ഖൽബിലെ കിനാവ്✍️📖 PART 5 "എടാ, കാർ എടുത്ത് കൊണ്ടിങ്ങ് വാ… നിങ്ങൾ എന്നെ കളഞ്ഞിട്ട് എവിടെ പോയി?" അവന്റെ സംസാരം സനക്ക് വളരെ ഇഷ്ടപ്പെട്ടു…ആള്‍ നല്ല തമാശക്കാരൻ ആണ്. അവർ വരുന്നതുവരെ ആ വെയിലത്ത് അവര്‍ കാത്തുനിന്നു… കൂട്ടുകാർ കാർ കൊണ്ടു ഇവർ നിന്നിരുന്ന എതിർവശത്ത് നിർത്തി. “എടാ, നിങ്ങൾ എന്താ അവിടെ നിർത്തിയത്? ഇങ്ങോട്ട് കാർ തിരിച്ചു കൊണ്ടുവാ… ചായ കുടിക്കണ്ടേ?” നിഫാസ് ഫോണിലൂടെ പറഞ്ഞു. “എടാ മണ്ടാ… ചായക്കട ഞങ്ങൾ നിൽക്കുന്ന സൈഡിലാണ്. നീ അവിടെ നിന്നാൽ ചായ കിട്ടില്ല.” കൂട്ടുകാരിൽ ഒരാൾ പറഞ്ഞു. അപ്പോഴാണ് നിഫാസ് ശ്രദ്ധിച്ചത് അവർ നിൽക്കുന്ന വശത്ത് കട ഇല്ലെന്ന്. നിഫാസ് ആകെ ചമ്മി പോയി. സനയ്ക്ക് ചിരി അടക്കാൻ കഴിഞ്ഞില്ല. “അതെ… അപ്പുറത്തെ വശത്തേക്ക് പോകാം,” അവൻ സനയെ നോക്കി ചമ്മലോടെ പറഞ്ഞു. “മ്മ്… ശരി… ആയിക്കോട്ടെ.” സന അവന്റെ പിന്നാലെ റോഡ് മുറിച്ചു കടന്ന് എതിർവശത്തേക്ക് എത്തി. “ഇതാണ് എന്റെ ഫ്രണ്ട്സ്,” നിഫാസ് ഓരോ കൂട്ടുകാരെയും സനയ്ക്ക് പരിചയപ്പെടുത്തി. “ഞാൻ ചായ പറയാം… ചേട്ടാ, ആറു ചായ… ഒരണ്ണം without ആണ്,” നിഫാസ് കടയിലേക്ക് നോക്കി പറഞ്ഞു. “ചേട്ടാ… രണ്ട് without,” സന പുറകിൽ നിന്ന് വിളിച്ചു പറഞ്ഞു. അത് കേട്ടപ്പോൾ നിഫാസ് അവളെ ഒരു പുരികം ഉയർത്തി നോക്കി. “നീ without ആണോ കുടിക്കുന്നത്?” “അതെ… ഞാൻ അധികം പഞ്ചസാര ഉപയോഗിക്കില്ല.” സനയുടെ മറുപടി അവന് വിശ്വാസം വന്നില്ല. അവർക്കിടയിൽ എന്തോ സാമ്യങ്ങൾ ഉണ്ടെന്ന് അവന് തോന്നി. അവൻ ചായ വരുന്നത് വരെ കൂട്ടുകാർ നിൽക്കുന്ന ടേബിളിലേക്ക് പോയി. “എടാ… കൊച്ച് എങ്ങനെയുണ്ട്?" നിഫാസ് മെല്ലെ അവരോട് ചോദിച്ചു. “നിഫാസേ… നിനക്ക് ചേരും. നല്ല കൊച്ചാണ്. നിങ്ങൾ നല്ല മാച്ചാണ്… നിന്റെ അനിയത്തിയെ പോലെ അല്ല,” കൂട്ടുകാർ പറഞ്ഞു. നിഫാസ് സംസാരിച്ച് തിരിഞ്ഞപ്പോഴേക്കും ചായ തയ്യാറായി. അവൻ അതിൽ നിന്ന് രണ്ട് without ചായ എടുത്ത് സനയുടെ ടേബിളിലേക്ക് നീങ്ങി. “നിനക്ക് എങ്ങനെ എന്നെ ഇഷ്ടപ്പെട്ടു?” അവൻ ചോദിച്ചു. “എനിക്ക് അറിയില്ല… നിങ്ങൾക്ക് ഒരു റെയർ സ്വഭാവം ആണെന്ന് തോന്നി. കണ്ടതിൽ വെച്ച് എനിക്ക് ചേരുമെന്ന് തോന്നി,” സന മറുപടി പറഞ്ഞു. “നീ ‘നിങ്ങൾ’ എന്നൊക്കെയാണോ വിളിക്കുന്നത്?” അവൻ കുറച്ച് ഗൗരവത്തോടെ ചോദിച്ചു. “സ്ട്രേഞ്ചേഴ്സിനോട് ഞാൻ അങ്ങനെയാണ്,” അവൾ അല്പം പുച്ഛത്തോടെ പറഞ്ഞു. “അയ്യടാ… മര്യാദയ്ക്ക് ‘ഇക്കാ’ എന്ന് വിളിച്ചോ. ഇല്ലെങ്കിൽ നല്ല ഇടി കിട്ടും കേട്ടോ,” അവൻ പറഞ്ഞു. “ഓ… ശരി സാർ,” അവൾ കളിയാക്കുന്ന പോലെ പറഞ്ഞു. “ഞാൻ കരുതിയത് നീ പർദ ഇട്ട് വരുമെന്നാണ്,” നിഫാസ് ഒരു കള്ളച്ചിരിയോടെ ചോദിച്ചു. “എന്റെ പർദ അലക്കി ഇട്ടിരുന്നു… പിന്നെ കിട്ടിയതെടുത്ത് ഇങ്ങോട്ട് പോന്നു,” സന മറുപടി പറഞ്ഞു. സനയ്ക്ക് പർദ ഇടണമെന്ന വലിയ ആഗ്രഹം ഉണ്ടായിരുന്നു. "എനിക്ക് ഇനി വേറെ പെൺകുട്ടികളെ ആലോചിക്കാൻ വയ്യ, സന… ഇതോടെ നിർത്തി.” “എനിക്കും വയ്യ… ഇത് എന്റെ അവസാന ആലോചനയാണ്. എനിക്കും മടുത്തു,” സന ശാന്തമായി പറഞ്ഞു. “നീ എന്നെക്കുറിച്ച് വല്ലതും അന്വേഷിച്ചോ?” “ആ… അന്വേഷിച്ചു. നിങ്ങളുടെ ജനനദിവസം വരെ എനിക്ക് അറിയാം.” “അത് നിനക്ക് എങ്ങനെ അറിയാം? പറ… ആരാണ് പറഞ്ഞത്?” നിഫാസിന്റെ ശബ്ദത്തിൽ ചെറിയ ആകാംക്ഷ ഉണ്ടായിരുന്നു. “അത് ഞാൻ പറയില്ല… അങ്ങനെ പറഞ്ഞാൽ ത്രിൽ പോകില്ലേ,” അവൾ ചിരിച്ചുകൊണ്ട് പറഞ്ഞു. “പിന്നെ കോളേജിൽ ഒരു റൗഡി ചെല്ലമ്മ ആയിരുന്നെന്നും ഞാൻ അറിഞ്ഞു.” സന ഇതെല്ലാം അവന്റെ സോഷ്യൽ മീഡിയ അക്കൗണ്ടിലൂടെ മനസ്സിലാക്കിയതാണ്. കൂടാതെ, നിഫാസിന്റെ കോളേജിലെ ഒരു ജൂനിയർ കുട്ടി അവളുടെ സുഹൃത്തുമായിരുന്നു. “അത് ഒക്കെ പണ്ട് അങ്ങനെയായിരുന്നു… ആൺപിള്ളേരെല്ലാം അങ്ങനെ തന്നെ. നീ കോളേജിൽ നല്ല ഡീസന്റ് ആണെന്നാണല്ലോ ഞാൻ അറിഞ്ഞത്.” “ഓ… അമീന പറഞ്ഞിരിക്കുമല്ലോ?” അവൻ ചിരിച്ചു. “അതെ ഇക്കാ… ഈ പാസ്റ്റ് മാത്രം ആലോചിച്ച് നിന്നാൽ ജീവിക്കാൻ പറ്റില്ല. ഒരു സൈക്യാട്രിസ്റ്റിനെ പോയി കാണൂ… അതാണ് നല്ലത്.” “അതെ… ഞാൻ പോയി കണ്ടതാണ്. രണ്ട് തവണ പോയി… പിന്നെ എനിക്ക് മടുത്തു.” “അതുശരി… എനിക്കും ട്രോമ ഒക്കെ ഉണ്ടായിരുന്നു. പക്ഷേ എന്റെ പാസ്റ്റ് കൊണ്ട് ഞാൻ ഒരിക്കലും എന്റെ ഭാവി തുലയ്ക്കാൻ സമ്മതിക്കില്ല,” സന ധൈര്യത്തോടെ പറഞ്ഞു. “നീ നല്ല ബോൾഡാണ്… നിന്നെ പോലെ അല്ല ഞാൻ.” “പക്ഷേ ഇത്രയും ബോൾഡ് ആയ ഒരു പെൺകുട്ടി കൂടെയുണ്ടാകുമ്പോൾ ഇക്കാ എന്തിന് പേടിക്കണം?” അവൾ വീണ്ടും ചോദിച്ചു. നിഫാസ് അല്പസമയം മിണ്ടാതെ നിന്നു. “നിനക്ക് അത് മനസ്സിലാകില്ല… എനിക്ക് ഒന്നിനെയും പേടി ഇല്ല. പക്ഷേ ‘കല്യാണം’ എന്നൊരു കാര്യം വരുമ്പോൾ മാത്രമാണ് എന്റെ ധൈര്യം എല്ലാം ഒലിച്ചു പോകുന്നത്. നിന്റെ പ്രൊഫൈൽ ഞാൻ ഒരുപാട് തവണ എടുത്ത് നോക്കിയിട്ടുണ്ട് മുമ്പ്… റിക്വസ്റ്റ് അയക്കണോ വേണ്ടയോ എന്ന് സംശയം ഉണ്ടായിരുന്നു. അപ്പോഴാണ് എന്റെ അനിയത്തി എടുത്ത് അയച്ചത്.” നിഫാസിന് തനിക്കോട് ഒരു താൽപ്പര്യം ഉണ്ടെന്ന് സനക്ക് വ്യക്തമായി തോന്നി. പക്ഷേ അവൾ അതിനെക്കുറിച്ച് കൂടുതൽ ഒന്നും ചോദിക്കാൻ തയ്യാറായില്ല. അവർ കാര്യങ്ങൾ ഒക്കെ പറഞ്ഞ് നിന്നു. സമയം പോയത് അവന് അറിയാതെ പോയി. അപ്പോഴാണ് കൂട്ടുകാരൻ വാച്ച് നോക്കി അവനെ കാണിച്ചത്. “അയ്യോ… സമയം പോയി! കുറച്ച് കൂടി ഇവിടെ നിന്നാൽ എന്റെ ഫ്ലൈറ്റ് അങ്ങ് പോകും. ഞാൻ പോകട്ടെ,” നിഫാസ് വേഗം ബാക്കി ചായയും കുടിച്ച് ഗ്ലാസ് തിരികെ വെച്ചു. “ഇനി നാട്ടിലേക്ക് എപ്പോഴാണ് വരുന്നത്?” “അത് എനിക്ക് അറിയില്ല… എനിക്ക് നാട്ടിലേക്ക് വരണമെന്നു തോന്നുന്നില്ല. ഇപ്പോൾ കല്യാണം എന്നൊക്കെ പറഞ്ഞ് നിൽക്കുന്നതുകൊണ്ട് ഒട്ടും തോന്നുന്നില്ല. ഞാൻ മിക്കവാറും രണ്ട് വർഷം കഴിഞ്ഞേ കാലുകുത്തു ” അവൻ എന്തോ ഉറപ്പിച്ചുപറയുന്നതുപോലെ ആയിരുന്നു ഉത്തരം. “എങ്കിൽ ശരി… ഇതിൽ കൂടുതലായി എനിക്ക് ഒന്നും പറയാനില്ല. ഇക്കാക്ക് വേണമെങ്കിൽ ഞാൻ സമയം തരാം. പതിയെ ആലോചിച്ച് തീരുമാനിച്ചാൽ മതി. എനിക്കും പെട്ടെന്ന് ഒരാളെ കണ്ടിട്ട് ഇഷ്ടപ്പെടാൻ ഒന്നും പറ്റില്ല… ഞാനും ഒന്ന് ആലോചിക്കട്ടെ,” സന പറഞ്ഞു. “അപ്പോ ശരി… ചിലപ്പോള് നമ്മൾ ഇനി കാണില്ലായിരിക്കും,” എന്ന് പറഞ്ഞുകൊണ്ട് നിഫാസ് അവൾക്ക് ഷേക്ക്‌ഹാൻഡ് കൊടുക്കാൻ വേണ്ടി കൈ നീട്ടി. സനയ്ക്ക് ആ ഒരു വാചകം വളരെ വിഷമമായി തോന്നി. അവൾ അവന്റെ കൈയിലേയ്ക്ക് നോക്കി ഒരു നിമിഷം നിശബ്ദമായി നിന്നു. “ഹലോ… ഒരു ഷേക്ക്‌ഹാൻഡ് പോലും തരില്ലേ?” നിഫാസ് അവളെ നോക്കി സംശയത്തോടെ ചോദിച്ചു. “ഓ… ഒക്കെ… ശരി… ഗുഡ് ലക്ക്,” അവൾ കൈ കൊടുത്തു. പക്ഷേ അവന് ആ കൈ പെട്ടെന്ന് വിടാൻ തോന്നിയില്ല. മൃദുവായ അവളുടെ കൈ അവന് എന്തോ പ്രതീക്ഷകൾ തരുന്നപോലെ ആയിരുന്നു. അവൻ പെട്ടെന്ന് തിരിച്ച ബോധത്തിൽ വന്നു… ഉടനെ കൈ പിൻവലിച്ചു. അവളെ നോക്കി ഒരു ചെറുപുഞ്ചിരി നൽകി നടന്നു കാറിൽ കയറി. അവൾ ബസ്‌സ്റ്റോപ്പിലേക്ക് നടന്നു. അവനെ തിരിഞ്ഞ് നോക്കാൻ പോലും അവൾക്ക് കഴിഞ്ഞില്ല. അവളുടെ ഉള്ളിൽ എന്തോ തീക്കനൽ കൊരിയിട്ടതുപോലെ ആയിരുന്നു. ******************************************** കാറിൽ യാത്രയായപ്പോഴും കൂട്ടുകാർ അവളെ കുറിച്ചായിരുന്നു എല്ലാ ചോദ്യങ്ങളും ചോദിച്ചത്. “എടാ… കൊച്ചിന്റെ വീട് എവിടെയാണ്?” ഒരുവൻ ചോദിച്ചു. “അത് എനിക്ക് കൃത്യമായി ഓർമ്മയില്ല…” “എഹ്… നീ എന്താടാ ഇങ്ങനെ? അവളുടെ വീട് എവിടെയാണെന്നു പോലും ഓർമ്മ ഇല്ലെങ്കിൽ കെട്ടിയാൽ എങ്ങനെ ആയിരിക്കും?” “എടാ… എനിക്ക് അവളെ കെട്ടണോ വേണ്ടയോ എന്നത് ഇപ്പോഴും സംശയമാണ്…” “കെട്ട് നിഫാസേ… ഇതുപോലെ ഒരാളെ ഇനി കിട്ടണമെന്നില്ല. നീ നിന്റെ ഉമ്മയെ വിഷമിപ്പിക്കരുത്.” കൂട്ടുകാർ തളങ്ങും വിലങ്ങും കിടന്ന് ഉപദേശങ്ങളായിരുന്നു. അവൻ മെല്ലെ മൊബൈൽ എടുത്ത് അവളെ വിളിച്ചു. “ഹലോ… സന, നിനക്ക് ബസ് കിട്ടിയോ?” അവൻ ചോദിച്ചു. “കിട്ടിയല്ലോ… ഇക്കാ എയർപോർട്ടിൽ എത്തിയോ?” “ഇല്ല… കുറച്ച് കൂടി പോകണം. അതെ… നിന്റെ വീട് എവിടെയായിരുന്നു?” അവന്റെ ആ ചോദ്യം കേട്ട് കൂട്ടുകാർക്ക് തന്നെ ചിരി വന്നു. ചോദ്യം കേട്ട് സനയ്ക്കുതന്നെ ഷോക്ക് ആയി. “എഹ്… ഇത്രയും ആയിട്ടും എന്റെ വീട് എവിടെയാണെന്ന് പോലും ഓർമ്മയില്ലേ? എന്റെ വീട് ഇവിടെ അടുത്ത k p ജംഗ്ഷനിലാണ്…” “ഓക്കേ… നീ വെച്ചോളൂ,” നിഫാസ് പെട്ടെന്ന് തന്നെ ഫോൺ കട്ട് ചെയ്തു. “എന്തൊരു ദാരിദ്ര്യമാണ് ഡാ!” കൂട്ടുകാർ കളിയാക്കി. അവൻ പിന്നെ ഒന്നും മിണ്ടാതെ കാറിൽ ഇരുന്നു. ******************************************** “എന്തായി… പോയി കണ്ടോ അവനെ?” ഉമ്മ പുറത്തു ചെടികൾക്ക് വെള്ളം ഒഴിക്കുകയായിരുന്നു. “ഹാ… കണ്ടു. അതേ കൺഫ്യൂഷനിൽ തന്നെയാണ് ആൾ. സമയം കൊടുത്താൽ ശരിയാകും ആയിരിക്കും… ഞാൻ ഒന്ന് കിടക്കട്ടെ, എനിക്ക് നല്ല ഷീണം ഉണ്ട്.” സന ഇത്ര മാത്രം പറഞ്ഞുകൊണ്ട് മുറിയിലേക്ക് പോയി. ******************************************** (ദുബൈ സമയം രാത്രി 8 മണി) നിഫാസ് റൂമിൽ എത്തി കുളിച്ച് കിടക്കാൻ തുടങ്ങി. അപ്പോഴാണ് ഫോണിൽ ഒരു മെസേജ് വന്നത്. മറ്റാരുമല്ല… സനയാണ്. “ദുബൈയിൽ ലാൻഡ് ആയോ?” “ആ… റൂമിൽ എത്തി…” ഇത്ര മാത്രം അവൻ മെസേജ് അയച്ചു ഫോൺ ടേബിളിൽ വെച്ചു. ജനാലക്കരികിൽ നിന്നു ചിന്തയിൽ മുഴുകി. “ഇവളെ പോലൊരു പെണ്ണിനെ കിട്ടാൻ ഇനി വഴിയില്ല… പക്ഷേ അവൾക്ക് എനിക്ക് കൊടുക്കാൻ വേണ്ടി എന്റെ കയ്യിൽ ആ പഴയ സ്നേഹം ഇല്ല… ഞാൻ എന്താ ഇങ്ങനെ ആയി പോയത്…” അവൻ ഓരോന്നായി ചിന്തിച്ചു കൂട്ടി. ******************************************* സനയ്ക്ക് ആ രാത്രി ഉറങ്ങാൻ കഴിഞ്ഞില്ല. അവൾ ഓരോന്നായി ആലോചിച്ചു കൊണ്ടിരുന്നു. നിഫാസിനെ കുറിച്ച് കൂടുതൽ അറിയാൻ അവൾ തിരയാൻ തുടങ്ങി. പക്ഷേ അധികം വിവരങ്ങൾ ഒന്നും അവൾക്ക് കിട്ടിയില്ല. “ഇക്കയുടെ ആ പഴയ കാമുകിയെ ഒരിക്കൽ കണ്ടെത്തണം… അവൾ എന്തിനാണ് ഇക്കയെ വിട്ടുപോയത് എന്ന് അറിയണം… അവരുടെ ഇടയിൽ എന്താണ് സംഭവിച്ചത് എന്ന് മനസ്സിലാക്കണം.” സന മനസ്സിൽ ഉറപ്പിച്ചു. അപ്പോഴാണ് ഒരു അക്കൗണ്ട് അവളുടെ കണ്ണിൽപ്പെട്ടത്. “ഹംന…” അവൾ ആ അക്കൗണ്ട് തുറന്ന് നോക്കി. നല്ല ഫാഷൻക്കാരിയായ ഒരു പെൺകുട്ടി. പഴയ ഫോട്ടോകൾ എടുത്ത് നോക്കിയപ്പോൾ എല്ലാം നല്ല ഹിജാബ് ധരിച്ച് നിൽക്കുന്ന ആളായിരുന്നു. ഇപ്പോൾ എന്നാൽ വളരെ മോഡേൺ ആയി കാണുന്നു. ഇക്ക ഫോൺ വിളിച്ചപ്പോൾ ഒരു കൂട്ടുകാരിയെക്കുറിച്ച് പറഞ്ഞത് അവൾ ഓർമ്മിച്ചു. അവർ പണ്ടേ അടുത്ത സുഹൃത്തുക്കളായിരുന്നു. അവൾക്ക് വിവാഹം കഴിഞ്ഞിരുന്നു, പക്ഷേ ഇപ്പോൾ ഡിവോഴ്‌സിന്റെ വക്കിലാണ് നിൽക്കുന്നത് എന്നും അതുകൊണ്ട് ആരെയും വിശ്വസിക്കാൻ കഴിയുന്നില്ല എന്നും പറഞ്ഞത് സന ഓർത്തെടുത്തു. “ഇവളായിരിക്കുമോ ഇനി ആ കുട്ടി?” സനക്ക് ഒരു സംശയം തോന്നി...... തുടരും..... (നിഫാസിന്റെ ആ പഴയ കാമുകി… ഹംന തന്നെയായിരിക്കുമോ? അല്ലെങ്കിൽ സന വെറുതെ സംശയിക്കുകയാണോ? കാത്തിരുന്നു കാണാം) # #💞 പ്രണയകഥകൾ #📙 നോവൽ #💌 പ്രണയം #💞 നിനക്കായ്