ഖൽബിലെ കിനാവ്✍️📖 PART 6 അവർ പണ്ടേ അടുത്ത സുഹൃത്തുക്കളായിരുന്നു. അവൾക്ക് വിവാഹം കഴിഞ്ഞിരുന്നു, പക്ഷേ ഇപ്പോൾ ഡിവോഴ്‌സിന്റെ വക്കിലാണ് നിൽക്കുന്നത് എന്നും അതുകൊണ്ട് ആരെയും വിശ്വസിക്കാൻ കഴിയുന്നില്ല എന്നും പറഞ്ഞത് സന ഓർത്തെടുത്തു. “ഇവളായിരിക്കുമോ ഇനി ആ കുട്ടി?” സനക്ക് ഒരു സംശയം തോന്നി...... സന അവളുടെ അക്കൗണ്ട് നോക്കിക്കൊണ്ടിരിക്കുമ്പോഴാണ് ഫോണിലേക്ക് നിഫാസിന്റെ ഒരു കോൾ വന്നത്. “ഹലോ? സുഖമാണോ?” നിഫാസിന്റെ ആ ശബ്ദത്തിൽ എന്തോ ആവേശമില്ലാത്ത പോലെ തോന്നി. “ഹാ.. സുഖം.. എന്താ അവിടെ വിശേഷം?” “ഇവിടെ വിശേഷങ്ങൾ ഒന്നുമില്ല… എടി… എനിക്ക് നിന്നോട് സോറി പറയണം.” നിഫാസിന്റെ ആ വാക്കുകൾ കേട്ട് സന സംശയത്തോടെ ചോദിച്ചു. “എന്ത്? സോറിയോ? എന്തിന്?” “എനിക്ക് നിന്നെ ഒരു ഡ്രാമയിലേക്ക് വലിച്ചിഴയ്ക്കാൻ ഒരു താൽപര്യവും ഇല്ല സന… എനിക്ക് ഇത് വർക്ക് ഔട്ട് ആകുമെന്ന് തോന്നുന്നില്ല… നമുക്ക് ഇത് ഇവിടെ വെച്ച് അവസാനിപ്പിക്കാം… I am sorry…” നിഫാസിന്റെ ആ മറുപടി സനയെ വളരെയധികം വിഷമിപ്പിച്ചു. ഒരു നിമിഷം ഭൂമി പിളർന്ന് താഴേക്ക് പോയാലോ എന്ന് അവൾ ചിന്തിച്ചു. അവൾ ഇത്രയും നാൾ എടുത്ത പരിശ്രമം എല്ലാം വെറുതെയായി പോയി എന്ന സത്യം അവൾക്ക് ഉൾക്കൊള്ളാൻ കഴിഞ്ഞില്ല. അവൾ ഒരു നിമിഷം മിണ്ടാതെ നിന്നു. പിന്നെ ഇടറിയ ശബ്ദത്തിൽ സംസാരിച്ചുതുടങ്ങി. “ഇക്കാ… ആലോചിച്ചിട്ടുതന്നെയാണോ ഇത് പറയുന്നത്? എനിക്ക് ഇത് വീട്ടിൽ ഇപ്പോൾ പറയാൻ കഴിയില്ല… കാരണം എല്ലാവരും ഇത് നടക്കുമെന്ന് സന്തോഷത്തിൽ ഇരിക്കുകയാണ്… ഞാൻ നാളെ അവരോട് പറഞ്ഞോളാം…” ഇത് പറയുമ്പോൾ അവളുടെ കണ്ണുകൾ നിറഞ്ഞൊഴുകുകയായിരുന്നു. ഇത്രയും പറഞ്ഞുകൊണ്ട് അവൾ ഫോൺ കട്ട് ചെയ്തു. അന്നത്തെ ദിവസം അവൾക്ക് ഒരു പൊള കണ്ണടക്കാനായില്ല. നെയ്ത് കൂട്ടിയ സ്വപ്നങ്ങൾ എല്ലാം പാഴായി പോയ ഒരു പെൺകുട്ടി… പക്ഷേ അവൾക്ക് വിട്ടുകൊടുക്കാൻ കഴിഞ്ഞില്ല. അവൾ തല പുകഞ്ഞു പോലെ ചിന്തിച്ചു. അവൾ കണ്ണുകൾ തുടച്ച് മെല്ലെ അടുക്കളയിലേക്ക് ചെന്നു. അവിടെ ഉമ്മയുടെ മൊബൈൽ ടേബിളിൽ ഉണ്ടായിരുന്നു. ഉമ്മ കാണാതെ അവൾ അതിൽ നിന്ന് നജ്മയുടെ നമ്പർ കൈക്കലാക്കി ഓടി തിരിച്ച് റൂമിലേക്ക് എത്തി. അവൾ ഉടൻ തന്നെ നജ്മയെ വിളിച്ചു നിഫാസ് പറഞ്ഞ കാര്യങ്ങൾ അവതരിപ്പിച്ചു. “എഹ്? ഇക്കാ അങ്ങനെ പറഞ്ഞോ? നീ വിഷമിക്കാതെ സന… ഇക്കാ ഇങ്ങനെ ഏതൊരു പെണ്ണിനെക്കുറിച്ചും ആലോചിച്ചാൽ ‘വേണ്ട’ എന്ന് പറയും… അങ്ങനെ വിട്ടാൽ ശരിയാകില്ലല്ലോ… ഇക്കാക്ക് നിന്നെ ഇഷ്ടപ്പെട്ടതാണ് സന.” “അത് എനിക്ക് അറിയാം നജ്മ… പക്ഷേ ഇക്കാ ഇങ്ങനെ ആയാൽ എന്ത് ചെയ്യാനാണ്…” “ഇക്കാ ദുബായിലേക്ക് പോകുന്നതിന് തലേദിവസം ഉമ്മ ഇക്കാക്ക് ഇഷ്ടപ്പെട്ട മട്ടൺ ബിരിയാണി വെക്കുമ്പോൾ ഇക്കാ മെല്ലെ അടുക്കളയിൽ ചെന്നു… അപ്പോൾ ഇക്കാ ചോദിച്ചു, ‘എന്താ ഉമ്മാ, സനയെ കെട്ടാൻ വേണ്ടി എന്നെ സോപ്പ് ഇടാനാണോ മട്ടൺ ഒക്കെ വെക്കുന്നത്?’ എന്ന്. അപ്പോൾ ഉമ്മ പറഞ്ഞു, ‘നിനക്ക് വേണമെങ്കിൽ കെട്ട്, നല്ല കൊച്ചാണ്’ എന്ന്… അപ്പോൾ ഇക്കാ പറഞ്ഞത് ഇക്കാക്ക് പ്രശ്നം ഒന്നുമില്ല… ഇഷ്ടമാണെന്ന് ഒക്കെ… ഇക്കാ അന്ന് വളരെ ഹാപ്പിയായിരുന്നു സന.” “അത് ഒക്കെ ശരിയാണ് നജ്മ… പക്ഷേ ഇപ്പോൾ ദുബായിൽ ചെന്നപ്പോൾ ഇക്കയുടെ സ്വഭാവം മാറി… അവിടെ ഇക്കയെ കൺവിൻസ് ചെയ്യാൻ ആരുമില്ലല്ലോ…” “നീ ഇപ്പോൾ ഇത് എടുത്ത് ചാടി വീട്ടുകാരോട് ഒന്നും പറയല്ലേ… ഞാൻ ഇവിടെ വീട്ടിൽ ഒന്ന് സംസാരിക്കട്ടെ.” നജ്മയോട് കാര്യങ്ങൾ പറഞ്ഞപ്പോൾ സനയ്ക്ക് ഒരു പൊടിക്ക് ആശ്വാസമായി. ****************************************** “എന്താ ഞാൻ ഈ കേൾക്കുന്നത്?” കയ്യിൽ ഉണ്ടായിരുന്ന പത്രം ടേബിളിന് മുകളിൽ വെച്ചുകൊണ്ട് നിഫാസിന്റെ ഉമ്മ തലയിൽ കൈ വെച്ചു. “എന്റെ റബ്ബേ, ഇവനെ കൊണ്ട് ഞാൻ മടുത്തു… എന്റെ കുഞ്ഞ് മാത്രം എന്താ ഇങ്ങനെ…” അവരുടെ കവിള്തടങ്ങൾ കണ്ണുനീരാൽ നനഞ്ഞു. “കരയാതെ ഉമ്മ… വാപ്പയോട് ഞാൻ സംസാരിക്കട്ടെ… ഉമ്മ ഇതുവരെ സാനയെ നേരിട്ട് കണ്ടിട്ടില്ലല്ലോ… നമുക്ക് ഫാമിലിയായി അവളെ പോയി ഒന്ന് കാണാം…” നജ്മ ഉമ്മയെ ആശ്വസിപ്പിച്ചു. നജ്മ മൊബൈൽ എടുത്തുകൊണ്ട് പുറത്തേക്ക് ഇറങ്ങി. “വാപ്പാ… ഞാൻ അന്നു ഇക്കാക്ക് പെൺ കണ്ട കാര്യങ്ങൾ പറഞ്ഞില്ലേ…” നജ്മ വാപ്പയോട് എല്ലാം വിശദീകരിച്ചു. “അവൻ എന്തൊക്കെയാ ഈ ഉദ്ദേശിക്കുന്നത്… ഇതിപ്പോ നമ്മൾ കുടുംബക്കാരായി ആ കൊച്ചിന്റെ വീട്ടിൽ പോയി കണ്ടില്ലല്ലോ … നാളെ പോയി കാണാം…” വാപ്പ ഗൗരവത്തോടെ സംസാരിച്ചു അവസാനിപ്പിച്ചു. “ഉമ്മ… വാപ്പ നാളെ പോയി കാണാൻ വരാമെന്ന് പറഞ്ഞു.” ഇത് കേട്ടപ്പോൾ കരഞ്ഞുകൊണ്ടിരുന്ന ഉമ്മക്ക് പെട്ടെന്ന് ദേഷ്യം വന്നു. “ഇത്രയും നാൾ അയാൾക്ക് എന്റെ മക്കളുടെ കാര്യം അറിയണ്ടായിരുന്നു… ഇപ്പോൾ കല്യാണം ആയപ്പോൾ സ്ത്രീധനം എത്ര കിട്ടും എന്ന് ചോദിക്കാൻ വേണ്ടിയാകും അല്ലേ വരുന്നത്…” “ഉമ്മ അങ്ങനെ പറയാതെ… ഇത് നമ്മുടെ ഇക്കയുടെ കാര്യമല്ലേ…” നജ്മ തർക്കിച്ചു. “എങ്കിൽ നിങ്ങൾ എന്തെന്നു വെച്ചാൽ തീരുമാനിക്ക്…” ഉമ്മ ദേഷ്യത്തിൽ അടുക്കളയിലേക്ക് പോയി. “റബ്ബേ… ഞാൻ ഇനി എന്താ ചെയ്യേണ്ടത്…” നജ്മ ഒരു നിമിഷം ചിന്തിച്ചു. അവൾ പെട്ടെന്ന് അടുത്ത ആരെയോ കോൾ ചെയ്തു. “ഹലോ… മാമി… ഒരു ചെറിയ പ്രശ്നം…” നജ്മ അവളുടെ പ്രിയപ്പെട്ട മാമിയെ വിളിച്ചു. അവർ ആണ് എന്ത് പ്രശ്നമുണ്ടെങ്കിലും പരിഹരിക്കാൻ മിടുക്കി. “ഓ… അങ്ങനെയാണോ കാര്യങ്ങൾ… നീ ഒരു കാര്യം ചെയ്യൂ… ഉമ്മയും ഞാനും കൂടി കാണാം… നിന്റെ വാപ്പയെ ഞാൻ വിളിച്ച് അറിയിക്കാം… പുള്ളി ഇപ്പോൾ ഹോസ്പിറ്റലിലല്ലേ… അപ്പോൾ പുള്ളി വന്നാൽ അവിടെ വാപ്പുമ്മ ഒറ്റയ്ക്ക് ആകില്ലേ…” മാമിയുടെ ഐഡിയ കൊണ്ട് രണ്ട് വശത്തെയും പ്രശ്നം മാറുമെന്ന് നജ്മയ്ക്ക് അറിയാം. അവൾ സമ്മതിച്ചു… ഫോൺ കട്ട് ചെയ്തു. ***************************************** “പടച്ചോനെ… ഉമ്മ വിളിക്കുന്നു… സീൻ ആയോ ആവോ…” നിഫാസ് പേടിച്ച് വിറച്ച് മൊബൈൽ എടുത്ത് ചെവിയിലേക്ക് വെച്ചു. “നീ എന്താ ഉദ്ദേശം? നീ ആ കൊച്ചിനെയും അവരുടെ വീട്ടുകാരെയും അപമാനിക്കാനാണോ വന്നത്? ഇപ്പോൾ നീ എന്നെ നാണംകെടുത്തിയല്ലേ…” ഫോണിന്റെ മറുവശത്തെ ശബ്ദം അവനെ വളരെയധികം ഭയപ്പെടുത്തി. ഉമ്മ ദേഷ്യപ്പെട്ടാൽ നിഫാസിന് പിന്നെ പിടിച്ച് നിൽക്കാൻ കഴിയില്ല. “അങ്ങനെ അല്ല ഉമ്മ… എന്റെ വിഷമം എനിക്ക് അല്ലേ അറിയൂ…” “നിന്റെ ഒരു വിഷമം… എനിക്കും ഉണ്ടെടാ വിഷമങ്ങൾ… ഞാൻ ആരോടും കാണിച്ച് നടക്കാറില്ല… നാളെ ഞങ്ങൾ കൊച്ചിനെ പോയി നേരിട്ട് വീട്ടിൽ കാണുന്നുണ്ട്… പിന്നെ ഞങ്ങൾ തീരുമാനിക്കും കാര്യങ്ങൾ.” നിഫാസ് കുറച്ച് നേരം നിശ്ശബ്ദനായി നിന്നു. “ഹാ… എന്നാൽ നിങ്ങൾ പോയി കാണൂ… എനിക്ക് പ്രശ്നമില്ല…” നിഫാസ് ഇത്ര മാത്രം പറഞ്ഞുകൊണ്ട് കോൾ കട്ട് ചെയ്തു. അവന്റെ ഉള്ളിൽ തീക്കനൽ കോരി ഇട്ട ഒരു പ്രതീതിയായിരുന്നു. പഴയ ഓർമ്മകൾ അവനിൽ എന്തോ വിഷം കുത്തിവെച്ച പോലെ ആയിരുന്നു… പക്ഷേ ഉമ്മയെ വിഷമിപ്പിക്കാൻ അവനൊരിക്കലും കഴിയില്ല. അതുകൊണ്ടാണ് വീട്ടിൽ പോയി കണ്ടോളാം എന്ന് അവൻ സമ്മതിച്ചത്. “എന്തായാലും അവർ പോയി കാണട്ടെ… വാപ്പയുടെ വീട്ടുകാർക്ക് അവളെ പിടിക്കാൻ ബുദ്ധിമുട്ട് കാണും… അപ്പോൾ അവർ തന്നെ വേണ്ടെന്ന് വെച്ചോളും…” നിഫാസ് ഇങ്ങനെ സ്വയം പറഞ്ഞ് ആശ്വസിച്ചു. ******************************************* (രാവിലെ 7 മണി) സനയുടെ മുറിയുടെ വാതിലിൽ ശക്തിയായി ഉമ്മ കൊട്ടിവിളിക്കുന്നുണ്ടായിരുന്നു. “സന… ഒന്ന് എഴുന്നേൽക്കു… ഇത് എന്ത് ഉറക്കമാണ്… അത്യാവശ്യം ആയി എന്തെങ്കിലും കാര്യം പറയാൻ വന്നാൽ ഇങ്ങനെ മുറി പൂട്ടിയിട്ട് കിടന്നാൽ എങ്ങനെ ശരിയാകും?” സന മെല്ലെ കണ്ണുകൾ തുറന്നു. “എന്താ ഉമ്മ… ഡോർ ചവിട്ടി പൊളിക്കുമോ? ഞാൻ ദാ വരുന്നു…” സന ഉറക്കം തൂങ്ങി എങ്ങനെയോ പല്ല് തേച്ച് ചായ കുടിക്കാൻ ആയി താഴെ ചെന്നു. അവിടെ ഉമ്മ എന്തൊക്കെയോ തിരക്ക് കൂട്ടി പണി ചെയ്യുകയായിരുന്നു. “എന്താ ഉമ്മ ഇത്രക്ക് ബിസി… ആരെങ്കിലും വരുന്നോ?” “ഹാ… ഒരു കൂട്ടർ വരുന്നു… നിന്നെ കാണാൻ.” “എഹ്… എന്തൊന്ന്?” സന ഞെട്ടി. “എടി… നിഫാസിന്റെ വീട്ടുകാർ നിന്നെ ഒന്ന് കാണാൻ വരുന്നു എന്ന്…” സന ആകെ അമ്പരപ്പോടെ സ്ഥംഭിച്ചു നിന്നു. “അവർ ഉമ്മയെ വിളിച്ചോ?” സന സംശയത്തോടെ ചോദിച്ചു. “ഹാ… മോളേ… ഇന്ന് രാവിലെ ഒന്ന് വിളിച്ചു… ഇന്ന് ഉച്ച കഴിഞ്ഞ് അവർ നിന്നെ ഒന്ന് കാണാൻ വരുമെന്ന്…” അത് കേട്ട ഉടൻ അവൾ ഓടി മുറിയിലേക്ക് ചെന്നു മൊബൈൽ എടുത്ത് നോക്കി. നജ്മയുടെ മൂന്ന് മിസ്ഡ് കോൾ. അവൾ നജ്മയെ തിരിച്ച് വിളിച്ചു. “എടാ… ഞാൻ എത്ര തവണ വിളിച്ചു നിന്നെ… എന്റെ ഉമ്മയും മാമിയും നിന്നെ കാണാൻ വേണ്ടി വരുന്നു ഇന്ന്… പിന്നെ ഞങ്ങൾ ഫാമിലി തീരുമാനിക്കും എന്ന് പറഞ്ഞു കാര്യങ്ങൾ.” “ഇക്കാ ഇത് വല്ലതും അറിഞ്ഞോ നജ്മ?” “ഇക്കാ തന്നെയാ പോയി കണ്ടോളാൻ പറഞ്ഞത്… നീ പേടിക്കണ്ടടാ…” നജ്മ ഇത്രയും പറഞ്ഞുകൊണ്ട് ഫോൺ വെച്ചു. “ഈ ഇക്കാ എന്താ ഇങ്ങനെ… എന്നോട് വേണ്ടെന്ന് പറഞ്ഞിട്ട് വീട്ടിൽ പോയി കാണാൻ പറയുന്നത്…” സനക്ക് തന്നെ അവന്റെ വട്ട് സ്വഭാവം കണ്ട് സ്വയം വട്ട് ആകുന്ന പോലെ തോന്നി. അവൾ പെട്ടെന്ന് കുളിച്ച് ഒരുങ്ങാൻ തുടങ്ങി. ******************************************* (ഉച്ച കഴിഞ്ഞ് 2 മണി) ഒരു വെള്ള കാറിൽ നിഫാസിന്റെ ഉമ്മയും മാമിയും പിന്നെ രണ്ട് കുട്ടികളും വന്നു ഇറങ്ങി. അതിൽ ഒരാൾ അന്ന് സനയെ കാണാൻ വന്ന കൂട്ടത്തിൽ ഉണ്ടായിരുന്ന ഒരു കസിൻ ആയിരുന്നു. സനയുടെ ഉമ്മയും കൊച്ചാപ്പയും ബാക്കി ഉള്ളവരും സന്തോഷത്തോടെ അവരെ വരവേറ്റു. നിഫാസിന്റെ ഉമ്മ നല്ലൊരു ചെറുപ്പക്കാരിയാണ്… ശരിക്കും സനയുടെ ഉമ്മയെ പോലെ തന്നെ. അവർ സനയെ കണ്ടപ്പോൾ തന്നെ വിശേഷങ്ങൾ ഒക്കെ തിരക്കി. അവർക്കു ചായ ഒക്കെ ഇട്ട് നൽകി. “എനിക്ക് അവൻ എങ്ങനെയെങ്കിലും ഒന്ന് കെട്ടിയാൽ മതി… ഒരുപാട് ഇട്ട് വിഷമിപ്പിക്കുന്നു അവൻ…” നിഫാസിന്റെ ഉമ്മ സനയുടെ ഉമ്മയോട് പറഞ്ഞു. “അത് ഒക്കെ ശരിയാകും… അല്ലാഹു വിധിച്ചിട്ടുണ്ടെങ്കിൽ എന്തും നടക്കും…” ഉമ്മ ആശ്വസിപ്പിച്ചു. കാർ യാത്ര നിഫാസിന്റെ ഉമ്മയ്ക്ക് അത്രക്ക് ശീലമല്ലാത്തത് കൊണ്ട് നല്ല തലവേദന ആയിരുന്നു. അവർക്കു പ്രത്യേകമായി കട്ടൻ ചായ ഒക്കെ ഇട്ട് നൽകി. എല്ലാവരും പരസ്പരം നല്ല രീതിയിൽ സംസാരിച്ചു മടങ്ങി. ***************************************** ഉമ്മറപ്പടിയിൽ നജ്മ കാത്തുനിൽക്കുന്നുണ്ടായിരുന്നു. “എന്തായി ഉമ്മ കാര്യങ്ങൾ?” കാർ വന്ന് ഇറങ്ങിയ ഉടനെ അവൾ ചോദിച്ചു. “ഹാ… അവളെ കണ്ടു… നല്ല കുട്ടിയാണ്… നല്ല കുടുംബം… ഇതുപോലെ ഒരു ആലോചന ഇനി അവന് വരുമെന്നു തോന്നുന്നില്ല…” മാമി പറഞ്ഞു. “അതെ… മോളേ… നിഫാസിന് ചേരും ആ കുട്ടി…” നിഫാസിന്റെ ഉമ്മ പറഞ്ഞു. ഇത് കേട്ടപ്പോൾ നജ്മയ്ക്ക് നല്ല സന്തോഷമായി. അവൾ ഇക്കയെ വിളിക്കാൻ ഫോൺ എടുത്തു. പക്ഷേ ഇക്കയുടെ ഫോൺ സ്വിച്ച്ഡ് ഓഫ് എന്നാണ് കേൾക്കുന്നത്. തിരക്ക് ആയിരിക്കും, കുറച്ച് കഴിഞ്ഞ് വിളിക്കാം എന്ന് പറഞ്ഞ് നജ്മ അകത്തേക്ക് കയറി. ******************************************** (രാത്രി 8 മണി) ഉമ്മയും നജ്മയും നിഫാസിന്റെ മൊബൈലിൽ മാറിമാറി വിളിക്കുകയാണ്. അവൻ ഫോൺ സ്വിച്ച്ഡ് ഓഫ് എന്നാണ് പറയുന്നത്. ഇത് കേട്ടപ്പോൾ ഉമ്മ ആകെ അങ്കലാപ്പിലായി. “പടച്ചോനെ… അവൻ എന്താ ഫോൺ എടുക്കാതെ… വല്ല അബദ്ധവും കാണിച്ചോ?” ഉമ്മ ആകെ പേടിച്ച് വിറയ്ക്കുകയാണ്. “ശേ… ഒന്ന് അടങ്ങ് ഉമ്മ… ഇക്കാ നമ്മളെ പറ്റിക്കുന്നതാണ്… പോയ കാര്യം പറയാൻ ആണെന്ന് ഇക്കയ്ക്ക് അറിയാം… അതാ ഫോൺ എടുക്കാതെ…” നജ്മ പറഞ്ഞു. നജ്മ ഫോൺ എടുത്ത് സാ നയ്ക്ക് മെസേജ് ഇട്ടു. സനയും അവനെ വിളിച്ച് നോക്കി… സ്വിച്ച്ഡ് ഓഫ് തന്നെ. “ഈ ഇക്കാ ഇത് എങ്ങോട്ട് പോയി റബ്ബേ…” സന വളരെയധികം ഭയന്നു. തുടരും… ^^^^^^^^^^^^^^^^^^^^^^^^^^^^^^^^^^^^^^^^^^^^^ നിഫാസ് ശരിക്കും എങ്ങോട്ടേക്കാണ് പോയത് ? 🤔 കണ്ട് അറിയാം... പരീക്ഷയുടെ തിരക്ക് കാരണം പോസ്റ്റ് ഇടാൻ താമസിക്കുന്നതാണ്. ക്ഷമിക്കണം. #💞 നിനക്കായ് #💌 പ്രണയം #📙 നോവൽ #💞 പ്രണയകഥകൾ