നാഗമുദ്ര ഭാഗം - 1 🪱🪱🪱🪱🪱🪱🪱 അനന്തകോടി നാഗങ്ങൾ വസിക്കുന്ന പാതാളലോകത്തെ നാഗസദസ്സ് അന്ന് നിശബ്ദമായിരുന്നു… നാഗരാജാവായ വാസുകിയുടെ കൊട്ടാരത്തിലെ മുഖ്യ നർത്തകി അനന്തലക്ഷ്മി തന്റെ ചിലങ്കകളഴിച്ചു വെച്ച് വിതുമ്പുകയായിരുന്നു... തൊട്ടടുത്ത്, ക്രോധത്താൽ ജ്വലിക്കുന്ന കണ്ണുകളുമായി നാഗസേനാനായകൻ ഭദ്രകാളൻ നിൽക്കുന്നു… നാഗലോകത്തെ ഏറ്റവും കരുത്തനായ യോദ്ധാവായിരുന്നു ഭദ്രകാളൻ…. അനന്തലക്ഷ്മിയുടെ അമാനുഷികമായ സൗന്ദര്യത്തിൽ മോഹിതനായ അവൻ അവളെ തന്റെ പത്നിയാക്കാൻ ആഗ്രഹിച്ചു…. എന്നാൽ, പരമശിവന്റെ പരമഭക്തയായ അനന്തലക്ഷ്മി തന്റെ ഹൃദയം ഈശ്വരന് സമർപ്പിച്ചവളായിരുന്നു…. മഹാദേവന്റെ പൂജയ്ക്കായി താൻ കരുതിവെച്ചിരുന്ന അപൂർവ്വമായ നീലത്താമരകൾ ഭദ്രകാളൻ നശിപ്പിച്ചപ്പോൾ, അനന്തലക്ഷ്മി സദസ്സിൽ വെച്ച് അവനെ പരസ്യമായി തള്ളിക്കളഞ്ഞു… തന്റെ പ്രണയം നിരസിച്ചതിനേക്കാൾ, ഒരു പെണ്ണിന് മുന്നിൽ തന്റെ ആഭിജാത്യം തകർക്കപ്പെട്ടതാണ് ഭദ്രകാളനെ പ്രകോപിപ്പിച്ചത്. അവൻ കൈയ്യിലെ മാന്ത്രികദണ്ഡ് നിലത്തടിച്ചു കൊണ്ട് അവളെ ശപിച്ചു "നീ അഹങ്കരിക്കുന്ന ഈ ദിവ്യരൂപം നിനക്ക് നഷ്ടമാകട്ടെ! ഭൂമിയിലെ മർത്യരുടെ ഇടയിൽ, നിന്റെ ഈ നാഗശക്തികളെല്ലാം വിസ്മരിച്ച് നീ ഒരു സാധാരണ പെൺകുട്ടിയായി ജനിക്കും. എന്ന് നീ നിന്റെ യഥാർത്ഥ രൂപത്തെക്കുറിച്ച് തിരിച്ചറിയുന്നുവോ, അന്ന് നിന്റെ മരണം സംഭവിക്കും!" ഭയന്നുവിറച്ച അനന്തലക്ഷ്മി വാസുകി മഹാരാജാവിന്റെ പാദങ്ങളിൽ വീണു. രാജാവ് ശാപത്തിന് ഒരു ചെറിയ മോക്ഷം നൽകി: "നീ ഭൂമിയിൽ വച്ച് മഹാദേവന്റെ അംശമായ ഒരു മനുഷ്യനെ പ്രണയിക്കും. നിനക്ക് വേണ്ടി അവൻ സ്വന്തം ജീവൻ ബലി നൽകാൻ തയ്യാറാകുന്ന നിമിഷം നിന്റെ ശാപം മാറും നിനക്ക് മരണം സംഭവിക്കുക ഇല്ല….".. വർഷങ്ങൾ കടന്നുപോയി. പശ്ചിമഘട്ടത്തിന്റെ താഴ്‌വരയിലുള്ള 'മണിമംഗലം' തറവാട്ടിൽ ഒരു പെൺകുഞ്ഞ് പിറന്നു. തറവാട്ടിലെ നാഗക്കാവിൽ സർപ്പങ്ങൾ പത്തിവിടർത്തി ആടിയ ദിവസമായിരുന്നു അത്. അവൾക്ക് അവർ പദ്മ എന്ന് പേരിട്ടു…. പദ്മ വളർന്നത് നാഗങ്ങളുടെ സംരക്ഷണയിലായിരുന്നു. കാവിലെ സർപ്പങ്ങൾ അവൾക്ക് കൂട്ടുകാരെപ്പോലെയായിരുന്നു…. എന്നാൽ, തന്റെ ഉള്ളിൽ ഉറങ്ങിക്കിടക്കുന്ന നാഗമാണിക്യത്തെക്കുറിച്ചോ, താൻ നേരിട്ട ശാപത്തെക്കുറിച്ചോ അവൾ അറിഞ്ഞില്ല…. പക്ഷേ, പദ്മയുടെ കഴുത്തിന് താഴെ ഒരു നാഗത്തിന്റെ രൂപത്തിലുള്ള മറുക് (നാഗമുദ്ര) ഉണ്ടായിരുന്നു. മണിമംഗലം തറവാട്ടിലെ നാഗപൂജകൾ മുടങ്ങിയ കാലമായിരുന്നു അത്. ഐശ്വര്യം ക്ഷയിച്ചു തുടങ്ങിയ തറവാടിനെ രക്ഷിക്കാൻ, വേദപണ്ഡിതനും തപസ്വിയുമായ ആദിത്യൻ അവിടെയെത്തി…. ശാന്തമായ സ്വഭാവവും മഹാദേവനിൽ അടിയുറച്ച ഭക്തിയുമുള്ള യുവാവായിരുന്നു ആദിത്യൻ…. തറവാട്ടിലെത്തിയ ആദിത്യൻ ആദ്യമായി പദ്മയെ കണ്ടത് കാവിനുള്ളിൽ വെച്ചായിരുന്നു. കയ്യിലൊരു കുടന്ന തുളസിപ്പൂക്കളുമായി നിൽക്കുന്ന പദ്മയെ കണ്ടപ്പോൾ, തന്റെ ജന്മാന്തരങ്ങളായുള്ള ഏതോ പുണ്യമാണ് മുന്നിൽ നിൽക്കുന്നതെന്ന് ആദിത്യന് തോന്നി…. അവളുടെ കഴുത്തിലെ നാഗമുദ്ര കണ്ട ആദിത്യൻ ഞെട്ടിപ്പോയി. ആ മുദ്ര ഒരു സാധാരണ അടയാളമല്ലെന്നും, ഏതോ വലിയ ദൈവിക രഹസ്യത്തിന്റെ താക്കോലാണെന്നും അവൻ മനസ്സിലാക്കി… തുടരും... ✍️സന്തോഷ്‌ ശശി… #📙 നോവൽ #📔 കഥ #✍ തുടർക്കഥ #💞 പ്രണയകഥകൾ