37അയലത്തെ അമ്പിളി 🌜 " അപ്പു ആണല്ലോ..... " രുദ്രൻ വിളി കേട്ട പാടേ വീട്ടിലേക്ക് ഓടി... പിറകെ വിഷ്ണുവും. വീട്ടിലേക്ക് ഓടിക്കയറി, തുറന്നു കിടന്ന മുൻ വാതിലിലൂടെ ഹാളിലേക്ക് ചെന്ന രുദ്രൻ അവിടെ കണ്ട കാഴ്ചയിൽ തറഞ്ഞു നിന്ന് പോയി. രുഗ്മിണി അമ്മ ഹാളിലെ നിലത്തിരിപ്പുണ്ട്. അവരെ ഒരു നോട്ടമേ രുദ്രൻ നോക്കിയുള്ളൂ. വാ പിളർന്ന് നിന്ന് പോയി... പിന്നെ പരിസരം മറന്നതു പോലെ ഉറക്കെ പൊട്ടിച്ചിരിച്ചു. അവന് പിറകെ ഓടിക്കയറി വന്ന വിഷ്ണുവും ചിരി തുടങ്ങി. വിഷ്ണു കണ്ണെടുക്കാതെ രുഗ്മിണിയമ്മയെ തന്നെ നോക്കി. രുഗ്മിണിയമ്മയുടെ നരകയറിയ മുടി ഇരുവശത്തുമായി കൊമ്പ് കെട്ടി വച്ചിട്ടുണ്ട്. അതിൽ പകുതിയും പുറത്തേയ്ക്ക് ഊർന്നുവീണു കിടക്കുന്നു. നെറ്റിയിൽ കരി കൊണ്ടൊരു വലിയ വട്ടപ്പൊട്ട്. രണ്ട് കണ്ണിലും നിറയെ കരി വാരി പൊത്തി വച്ചിട്ടുണ്ട്. അതു പോലെ തന്നെ പുരികത്തും. നെറ്റിയിൽ ഉള്ളതു പോലെ ഒരു പൊട്ട് കവിളത്തും ഉണ്ട്. അതുപോലെ തന്നെ വൈറ്റ് സിമന്റിനകത്ത് വീണത് മാതിരി മുഖം മുഴുവൻ പൗഡറും. ദേവി ക്ഷേത്രത്തിൽ നിന്നും കിട്ടിയ കുങ്കുമം വെള്ളത്തിൽ ചാലിച്ച് ചുണ്ടിൽ വാരി പൂശിയിട്ടുണ്ട്. രുദ്രന്റെ കാറിന്റെയും ബൈക്കിന്റെയും കീചെയിനകൾ ഇരു ചെവിയിലെയും ചെവിക്കുടയിലൂടെ തൂക്കിയിട്ടിരിക്കുന്നു. രണ്ടു വലിയ ദോശക്കല്ലുകൾ പോലെ അത് ഞാന്ന് കിടന്ന് ആടുന്നുണ്ട്. " നല്ല ചേലുണ്ട്...! " രുദ്രൻ ചിരിയടക്കാൻ പാടുപെട്ടുകൊണ്ട് പറഞ്ഞതും രുക്മണിയമ്മ അവനെ ദയനീയമായി നോക്കി. " എന്നും രുക്കിനി അമ്മയല്ലേ അപ്പുവിനെ ഒരുക്കണത്. ഇന്ന് അപ്പു രുക്കിനി അമ്മേ ഒരുക്കീതാ.... കൊള്ളാവോ അച്ഛാ? " അപ്പുവിന്റെ നിഷ്കളങ്കമായ ചോദ്യം. " പിന്നേ.... നന്നായിട്ടുണ്ട്. " രുദ്രൻ വാ പൊത്തിക്കൊണ്ട് തലയാട്ടി. " രുക്കിനി അമ്മ കുഞ്ഞാവയായി.... ഇനി തൊട്ടിലിൽ കിടത്തി ആട്ടി ആട്ടി ഉറക്കണം.... " അപ്പു ചിരിയോടെ തന്റെ പ്ലാനുകൾ പറയുകയാണ്.... " അല്ല.... ഇത് കാണിക്കാനാണോ നീ ഇവിടെ കിടന്നു ഓടി വായോ എന്ന് വിളിച്ചു കൂവിയത്...? " രുദ്രൻ ചോദിച്ചതും അപ്പു അല്ല എന്ന തലയാട്ടി. " രുക്കിനി അമ്മ ഇപ്പോ കുഞാവയല്ലേ? നടന്നു വന്നപ്പോൾ ഹാളിലെ തറേല് മൂത്രമൊഴിച്ചു. അതിൽ ചറക്കി പോത്തോന്ന് വീണു. അതാ ഞാൻ അച്ഛനെ വിളിച്ചേ.... " രുദ്രൻ അപ്പോൾ മാത്രമാണ് രുഗ്മിണി അമ്മയുടെ ഇരിപ്പ് ശ്രദ്ധിച്ചത്. കാലു മുന്നിലേക്ക് നീട്ടി വെച്ച്, കൈ രണ്ടും പിറകിലേക്ക് കുത്തി, പിറകിലേക്ക് അല്പം വളഞ്ഞിരിക്കുന്നവരുടെ മുഖം വേദന കൊണ്ട് ചുളിഞ്ഞിട്ടുണ്ട്. " അയ്യോ..... " രുദ്രൻ തലയിൽ കൈവെച്ചു പോയി. അപ്പുവിനെ നോക്കി ഒന്ന് കണ്ണുരുട്ടി കൊണ്ട് അവൻ രുഗ്മിണിയമ്മയുടെ അടുത്തേക്ക് ഓടിച്ചെന്നു. രുദ്രനും വിഷ്ണുവും ചേർന്ന് അവരെ താങ്ങിപ്പിടിച്ച് സോഫയിലേക്ക് ഇരുത്തി. രുദ്രൻ വേഗം തന്നെ അടുക്കളയിലേക്ക് ചെന്ന് ഒരു ഗ്ലാസ് വെള്ളം എടുത്തിട്ട് വന്നു. " ആശുപത്രിയിൽ പോണോ രുഗ്മിണിയമ്മേ? " അവർ വെള്ളം കുടിക്കുന്നതിനിടയിൽ രുദ്രൻ ആശങ്കയോടെ ചോദിച്ചു. " അത്രക്കൊന്നും ഇല്ല കുഞ്ഞേ.... ഇതിപ്പോ മൂടിടിച്ചാ വീണത്. അതോണ്ട് തന്നേ എണീക്കാൻ പറ്റീല്ല. അതാ അപ്പുമോളോട് നിന്നെ ഒന്ന് വിളിക്കാൻ പറഞ്ഞത്. അതിന് ഈ കാ‍ന്താരി ഇങ്ങനെ കാറി കൂവുംന്ന് ഞാൻ അറിഞ്ഞോ? " രുഗ്മിണിയമ്മ അപ്പുവിനെ ചിരിയോടെ ഒന്ന് കൂർപ്പിച്ചു നോക്കി. " അപ്പുനെ കുളിപ്പിച്ചിട്ട് ഒരുക്കാൻ വേണ്ടി കരീം പൌഡറും ഒക്കെ എടുത്തു വച്ചതാ ഞാൻ. അപ്പൊ അവക്ക് എന്നെ ഒരുക്കണം. പറ്റില്ല എന്ന് പറഞ്ഞപ്പോ കരച്ചിൽ തുടങ്ങി. അതാ ഇരുന്ന് കൊടുത്തത്. എന്നെ ഈ കോലത്തിൽ ആക്കി കഴിഞ്ഞതും ഞാൻ അവളെ ഒരുക്കാതിരിക്കാൻ ആശാത്തി മുറീന്ന് ഇറങ്ങി ഒറ്റ ഓട്ടവാന്നെ... ഞാൻ അവളുടെ പിറകെ വന്നതാ. വെള്ളം കിടന്നത് കണ്ടില്ല.... " രുഗ്മിണിയമ്മ പറഞ്ഞതും രുദ്രൻ അപ്പുവിനെ നോക്കി. " അപ്പു ഇങ്ങ് വന്നെ.... " രുദ്രൻ അവളെ തന്റെ അടുത്തേക്ക് വിളിച്ചു. അപ്പു രുദ്രന്റെ അടുത്ത് വന്ന് പതുങ്ങി നിൽപ്പായി. " രുഗ്മിണിയമ്മ എങ്ങനെ വീണെന്നാ പറഞ്ഞെ? " " അത്... പിന്നെ... രുക്കിനിഅമ്മ... മൂത്രം ഒഴിച്ചപ്പോ... " " അപ്പൂ.....! " രുദ്രൻ താക്കീതോടെ വിളിച്ചു. അതോടെ അപ്പു സത്യം പറയാൻ തയ്യാറായി. " അപ്പു വാട്ടർകളർ എടുത്തപ്പോ ബ്രഷ് മുക്കാൻ പാത്രത്തിൽ എടുത്ത് വച്ച വെള്ളം അറിയാതെ തട്ടി വീണു പോയതാ... " മുഖം താഴ്ത്തി ഇരുകയ്യും പിറകിൽ കെട്ടി ആടി ആടി നിന്ന് പറയുന്നവളെ കണ്ടപ്പോ രുദ്രന് വല്ലാത്ത വാത്സല്യം തോന്നി. അവൻ അവളെ തന്നോട് ചേർത്ത് പിടിച്ചു. " ഇനി ഇങ്ങനെ കുറുമ്പോന്നും കാണിക്കരുത് കേട്ടോ? " അപ്പു തലയാട്ടി. " അമ്മൂമ്മയോട് സോറി പറഞ്ഞെ.... " അപ്പു ഉടനെ തന്നെ രുഗ്മിണി അമ്മയോട് സോറി പറഞ്ഞു. ഒപ്പം കെട്ടിപ്പിടിച്ച് കരിപുരണ്ട കവിളിൽ ഒരു ഉമ്മയും കൊടുത്തു. " അതൊന്നും സാരമില്ല കുഞ്ഞേ... നീ എന്റെ കുറുമ്പി കുട്ടിയല്ലേ? " രുഗ്മിണി അമ്മയും അവളെ ചേർത്തണച്ചു. " അല്ല... അപ്പു ബൂട്ടീഷൻ ഈ മേക്കപ്പ് ട്രിക്ക്കളൊക്കെ എവിടുന്ന് പഠിച്ചതാ? " ചോദിച്ചത് വിഷ്ണുവാണ് . " അതേ അച്ഛന്റെ ഫോണിൽ റീൽസ് കണ്ടതാ. ഒരു കുഞ്ഞാവ അമ്മേ ഒരുക്കണത്. എന്റെ അമ്മ ജയിലിൽ അല്ലെ? അതോണ്ട് ഞാൻ അമ്മൂമ്മേ ഒരുക്കി. " അപ്പുവിന്റെ മറുപടി കേട്ട് വിഷ്ണു നേരെ നോക്കിയത് രുദ്രന്റെ മുഖത്തേക്കാണ്. അവൻ മുഖം കുനിച്ച് കളഞ്ഞു. രുദ്രന്റെ അവസ്ഥ മനസ്സിലായതു കൊണ്ടാവാണം ചോദ്യങ്ങൾ ഒന്നുമില്ലാതെ വിഷ്ണു എഴുന്നേറ്റു. അവനും എല്ലാം നേരത്തെ തന്നെ അറിഞ്ഞിരുന്നു.... " എന്നാൽ ഞാൻ ഇറങ്ങട്ടെ രുദ്രേട്ടാ... ഇടയ്ക്ക് വരാം.... " അങ്ങനെ പറഞ്ഞുകൊണ്ട് അവൻ ഇറങ്ങി പുറത്തേക്ക് നടന്നു. 🌜 ബെഡിൽ വിരിച്ചിരുന്ന വിരിപ്പും കിഷോറിന്റെ വസ്ത്രങ്ങളും ഒക്കെ മാറ്റി വേറെ ഇടിവിപ്പിച്ചു കൊടുത്തു അമ്പിളി. ആദ്യമൊക്കെ ഒറ്റയ്ക്ക് കിഷോറിന്റെ വസ്ത്രങ്ങൾ മാറ്റി കൊടുക്കാൻ അവൾക്ക് വല്ലാത്ത ബുദ്ധിമുട്ട് തോന്നിയിരുന്നു. എന്നാൽ ഇപ്പോൾ അത്രകണ്ട് പ്രയാസമില്ല. മെലിഞ്ഞുണങ്ങി അസ്ഥിപഞ്ചരം പോലെ കിടക്കുന്ന ഒരു മനുഷ്യനെ തിരിച്ചും മറിച്ചുമൊക്കെ കിടത്താൻ എന്തു പാട്? മാറ്റിയ വസ്ത്രങ്ങളും എടുത്ത് അടുക്കള വാതിലിൽ കൂടി അമ്പിളി പുറത്തേക്കിറങ്ങി. അവിടെയാണ് അലക്ക് കല്ല്. ഈ തുണികളും കൂടി അലക്കി വിരിച്ചിട്ട് വേണം അമ്മിണി പശുവിനെ തിരികെ തൊഴുത്തിലേക്ക് കൊണ്ടു വന്ന് കെട്ടാൻ. കിഷോറിന്റെ ചേച്ചിയുടെ പറമ്പിൽ അതിനെ മേയാൻ വിട്ടിരിക്കുകയാണ്. അതു കൂടി കഴിഞ്ഞു വേണം ഒന്ന് നടുനിവർത്താൻ... തുണികൾ വെള്ളത്തിലേക്ക് മുക്കി വെച്ച് നടുവിൽ പിടിച്ചുകൊണ്ട് അമ്പിളി നിവർന്നു നിന്നു. നേരെ നോക്കിയപ്പോൾ കണ്ടതോ? തൊടിയിലെ മാവിലായി അമ്മിണിപ്പശുവിനെ കിട്ടിയിരുന്ന കയർ അഴിച്ചുവിടുന്ന കിഷോറിന്റെ അമ്മയെ. " ഈശ്വരാ... ഇവരിത് എന്താ ചെയ്യുന്നേ? " അമ്പിളി അങ്ങോട്ടേക്ക് ഓടിച്ചെന്നു. " നിന്നോട് ഞാൻ പലവട്ടം പറഞ്ഞിട്ടുണ്ട് എന്റെ പെണ്ണിന്റെ പറമ്പിൽ ഈ ജന്തൂനെ കൊണ്ട് കെട്ടരുതെന്ന്.... " അമ്പിളിയെ കണ്ടതും അഴിച്ച കയർ നിലത്തേക്ക് എറിഞ്ഞു കൊണ്ട് അവർ അവളോട് അരിശപ്പെട്ടു. " ഈ മിണ്ടാപ്രാണിയുടെ പാല് വിട്ടുകിട്ടുന്ന കാശുകൊണ്ടാ നിങ്ങളും മൂന്ന് നേരം തിന്നും കുടിച്ചും കിടക്കുന്നത്. അത് മറക്കണ്ട. " അവരുടെ പ്രവർത്തി കണ്ട് അമ്പിളിക്ക് ദേഷ്യം വന്നു പോയി. " ഓ... അവള് വലിയ കെട്ടിലമ്മ. എന്റെ ചെറുക്കന് ആവതുണ്ടായിരുന്നെങ്കിലെ അവൻ എന്നെ നല്ല പോലെ നോക്കിയേനെ.... ഇത് നാക്കിൽ പുരളാൻ ഇല്ലാത്ത വല്ലതും വച്ചുണ്ടാക്കി തരണേനാ അവളീ കെടന്ന് ചെലക്കണത്....! " അമ്പിളി അത് കേട്ടില്ല എന്ന് നടിച്ചു. രാവിലെ മുതൽ ഓരോന്നൊക്കെ നുള്ളി പെറുക്കി ചെയ്ത് നടക്കുന്നതാണ്. അവരോട് വഴക്കുണ്ടാക്കാനുള്ള മാനസികാവസ്ഥയിൽ ഒന്നും ആയിരുന്നില്ല അമ്പിളി. നിലത്തു കിടന്നിരുന്ന കയറ് കയ്യിലെടുത്ത് വലിച്ചു കൊണ്ട് അമ്പിളി പശുവിനെ തൊഴുത്തിലേക്ക് നടത്തി. " ഇനി മേലിൽ ഈ സാധനത്തിനെ ഇങ്ങോട്ട് കേറ്റി പോകരുത്. പറമ്പ് മുഴുവൻ ചാണകമിട്ട് നാശമാക്കിയിരിക്കുന്നു... നശൂലം.... " പറയുന്നതിനൊപ്പം കിഷോറിന്റെ അമ്മ തൊട്ടടുത്ത് നിന്നിരുന്ന പൂച്ചെടിയുടെ കമ്പ് വലിച്ചൊടിച്ച് പശുവിന്റെ പുറകിൽ ആഞ്ഞടിച്ചു. പശു ഉച്ചത്തിൽ അമറികൊണ്ട് മുന്നോട്ടു കുതിച്ചു. അമ്പിളിയത് പ്രതീക്ഷിക്കാതെ ഇരുന്നതിനാൽ അവളുടെ കൈയിലെ കയറിന്റെ പിടി വിട്ടു പോയി. " ഈശ്വരാ എന്റെ പശു... " അവൾ ഉറക്കെ നിലവിളിച്ചു പോയി. പശു വീടിന്റെ വശത്തുകൂടി മുറ്റത്തേക്ക് കടന്ന് മുന്നിലെ ഗേറ്റും കഴിഞ്ഞ് റോഡിലേക്ക് ഓടിയിറങ്ങി. പിറകെ അമ്പിളിയും... റോഡിൽ എതിരെ ഒരു കാർ വരുന്നത് കണ്ടതും അമ്പിളി ഓട്ടത്തിന്റെ വേഗത കൂട്ടി. പശുവിന്റെ പാലും, കോഴി മുട്ടയും ഒക്കെ വിറ്റ് കിട്ടുന്ന കാശും പിന്നെ അല്ലറ ചില്ലറ പരിപാടികളും ഒക്കെ കൊണ്ടാ വീട്ടിലെ ചിലവുകളൊക്കെ ഒരുവിധം കഴിഞ്ഞു പോകുന്നത്. അതിനെന്തെങ്കിലും പറ്റിയാൽ പിന്നെ എല്ലാം കുഴഞ്ഞു മറിഞ്ഞത് തന്നെ.... അമ്പിളി വെപ്രാളത്തോടെ മുന്നോട്ട് ഓടി. 🌜 🌜 🌜 🌜 🌜 #📔 കഥ #💞 പ്രണയകഥകൾ #📚 ട്വിസ്റ്റ് കഥകൾ #📙 നോവൽ #✍ തുടർക്കഥ