ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/6jvdPd8?d=n&ui=v64j8rk&e1=c💞ദേവനന്ദിനി... Part 38💞 പിറ്റേന്ന് രുദ്രൻ ബാങ്കിൽ ഇരിക്കുമ്പോൾ രുദ്രന് ഒരു ഫോൺ കാൾ വന്നു. അത് അറ്റൻഡ് ചെയ്ത രുദ്രനറിഞ്ഞില്ല ആ കോൾ തന്റെ ജീവിതം തന്നെ മാറ്റി മറിക്കുമെന്ന്….. കാൾ അവനു വന്നത് പ്രശസ്ത ബിസിനസ്‌ ഗ്രൂപ്പ്‌ ആയ മാളിയേക്കൽ ഗ്രൂപ്പിലെ ഒരു എംപ്ലോയിയുടെ ഫോണിൽ നിന്നായിരുന്നു. അയാൾക്ക് പേർസണൽ ലോൺ ആവശ്യം വന്നു ബാങ്കിലേക്ക് വിളിച്ചപ്പോൾ കാൾ കൈമാറിയെത്തി രുദ്രന്റെ കയ്യിലേക്കെത്തി… അയാളുമായി സംസാരിച്ചു തമ്മിൽ കാണാനുള്ള സമയം ഫിക്സ് ചെയ്തു കഴിഞ്ഞപ്പോഴാണ് രുദ്രന് ഒരു കാര്യമോർമ്മ വന്നത്. മാളിയേക്കൽ ഗ്രൂപ്പ്‌ ഗൗരിയുടെ കുടുംബത്തിന്റെ ബിസിനസ്‌ സംരംഭമാണല്ലോ എന്ന്…. ഗൗരിയുമായി അടുത്തിട്ട് രണ്ട് മൂന്നു വർഷമായിട്ടും ഇത് വരെ രുദ്രൻ അവളുടെ വീട്ടിലോ അവളുടെ കുടുംബക്കാരുടെ സ്ഥാപനങ്ങളിലോ പോയിട്ടില്ല…. എന്തായാലും പോകുമ്പോൾ ഒന്നവിടെ കാണുകയും ചെയ്യാം…..രുദ്രൻ മനസ്സിൽ ചിന്തിച്ചു… ഉച്ച കഴിഞ്ഞാണ് മീറ്റിംഗ് ഫിക്സ് ചെയ്തിരിക്കുന്നത്….. ഉച്ചയായപ്പോൾ രുദ്രൻ തന്റെ വണ്ടിയിൽ മാളിയേക്കൽ ഗ്രൂപ്പിന്റെ ഓഫീസിനു മുൻപിൽ എത്തി. മൂന്നു നിലയിൽ പ്രൗഡിയോടെ ഉയർന്നു നിൽക്കുന്ന ബിൽഡിംഗ്‌. അവിടേക്ക് വിളിച്ച ആളിനെ കാണാനാണ് വന്നതെങ്കിലും ഉള്ളിൽ അകാരണമായ എന്തോ ഒരു ഭീതി തന്റെയുള്ളിൽ നിറയുന്ന പോലെ തോന്നി രുദ്രന്…. എങ്കിലും അതെല്ലാം മറന്നു അവൻ അകത്തു കയറി റിസപ്ഷനിൽ താൻ വന്ന കാര്യവും കാണേണ്ട ആളെ പറ്റിയുള്ള വിവരവും വെളിപ്പെടുത്തി. അവനോട് അവിടെ കാത്തിരിക്കാൻ പറഞ്ഞു റീസെപ്ഷനിസ്റ്റ് ആർക്കോ ഫോൺ ചെയ്തു…. അല്പസമയം കഴിഞ്ഞപ്പോൾ രുദ്രനോട് ഉള്ളിലേക്ക് കയറാനും ലിഫ്റ്റിൽ കാണേണ്ട ആളുടെ സീറ്റും ഒക്കെ റിസപ്ഷനിൽ നിന്നും അവർ പറഞ്ഞു കൊടുത്തു…. രുദ്രൻ ഉള്ളിലേക്ക് കയറി തനിക്കു കാണേണ്ട ആളിന്റെ സീറ്റിനടുത്തെത്തി… "Mr സജിത്ത് ലാൽ "…. രുദ്രൻ അയാളോട് ചോദിച്ചു… "അതെ….രുദ്രദേവ് അല്ലെ…" " ഇരിക്കൂ "….തൊട്ടടുത്ത സീറ്റ് ചൂണ്ടിക്കാണിച്ചു അയാൾ പറഞ്ഞു… രുദ്രൻ ഇരുന്നു…. "സാർ…. സാറിന്റെ ഡോക്യൂമെന്റസ് ഒക്കെ തന്നിരുന്നെങ്കിൽ എനിക്ക് ബാക്കി ഡീറ്റെയിൽസിലേക്ക് കടക്കാമായിരുന്നു "…. രുദ്രൻ സജിത്ത് ലാലിനോട് പറഞ്ഞു… "അതൊക്കെ തരാം….അതിനു മുൻപ് ഞാൻ ഒരാളെ കൂടി പരിചയപ്പെടുത്തി തരാം…. രുദ്രൻ വരൂ "…. സജിത്ത് ലാൽ അതും പറഞ്ഞു കൊണ്ട് എഴുന്നേറ്റു… "അതെന്തിനാ സാർ….എനിക്ക് സാറിനെ വന്നു കാണേണ്ടതിന്റെയും ഡോക്യൂമെന്റസ് നോക്കി പ്രിലിമിനറി പ്രൊസീഡിങ്‌സ് ചെയ്യേണ്ട കാര്യമേ ഉള്ളൂ …." " സാറിന് ലോൺ എടുക്കാൻ ഈ കമ്പനി പോളിസി പ്രകാരം വല്ല ഡോക്യൂമെന്റും തയ്യാറാക്കാൻ ബാക്കിയുണ്ടെങ്കിൽ സാർ അത് തയ്യാറാക്കിയതിനു ശേഷം വിളിച്ചാൽ മതി "….. രുദ്രൻ വിനയം കൈ വിടാതെ മറുപടി നൽകി…. "രുദ്രൻ വരൂ എന്നെ….രുദ്രന് എന്തായാലും ഗുണമുള്ള കാര്യമാണ് "…… സജിത്ത് ലാൽ ഒന്നു ചിരിച്ചു കൊണ്ട് രുദ്രനെ കൂടെ ചെല്ലാൻ ക്ഷണിച്ചു…. "തന്റെ ടാർഗറ്റ് തികയ്ക്കാൻ ഈ ലോൺ അപ്പ്രൂവ് ആക്കിയാൽ അതൊരു സഹായമാകും. എന്തായാലും ഒന്നു പോയി നോക്കാം ഇയാളുടെ കൂടെ "…..രുദ്രൻ ഒന്നാലോചിച്ചതിന് ശേഷം എഴുന്നേറ്റു… രുദ്രനെയും കൊണ്ട് സജിത്ത് ലാൽ മുന്നോട്ട് നടന്നു. കുറച്ചു മാറി ഒരു ക്യാബിന്റെ മുൻപിലെത്തിയപ്പോൾ രുദ്രൻ ഒന്നു നെറ്റി ചുളിച്ചു… ആ ക്യാബിന്റെ ഗ്ലാസ്സ് ഡോറിൽ മാനേജിങ് ഡയറക്ടർ എന്ന് പതിച്ചിരിക്കുന്നു… ഇങ്ങോട്ട് തന്നെ കൊണ്ട് വരേണ്ട ആവശ്യമെന്താണുള്ളതെന്നു രുദ്രൻ ചിന്തിക്കുമ്പോഴേക്കും സജിത്ത് ഡോർ തുറന്നു ഉള്ളിലേക്ക് കയറിയിരുന്നു….. 🌸🌸🌸🌸🌸🌸🌸🌸🌸🌸🌸🌸🌸🌸🌸 ഒന്നു ശങ്കിച്ചു നിന്ന രുദ്രൻ സജിത്തിന്റെ പിന്നാലെ ക്യാബിന്റെ അകത്തേക്ക് കയറി… അകത്തേക്ക്‌ കയറിയ രുദ്രൻ കണ്ടു വിശാലമായ ചെറിയൊരു ഹാളിൽ എം ഡി യുടെ ചെയറിൽ ഇരിക്കുന്ന വെളുത്ത സിൽക്ക് ജുബ്ബയണിഞ്ഞ വെളുത്തു പ്രൗഡമായ മുഖഭാവത്തോട് കൂടിയ ആ മനുഷ്യനെ… മാളിയേക്കൽ ഗ്രൂപ്പിന്റെ അമരക്കാരൻ പരമേശ്വര മേനോനെ….ഗൗരിയുടെ അച്ഛനെ… രുദ്രൻ പരമേശ്വര മേനോനെ ഒന്നു കൂടി നോക്കി… ആരെയും കൂസാത്ത താൻ പോരിമ പടർന്ന മുഖഭാവം. അൽപ്പം നര കയറിയ തല. മുന്നിൽ ഒരല്പം കയറിയിട്ടുണ്ട്… അയാളുടെ ടേബിളിനോട് ചേർന്നുള്ള കസേരയിൽ മുപ്പതിനോട് അടുത്ത് പ്രായം തോന്നിക്കുന്ന രണ്ട് ചെറുപ്പക്കാരുമിരിക്കുന്നു. അഹങ്കാരം നിറഞ്ഞ മുഖഭാവം രണ്ട് പേർക്കും…. പരമേശ്വര മേനോന്റെ മുൻപിലെത്തിയ രുദ്രനോട് അയാൾ മുന്പിലെ സീറ്റ് ചൂണ്ടി ഇരിക്കാൻ ആംഗ്യം കാണിച്ചു…. രുദ്രൻ ഒന്നു മടിച്ചിട്ടാണെങ്കിലുമിരുന്നു…. "രുദ്രൻ…അല്ലെ "….. ഗാംഭീര്യമാർന്ന ശബ്ദത്തോടെയുള്ള മേനോന്റെ ചോദ്യം… രുദ്രൻ അതേയെന്നു തലയാട്ടി….. "എന്തിനാ തന്നെയിങ്ങോട്ട് വരുത്തിയതെന്നു അറിയാമോ "…. വീണ്ടും മേനോന്റെ ചോദ്യം…. "ഇല്ല….സാർ….ഇദ്ദേഹത്തിന് ഒരു പേർസണൽ ലോൺ ആവശ്യമുണ്ടെന്നു പറഞ്ഞത് കൊണ്ടാണ് ഞാനിങ്ങോട്ട് വന്നത്. സാറിന്റെ അടുത്തേക്ക് കൊണ്ട് വന്നതെന്തിനാണെന്ന് മനസ്സിലായില്ല "….. സജിത്ത് ലാലിനെ ചൂണ്ടിക്കൊണ്ട് രുദ്രൻ പറഞ്ഞു…. "സജിത്ത്…..താൻ പൊയ്ക്കോളൂ….എനിക്ക് രുദ്രനുമായി കുറച്ചു കാര്യങ്ങൾ സംസാരിക്കാനുണ്ട് "…. മേനോൻ സജിത്ത് ലാലിനോട് പറഞ്ഞു…. രുദ്രൻ സജിത്ത് ലാലിനോട് എന്തെങ്കിലും ചോദിക്കാൻ നിൽക്കുമ്പോഴേക്കും സജിത്ത് ലാൽ പോയിക്കഴിഞ്ഞിരുന്നു…. "രുദ്രൻ അവനെ നോക്കേണ്ട…തന്നെ ഇവിടെ എത്തിക്കാനുള്ള ഞങ്ങളുടെ ഒരു ട്രാപ് ആയിരുന്നു ലോണിന് വേണ്ടിയുള്ള ആ ഫോൺ കോൾ "….മേനോന്റെ മുഖത്തൊരു പുച്ഛം നിറഞ്ഞ ചിരി നിറഞ്ഞു… "രുദ്രന് കാര്യമെന്താണെന്ന് മനസ്സിലായിട്ടുണ്ടാവില്ല…..മനസ്സിലാക്കിത്തരാം "…. അതും പറഞ്ഞു മേനോൻ തന്റെ മുന്നിലിരുന്ന ഐ പാഡ് എടുത്തു അതിൽ നിന്നുമെന്തോ തുറന്നു അവന്റെ മമ്പിലേക്ക് നീക്കി വച്ചു….. ഐ പാഡിലേക്ക് ഒന്നു നോക്കിയ രുദ്രൻ ഞെട്ടിപ്പോയി…. തലേ ദിവസം ഫോർട്ട്‌ കൊച്ചിയിലെ ഹോട്ടലിൽ താനും ഗൗരിയും കൂടി ഇരുന്നു സംസാരിക്കുന്ന ചിത്രമായിരുന്നു രുദ്രൻ അതിൽ കണ്ടത്…. "ഇപ്പോൾ മനസ്സിലായല്ലോ അല്ലെ…തന്നെയിങ്ങോട്ട് വരുത്തിയതെന്തിനാണെന്ന്"…. മേനോന്റെ ചോദ്യം കേട്ട് രുദ്രൻ തലയുയർത്തി നോക്കി… "താനും എന്റെ മകളും തമ്മിൽ ഈ ബന്ധം എന്ന് തുടങ്ങി എന്നൊന്നും എനിക്കറിയണ്ട. എനിക്ക് പറയാനുള്ളത് ഈ നിമിഷം എല്ലാമവസാനിപ്പിച്ചോ…അതാണ് തനിക്കു നല്ലത് "… മേനോൻ തുടർന്നു… "അവളുടെ വിവാഹം ആരുമായി നടത്തണമെന്നത് ഞങ്ങൾ ആദ്യമേ തീരുമാനിച്ചു കഴിഞ്ഞതാ…ഞങ്ങളുടെ നിലയ്ക്കും വിലയ്ക്കും ഒത്ത ലണ്ടനിൽ സെറ്റിൽ ചെയ്തിരിക്കുന്ന ഞങ്ങളുടെ ബന്ധത്തിലുള്ള ഒരു ബിസിനസ്‌കാരന്റെ മകനുമായിട്ട് ആദ്യമേ പറഞ്ഞുറപ്പിച്ചതാണ് അവളുടെ കാര്യം…." "നിന്നെ പോലെ അനാഥനായ സ്ഥിരവരുമാനമുള്ള ജോലിയില്ലാത്ത എന്തിനു കയറിക്കിടക്കാൻ ഒരു വീട് പോലുമില്ലാത്ത നിന്നെ പോലെയൊരുവനു തരാൻ മാത്രം അധഃപതിച്ചിട്ടില്ല ഞങ്ങൾ…" "ഇതൊന്നും നിന്നോട് പറയേണ്ട കാര്യമില്ല. നിന്നെക്കുറിച്ചു എല്ലാ വിവരവും ഇവിടെയിരുന്നു കൊണ്ട് അറിഞ്ഞ ഞങ്ങൾക്ക് ഒരു പൂ പറിക്കുന്ന പോലെ തീർക്കാവുന്നതേയുള്ളൂ. ഞങ്ങൾക്കെതിരെ വരുന്നതിനെയൊക്കെ തീർത്തു തന്നെയാണ് ശീലവും. പിന്നെ നിന്റെ കാര്യത്തിൽ എന്റെ മകളുടെ അടുത്തും തെറ്റുണ്ടാവാം അത് കൊണ്ട് നിന്നെയിങ്ങോട്ട് വിളിച്ചു വരുത്തി അറിയിച്ചെന്നു മാത്രം. എന്റെ മകളായിട്ട് നിനക്കെന്തെങ്കിലും പ്രതീക്ഷ തന്നിട്ടുണ്ടെങ്കിൽ അതൊക്കെ വേരോടെ പിഴുതു കളയാനും ഒക്കെ ഒരുങ്ങിക്കോ എന്നുംപറയാനും കൂടിയാണ് നിന്നെയിങ്ങോട്ട് വരുത്തിയത് "… അത് പറഞ്ഞു നിർത്തുമ്പോൾ മേനോന്റെ മുഖത്ത് ഒരു പുച്ഛവും ധാർഷ്ട്യവും നിറഞ്ഞു നിന്നു…. രുദ്രൻ അടുത്തുള്ള ആ ചെറുപ്പക്കാരുടെ മുഖത്തേക്ക് നോക്കി. അതെ ഭാവങ്ങൾ തന്നെയവർക്കും…. "സാർ…ഒരു കാര്യം ചോദിച്ചോട്ടെ…." ആദ്യത്തെ ഞെട്ടലിൽ നിന്നും മുക്തനായ രുദ്രൻ തികഞ്ഞ ശാന്തതയോടെ മേനോന്റെ മുഖത്തേക്ക് നോക്കി ചോദിച്ചു…. മേനോൻ എന്താണെന്ന് തലയാട്ടിക്കൊണ്ട് ചോദിച്ചു…. "നിങ്ങളുടെ മകളോട് ചോദിച്ചോ ഈ കല്യാണത്തിന് അവൾക്ക് സമ്മതമാണോ എന്ന് "….. (രുദ്രൻ) "അവളോട് ചോദിക്കേണ്ട ആവശ്യമില്ല… അവളുടെ സമ്മതം നോക്കേണ്ട ആവശ്യം ഞങ്ങൾക്കില്ല. അവളുടെ കാര്യം ഞങ്ങൾ തീരുമാനിക്കും. അത് ഞങ്ങൾ നടത്തുകയും ചെയ്യും "….. മേനോൻ പുച്ഛത്തോടെ മറുപടി നൽകി… രുദ്രനത് കേട്ടൊന്നു ചിരിച്ചു…. "എനിക്കറിയാം…നിങ്ങൾ അവളോട് സമ്മതം ചോദിച്ചാൽ ഇല്ലെന്ന മറുപടി മാത്രമേ കിട്ടൂ എന്ന്. കാരണം നിങ്ങളുടെ മകളെ എനിക്കറിയാവുന്ന പോലെ നിങ്ങൾക്കറിയില്ല. അല്ലെങ്കിൽ നിങ്ങളൊരിക്കലും അറിയാൻ ശ്രമിച്ചിട്ടില്ല "…. രുദ്രൻ അക്ഷോഭ്യനായി പറഞ്ഞു… "ഡാ…. ഇരുന്നു പിടയ്ക്കാതെ…ഇത്രയും നേരം സഭ്യമായി നിന്നോട് സംസാരിച്ചത് ഞങ്ങൾ നിന്നോട് കാണിച്ച ഒരു മര്യാദ.. നീ അവളുടെ ചുറ്റുപാട് കണ്ടിട്ടാണ് അവൾക്ക് പിന്നാലെ പോയതെന്ന് ഞങ്ങൾക്കറിയാം.. നിന്നെ തീർത്തു കളഞ്ഞാലും ആരും ചോദിക്കില്ല. ഇവിടേക്ക് വരുത്താതെ ഇരുചെവിയറിയാതെ നിന്നെയങ്ങ് തീർക്കാനും ഞങ്ങൾക്കറിയാൻ പാടില്ലാഞ്ഞിട്ടല്ല……അത് കൊണ്ട് നേരത്തെ പറഞ്ഞത് അനുസരിച്ചാൽ നിനക്ക് കൊള്ളാം"……രുദ്രന്റെ ചിരിയോടെയുള്ള മറുപടിയിൽ ക്ഷോഭം കൊണ്ട മേനോന്റെ ശബ്ദമുയർന്നു….. "സാർ….എന്നെങ്കിലും ഒരു ദിവസം നിങ്ങളുടെ അടുത്ത് വന്നു ഞങ്ങളുടെ കാര്യം ചോദിക്കണമെന്നായിരുന്നു ഞാൻ വിചാരിച്ചത്. ഇതിപ്പോൾ ഏതായാലും നിങ്ങൾ എന്നെ ഇങ്ങോട്ട് വരുത്തിച്ച സ്ഥിതിയ്ക്ക് ഞാൻ എനിക്ക് പറയാനുള്ളത് അങ്ങു പറഞ്ഞേക്കാം…." "നിങ്ങളുടെ മകളെ ഞാൻ സ്നേഹിച്ചത് അവളുടെ പണമോ പ്രതാപമോ കണ്ടല്ല. എനിക്കവളെ അല്ലാതെ അവളുടെ പണമോ പ്രതാപമോ ഒന്നും എനിക്കാവശ്യമില്ല. ഈ എതിർപ്പുകൾ ഒക്കെ മുൻപിൽ കണ്ടു തന്നെയാണ് ഞാൻ അവളെ ഇഷ്ടപ്പെട്ടത്…" പിന്നെ നിങ്ങളിപ്പോൾ ഉയർത്തിയ ഭീക്ഷണി. അതിനു ഞാൻ പുല്ല് വിലയെ കൽപ്പിക്കുന്നുള്ളൂ. എന്നെയങ്ങോട്ട് തീർക്കും എന്ന് ഭീക്ഷണി മുഴക്കുമ്പോൾ നിങ്ങളൊരു കാര്യമോർത്തില്ല. അവൾക്ക് വേണ്ടി ജീവൻ കളയാനും തയ്യാറായ ഒരുത്തൻ ആണ് അവളെ സ്നേഹിക്കുന്ന ഈ ഞാനെന്നു…" " എനിക്കും അവൾക്കും ഒരുമിക്കാൻ വിധിയുണ്ടെങ്കിൽ നിങ്ങൾക്കെന്നല്ല ആര് വിചാരിച്ചാലും ഞങ്ങളെ പിരിക്കാൻ സാധിക്കില്ല. അതോണ്ട് ആ തരത്തിലുള്ള ഭീക്ഷണി സാറ് നാലു മടക്കാക്കി അവിടെ തന്നെ വച്ചോ…." പറഞ്ഞു നിർത്തുമ്പോൾ രുദ്രന്റെ സംസാരത്തിലും ഒരു പുച്ഛം വന്നു…. രുദ്രൻ പറഞ്ഞു നിർത്തിയതും ചെറുപ്പക്കാരിൽ ഒരുവൻ രുദ്രന്റെ അടുത്തേക്ക് വന്നു അവന്റെ കോളറിൽ പിടിച്ചു കൊണ്ട് അലറി…. "പ്ഫ…. തരത്തിൽ പോയി കളിക്കെടാ നായെ…. ഞങ്ങളുടെ അടുത്തു വന്നിട്ട് ഇത് പോലെ സംസാരിക്കാൻ ഇത് വരെ ആരും ധൈര്യപ്പെട്ടിട്ടില്ല. കഞ്ഞി കുടിക്കാൻ വകയില്ലാത്ത അവനു പ്രേമിക്കാൻ വലിയ വീട്ടിലെ പെണ്ണിനെ തന്നെ വേണമെന്ന്…." "കയ്യെടുക്കെടോ "… രുദ്രനവന്റെ മുഖത്തേക്ക് കടുപ്പിച്ചു നോക്കികൊണ്ട് പറഞ്ഞു… "ഹേമചന്ദ്ര….. വിട് അവനെ….ഇവിടെ വച്ചു ഒരു സീൻ വേണ്ട… ഇവനുള്ളത് പിന്നെ പുറത്തു വച്ചു കൊടുക്കാം "…. മേനോൻ ചെറുപ്പക്കാരനെ നോക്കി പറഞ്ഞു.. രുദ്രൻ തന്റെ ഷർട്ടിന്റെ കോളർ നേരെയാക്കിയെഴുന്നേറ്റു….എന്നിട്ട് മൂന്നു പേരോടുമായി പറയാൻ തുടങ്ങി… "നിങ്ങളുടെ ഈ വിരട്ടലിൽ വീണു പോകുന്നവരുണ്ടാവാം. എന്നെ ആ കൂട്ടത്തിൽ കൂട്ടല്ലേ…പിന്നെ നിങ്ങൾ പറഞ്ഞ പണവും പ്രതാപവും….ഒരു പ്രളയം വന്നാൽ ഏതു വലിയവന്റെയും കാലിന്റെ അടിയിലെ മണ്ണൊലിച്ചു പോകും…അത് പോലെയേ ഉള്ളൂ നിങ്ങളീ പറഞ്ഞതും…" "ഞാൻ ഗൗരിയെയാണ് ഇഷ്ടപ്പെട്ടത്. അവളെ എന്റെ ജീവിതത്തിൽ കൂട്ടാനാണ് ഞാനാഗ്രഹിക്കുന്നത്. നിങ്ങളുടെ പണവും പ്രതാപവുമല്ല…എന്റെ ജീവിതത്തിൽ ഒരു പെണ്ണുണ്ടെങ്കിൽ അതവൾ മാത്രമായിരിക്കും…പിന്നെ ഭീക്ഷണിപ്പെടുത്തിയ പോലെ നിങ്ങൾ എന്നെയങ്ങു തീർത്താലും ഞാൻ സന്തോഷത്തോടെ ആ മരണത്തെ സ്വീകരിക്കും. മരണത്തിൽ എനിക്ക് ഭയമില്ല…." രുദ്രൻ മേനോന്റെ നേരെ നോക്കിക്കൊണ്ട് വീണ്ടും പറഞ്ഞു തുടങ്ങി…. "സാർ….എപ്പോഴെങ്കിലും സ്വന്തം മകളെയൊന്ന് മനസ്സിലാക്കാൻ ശ്രമിക്കണം. സ്നേഹത്തിന്റെ വിലയറിയാത്ത നിങ്ങളോട് പറഞ്ഞിട്ട് കാര്യമില്ലെന്നറിയാം. ഞാനെന്തായാലും ഈ ബന്ധത്തിൽ നിന്നും പിന്നോട്ടില്ല…നിങ്ങൾക്ക് ചെയ്യാൻ പറ്റുന്നതൊക്കെ ചെയ്തോ…." രുദ്രൻ അതും പറഞ്ഞു തന്റെ ബാഗുമെടുത്ത് തിരിഞ്ഞു നടന്നു…. മേനോൻ കോപത്തോടെ വലിഞ്ഞു മുറുകിയ മുഖവുമായി അവൻ പോകുന്നതും നോക്കിയിരുന്നു….. 🌸🌸🌸🌸🌸🌸🌸🌸🌸🌸🌸🌸🌸🌸🌸 ബാങ്കിൽ തിരിച്ചെത്തിയ രുദ്രൻ ഗൗരിയെ ഫോണിൽ വിളിച്ചു നോക്കി…. അപ്പുറത്ത് നിന്നും സ്വിച്ചഡ് ഓഫ്‌ എന്നാണ് കേട്ടത്. അവളുടെ വീട്ടിൽ സ്ഥിതി ഗുരുതരമായിരിക്കുമെന്ന് അവനു മനസ്സിലായി. അവനുടനെ തന്നെ ജിജോയെ വിളിച്ചു നടന്ന കാര്യങ്ങൾ പറഞ്ഞു…. ഒന്നു സൂക്ഷിക്കണം എന്ന മറുപടി ജിജോയിൽ നിന്നും അവനു കിട്ടി… നാലഞ്ച് ദിവസം കടന്നു പോയി. ഈ ദിവസങ്ങളിൽ ഗൗരിയെ വിളിക്കുമ്പോൾ ഒന്നുകിൽ സ്വിച്ച്ഓഫ് അല്ലെങ്കിൽ ഫോൺ റിംഗിനിടയിൽ കട്ടായ വിവരങ്ങൾ കിട്ടിക്കൊണ്ടിരുന്നു. അവളോട് സംസാരിക്കാൻ കഴിയാത്തത് അവനെ വീർപ്പുമുട്ടിച്ചു. അവളെ കാണാനായി ഈ ദിവസങ്ങളിൽ കോളേജിൽ പോയപ്പോൾ അവൾ ആ ദിവസങ്ങളിൽ വന്നിട്ടില്ല എന്ന അറിവ് കിട്ടി…. ഒരു ദിവസം രുദ്രന് ഒരു കസ്റ്റമറുമായി മീറ്റിംഗ് ഉണ്ടായിരുന്നത് വൈകീട്ട് ആറു മണിക്കായിരുന്നു. അതാകട്ടെ കുറച്ചു ദൂരെയും. തിരിച്ചു അവന്റെ താമസസ്ഥലത്തേക്ക് പോകുമ്പോൾ സമയം പതിവിലും വൈകിയിരുന്നു. മെയിൻ റോഡിൽ നിന്നും താമസസ്ഥലത്തേക്ക് പോകുന്ന വഴിയിലേക്ക് തിരിയുന്നിടത്തേക്ക് കഷ്ടിച്ച് ഒരു കിലോമീറ്റർ ദൂരം ബാക്കിയുള്ളപ്പോൾ തന്നെ ഒരു ബൈക്ക് പിന്തുടരുന്നത് പോലെ തോന്നി രുദ്രന്… രുദ്രൻ സ്റ്റേറ്റ് ഹൈവേയിൽ നിന്നും തന്റെ താമസസ്ഥലത്തേക്ക് പോകുന്ന വഴിയ്ക്ക് കയറി. വഴിയൽപ്പം വിജനമായിരുന്നു. രുദ്രൻ മിററിലൂടെ നോക്കുമ്പോൾ ആ ബൈക്ക് തന്റെ വഴിയിലേക്ക് കയറിയത് അവൻ കണ്ടു. അവന്റെ മനസ്സിൽ ഒരു അപകട സൂചന തെളിഞ്ഞു. രുദ്രൻ തന്റെ ബൈക്കിന്റെ സ്പീഡിൽ കൂട്ടി….. എന്നാൽ അധികദൂരം മുന്നിടുമ്പോഴേക്കും ആ ബൈക്ക് രുദ്രന്റെ വണ്ടിയുടെ അടുത്തെത്തിയിരുന്നു. രണ്ടു പേരുണ്ട് വണ്ടിയിൽ. ഹെൽമെറ്റ്‌ വച്ചത് കൊണ്ട് മുഖം വ്യക്തമല്ല… അപ്രതീക്ഷിതമായി അവർ രുദ്രന്റെ വണ്ടിയെ ഓവർടേക്ക് ചെയ്തു അവന്റെ വണ്ടിക്ക് വട്ടം വച്ചു. രുദ്രൻ സഡൻ ബ്രേക്കിട്ടു. ശക്തിയിൽ മുന്നോട്ടൊന്നു ആഞ്ഞു കൊണ്ട് വണ്ടി നിന്നു….. രുദ്രൻ വണ്ടി സ്റ്റാന്റിലിട്ടു നിർത്തി എഴുന്നേറ്റു. വണ്ടിയിൽ വന്നവർ അത് സ്റ്റാന്റിലിട്ട് തന്റെ നേർക്ക് കുതിക്കുന്നത് അവൻ കണ്ടു. ഒരുത്തന്റെ കയ്യിൽ ഒരു ഇരുമ്പ് റോഡുമുണ്ട്…. അപകടം മണത്ത രുദ്രൻ ചുറ്റുമൊന്നു നോക്കി. ആരും ആ പരിസരത്തില്ല. രുദ്രൻ ചിന്തിച്ചു നിക്കുമ്പോഴേക്കും ഒരുത്തൻ അവനെ ആഞ്ഞു ചവിട്ടി കഴിഞ്ഞിരുന്നു… രുദ്രൻ നിലത്തേക്ക് ഒന്നു വേച്ചു കൊണ്ട് വീണു. രുദ്രൻ പതുക്കെ എഴുന്നേറ്റു നിന്നപ്പോഴേക്കും ചവിട്ടിയവൻ വീണ്ടുമവനെ പ്രഹരിക്കാനായി വന്നു. വീണ്ടും തന്റെ നേരെ കൈ പൊക്കിയ അവന്റെ താഡനത്തെ രുദ്രൻ സമർത്ഥമായി തടഞ്ഞു. അവന്റെ നാഭിക്കിട്ട് രുദ്രൻ ആഞ്ഞു ചവിട്ടി. അവൻ വീണു…. പെട്ടെന്ന് തലയിൽ എന്തോ പതിച്ചതും തന്റെ കാഴ്ചകൾ മങ്ങുന്ന പോലെയും രുദ്രന് തോന്നി…രണ്ടാമൻ രുദ്രന്റെ തലയിൽ റോഡ് കൊണ്ട് അടിച്ചതാണ്. രുദ്രന് ചുറ്റും കറങ്ങുന്ന പോലെയും ഒരു മരവിപ്പും ശരീരം ആടുന്നതായും അനുഭവപ്പെട്ടു…. വീണ്ടും അവൻ റോഡ് കൊണ്ട് രുദ്രനെ പ്രഹരിക്കാനായി കൈ പൊക്കുമ്പോൾ അങ്ങോട്ട് ഒരു വണ്ടിയുടെ ശക്തിയിൽ ഉള്ള വെളിച്ചം കണ്ടു… ഒരു ടൊയോട്ട ഫോർച്യുണർ അവിടെ വന്നു നിൽക്കുന്നതും മുൻവശത്തെ ഇടത് ഭാഗത്തു നിന്നും ഒരാൾ ഇറങ്ങുന്നത് മങ്ങിയ ആ കാഴ്ചയിലും രുദ്രൻ കണ്ടു. പതിയെ അവന്റെ കണ്ണുകൾ അടഞ്ഞു തുടങ്ങി….. ( തുടരും ) കണ്ണൂർകാരൻ ❤️❤️❤️❤️ #📙 നോവൽ #📚 ട്വിസ്റ്റ് കഥകൾ #📔 കഥ #💞 പ്രണയകഥകൾ #✍ തുടർക്കഥ