#🙏ପବିତ୍ର ସଫଳା ଏକାଦଶୀ ଉପବାସ🪷 #ଓଁ ନମଃ ଭଗବତେ ବାସୁଦେବ🙏 ⚫❗⚫ -: ll ସଫଳା ଏକାଦଶୀ ll :- ପୌଷ କୃଷ୍ଣ ଏକାଦଶୀ ସର୍ବୋତ୍କୃଷ୍ଟ ଏକାଦଶୀ ଭାବରେ କଥିତ। ଏହାର ନାମ ‘ ସଫଳା ଏକାଦଶୀ ’। ଏହିଦିନ ଭଗବାନ ବିଷ୍ଣୁଙ୍କୁ ‘ନାରାୟଣ’ ରୂପରେ ପୂଜା କରାଯାଇଥାଏ। ଯେପରି ନାଗମାନଙ୍କ ମଧ୍ୟରେ ଶେଷନାଗ, ପକ୍ଷୀମାନଙ୍କ ମଧ୍ୟରେ ଗରୁଡ଼ ଓ ଦେବତାମାନଙ୍କ ମଧ୍ୟରେ ଶ୍ରୀବିଷ୍ଣୁ, ଠିକ୍ ସେହିପରି ବ୍ରତମାନଙ୍କ ମଧ୍ୟରେ ଏକାଦଶୀ ତିଥି ଶ୍ରେଷ୍ଠ। ସେ ମଧ୍ୟରେ ସଫଳା ଏକାଦଶୀ ସର୍ବଶ୍ରେଷ୍ଠ। କାରଣ ଏହି ଏକାଦଶୀ ବ୍ରତ କଲେ ମନୁଷ୍ୟ ସର୍ବୋତ ଭାବରେ ସଫଳ ହୋଇଥାଏ। ଜୀବଦ୍ଦଶାରେ ଧନଧାନ୍ୟ ଭୋଗ କରି ମୃତ୍ୟୁ ପରେ ବୈକୁଣ୍ଠ ପ୍ରାପ୍ତ ହୁଏ। ଏହି ଦିନ ଉଜାଗର ଓ ଉପବାସ ରହି ନଡ଼ିଆ, କଦଳୀ, ଅଁଳା ଆଦି ଫଳମୂଳ ସହିତ ଧୂପ ଦୀପ ଦେଇ ନାରାୟଣଙ୍କୁ ପୂଜା କରାଯାଏ। ରାତି ସାରା ଉଜାଗର ରହି ଦୀପ ଦାନ କରାଯାଏ। ପରଦିନ ପାରାୟଣ ପରେ କେବଳ ଫଳ ପ୍ରସାଦ ଗ୍ରହଣ କରାଯାଏ। ll ଏକାଦଶୀ ମହାତ୍ମ୍ୟ ll :- ଚମ୍ପାବତୀ ନଗରୀର ରାଜା, ରାଜର୍ଷି ମହିଷ୍ମତୀଙ୍କର ପୁତ୍ର ଲୁମ୍ବକ ଦୁରାଚାରୀ ହେବାରୁ, ରାଜା ତାଙ୍କୁ ରାଜ୍ୟରୁ ବାହାର କରି ଦେଇଥିଲେ। ସେ ଜଙ୍ଗଲରେ ରହି, ଫଳ, ମୂଳ ଓ ପଶୁପକ୍ଷୀଙ୍କର ମାଂସ ଖାଇ ଏକ ପୁରୁଣା ଅଶ୍ୱତ୍‌ଥ ବୃକ୍ଷ ତଳେ ବାସ କରୁଥିଲେ। ଥରେ ଶୀତଦିନରେ ପ୍ରବଳ ଶୀତ ଓ ଖାଦ୍ୟଭାବରୁ ସାରା ରାତି କାତର ହୋଇ ସେ ନିଜର ସମସ୍ତ ପାପକର୍ମ ନିମିତ୍ତ ଅନୁତାପ କରୁ କରୁ ଭଗବାନ ବିଷ୍ଣୁଙ୍କ ନାମ ଉଚ୍ଚାରଣ କରି ନିଜର ପାପ ନିମିତ୍ତ ତାଙ୍କୁ କ୍ଷମା କରି ଦେବାକୁ ପ୍ରାର୍ଥନା କଲେ। ରାତି ଶେଷ ହେଲା ବେଳକୁ, ସେହିପରି ଜପ କରୁ କରୁ, ପ୍ରବଳ ଶୀତରେ ତାଙ୍କର ଚେତନା ଲୋପ ପାଇଗଲା। ଚେତନା ଫେରିବା ବେଳକୁ ଦ୍ୱିପ୍ରହର ହୋଇ ଯାଇଥିଲା। ଦୁର୍ବଳ ପାଦରେ ଉଠି, କିଛି ଫଳ ସଂଗ୍ରହ କରି, ସେ ସେହି ଫଳକୁ ଶ୍ରୀନାରାୟଣଙ୍କୁ ସମର୍ପଣ କରି ଭୋଜନ କଲେ। ସେଦିନଟି ଥିଲା ପୌଷ କୃଷ୍ଣ ଏକାଦଶୀ। ତାଙ୍କର ଅଜାଣତରେ ଏହି ଏକାଦଶୀ ବ୍ରତ ପାଳନ କରିଥିବାରୁ ତାଙ୍କର ହୃଦୟ ପରିବର୍ତ୍ତନ ହେଲା ଏବଂ ସେ ପବିତ୍ର ଜୀବନଯାପନ କଲେ। ରାଜା ତାହା ଜାଣି ପୁତ୍ରକୁ ରାଜ୍ୟକୁ ଫେରାଇନେଲେ। ଲୁମ୍ବକ ରାଜା ହୋଇ, ରାଜସୁଖ ଭୋଗକରି, ବୈକୁଣ୍ଠପ୍ରାପ୍ତ ହେଲେ। କଥିତ ଅଛି ଯେ ଏହି ଏକାଦଶୀ ବ୍ରତ ପାଳନ କଲେ, ସହସ୍ର ବର୍ଷର ତପ ଓ ଅଶ୍ୱମେଧ ଯଜ୍ଞର ଫଳ ମିଳେ । -: ll ଶ୍ରୀ ଏକାଦଶୀ ମାହାତ୍ମ୍ୟ ll :- ll ଯୁଧିଷ୍ଠିର ଉବାଚ ll ବିନୟେ ପଣ୍ଡୁର ସନ୍ତତି l ବାସୁଦେବଙ୍କୁ ପଚାରନ୍ତି ll ଏ ପୌଷ କୃଷ୍ଣ ଏକାଦଶୀ l କହିବା ଶ୍ରୀକୃଷ୍ଣ ବିଶେଷି ll ଏହାର କିସ ନାମ ଧେୟ l କେଉଁ ବିଧିରେ ଏ ବିଧେୟ ll ll ଶ୍ରୀକୃଷ୍ଣ ଉବାଚ ll କୃଷ୍ଣ କହନ୍ତି ପଣ୍ଡୁ ସୁତ l ଏ ମୋର ଅତ୍ୟନ୍ତ ଗୁପତ ll ପ୍ରୀତି ହେତୁରୁ ସୁପ୍ରକାଶ l କରିବା ଯେ ଅବା ବିଶେଷ ll ଦକ୍ଷିଣା ବିଶେଷର ବ୍ରତ l ସେ ଯଜ୍ଞ ଦାନାଦି ସୁକୃତ ll ଯେ ଅବା ତୀର୍ଥ ବ୍ରତମାନ l କେହି ନୁହନ୍ତି ଏ ସମାନ ll ଏ ମୋର ଯଥା ତୁଷ୍ଟିକର l ସେ ରୂପେ ନାହିଁ ଆଉ ପର ll ରୂପେ ଯେ ଗୀତା ଭାଗବତ l କାର୍ତ୍ତିକ ବ୍ରତ ଯେବା ଭକ୍ତ ll ତହୁଁ ଅଧିକ ଏ ଯେ ବ୍ରତ l ଜାଣେ ଏ ମୋର ପଞ୍ଚଭୂତ ll ପଞ୍ଚ ପବନ ପ୍ରାଣସମ l ଏ ମହାବ୍ରତ ମୋର ପ୍ରାଣ ll ତେଣୁ ଏ ବ୍ରତ ଯତ୍ନ କରି l କରିଲେ ସର୍ବ ନରନାରୀ ll ଏ ପୌଷ ମାସ ଏକାଦଶୀ l ମାହାତ୍ମ୍ୟ ଗୁଣ ସେ ବିଶେଷି ll ଏବେ ଏ ଏକାଦଶୀ କର l ଭେଦ ନ କର ଯୁଧିଷ୍ଠିର ll ଲୋକମାନଙ୍କ ହିତ ପାଇଁ l ଏ କୃଷ୍ଣ ଦୀକ୍ଷା କହିବଇଁ ll ପୌଷର କୃଷ୍ଣ ଏକାଦଶୀ l ନାମେ ସଫଳା କରି ଭାଷି ll ଏଥିରେ ଦେବି ନାରାୟଣ l ଅଧି ଦେବତା କରି ଜାଣ ll ଯତ୍ନରେ ତାଙ୍କୁ ପୂଜା କର l ନାନା ନୈବେଦ୍ୟ ଯୁଧିଷ୍ଠିର ll ଯେ ରୂପେ ଶେଷ ନାଗଈଶ l ଗରୁଡ଼ ପକ୍ଷୀଙ୍କ ଅଧୀଶ ll ଯଥା ଦେବରେ ନାରାୟଣ l ଦ୍ଵାପର ମଧ୍ୟରେ ବ୍ରାହ୍ମଣ ll ନଦୀଙ୍କ ମଧେ ଗଙ୍ଗାପର l ବ୍ରତଙ୍କ ମଧ୍ୟେ ଏ ଈଶ୍ଵର ll ସେ ଜନମାନେ ପୂଜ୍ୟ ମୋର l ଯେ ଏକାଦଶୀରେ ତତ୍ପର ll ଶୁଣ ସଫଳ ବିଧି ରାଜା l ଫଳମାନରେ ଯହିଁ ପୂଜା ll ଜମ୍ବିଳ ମୁଗ ନାରିକେଳ l ଡାଳିମ୍ବ ବିଜପୁର ଫଳ ll ଆମ୍ବ ଲବଙ୍ଗ ଜାତି ଫଳ l ଅନ୍ୟ ଯେ ବିଶୁଦ୍ଧ ମଧୁର ll ଫଳେ ପୂଜିବ ନାରାୟଣୀ l ଦୀପ ସୁରଭି ଧୂପଦାନୀ ll ଜାଗର ଦେଇ ଉଜାଗର l ହୋଇବ ଦେବତା ଆଗର ll ଅରୁଣ ଉଦୟ ଅବଧି l ଯେ କରେ ଉଜାଗର ବିଧି ll ଏକାଗ୍ର ମନରେ ତାହାର l ପୁଣ୍ୟ କହିବା ଯୁଧିଷ୍ଠିର ll ଯଜ୍ଞ ଯେ ପୁଣ୍ୟ ସମ ନୋହେ l ଗଙ୍ଗାଦି ତୀର୍ଥ ଉଣା ହୁଏ ll ଏ ଲୋକ ପରଲୋକ ଦୁଇ l ଜିଣି ଜ୍ୟୋତିଷ୍ପତି ହୋଇ ll ପଞ୍ଚ ସହସ୍ର ବର୍ଷ କାଳ l ତପସ୍ୟା କରି ଯେତେ ଫଳ ll ସଫଳା ଦିନେ ଉଜାଗର l ହୋଇ ସେ ଫଳ ପାଏ ନର ll କହିବା ଅବନୀ ନାୟକ l ଶୁଣ ସୁଫଳ କଥା ଏକ ll ଅଛଇ ଚମ୍ପାବତୀ ନାମ l ଏକଇ ପୁର ସୁସମ୍ପନ୍ନ ll ତହିଁରେ ରାଜା ମାହିଷ୍ମତ l ତାଙ୍କର ହେଲେ ଚାରିସୁତ ll ଏକ ଏକରେ ବଳିଆର l ଇଚ୍ଛା ଜିଣିବା ତିନିପୁର ll ଏ ଚାରି ଭାଇଙ୍କର ଜ୍ୟେଷ୍ଠ l ଦୁଷ୍ଟ ଆଚାରେ ସୁଗରିଷ୍ଠ ll ନିର୍ଭୟ ପାପ କରିବାରେ l ଅତି ତତ୍ପରେ ପରଦାରେ ll ବେଶ୍ୟା ସଙ୍ଗତେ ଅତି ରତ l ନିରତେ ପାନ ଦୁଇ ମତ ll ପାପ ଆଚାରେ ପିତା ଧନ l ବ୍ୟୟ ସେ କଲା ପୁନଃପୁନ ll ବ୍ରାହ୍ମଣ ବୈଷ୍ଣବ ନିନ୍ଦଇ l ନିତ୍ୟ ଅସତ୍ୟ ବୃତ୍ତେ ଥାଇ ll ଈଦୃଶ କରିଣ ପୁତ୍ରକୁ l ଦେଖି ଶୁଣିଣ କୋପେ ତାକୁ ll ଲମ୍ଭକ ନାମା କରି ତାତ l ରାଜ୍ୟରୁ କଲେ ନିଷ୍କାଷିତ ll ବନ୍ଧୁ ବାନ୍ଧବ ପ୍ରଜାମାନେ l ଭୟରେ ନ ରଖିଲେ ସ୍ଥାନେ ll କଦାପି ସ୍ବାଭାବିକ ଗୁଣ l ଦଣ୍ଡ ମୁଣ୍ଡରେ ନୁହେଁ ଆନ ll ଦେଖନ୍ତି ସେହି ଗୁଣ ପରେ l ଲମ୍ବକ ବିଚାରିଲା ଥରେ ll କଲି ମୁଁ ବହୁତ କୁକର୍ମ l ପିତାଦିଙ୍କର ଏ କି ଧର୍ମ ll ନ ଦେଲେ ଖାଇବାକୁ ମୋତେ l ରାଜ୍ୟରୁ ନିଷ୍କାସି ସମସ୍ତେ ll ଏତେ ବିଚାରି ସେ ପାପିଷ୍ଠ l ପୁଣି ହିଁ ପାପରେ ପ୍ରବିଷ୍ଟ ll ସିଦ୍ଧାନ୍ତ କଲା ବନେ ଥିବି l ପିତାର ରାଜ୍ୟକୁ ନ ଯିବି ll ଏତେ ବିଚାରି ସେ ଲମ୍ବକ l ଗଲା ଗହନ ବନ ଏକ ll ତହିଁରେ ବହୁ ଜୀବ ମାରି l ପିତାଙ୍କ ରାଜ୍ୟୁ ଚୋରିକରି ll କଲା ସେ ବୃତ୍ତି ନିରନ୍ତର l ନୋହିଲା ନିବୃତ୍ତି ଅନ୍ତର ll ଶୁଦ୍ଧ ମତିରେ ଧରି ଲୋକେ l ନମାରି ଛାଡ଼ିଦେଲେ ଶୋକେ ll ନିତ୍ୟେ ଆମିଷେ ଥାନ୍ତି ରତ l ଯେ ଅବା ଚୌର୍ଯ୍ୟ ବେଶ୍ୟାରତ ll ଏ ସର୍ବ ଜନ୍ମାନ୍ତର ପାପ l ହେତୁରୁ ହୋଇଲା ହେ ନୃପ ll ଅତି ଦୂରନ୍ତ ପାପ ଭୋଗ l କହନ୍ତେ ଫଳ ହେଲା ଭୋଗ ll କରିବି କିମ୍ପା ଜୀବ ଘାତ l ଯହୁଁ ନରକେ ହୁଏ ପାତ ll ଏ ବନେ ଏତେ ଫଳ ଅଛି l ଖାଇବି ମୋ ମନକୁ ବାଛି ll କିମ୍ପା କରିବି ଘରେ ଚୋରୀ l ଦୁଃଖ ପାଇବି ଅର୍ଜିକରି ll ବେଶ୍ୟାକୁ ଧନ ଦେଲି କେତେ l ତାହା ନଦେଲି ସାଧୁ ହସ୍ତେ ll ଦେଖ ଏ ପାପ ପୂଣ୍ୟ ଗତି l ବଦଳି ଗଲା ସେହି ମତି ll ଏ ରୂପେ ପାପ ପୁଣ୍ୟ ଗତି l ଶୁଣି ବିସ୍ମିତ ନରପତି ll ପୁଣି କୃଷ୍ଣଙ୍କୁ ପଚାରିଲେ l ଲମ୍ବକ କେଉଁ ବୃ୍ତ୍ତି କଲେ ll କୃଷ୍ଣ କହିଲେ ପଣ୍ଡୁସୁତ l ଶୁଣ ସେ କଲେ ଋଷିବୃତ୍ତ ll ଆଶ୍ରମ ଅଶ୍ଵତ୍ ଥର ତଳେ l ରହି ବଞ୍ଚିଲେ ଫଳମୂଳେ ll ଏହି ଆଶ୍ରମେ ଥାଇ ତାର l କ୍ରମରେ ଗଲା କେତେ କାଳ ll ପୁଷ ଆଗତ ଦଶମୀରେ l ଲମ୍ବକ ଅତି ଶୀତ ଡରେ ll ନ ଖାଇ ରହିଲାକ ନିଶି l ରାତ୍ର ପାହିଲା ଏକାଦଶୀ ll ପ୍ରାତଃକାଳର ସ୍ନାନ କଲା l ତତ୍କାଳ ସାରି ବିଚାରିଲା ll ଆଣିଲା କିଛି ଫଳମୂଳ l ଆଶ୍ରମେ ରଖିଲା ସକଳ ll ଖାଇବ ବୋଲି ଆପେ ବାଢ଼ି l ଆପଣା ଘର ମନେ ପଡ଼ି ll ଜାତ ହେବାରୁ ଅତି ଦୁଃଖ l ହେଲା ସେ ଆତ୍ମାରେ ବିମୁଖ ll ପ୍ରୟାସ ଦୁର୍ବଳାଚାରୀର l ତହିଁରେ ଚିନ୍ତା ଅତି ଘୋର ll ପୁଷ ମାସରେ ହୀମ ପଡ଼ି l ଗଲା ଲମ୍ବକ ଅତି ସଢ଼ି ll କଥା ନ କହେ ଦନ୍ତ ଥରେ l ଭାଗ୍ୟବଶରୁ କୃଷ୍ଣ ସ୍ଫୁରେ ll ଉଠି ନ ପାରେ ଦେହ ଥରେ l କୃଷ୍ଣ ଉଚ୍ଚାରେ ଅତି ଧୀରେ ll ଏ ରୂପେ ବୋଲୁ ବୋଲୁ ଦିନ l ଗଲା ପ୍ରବେଶ ହେଲା ମନ ll ଅତି ଦୁର୍ବଳ ସେ ପ୍ରୟାସ l ତହିଁରେ ହେଲା ଉପବାସ ll ଶୀତରେ ହେଲା ଥର ଥର l ଉଠି ନ ପାରି ହୁଏ ସ୍ଥିର ll ଦୁଃଖ ବିଚାରି ମୃତ୍ୟୁ ସୁଖ l ମରିବି ନ ସହିବି ଦୁଃଖ ll ଏତେ ବିଚାରି ଥର ଥର l ହୋଇ ଉଠିଲା ଦେଇ ଭାର ll ବଳେ ଧଇଲା ଫଳମାନ l ବୋଇଲା ପ୍ରଭୁ ନାରାୟଣ ll ଶୀତ ହୋଇଲା ଦୁଃଖ ନୋହୁ l ଅଥବା ଦୁଃଖୁ ଦୁଃଖ ଯାଉ ll ଏମନ୍ତ ବୋଲି ଫଳମୂଳ l ରଖି ଅଶ୍ଵତ୍ ଥ ବୃକ୍ଷମୂଳ ll ଦୁଃଖରୁ କିଛି ନ ଖାଇଲା l ନ ଖାନ୍ତେ ନିଦ୍ରାହିଁ ନୋହିଲା ll ବାତ କମ୍ପିତ ବୃକ୍ଷ ଡ଼ାଳୁ l ହୀମ ଶିକର ପଡ଼ିବାରୁ ll ଶୀତାଇ ଯାଏ ସେ ଲମ୍ବକ l କି ଅବା ପଡ଼ନ୍ତି ମୃତକ ll ମୃତକ ଭେଦ ଚାହିଁବାର l କରଇ ମନରେ ବିଚାର ll କେତେ ଦୂଷ୍କୃତ କରିଥିଲି l ଏ ଘୋର ବନରେ ରହିଲି ll ଛାଡ଼ିଲି ଚମ୍ପାବତୀ ପୁର l ଆପଣା ପିତା ମାତା ଘର ll ଏକାକୀ ହୋଇ ଏଣୁ ରହି l ନକଲେ ମୋରେ ଦୟା କେହି ll ତାହାଙ୍କୁ କିମ୍ପାଇଁ ବୋଲିବି l ଆପଣା କର୍ମକୁ ଭୁଞ୍ଜିବି ll ଈଶ୍ବର କର୍ମଫଳ ଦାତା l ରାଜଦଣ୍ଡରୁ ଦଣ୍ଡଦାତା ll ଗଲା ଲୋକର ଦୃଢ଼ ହୋଇ l କୁକର୍ମ କର୍ତ୍ତା ନିନ୍ଦା ପାଇ ll ଏହାକୁ ଯହୁଁ ନିନ୍ଦାକଲି l ଅଧିକ ଦୁଷ୍କୃତ ଅର୍ଜିଲି ll ଏ ମୋର ସର୍ବପାପମାନ l ନାଶକର ହେ ନାରାୟଣ ll ଏତେ ବିଚାରି ଉଠି ମନ l ନ ପାରି ହେଲା ଅଚେତନ ll ଦେଖିଲା ରାତ୍ର ଅବଶେଷ l କଲ୍ୟୁ ହୋଇଛି ଉପବାସ ll ସ୍ନାନ କରିବି ବୋଲି ଗଲା l ମାର୍ଗରେ ମୋହରେ ପଡ଼ିଲା ll ମୋହ ଛାଡ଼ିଣ ଦିଗ ଚାହିଁ l ଦେଖିଲି ସୂର୍ଯ୍ୟ ଉଦେ ହୋଇ ll ଏହି କାଳରେ ନାରାୟଣ l ଘେନି ତା ଦୁଃଖ ନିବେଦନ ll ସଫଳ ପରବେଶ ହୋଇ l ମଣିଲେ ମହାବ୍ରତୀ ହୋଇ ll କଲା ଏ ସୁତା ଜାଗରଣ l ଫଳମାନଙ୍କୁ ସମର୍ପଣ ll ମୋ ନାମ ପୁନଃପୁନ ଧରି l ଯେଣୁ ସଫଳାବ୍ରତ କରି ll ଏଣୁ ଏ କିଛି ଫଳ ପାଉ l ଏହାର ଦୁର୍ଗତି ଯେ ଯାଉ ll ଏମନ୍ତ ବିଚାରନ୍ତେ ହରି l ସର୍ବ ସମ୍ପଦ ଆଗ କରି ll ଲମ୍ବକ ରୂପେ ଚମତ୍କାର l କଙ୍କଣ ବୀରବଲ୍ଲୀ ହାର ll ଏହି ସମୟେ ଖୋଜା ଖୋଜି l ଭେଟିଲେ ଆତ୍ମ ମନ୍ତ୍ରୀ ରାଜି ll ଦେଖି ସୁସ୍ନାନ କରାଇଲେ l ପିତାଙ୍କ ହକରା କହିଲେ ll ଖୁଆଇ ମିଷ୍ଟ ଦ୍ରବ୍ୟମାନ l ଦେଉ ଆତ୍ମୀୟ ଦିବ୍ୟ ଯାନ ll ଚାହିଁ ଅଶ୍ଵତ୍ ଥ ତରୁ ରାଜା l କରିଣ ମାନସିକ ପୂଜା ll ଗଲେ ସେ ଦିବ୍ୟପାନ ଚଢ଼ି l ବିଷ୍ଣୁ କବଚ ମନେପଡ଼ି ll ପ୍ରବେଶ ହେଲେ ଚମ୍ପାବତୀ l ଆନନ୍ଦେ ସମସ୍ତ ଦେଖନ୍ତି ll ଉଠି ଆପଣେ ମାହୀଷ୍ମତ l ବସାଇ ଅଙ୍କରେ ତୁରିତ ll ପୁତ୍ରକୁ ସମ୍ଭାବନା କଲେ l କି କି ନ କଲେ କୃଷ୍ଣ ତୁଲେ ll ଦେଲେ ଆପଣା ଅଧିକାର l ସମର୍ପି ସବୁ ରାଜ୍ୟଭାର ll ଅଙ୍କରୁ ଉଠି ଯୁବରାଜା l କଲେ ପିତାଙ୍କ ପାଦେ ପୂଜା ll ମାତୃଗଣଙ୍କୁ ପୂଜାକରି l ରହିଲେ ନିଜ ସ୍ଥାନ ବରି ll ପାଳିଲେ ଧର୍ମେ ପ୍ରଜାଗଣ l ଭକ୍ତିରେ ବୈଷ୍ଣବ ବ୍ରାହ୍ମଣ ll ଭଜିଲେ ଭଗବାନ ପଦ l ସେ ହରେ ସମସ୍ତ ବିପଦ ll ଆଶ୍ରମ ଧର୍ମ ଆଶ୍ରେ କରି l ମାଇଲେ ଶୁଦ୍ଧ ପୁତ୍ର ଚାରି ll ବିଷ୍ଣୁ ବୈଷ୍ଣବ ଦୃଢ଼ଭକ୍ତି l ଜାଣି ନୃପତି ହେଲେ ତୃପ୍ତି ll ହକାରି ପୁତ୍ରକୁ ଅଣାଇ l ଦେଲେ ଚାମର ଛତ୍ର ଦୁଇ ll ଚମ୍ପାବତୀକି ସମର୍ପିଲେ l ରାଜତ୍ଵ କର ତୁ ବୋଇଲେ ll ଅମାତ୍ୟ ପୁରୋହିତ ମନ୍ତ୍ରୀ l ଘେନି ପାଳ ତୁ ଏ ଧରିତ୍ରୀ ll ଏମନ୍ତେ ପୃଥ୍ୱୀ ପୁତ୍ରେ ଦେଇ l ଗଲେ ନୃପତି ବନଭୂଇଁ ll ବନେ ଆଧ୍ୟାତ୍ମ୍ୟ ଜ୍ଞାନ ସାଧି l ଧୈର୍ଯ୍ୟ କାମାଦି ରିପୁବ୍ୟାଧି ll ବିଷ୍ଣୁ ଲୋକକୁ ଗଲେ ରାଜା l ଲମ୍ବକ ହେଲେ ପୃଥ୍ୱୀ ରାଜା ll ପାଳିଲେ ପୃଥ୍ୱୀ ପିତା ପରି l ଅଧର୍ମ ପଥ ଦୂରକରି ll ବିଷ୍ଣୁ ବୈଷ୍ଣବ ଦ୍ବିଜ ପୂଜା l ନିରତେ ଚମ୍ପାବତୀ ରାଜା ll କଲେ ବିଧିରେ ମହାବ୍ରତ l ବିଷ୍ଣୁ ବୈଷ୍ଣବେ ଅତି ଭକ୍ତ ll ହେଲେ ନୃପତିମାନେ ବଶ l ନିର୍ମଳେ ପ୍ରସରିଲା ଯଶ ll ଷୋଳ ସହସ୍ର ସମ୍ବତ୍ସର l ରାଜତ୍ଵ କଲେ ନୃପବର ll ଅନ୍ତେ ପାଇଲେ ସ୍ଵର୍ଗପୁର l ପୁତ୍ର ହୋଇଲେ ରାଜେଶ୍ଵର ll କହନ୍ତି କୃଷ୍ଣ ଶୁଣ ରାଜା l ସଫଳା ଏକାଦଶୀ ପୂଜା ll କରିବେ ଯେଉଁ ନରନାରୀ l ଏଥିରେ ରାଜ୍ୟ ଭୋଗକରି ll ଅନ୍ତେ ପାଇବେ ସ୍ଵର୍ଗପୁର l ଏହା ନିଶ୍ଚୟ ଯୁଧିଷ୍ଠିର ll ସେ ଧନ୍ୟ କୃତ ପୁଣ୍ୟ ଜାଣ l କଲେ ସେ ସକଳ ସେବନ ll ସଫଳା ଏକାଦଶର ବ୍ରତ l କରେ ଯେ ହୋଇ ବିଧିବନ୍ତ ll ନାହିଁ ତହିଁରୁ ଭାଗ୍ୟବନ୍ତ l ଯାହାର ଜନ୍ମ ଫଳବନ୍ତ ll ଆଉ ସୁଫଳା ଉପୋଷଣ l କରେ ଯେ ତା ବିଧି ଶ୍ରବଣ ll ସେ ବାଜପେୟ ଫଳ ପାଇ l ଦେବଙ୍କ ସଙ୍ଗେ ବସେ ଯାଇ ll ଶୁଣି ଏ କୃଷ୍ଣର ପ୍ରଭାବ l ଆନନ୍ଦେ ଯୁଧିଷ୍ଠିର ଦେବll କୃଷ୍ଣକୁ ସମ୍ଭାବନା କରି l ପ୍ରବର୍ତ୍ତେ ଶୁକ୍ଳାକୁ ପଚାରି ll ଇତି ଶ୍ରୀ ଭବିଷ୍ୟ ପୁରାଣେ ପୌଷ କୃଷ୍ଣ ସଫଳା ନାମେ ଏକାଦଶୀ ମାହାତ୍ମ୍ୟେ ତୃତୀୟୋଽଧ୍ୟାୟଃ ll