ഭദ്രകാളീപഥം ഭാഗം 3 ഭൈരവന്റെ മന്ത്രശക്തികൾ പരാജയപ്പെട്ടു തുടങ്ങിയപ്പോൾ, ആകാശത്ത് കറുത്ത മേഘങ്ങൾ ചുഴിപോലെ വട്ടംചുറ്റാൻ തുടങ്ങി. ഭൈരവൻ തന്റെ ചോര ഭൂമിയിലൊഴുക്കി പാതാളത്തിലെ ഏറ്റവും ക്രൂരമായ ശക്തികളെ ആവാഹിച്ചു. ഭൈരവന്റെ മന്ത്രോച്ചാരണങ്ങൾ ഉച്ചസ്ഥായിയിലായപ്പോൾ, ഗുഹയുടെ ഭിത്തികളിൽ നിന്ന് കറുത്ത പുക ഉയർന്നു. ആ പുകയിൽ നിന്നും ഛായാപുരുഷന്മാർ രൂപപ്പെട്ടു. ഇവർക്ക് ശരീരമില്ല അതുകൊണ്ടുതന്നെ ഭദ്രയുടെ വാളിന് അവരെ സ്പർശിക്കാനാവില്ലായിരുന്നു. അവർ നിഴലുകളെപ്പോലെ വായുവിൽ ഒഴുകി നടന്ന് ഗ്രാമവാസികളെ ശ്വാസം മുട്ടിക്കാൻ തുടങ്ങി…. അതോടൊപ്പം തന്നെ, ഭൂമി പിളർന്ന് ഭീമാകാരമായ രക്തസർപ്പങ്ങൾ പുറത്തുവന്നു. അവയുടെ കണ്ണുകളിൽ നിന്ന് വിഷം ചീറ്റിക്കൊണ്ടിരുന്നു… നിഴൽരൂപികളോട് പോരാടാൻ കഴിയാതെ ഭദ്ര പതറി. അവളുടെ വാൾ വായുവിൽ വെറുതെ വീശിക്കൊണ്ടിരുന്നു… "അദൃശ്യമായ ശത്രുവിനെ ഞാൻ എങ്ങനെ നേരിടും" അവൾ ആത്മഗതമായി ചോദിച്ചു… പെട്ടെന്ന് അവളുടെ ഉള്ളിൽ കാളീരൂപം തെളിഞ്ഞു. അവൾ കണ്ണുകളടച്ച് തന്റെ ഉള്ളിലെ ക്രോധത്തെ ഒരു അഗ്നിയായി മാറ്റി. ഭദ്രയുടെ ശരീരം പെട്ടെന്ന് തങ്കനിറത്തിൽ തിളങ്ങാൻ തുടങ്ങി. അവൾ പ്രാർത്ഥിച്ചു.. "അമ്മേ.. ഇരുട്ടിനെ നശിപ്പിക്കാൻ എനിക്ക് വെളിച്ചത്തിന്റെ കരുത്ത് നൽകൂ"... അവളുടെ ഉടവാളിൽ നിന്ന് പെട്ടെന്ന് അഗ്നിജ്വാലകൾ പുറപ്പെട്ടു. ആ അഗ്നി തട്ടിയതും നിഴൽരൂപികൾ ഉരുകിത്തീരാൻ തുടങ്ങി. ഇരുട്ടിനെ നശിപ്പിക്കാൻ വെളിച്ചത്തിന് മാത്രമേ കഴിയൂ എന്ന് അവൾ തിരിച്ചറിഞ്ഞു…. മറുഭാഗത്ത് കൂറ്റൻ രക്തസർപ്പങ്ങൾ രുദ്രനെ വരിഞ്ഞുമുറുക്കി. അവയുടെ വിഷപ്പല്ലുകൾ അവന്റെ ശരീരത്തിൽ ആഴ്ന്നിറങ്ങാൻ ശ്രമിച്ചു. രുദ്രന്റെ ശരീരത്തിൽ നീലനിറം പടരാൻ തുടങ്ങി. പക്ഷേ മഹാദേവൻ കാളകൂട വിഷം കഴിച്ചതുപോലെ ആ സർപ്പവിഷം രുദ്രനെ തളർത്തിയില്ല…. രുദ്രൻ തന്റെ കൈകൾ വിടർത്തി ഒരു ഭയങ്കരമായ ഗർജ്ജനം മുഴക്കി. അവന്റെ ചുറ്റും അദൃശ്യമായ ഒരു ഊർജ്ജവലയം രൂപപ്പെട്ടു…. "അധർമ്മത്തിന്റെ വിഷം ഈ ഭൂമിയിൽ പടരാൻ ഞാൻ അനുവദിക്കില്ല"..... രുദ്രൻ തന്റെ ദണ്ഡ് വായുവിൽ കറക്കി നിലത്തടിച്ചതും അവിടെ ഒരു രുദ്രാങ്കണം രൂപപ്പെട്ടു. ആ മണ്ഡലത്തിനുള്ളിൽ വന്ന പാതാള സർപ്പങ്ങളെല്ലാം ഭസ്മമായി മാറി… ഭൈരവന്റെ ശക്തികൾ തോൽക്കുന്നത് കണ്ടപ്പോൾ ദൂരെ മലമുകളിൽ നിന്ന് ഒരു ഭീകരമായ ചിരി മുഴങ്ങി. ഭൈരവന്റെ ഗുരുവും പാതാളലോകത്തെ സേനാപതിയുമായ താമ്രസൂരൻ അവിടെ പ്രത്യക്ഷപ്പെട്ടു….. താമ്രസൂരന്റെ ശരീരം ചെമ്പുതകിടുകൾ കൊണ്ട് നിർമ്മിച്ചതുപോലെ കടുപ്പമേറിയതായിരുന്നു. സാധാരണ ആയുധങ്ങളോ മന്ത്രങ്ങളോ അവനിൽ ഏൽക്കില്ല. അവൻ കൈയിലുണ്ടായിരുന്ന ഇരുമ്പുലക്ക കൊണ്ട് മലയിടുക്കുകൾ തകർത്തു…. "ഭൈരവൻ വെറുമൊരു കളിപ്പാട്ടം മാത്രമാണ് ..യഥാർത്ഥ നാശം ഇനി തുടങ്ങുന്നു"..... താമ്രസൂരൻ അലറി… തുടരും…. ✍️സന്തോഷ്‌ ശശി…. #📙 നോവൽ #കഥ,ത്രില്ലെർ,ഹൊറർ #💞 പ്രണയകഥകൾ #✍ തുടർക്കഥ #📔 കഥ