കൈ എത്തും ദൂരത്തു.. ബദ്രിയും യുവിയും ചന്ദ്ര ശേഖറും നേരെ പോയത് ASP വിനോദ് കുമാറിൻ്റെ ഓഫീസിലേക്കായിരുന്നു. യുവി ആയിരുന്നു ഡ്രൈവിംഗ് സീറ്റിൽ. , ബദ്രി പിൻ സീറ്റിൽ ചാരിയിരുന്ന് പതിയെ കണ്ണുകൾ അടച്ചു. അവൻ പതിയെ ഓർമ്മകളിലേക്ക് വഴുതി വീണു... ​ ​ബദ്രി തൻ്റെ ഒരു കൂട്ടുകാരൻ്റെ ഹൗസ് വാമിങ്ങിന് പോയപ്പോഴാണ് മഹേഷ് വർമ്മയെ കണ്ടത്. അദ്ദേഹത്തെ കണ്ടപ്പോൾ തന്നെ ബദ്രിയുടെ മനസ്സിൽ ഒരുപാട് പഴയ കാര്യങ്ങൾ ഓടിയെത്തി. ​"ഹലോ അങ്കിളേ, എന്നെ മനസ്സിലായോ?" ബദ്രി മഹേഷ് വർമ്മയുടെ അടുത്ത് പോയി ആകാംഷയോടെ ചോദിച്ചു. ​"ഇല്ല മോനേ... എനിക്കങ്ങോട്ട്..." മഹേഷ് വർമ്മ സംശയിച്ചു. ​അപ്പോൾത്തന്നെ ബദ്രി ഫോൺ എടുത്ത് ഗാലറി ഓപ്പൺ ചെയ്ത് അദ്ദേഹത്തിന് നേരെ നീട്ടി. മഹേഷ് വർമ്മ അത് വാങ്ങി നോക്കിയതും ഒന്ന് ഞെട്ടിപ്പോയി! ​ഫോട്ടോയിൽ മഹേഷ് വർമ്മയും ഭാര്യ സുഭദ്രയും, ബദ്രിയുടെ അച്ഛൻ ഗൗതമും അമ്മ സുചിത്രയും, അവരുടെ കൂടെ ജാനകിയും ഒരു കൊച്ചു പയ്യനും (ബദ്രി) ഉണ്ടായിരുന്നു. ​ബദ്രിയുടെ അച്ഛൻ ഗൗതം മഹേഷ് വർമ്മയുടെ ബെസ്റ്റ് ഫ്രണ്ടായിരുന്നു. എല്ലാ വീക്കെൻഡിലും അച്ഛനും അമ്മയ്ക്കും ഒപ്പം ബദ്രി മഹേഷിൻ്റെ വീട്ടിൽ പോകുമായിരുന്നു. അന്ന് ജാനകിയുമായി നല്ല കൂട്ടായിരുന്നു. ​പെട്ടെന്നാണ് അവരുടെ സന്തോഷങ്ങൾക്ക് വില്ലനായി ആ ആക്സിഡൻ്റ് വന്നത്. അതിൽ അവന് തൻ്റെ എല്ലാമെല്ലാമായ അച്ഛനെയും അമ്മയെയും നഷ്ടപ്പെട്ടു. ​"അങ്കിളിന് വലിയ മാറ്റമൊന്നുമില്ല. അതുകൊണ്ട് പെട്ടെന്ന് മനസ്സിലായി," അവൻ ഒരു കുസൃതിച്ചിരിയോടെ പറഞ്ഞു. ​"മോൻ പോയതിന് ശേഷം ആദ്യം കുറച്ചൊക്കെ നിന്നെ ഓർക്കുമായിരുന്നു. ജാനകി ഇടയ്ക്ക് നിന്നെപ്പറ്റി അന്വേഷിക്കുമായിരുന്നു. പിന്നെ ജീവിതത്തിൻ്റെ തിരക്കും ജോലിയുമായി എല്ലാം മറവിക്ക് വിട്ടുകൊടുത്തു," മഹേഷ് വർമ്മ നിശ്വസിച്ചു. ​"നാട്ടിലെ പ്രമാണിയുടെ മകൻ ഒരു അനാഥയെ കല്യാണം കഴിച്ചതിൻ്റെ പേരിൽ വീട്ടിൽ നിന്ന് പുറത്താക്കിയതാണ് എന്നെ. പിന്നെ അവരുമായി ഒരു ബന്ധവും ഇല്ലായിരുന്നു. പിന്നെ അച്ഛൻ്റെ മരണവാർത്ത അറിഞ്ഞപ്പോൾ ചെറിയച്ഛൻ വന്ന് എന്നെ കൊണ്ടുപോയി. വീട്ടിൽ പ്രശ്നമാവുന്നത് കൊണ്ട് ആരും അറിയാതെ എൻ്റെ കാര്യങ്ങൾ ഒക്കെ നോക്കി. ഒരു വർഷം മുന്നേ അദ്ദേഹവും പോയി..." ​"അന്ന് പോകുമ്പോൾ ആകെ സമ്പാദ്യമായി കൊണ്ടുപോയത് ഒരുപാട് ഓർമ്മകൾ നിറഞ്ഞ ഈ ആൽബം ആയിരുന്നു. ഇടയ്ക്ക് അത് എടുത്ത് നോക്കും. അങ്ങനെ എപ്പോഴോ ആണ് അത് ഫോണിൽ പകർത്തിയത്," ബദ്രി ചെറുചിരിയോടെ പറഞ്ഞു. ​പെട്ടെന്ന് "അച്ഛാ, വാ പോകാം!" എന്ന് ഒരു പെൺകുട്ടി കുറച്ചകലെ നിന്ന് വിളിച്ചു പറഞ്ഞു. ​അക്ഷമയോടെ നിൽക്കുന്ന അവളെ ചൂണ്ടി മഹേഷ് വർമ്മ ബദ്രിയെ നോക്കി പറഞ്ഞു: "അതാണ് ജാനകി." ​വർഷങ്ങൾക്ക് ശേഷം അന്ന് അവൻ വീണ്ടും ജാനകിയെ കണ്ടു. അവളെ കണ്ടതും, നഷ്ടപ്പെട്ട ഏതോ സന്തോഷം തിരിച്ചു കിട്ടിയതുപോലെയായിരുന്നു അവന്. അവൾ പക്ഷേ ഇവനെ കണ്ടില്ല. ​"ബദ്രി, വാ... അവളെ പരിചയപ്പെടാം. അവൾക്കതൊരു സർപ്രൈസ് ആകും," മഹേഷ് വർമ്മ ക്ഷണിച്ചു. ​പക്ഷേ, അവൻ "പിന്നെ ഒരു ദിവസമാവാം" എന്ന് പറഞ്ഞ് ആ അവസരം ഒഴിവാക്കി. ജാനകിയെ ഫേസ് ചെയ്യാൻ എന്തോ ഒരു മടി. ​പിന്നീട് പല സ്ഥലങ്ങളിൽ വെച്ച് ഇവർ പരസ്പരം കാണാറുണ്ടായിരുന്നു. അന്നൊക്കെ മഹേഷ് വർമ്മ ബദ്രിയെ വീട്ടിലേക്ക് ക്ഷണിച്ചെങ്കിലും ബദ്രി പോയിരുന്നില്ല. ​അന്ന് വർഷങ്ങൾക്ക് ശേഷം അവളെ കണ്ടപ്പോൾ തുടങ്ങിയ ഒരിഷ്ടം അവൻ്റെ ഉള്ളിൽ കയറിക്കൂടി. പിന്നെ അവളുടെ അച്ഛനിൽ നിന്ന് അവളെക്കുറിച്ച് കേൾക്കാൻ തുടങ്ങിയപ്പോൾ അതൊരു പ്രണയമായി വളർന്നു. ​ഇടയ്ക്കിടെ പലയിടങ്ങളിൽ വെച്ച് അവളെ കാണുമായിരുന്നു. അപ്പോഴൊക്കെ അവളോട് സംസാരിക്കാൻ കൊതിക്കുമെങ്കിലും, അവൻ്റെ മനസ്സ് വിലക്കി. ​ഒരു ദിവസം കോളേജിൽ എല്ലാവരും കൂട്ടംകൂടി നിൽക്കുന്നത് കണ്ട് വെറുതെ പോയി നോക്കിയതാണ്. അപ്പോഴാണ് ശ്രീ ഹരിയുമായി വഴക്കിട്ട് നിൽക്കുന്ന അവളെ കണ്ടത്. ബദ്രി ശരിക്കും ഞെട്ടിയെങ്കിലും പുറത്ത് കാണിച്ചില്ല. പരിചയമില്ലാത്തവരെ പോലെ സംസാരിച്ചു. ​പിന്നീട് ക്ലാസ്സ് വരാന്തയിലൂടെ നടക്കുമ്പോൾ അവൻ അവളുടെ ക്ലാസ്സിൻ്റെ മുന്നിൽ എത്തുമ്പോൾ ഒന്ന് സ്ലോ ആവും, അവളെ കാണാൻ. കൂട്ടുകാരുടെ കൂടെ ചിരിച്ചും കളിച്ചും നിൽക്കുന്ന അവളെ മിക്കപ്പോഴും കാണാറുമുണ്ടായിരുന്നു. ​പിന്നീട്, അവൾ ഇഷ്ടമാണെന്ന് പറഞ്ഞ് അവൻ്റെ പിന്നാലെ വരാൻ തുടങ്ങി. അന്നൊക്കെ ബദ്രി വല്ലാതെ കൊതിച്ചുപോയിരുന്നു, "ഒരുപാട് ഇഷ്ടമാണ് പെണ്ണേ നിന്നെയും" എന്ന് പറയാൻ. ​പക്ഷേ, ഒരു അനാഥനായ തന്നെ അവളുടെ വീട്ടുകാർ അംഗീകരിക്കുമോ എന്നൊരു ഭയമായിരുന്നു അവൻ്റെ മനസ്സിൽ. അറിഞ്ഞുകൊണ്ട് അച്ഛൻ്റെ ഉറ്റ സുഹൃത്തിനെ ചതിക്കാൻ അവൻ തയ്യാറായിരുന്നില്ല. ​പഠനം കഴിഞ്ഞ് ഒരു ജോലി കിട്ടി അവളുടെ അച്ഛനോട് നേരിട്ട് സംസാരിക്കാം, അദ്ദേഹത്തിന് സമ്മതമാണെങ്കിൽ മാത്രം അവളോട് തൻ്റെ ഇഷ്ടം തുറന്നു പറയാമെന്ന് അവൻ തീരുമാനിച്ചു. ഒന്നിനും ഉറപ്പില്ലാത്തതിനാൽ വെറുതെ അവൾക്ക് ആഗ്രഹം നൽകേണ്ട എന്ന് കരുതി, അവൾ ഇഷ്ടം പറയുമ്പോഴെല്ലാം അവൻ പുറമെ ദേഷ്യം പ്രകടിപ്പിച്ചു. ​"ഡാ ബദ്രി, ഓഫീസ് എത്തി," യുവി വിളിച്ചപ്പോഴാണ് അവൻ ഓർമ്മകളിൽ നിന്ന് ഉണർന്നത്. ​അവർ കാറിൽ നിന്നിറങ്ങി ASP വിനോദ് കുമാറിൻ്റെ ക്യാബിൻ ലക്ഷ്യമാക്കി നടന്നു. യുവിയുടെ അമ്മാവൻ ചന്ദ്ര ശേഖർ കൂടെ ഉണ്ടായിരുന്നത് കൊണ്ട് കാര്യങ്ങൾ എളുപ്പമായി. ​ASP വിനോദ് കുമാറിൻ്റെ കർശന നിർദ്ദേശം കിട്ടിയതോടെ പോലീസുകാർക്ക് വേറെ വഴിയില്ലായിരുന്നു. അവർ കേസ് രജിസ്റ്റർ ചെയ്തു. ശ്രീ ഹരിക്കെതിരെ കേസെടുത്തു. രക്ഷപ്പെടാൻ പഴുതുകളില്ലാതെ വന്നപ്പോൾ ശ്രീ ഹരി ഒളിവിൽ പോയി. ​ ​ജാനകി ഉമ്മറത്ത് അച്ഛൻ്റെ ചുമലിൽ ചാരി ഇരിക്കുകയായിരുന്നു. അദ്ദേഹം എന്തൊക്കെയോ പറഞ്ഞ് അവളെ ആശ്വസിപ്പിക്കുന്നുണ്ട്. അവൾ എല്ലാത്തിനും വെറുതെ മൂളിക്കൊണ്ടിരുന്നു. ​അമ്മ സുഭദ്ര മുറ്റത്ത് ചെടികൾക്ക് വെള്ളം നനയ്ക്കുന്നു. ഇടയ്ക്കിടെ ജാനകിയെ നോക്കുന്നുണ്ട്. സുഭദ്ര അവളുടെ അവസ്ഥ കണ്ട് സാരിത്തുമ്പ് കൊണ്ട് കണ്ണുനീര് തുടച്ചു. അവളെ പഴയ ജാനകിയാക്കി മാറ്റാനുള്ള ശ്രമത്തിലാണ് മഹേഷ് വർമ്മയും സുഭദ്രയും. പക്ഷേ, അവൾക്ക് ഒരു മാറ്റവുമില്ല; എപ്പോഴും റൂമിൽ ഒരേ ഇരിപ്പാണ്. ​പെട്ടന്നാണ് അവരുടെ മുറ്റത്തേക്ക് ഒരു കാർ വന്ന് നിർത്തിയത്... #📔 കഥ #📝 ഞാൻ എഴുതിയ വരികൾ #📙 നോവൽ #💞 പ്രണയകഥകൾ