#😇My Status #ఘంటసాల గారి వర్థంతి కాఫీ కబుర్లు సంఖ్య 1103 (ఫిబ్రవరి 11 - 2026).. గానమె ఆనందం.. -- అందమె ఆనందం.. ఆనందమె జీవిత మకరందం.. అంటూ తన గళం ద్వారా వేలాది పాటలకి అందం అద్ది కోట్లాది శ్రోతలకు నేటికీ గానానందం కలిగిస్తున్న అమృత గాయకుడు.. అద్భుత గాయకుడు ఘంటసాల కారణజన్ముడు. మరో ఘంటసాల రాడు.. రాబోడు అన్నంతగా పేరు తెచ్చుకున్న ఘంటసాల మాస్టారి పాట విని పరవశించని వ్యక్తి ఉండడు. రాళ్ళు కరిగేలా, గుండెలు ద్రవించేలా, కనులు కన్నీరు కార్చేలా, యువ హృదయాలు ఉరకలు వేసేలా పాటలు పాడటం ఆయనకి వెన్నతో పెట్టిన విద్య. 1940 దశకం చివరిలో బాలరాజు, కీలుగుఱ్ఱం నుంచి అక్కినేని నాగేశ్వరరావు గారికి, పాతాళభైరవి నుంచి ఎన్ టి రామారావు గారికి .. యీ ఇద్దరి గొంతులను తన స్వరంగా మార్చుకున్నారు ఘంటసాల మాస్టారు. పయనించే ఓ చిలుకా.. అంటూ అనేక నేపథ్య గీతాలకు ప్రాణం పోశారు. ఇంగ్లీషు లోని మ్యారేజి.. హిందీలో అర్ధము షాదీ.. అంటూ సరదా పాటలు పాడి నవ్వించారు. అమ్మా అని పిలిచినా.. వంటి పాటలు పాడి ఏడ్పించారు.. కుడి ఎడమైతే పొరపాటు లేదోయ్.. అంటూ మైకం పాటలతో మైమరిపించేరు. కనుపాప కరవైన కనులెందుకో.. వంటి పాటలు పాడి గుండెల్ని ద్రవింపజేసారు. ఘనా ఘన సుందరా.. అంటూ భక్తి పాటలు ఘనాతి ఘనంగా పాడారు‌. మల్లియలారా మాలికలారా.. అంటూ తన కథను దీనంగా చెప్పుకునే పాటలు పాడారు. చిటపట చినుకులు పడుతూ వుంటే.. వంటి పాటలు పాడి యువ హృదయాల్లో అలజడి సృష్టించారు. ఎంత హాయి ఈ రేయి.. వంటి శోభనం పాటలు శోభాయమానంగా పాడారు. డీరిడిరి డీరిడీ.. అంటూ మనకు హుషారు కలిగించే పాటలు ఎన్నో పాడారు. ఇలా చెప్పుకుంటూ పోతే ఈ జాబితాకి అంతు ఉండదు. హరికథా గీతాలు, బుర్రకథ పాటలు, యక్షగానాలు, లలిత గీతాలు అద్బుతంగా పాడి మనల్ని రంజింపజేసిన అమర గాయకుడు మన ఘంటసాల వెంకటేశ్వరరావు గారు.. వేలాది పాటలు పాడారు. 104 సినిమాలకు సంగీత దర్శకత్వం వహించారు. పాతాళభైరవి, లవకుశ, రహస్యం, జరిగిన కథ వంటి చిత్రాలకు ఆయన సంగీతం సమకూర్చిన పాటలు ఏనాటికీ మరువలేం. ఘంటసాల.. గానసాల.. పాటలకే పాఠశాల. ఆయన 52వ వర్ధంతి సందర్భంగా ఈరోజు (11-02-2026) ఆయన పాటల రూపంలో అందించిన ఆణిముత్యాలను తలుచుకుంటూ.. ఘంటసాల మాస్టారికి శ్రద్ధాంజలి ఘటిద్దాం..