെ ശരീരത്തിൽ നിന്ന് കറുത്ത പുക ഉയരാൻ തുടങ്ങി. അവൻ തന്റെ ക്രോധത്തെ ഒന്നായി കേന്ദ്രീകരിച്ചു….. രക്തബിന്ദു തന്റെ മാന്ത്രിക ഖഡ്ഗം വീശി ഇന്ദ്രജിത്തിന്റെ തോളിന് താഴെ ഒരു മുറിവുണ്ടാക്കി. ഇന്ദ്രജിത്തിന്റെ ചോര നിലത്തു വീണപ്പോൾ അത് കറുത്ത നിറമായി മാറി…. "നിന്റെ ഭക്തിയുടെ രക്തം പോലും ഇപ്പോൾ അശുദ്ധമായിരിക്കുന്നു ഇന്ദ്രജിത്ത്" രക്തബിന്ദു പരിഹസിച്ചു….. ഈ സമയം രുദ്രാവതി തന്റെ ഗംഗാ ചൈതന്യം ഉണർത്തി അന്തരീക്ഷത്തിൽ അദൃശ്യമായ ഒരു വലയം തീർത്തു. രക്തബിന്ദുവിൽ നിന്ന് പുറപ്പെടുന്ന ഓരോ തുള്ളി ചോരയും മണ്ണിൽ തൊടുന്നതിന് മുൻപ് രുദ്രാവതി തന്റെ ജലശക്തിയാൽ വായുവിൽ വെച്ച് മരവിപ്പിക്കാൻ തുടങ്ങി…. "ഇന്ദ്രജിത്ത്... രക്തം മണ്ണിൽ വീഴരുത്.. മണ്ണിൽ വീണാൽ കലിയുഗം അവസാനിക്കും" അവൾ വിളിച്ചു പറഞ്ഞു…. പക്ഷേ ഇത് രുദ്രാവതിയെ തളർത്തിക്കൊണ്ടിരുന്നു. ലക്ഷക്കണക്കിന് രക്തത്തുള്ളികളെ ഒരേസമയം നിയന്ത്രിക്കുക എന്നത് അവളുടെ ദൈവിക ശക്തിക്ക് പോലും താങ്ങാനാവുന്നതിലും അധികമായിരുന്നു. അവളുടെ നാഡികൾ നീല നിറമായി മാറാൻ തുടങ്ങി. അവൾ ഓരോ പ്രാവശ്യവും ശ്വാസം എടുക്കാൻ ബുദ്ധിമുട്ടി…. രക്തബിന്ദു തന്റെ ശരീരം സ്വയം മുറിക്കാൻ തുടങ്ങി. അവന്റെ ദേഹത്തുനിന്ന് നൂറുകണക്കിന് രക്തധാരകൾ പുറപ്പെട്ടു. അവ വായുവിൽ വെച്ച് ഭീകരമായ രൂപങ്ങളായി മാറി. രുദ്രാവതിക്ക് തടയാൻ കഴിയുന്നതിലും വേഗത്തിൽ അവ ഇന്ദ്രജിത്തിനെ വളഞ്ഞു….. ആ രൂപങ്ങൾക്ക് മുഖമില്ലായിരുന്നു, വെറും രക്തം കൊണ്ടുള്ള രൂപങ്ങൾ മാത്രം. അവ ഇന്ദ്രജിത്തിന്റെ ദേഹത്ത് പറ്റിപ്പിടിച്ചു അവന്റെ മാംസം അലിയിക്കാൻ ശ്രമിച്ചു. കാഴ്ചയില്ലാത്ത ഇന്ദ്രജിത്ത് വേദന കൊണ്ട് പുളഞ്ഞു. അവന്റെ ജ്ഞാനദൃഷ്ടിയിൽ പ്രപഞ്ചം മുഴുവൻ ചുവന്ന നിറമായി മാറി….. വേദനയുടെ അങ്ങേയറ്റത്ത് ഇന്ദ്രജിത്ത് തന്റെ മനുഷ്യത്വം പൂർണ്ണമായി വെടിഞ്ഞു. അവന്റെ ജടകൾ ആകാശത്തോളം ഉയർന്നു. അവൻ തന്റെ ശൂലം നിലത്ത് കുത്തി ഒരു ഭീകരമായ ഗർജ്ജനം പുറപ്പെടുവിച്ചു….. "രക്തബിന്ദൂ... നീ ചോര കൊണ്ട് കളിച്ചു. ഇനി ആ ചോര നിന്റെ ഉള്ളിൽ തന്നെ ദഹിക്കും".... ഇന്ദ്രജിത്ത് തന്റെ കൈകൾ വായുവിൽ വിരിച്ചു. അവന്റെ ഉള്ളിലെ ഹാലാഹലം വീണ്ടും ഉണർന്നു. അവൻ വായുവിനെ മുഴുവൻ തന്റെ ഉള്ളിലേക്ക് വലിച്ചെടുക്കാൻ തുടങ്ങി. രക്തബിന്ദുവിന്റെ ശരീരത്തിൽ നിന്ന് പുറത്തുവന്ന ഓരോ തുള്ളി ചോരയും, വായുവിൽ രൂപപ്പെട്ട അസുരന്മാരും ഇന്ദ്രജിത്തിന്റെ വായയ്ക്കുള്ളിലേക്ക് ഒരു ചുഴിപോലെ വലിച്ചെടുക്കപ്പെട്ടു….. ഇന്ദ്രജിത്ത് ആ വിഷരക്തം മുഴുവൻ കുടിക്കുകയായിരുന്നു.. രുദ്രാവതി ഭയത്തോടെ നോക്കി നിന്നു. "ഇന്ദ്രജിത്ത്, വേണ്ട.. അത് നിന്നെ ഒരു അസുരനാക്കി മാറ്റും".... പക്ഷേ ഇന്ദ്രജിത്ത് കേട്ടില്ല. രക്തബിന്ദുവിന്റെ ശക്തി മുഴുവൻ ഇന്ദ്രജിത്തിന്റെ ഉള്ളിലെത്തി. രക്തബിന്ദുവിന്റെ ശരീരം ശുഷ്കിച്ച് ഒരു അസ്ഥികൂടമായി മാറി. അവസാനം ഇന്ദ്രജിത്ത് രക്തബിന്ദുവിന്റെ തല കഴുത്തിന് പിടിച്ചുയർത്തി….. "നീ വിചാരിച്ചത് നിന്റെ രക്തം നിന്നെ രക്ഷിക്കുമെന്നാണ്. പക്ഷേ കാലഭൈരവന്റെ ഉദരം എല്ലാത്തിനെയും ദഹിപ്പിക്കുന്ന ശ്മശാനമാണ്!"..... ഇന്ദ്രജിത്ത് രക്തബിന്ദുവിനെ ഭസ്മമാക്കി. പക്ഷേ യുദ്ധം കഴിഞ്ഞപ്പോൾ ഇന്ദ്രജിത്തിന്റെ രൂപം ഭയാനകമായിരുന്നു. അവന്റെ കണ്ണുകളിൽ നിന്ന് ചോര ഒലിക്കുന്നു ശരീരം മുഴുവൻ കറുത്ത വിഷം പടർന്നിരിക്കുന്നു. അവൻ രുദ്രാവതിയെ നോക്കി ഗർജ്ജിച്ചു. അവൻ അവളെ തിരിച്ചറിയുന്നില്ല.. അവൻ സംഹാര താണ്ടവം ആടാൻ തുടങ്ങി….. തുടരും…. ✍️സന്തോഷ്‌ ശശി….. #📙 നോവൽ #കഥ,ത്രില്ലെർ,ഹൊറർ #💞 പ്രണയകഥകൾ #✍ തുടർക്കഥ #📔 കഥ