#📙 നോവൽ രണ്ടാം താലി നിമ മൃദുവിന്റ താടി തുമ്പ് പിടിച്ചു ഉയർത്തി... " നീ ഇങ്ങനെ നോക്കി നടന്നിട്ട്... അങ്ങേര് നിന്നെ തിരിച്ചു ഒന്ന് നോക്കുന്നത് കൂടെ ഇല്ലാല്ലൊ മൃദുവേ... നീ സങ്കടപെടേണ്ടി വരരുത്... എനിക്ക് അത്രേ ഒള്ളു... നിമ തന്റെ മനസ്സിൽ ഉള്ളത് തുറന്നു പറഞ്ഞു.. " എനിക്ക്... എനിക്ക് ഇഷ്ടമാണ് സൂരജ് ഏട്ടനെ... അത് പറയുമ്പോൾ മൃദുവിന്റെ സ്വരം നേർത്തു പോയിരുന്നു... " നിനക്ക് നിന്റെ  വീട്ടുകാരെ കുറിച്ച് അറിയാലോ..? ജാതിയുടെ പേരും പറഞ്ഞു നിന്റെ അച്ഛനും ആ രുദ്രനും നാട്ടിൽ ഉണ്ടാക്കുന്ന ലഹള ചെറുതല്ല... അപ്പോൾ പിന്നെ മകൾ ഒരു താഴ്ന്ന ജാതിയിൽ പെട്ട ഒരാളെ സ്നേഹിക്കുന്നു എന്ന് കേട്ടാൽ കഴിഞ്ഞില്ലേ... ഞാൻ പറഞ്ഞു തരണ്ടല്ലോ പിന്നെ ഉള്ള പുകില്.. നിമയുടെ വാക്കുകൾ ചെറുതല്ലാത്ത ഒരു ഭീതി മൃദുവിൽ പടർത്തി കഴിഞ്ഞിരുന്നു... പതിയെ മൃദുവിന്റെ താടി തുമ്പ് പിടിച്ചുയർത്തി നിമ അവളെ തന്നെ നോക്കി... ആ ചേട്ടൻ നിന്നെ ഒന്ന് നോക്കുന്ന പോലും ഞാൻ കണ്ടിട്ടില്ല... ഇപ്പോൾ നിന്റെ ഈ പ്രണയം ഞാനും നീയും മാത്രേ അറിഞ്ഞിട്ടൊള്ളു... ഒഴിവാക്കുന്നത് ആയിരിക്കും നിനക്ക് നല്ലത്... നിമ അവളുടെ കവിളിൽ കൈ ചേർത്ത് കൊണ്ട് വാത്സല്യത്തോടെ മൃദുവിനെ നോക്കി... " ആര് ഉണ്ടായില്ലെങ്കിലും എന്റെ ഇഷ്ടം അറിഞ്ഞാൽ എന്റെ വല്യേട്ടൻ കൂടെ നിൽക്കും... മൃദുവിന്റെ മുഖം വീർത്തു വീർത്തു വന്നു.. നിമക്ക്  പൊടുന്നനെ ചിരി വന്നു.. " ഇങ്ങനെ ഒരു തൊട്ടാവാടി... അപ്പോഴേക്കും മുഖം എല്ലാo വീർത്തു... എന്റെ പൊന്നു മൃദു അറിഞ്ഞിടത്തോളം ആ സൂരജേട്ടൻ ഒരു മുശേട്ട ആണ്... നീ ഇഷ്ടാണ് എന്നൊക്കെ പറഞ്ഞു ചെന്നാൽ കാലിൽ വാരി അയാൾ ഭിത്തിയിൽ അടിക്കാഞ്ഞാൽ മതി...നിമ ചിരിച്ചു കൊണ്ട് അവളെ നോക്കി മൃദു വിരല് കടിച്ചു കൊണ്ട് നിന്നു... " നീ വാ... നേരം വൈകി... സങ്കടപെട്ട് നിൽക്കുന്ന മൃദുവിന്റെ കയ്യും പിടിച്ചു അവൾ വേഗത്തിൽ നടന്നു... അന്നേരവും അവളുടെ ഹൃദയം മുഴുവൻ സൂരജ് ആയിരുന്നു...  ആ ചെറിയ കണ്ണുകളും.... സധാ ചുണ്ടിൽ ഉണ്ടാവുന്ന ആ ചിരിയും എല്ലാം... ✨✨✨✨✨✨✨✨✨✨✨✨✨✨✨✨✨ ക്ലാസ്സിൽ ഇരുന്നു എന്തോ ആലോചനയിൽ ആയിരുന്ന മൃദുവിന് നേരെ ഒരു ചോക്കിന്റെ കഷ്ണം പാഞ്ഞു വന്നത് പെട്ടെന്ന് ആണ്.. മൃദു ഞെട്ടി കൊണ്ട് മുന്നോട്ട് നോക്കി... മുന്നിൽ ജാനകി ടീച്ചറുടെ കലി നിറഞ്ഞ മുഖം.. അവൾ ഉമിനീർ വിഴുങ്ങി കൊണ്ട് എഴുനേറ്റു നിന്നു... " ക്ലാസ്സിൽ ഇരുന്ന് ഇങ്ങനെ പകൽ സ്വപ്നം കാണാൻ ആണെങ്കിൽ ഇങ്ങോട്ട് വരണ്ട കാര്യം ഇല്ലാ... ഇത് വീട്ടുകാർക്കും നാട്ടുകാർക്കും ഒരു ഉപകാരവും ഇല്ലാതെ കുറേ എണ്ണം... രണ്ടക്ഷരം പഠിക്കേണ്ട സമയത്ത് പഠിക്കണം... അല്ലാതെ വായും പൊളിച്ചു ഇരുന്നാൽ ഇരിക്കത്തെ ഒള്ളു... ജാനകി ടീച്ചർ കത്തി കയറുകയാണ്... മൃദു മിണ്ടാതെ തലയും താഴ്ത്തി നിന്നതെ ഒള്ളു...എന്തെങ്കിലും മറുപടി പറഞ്ഞാൽ പിന്നെ അതിന്മേൽ പിടിച്ചു തൂങ്ങും... മിണ്ടാതെ ഇരിക്കുന്നത് തന്നെ ആണ് എന്ത് കൊണ്ടും നല്ലത്... " കൊള്ള പലിശക്ക് കടം കൊടുക്കുന്ന കുടുംബത്തിൽ നിന്നും വരുന്നത് അല്ലെ.. അപ്പോൾ പിന്നെ കുടുംബത്ത് ആവശ്യത്തിന് പണം ഉണ്ടാകും.. പഠിച്ചു ജോലി വാങ്ങി അധ്വാനിക്കേണ്ട കാര്യം ഒന്നുമില്ലല്ലൊ.. ജാനകി ടീച്ചർ വിടാൻ ഭാവം ഇല്ലാ... പലപ്പോഴും മൃദുവിനോട് എന്തോ പൂർവ്വ വൈരാഗ്യം ഉള്ള പോലെയാണ് ടീച്ചറുടെ സംസാരം... നിമ ഓർത്തെടുത്തു... അത് പറഞ്ഞപ്പോൾ മാത്രo മൃദുവിന്റെ കണ്ണ് നിറഞ്ഞു പോയിരുന്നു... " ടീച്ചർ ക്ലാസ്സിൽ ശ്രദ്ധിക്കാത്തത്തിനു മാത്രo അവളെ വഴക്ക് പറഞ്ഞാൽ പോരെ.. അല്ലാതെ കുടുംബക്കാരെ ഇതിൽ വലിച്ചു ഇടേണ്ട കാര്യം എന്താ... നിമ ചാടി എഴുനേറ്റു.. " ഹാ... കൂട്ടുകെട്ട് തർക്കുത്തരം കണ്ടുപിടിച്ച ഒരുത്തിയുമായിട്ട് ആണല്ലോ... പിന്നെ എങ്ങനെ നന്നാവാനാണ്... കൂട്ടത്തിൽ നല്ല ഒരുത്തി ഉള്ളത് അഞ്ചു ആണ്... അതിന് അത്യാവശ്യം പഠിക്കണം എന്നൊരു ചിന്ത ഉള്ള കൂട്ടത്തിലാ... വെറുതെ കൂടെ കൊണ്ട് നടന്നു അതിന്റെ ഭാവി നശിപ്പിക്കണ്ട... ടീച്ചറുടെ മുള്ളും മുനയും വെച്ചുള്ള സംസാരം കേൾക്കെ കുട്ടികൾ അടക്കി ചിരിക്കാൻ തുടങ്ങി.. നിമ അവരെ രൂക്ഷമായി ഒന്ന് നോക്കിയപ്പോൾ പൊട്ടി വന്ന ചിരി എല്ലാവരും അടക്കി നിർത്തുന്നത് കണ്ടു.. അപ്പോഴേക്കും മൃദുവിന്റെ കണ്ണുകൾ നിറഞ്ഞു കവിഞ്ഞു തുടങ്ങിയിരുന്നു... ✨✨✨✨✨✨✨✨✨✨✨✨✨✨✨✨✨ ചോറ്റും പാത്രത്തിൽ വെറുതെ കയ്യിട്ട് നീക്കി കൊണ്ടിരിക്കുന്ന മൃദുവിനെ തന്നെ നോക്കി ഇരുന്നു നിമ... " നീ എന്താ ഇങ്ങനെ ഇരിക്കുന്നത് നീ കഴിക്കുന്നില്ലേ... നിമ അവളെ തന്നെ നോക്കി ചോദിച്ചു... എന്തോ ആലോചനയിൽ നിന്നും പെട്ടെന്ന് പുറത്തു വന്ന പോലെ മൃദു നിമയെ നോക്കി.. " വിശപ്പില്ലടി... മൃദു അവളെ നോക്കി ഒന്ന് കണ്ണ് ചിമ്മി... നിമക്ക് പെട്ടെന്ന് ദേഷ്യം വന്നു... " നീ ആ ജാനകി ടീച്ചറു പറഞ്ഞത് ആലോചിച്ചിരിക്കുവാണോ... ആ തള്ളക്ക് നാവിനു എല്ലില്ലെന്ന് കരുതി... അല്ലെങ്കിലും ഞാൻ ശ്രദ്ധിക്കാറുണ്ട്... അവർക്ക് നിന്നോട് എന്തോ വൈരാഗ്യ ബുദ്ധി ഉള്ള പോലെ... " അവൾ അടുത്തിരുന്ന ചെറിയ കുപ്പി തുറന്ന് മോര് കൂട്ടാൻ ഒന്നൂടെ ചുഴറ്റി മൃദുവിന്റെ പാത്രത്തിലേക്ക് ഒഴിച്ചു കൊടുത്തു കൊണ്ട് പറഞ്ഞു... " മോര് ഇന്ന് അധികo പുളി പിടിച്ചിട്ടില്ല.. എന്നാലും കറി കൊള്ളാം.. നിനക്ക് ഇഷ്ടാണെന്ന് പറഞ്ഞു അമ്മയെ കൊണ്ട് പറഞ്ഞു ഉണ്ടാക്കിച്ചതാ... കഴിച്ചേ വേഗം... തന്റെ ചോറ്റും പാത്രത്തിൽ നിന്നും ചോറിൽ പെട്ട് കുഴഞ്ഞു പോയ ഒരു കടും മാങ്ങാ കഷ്ണവും അവൾ മൃദുവിന്റെ പാത്രത്തിലേക്ക് ഇട്ട് കൊടുത്തു... " രണ്ടും കൂടി കൂട്ടിയിട്ട് അങ്ങ് കഴിക്ക് പെണ്ണെ... നിന്റെ സൂരജേട്ടനെ ഒന്ന് വളച്ചു കുപ്പിയിൽ ആക്കണമെങ്കിൽ അത്യാവശ്യം ആരോഗ്യം ഒക്കെ വേണം... നിമ കളി പറയവേ കൂടുതൽ തെളിമയിൽ മൃദുവിന്റ ഉള്ളിലേക്ക് ആ മുഖം പടർന്നു കയറുന്നുണ്ടായിരുന്നു... ഒരു വട്ടം ഒന്ന് കാണാൻ ഉള്ള് തുടിച്ചു.. പതിയെ നിമ ഒരു ഉരുള ചോറ് കുഴച്ചു മൃദുവിന് നേരെ നീട്ടി... " നീ ഇങ്ങനെ സ്വപ്നം കണ്ടു കഴിച്ചാൽ ഇന്ന് ഇത് നീങ്ങില്ല... ഉച്ചക്ക് ശേഷം മാത്‍സ് ആണ്... ഇന്നലെ തന്ന വർക്ക്‌ ചെയ്തു കഴിഞ്ഞിട്ടില്ല... നീയും ചെയ്തില്ലല്ലോ." നിമ സംശയത്തോടെ അവളെ നോക്കി.. " ചും... ചുമൽ ഒന്ന് ചലിപ്പിച്ചു അവൾ ഇല്ലാന്ന് തല വെട്ടിച്ചു.. " ഹാ... ഞാൻ പേടിച്ചു പോയി... ഞാൻ ഒറ്റക്ക് ആവുമോന്ന് കരുതി... നീ വാ അങ്ങോട്ട് തുറക്ക്... വേഗം കഴിച്ചിട്ട് വർക്ക്‌ ചെയ്തു തീർക്കാം.." നിമയുടെ കയ്യിൽ നിന്നും ഒരു ഉരുള ചോറ് വാങ്ങി കഴിക്കവേ... വെട്ടേക്കാടിലെ കണ്ണി മാങ്ങയുടെ പുളിയിൽ അവളിലെ രുചി മുകുളങ്ങൾ ഉണർന്നു തുടങ്ങിയിരുന്നു.. ✨✨✨✨✨✨✨✨✨✨✨✨✨✨✨✨✨ " എന്റെ പൊന്നു മൃദു... നീ ഇങ്ങനെ കിടന്ന് ഓടാതെ... എനിക്ക് ഓടി ഒപ്പം എത്തുന്നില്ലട്ടോ... ഊരക്ക് കയ്യും കൊടുത്തു കൊണ്ട് നിമ നിന്ന് കിതച്ചു... " വേഗം വാ നിമേ...തന്നെക്കാൾ അല്പം ദൂരം പോയവൾ തിരികെ വന്നു വിളിക്കുന്നത് കണ്ടപ്പോൾ അവളുടെ നെറ്റിയൊന്നു ചുളിഞ്ഞു...മൃദുവും വല്ലാതെ കിതക്കുന്നുണ്ട്.. " നീ അഞ്ജുവിനെ കാണാൻ ഒന്നുമല്ലല്ലൊ.. ഈ തിരക്കിട്ട് ഓടുന്നത്... അവളുടെ ഏട്ടനെ കാണാൻ അല്ലെ... നിമക്ക് ദേഷ്യം വന്നു.. മൃദു ഒന്നൂടെ നിമക്ക് അടുത്തേക്ക് നീങ്ങി നിന്നു... " നീ ഇപ്പോൾ എന്നോട് അടി കൂടാൻ നിൽക്കല്ലേ നിമേ... മൂപ്പര് പുറത്തേക്കോ മറ്റോ പോവും കേട്ടോ... പിന്നെ ഇന്ന് കാണാൻ പറ്റില്ല... ഇത് ഇപ്പോൾ ട്യൂഷൻ കഴിഞ്ഞു പിള്ളേർ പോവുന്ന നേരമാണ്.. ഇപ്പോൾ ആള് വീട്ടിൽ കാണും.. " മൃദു ആലോചനയോടെ പറഞ്ഞു നിർത്തി.. സൂരജ് ചുറ്റുവട്ടത്തുള്ള കുറച്ചു കുട്ടികൾക്ക് ട്യൂഷൻ എടുത്തു കൊടുക്കുന്നുണ്ട്... വൈകീട്ട് 5 മണി വരെ കാണും.. അത് കഴിഞ്ഞാൽ ചിലപ്പോൾ കാണാൻ കഴിയില്ല.. ഒരു നോട്ടം ഒന്ന് കണ്ടാൽ മതി എവിടെ നിന്നെങ്കിലും... ഇല്ലെങ്കിൽ മനസ്സിൽ ഒരു പിടച്ചിലാണ്... ഞാൻ ഇങ്ങനെ അതിരില്ലാതെ സ്നേഹിക്കുന്നത് ആൾ അറിയുന്നുണ്ടാകുമോ..? ഒരു നോട്ടം എപ്പോഴെങ്കിലും വീണു കിട്ടിയാൽ പോലും ആ കണ്ണിൽ ഒരു തരം ദേഷ്യം ഉള്ള പോലെ തോന്നും... അല്ലാതെ തന്നോട് തിരിച്ചു ഒരു തരി സ്നേഹം ഉള്ളത് ആയിട്ട് തോന്നിയിട്ടില്ല... ഒരിക്കലും എന്നെ സ്നേഹിക്കില്ലേ ഇനി? അവളുടെ ഹൃദയം ഒന്ന് മിടിച്ചുയർന്നു... തുടരും സൂര്യകാന്തി അഭിപ്രായങ്ങൾക്ക് കാത്തിരിക്കുന്നു ❤️