#🛕ખોડલધામના અધ્યક્ષની નિમણૂંક, કાગવડ સ્થિત ખોડલધામ મંદિર પ્રાણ પ્રતિષ્ઠા મહોત્સવને આજે 21 જાન્યુઆરી 2026ના રોજ નવ વર્ષ પૂર્ણ થયા છે. આ અવસર પર ખોડલધામ ખાતે હાલ વર્ષ 2026 કન્વીનર મિટિંગનું આયોજન થયું છે. જે કન્વીનર મિટિંગમાં ખોડલધામ ટ્રસ્ટના ચેરમેન નરેશ પટેલે ખોડલધામ સંગઠનના અધ્યક્ષ તરીકે પૂર્વ મુખ્યમંત્રી આનંદીબેન પટેલના પુત્રી અનાર પટેલના નામની ઘોષણા કરી છે. ત્યારે કાર્યક્રમ દરમિયાન ખોડલધામ સંગઠનના નવનિયુક્ત અધ્યક્ષ અનાર પટેલે પોતાનું પ્રથમ સંબોધન આપ્યું હતું.આ પ્રસંગે તેમણે ખોડલધામના સ્થાપક નરેશ પટેલ પર અઢળક વિશ્વાસ વ્યક્ત કરતા કહ્યું કે, “નરેશભાઈ પટેલનો વિશ્વાસ હું ક્યારેય ડગમગવા નહીં દઉં.” તો સાથે જ કહ્યું હતું કે, મને મળેલું પદ કોઈ સામાન્ય પદ નથી, પરંતુ એક મોટી જવાબદારી છે, જે બાબતનું પૂરું ભાન તેમને છે. તેમણે ઉમેર્યું કે નરેશભાઈ પટેલે ‘મા ખોડલની ભક્તિ અને એકતાની શક્તિ’ના સૂત્ર સાથે ખોડલધામની સ્થાપના કરી છે અને આ સંસ્થાએ સમાજને એકજૂટ કરવાનો સંદેશ આપ્યો છે.વધુમાં અનાર પટેલે સ્ટેજ પરથી કહ્યું કે, “આપણી પાસે શક્તિ છે, સંપત્તિ છે, પટેલ સમાજ પાસે શું નથી? પરંતુ સાચી તાકાત એકતામાં છે. જેથી આપણે સંગઠિત રહેશું તો જ ઇતિહાસ રચી શકીશું.” અનાર પટેલે નરેશ પટેલના શબ્દોનો ઉલ્લેખ કરતા કહ્યું કે, “ઉછળતા દેડકાઓનું વજન કરવું શક્ય છે, પરંતુ પટેલોને એકજૂટ કરવું મુશ્કેલ છે.” છતાં પણ નરેશભાઈ પટેલે પટેલ સમાજને એકત્રિત કરીને બતાવ્યું છે, જે તેમની નેતૃત્વ ક્ષમતાનું ઉત્તમ ઉદાહરણ છે.સમાજમાં એકતાની જરૂરિયાત પર ભાર મુકતા અનાર પટેલે કહ્યું કે, “મતભેદ ચાલી શકે, ચર્ચા-વિવાદ પણ થઈ શકે, પરંતુ મનભેદ ક્યારેય ન હોવા જોઈએ. આંતરિક વિખવાદ સમાજને નબળો બનાવે છે.” વયોવૃદ્ધ માતા-પિતાની સંભાળ બાબતે તેમણે ભાવુક અપીલ કરતા કહ્યું કે, પટેલ સમાજના વૃદ્ધ માતા-પિતા વૃદ્ધાશ્રમમાં જવા ન પડે તે આપણી સૌની સંયુક્ત જવાબદારી છે.અંતમાં ખોડલધામ સંગઠનના નવનિયુક્ત અધ્યક્ષ અનાર પટેલે સ્પષ્ટ સંદેશ આપ્યો કે, “નરેશ પટેલને ટેકો આપીએ, ટીકા નહીં.” તેમણે સમાજને એકતાની દિશામાં આગળ વધવા માટે આહ્વાન કર્યું હતું. આ સમગ્ર કાર્યક્રમ દરમિયાન મોટી સંખ્યામાં સમાજના આગેવાનો અને કાર્યકરો હાજર રહ્યા હતા, જેમણે અનાર પટેલના વિચારોને વધાવ્યા હતા. #તાજા સમાચાર #🔥 બિગ અપડેટ્સ #આજના સમાચાર #રાજકોટ