#ದಿನಕ್ಕೊಂದು ಕಥೆ ***ದೇವರು ಎಲ್ಲ ಕಡೆ ಇದ್ದಾನೆಯೇ?*** ಮನೆಯ ಹಿರಿಯರು ಒಂದು ಸಂಜೆ ಪ್ರಾಂಗಣದಲ್ಲಿ ಕುಳಿತು ಆಧ್ಯಾತ್ಮಿಕ ಗ್ರಂಥ ಒಂದರ ಸ್ವಾಧ್ಯಾಯನ ಮಾಡುತ್ತಿದ್ದರು. ಮೊಮ್ಮಗ ಸನಿಹದ ತನ್ನ ಅಭ್ಯಾಸದ ಮೇಜಿನ ಮುಂದೆ ಕುಳಿತು ತನ್ನ ಶಾಲಾ ಹೋಂ ವರ್ಕ್ ಮಾಡಿಕೊಳ್ಳುತ್ತಿದ್ದನು. ಆತನ ತಾಯಿ ಕೈಲಿ ಪೂಜಾ ಸಾಮಗ್ರಿಯ ಬುಟ್ಟಿ ಹಿಡಿದು; ಮಾವ ದೇವಸ್ಥಾನಕ್ಕೆ ಹೋಗಿ ಬರುತ್ತೇನೆ ಹುಡುಗನ ಕಡೆ ಗಮನವಿರಲಿ. ನಾನು ಬರುವವರೆಗೆ ಆಟವಾಡಲು ಆಚೆ ಕಳಿಸಬೇಡಿ ಎಂದು ವಿನಂತಿಸಿ ಮುಂಬಾಗಿಲು ಹಾಕಿಕೊಂಡು ಹೊರ ಹೋದರು. ಕೆಲ ಸಮಯದ ಬಳಿಕ ಹೋಂ ವರ್ಕ್ ಮುಗಿಸಿದ ಬಾಲಕ ಹಿರಿಯರನ್ನು ಕುರಿತು, "ಅಜ್ಜಯ್ಯ, ದೇವರು ಎಲ್ಲಾ ಕಡೆಯೂ ಇದ್ದಾನೆ ಅಂತ ಹಲವಾರು ಸಂದರ್ಭಗಳಲ್ಲಿ ನನಗೆ ಪುರಾಣದ ಪುಣ್ಯ ಕಥೆಗಳನ್ನು ಹೇಳುವಾಗ ತಿಳಿಸಿದ್ದೀರಿ ಮತ್ತು ನಮ್ಮ ಮನೆಯಲ್ಲೂ ಪೂಜಾ ಗೃಹವಿದೆ ಮತ್ತು ಒಳಗೆ ದೇವರ ವಿಗ್ರಹ ಮತ್ತು ಫೋಟೋ ಸಹ ಇದ್ದರೂ ಅಮ್ಮ ಏತಕ್ಕಾಗಿ ಆಗಾಗ ದೇವಸ್ಥಾನಕ್ಕೆ ಹೋಗುತ್ತಾರೆ" ಎಂದು ಪ್ರಶ್ನಿಸಿದ. ಅಜ್ಜಯ್ಯ ಕ್ಷಣ ಕಾಲ ಆಲೋಚಿಸಿ; "ಮಗು ಗಾಳಿ ಎಲ್ಲಾ ಕಡೆಯೂ ಇದೆ ಅಲ್ಲವೇ? ಅದು ನಿನ್ನ ಅನುಭವಕ್ಕೂ ಬರುತ್ತದೆ ಅಲ್ಲವೇ" ಎಂದಾಗ ಬಾಲಕ ಹೌದು ಎಂದು ತಲೆಯಾಡಿಸಿದ. ಆದರೂ ನಿನ್ನ ಸೈಕಲ್ ಚಕ್ರದ ಟೈರಲ್ಲಿ ಗಾಳಿ ಕಡಿಮೆ ಏಕಾಗುತ್ತದೆ ಮತ್ತು ಗಾಳಿ ತಾನಾಗಿ ಏಕೆ ಖಾಲಿಯಾದ ಸ್ಥಳದಲ್ಲಿ ಹೋಗಿ ಸೇರುವುದಿಲ್ಲ ? ನೀನು ಗಾಳಿ ತುಂಬುವ ಪಂಪ್ ಅದರ ಮುಂದೆ ಇಟ್ಟರೆ ಗಾಳಿ ಟೈರ್ ಒಳಗೆ ಹೋಗುವುದೇ? ಪಂಪಲ್ಲಿಯೂ ಗಾಳಿ ಇರುವುದಿಲ್ಲ. ಹೊರಗಿರುವ ಗಾಳಿಯನ್ನು ಟೈರ್ ಒಳಗೆ ಸೇರಿಸುವ ನಿನ್ನ ಪ್ರಯತ್ನಕ್ಕೆ ಸಹಕರಿಸುವ ಸಾಧನವಷ್ಟೇ. ನಿನ್ನ ತಂದೆಯ ಕಾರ್ ಟೈರ್ ಪಂಕ್ಚರ್ ಆದರೆ ನಿನ್ನ ಸೈಕಲ್ ಪಂಪ್ ಕೆಲಸಕ್ಕೆ ಬಾರದು! ಅದಕ್ಕೆ ಪೆಟ್ರೋಲ್ ಬಂಕ್ ಅಥವಾ ಪಂಕ್ಚರ್ ಶಾಪಿನ ಯಾಂತ್ರಿಕ ಪಂಪ್ ಅವಶ್ಕಕತೆ ಬೇಕಾಗುತ್ತದೆ. ಗಾಳಿ ಎಲ್ಲಾ ಕಡೆ ಇದ್ದರೂ ಅವಶ್ಯಾನುಸಾರ ಗಾಳಿಯ ಪ್ರಯೋಜನ ಪಡೆಯಲು ವಿಧವಿಧವಾದ ಸಲಕರಣೆ ಹಾಗೂ ಅದನ್ನು ಉಪಯೋಗಿಸಲರಿತವರ ಸಹಕಾರ ಪಡೆಯಬೇಕಾಗುತ್ತದೆ. ಇದೇ ಪ್ರಕಾರ ಸರ್ವಾಂತರ್ಯಾಮಿಯಾದ ಭಗವಂತನೂ ಸಹ ನಮ್ಮ ದೇವರ ಮನೆಯಲ್ಲೂ ಇದ್ದಾನೆ ಮತ್ತು ದೇವಸ್ಥಾನದ ವಿಗ್ರಹದಲ್ಲಿಯೂ ಇದ್ದಾನೆ. ನಿನ್ನ ತಾಯಿ ನಿತ್ಯ ಪೂಜೆ ಮನೆಯಲ್ಲೇ ಮಾಡಿದರೂ, ಇಂದು ಶುಕ್ರವಾದುದರಿಂದ ಮಹಾಲಕ್ಷ್ಮಿ ಮಂದಿರಕ್ಕೆ ವಿಶೇಷ ಪೂಜೆಗೆಂದು ಹೋಗಿದ್ದಾರೆ. ಅಲ್ಲಿ ಅರ್ಚಕರು ದೇವರ ವಿಗ್ರಹಕ್ಕೆ ಅಭಿಷೇಕ ಅರ್ಚನೆ ಮಾಡಿ ತೀರ್ಥ ಪ್ರಸಾದ ನೀಡುತ್ತಾರೆ ಅದರಿಂದ ವಿಶೇಷ ಫಲ ಸಿಗುವುದೆಂದು ನಿನ್ನಮ್ಮನ ನಂಬಿಕೆ. ನೀನೂ ದೊಡ್ಢವನಾಗುತ್ತಾ ಆಗುತ್ತಾ ಮನವರಿಕೆ ಆಗುತ್ತದೆ. ನೋಡು ಗೇಟ್ ಶಬ್ಧವಾಗುತ್ತಿದೆ, ನಿನ್ನ ಹೋಂ ವರ್ಕ್ ಆಗಿದ್ದರೆ ಅಮ್ಮನ ಪರ್ಮಿಷನ್ ಪಡೆದು ಗೆಳೆಯರ ಜೊತೆ ಹುಷಾರಾಗಿ ಆಟವಾಡಿಕೋ ಎಂದು ತಲೆ ಸವರಿದರು! ▬▬ஜ۩۞۩ஜ▬▬▬*▬▬▬ஜ۩۞۩ஜ▬▬ !! ಸರ್ವಂ ಶ್ರೀ ಕೃಷ್ಣಾರ್ಪಣಮಸ್ತು !! 🙏 ಸರ್ವೇ ಜನಾಃ ಸುಖಿನೋ ಭವಂತುಸರ್ವೇ ಸಂತು ನಿರಾಮಯಾಃ 🙏 !! ಧರ್ಮೋ ರಕ್ಷತಿ ರಕ್ಷಿತಃ !! ▬▬▬ஜ۩۞۩ஜ▬▬▬▬▬▬ஜ۩۞۩ஜ▬▬▬ 🙏 ಹರಿ ಸರ್ವೋತ್ತಮ ವಾಯು ಜೀವೋತ್ತಮ 🙏