ആദ്യ ഭാഗ്ങ്ങൾ ലിങ്കിൽ ഉണ്ട് https://sharechat.com/post/6DmArqd?d=n&ui=v64j8rk&e1=cമിശ്വ 8 "ഇനിയൊരു മടക്കം ഇങ്ങോട്ട് ഉണ്ടാവില്ല അല്ലേ ?" ഓടുന്ന ട്രെയിനിന്റെ ജാലകത്തിലൂടെ പിന്നിലേക്ക് പാഞ്ഞു പോകുന്ന ഗ്രാമത്തെ അവസാനമെന്നോണം ഒന്ന് നോക്കിക്കൊണ്ട് ചോട്ടു നെടുവീർപ്പിട്ടു. "നീ വേണമെങ്കിൽ വന്നോ. ഞാനിനി ഇങ്ങോട്ടില്ല." തരുൺ ബാഗ് എടുത്ത് സീറ്റിന്റെ മൂലയിലേക്ക് വെക്കുന്നതിനിടയിൽ പറഞ്ഞു. "എന്തിന് ? അണ്ണന്റെ അച്ഛന്റെ തോക്കിനു മുൻപിൽ തീരാനോ ? ഞാനൊന്നുമില്ല ഇങ്ങോട്ട്." ചോട്ടു പുറത്തെ കാഴ്ച്ചകളിൽ നിന്നും കണ്ണെടുത്തു. "അല്ല അണ്ണനിതെന്തുവാ കാണിക്കുന്നേ? ആ ബാഗ് ഇങ്ങ് തന്നേ. ഞാൻ പിടിച്ചോളാം. അവിടെയിവിടെ വെറുതേ കൊണ്ടെ വെക്കാൻ അതിൽ പണമുള്ളതല്ലേ. അതും നാല് ലക്ഷം രൂപ!" അവസാന വാചകം പറയുമ്പോൾ ചോട്ടു ഒന്ന് വെള്ളമിറക്കിയത് പോലെ. "നീ വിളിച്ചു കൂവി ആരെയും അറിയിക്കാഞ്ഞാൽ മതി." തരുൺ ഗൗരവത്തോടെ പറഞ്ഞു കൊണ്ട് അതിനു മീതെ തല വെച്ച് ചെരിഞ്ഞു കിടന്നു. ചോട്ടുവും അവന് എതിർവശത്തുള്ള സീറ്റിലേക്ക് ചെരിഞ്ഞു. തരുൺ സുഖമായിട്ട് ഉറങ്ങിയെങ്കിലും ചോട്ടുവിന് കണ്ണടക്കാൻ സാധിച്ചില്ല. മനസ്സിൽ നിറയെ തരുണിന്റെ തലക്ക് കീഴെ ഉള്ള പണമാണ്. താനും ഉറങ്ങിയാൽ ആരെങ്കിലും അത് മോഷ്ടിച്ചാലോ... മണിക്കൂറുകൾ നീണ്ടു നിന്ന ട്രെയിൻ യാത്രക്ക് ശേഷം വിജയകരമായി അവർ മൈസൂർ സ്റ്റേഷനിൽ ചെന്നിറങ്ങി. ട്രെയിൻ ഇറങ്ങിയതും എങ്ങോട്ട് പോകണമെന്നറിയാതെ തരുൺ ചുറ്റിലും നോക്കികൊണ്ട് അങ്ങോട്ടുമിങ്ങോട്ടും നടന്നു. "അണ്ണാ. കുറേ നേരായല്ലോ ഇത്... എങ്ങോട്ടാ പോകേണ്ടത് എന്ന് അണ്ണനറിയില്ലേ ?" ചോട്ടു മുഷിച്ചിലോടെ ചോദിച്ചു. "കുഞ്ഞു നാളിൽ എപ്പോഴോ വന്നതാടാ. മാമനിവിടെ വെജിറ്ററിയൻ ഹോട്ടലാണ്... അതെവിടെയാ എന്താണെന്നൊന്നും എനിക്കൊരു പിടുത്തവുമില്ല. നമുക്കാദ്യം ടാക്സി വിളിക്കാം." റയിൽവേ സ്റ്റേഷനിൽ നിന്നും ഇറങ്ങി വടക്കോട്ട് നടന്ന അവർ എങ്ങനെയോ ടാക്സി സ്റ്റാൻഡിൽ എത്തി. "അണ്ണേ. ഹോട്ടൽ അഭിരാമി ഇവിടെ എവിടെയാ ?" തരുൺ ഒരു ടാക്സി ഡ്രൈവറോട് ചെന്ന് അന്വേഷിച്ചു. "അത് ഒരു അഞ്ചാറെണ്ണം ഉണ്ട്... ഏതിലേക്കാ ?" "ഇവിടെ... മൈസൂരിൽ ഉള്ള അഭിരാമി ഹോട്ടൽ. രാജശേഖര റെഡ്‌ഡിയുടെ ?" "മൈസൂരിൽ തന്നെ സാർ. അഞ്ചാറെണ്ണം കാണും." ചോട്ടുവിന്റെ കണ്ണ് മിഴിഞ്ഞു പോയി. തരുൺ ചിന്താധീനനായി നിന്നു. "എന്നാൽ അതിലേറ്റവും വലുതിലേക്ക് തന്നെ വിട്ടോ." തരുൺ ഡോർ തുറന്ന് കാറിനുള്ളിലേക്ക് കയറി. പിറകെ ചോട്ടുവും. "ഡാ... പിന്നേയ്. അമ്മാവനൊരു മകളുണ്ട് മൃദുല. നമ്മുടെ ഗ്രാമത്തിലേക്കവൾ ഭർത്താവുമൊന്നിച്ച് ഒരിക്കൽ വന്നി..." "ആ എനിക്കറിയാല്ലോ... ചരക്കാണ്! " തരുൺ പറഞ്ഞു പൂർത്തിയാക്കുന്നതിന് മുൻപേ ചോട്ടു ചാടിക്കയറി പറഞ്ഞു. "എന്താടാ പട്ടീ നീ പറഞ്ഞേ!" തരുൺ രൂക്ഷമായി നോക്കിയതും ചോട്ടു നാക്ക് കടിച്ചു കൊണ്ട് തല തിരിച്ചു. "അഭിരാമി വെജിറ്റേറിയൻ ഹോട്ടൽ!" ഹോട്ടലിന് മുൻപിൽ ചെന്ന് ടാക്സി ഇറങ്ങിയതും ചോട്ടു ആ വലിയ ബോർഡ് നോക്കി വായിച്ചു. "ആദ്യം എന്തെങ്കിലും കഴിക്കാം അണ്ണാ. എന്നിട്ടാകാം ബാക്കി കണ്ടുപിടിത്തം." ചോട്ടു വേഗം അകത്തേക്ക് കയറിച്ചെന്നു കൊണ്ട് ഒരു ടേബിളിൽ ഇടം പിടിച്ചു. ചുറ്റും കണ്ണോടിച്ചു കൊണ്ട് തരുൺ അവനരികിലേക്ക് ചെന്നിരുന്ന് ഭക്ഷണത്തിന് ഓർഡർ കൊടുത്തു. "അണ്ണന്റെ അമ്മാവൻ ഇങ്ങോട്ട് വരാറുണ്ടാകുമോ അതിന് ? " വെട്ടി വിഴുങ്ങന്നതിനിടെ ചോട്ടു തരുണിന് നേരെ തലയുയർത്തി. "ആർക്കറിയാം. അന്വേഷിക്കാം." തരുൺ തല ചലിപ്പിച്ചു. "ഡാ. പൊറുക്കി പണ്ടാരക്കാലാ!!" ഇടതു വശത്തു നിന്നുമൊരു അലർച്ച കേട്ടതും തരുൺ നടുക്കത്തോടെ തല ചെരിച്ചു. ചിരിയോടെ കൈ വീശിക്കൊണ്ട് തങ്ങളുടെ അരികിലേക്ക് വരുന്ന ആ യുവതിയെ കണ്ടതും തരുൺ പുഞ്ചിരിയോടെ എഴുന്നേറ്റു. ഓടിയടുത്ത അവൾ അവനെ ഇറുകെ പുണർന്നത് കണ്ട ചോട്ടു അമ്പരന്നുപോയി. "ഹായ്. ഞാൻ മൃദുല." അവൾ ചോട്ടുവിന് നേരെ കൈ നീട്ടി. "ചോട്ടു." ചോട്ടു ഇടം കൈ നീട്ടിക്കൊണ്ട് എഴുന്നേറ്റു. "എന്തൊക്കെയുണ്ടെടാ. എപ്പോ വന്നു ?" മൃദുല, തരുണിന്റെ വയറിന്‌ ഒരു കുത്ത് കൊടുത്തു. "ദേ വന്ന് കയറി കഴിക്കാൻ ഇരുന്നു. അത്രയേ ആയുള്ളൂ." തരുൺ ചിരിയോടെ പറഞ്ഞു. “എവിടെ നിന്റെ കെട്യോൻ - ആ മിണ്ടാപ്രാണി ?” മൃദുല ഒന്നു ഞെട്ടിയതുപോലെ. “അപ്പൊ നീ അറിഞ്ഞില്ലാരുന്നോ ?” തരുണിന്റെ നെറ്റി ചുളിഞ്ഞു. “ഞങ്ങൾ ഹാപ്പിലി ഡിവോഴ്സ്ഡായി മാൻ! ആറു മാസാകാൻ പോകുന്നു. ശെഡാ... ഇനി ഈ സംസ്ഥാനത്ത് നീ മാത്രമേ അറിയാൻ ബാക്കിയുണ്ടാരുന്നുള്ളൂന്നു തോന്നുന്നു.” “നിനക്കെന്റെ നമ്പറൊക്കെ ഉണ്ടാരുന്നതല്ലേ ? ഇടയ്ക്കെങ്കിലും ഒന്നു വിളിക്കാമായിരുന്നല്ലോ. രക്തബന്ധുക്കളാ നമ്മള്‌.” “അത് നിനക്ക് ഇങ്ങോട്ടും ആകാമായിരുന്നു. വെറുതേ എന്റെ വായിലിരിക്കുന്നത് കേൾക്കണ്ട.” മൃദുല ചൊടിച്ചു. “എന്നട്ട് ? എന്തിനാ ഇപ്പൊ ഇങ്ങോട്ട് കെട്ടിയെടുത്തേക്കുന്നെ ? ദിനകർ മാമൻ തട്ടിപ്പോയോ ? അല്ലാതെ ആ കുഗ്രാമം വിട്ട് വെളിയിൽ വരാൻ സാധ്യതയില്ലല്ലോ.” “ഞാൻ ഇതൊന്ന് കഴിച്ചു തീർക്കട്ടെ. എന്നിട്ട് വിശദമായിട്ട് പറയാം. വൻ കഥകളാണ്‌.” "എന്നാ കഴിച്ചൊ കഴിച്ചോ. അച്ഛൻ ദേ ഇച്ചിരി കഴിഞ്ഞാൽ എത്തും. എനിക്കൊരിത്തിരി തിരക്കുണ്ട്. വൈകിട്ട് വീട്ടിൽ വെച്ച് കാണാം.” “അയ്യോ, ഇത്ര പെട്ടെന്ന് പോണോ ? ഒന്ന് വെയ്റ്റ് ചെയ്തുകൂടെ ? അച്ഛൻ വരുമ്പൊ എനിക്കൊരു കമ്പനിക്ക്... സത്യം പറയാല്ലോ, മാമനെ എനിക്കൊരിത്തിരി...” “പേടിയാണല്ലേ ?” മൃദുല കുലുങ്ങിച്ചിരിച്ചു. “രക്ഷയില്ല മോനേ. ഞനിപ്പൊ ചെന്നില്ലെങ്കിൽ കോടികളുടെ നഷ്ടമുണ്ടായേക്കും!” “ഓ പിന്നേ!” തരുൺ കണ്ണുകൾ മേൽപ്പോട്ടാക്കി ഒരു ഗോഷ്ടി കാണിച്ചു. “അപ്പോ ശരി കുട്ടാ! പോട്ടേ ചോട്ടൂ...” അവൾ വിടർന്ന ചിരിയോടെ എഴുന്നേറ്റ് പുറത്തേക്ക് നടന്നു. “എന്റാശാനേ!” ചോട്ടു സ്വയമറിയാതെയെന്നോണം തരുണിന്റെ തുടയിൽ കൈയമർത്തി. “എന്തൊരു ഫിഗറാണ്‌. ആ ബാക്ക് ഒക്കെ നോക്കിക്കേ! എന്നാലും എന്തിനാരിക്കും ആ ചെറുക്കൻ ഇതുപോലൊരെണ്ണത്തിനെ ഉപേക്ഷിച്ചിട്ടുണ്ടാകുക ?” മറുപടിയായി തരുൺ, താൻ കഴിച്ചുകൊണ്ടിരുന്ന വലതു കൈ ചോട്ടുവിന്റെ ഇരുകണ്ണുകളിലും നന്നായിട്ടൊന്നു തേച്ചു കൊടുത്തു. “ഇപ്പൊ ഇത്രേയുള്ളൂ. ഇനി മേലിൽ നീ അവളെ നോക്കി വെള്ളമിറക്കുകയോ കമന്റടിക്കുകയോ ചെയ്താൽ, ചവിട്ടി ഒടിച്ചു കളയും ഞാൻ! മനസ്സിലായോടാ കഴുവേറിക്ക മകനേ!” “അണ്ണാ!” ചോട്ടു കണ്ണുകൾ പൊത്തി ഇരുന്നു ചിണുങ്ങി. “തമാശ പറയാനും പാടില്ലേ ?” തരുൺ ഇരുന്ന് കഴിപ്പ് തുടർന്നു. നിമിഷങ്ങൾക്കകം ഹോട്ടലിന്റെ മുന്നിലേക്ക് വന്ന് നിന്ന ബെൻസ് കാറിൽ നിന്നും രാജശേഖര റെഡ്‌ഡി ഇറങ്ങി അകത്തേക്ക് വരുന്നത് അവർ കണ്ടു. "ദാ അച്ഛൻ വന്നല്ലോ... " മൃദുല അയാൾക്കരികിലേക്ക് ഓടിച്ചെന്ന് തങ്ങളെ ചൂണ്ടിക്കാണിച്ച് എന്തല്ലാമോ പറയുന്നത് കണ്ട് തരുണും ചോട്ടുവും ചെന്ന് കഴുകി വന്നു. മൃദുല അവർക്ക് നേരെ റ്റാറ്റ കാണിച്ചു കൊണ്ട് പുറത്തേക്കിറങ്ങി പോയി. നിറപുഞ്ചിരിയോടെ കൈകൾ വിരിച്ചു പിടിച്ചു കൊണ്ട് തന്റെ അരികിലേക്ക് നടന്നു വരുന്ന വെള്ളയും വെള്ളയും ധരിച്ച ആ മദ്ധ്യവയസ്കനെ തരുൺ ഒരു ചെറുചിരിയോടെ നോക്കി നിന്നു. "മരുമകനേ... " തരുണും മുൻപോട്ടു ചെന്ന് അദ്ദേഹത്തെ പുണർന്നു. "എന്തുണ്ട് മോനേ വിശേഷം... എത്ര കാലമായി കണ്ടിട്ട്." തരുണിനെ അടിമുടി നോക്കുമ്പോൾ അയാളുടെ മിഴികൾ തിളങ്ങുകയായിരുന്നു. "അമ്മയുടെ വിശേഷമെന്താണ് മോനേ?" അയാൾ ചോദിച്ചതും തരുണിന്റെ മുഖം മങ്ങി. അത് മനസ്സിലായെന്നോണം രാജശേഖര റെഡ്ഢിയുടെ മുഖം കൂർത്തു വന്നു. “ആ അളിയൻ പട്ടിക്ക് സുഖമല്ലേ ?” പല്ലുകൾ കടിച്ചമർത്തിക്കൊണ്ടാണ്‌ അയാളത് ചോദിച്ചത്. അതുവരെ പുഞ്ചിരിയോടെ നിന്ന ആ മുഖം പെട്ടെന്ന് കോപത്തോടെ വലിഞ്ഞു മുറുകിയതും ചോട്ടു ചെറുതായൊന്നു ഭയന്നു. "ഇതാരാ? " ചോട്ടുവിന്റെ നേരെയായി അയാളുടെ കണ്ണുകൾ. "ഇതെന്റെ ഉറ്റ സുഹൃത്താണ് അമ്മാവാ. ചോട്ടു. " തരുൺ പരിചയപ്പെടുത്തിയപ്പോൾ അയാൾ ഒരു സുഖമില്ലാത്ത മട്ടിലാണ്‌ അവനെ അടിമുടി ഒന്നു നോക്കിയത്. "ഭക്ഷണം കഴിച്ചോ." അയാൾ ജോലിക്കാരെ കണ്ണ് കൊണ്ട് പരതുന്നതിനിടയിൽ ചോദിച്ചു. "കഴിച്ചമ്മാവാ. വന്ന പാടെ കഴിച്ചു." "ഉം. എന്നാ വീട്ടിലേക്ക് പൊയ്ക്കോളൂ. ഞാനൊരു വണ്ടി സെറ്റാക്കിത്തരാം." അദ്ദേഹം തരുണിന് നേരെ നോക്കി പറഞ്ഞു കൊണ്ട് മുകളിലേക്കുള്ള പടികൾ കയറി. "അണ്ണന്റെ കുടുംബം മുഴുവൻ ഇങ്ങനത്തെ ടെറർ കഥാപാത്രങ്ങളാണ്‌..." വിയർപ്പ് തുടച്ചു കൊണ്ട് ചോട്ടു ആത്മഗതം പറഞ്ഞപ്പോൾ തരുൺ ചുറ്റും നോക്കിക്കൊണ്ട് എൻട്രൻസിലേക്ക് നടന്നു. അധികം വൈകാതെ തന്നെ രാജശേഖര റെഡ്‌ഡി ഏല്പിച്ച വാഹനത്തിൽ ചോട്ടുവും തരുണും അദ്ദേഹത്തിന്റെ വീട്ടിലേക്ക് പുറപ്പെട്ടു. മൈസൂർ സിറ്റിയുടെ ഒത്ത നടുക്കായി വലിയൊരു കോമ്പോണ്ടിൽ തലയെടുപ്പോടെ നിൽക്കുന്ന ആ മൂന്ന് നില വീട് കണ്ടതും ചോട്ടുവിന്റെ കണ്ണ് തുറിച്ചു. ഗേറ്റ് കടന്നും ഇത്തിരി ദൂരം സഞ്ചരിച്ച് അവർ മുൻവശത്തെത്തി. ആഢംബരത്തിന്റെ പര്യായമെന്നൊക്കെ കൃത്യമായി വിശേഷിപ്പിക്കാവുന്ന ആ ബംഗ്ലാവിന്റെ മുറ്റത്തേക്കിറങ്ങിയതും ലഗേജ് എടുക്കാൻ വന്ന ആൾ തരുണിന്റെ ബാഗ് വാങ്ങാൻ ശ്രമിച്ചപ്പോൾ ചോട്ടു അതിനനുവദിച്ചില്ല. താൻ പിടിച്ചോളാമെന്നും പറഞ്ഞ് അവനത് തോളിലേറ്റി. അകത്തേക്ക് ആനയിക്കാനായി വന്ന സെർവന്റ്സിനെ കണ്ട് ചോട്ടുവിന്റെ കണ്ണുതള്ളി. കാര്യം, കല്ലഹള്ളിയിലെ ദിനകർ റെഡ്ഡിയുടെ ബംഗ്ലാവ് ഒരുപക്ഷേ ഇതിനേക്കാൾ വലുതായിരിക്കും. പക്ഷേ ആ ഉൾഗ്രാമം പോലെയല്ല ഇവിടെ. എല്ലാത്തിനും ഒരു രാജകീയപ്രൗഢിയുണ്ട്. "മകാ... " അകത്തു നിന്നും ഒരു സ്ത്രീ പുഞ്ചിരിയോടെ അവരുടെ അരികിലേക്ക് ഓടിയെത്തി അവനെ ചേർത്തു പിടിച്ചു. കുശലന്വേഷണങ്ങൾക്ക് ശേഷം അമ്മായി പറഞ്ഞത് പ്രകാരം അവർ മുകളിലെ ഒരു മുറിയിലേക്ക് നടന്നു. "അണ്ണാ. നമ്മെളെന്തു കൊണ്ട് നേരത്തേ ഇങ്ങോട്ട് വന്നില്ല ?" മുറി തുറന്നതും വൃത്തിയായി വിരിച്ചിരിക്കുന്ന തൂവെള്ള പതുപതുത്ത മെത്തയിലേക്ക് ചെന്ന് വീണു കൊണ്ട് ചോട്ടു ചോദിച്ചു. "അടങ്ങി ഒതുങ്ങി നിന്നാൽ നിനക്ക് നല്ലത്. ഇടഞ്ഞാൽ അച്ഛനെക്കാൾ പിശകാ അമ്മാവൻ." തരുൺ മുന്നറിയിപ്പ് കൊടുത്തു. “നിന്റെ നടപ്പും ഭാവവുമൊക്കെ ഒന്ന് മാറ്റിക്കോ. നമ്മടെ കുഗ്രാമമല്ല ഇത്. അതുപോലെ ഈ പെൺപിള്ളേരെ കാണുമ്പൊ ഉള്ള ഇളക്കവും വേണ്ട. മനസ്സിലായോ ?” “അതൊക്കെ ഞാൻ ഏറ്റണ്ണാ! ടെൻഷനാകാതെ.” ചോട്ടുവിന്‌ തരുൺ പറഞ്ഞത് അത്ര ഇഷ്ടപ്പെട്ടില്ല എന്ന് സ്വരഭാവത്തിൽ നിന്നും മനസ്സിലാക്കാമായിരുന്നു. സാവധാനം എഴുന്നേറ്റ് കർട്ടൻ മാറ്റി പുറത്തേക്ക് നോക്കിയ ആ ചെറുപ്പക്കാരന്റെ കണ്ണുകൾ വിടർന്നു. “അതു കണ്ടോ അണ്ണാ...” അവൻ പുറത്തേക്ക് വിരൽ ചൂണ്ടി. “സൊന്തമായിട്ട് വിമാനമൊക്കെ ഉണ്ട് ഇങ്ങേർക്ക്!” “വിമാനമല്ല കോപ്പേ! ഹെലികോപ്റ്റർ!” തരുൺ അലക്ഷ്യമായി പറഞ്ഞുകൊണ്ട് ബെഡിലേക്ക് ചാഞ്ഞു. “അതേ...” ചോട്ടു ഒരു രഹസ്യം പറയുന്നതു പോലെ അവനരികിലേക്ക് കുനിഞ്ഞു. “അണ്ണന്റെ അമ്മാവന് ഏതായാലും ഹോട്ടൽ ബിസിനസ് മാത്രമാണെന്ന് എനിക്ക് തോന്നുന്നില്ല." "അതെനിക്കും തോന്നുന്നില്ല." തരുണും ശെരി വെച്ചു. “നീ കുറച്ചുനേരം ആ വായൊന്നടച്ചുവെച്ചേ. ഒരു പത്തു മിനിട്ട് ഒന്ന് കണ്ണടയ്ക്കട്ടെ.” വൈകിട്ട്. മൂന്നാം നിലയുടെ മുകളിൽ ഓപ്പൺ ടെറസിലെ ഇരിപ്പിടത്തിൽ ചായ ഗ്ലാസ് ചുണ്ടോട് ചേർത്ത് ചിന്താവിഷ്ടനായി ഇരിക്കുകയാണ് തരുൺ. അവിടെ ഇരുന്നാൽ മൈസൂർ നഗരത്തിന്റെ പകുതിയും കാണാം. "ഹലോ!" കൊഞ്ചലോടെ ഒരു സ്ത്രീ ശബ്ദം തൊട്ട് പിറകിൽ അനുഭവപ്പെട്ടതും തരുൺ ഒന്ന് ഞെട്ടി. "ഹോ. നീയായിരുന്നോ ?" തരുൺ ചിരിക്കാൻ ശ്രമിച്ചു. "പിന്നെ ആരാവാൻ? കൂട്ടുകാരനെവിടെ പോയി.?" മൃദുല അവനരികിലേക്ക് ചെന്നിരുന്നു. "ഉറങ്ങുന്നു." തരുൺ വീണ്ടും ചിന്തകളിലാണ്ടു. "ഉം. സർ എന്തോ കാര്യമായ ആലോചനയിലാണല്ലോ. രാവിലെയും ഞാൻ ശ്രദ്ധിച്ചു." “ഒരുപാട് കാര്യങ്ങളുണ്ട്...” അവൻ ആത്മഗതം പോലെ പിറുപിറുത്തു. “എല്ലാം വളരെ പെട്ടെന്നായിപ്പോയി. അച്ഛനോട് വഴക്കിട്ടതും, ഒരൊറ്റ തോന്നലിന്‌ ചാടിയിറങ്ങി നാടു വിട്ടതും... എല്ലാം. മണ്ടത്തരമായോന്നൊക്കെ ഒരു തോന്നൽ...” “ആഹാ!” മൃദുലയുടെ ചുണ്ടിൽ ഒരു പുഞ്ചിരി വിടർന്നു. “ആദ്യം മുതൽ പറ. കേൾക്കട്ടെ. എന്നിട്ടു ഞാൻ പറഞ്ഞു തരാം മണ്ടത്തരമായോന്നൊക്കെ.” തുടർന്ന് ഏതാണ്ട് അരമണിക്കൂറോളം സമയമെടുത്ത് തരുൺ അവളോട് തന്റെ മനസ്സു തുറന്നു. മിശ്വയുടെ യാത്രയും, അതേ തുടർന്നുണ്ടായ പ്രശ്നങ്ങളും എല്ലാം വിശദീകരിച്ചു പറഞ്ഞു തീർന്നപ്പോഴേക്കും തരുൺ വിയർത്തു കുളിച്ചിരുന്നു. "എന്നിട്ട്, അവളെവിടെ ? എങ്ങോട്ടു പോയി ?" "അന്ന് പോന്നതാണവൾ. ഇപ്പോൾ എന്ത് പറ്റിയെന്നറിയില്ല. ബന്ധപ്പെടാൻ യാതോരു മാർഗ്ഗവുമില്ല. ഫോൺ ഓഫാണ്‌. എന്തെങ്കിലും അപകടത്തിൽ പെട്ടതാണോ എന്നാണെന്റെ പേടി." "സ്ഥലത്തിന്റെ പേരെന്താ. നമുക്ക് നോക്കാം." "അതറിയില്ല!" “ങ്ഹേ ?” "അവൾ പറഞ്ഞില്ല. മനപ്പൂർവം പറയാത്തതാ... എന്നെ ഒഴിവാക്കാൻ " മൃദുല ഞെട്ടി മുഖമുയർത്തി "നിന്നെ ഒഴിവാക്കാനോ? അങ്ങനെ ഒരുവളെ എന്തിന് നീ അന്വേഷിച്ചു നടക്കുന്നു തരുൺ.?" തരുൺ മനോഹരമായൊന്നു പുഞ്ചിരിച്ചുകൊണ്ട് അവളെ നോക്കി. "അവൾ അങ്ങനെ അങ്ങ് രക്ഷപ്പെട്ടു പോകാൻ ഞാൻ സമ്മതിക്കുമോ ?" തുടരും... കണ്ണൂർകാരൻ ❤️❤️❤️❤️❤️ #🧟 പ്രേതകഥകൾ! #📔 കഥ #📙 നോവൽ #🕵️‍♀️ കുറ്റാന്വേഷണ കഥകൾ #✍ തുടർക്കഥ