ഒരു വട്ടം കൂടെ.. പാർട്ട്‌ 3 തിരികെ വീട്ടിലേക്കുള്ള യാത്രയിലുടനീളം ആദിയുടെയുള്ളിൽ ഒരൊറ്റ ചിന്ത മാത്രമേ ഉണ്ടായിരുന്നുള്ളൂ: "എന്തായിരിക്കും അവൾ അങ്ങനെ പറഞ്ഞത്? അവൾ ശരിക്കും എന്നെ മറന്നോ?" വർഷങ്ങൾ നീണ്ട കാത്തിരിപ്പിന് ശേഷം കണ്ടുമുട്ടിയപ്പോൾപോലും ശിവാനിയുടെ അവഗണന അവനെ അഗാധമായി മുറിവേൽപ്പിച്ചു. ഒരു കാലത്ത് നല്ല സുഹൃത്തുക്കളായിരുന്ന കൃഷ്ണൻ നായരും മോഹൻ തമ്പിയും ചേർന്ന് തുടങ്ങിയതാണ് കെഎം ഗ്രൂപ്പ്‌. കമ്പനി നല്ല രീതിയിൽ മുന്നോട്ട് പോകുമ്പോഴാണ് ഒരു സുപ്രധാന പ്രൊജക്റ്റ് അവർക്ക് നഷ്ടമായത്. അതോടെ സൗഹൃദം ശത്രുതയ്ക്ക് വഴിമാറി. "അത് നിന്റെ കുഴപ്പം," കൃഷ്ണൻ നായരും, "അല്ല, നിന്റെ പിടിപ്പുകേട്," മോഹൻ തമ്പിയും വാദിച്ചു. ആ തർക്കം ഒടുവിൽ കമ്പനിയുടെ പിളർപ്പിലും സൗഹൃദത്തിന്റെ തകർച്ചയിലും കലാശിച്ചു. പിന്നീട് അവരുടെ ഏക ലക്ഷ്യം പരസ്പരം തോൽപ്പിക്കുക എന്നത് മാത്രമായിരുന്നു. ഇവരുടെ അടുത്ത തലമുറയാണ് ശിവാനിയും ആദിയും. കുട്ടിക്കാലം മുതലേ അവർ ശത്രുക്കളായിരുന്നു. കളികളിലും പഠനത്തിലും എന്തിനും ഏതിനും മത്സരമായിരുന്നു അവർക്കിടയിൽ. എന്നാൽ, കാലം മുന്നോട്ട് പോയപ്പോൾ എല്ലാം മാറിമറിഞ്ഞു. കുടുംബങ്ങൾ തമ്മിലുള്ള ശത്രുതയ്ക്ക് മാറ്റമില്ലായിരുന്നെങ്കിലും, വെറുത്തു വെറുത്ത് കുട്ടിശങ്കരനെ ഇഷ്ടപ്പെട്ടതുപോലെ, ആ ശത്രുത പതിയെ പ്രണയത്തിന് വഴിമാറി. അവർ പരസ്പരം പ്രണയം തുറന്നു പറയുകയും ചെയ്തു. എല്ലാം സന്തോഷത്തോടെ മുന്നോട്ട് പോകുമ്പോഴാണ് ഒരു ദിവസം ഒരു മുന്നറിയിപ്പുമില്ലാതെ ശിവാനി ബ്രേക്ക് അപ്പ്‌ പറഞ്ഞത്. കാരണം അവൾ പറഞ്ഞില്ല, . ശിവാനി പഠനം നിർത്തി നാട്ടിൽ നിന്നും മുംബൈയിലേക്ക്, പിന്നീട് അവിടുന്ന് വിദേശത്തേക്കും പോയി. ഒരുപാട് നാളുകൾക്ക് ശേഷമാണ് അവർ ഇന്ന് വീണ്ടും കണ്ടുമുട്ടിയത്. ആദിത്യൻ ആദി വീട്ടിലെത്തുമ്പോൾ അവനെ കാത്ത് അച്ഛൻ മഹേഷ്‌ ഇരിപ്പുണ്ടായിരുന്നു. കണ്ടയുടനെ പ്രൊജക്റ്റ് നഷ്ടപ്പെട്ടതിനെക്കുറിച്ചുള്ള ദേഷ്യവും നിരാശയും മഹേഷിന്റെ വാക്കുകളിലൂടെ അണപൊട്ടി. വഴക്കിന്റെ പരുപരുത്ത വാക്കുകൾ ചെവികൊടുത്തിട്ടും ആദിയുടെ മുഖത്ത് യാതൊരു ഭാവമാറ്റവും ഉണ്ടായിരുന്നില്ല. ഒരുകാലത്ത് ഊർജ്ജസ്വലനും സ്മാർട്ടുമായിരുന്ന അവൻ, ഇപ്പോൾ ഒരു പ്രതിമ കണക്കെ മറുത്തൊന്നും പറയാതെ എല്ലാം കേട്ടിരുന്നു. അവനെ അത്ഭുതത്തോടെ നോക്കി ജോലിക്കാർ നിന്നു. അപ്പോഴാണ് ആദിയുടെ അടുത്ത സുഹൃത്തും അച്ഛന്റെ പെങ്ങളുടെ മകനുമായ അർജുൻ അങ്ങോട്ട് വന്നത്. "ആക്ച്വലി അങ്കിൾ, എന്താ സത്യത്തിൽ ഉണ്ടായതെന്ന് വെച്ചാൽ..." ആദിയെ സപ്പോർട്ട് ചെയ്യാൻ അർജുൻ ശ്രമം തുടങ്ങി. "പ്ഫാ! ഒരക്ഷരം മിണ്ടിയാൽ നിന്റെ തലയടിച്ചു പൊട്ടിക്കും!" മഹേഷിന്റെ ശബ്ദം ഉയർന്നു. "അങ്ങേരുടെ വായിലുള്ളത് കേട്ടപ്പോൾ നിനക്ക് വല്ല കാര്യമുണ്ടായിരുന്നോ?"എന്ന ഭാവത്തിൽ ആദി അർജുനെ നോക്കി "അതെനിക്ക് എന്തിന്റെ കേടായിരുന്നു?" എന്ന ഭാവത്തിൽ അർജുനെ ആദിയെ തിരിച്ചു നോക്കി. അച്ഛൻ വഴക്ക് പറഞ്ഞ് തളർന്ന് സ്വയം നിർത്തിയപ്പോൾ, ആദിയും അർജുനും അവരുടെ റൂമിലേക്ക് നടന്നു. "ടാ ആദി, ആ പ്രൊജക്റ്റ് തിരിച്ചു പിടിക്കാൻ ഒരു വഴിയുണ്ട്!" അർജുൻ ആവേശത്തോടെ പറഞ്ഞു. അവന്റെ കണ്ണുകളിൽ പ്രതീക്ഷയുണ്ടായിരുന്നു. "ഹേയ്, എനിക്ക് അതിലൊന്നും ഒരു താല്പര്യവും ഇല്ല," ആദി താൽപര്യമില്ലാത്ത മട്ടിൽ മറുപടി പറഞ്ഞു. "എന്നാൽ നിന്റെ ഇഷ്ടം പോലെയാവട്ടെ. പക്ഷെ നീ ഇങ്ങനെയായിരുന്നില്ല. പ്രശ്നങ്ങളിൽ നിന്ന് ഓടിപ്പോവുക എന്നത് നിന്റെ ഡിക്ഷണറിയിലെ ഉണ്ടായിരുന്നില്ല!" അർജുൻ നിരാശയോടെ പറഞ്ഞു. ആദി അതിന് മറുപടിയൊന്നും പറയാതെ മൗനം പാലിച്ചു. അവന്റെ മൗനം എല്ലാത്തിനോടുമുള്ള അവന്റെ വേദന വിളിച്ചോതുന്നുണ്ടായിരുന്നു. അപ്പോഴാണ് ആദിയുടെ ഒരേയൊരു സഹോദരി അവ്‌നി, ഒരു മെഡിക്കൽ സ്റ്റുഡന്റ്, അവിടേക്ക് വന്നത്. "അജു ഏട്ടാ, എന്റെ കൂടെ ടൗൺ വരെ വരുമോ?" അവൾ ചോദിച്ചു. അർജുൻ,  ആദിയുടെ മുഖത്തേക്ക് നോക്കി.അവന്റെ മുഖത്ത് സങ്കടം വ്യക്തമായിരുന്നു. "അവ്‌നി, ഞാൻ ഇപ്പോൾ കുറച്ച് ബിസിയാണ്. നീ ആദിയുടെ കൂടെ പോയിക്കോ," അർജുൻ പറഞ്ഞു. അവളുടെ മറുപടിക്കായി ആദി പ്രതീക്ഷയോടെ കാത്തിരുന്നു. പക്ഷേ ഫലം നിരാശയായിരുന്നു. "അജു ഏട്ടന് വരാൻ പറ്റുമെങ്കിൽ വാ, അല്ലെങ്കിൽ ഞാൻ ഫ്രണ്ടിന്റെ കൂടെ പോകും," അവൾ ദേഷ്യത്തിൽ പറഞ്ഞു, തിരിഞ്ഞു നടന്നു. "അവഗണന ഏറ്റുവാങ്ങാൻ എന്റെ ജീവിതം ഇനിയും ബാക്കി!" തമാശ രൂപേണ പറഞ്ഞുകൊണ്ട് ആദി ബാത്‌റൂമിലേക്ക് നടന്നു. അവൻ ഒരുപാട് വിഷമത്തിലാണെന്ന് അർജുന് നന്നായി അറിയാമായിരുന്നു. #📝 ഞാൻ എഴുതിയ വരികൾ #📔 കഥ #💞 പ്രണയകഥകൾ #📙 നോവൽ