ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/6jnw916?d=n&ui=v64j8rk&e1=c🦋 മരുമകൾ 🦋 30 " ഇത്തിരി ഒന്ന് മെനയായിട്ട് വന്നതായിരുന്നു. വയറു വയ്യാതാവാൻ അവിടെച്ചെന്ന് എന്താ കഴിച്ചത് മോളെ? " അവിടെ എന്റെ അമ്മായി നിർത്താൻ പ്ലാൻ ഒന്നുമില്ല. എന്റെ വീട്ടീന്ന് ഞാൻ ആഹാരം കഴിച്ചിട്ടാണ് എനിക്ക് വയറ് വയ്യാതായത് എന്നാണ് ഈ പറയുന്നത്...! ഞാൻ മറുപടി കൊടുക്കാതെ ചായ കയ്യിൽ എടുത്തു കുടിച്ചു. ഹരിയേട്ടൻ അപ്പോഴേക്കും ചായ കുടിച്ചു കഴിഞ്ഞിരുന്നു. മുറിയിലേക്ക് വരാൻ എന്നെ കണ്ണ് കാണിച്ച് ആള് എഴുന്നേറ്റു പോയി. ' ഇപ്പൊ എങ്ങനെ? ഞാൻ പറഞ്ഞത് ശരിയല്ലേ? അമ്മയ്ക്ക് തന്നോടുള്ള സ്നേഹം കണ്ടോ? ' എന്നൊക്കെ പറയാനാകും റൂമിലേക്ക് വിളിച്ചത്. ചായ കുടിച്ച ഗ്ലാസ്സൊക്കെ കഴുകി വച്ച് റൂമിലേക്ക് ചെല്ലുമ്പോ എന്നെക്കാത്ത് കട്ടിലിൽ ഇരിപ്പുണ്ട് ഹരിയേട്ടൻ. " ദേവു വാ... ഇവിടിരിക്ക്.... " ബെഡിൽ ഹരിയേട്ടന്റെ അടുത്തായിട്ട് കൈ കൊണ്ട് തട്ടി ആളെന്നെ നോക്കി. ഞാൻ ഒന്നും മിണ്ടാതെ അരികിൽ ചെന്നിരുന്നു. പറയാൻ പോകുന്നത് എന്താണെന്ന് ഏകദേശം ഊഹമൊക്കെ എനിക്ക് ഉണ്ടല്ലോ? അത് കൊണ്ട് ആ മുഖത്തേക്കേ നോക്കിയില്ല. നിലത്തോട്ട് നോക്കി കുനിഞ്ഞിരുന്നു. " നിനക്ക് ഒരു സർപ്രൈസ് കൂടി പ്ലാൻ ചെയ്തിരുന്നതാ... ഇനിയിപ്പോ സർപ്രൈസ് ആക്കി വയ്ക്കുന്നില്ല. ഇന്നത്തെ സന്തോഷത്തിൽ ഇതൊടെ പറഞ്ഞേക്കാം... " എന്റെ നെറ്റി ചുളിഞ്ഞു. ഇപ്പൊ അമ്മ പുരാണം കേൾക്കും എന്ന് കരുതിയിടത്ത് സർപ്രൈസോ? " അന്നത്തെ ട്രിപ്പ്‌ ക്യാൻസൽ ആയപ്പോ ഇവിടെ ഒരാള് വിഷമിച്ചിരിക്കുന്നത് കണ്ടു. അതിന് പകരമായിട്ട് ഒരു ചെറിയ യാത്ര പ്ലാൻ ചെയ്യുന്നുണ്ട്. " " ശരിക്കും....??? " ഹരിയേട്ടൻ പറഞ്ഞ് അവസാനിപ്പിച്ചു കൂടി കാണില്ല. Excitement ഒരല്പം കൂടിപ്പോയെനിക്ക്. കണ്ണും മിഴിച്ച് ശബ്ദം ഉയർത്തിയുള്ള എന്റെ ' ശരിക്കും ' കേട്ട് വന്ന ചിരി അടക്കി പിടിക്കാതെ എന്നെ നോക്കി ഇരിപ്പുണ്ടാള്. ഞാൻ ഒരു ചമ്മിയ ചിരി ചിരിച്ചു കൊണ്ട് തല താഴ്ത്തി. " ഇത്രേം excitement വേണ്ട കേട്ടോ.... അങ്ങനെ വലിയ യാത്ര ഒന്നുമല്ല. രാജേഷിന്റെ വൈഫ്‌ന് ചക്കുളത്ത് എന്തൊക്കെ നേർച്ച ഉണ്ടത്രേ... അത് നടത്താനായിട്ട് അവരുടെ പോകുന്നുണ്ട്. അവൻ എന്നോട് വരുന്നോ ന്ന് ചോദിച്ചു. അപ്പോ ഞാനും കരുതി എന്നാപ്പിന്നെ നമ്മുടെ ഫസ്റ്റ് യാത്ര അമ്പലം തന്നെ ആയിക്കോട്ടേന്ന്.... പോകുന്ന വഴിക്ക് കൊട്ടാരക്കര ഗണപതി അമ്പലത്തിലും പിന്നെ ഇടയ്ക്കുള്ള ഒന്ന് രണ്ടിടത്തും കൂടി കയറാമെന്നാ അവൻ പറഞ്ഞത്. " " എന്നാ പോകുന്നെ....? " " സൺ‌ഡേ.... നിനക്ക് അന്ന് ബുദ്ധിമുട്ടൊന്നും ഇല്ലല്ലോ അല്ലെ? " ആള് ചോദിച്ചത് എന്താണെന്ന് മനസ്സിലായത് കൊണ്ട് ഞാനും ഇല്ലെന്ന് തലയാട്ടി. " അമ്പലപ്പുഴ പോവോ? " ചക്കുളം കാവീന്ന് അധികദൂരം ഇല്ല അമ്പലപ്പുഴ ശ്രീകൃഷ്ണ സ്വാമി ക്ഷേത്രം എന്ന് പറഞ്ഞു കേട്ടിട്ടുണ്ട്. ഒരിക്കൽ മീനുവും മധുവും മാമീടെ വീട്ടുകാരുമായിട്ട് പോയപ്പോ അവിടുന്ന് പാൽപ്പായസം കൊണ്ട് വന്നിരുന്നു. എന്ത് മധുരമായിരുന്നു. നാവ് കൂടി ഇറങ്ങിപ്പോകും പോലെ..... "അമ്പലപ്പുഴ കൃഷ്ണന് നേദിച്ചതാ... അതാണ്‌ ഇത്ര രുചി" ന്ന് അമ്മ അന്ന് പറഞ്ഞു. അന്നേ തുടങ്ങിയ ആശയാണ് അമ്പലപ്പുഴ പോണമെന്ന്. " പോണോ? " കൈ കെട്ടി ഇരുന്നാണ് ചോദ്യം. " മ്മ്... " ഞാൻ മൂളിയതും " എന്നാ പോയേക്കാം " എന്ന് പറഞ്ഞു ചിരിച്ചു. എനിക്കും വല്ലാത്ത സന്തോഷം തോന്നി. യാത്ര പോകുന്നു എന്ന് പറഞ്ഞത് കൊണ്ട് മാത്രമല്ല.... ഹരിയേട്ടൻ ചോദിക്കുമെന്ന് കരുതിയ കാര്യം ചോദിക്കാത്തതിലായിരുന്നു എനിക്ക് കൂടുതൽ സന്തോഷം. അമ്മേടെ കാര്യം ഇല്ലേ? അത് തന്നെ...! അങ്ങനെ ഓരോന്ന് പറഞ്ഞിരുന്നപ്പോഴാണ് അന്ന് വൈകിട്ടാണല്ലോ മീനൂന്റെ വീട്ടിലേക്ക് വിരുന്നിനു വിളിച്ചിരിക്കുന്നത് എന്ന് ഓർത്തത്. " അയ്യോ... ഞാൻ അത് മറന്നു. " ഹരിയേട്ടൻ നെറ്റിയിൽ കൈ വച്ചു. എന്റെ മുഖം മങ്ങി. അപ്പൊ ഇതും നടക്കൂല്ല....! " അത് സാരമില്ല... നമ്മൾ രാവിലെ പോയിട്ട് വൈകിട്ട് ഇങ്ങെത്തും... അവിടെ രാത്രി പോയാ മതീല്ലോ..? അന്ന് പുലർച്ചെ പോയാൽ വൈകിട്ട് ആറ് മണിക്ക് മുൻപ് നമുക്ക് തിരികെ വരാം. വന്നിട്ട് മധുന്റെ വീട്ടിൽ പോകാം. " അത് കേട്ടപ്പോ പോയ സന്തോഷം പതിൻമടങ്ങായി തിരികെ വന്നു. എന്നാലോ ഇതും അമ്മ എങ്ങനെ എങ്കിലും മുടക്കുമല്ലോ എന്നാലോചിച്ചപ്പോ ഉള്ളിൽ ഉദിച്ച സന്തോഷം പിന്നെയും കെട്ടു പോയി. " ഇതെന്ത് പറ്റി? കത്തി നിന്ന ബൾബിന്റെ ഫ്യൂസ് പോയല്ലോ? " ചൂണ്ടു വിരൽ കൊണ്ട് എന്റെ ഇടത്തെ കവിളിൽ കുത്തിയിട്ടാണ് ചോദ്യം. ഞാൻ ഒന്നുമില്ലെന്ന് കണ്ണടച്ച് കാണിച്ചു. അല്ലാതെ ഞാനിപ്പോ എന്താ ചിന്തിച്ചേന്ന് പറഞ്ഞാ ഉള്ള ഫ്യൂസ് ഹരിയേട്ടൻ തന്നെ ഊരി എടുത്തോണ്ട് പോകും. വെറുതേ എന്തിനാ ഉള്ള സന്തോഷം കൂടി കളയണത്? " ഹാ.... പിന്നെ... ശനിയാഴ്ച ഈവനിംഗ് കോളേജിൽ ഒരു ഫങ്ക്ഷൻ ഉണ്ട്. ഫാമിലി ഗെറ്റ് ടുഗതർ. എല്ലാ കൊല്ലവും ഉള്ളതാ.... ടീച്ചിങ് സ്റ്റാഫുകളുടെ എല്ലാം ഫാമിലി കാണും. ഇത്തവണ നീയും വരണം.... " " ഞാനോ? " " മ്മ്... എന്താ? എന്റെ ഫാമിലി പിന്നെ ആരാ? " " അത്.... ഞാൻ.... " എനിക്കീ ഫങ്ക്ഷൻ ഒന്നും പൊതുവെ താല്പര്യം ഇല്ലാത്തതാണ്. പ്രത്യേകിച്ചും പരിചയമില്ലാത്ത ഇടങ്ങളിൽ.... ആരോട് എങ്ങനെ പെരുമാറണം എന്ന് സത്യത്തിൽ എനിക്ക് അറിഞ്ഞു കൂടാ.... ഒന്നിനും ഒരിടത്തും പോയിട്ടില്ലാത്തതിന്റെ കുഴപ്പമാണ്. ഞാൻ കാരണം ഹരിയേട്ടൻ നാണം കെടേണ്ടി വന്നാലോ? അങ്ങനെ ഒരു ചിന്ത പോയത് കൊണ്ടാവാം ഞാൻ ഓക്കേ പറയാതെ മടിച്ചു നിന്നത്. " ഞാൻ.... ശരിയാവില്ല ഹരിയേട്ടാ... എനിക്ക് ഇതൊന്നും ശീലമില്ല. " " ഇത് കൊള്ളാം....! എന്റെ ദേവൂ.... ശീലങ്ങൾ ഉണ്ടാവുന്നത് ഒരു കാര്യം പല തവണ ചെയ്യുമ്പോഴാണ്. ഇതിപ്പോ കേട്ട പാടേ ശീലമില്ല എന്ന് പറഞ്ഞാൽ? ഇങ്ങനെ ഒക്കെ അല്ലെ ശീലിക്കുന്നത്? എന്റെ ഭാര്യയെ എന്റെ സുഹൃത്തുക്കൾക്ക് പരിചയപ്പെടുത്തി കൊടുക്കണ്ടെ എനിക്ക്...? പിന്നെ... നിനക്ക് എന്റെ കോളേജ് ഒക്കെ കാണണ്ടേ? " തോളിൽ കൂടി കയ്യിട്ട് എന്നെ ചേർത്ത് പിടിച്ച് അങ്ങനെ പറഞ്ഞപ്പോ മറുത്തു പറയാൻ എനിക്കും തോന്നിയില്ല. തലയാട്ടി സമ്മതിക്കുമ്പൊ അന്നത്തെ ടെൻഷൻ എനിക്ക് ഇപ്പോഴേ തുടങ്ങിയിരുന്നു. 🦋 🦋 🦋 🦋 🦋 രണ്ട് ദിവസം പ്രത്യേകിച്ച് വിശേഷങ്ങൾ ഒന്നും ഇല്ലാതെ കടന്ന് പോയി. ഹരിയേട്ടൻ യാത്രയുടെ കാര്യം അമ്മയോട് പറഞ്ഞതായി തോന്നിയില്ല. പക്ഷെ ശനിയാഴ്ച കോളേജിൽ പോകുന്ന കാര്യം പറഞ്ഞിരുന്നു. അമ്മേടെ സംസാരത്തിൽ നിന്ന് തന്നെയാണ് അതെനിക്ക് മനസ്സിലായത്. ഹരിയേട്ടൻ കോളേജിൽ പോയിക്കഴിഞ്ഞ് പണിയൊക്കെ ഒതുക്കി ഞാനും അമ്മയും കൂടി വരാന്തയിൽ ചെന്നിരുന്നപ്പോഴാണ് അമ്മ ചോദിച്ചത്. " ശനിയാഴ്ച മോള് പോകുന്നില്ലേ? " " മ്മ്... എന്നോടും കൂടെ ചെല്ലാൻ ഹരിയേട്ടൻ പറഞ്ഞു. എല്ലാരുടേം ഫാമിലി കാണൂന്ന്... " " അവന്റെ കൂട്ടുകാരന്മാരുടെ ഭാര്യമാർക്കൊക്കെ ജോലി ഉണ്ടെന്ന് തോന്നുന്നു. കോളേജ് അധ്യാപകരല്ലേ? ഒട്ട് മിക്കവാറും ജോലി ഉള്ളത് നോക്കിയല്ലേ കെട്ടുള്ളൂ....? " അതിനിടയ്ക്കും എനിക്കിട്ട് വയ്ക്കുന്നുണ്ട്. ഞാനത് ശ്രദ്ധിക്കാത്തത് പോലെ ഇരുന്നു. " അവന്റെ ഡിപ്പാർട്ട്മെന്റിൽ ഒരു ടീച്ചർ ഉണ്ടേ... ഒരു രാജലക്ഷ്മി. അവരുടെ അനിയത്തിയെ അവര് തന്നെ ഹരിക്ക് വേണ്ടി ആലോചിച്ചതാ.... ആ കൊച്ചിന് എം ടെക് കഴിഞ്ഞു ഏതോ കോളേജിൽ ജോലി ഉണ്ടായിരുന്നു.... " ഓഹ്... തൊടങ്ങി....! ഞാൻ തലയിൽ കൈ താങ്ങി ഇരുന്നതും " ചേച്ചി " ന്ന് വിളിച്ചു അടുത്ത വീട്ടിലെ ശൈലജ മാമി കേറി വന്നു. " എന്താ ശൈലജേ? " അമ്മ തല ചരിച്ചു മാമിയെ നോക്കിയാണ് ചോദ്യം. " ഇത്തവണ ചക്കയില്ലേ ചേച്ചി? " " ഇല്ലെടി.... കഴിഞ്ഞ പ്രാവശ്യം ഈ സമയത്തും നമ്മളെ പ്ലാവില് ചക്ക ഉണ്ടായിരുന്നു... ഇപ്പഴില്ല. എന്ത്? " " കൊച്ചിന് ചക്കവരട്ടി തിന്നാൻ കൊതി. എന്റടുത്തല്ലേ അതിന് പറയാനൊക്കൂ... " " അതും ശെരിയാ.... ആരും ഇല്ലാത്ത കൊച്ചല്ലേ? നീ തന്നെ അതിനെ നല്ലോണം നോക്കാൻ... ഈ സമയത്ത് അതിന് വേണ്ടതൊക്കെ വച്ചൊണ്ടാക്കി കൊടുക്കണം. " അമ്മായി മാമിയെ അനുകൂലിക്കുന്നുണ്ട്. " മൂത്ത ചേച്ചിലവിടെ കാണോ? " വല്യമ്മേ ആണ് ഉദ്ദേശിച്ചത് എന്ന് തോന്നുന്നു. " ഇല്ലെടി... ഇത്തവണ അവിടേം ഇല്ല. എവിടുന്നേലും കിട്ടിയാ ഞാൻ നിന്നെ വിളിച്ചു തരാം. ഒരു വയറ്റ്കണ്ണിക്ക് വേണ്ടിയല്ലേ? " മാമി അമ്മയോട് തലയാട്ടി കാണിച്ച ശേഷം എന്നോടും എന്തൊക്കെയോ വിശേഷങ്ങൾ ചോദിച്ചു. ഞാൻ ചിരിയോടെ മറുപടി കൊടുത്തു. " എന്നാ ഞാൻ പോട്ടേ ചേച്ചി. കൊച്ചവിടെ ഒറ്റയ്‌ക്കെ ഒള്ളൂ.... " അമ്മയോട് പറഞ്ഞിട്ട് എന്നേം നോക്കി തലയാട്ടി മാമി നടന്നു പോയി. " കൊച്ചാണ് പോലും...! നാണം ഇല്ലാലോ ഇവക്ക്? നല്ലൊരു ചെറുക്കനായിരുന്ന്... നല്ല സർക്കാർ ജോലീം... അതിനെക്കൊണ്ട് ഒരു അനാഥ പെണ്ണിനെ കെട്ടിച്ചേക്കണ്... അതും ഹിന്ദുക്കളെ അനാഥാലയത്തിന്നും അല്ല. ക്രിസ്ത്യാനികളെ അനാഥാലയത്തീന്ന്.... " അമ്മായീടെ പറച്ചില് കേട്ട് ഞാൻ കണ്ണും മിഴിച്ച് അവരെ നോക്കി. അനാഥാലയത്തിനും ഉണ്ടോ ഹിന്ദു എന്നും ക്രിസ്ത്യൻ എന്നും?????!!!! 🦋 🦋 തുടരും 🦋 🦋 🦋 Sorry for the delay.... 🙏 കണ്ണൂർകാരൻ ❤️❤️❤️ #✍ തുടർക്കഥ #📔 കഥ #📚 ട്വിസ്റ്റ് കഥകൾ #📙 നോവൽ #💞 പ്രണയകഥകൾ