പാർട്ട്‌ - 31 മാമയുടെ കൈ പിടിച്ചു സർവാഭരണവിഭൂഷിതയായി നടന്നു വരുന്ന നച്ചുവിനെ സമീർ കണ്ണെടുക്കാതെ നോക്കി നിന്നു. നച്ചു മുഖമുയർത്തി നോക്കിയപ്പോൾ പുഞ്ചിരിയോടെ നേരെ നിൽക്കുന്ന സമീറിനെ കണ്ടു പെട്ടെന്ന് തല കുനിച്ചു. അവിടെയുള്ള കസേരയിലേക്ക് മാമ നച്ചുവിനെ ഇരുത്തി. പിന്നേ സമീറിന് കൈ കൊടുത്തു അവനെയും അങ്ങോട്ട് ആനയിച്ചു. സമീർ തികഞ്ഞ ആത്മവിശ്വാസം ഉള്ള ചെറുപ്പക്കാരനാണ്. അവന്റെ നോട്ടത്തിലും പെരുമാറ്റത്തിലും സംസാരത്തിലും എല്ലാം ഒരു കോർപ്പറേറ്റ് ഫീൽഡിൽ ജോലി ചെയ്യുന്ന ആളുടെ ചടുലതയുണ്ട്. ആരെയും ആകർഷിക്കുന്ന പേഴ്സണാലിറ്റി. സമീർ നച്ചുവിന് നേരെ കൈ നീട്ടി. " അസ്സലാമു അലൈകും നച്ചൂ... ഒരു നിമിഷം അവൾ ഒന്ന് ശങ്കിച്ചു. പിന്നെ സലാം പറഞ്ഞു കൊണ്ടു അവൻ നീട്ടിയ കൈയിലേക്ക് അവളുടെ കൈ ചേർത്തു വെച്ചു.അവന്റെ കൈ അവളുടെ കൈകളിൽ മുറുകുന്നത് അവൾക്കനുഭവപ്പെട്ടു. അവൾ കൈ വലിക്കാൻ നോക്കിയപ്പോൾ ആ പിടുത്തം ഒന്ന് കൂടി മുറുകി. ചുറ്റുമുള്ളവർ അതൊക്കെ ചിരിയോടെ നോക്കി നിൽക്കുകയാണ്. സമീറിന്റെ മുഖത്തും ഒരു കുസൃതിചിരിയുണ്ട്. പക്ഷെ നച്ചു അവനെ നോക്കിയതേയില്ല. പതുക്കെ അവൻ അവളുടെ കൈയിൽ നിന്നും പിടുത്തം വിട്ടു. ചടങ്ങുകൾ തുടങ്ങി. സമീറിന്റെ സഹോദരി സുമയ്യ മഹർ മാല എടുത്തു അവന്റെ കൈയ്യിൽ കൊടുത്തു.അവൻ എഴുന്നേറ്റു നച്ചുവിന്റെ അടുക്കലേക്കു നീങ്ങി അത് കഴുത്തിൽ അണിയിച്ചു. ഷാഹിദ പാല് നിറച്ച ഗ്ലാസ്‌ കൊണ്ട് വന്നു സമീറിന് നേരെ നീട്ടി. അവൻ അത് ചിരിയോടെ അൽപ്പം കുടിച്ചു. പിന്നെ ഷാഹിദയുടെ കൈയ്യിൽ നിന്നു ആ പാൽ നിറച്ച ഗ്ലാസ്‌ വാങ്ങി നച്ചുവിന്റെ നേരെ നീട്ടി. അവൾക്കു അത് കുടിക്കാതെ വേറെ വഴിയില്ലായിരുന്നു.സമീർ ആ ഗ്ലാസ്‌ അവളുടെ ചുണ്ടോട് ചേർത്തു. സമീറിന്റെ വിരലിൽ ഷാഹിദ മോതിരം അണിയിച്ചു.സമീർ ഷാഹിദയ്ക്കു ഒരു വള സമ്മാനിച്ചു.സമീറിന്റെ ഉമ്മയും സഹോദരിമാരും ഒക്കെ നച്ചുവിന് ഗിഫ്റ്റ് ആയി സ്വര്ണാഭരണങ്ങൾ നൽകി. ചടങ്ങുകൾ എല്ലാം വീക്ഷിച്ചു കൊണ്ടിരുന്ന അതിഥികൾ എല്ലാം പെണ്ണും ചെറുക്കനും സൂപ്പർ ജോഡി എന്ന് പറയുന്നുണ്ട്. ഫോട്ടോഗ്രാഫർസും വീഡിയോ ഗ്രാഫർസ്സും എല്ലാം അവർക്കു ഓരോ നിർദേശങ്ങൾ കൊടുത്തു ആ നിമിഷങ്ങൾ മിഴിവോടെ പകർത്തുന്നുണ്ട്.അവർ പറഞ്ഞത് പോലെയൊക്കെ നില്കാൻ നച്ചുവിന് ബുദ്ധിമുട്ട് തോന്നി. സമീർ എല്ലാത്തിനും നന്നായി സഹകരിക്കുന്നുണ്ട്. എല്ലാം കഴിഞ്ഞു ഭക്ഷണം കഴിക്കേണ്ട ഹാളിലേക്ക് അവരെ കൊണ്ടുപോയി. സമീറിനും ബന്ധുക്കൾക്കും ഒപ്പം ഇരുന്നു കഴിക്കുമ്പോൾ ഒരു കൂട്ടം അപരിചിതരുടെ നടുക്ക് പെട്ടത് പോലെ അവൾക്കൊന്നും കഴിക്കാൻ പറ്റുന്നുണ്ടായിരുന്നില്ല. അവൾ കഴിക്കാൻ ബുദ്ധിമുട്ടുന്നത് കണ്ടു മതിയായെങ്കിൽ കഴിക്കണ്ട എന്ന് സമീർ അവളുടെ അടുക്കലേക്ക് ചേർന്നിരുന്നു കൊണ്ട് പറഞ്ഞു. അത് കേട്ടയുടനെ ആശ്വാസത്തോടെ നച്ചു കഴിക്കുന്നത് നിർത്തി.സമീർ കഴിച്ചു കഴിയുന്നത് വരെ അവൾ ഒപ്പമിരുന്നു. അല്ലാതെ എന്ത്‌ ചെയ്യാൻ. ഈ സമയം സമീറിന്റെ ബന്ധുക്കൾ ആരോ ഒക്കെ വന്നു സംസാരിച്ചു. ആരെയും അറിയില്ലെങ്കിലും അവൾ യാന്ത്രികമായി ചിരിച്ചു. ഭക്ഷണം എല്ലാം കഴിഞ്ഞു സമീറിന്റെ വീട്ടിലേക്കു പോകാൻ സമയമായി. അടുത്ത ബന്ധുക്കൾ ഒഴിച്ചു ബാക്കിയെല്ലാവരും അതിനോടകം പോയിരുന്നു. എല്ലാവരും ഓഡിറ്റോറിയത്തിന്റെ ഫ്രണ്ടില്ലേക് അവരെ യാത്രയാക്കാൻ എത്തിയിരുന്നു. സമീർ എല്ലാവരോടും യാത്ര ചോദിച്ചു. ജമാൽ നച്ചുവിന്റെ കൈ സമീറിന്റെ കൈകളിലേക്ക് ചേർത്തുവെച്ചു. സമീർ അദ്ദേഹത്തെ ചേർത്തു പിടിച്ചു. നച്ചു എല്ലാവരോടും യാത്ര പറയാൻ ബുദ്ധിമുട്ടി.കണ്ണുകൾ നിറച്ചു അവൾ എല്ലാവരെയും നോക്കി. ഷാഹിദ മകളെ മൂർദ്ധാവിൽ ചുംബിച്ചു വിതുമ്പി. ജമാൽ അവളെ ചേർത്ത് നിർത്തി നിറഞ്ഞ കണ്ണുകൾ തുടച്ചു കൊടുത്തു. നിഹാലും നബീലും അവളുടെ കൂടെ തന്നെ നിന്നു. സുറുമിയെ കെട്ടിപ്പിടിച്ചപ്പോൾ അവൾ ഏങ്ങിപ്പോയി. ചുട്ടുപൊള്ളിക്കുന്ന ഓർമ്മകൾ അവളുടെ സങ്കടത്തിന്റെ ആക്കം കൂട്ടി. മൂത്താപ്പയും മൂത്തുമ്മയും മക്കളും കൊച്ചാപ്പയും ഫാമിലിയും വലിയുമ്മമാർ, ഷാഹിദയുടെ സഹോദരങ്ങൾ അയൽക്കാർ അങ്ങനെ എല്ലാവരും അവളെ യാത്ര അയക്കാൻ അവിടെ കൂടിയിരുന്നു. സമീർ ബാക്ക് സീറ്റ്‌ തുറന്നു പിടിച്ചു. നിഹാൽ നച്ചുവിനെ കാറിന്റെ അടുത്ത് വരെ അനുഗമിച്ചു. നച്ചു കാറിലേക്ക് കയറിയിരുന്നു.എല്ലാവരെയും നോക്കി അവൾ പോട്ടെ എന്ന് തലയാട്ടി. സമീർ എല്ലാവർക്കും നേരെ കൈ കാണിച്ചു. കാർ അവിടെ നിന്ന് കുത്തിയതോടിനു തിരിച്ചു. ✳️✳️✳️✳️✳️✳️ മൂന്നരയോട് കൂടി അവർ കുത്തിയതോട് എത്തി. അവരെ സ്വീകരിക്കാൻ എല്ലാവരും വീടിനു മുന്നിൽ തന്നെ നിൽപുണ്ടായിരുന്നു. സമീർ കാറിൽ നിന്നു ആദ്യം ഇറങ്ങി നച്ചുവിന് വേണ്ടി ഡോർ തുറന്നു പിടിച്ചു.അവൾ ഇറങ്ങി സമീറിന്റെ കൂടെ നടന്നു വീടിന്റെ പടിക്കൽ എത്തി. " വലത് കാൽ വെച്ച് കയറിവാ മോളേ സമീറിന്റെ ഉമ്മ പുഞ്ചിരിയോടെ അവളെ നോക്കി പറഞ്ഞു. നച്ചു വലത് കാൽ വെച്ചു തന്നെകയറി. കൂടെ സമീറും.ഉമ്മ അവർ രണ്ടുപേരുടെയും നെറുകയിൽ ചുംബിച്ചു. ബന്ധുക്കൾ എല്ലാം ചുറ്റിനും ഉണ്ട്. പരിചയകുറവിന്റെ ചെറിയ ബുദ്ധിമുട്ട് നച്ചുവിനുണ്ട്. അവൾക്കു കുടിക്കാൻ സമീറിന്റെ ഉമ്മ ചായ കൊണ്ട് വന്നു. അവൾ അത് വാങ്ങികുടിച്ചു. " ഇന്ന് ഇനി ആലപ്പുഴയ്ക്കു പോകുന്നില്ലല്ലോ. നാളെ പെണ്ണ് വിളി ചടങ്ങ് കഴിഞ്ഞല്ലേ അങ്ങോട്ട് പോകുന്നുള്ളൂ. അത് കൊണ്ടു ഈ ഡ്രെസ്സ് ഒക്കെ മാറ്റാം.. അതും പറഞ്ഞു താഴെയുള്ള ഒരു മുറിയിൽ തന്നെ സുമയ്യയും ചേട്ടന്റെ ഭാര്യ ഷബ്‌നയും ചേർന്ന് അവളെ എല്ലാം അഴിക്കാൻ സഹായിച്ചു. ഓർണമെൻറ്സ് എല്ലാം സൂക്ഷിച്ചു ബോക്സ്സുകളിൽ ആക്കി. ചെറിയ ഒരു കമ്മലും മഹർ മാലയും രണ്ടു വളകളും രണ്ടു മോതിരവും മാത്രം ധരിച്ചു. സാരി അഴിച്ചു മടക്കി സ്റ്റാൻഡിൽ ഇട്ടു. സുമയ്യ മാറ്റിയിടാൻ ഡ്രെസ്സ് കൊണ്ട് വന്നു കൊടുത്തു. " നിങ്ങളുടെ മുറി മുകളിലാണ്.അവിടെ സമിയുടെ ഫ്രണ്ട്സ് ഡെക്കറേറ്റ് ചെയ്യുവാണ്.തത്കാലം ഇവിടുന്നു ഫ്രഷ് ആയിക്കോ.. നച്ചു ബാത്‌റൂമിൽ കയറി ഫ്രഷ് ആയി വന്നു.എല്ലാം അഴിച്ചു മാറ്റിയപ്പോൾ തന്നെ ആശ്വാസം തോന്നി. പിന്നെ പുറത്തേക്കു വന്നു ബന്ധുക്കൾക്കൊപ്പം ഇരുന്നു. ആരാ എന്താന്ന് ഒക്കെ ഇതുവരെ അവൾക്കു പിടികിട്ടിയിട്ടില്ല. രാത്രി ഭക്ഷണം കഴിക്കാൻ നേരമാണ് പിന്നെ സമീറിനെ കാണുന്നത്. അവൻ ഡ്രെസ്സ് ഒക്കെ മാറ്റി ഒരു പാന്റും ഷർട്ടും ഇട്ടിട്ടുണ്ട്. കൂട്ടുകാരോടൊപ്പം അവൻ പന്തലിൽ ആയിരുന്നു. സമീർ അവളുടെ അടുത്തു വന്നിരുന്നു. സമീറിന്റെ ഉമ്മ അവളുടെ പ്ലേറ്റിലേക്ക് അരിപ്പത്തിരിയും മട്ടൻകുറുമയും വിളമ്പി. " കഴിക്കു മോളേ... അവളെ നോക്കി ചിരിയോടെയാണ് അവർ പറഞ്ഞത്. " ഉച്ചക്ക് ഒന്നും കാര്യമായിട്ട് കഴിച്ചില്ലല്ലോ. അത് കൊണ്ടു ഉമ്മ വിളമ്പിയത് മുഴുവൻ കഴിക്കണം. സമീർ അവളുടെ അടുത്തേക്ക് നീങ്ങി ഇരുന്നു കൊണ്ടു പറഞ്ഞു.അവൾ അതിനു മറുപടി ഒന്നും പറയാതെ പ്ലേറ്റിൽ ഉള്ളത് മുഴുവൻ കഴിച്ചു. പിന്നെയും വിളമ്പാൻ പോയപ്പോൾ വേണ്ടാന്ന് പറഞ്ഞു എഴുന്നേറ്റു. ഭക്ഷണം കഴിഞ്ഞു എല്ലാവരും ഹാളിൽ തന്നെ സംസാരിച്ചിരുന്നു. ✳️✳️✳️✳️✳️ അൽപ സമയം കഴിഞ്ഞു ഷബ്‌നയും സുമയ്യയും സമീറിന്റെ മൂത്ത സിസ്റ്റർ സുഹൈനയും നച്ചുവിനെ കൂട്ടികൊണ്ട് പോയി. അവൾ ഫ്രഷ് ആയി വന്നപ്പോൾ സെറ്റ് സാരിയും ചെറുപയർ കളറിൽ ബ്ലൗസും ഒക്കെ കണ്ടു അമ്പരന്നു. " ഞങ്ങൾ ഒക്കെ ഫസ്റ്റ്നൈറ്റിൽ സെറ്റ് സാരിയും ബ്ലൗസും ആണ് ഉടുത്തത്. അത്കൊണ്ടു നച്ചുവിനും അത് തന്നെ വാങ്ങി. ഷബ്‌ന അതും പറഞ്ഞു നച്ചുവിന് ഭംഗിയിൽ അതുടുത്തു കൊടുത്തു. സെറ്റ് സാരിയും ബ്ലൗസും അവൾകു ഇണങ്ങുന്നുണ്ടായിരുന്നു. പിന്നെ അവളുടെ നീണ്ട ഇടതൂർന്ന മുടി നന്നായി മെടഞ്ഞു അതിൽ മുല്ലപ്പൂവ് ചൂടി. ചെറിയ രീതിയിൽ ഒരുക്കി അവളെ കണ്ണാടിയുടെ മുൻപിൽ കൊണ്ടു വന്നു നിർത്തി. " നോക്കിയേ നച്ചു... നന്നായിട്ടില്ലേ? ഷബ്‌ന ചോദിച്ചപ്പോൾ അവൾ കണ്ണാടിയിലേക്ക് നോക്കി. അവരുടെ എല്ലാം മുഖത്ത് നിറഞ്ഞ ചിരിയുണ്ടായിരുന്നു. അവരെല്ലാം കൂടി അവളെ പുറത്തേക്കു കൊണ്ടു വന്നു. അടുത്ത ബന്ധുക്കളായ സ്ത്രീകൾ അവളെ കണ്ണ് ചിമ്മാതെ നോക്കുന്നുണ്ട്. എല്ലാവരുടെയും മുഖം വിടർന്നിട്ടുണ്ട്. നച്ചുവിന് അവരുടെയൊക്കെ മുൻപിൽ ഇങ്ങനെ നില്കാൻ ബുദ്ധിമുട്ട് തോന്നി. സമീറിന്റെ ഉമ്മ നച്ചുവിന്റെ കൈകൾ ചേർത്ത് പിടിച്ചു. ഷബ്‌ന ഒരു ഗ്ലാസ്‌ പാലുമായി അങ്ങോട്ട് വന്നു. നച്ചുവിനെ കൂട്ടി സുമയ്യായും ഷബ്‌നയും മുകളിലേക്കുള്ള സ്റ്റെപ്പുകൾ കയറി. സമീറിന്റെ മുറിയുടെ മുൻപിൽ എത്തിയപ്പോൾ പാൽ ഗ്ലാസ്‌ നച്ചുവിനെ ഏല്പിച്ചു ഒരു 'all the best ' പറഞ്ഞു അവർ രണ്ടും താഴേക്കു പോയി. നച്ചു ഒന്ന് ശ്വാസം വലിച്ചു വിട്ടു. പിന്നെ പതിയെ ഡോർ ഹാൻഡിൽ തിരിച്ചു. മുറിയിലേക്കു കയറിയ അവൾ അവിടെയുള്ള ഒരുക്കങ്ങൾ കണ്ടു കണ്ണു മിഴിച്ചു. മുല്ലപ്പൂവും വേറെ ഫ്രഷ് ഫ്ലവറും കൊണ്ടു മനോഹരമാക്കിയിരിക്കുന്നു. അതൊക്കെ ശ്രദ്ധിച്ചു നിൽകുമ്പോൾ പുറകിൽ കതകു തുറക്കുന്ന ശബ്ദം കേട്ടു നച്ചു തിരിഞ്ഞു നോക്കി. പുഞ്ചിരിയോടെ അവളുടെ അടുത്തേക്ക് നടന്നടുക്കുന്ന സമീർ!!. തുടരും വൈകുന്നതിന്റെ കാരണം ഞാൻ പറഞ്ഞിരുന്നല്ലോ. സഹകരിക്കുന്ന എല്ലാ കൂട്ടുകാർക്കും 🙏😊 #📙 നോവൽ