55 #📔 കഥ #💞 പ്രണയകഥകൾ #📚 ട്വിസ്റ്റ് കഥകൾ #✍ തുടർക്കഥ #📙 നോവൽ അയലത്തെ അമ്പിളി പിറ്റേന്ന് രാവിലെ തന്നെ അമ്പിളി തന്റെ ജോലി തുടങ്ങി. ബ്രേക്ക് ഫാസ്റ്റും, ഉച്ചയ്ക്ക് അപ്പുവിനും രുദ്രനും കൊണ്ടു പോകാനുള്ള ഊണും ഒക്കെ അമ്പിളി സ്വന്തം വീട്ടിൽ വച്ച് തന്നെ തയ്യാറാക്കി കൊണ്ടു വരികയാണ് ചെയ്തത്. അമ്പിളിക്ക് അതാണ് സൗകര്യമെന്ന് തോന്നിയതു കൊണ്ട് രുദ്രനും അതിൽ എതിർപ്പ് ഒന്നും പറഞ്ഞില്ല. അതാവുമ്പോൾ അവൾക്ക് കുമാരന്റെയും കിഷോറിന്റെയും ഒക്കെ കാര്യങ്ങൾ നോക്കുകയും ചെയ്യാം.... രുദ്രന്റെയും അപ്പുവിന്റെയും ചോറ്റു പാത്രം തലേന്ന് രാത്രി തന്നെ അമ്പിളി വീട്ടിലേക്ക് എടുത്തിരുന്നു. രണ്ടു പാത്രങ്ങളിലും ചോറും കറികളും പകർന്നെടുത്ത്, ബ്രേക്ക് ഫാസ്റ്റും കാസറോളിൽ ആക്കി അമ്പിളി രുദ്രന്റെ വീട്ടിലേക്ക് എത്തുമ്പോൾ ഏഴര ആകുന്നെ ഉണ്ടായിരുന്നുള്ളൂ.... ആ നേരത്തിനുള്ളിൽ അവൾ കുമാരന് പ്രഭാതഭക്ഷണം കൊടുത്തു കഴിഞ്ഞിരുന്നു. കിഷോറിനുള്ളത് അവനെടുക്കാൻ പാകത്തിന് എടുത്തു മൂടി വച്ചിട്ടാണ് അവൾ വന്നിരിക്കുന്നത്. രുദ്രൻ അപ്പോഴേക്കും കുളിയൊക്കെ കഴിഞ്ഞു അപ്പുവിനെ ഉണർത്തുക എന്ന ഭഗീരധപ്രയത്നത്തിൽ ആയിരുന്നു. പിന്നീട് അപ്പുവിനെ കുളിപ്പിച്ച് ഒരുക്കുന്ന പണിയൊക്കെ അമ്പിളി ഏറ്റെടുത്തു. രുദ്രന് അന്ന്, കുറച്ചു ദിവസമായി മനസ്സിനെ ചുറ്റി വരിഞ്ഞിരുന്ന പിരിമുറുക്കം ഒന്ന് അയഞ്ഞു കിട്ടിയതായി തോന്നി. മുൻപ് രുഗ്മിണിയമ്മ ഉണ്ടായിരുന്നപ്പോൾ ഉള്ളത് പോലെ ഒരാശ്വാസം..... ജീവിതചര്യ പിന്നെയും കുറച്ചു നാളായി തുടർന്ന് പോന്നിരുന്ന താളം വീണ്ടെടുത്തിരിക്കുന്നു.... അപ്പുവിനെ സ്കൂളിൽ വിട്ടിട്ട് അതേ സന്തോഷത്തോടെയും സമാധാനത്തോടെയും തന്നെയാണ് രുദ്രൻ അന്ന് സൂപ്പർ മാർക്കറ്റിലേക്ക് പോയത്. ആ സമാധാനത്തിന് പക്ഷെ ശ്രീധരന്റെ കാൾ വരുന്നത് വരെയുള്ള ആയുസ്സെ ഉണ്ടായിരുന്നുള്ളൂ. കാവ്യ തിരികെ വന്നിരിക്കുന്നു എന്ന വാർത്ത ഒട്ടൊരു ഞെട്ടലോടെയാണ് രുദ്രൻ കേട്ടത്. അതിനേക്കാൾ പ്രതാപൻ ഒപ്പം ഇല്ല എന്നറിഞ്ഞപ്പോഴാണ് അവൻ ആകെ തളർന്നു പോയത്. ശ്രീധരന്റെ കോൾ കട്ടാകുമ്പോൾ രുദ്രന് തലചുറ്റുന്നത് പോലെ തോന്നുന്നുണ്ടായിരുന്നു. ഇനി രുദ്രന്റെ ജീവിതത്തിലേക്ക് കടന്നു കയറില്ല എന്ന് ഉറപ്പ് വാങ്ങിയിട്ടാണ് കാവ്യയെ വീട്ടിൽ കയറ്റിയത് എന്ന് ശ്രീധരൻ പറഞ്ഞിരുന്നു. പക്ഷെ എങ്ങനെ അത് വിശ്വസിക്കും ? എങ്ങനെ കാവ്യയെ വിശ്വസിക്കും? കാവ്യ ഇപ്പോഴും നിയമപരമായി തന്റെ ഭാര്യയാണ്. അങ്ങനെയായാൽ പോലും അവളിനി തന്റെ ജീവിതത്തിലുണ്ടാവില്ല. അക്കാര്യത്തിൽ തനിക്ക് ഒരു സംശയവുമില്ല. പക്ഷേ അപ്പു....? കാവ്യ അവളുടെ അമ്മയാണ്. അപ്പുവിനെ സ്നേഹിച്ചിട്ടില്ലെങ്കിലും, അവളെ ഉപേക്ഷിക്കാൻ നോക്കിയെങ്കിലും കാവ്യ അവളുടെ അമ്മ ആണ് എന്നത് നിഷേധിക്കാനാവില്ലല്ലോ.? അപ്പുവിനെ വേണമെന്ന് അവൾ ആവശ്യപ്പെട്ടാൽ ? രുദ്രന് ആകെ ഭ്രാന്ത് പിടിക്കും പോലെ തോന്നി. പിന്നീട് ഒന്നിലും ശ്രദ്ധ കൊടുക്കാന്‍ അവനായില്ല... ഉച്ചയോടെ ശക്തമായ തലവേദന തോന്നിത്തുടങ്ങി രുദ്രന്. രുദ്രൻ, അഭിയുടെ ആഭാവത്തിൽ ഇപ്പോൾ കടയുടെ ഓൾ ഇൻ ആൾ ആയിട്ടുള്ള ബിജുവിനോട് പറഞ്ഞിട്ട് സൂപ്പർമാർക്കറ്റിൽ നിന്ന് ഇറങ്ങി നേരെ എതിരെയുള്ള സ്റ്റീഫൻ അച്ചായന്റെ ചായക്കടയിലേക്ക് നടന്നു.... 🌜 വീടിന് അടുത്ത് വരെ ഓട്ടം വന്നത് കൊണ്ട് ഇന്ന് ഊണ് ജയയോടൊപ്പം ആക്കാമെന്ന് കരുതിയാണ് പപ്പുവേട്ടൻ വീട്ടിലേക്ക് ചെന്നത്. ഹോട്ടലിൽ നിന്നും കഴിക്കുന്ന പതിവില്ല പപ്പുവേട്ടന്. വാട്ടിയ ഇലയിൽ പൊതിഞ്ഞെടുത്ത ചോറ് എന്നും രാവിലെ ഓട്ടം പോകുമ്പോൾ കയ്യിൽ കരുതും. ഇത് പോലെ വീട്ടിനടുത്തൊക്കെ ഓട്ടം വന്നാൽ വീട്ടിലേക്ക് ചെന്ന് ജയയോടൊപ്പം ഇരുന്ന് ഊണ് കഴിക്കും. ഇന്ന് പക്ഷെ ജയയുമായി പങ്ക് വയ്ക്കാൻ പപ്പുവേട്ടന്റെ പക്കൽ ഒരു വിശേഷം കൂടിയുണ്ട്. അത് ജയയെ എങ്ങനെ ബാധിക്കും എന്നുള്ള ആശങ്കയും ഉണ്ട്. പപ്പുവേട്ടൻ ചെല്ലുമ്പോൾ ജയ ഉമ്മറപ്പടിയിൽ എന്തോ പുസ്തകം വായിച്ചു ഇരിപ്പുണ്ട്. " അച്ഛൻ വന്നോ? " " ഇവിടെ അടുത്തൊരു ഓട്ടം കിട്ടി. " കയ്യിൽ കരുതിയിരുന്ന പലവ്യഞ്ജിന സാധങ്ങളുടെ കവറുകൾ ഒക്കെ ജയയുടെ കയ്യിൽ കൊടുത്തു കൊണ്ട് അയാൾ ചോറ് പൊതിയും കൊണ്ട് അകത്തേക്ക് കയറി. ഇരുവരും ഒരുമിച്ചിരുന്നാണ് ആഹാരം കഴിച്ചത്. " അന്ന് ഞാൻ ഇന്റർവ്യൂ ന് പോയില്ലേ അച്ഛാ? ആ സ്കൂളിന്ന് കുറച്ചു മുന്നേ വിളിച്ചിരുന്നു. ലിസ്റ്റ് ഇട്ടൂന്ന്. ഞാനാ ഒന്നാമത്. അടുത്ത ആഴ്ച ജോയിൻ ചെയ്യാനാ അവര് പറഞ്ഞത്. " ജയക്ക് പറയാൻ ഒരു സന്തോഷ വാർത്ത ഉണ്ടായിരുന്നു. " ആണോ കുഞ്ഞേ...? ഈശ്വരാ.... എന്റെ കൊച്ചിനൊരു സ്ഥിരവരുമാനം ആയല്ലോ? " പപ്പുവേട്ടൻ സന്തോഷത്തോടെ, അതിലേറെ ആശ്വാസത്തോടെ നെഞ്ചിൽ കൈവച്ചു. " സ്ഥിരം ഒന്നും അല്ല എന്റെ അച്ഛാ. അത് മീറ്റെർണിറ്റി ലീവ് വേക്കൻസിയാ. എന്ന് വച്ചാ പ്രസവാവധി. ആറ് മാസമേ ഉള്ളൂ... എന്നാലും ഈ ട്യൂഷൻ സെന്ററിൽ നിന്ന് കിട്ടണത് പോലെ അല്ല.... നല്ല സാലറി കിട്ടും. പിന്നെ എക്സ്പീരിയൻസും ആവുമല്ലോ? " ജയ പപ്പുവേട്ടന്റെ തെറ്റിധാരണ തിരുത്തി. " അപ്പൊ നീ ട്യൂഷൻ ക്ലാസ്സിലെ ജോലി നിർത്താൻ പോവാ? " ജയ പറഞ്ഞത് കേട്ടപ്പോൾ, ആറ് മാസം കഴിഞ്ഞാൽ ജയക്ക് ജോലി ഇല്ലാതാവുമോ എന്നായി പപ്പുവേട്ടന് ആശങ്ക. " ഏയ്‌.... സ്ഥിരമായി ഒരു വരുമാനം ഉണ്ടാവാതെ ഞാൻ അത് കളയുകയൊന്നും ഇല്ല. ഞായറും ശനിയും വൈകിട്ടും ഒക്കെ ആയിട്ട് അത് അഡ്ജസ്റ്റ് ചെയ്യണം. " " മ്മ്... അതാണ്‌ നല്ലത്. താൽക്കാലികമായിട്ട് ഒരു ജോലി കിട്ടീന്ന് വച്ച് സ്ഥിരമായിട്ട് ഉള്ളൊരു വരുമാനം ഇല്ലാതാക്കരുതല്ലോ? " പപ്പുവേട്ടനും ജയയുടെ അഭിപ്രായം ശെരി വച്ചു. " മക്കളേ... പിന്നില്ലേ? അച്ഛൻ ഇന്ന് ഇങ്ങോട്ട് വരും വഴി ഒരു വിവരം അറിഞ്ഞിരുന്നു.... " അറിഞ്ഞ വിവരം ജയയോട് പറയണമോ എന്ന് പപ്പുവേട്ടൻ ഒന്ന് സംശയിച്ചു. പറയാനും വയ്യ പറയാതിരിക്കാനും വയ്യ എന്ന അവസ്ഥ... കാവ്യാ തിരികെ വന്ന കാര്യം കുറച്ചു മുൻപാണ് പപ്പുവേട്ടൻ അറിഞ്ഞത്. നാട്ടിൽ ഏതാണ്ട് എല്ലാവരും തന്നെ അറിഞ്ഞിട്ടുണ്ട്. അല്ലെങ്കിലും ഇത്തരം കാര്യങ്ങളൊക്കെ കാട്ടു തീ പോലെയാണല്ലോ? അറിഞ്ഞവർ അറിയാത്തവരെ എല്ലാം തന്നെ അറിയിച്ചു കൊള്ളും... " എന്താ അച്ഛാ? " കഴിച്ച പാത്രവും എടുത്ത് അടുക്കളയിലേക്ക് നടക്കും വഴി ജയ ചോദിച്ചു. " അത്... കാവ്യ തിരിച്ചു വന്നെന്ന്...... " ജയ നിന്നു. " എപ്പോ? " പതിഞ്ഞ ഒരു ചോദ്യം. " ഇന്നലെയോ മറ്റോ ആണ്. നാട്ടിൽ എല്ലാവരും അറിഞ്ഞിട്ടുണ്ട്. " " മ്മ്... " അവൾ മെല്ലെയൊന്ന് മൂളി.... " പ്രതാപൻ.... " പപ്പുവേട്ടൻ എന്തോ പറയാൻ ഒരുങ്ങിയതാണ്. " വേണ്ടച്ചാ... " ജയ അപ്പോൾ തന്നെ അത് തടഞ്ഞു. " എനിക്കറിയണ്ട. അയാളുടെ പേര് പോലും എനിക്ക് കേൾക്കണ്ട. അയാള് മരിച്ചിട്ട് വർഷം ഒന്ന് കഴിഞ്ഞു. എന്റെ മനസ്സിൽ അയാൾക്കുള്ള ശേഷക്രിയകൾ പോലും ഞാൻ എന്റെ മക്കളെക്കൊണ്ട് ചെയ്യിപ്പിച്ചു കഴിഞ്ഞതാണ്... " അത്രയും പറഞ്ഞു കൊണ്ട് അവൾ അടുക്കളയിലേക്ക് തന്നെ നടന്നു. ഊണ് കഴിഞ്ഞു വീട്ടിൽ നിന്നും ഇറങ്ങുമ്പോൾ പപ്പുവേട്ടന് വല്ലാത്ത ആശ്വാസം തോന്നിയിരുന്നു. പ്രതാപൻ എന്ന വ്യക്തിക്ക് ഇനി എന്ത് സംഭവിച്ചാലും അതിനി ജയയെ ബാധിക്കുകയേ ഇല്ല എന്ന ആശ്വാസം.... 🌜 🌜 🌜 🌜 🌜 ജയ ജീവിച്ചു തുടങ്ങി... ജീവിക്കട്ടെ അല്ലെ..... 🥰 ഡെയിലി തരുന്നില്ലേ? അതാണ് ചെറിയ പാർട്ട്‌ 🫣