ਸਿਕੰਦਰ ਸਿੰਘ ਨੇ ਕਮਾਈ ਨੂੰ ਲਾਗ਼ਤ ਬਣਾ, ਕਰ ਲਏ ਨਗ ਪੰਜ ਤੋਂ ਪੰਜਾਹਪੰਜਾਬ ਇੱਕ ਖੇਤੀ ਮੋਹਰੀ ਸੂਬਾ ਹੈ ਜਿੱਥੇ ਬਹੁਤੇ ਵਸਨੀਕ ਖੇਤੀਬਾੜੀ ਕਰਕੇ ਆਪਣੇ ਪਰਿਵਾਰ ਨੂੰ ਪਾਲਦੇ ਹਨ। ਖੇਤੀ ਦੇ ਨਾਲ-ਨਾਲ ਜੇਕਰ ਕੋਈ ਲਾਹੇਵੰਦ ਸਹਾਇਕ ਕਿੱਤਾ ਵੀ ਅਪਨਾ ਲਿਆ ਜਾਵੇ ਤਾਂ ਸੋਨੇ ਤੇ ਸੁਹਾਗੇ ਵਾਲੀ ਗੱਲ ਹੋ ਜਾਂਦੀ ਹੈ। ਡੇਅਰੀ ਫਾਰਮਿੰਗ ਦਾ ਧੰਦਾ ਵੀ ਇੱਕ ਲਾਹੇਵੰਦ ਧੰਦਾ ਹੈ ਅਤੇ ਪਰਿਵਾਰ ਦੀ ਰੋਜ਼ਾਨਾ ਆਮਦਨ ਲਈ ਸਹਾਇਕ ਹੈ। ਅਜਿਹਾ ਧੰਦਾ ਕਰਨ ਵਾਲਾ ਅਗਾਂਹਵਧੂ ਸਫ਼ਲ ਕਿਸਾਨ ਹੈ - ਸਿਕੰਦਰ ਸਿੰਘ, ਜਿਸ ਦੀ ਉਮਰ 35 ਸਾਲ ਹੈ, ਜੋ ਪਿੰਡ ਜਵਾਹਰਕੇ, ਤਹਿਸੀਲ ਅਤੇ ਜ਼ਿਲ੍ਹਾ ਮਾਨਸਾ ਦਾ ਰਹਿਣ ਵਾਲਾ ਹੈ।ਸਿਕੰਦਰ ਸਿੰਘ ਦੀ ਪੜਾਈ ਦੇ ਨਾਲ-ਨਾਲ ਪਸ਼ੂਆਂ ਵਿੱਚ ਸ਼ੁਰੂ ਤੋਂ ਹੀ ਰੁਚੀ ਰਹੀ ਹੈ ਅਤੇ ਉਸਨੇ 10+2 ਕਰਨ ਤੋਂ ਬਾਅਦ ਆਮ ਰਵਾਈਤੀ ਖੇਤੀ ਅਪਣਾਈ । ਪਰ ਪਸ਼ੂਆਂ ਨਾਲ ਪਿਆਰ ਉਸਨੂੰ ਸਾਲ 2018 ਵਿਚ ਡੇਅਰੀ ਫਾਰਮਿੰਗ ਦੇ ਸਹਾਇਕ ਕਿੱਤੇ ਵੱਲ ਖਿੱਚ ਲਿਆਇਆ। ਸ਼ੁਰੂਆਤ ਵਿੱਚ ਘਰ ਦੀਆਂ 4-5 ਮੱਝਾਂ ਦੇ ਨਾਲ ਇੱਕ ਗਾਂ ਹੋਰ ਖਰੀਦ ਕੇ ਡੇਅਰੀ ਫਾਰਮਿੰਗ ਦਾ ਧੰਦਾ ਸ਼ੁਰੂ ਕੀਤਾ। ਸ਼ੁਰੂ ਵਿੱਚ ਇਹਨਾਂ ਦੀ ਸਾਂਭ-ਸੰਭਾਲ ਘਰ ਵਿੱਚ ਵਿੱਚ ਹੀ ਕੀਤੀ ਪਰ ਫਿਰ ਹੋਰ ਪਸ਼ੂ ਖਰੀਦਣ ਤੋਂ ਬਾਅਦ ਆਪਣਾ ਫਾਰਮ ਪਿੰਡ ਤੋ ਬਾਹਰ ਬਣਾ ਲਿਆ। ਅੱਜ ਸਿਕੰਦਰ ਕੋਲ ਲਗਭਗ 30 ਵਧੀਆ ਨਸਲ ਦੀਆਂ ਮੱਝਾਂ ਜਿਨਾਂ ਵਿੱਚ ਮੁਰ੍ਹਾ ਨਸਲਾਂ ਮੁੱਖ ਹਨ ਅਤੇ 15 ਐੱਚ ਐੱਫ ਗਾਂਵਾਂ ਹਨ। ਨਸਲ ਸੁਧਾਰ ਲਈ ਇੱਕ ਸਾਂਡ ਵੀ ਰੱਖਿਆ ਹੋਇਆ ਹੈ। ਫਾਰਮ ਉਤੇ ਰੋਜ਼ਾਨਾ ਔਸਤਨ 4-4.25 ਕੁਇੰਟਲ ਦੁੱਧ ਪੈਦਾ ਹੰਦਾ ਹੈ। ਇਹ ਦੁੱਧ ਦੀ ਵਿੱਕਰੀ ਮਾਨਸਾ ਸ਼ਹਿਰ ਦੇ ਬਾਰਹਟਾ ਚੌਂਕ ‘ਤੇ ਸਿਕੰਦਰ ਆਪ ਹੀ ਕਰਦਾ ਹੈ। ਉਹ ਖਰੀਦਦਾਰਾਂ ਨੂੰ ਦੁੱਧ ਦੀ ਸ਼ੁੱਧਤਾ ਦੀ ਪੂਰੀ ਗਰੰਟੀ ਦੇਂਦਾ ਹੈ, ਸ਼ੁੱਧ ਅਤੇ ਸਾਫ-ਸੁਥਰਾ ਦੁੱਧ ਦੇ ਚਾਹਵਾਨ ਲੋਕੀ ਲਾਈਨਾਂ ‘ਚ ਲੱਗ ਕੇ 70 ਰੁਪਏ ਪ੍ਰਤੀ ਲੀਟਰ ਦੇ ਹਿਸਾਬ ਨਾਲ ਖਰੀਦ ਲੈਂਦੇ ਹਨ। ਦੁੱਧ ਨੂੰ ਵੇਚਕੇ 2.5-3.0 ਲੱਖ ਰੁਪਏ ਅਤੇ ਪਸ਼ੂਆਂ ਦੀ ਖਰੀਦ-ਵੇਚ ਕਰਕੇ 1-1.25 ਲੱਖ ਰੁਪਏ ਪ੍ਰਤੀ ਮਹੀਨਾ ਮੁਨਾਫਾ ਕਮਾਉਂਦਾ ਹੈ।ਸਿਕੰਦਰ ਸਿੰਘ ਨੇ ਪਸ਼ੂਆਂ ਦੇ ਪਾਲਣ ਪੋਸ਼ਣ ਉੱਤੇ ਹੋਣ ਵਾਲੇ ਖਰਚੇ ਅਤੇ ਆਮਦਨ ਬਾਰੇ ਹਿਸਾਬ ਰੱਖਣ ਲਈ ਵਹੀ-ਖਾਤਾ ਵੀ ਲਗਾਇਆ ਹੋਇਆ ਹੈ। ਮਾੜਾ ਅਤੇ ਘੱਟ ਦੁੱਧ ਦੇਣ ਵਾਲੇ ਪਸ਼ੂਆਂ ਦੀ ਛਾਂਟੀ ਕਰਕੇ ਵੇਚ ਦਿੰਦਾ ਹੈ। ਪਸ਼ੂਆਂ ਲਈ ਫੀਡ ਆਪਣੇ ਘਰ ਵਿੱਚ ਹੀ ਤਿਆਰ ਕਰਦਾ ਹੈ । ਪਸ਼ੂਆਂ ਦੇ ਸ਼ੈੱਡ ਆਧੁਨਿਕ ਢੰਗ ਨਾਲ ਬਣਾਏ ਹੋਏ ਹਨ, ਜੋ ਕਿ ਪੂਰੇ ਹਵਾਦਾਰ ਅਤੇ ਪਸ਼ੂਆਂ ਲਈ ਅਰਾਮਦਾਇਕ ਹਨ। ਹਰ ਮੱਝ ਲਈ ਵੱਖਰਾ-ਵੱਖਰਾ ਰਹਿਣ ਦਾ ਪ੍ਰਬੰਧ ਹੈ ਅਤੇ ਪਸ਼ੂਆਂ ਦੇ ਥੱਲੇ ਮੈਟ ਵਿਛਾਏ ਹੋਏ ਹਨ ਤਾਂ ਜੋ ਪਸ਼ੂ ਆਰਾਮ ਨਾਲ ਬੈਠ ਕੇ ਜੁਗਾਲੀ ਕਰ ਸਕਣ ਅਤੇ ਪਸ਼ੂਆਂ ਨੂੰ ਕਿਸੇ ਤਰ੍ਹਾਂ ਦੀ ਕੋਈ ਸੱਟ ਨਾ ਲੱਗੇ। ਸਿਕੰਦਰ ਸਿੰਘ ਨੇ ਆਪਣੀਆਂ ਮੱਝਾਂ ਦੇ ਲਈ ਸਾਫ਼ ਸੁਥਰੇ ਪੀਣ ਵਾਲੇ ਪਾਣੀ ਦਾ ਵੀ ਵਧੀਆ ਪ੍ਰਬੰਧ ਕੀਤਾ ਹੋਇਆ ਹੈ ਅਤੇ ਗਰਮੀ ਦੇ ਅਸਰ ਨੂੰ ਘਟਾਉਣ ਲਈ ਫਾਰਮ ਦੇ ਵਿੱਚ ਹੀ ਇੱਕ ਪੱਕਾ ਟੋਭਾ ਵੀ ਬਣਾਇਆ ਹੋਇਆ ਹੈ । ਇਸ ਟੋਭੇ ਵਿੱਚ ਮੱਝਾਂ ਗਰਮੀ ਤੋਂ ਰਾਹਤ ਅਤੇ ਅਰਾਮਦਾਇਕ ਮਹਿਸੂਸ ਕਰਦੀਆਂ ਹਨ। ਪਸ਼ੂਆਂ ਨੂੰ ਸਿਹਤਮੰਦ ਰੱਖਣ ਲਈ ਯੂਨੀਵਰਸਿਟੀ ਦੀ ਸਿਫਾਰਸ਼ ਅਨੁਸਾਰ ਨਿਯਮਤ ਤੋਰ ਤੇ ਕੀੜ੍ਹੇਮਾਰ ਦਵਾਈਆਂ ਦੀ ਵਰਤੋਂ ਅਤੇ ਟੀਕਾਕਰਨ ਕੀਤਾ ਜਾਂਦਾ ਹੈ । ਮੱਝਾਂ ਪਾਲਣ ਦਾ ਕਿੱਤਾ ਸਿਕੰਦਰ ਸਿੰਘ ਦਾ ਪਰਿਵਾਰਕ ਕਿੱਤਾ ਹੋਣ ਕਰਕੇ ਪਸ਼ੂਆਂ ਦੀਆਂ ਆਮ ਬਿਮਾਰੀਆਂ ਅਤੇ ਹੋਰ ਸਮੱਸਿਆਵਾਂ ਦੇ ਹੱਲ ਲਈ ਉਹ ਤੁਰੰਤ ਹੀ ਪਸ਼ੂ ਮਾਹਿਰਾਂ ਦੀ ਸਲਾਹ ਲੈ ਲੈਂਦਾ ਹੈ।ਸਿਕੰਦਰ ਸਿੰਘ ਦੇ ਅਨੁਸਾਰ ਹਰਾ ਚਾਰਾ, ਸਾਈਲੇਜ਼, ਫੀਡ, ਤਾਜ਼ਾ ਪਾਣੀ ਅਤੇ ਸਵੱਛਤਾ ਹੀ ਸਫ਼ਲ ਡੇਅਰੀ ਫਾਰਮ ਦਾ ਮੁੱਖ ਅਧਾਰ ਹਨ । ਫੀਡ ਅਤੇ ਖਣਿਜ ਮਿਸ਼ਰਣ (ਧਾਤਾਂ ਦਾ ਚੂਰਾ) ਯੂਨੀਵਰਸਿਟੀ ਦੀ ਸਿਫਾਰਸ਼ ਅਨੁਸਾਰ ਦਿੱਤਾ ਜਾਂਦਾ ਹੈ। ਉਹ ਡੇਅਰੀ ਦੇ ਧੰਦੇ ਵਿੱਚ ਆਉਂਦੀਆਂ ਮੁਸ਼ਕਿਲਾਂ ਦੇ ਹੱਲ ਲਈ ਅਤੇ ਖੇਤੀ ਵਿੱਚ ਨਵੀਂਆਂ ਖੋਜਾਂ ਲਈ ਕ੍ਰਿਸ਼ੀ ਵਿਗਿਆਨ ਕੇਂਦਰ, ਮਾਨਸਾ ਨਾਲ ਹਮੇਸ਼ਾਂ ਸੰਪਰਕ ਵਿੱਚ ਰਹਿੰਦਾ ਹੈ। ਆਪਣੀ 14 ਏਕੜ ਜ਼ਮੀਨ ਵਿੱਚ ਸਿਕੰਦਰ ਸਿੰਘ ਕਣਕ, ਝੋਨਾ, ਮੱਕੀ, ਚਰੀ, ਜਵੀ, ਬਰਸੀਮ ਅਤੇ ਮੌਸਮੀ ਸਬਜ਼ੀਆਂ ਦੀ ਕਾਸ਼ਤ ਕਰਦਾ ਹੈ। ਉਸਦਾ ਵਧੇਰੇ ਧਿਆਨ ਆਪਣੇ ਹੀ ਖੇਤ ਵਿੱਚ ਹਰੇ ਚਾਰੇ ਦੇ ਉਤਪਾਦਨ ਅਤੇ ਸਾਈਲੇਜ਼ ਵੱਲ ਵੀ ਹੈ ਜਿਸ ਦੁਆਰਾ ਘੱਟ ਕੀਮਤ ਵਿੱਚ ਵਧੇਰੇ ਦੁੱਧ ਪੈਦਾ ਕੀਤਾ ਜਾਂਦਾ ਹੈ। ਸਿਕੰਦਰ ਸਿੰਘ ਇੱਕ ਅਗਾਂਹਵਧੂ ਕਿਸਾਨ ਹੈ ਅਤੇ ਪਿਛਲੇ 5 ਸਾਲਾਂ ਤੋਂ ਝੋਨੇ ਦੀ ਪਰਾਲੀ ਨੂੰ ਅੱਗ ਨਾ ਲਾ ਕੇ ਵਾਤਾਵਰਨ ਨੂੰ ਪ੍ਰਦੂਸ਼ਿਤ ਹੋਣ ਤੋਂ ਬਚਾਉਣ ਵਿੱਚ ਵੀ ਯੋਗਦਾਨ ਪਾਉਂਦਾ ਆ ਰਿਹਾ ਹੈ। ਝੋਨੇ ਦੀ ਕਟਾਈ ਉਪਰੰਤ ਕੁਝ ਪਰਾਲੀ ਦੀਆਂ ਬੇਲਰ ਨਾਲ ਗੱਠਾਂ ਬਣਵਾ ਕੇ ਫਾਰਮ ਤੇ ਰੱਖ ਲੈਂਦਾ ਹੈ ਅਤੇ ਇਹਨਾਂ ਨੂੰ ਡੇਅਰੀ ਫਾਰਮ ਦੇ ਪਸ਼ੂਆਂ ਥੱਲੇ ਸੁੱਕ ਪਾਉਣ ਲਈ ਵਰਤਦਾ ਹੈ ਅਤੇ ਬਾਕੀ ਖੇਤਾਂ ਵਿਚ ਹੈਪੀ ਸੀਡਰ ਅਤੇ ਸੁਪਰ ਸੀਡਰ ਨਾਲ ਬਿਜਾਈ ਕਰਦਾ ਹੈ। ਜਿਸ ਨਾਲ ਉਸ ਦੀ ਮਿੱਟੀ ਦੀ ਸਿਹਤ ਵਿੱਚ ਵੀ ਸੁਧਾਰ ਹੋਇਆ ਹੈ।ਸਿਕੰਦਰ ਸਿੰਘ ਵੱਲੋਂ ਚਲਾਇਆ ਜਾ ਰਿਹਾ ਡੇਅਰੀ ਫਾਰਮ ਨਾ ਸਿਰਫ ਉਸ ਲਈ ਰੋਜ਼ੀ-ਰੋਟੀ (ਲਾਭਦਾਇਕ ਉੱਦਮ) ਦੇ ਪੱਖੋਂ ਲਾਹੇਵੰਦ ਸਾਬਤ ਹੋਇਆ ਹੈ, ਸਗੋਂ ਨੇੜਲੇ ਪਿੰਡਾਂ ਦੇ ਹੋਰ ਬੇਰੁਜ਼ਗਾਰ ਨੋਜਵਾਨਾਂ ਨੂੰ ਵੀ ਇਸ ਲਾਭਕਾਰੀ ਕਿੱਤੇ ਬਾਰੇ ਗੰਭੀਰਤਾ ਨਾਲ ਸੋਚਣ ਲਈ ਮਜ਼ਬੂਰ ਕੀਤਾ ਹੈ ਕਿਉਂਕਿ ਡੇਅਰੀ ਫਾਰਮ ਦਾ ਧੰਦਾ ਇੱਕ ਕਾਮਯਾਬ ਧੰਦਾ ਹੈ। ਹੁਣ ਸਿਕੰਦਰ ਸਿੰਘ ਨੇ ਪਸ਼ੂ ਪਾਲਣ ਦੇ ਕਿੱਤੇ ਨੂੰ ਮੁੱਖ ਕਿੱਤੇ ਵਜੋਂ ਅਪਨਾ ਲਿਆ ਹੈ ਅਤੇ ਖੇਤੀਬਾੜੀ ਨੂੰ ਕੇਵਲ ਸਹਾਇਕ ਕਿੱਤੇ ਵਜੋਂ ਕਰਦਾ ਹੈ। ਸਿਕੰਦਰ ਸਿੰਘ ਆਪਣੇ ਇਸ ਮੱਝਾਂ ਪਾਲਣ ਦੇ ਕਿੱਤੇ ਤੋਂ ਅੱਜ ਪੂਰੀ ਤਰ੍ਹਾਂ ਨਾਲ ਸੰਤੁਸ਼ਟ ਹੈ ਅਤੇ ਹਮੇਸ਼ਾਂ ਦੂਜੇ ਕਿਸਾਨਾਂ ਨੂੰ ਪਸ਼ੂ ਪਾਲਣ ਦੇ ਕਿੱਤੇ ਨੂੰ ਵਧੀਆ ਢੰਗ ਨਾਲ ਕਰਨ ਲਈ ਅਤੇ ਇਸ ਤੋਂ ਵਧੇਰੇ ਆਮਦਨ ਲੈਣ ਲਈ ਸਿੱਖਿਅਤ ਕਰਦਾ ਰਹਿੰਦਾ ਹੈ। ਸਿਕੰਦਰ ਸਿੰਘ ਦੀਆਂ ਮੱਝਾਂ ਨੂੰ ਦੇਖਣ ਲਈ ਦੂਜੇ ਕਿਸਾਨ ਅਕਸਰ ਆਉਂਦੇ ਰਹਿੰਦੇ ਹਨ ਅਤੇ ਪ੍ਰਭਾਵਸ਼ਾਲੀ ਡੇਅਰੀ ਦੇ ਕਿੱਤੇ ਨੂੰ ਦੇਖ ਕੇ ਬਹੁਤ ਉਤਸ਼ਾਹਿਤ ਹੁੰਦੇ ਹਨ । ਅਸੀਂ ਵੀ ਆਸ ਕਰਦੇ ਹਾਂ ਕਿ ਸਿਕੰਦਰ ਸਿੰਘ ਆਪਣੇ ਇਸ ਕਿੱਤੇ ਵਿੱਚ ਦਿਨ ਦੁੱਗਣੀ ਅਤੇ ਰਾਤ ਚੌਗਣੀ ਤੱਰਕੀ ਕਰੇ ਅਤੇ ਆਪਣੇ ਸੂਬੇ ਦਾ ਨਾ ਪੂਰੀ ਦੁਨੀਆਂ ਵਿੱਚ ਰੌਸ਼ਨ ਕਰੇ।#progressive #successmindset #success #initiative #motivation #dairyfarming #📑ਸ਼ੇਅਰਚੈਟ ਜਾਣਕਾਰੀ 📑