#😦 ആണുങ്ങൾ നഗ്നതാ പ്രദർശനം നടത്തി, ഒരാളെ തല്ലി': വെളിപ്പെടുത്തി പാർവതി തിരുവോത്ത് കുട്ടിക്കാലത്തും കൗമാരകാലത്തും തനിക്കുണ്ടായ ഞെട്ടിക്കുന്ന അനുഭവങ്ങൾ പങ്കുവച്ച് നടി പാർവതി തിരുവോത്ത്. റെയിൽവേ സ്റ്റേഷനിൽ മാതാപിതാക്കൾക്കൊപ്പം നിൽക്കുമ്പോൾ ഒരാൾ വന്ന് തന്റെ മാറത്ത് അടിച്ചിട്ട് ഓടിപ്പോയ അനുഭവമാണ് താരം വിവരിച്ചത്. വെറുമൊരു സ്പർശനമായിരുന്നില്ല, മറിച്ച് വേദനിപ്പിക്കുന്ന രീതിയിലുള്ള മർദ്ദനമായിരുന്നു അതെന്നും അന്നരു കുട്ടിയായിരുന്ന തനിക്കത് വലിയ മാനസിക വിഷമമുണ്ടാക്കിയെന്നും പാർവതി പറയുന്നു. വഴിയിലൂടെ നടക്കുമ്പോൾ പുരുഷന്മാരുടെ കൈകളിലേക്ക് ശ്രദ്ധിക്കണമെന്ന് തന്റെ അമ്മ പറഞ്ഞുതരുമായിരുന്നുവെന്ന് ഹൗട്ടർഫ്ലൈക്ക് നൽകിയ അഭിമുഖത്തിൽ പാർവതി പറയുന്നു. പൊതുസ്ഥലങ്ങളിൽ വച്ച് പുരുഷന്മാർ നഗ്നതാപ്രദർശനം നടത്തിയ നിരവധി അനുഭവങ്ങളും പാർവതി പങ്കുവച്ചു. പാർവതിയുടെ തുറന്നുപറച്ചിലിനെ പിന്തുണച്ചുകൊണ്ട് നിരവധി സ്ത്രീകളാണ് സോഷ്യൽ മീഡിയയിൽ തങ്ങൾക്കുണ്ടായ സമാന അനുഭവങ്ങൾ പങ്കുവച്ചുകൊണ്ട് രംഗത്തെത്തുന്നത്.‘‘ലൈംഗികതയെക്കുറിച്ചുള്ള എന്റെ ആദ്യത്തെ ധാരണ 'ടൈറ്റാനിക്' സിനിമയിൽ നിന്നായിരുന്നു. ആ ഉമ്മ വയ്ക്കുന്ന രംഗം. നമ്മളിൽ പലർക്കും അങ്ങനെ തന്നെയാകുമല്ലേ? എനിക്ക് ജാക്കിനോടും റോസിനോടും ഒപ്പമുള്ള ഒരു പർപ്പിൾ നിറത്തിലുള്ള ടൈറ്റാനിക് ടീഷർട്ട് ഉണ്ടായിരുന്നു. എനിക്ക് ജാക്കിനോട് വലിയ ഇഷ്ടമായിരുന്നു. അന്ന് 'കിസ്' എന്നാൽ എന്താണെന്ന് പോലും എനിക്കറിയില്ലായിരുന്നു. ഉറങ്ങാൻ പോകുന്നതിന് മുമ്പ് ഞാൻ ആ ടീഷർട്ടിൽ ഉമ്മ വയ്ക്കുമായിരുന്നു. പിന്നീട് എന്റെ കസിൻ സിസ്റ്റേഴ്സിനെയും കൂട്ടി ഇരുന്ന് സിനിമകാണുമ്പോൾ ഞാൻ പറയുമായിരുന്നു, 'ദാ ഇപ്പോൾ ആ സീൻ വരും, ഇപ്പോൾ വരും' എന്ന്. ഞാൻ തിരിഞ്ഞു നോക്കുമ്പോൾ എന്റെ അമ്മായിമാരൊക്കെ എന്നെ നോക്കി നിൽക്കുന്നുണ്ടാകും.പിന്നീട് എവിടെ നിന്നാണ് ഇതിനെക്കുറിച്ച് മനസ്സിലാക്കിയത് എന്ന് ചോദിച്ചാൽ, സത്യം പറഞ്ഞാൽ വളരെ മോശം അനുഭവങ്ങളിൽ നിന്നാണ്. സ്വന്തം അനുഭവങ്ങളിൽ നിന്ന് തന്നെയാണ് പഠിച്ചത്, പക്ഷേ അതിൽ ഒട്ടുമിക്കതും മോശം അനുഭവങ്ങളായിരുന്നു. നിർഭാഗ്യവശാൽ, എല്ലാ പെൺകുട്ടികളുടെ കാര്യത്തിലും സംഭവിക്കുന്ന ഒരു പൊതുവായ കാര്യമുണ്ട്; നമ്മൾ ജനിക്കുന്നു, വളരുന്നു, പിന്നെ നമ്മൾ ഉപദ്രവിക്കപ്പെടുന്നു. എല്ലാ പെൺകുട്ടികൾക്കും ഇത്തരം അനുഭവങ്ങൾ ഉണ്ടോ എന്ന് ചോദിച്ചാൽ, അതെ എന്നാണ് മറുപടി. ഓട്ടോയിൽ കയറുമ്പോൾ നുള്ളുക അത്തരത്തിലുള്ള അനുഭവങ്ങൾ. ഒരിക്കൽ റെയില്‍വേ സ്റ്റേഷനില്‍ വച്ച് ഒരു സംഭവമുണ്ടായി. അച്ഛനും അമ്മയ്ക്കുമൊപ്പമാണ് ഞാന്‍ നിന്നത്. ആരോ വന്ന് മാറില്‍ അടിച്ചിട്ട് പോയി, തൊടുക പോലുമായിരുന്നില്ല, അടിക്കുകയായിരുന്നു. അന്ന് ഞാന്‍ ഒരു കുട്ടിയാണ്. നല്ല വിഷമമായിരുന്നു. വഴിയിലൂടെ നടക്കുമ്പോള്‍ എന്തൊക്കെ ശ്രദ്ധിക്കണമെന്ന് അമ്മ പറഞ്ഞുതരുമായിരുന്നു, പുരുഷന്മാരുടെ കയ്യിലേക്ക് നോക്കി നടക്കണമെന്നായിരുന്നു അമ്മ പറഞ്ഞിരുന്നത്. ഒരു അമ്മ തന്‍റെ പെണ്‍കുട്ടിയെ ഇങ്ങനെ പറഞ്ഞുപഠിപ്പിക്കേണ്ട ഒരു സാഹചര്യം ഓര്‍ത്തുനോക്കൂ. അതുമാത്രമല്ല, കുട്ടിക്കാലത്ത് എത്രയോ തവണ പുറകിലേക്ക് തിരിഞ്ഞു നോക്കുമ്പോൾ കണ്ടിട്ടുണ്ട്, ചില പുരുഷന്മാർ മുണ്ട് പൊക്കി അവരുടെ സ്വകാര്യ ഭാഗങ്ങൾ പ്രദർശിപ്പിച്ചു കൊണ്ട് നടന്നു വരുന്നത്. അന്ന് എന്താണ് സംഭവിക്കുന്നതെന്നോ എന്താണ് അവർ ചെയ്യുന്നതെന്നോ എനിക്ക് ഒരു ധാരണയുമില്ലായിരുന്നു. 16, 17 അല്ലെങ്കിൽ 19 വയസ്സൊക്കെ ആകുമ്പോഴാണ് നമ്മൾ പഴയ കാര്യങ്ങളിലേക്ക് തിരിഞ്ഞു നോക്കുന്നത്; അപ്പോഴാണ് ഇങ്ങനെയുള്ള അനുഭവങ്ങൾ നമ്മുടെ ശരീരത്തെയും മനസ്സിനെയും എത്രത്തോളം ആഴത്തിൽ ബാധിച്ചിട്ടുണ്ടെന്ന് നമ്മൾ തിരിച്ചറിയുന്നത്.എന്റെ വീട്ടുകാരല്ലാത്ത ഒരാളിൽ നിന്നുള്ള ശാരീരിക സ്പർശനങ്ങൾ അതിക്രമങ്ങൾ ആയിരുന്നു. എനിക്ക് 17 വയസ്സുള്ളപ്പോഴായിരുന്നു അത്. അത് എനിക്ക് അറിയാവുന്ന ഒരാളിൽ നിന്ന് തന്നെയായിരുന്നു. സ്കൂളിൽ പഠിക്കുമ്പോൾ നമുക്ക് ആരോടെങ്കിലും ക്രഷ് തോന്നും, ആ വ്യക്തി നമ്മളെ ഒരു സ്വകാര്യ ഇടത്തിൽ വച്ച് ഉപദ്രവിക്കുന്നു. നമ്മൾ അവരെ സ്നേഹിക്കുന്നുണ്ടെങ്കിൽ അത് അനുവദിച്ചു കൊടുക്കണം എന്ന രീതിയിൽ അവർ അതിനെ സാധാരണവൽക്കരിക്കുകയും ചെയ്യുന്നു. ഈ പറഞ്ഞ ആൾ എനിക്ക് ക്രഷ് ഉണ്ടായിരുന്ന ആളായിരുന്നു. അയാൾക്ക് കൺസെന്റ് എന്താണെന്ന് അറിയില്ല.എന്റെ ജീവിതത്തിൽ നടന്ന ഈ കാര്യങ്ങൾ തിരിച്ചറിയാനും അത് ഉൾക്കൊള്ളാനും എനിക്ക് മുപ്പത് വർഷങ്ങൾ വേണ്ടിവന്നു. ഇതിൽ ലജ്ജിക്കേണ്ടത് ഞാനല്ല. എനിക്ക് 19-20 വയസ്സുള്ളപ്പോൾ നടന്ന മറ്റൊരു കാര്യമുണ്ട്. ഞാൻ ഒരു ലിഫ്റ്റിലായിരുന്നു. എന്റെ പിന്നിൽ നിന്ന ഒരാൾ എന്നിലേക്ക് ചേർന്നുനിൽക്കാൻ ശ്രമിക്കുന്നുണ്ടായിരുന്നു. അയാളുടെ സ്പർശനം എനിക്ക് ഫീൽ ചെയ്യുന്നുണ്ടായിരുന്നു. ലിഫ്റ്റിൽ നിന്ന് പുറത്തിറങ്ങിയ ഉടനെ ഞാൻ അയാളുടെ കരണത്തടിച്ചു. ‘നിങ്ങൾ എന്താണ് ഈ ചെയ്തത്?' എന്ന് ഞാൻ ചോദിച്ചു. സെക്യൂരിറ്റി വന്നു, പക്ഷേ ആ മാളിൽ സിസിടിവി ഉണ്ടായിരുന്നില്ല. പൊലീസിനെ വിളിച്ചു. പക്ഷേ പൊലീസുകാർ പോലും പറഞ്ഞത്, 'നീ ഒരു തല്ല് കൊടുത്തല്ലോ, ഇനി ഇത് വിട്ടേക്ക്' എന്നാണ്.അപ്പോഴാണ് ഈ നാട്ടിലെ നീതി എന്നാൽ എന്താണെന്ന് എനിക്ക് മനസ്സിലായത്. ഒടുവിൽ അയാൾ എന്റെ കാലിൽ വീണു പറഞ്ഞു, ‘എനിക്ക് ഇപ്പോൾ ഗൾഫിൽ ജോലി കിട്ടിയതാണ്, എന്റെ കല്യാണം നടക്കാൻ പോവുകയാണ്’ എന്നൊക്കെ. ഒരു ലിഫ്റ്റിൽ പോലും സ്വന്തം കാമത്തെ നിയന്ത്രിക്കാൻ കഴിയാത്ത ആളാണ് ഈ പറയുന്നത്! ഞാൻ അയാളെ തല്ലിയപ്പോൾ എല്ലാവരും എന്നെ അഭിനന്ദിച്ചു. പക്ഷേ എനിക്കതൊരു വലിയ നേട്ടമായി തോന്നിയില്ല. സ്വയം സംരക്ഷിക്കേണ്ടി വരുന്നത് ഒരു വലിയ കാര്യമല്ല. സ്വന്തം സുരക്ഷയ്ക്കായി പോരാടേണ്ടി വരുമ്പോൾ ആരും എന്റെ തോളിൽ തട്ടി 'നീ കരുത്തയാണ്' എന്ന് പറയേണ്ടതില്ല. അതൊരു നല്ല അവസ്ഥയല്ല. പുരുഷന്മാരേ, നിങ്ങൾ ഒന്ന് കേൾക്കൂ.തോളും വിരിച്ച് ആത്മവിശ്വാസത്തോടെ നടക്കാൻ കഴിയുന്ന നിങ്ങൾക്ക് പെൺകുട്ടികളുടെ അവസ്ഥ മനസ്സിലാകില്ല.പുരുഷന്മാർ എപ്പോഴും തോളും വിരിച്ച് ആത്മവിശ്വാസത്തോടെയാണ് നടക്കുന്നത്. പക്ഷേ സ്ത്രീകൾ അങ്ങനെയല്ല, ഞങ്ങൾ എപ്പോഴും ഒതുങ്ങിക്കൂടിയാണ് ഇരിക്കുന്നത്. പൊതുസ്ഥലങ്ങളിൽ നിൽക്കുമ്പോഴോ കുനിയുമ്പോഴോ ഒക്കെ സ്വന്തം വസ്ത്രവും ശരീരവും ശ്രദ്ധിച്ചുകൊണ്ടിരിക്കേണ്ട അവസ്ഥയാണ് സ്ത്രീകൾക്കുള്ളത്. പുരുഷന്മാർക്ക് തങ്ങളുടെ മാറിലെ രോമങ്ങൾ പുറത്തു കാണുന്നതിനെക്കുറിച്ച് ആകുലപ്പെടേണ്ടി വരാറില്ല, എന്നാൽ സ്ത്രീകൾ നടക്കുമ്പോൾ പോലും ശരീരഭാഗങ്ങൾ ശ്രദ്ധിക്കപ്പെടാതിരിക്കാൻ വസ്ത്രങ്ങൾ വലിച്ചു നേരെയാക്കിക്കൊണ്ടിരിക്കും. സ്വന്തം ശരീരത്തെക്കുറിച്ചുള്ള തിരിച്ചറിവ് കഴിഞ്ഞാൽ ഏറ്റവും പ്രധാനപ്പെട്ട കാര്യം തെറാപ്പിയാണ്. ദൈവത്തിന് നന്ദി, തെറാപ്പി എന്റെ ജീവിതത്തിൽ വലിയ മാറ്റങ്ങൾ വരുത്തി. എനിക്ക് തെറാപ്പിയോട് വലിയ ഇഷ്ടമാണ്. പക്ഷേ, ഇപ്പോഴുള്ള എന്റെ തെറാപ്പിസ്റ്റിനെ കണ്ടെത്തുന്നതിന് മുമ്പ് എനിക്ക് ഒരുപാട് മോശം അനുഭവങ്ങൾ ഉണ്ടായിട്ടുണ്ട്. മികച്ച ഒരു തെറാപ്പിസ്റ്റിനെ കണ്ടെത്തുക എന്നത് അത്ര എളുപ്പമുള്ള കാര്യമല്ല.’’– പാര്‍വതി തിരുവോത്ത് പറയുന്നു.പൃഥ്വിരാജ് അഭിനയിക്കുന്ന പുതിയ സിനിമയായ ‘നോബഡി’യിൽ പാർവതി തിരുവോത്ത് ആണ് നായിക. ‘റോഷാക്കി’നു ശേഷം നിസാം ബഷീർ സംവിധാനം ചെയ്യുന്ന ചിത്രമാണ് നോബഡി. അടുത്തിടെ സിനിമയിൽ സജീവമായ പാർവതിയുടെ വരാനിരിക്കുന്ന ചിത്രങ്ങൾക്കും വലിയ പ്രതീക്ഷയാണുള്ളത്. ഡോൺ പാലത്തറ രചനയും സംവിധാനവും നിർവഹിക്കുന്ന പുതിയ ചിത്രത്തിൽ പാർവതിയാണ് നായിക. ദിലീഷ് പോത്തനും ഈ ചിത്രത്തിൽ പ്രധാന വേഷത്തിലെത്തുന്നുണ്ട്. കൂടാതെ ബോളിവുഡ് താരം ഹൃത്വിക് റോഷൻ നിർമിക്കുന്ന പുതിയ വെബ് സീരീസിലും പാർവതി ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്.