ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/6aNMyJO6?d=n&ui=v64j8rk&e1=cശിക്ഷാർഹം - പാർട്ട് 21 ഡെയ്സിയുടെ വീട്ടിൽ നിന്നിറങ്ങിയ ആൽബി നേരേ സ്റ്റേഷനിലേക്കാണ്‌ പോയത്. യാത്രയ്ക്കിടയിൽ തന്നെ, ഇനിയങ്ങോട്ട് ചെയ്യേണ്ട കാര്യങ്ങളെപ്പറ്റി ഒരു ഏകദേശ ധാരണ ഉണ്ടാക്കിയെടുത്തിരുന്നു അയാൾ. സ്റ്റേഷനിലെത്തി ഓഫീസിലേക്ക് കയറിയതും, തന്റെ കസേരയിലിരിക്കുന്ന ആളെക്കണ്ട് ആൽബി ഒന്നു നടുങ്ങി. ഡി വൈ എസ് പി ജെയിംസ് ജോസഫ്! “ഇരിക്കഡോ.” ഡി വൈ എസ് പി മുൻപിലെ കസേര ചൂണ്ടി. “സർ എന്താ പെട്ടെന്ന് ? ” ആൽബിയുടെ സ്വരത്തിൽ അമ്പരപ്പുണ്ടായിരുന്നു. ആദ്യമായാണെന്നു തോന്നുന്നു ഡി വൈ എസ് പി തന്റെ ഓഫീസിനുള്ളിൽ. “ആൽബി... ” അദ്ദേഹം സംസാരിച്ചു തുടങ്ങി. “എനിക്ക് ചില കാര്യങ്ങളിൽ ക്ലാരിറ്റി കിട്ടണം. അതാണ്‌ നേരിട്ടു വന്നത്. ഇവിടെ നടക്കുന്ന പല കാര്യങ്ങളും താനെനിക്ക് റിപ്പോർട്ട് ചെയ്യാറില്ല എന്നൊരു തോന്നൽ.” “അതെന്തു പറ്റി സർ ? ” “ആദ്യം തന്റെ സുഹൃത്ത് അഡ്വക്കേറ്റ് ജയകുമാർ, പിന്നെ അതിനെ ഫോളോ ചെയ്ത് ആ ഡ്രൈവർ...ഇതിന്റെ എല്ലാം പുറകേ ഒരു ക്രൈം ബ്രാഞ്ച് ഉദ്യോഗസ്ഥൻ. ഒന്നിനും ഒരു തീരുമാനം കാണുന്നില്ല. സോ, എനിക്കൊരു അപ്ഡേറ്റ് കിട്ടണം ആൽബർട്ട്. ഇതുവരെ ഈ കേസുകൾ മുകളിലാരും ശ്രദ്ധിച്ച മട്ടില്ല. പക്ഷേ ഇനിയും വൈകിയാൽ പ്രഷർ വന്നു തുടങ്ങും. മനസ്സിലാകുന്നുണ്ടോ ? ” “യെസ് സർ! ” “സോ... പറഞ്ഞോളൂ.” “ജയന്റെ മരണം...” ആൽബി കസേരയിൽ ഇരുന്നുകൊണ്ട് തുടർന്നു. “വളരെ ബുദ്ധിപരമായി പ്ലാൻ ചെയ്ത ഒരു കൊലപാതകമായിരുന്നു അതെന്ന് തുടക്കത്തിലേ തന്നെ നമുക്ക് മനസ്സിലായതാണ്‌. ഞാൻ സാറിന്‌ ഡീറ്റയിൽസ് തന്നിരുന്നു.“ ”അതല്ല വിഷയം ആൽബി. കേസിന്റെ പ്രോഗ്രസാണെനിക്കറിയേണ്ടത്.“ ”ഇന്നലെ പ്ലാൻ ചെയ്തതനുസരിച്ച് നമ്മൾ ആ ഫെലിക്സുമായി മാർക്കറ്റിൽ പോയിരുന്നു. അവിടെ ഫെലിക്സ് പറഞ്ഞയാളെ കിട്ടിയില്ല പക്ഷേ തൊട്ടടുത്ത ഷോപ്പിലെ രണ്ടു പേരെ നമ്മൾ പൊക്കി. വളരെ സംശയകരമായ പെരുമാറ്റം. അക്കൗണ്ടബിൾ അല്ലാത്ത ഒരു 20 ലാക്ക്സ് ലിക്വിഡ് മണിയും കിട്ടി അവിടെ നിന്ന്.“ ”ഇന്ററസ്റ്റിങ്ങ്...“ ”ഇനി എന്റെ പ്ലാൻ, അവന്മാരെ ടെയിൽ ചെയ്യുക എന്നുള്ളതാണ്‌. അവരെ ഹോൾഡ് ചെയ്യാനോ ചോദ്യം ചെയ്യാനോ ഒന്നും നമുക്കു പറ്റിയില്ല. ഇന്നലെ വൈകിട്ടു തന്നെ വക്കീലെത്തി ഇറക്കിക്കൊണ്ടു പോയി. പക്ഷേ, മാർക്കറ്റിലെ ആ ഷോപ്പിങ്ങ് സെന്റർ... അതിന്റെ ഏറ്റവും പുറകിലുള്ള രണ്ടു മൂന്നു ഷോപ്പുകൾ പ്രശ്നമാണ്‌. അതൊന്ന് ശ്രദ്ധിക്കാനായിട്ടാണ്‌ നമ്മൾ പ്ലാൻ ചെയ്യുന്നത്. അതിനു വേണ്ടി ഷാഡോ പോലീസുമായി സംസാരിക്കണം.“ ”ഗുഡ്! അങ്ങനെ പോകട്ടെ തല്ക്കാലം. പക്ഷേ നമുക്ക് മാക്സിമം 2 ദിവസത്തിനുള്ളിൽ പ്രോഗ്രസ്സ് കാണണം.“ ”ശ്രമിക്കാം സർ! “ ”ധിലീഷ് പോത്തൻ ഈ കേസിലൊക്കെ സജീവമായി ഇടപെടുന്നുണ്ടല്ലേ ? “ ”യെസ് സർ! ആളിപ്പൊ ഹോസ്പിറ്റലിലാണ്‌. പക്ഷേ അങ്ങേർക്കിതിലെന്തോ പേഴ്സണൽ താല്പ്പര്യമുണ്ടെന്ന് എനിക്ക് മുൻപേ സംശയമുണ്ട്.“ “ഓക്കെ. ഇനി ഞാൻ പറയാൻ പോകുന്നത് ചിലപ്പൊ ആൽബിക്കിഷ്ടപ്പെടില്ല. പക്ഷേ, താൻ എനിക്കു വേണ്ടി ഇതു ചെയ്തേ പറ്റൂ.” ഡി വൈ എസ് പി ഒന്നിളകിയിരുന്നു. “താൻ മിസ്റ്റർ പോത്തനുമായി സംസാരിക്കണം. എന്താണ്‌ അയാളുടെ ഈ സ്പെഷ്യൽ ഇന്ററസ്റ്റ് എന്നു കണ്ടു പിടിക്കണം.” ആൽബി സംശയത്തോടെ മുഖമുയർത്തി. “രണ്ടു കാര്യങ്ങളുണ്ട്. ഒന്നാമത്തേത്, അയാൾ അന്വേഷിക്കുന്ന ഒരു കേസ് ഈ സംഭവങ്ങളുമായി കണക്റ്റഡായിരിക്കണം. അപ്പൊ ഞാൻ ചിന്തിക്കുന്നത്, നമുക്ക് തെളിയിക്കാൻ പറ്റാത്തതു കൊണ്ടായിരിക്കുമല്ലോ, ആ കേസ് ക്രൈം ബ്രാഞ്ചിനെ ഏല്പ്പിച്ചിട്ടുണ്ടാകുക. ആ ചീത്തപ്പേരു മാറ്റാനൊരു അവസരമാണിത്. അയാൾ വഴി നമുക്ക് ഈ ചെയിൻ ഓഫ് ക്രൈംസ് കണ്ടു പിടിക്കാനാകും. താൻ സ്മാർട്ടായിട്ട് നീങ്ങിയാൽ. രണ്ടാമത്തേത്, എനിക്ക് ഒരു ക്രൈം ബ്രാഞ്ച് ഉദ്യോഗസ്ഥൻ നമ്മുടെ ഓഫീസിൽ നിരങ്ങി ഇവിടത്തെ സൗകര്യങ്ങളും, എന്റെ ഒരു സർക്കിൾ ഇൻസ്പെക്ടറെയും യൂസ് ചെയ്ത് മിടുക്കനാകാൻ നോക്കുന്നത് അത്ര സന്തോഷമായിട്ട് തോന്നുന്നില്ല. ഇതോടെ പോത്തൻ എന്നവന്റെ ഈ സൂക്കേട് നമുക്കവസാനിപ്പിക്കണം. മാനിപ്പുലേഷൻ എന്ന വാക്ക് കണ്ടു പിടിച്ചതു തന്നെ അയാളാണ്‌.” “സർ! ” ഡി വൈ എസ് പി എഴുന്നേറ്റു.“അയാൾക്ക് യാതൊരു സംശയവും തോന്നരുത്. മനസ്സിലായോ ? ” “തീർച്ചയായും സർ.” ആൽബിയുടെ സ്വരം നന്നേ നേർത്തിരുന്നു. അദ്ദേഹം മുറി വിട്ടതും, പുറത്തു കാത്തു നിന്നിരുന്ന എസ്. ഐ. ശിവകുമാർ തിടുക്കത്തിൽ അകത്തേക്കു കയറി വന്നു. “ആ കാറിന്റെ മൂന്ന് വീഡിയോസ് കിട്ടിയിട്ടുണ്ട് സർ.” അയാൾ കയ്യിലിരുന്ന ലാപ്ടോപ്പ് മേശപ്പുറത്തു വെച്ചു തുറന്നുകൊണ്ടു പറഞ്ഞു. “മൂന്നിലും നമ്പർ വ്യക്തമല്ല. പക്ഷേ ആ കാറിന്റെ മെയ്ക്ക് ആൻഡ് മോഡൽ മനസിലാകുന്നുണ്ട്. മെഴ്സിഡസ് ബെൻസ് GLC ആണ്‌ വണ്ടി. വൈറ്റ് കളർ. മുൻപിലെ ഗ്രില്ലും, നമുക്ക് സൈറ്റിൽ നിന്നു കിട്ടിയതുമായി നല്ല സാമ്യമുണ്ട്. ഇന്നലെ രാത്രി ഇത്തരം ആകെ ഒരു കാറേ ആ വഴിയിൽ തിരിഞ്ഞിട്ടുള്ളൂ.” “ഗ്രെയ്റ്റ് വർക്ക് ശിവാ! ” ആൽബി സ്ക്രീനിൽ തെളിഞ്ഞ വീഡിയോയിലേക്ക് ശ്രദ്ധ കേന്ദ്രീകരിച്ചു. ആദ്യത്തേത്, ഒരു റെസ്റ്റോറന്റിന്റെ മുൻപിൽ സ്ഥാപിച്ചിരുന്ന ക്യാമറയാണ്‌. അതി വേഗത്തിൽ കടന്നുപോയ ആ കാർ ഒട്ടും വ്യക്തമായിരുന്നില്ല. ശിവകുമാർ ചൂണ്ടിക്കാണിച്ചപ്പോഴാണ്‌ അങ്ങനെ ഒരു കാർ തന്നെ വീഡിയോയിലുണ്ടെന്ന് ആൽബിക്ക് മനസ്സിലായത്. രണ്ടാമത്തെ വീഡിയോയിൽ, സർവ്വീസ് റോഡിലേക്ക് തിരിയുന്ന ഒരു വെളുത്ത കാർ കാണാമായിരുന്നു. പക്ഷേ നമ്പർ പ്ലേറ്റിന്റെ ഭാഗം വല്ലാതെ ബ്രൈറ്റായിപ്പോയതിനാൽ ഒന്നും വ്യക്തമായിരുന്നില്ല. പക്ഷേ ആ കാർ വ്യക്തമായി മനസ്സിലാക്കാനാകുമായിരുന്നു. ഡ്രൈവർ അല്ലാതെ മറ്റാരും കാറിലില്ലെന്നും വ്യക്തമാണ്‌. മൂന്നാമത്തെ വീഡിയോയിലായിരുന്നു ഏറ്റവും നിർണ്ണായകമായ ഒരു സൂചന ഒളിഞ്ഞിരുന്നത്. കാറിന്റെ പിൻ ഭാഗത്തു നിന്നുള്ള ദൃശ്യമാണ്‌. നമ്പർ പ്ലേറ്റ് വ്യക്തമല്ല. ബ്രൈറ്റ് ആയിപ്പോയിരിക്കുന്നു. പക്ഷേ... പുറകിലെ ഗ്ലാസ്സിൽ ഒട്ടിച്ചിരുന്ന ഇളം നീല നിറത്തിലുള്ള സ്റ്റിക്കർ അവരുടെ ശ്രദ്ധയാകർഷിച്ചു. “അതൊരു ലോഗോ അല്ലേ ? ” ശിവകുമാർ സ്ക്രീനിലേക്ക് ചൂണ്ടി. “ലോഗോ... അല്ലെങ്കിൽ ‘ഡി’ എന്ന അക്ഷരം അൽപ്പം ഫാൻസി ആയിട്ടെഴുതിയിരിക്കുകയാണ്‌.” ആൽബി ആത്മഗതം പോലെ പറഞ്ഞു. “ഫോറൻസിക്ക്കാര്‌ ഈ വീഡിയോ നോക്കിയിരുന്നോ ശിവാ ? ” “ഇല്ല സർ. ദാ, ഇപ്പൊ കോപ്പി ചെയ്ത് കട്ട് ചെയ്ത് കൊണ്ടു വരുന്ന വഴിയാണ്‌. ഞാനല്ലാതെ സർ ആണ്‌ ഇപ്പൊ ഇത് കാണുന്നത്. വേറേ ആരെയും കാണിച്ചിട്ടില്ല.” “നല്ല പരിചയമുള്ള ലോഗോ.” ആൽബി ഗാഢമായ ആലോചനയിലാണ്‌. “എനിക്കും തോന്നുന്നു സർ.” ശിവകുമാർ സ്ക്രീനിലൂടെ വിരലോടിച്ചു. “ഈയടുത്ത് ഞാനിതെവിടെയോ കണ്ടിട്ടുണ്ട്.” ആൽബി ശിവനെ ശ്രദ്ധിക്കുന്നുണ്ടായിരുന്നു. അതീവ ബുദ്ധിമാനാണയാൾ. ഡെയ്സി എന്ന പേര്‌ ചിത്രത്തിൽ വരാൻ ഇനി അധികം താമസമില്ല എന്നയാൾക്ക് മനസ്സിലായി. എങ്കിലും ആൽബി വാ തുറന്നില്ല. അധികം വൈകിയില്ല. ശിവകുമാറിന്റെ മുഖത്ത് ഒരു പുഞ്ചിരി വിരിഞ്ഞു.അയാൾ ഫോണെടുത്ത് ഗൂഗിളിൽ എന്തോ ടൈപ്പ് ചെയ്യുന്നത് കണ്ടു. “ഇതുകണ്ടോ സർ ? ” “യെസ്! ! ” ആൽബി ആവേശമഭിനയിച്ചുകൊണ്ട് ശിവന്റെ തോളിൽ തട്ടി. “ഇതു തന്നെ. ഡെയ്സീസ് ഗ്രൂപ്പ് ഓഫ് കമ്പനീസ്! അവരുടെ ലോഗോ ആണിത്. ഞാനിതെവിടെയാണ്‌ കണ്ടതെന്ന് ഓർത്തെടുക്കാൻ നോക്കുവാരുന്നു.”. “ആർ ടീ ഓ സൈറ്റിൽ പോയാൽ, ഇവരുടെ എല്ലാ വാഹനങ്ങളുടേയും ലിസ്റ്റ് കിട്ടും സർ! നല്ലൊരു ബ്രെയ്ക്കായി ഇത്! ” ശിവകുമാർ ആവേശഭരിതനായി. “ഞാനും ഇപ്പൊ അതു തന്നെ ചിന്തിച്ചതേയുള്ളൂ. ആൽബി എഴുന്നേറ്റ് തന്റെ സീറ്റിൽ ചെന്നിരുന്ന് കമ്പ്യൂട്ടർ ഓണാക്കി. തുടർന്ന് അയാൾ ആർ ടീ ഓ വെബ് സൈറ്റിൽ പോയി ഡെയ്സി ഗ്രൂപ്പിന്റെ പേരിൽ രെജിസ്റ്റർ ചെയ്തിട്ടുള്ള എല്ലാ വാഹനങ്ങളുടേയും ഡീറ്റയിൽ എടുത്തു. ഒപ്പം ഡെയ്സി സെബാസ്റ്റ്യൻ എന്ന പേരിലുള്ള വാഹനങ്ങളും. പക്ഷേ വൈറ്റ് കളറിലുള്ള മെഴ്സിഡസ് വാഹനങ്ങളൊന്നും തന്നെ ആ ലിസ്റ്റിൽ കണ്ടില്ല. ആൽബി അസ്വസ്ഥതയോടെ നെറ്റിയിൽ ചൊറിഞ്ഞു. “സർ! ” വാതില്ക്കൽ മാണി പ്രത്യക്ഷപ്പെട്ടു. “ആ ക്രൈംബ്രാഞ്ചിൽത്തെ ഫോറൻസിക്കു പയ്യൻ വന്നിട്ടുണ്ട്. രൂപേഷ് രവീന്ദ്രൻ. സാറിനെ കാണണോന്ന് പറയുന്നു.” “തല്ക്കാലം ക്രൈം ബ്രാഞ്ചിന്റെ ആവശ്യം ഇവിടില്ല. ആവശ്യം വരുമ്പൊ അറിയിക്കാന്ന് പറഞ്ഞേരെ.” ആൽബിക്കതത്ര സുഖിച്ചില്ല. “അയാളു സാറിനെ കണ്ടിട്ടേ പോകൂ. ഒരു പ്രത്യേക സ്വഭാവമാണ്‌. പോത്തൻ സാറു പറഞ്ഞിട്ടു വന്നതാന്ന് പറയുന്നു.” “പിന്നെ! പോത്തൻ സാറു പറഞ്ഞാ പിന്നെ അതിന്‌ മറുവാക്കില്ലല്ലോ. എറക്കി വിടഡോ. അല്ലാതെ തന്നെ മനുഷ്യനിവിടെ പ്രാന്തു പിടിച്ചു നിക്കുവാ.” “ഓക്കെ സർ! ” മാണി പിൻവാങ്ങി. “ആ ചെറുക്കൻ നല്ല സ്മാർട്ടാണ്‌ കേട്ടോ.” ശിവൻ ആൽബിയെ നോക്കി ഓർമ്മിപ്പിക്കും പോലെ പറഞ്ഞു. “എല്ലാരും സ്മാർട്ടാഡോ. സ്മാർട്ടായവന്മാരെ തടഞ്ഞിട്ട് നടക്കാന്മേല! താൻ തല്ക്കാലം ഇതിനെന്താ ഒരു മാർഗ്ഗമെന്നാലോചിക്ക്. അവൾടെ പേരിൽ ഇങ്ങനൊരു വണ്ടിയില്ല.” “ആ ലോഗോ ഒരു ക്ലൂ ആണല്ലോ. നമുക്ക് നേരെ അങ്ങു ചെന്ന് ഈ ഡെയ്സിയെ കൺഫ്രണ്ട് ചെയ്താലോ ? ” “എന്നിട്ടോ ? അവൾടെ പേരിൽ ഇങ്ങനൊരു വണ്ടിയില്ല ശിവാ. ലോഗോ എങ്ങനാഡോ ക്ലൂ ആകുന്നത് ? നമുക്ക് ഇങ്ങനെ പറയുമ്പൊ പറയാമെന്നല്ലാതെ... തെളിവാകുന്നതെങ്ങനാ ? ” ശിവൻ ആലോചനയിലായി. “ആ റെസിഡൻഷ്യൽ ഏരിയായിൽ വൈറ്റ് ബെൻസ് ഉള്ളവരെയൊക്കെ ഒന്നു തപ്പി നമുക്ക്...” “അപ്പോഴും ഈ ലോഗോ അല്ലാതെ നമുക്ക് വേറേ ഒരു പോയിന്റ് ഇതിനകത്തു പറയാനില്ല. ലോഗോ ഉണ്ടെന്നുള്ള ഒറ്റക്കാരണം കൊണ്ടാണല്ലോ നമ്മൾ ഇപ്പൊ ഡെയ്സിയിൽ എത്തിയത്.” “ഓക്കെ സർ. മറ്റൊരു ഐഡിയ. ഈ കാർ ഡെയ്സിയുടെ വീട്ടിലേക്കു കയറിപ്പോകുന്നതായി തെളിയിക്കാൻ പറ്റിയാൽ ? ” “ഉം. അതൊരു പോയിന്റാണ്‌. അവളുടെ വീടിന്റെ ഗേറ്റിൽ സെക്യൂരിറ്റി ക്യാമറകളുണ്ട്. അങ്ങനെ ഒരു നീക്കം നടത്താം. പക്ഷേ വാറണ്ട് വേണ്ടിവരും. അതില്ലാതെ അവൾ ക്യാമറകൾ പരിശോധിക്കാൻ സമ്മതിച്ചില്ലെങ്കിൽ.” ഒരു നിമിഷ നേരത്തേക്ക് ശിവൻ ഒന്ന് സ്തബ്ധനായതു പോലെ തോന്നി. “എന്താഡോ ? ” ആൽബി അമ്പരന്നു. “ഒന്നുമില്ല സർ. അങ്ങനെ അവൾ പറഞ്ഞാൽ, അവളെ നമ്മൾ കസ്റ്റഡിയിലെടുക്കുന്നു. വീഡിയോ ഫുട്ടേജുകൾ കോൺഫിസ്കേറ്റ് ചെയ്യുന്നു.” “റിസ്കാഡോ...” ആൽബിയിൽ നിന്നും ഒരു ദീർഘനിശ്വാസമുയർന്നു. “അത് നമ്മൾ ചെയ്യുന്ന സമയത്ത് വല്യ കാര്യമായിരിക്കും.പക്ഷേ ഇതൊക്കെ കഴിഞ്ഞ് കോടതീലെത്തുമ്പൊ വ്യക്തമായിട്ടത് തെളിയിക്കാൻ പറ്റീല്ലെങ്കിൽ, അതോടെ തൊപ്പീടെ കാര്യം തീരുമാനമാകും.” ശിവകുമാറിന്റെ മുഖം മങ്ങി. ആൽബി എന്തോ മറയ്ക്കാൻ ശ്രമിക്കുന്നുണ്ടെന്ന് അയാൾക്ക് മനസ്സിലായിരിക്കുന്നു. ഡെയ്സിയുടെ വീടിലെ ഗേറ്റിൽ സെക്യൂരിറ്റി ക്യാമറകളുണ്ടെന്ന് ആൽബി പറഞ്ഞ നിമിഷം തന്നെ അയാളുടെ മനസ്സിൽ കരടു വീണിരുന്നു. “ഡി വൈ എസ് പി സർ ഉള്ളപ്പൊ ഇതും കൂടി ഒന്ന് ഡിസ്ക്കസ് ചെയ്യാമായിരുന്നു. അല്ലേ സർ ? ” ശിവൻ എന്തോ മനസ്സിൽ വെച്ചു കൊണ്ടാണത് ചോദിച്ചതെന്ന് തോന്നി ആൽബിക്ക്. “തല്ക്കാലം, നമുക്ക് പറ്റുന്ന പോലെയൊക്കെ അന്വേഷിക്കാം. എന്നിട്ട് മുകളിലേക്ക് വിട്ടാൽ മതി. അല്ലെങ്കിൽ തന്നെ മറ്റേ ജയന്റെ കേസ് പയ്യെ ചൂടു പിടിച്ചു വരുവാ. രണ്ടു ദിവസത്തിനുള്ളിൽ അതൊരു തീരുമാനമാക്കണമെന്നു പറയാനാ അങ്ങേരു വന്നതു തന്നെ.” “സോ... ഇപ്പൊ ഒന്നും ചെയ്യണ്ട എന്നാണോ സർ പറയുന്നെ ? ” “യെസ്.” പെട്ടെന്ന് വാതില്ക്കൽ ഒരു യുവാവ് പ്രത്യക്ഷപ്പെട്ടു. പുറകേ അയാളെ തടഞ്ഞുകൊണ്ട് മാണിയുമുണ്ടായിരുന്നു. പക്ഷേ അയാൾ മാണിയെ അശേഷം വകവെക്കാതെ ഓഫീസിനുള്ളിലേക്കു കയറി വന്നു. “രൂപേഷ്! എന്തായിതൊക്കെ ? ഇതൊരു പോലീസ് സ്റ്റേഷനാണ്‌! ” ആൽബി എഴുന്നേറ്റ് മേശക്കിപ്പുറം വന്നു. “തന്നോട് എനിക്കൊന്നും സംസാരിക്കാനില്ലെന്ന് ഞാൻ പറഞ്ഞിരുന്നല്ലോ.” “അതേ... ഒന്നും വിചാരിക്കരുത് സർ. ലോക്കൽ പോലീസ്-ക്രൈം ബ്രാഞ്ച് പൊളിറ്റിക്സിൽ എനിക്ക് യാതൊരു താല്പ്പര്യവുമില്ല. അതൊക്കെ നിങ്ങൾക്ക് നേരേ മിസ്റ്റർ പോത്തനുമായി തീർക്കാവുന്നതാണ്‌. ഞാനിപ്പൊ ജസ്റ്റ് ഒരു മെസഞ്ചറാണ്‌. പറയാനുള്ളത് പറഞ്ഞിട്ട് അങ്ങു പൊയ്ക്കോളാം.” രൂപേഷിന്റെ സംസാരത്തിൽ അസാമാന്യമായ പക്വതയുണ്ടായിരുന്നു. ആൽബി ഒരു നിമിഷം നിശബ്ദനായി നിന്നിട്ട് രൂപേഷിന്‌ ഒരു കസേര ചൂണ്ടിക്കാണിച്ചു കൊടുത്തു. “ഇരിക്കുന്നില്ല സർ. പെട്ടെന്നു പൊയ്ക്കോളാം...” രൂപേഷ് പോക്കറ്റിൽ നിന്നും എന്തോ ഒരു പേപ്പറെടുത്ത് നിവർത്തി ഒന്നോടിച്ചു വായിച്ചു നോക്കി. എന്നിട്ട് തുടർന്നു. “മരണസമയത്ത് മിസ്റ്റർ അനന്തരാമയ്യരുടെ കൈവശം ഒരു കറുത്ത സ്യൂട്ട്കേസ് ഉണ്ടായിരുന്നു. അത് ഫോറൻസിക്ക് പരിശോധനക്കായി എടുക്കുകയും ചെയ്തിരുന്നു.” “യെസ് അറിയാം.” “അതിന്റെ ലോക്ക് ആരോ തുറന്ന നിലയിലായിരുന്നു. ഞങ്ങളത് തിരിച്ചും മറിച്ചും പരിശോധിച്ചു. പക്ഷേ അതിനുള്ളിൽ ഒരു മുടിനാരിഴ പോലും കണ്ടെത്താനായില്ല. കമ്പ്ലീറ്റ്ലി എംറ്റി! സോ, അങ്ങനൊരു കാലിപ്പെട്ടിയുമായി ഒരു മനുഷ്യൻ നടക്കേണ്ട കാര്യമില്ലല്ലോ. സ്വാഭാവികമായിട്ടും എനിക്കു സംശയം തോന്നി. ഞാൻ അന്വേഷിച്ചു. അയാൾക്ക് ആ ആക്സിഡന്റ് നടന്നിടത്തു നിന്നും കഷ്ടി ഒരു കി.മി. ദൂരെ ഒരു ചെറിയ ഓഫീസുണ്ട്. ഒരു ഒറ്റമുറി കെട്ടിടം. ഞാൻ നേരെ അങ്ങോട്ടു തിരിച്ചു. അവിടെ ചെന്നപ്പോളാണ്‌ കാര്യങ്ങളുടെ ഗൗരവം മനസ്സിലായത്. ആ ഓഫീസ് ആരോ ഇന്നലെ രാത്രി കുത്തിത്തുറന്ന്, അവിടെയുണ്ടായിരുന്ന സകല പേപ്പറുകളും ഫയലുകളും കൊണ്ടുപോയിരിക്കുന്നു! കുറേ എന്തൊകെയോ ആ മുറിക്കുള്ളിൽ തന്നെയിട്ട് കത്തിച്ച നിലയിലാണ്‌.” “വാട്ട്! ” ആൽബി ഞെട്ടി. “കുറച്ചു കഴിഞ്ഞപ്പോൾ അയാളുടെ അസിസ്റ്റന്റ് ഒരു പെൺകുട്ടി വന്നു. ഒരു ട്രെയിനീയോ മറ്റോ ആണ്‌. ആ കുട്ടി ഇതെല്ലാം കണ്ട് ആകെ ഭയന്നു പോയി. ഞാൻ അവരോട് പോലീസിൽ റിപ്പോർട്ട് ചെയ്യാൻ പറഞ്ഞിട്ട് അവർക്ക് അതിനുള്ള ധൈര്യമില്ല. പിന്നെ ഞാൻ അവിടെയിരുന്ന് ആ കുട്ടിയെ ചോദ്യം ചെയ്തു. അയ്യരുടെ ജോലിയുടെ സ്വഭാവം മനസ്സിലാക്കുകയായിരുന്നു ലക്ഷ്യം. അനന്തരാമയ്യർ ഒരു പഴയ സി എ ക്കാരനാണ്‌. തമിഴ്നാട് സ്വദേശി. ഇവിടെ വന്ന് പ്രാക്ടീസ് തുടങ്ങിയിട്ട് 20 കൊല്ലത്തിനു മേലെയായി. സ്വന്തമായി ഒരു സ്ഥാപനമൊക്കെ ഉണ്ടായിരുന്നു ആദ്യം. പക്ഷേ പാർട്ണേഴ്സ് ചതിച്ച് അയാളെ സ്വന്തം കമ്പനിയിൽ നിന്നു പുറത്താക്കി. ഇപ്പോൾ ഫ്രീലാൻസറാണ്‌. ആകെ രണ്ടോ മൂന്നോ ക്ലയന്റ്സ് മാത്രമുള്ള ഒരു പാവം അക്കൗണ്ടന്റ്. ഇനി ഒരു കാര്യം ചോദിക്കട്ടെ... സർ ‘ഡെയ്സീസ് ഗ്രൂപ്പ് ഓഫ് കമ്പനീസ്’ എന്നു കേട്ടിട്ടുണ്ടോ ? “ ശിവകുമാർ ഞെട്ടിത്തെറിച്ച് രൂപേഷിനെ നോക്കി. ”ഉണ്ടെങ്കിൽ ? “ ആൽബി നിസംഗതയോടെയാണ്‌ പ്രതികരിച്ചത്. ”അവരാണ്‌ ഈ അയ്യരുടെ മെയിൻ ക്ലയന്റ്. അവരുടെ കമ്പനിക്ക് സ്വന്തമായി വലിയ അക്കൗണ്ട്സ് ഡിപ്പാർട്ട്മെന്റ് ഒക്കെയുണ്ട്. പക്ഷേ ഗ്രൂപ്പിന്റെ ഓണർ, മിസ്. ഡെയ്സി സെബാസ്റ്റ്യന്റെ പേഴ്സണൽ ചാർട്ടേഡ് അക്കൗണ്ടന്റ് ആയിരുന്നു ഈ മരിച്ച മിസ്റ്റർ അയ്യർ.“ ആൽബി നിശബ്ദനായി നിന്നു കേൾക്കുകയാണ്‌. ശിവകുമാർ എന്തോ പറയാനായി വെമ്പി നില്ക്കുകയാണെന്ന് കണ്ടാലറിയാം. ”കഴിഞ്ഞപ്പോൾ, ഞാൻ ഈ വിവരമെല്ലാം പോത്തൻ സാറിനെ പോയിക്കണ്ട് പറഞ്ഞു.“ രൂപേഷ് തുടർന്നു. ”എല്ലാം കേട്ടിരുന്ന അദ്ദേഹം, ഈ ഡെയ്സി എന്ന പേരു കേട്ടതോടെ ചാടിയെഴുന്നേറ്റു.കൂടുതലൊന്നും കേൾക്കാൻ ആൾക്ക് താല്പ്പര്യമുണ്ടായിരുന്നില്ല. ഉടനെ ഇവിടെ വന്ന് സർനോട് ഈ വിവരം പറയാൻ പറഞ്ഞു. മിസ്. ഡെയ്സിയും സാറുമായി പരിചയമുണ്ടെന്നാണ്‌ പോത്തൻ സർ പറഞ്ഞത്.“ രൂപേഷിന്റെ ചുണ്ടിന്റെ കോണിൽ ഒരു ചെറു ചിരി വന്നു മാഞ്ഞു. ”ഒപ്പം ഒരു കാര്യം കൂടി പറയാൻ എന്നെ ഏല്പ്പിച്ചിട്ടുണ്ട്. ആൽബി സർ... എവെരിത്തിങ്ങ് ഈസ് കണക്റ്റഡ്! ഇനിയും കണ്ണടച്ച് ഇരുട്ടാക്കാൻ നോക്കരുതെന്ന്.“ രൂപേഷ് മനോഹരമായി പുഞ്ചിരിച്ചു കൊണ്ട് ആൽബിക്ക് നേരേ ഹസ്തദാനത്തിനായി കൈ നീട്ടി.”ഇതോടെ എന്റെ ജോലി കഴിഞ്ഞു. ഗുഡ് ബൈ സർ! പോത്തൻ സർ ഇത്തിരി മുൻപ് ഡിസ്ചാർജ്ജായിട്ടുണ്ട്. ചിലപ്പൊ ഇങ്ങോട്ടു വന്നേക്കും. “ രൂപേഷ് മുറി വിട്ടതും ശിവകുമാർ ആൽബിയെ നോക്കി.അവിശ്വസനീയത നിറഞ്ഞു നിന്നിരുന്നു അയാളുടെ മുഖത്ത്. “സാറിന്‌ ഈ ഡെയ്സിയെ മുന്നെ പരിചയമുണ്ടോ ? ” “എന്തു പരിചയം ശിവാ... അവരെപ്പറ്റി ഞാൻ കേട്ടിട്ടുണ്ട്. അത്ര തന്നെ.” ആൽബി ഒരു ഒഴുക്കൻ മട്ടിലാണ്‌ പ്രതികരിച്ചത്. “സർ... എല്ലാം തമ്മിൽ നല്ല കണക്ഷനുണ്ട്. ഇനിയും ഇതൊരു ആക്സിഡന്റായിട്ട് ഹാൻഡിൽ ചെയ്യാൻ പറ്റുമെന്ന് തോന്നുന്നില്ല. ഐ തിങ്ക് വീ ഷുഡ്-” “ശിവാ... ബഹളം വെക്കല്ലേ. നമുക്ക് സ്റ്റെപ് ബൈ സ്റ്റെപ് ആയി മുൻപോട്ടു പോകാം. ഇപ്പൊ കിട്ടിയ ഈ വിവരം കൊണ്ട് നമുക്ക് ഒരു പ്രയോജനവുമില്ല. താൻ തന്നെ ഒന്നാലോചിച്ചു നോക്കിക്കേ.” “സർ... ഞാൻ ചോദിക്കട്ടെ ? ഒന്നും വിചാരിക്കരുത്. സാറിന്‌ ഈ കേസിൽ-” “എന്താഡോ! ” ആൽബി ക്രുദ്ധനായത് നിമിഷ നേരം കൊണ്ടാണ്‌. “താനെന്താ ചോദിക്കുന്നെ ? ” “സർ എന്തോ മറയ്ക്കുന്ന പോലെ- ഇന്നലെ ആ അനന്തരാമയ്യർ എന്ന പേരു കേട്ടപ്പൊ തന്നെ സർ ഞെട്ടിയത് ഞാൻ ശ്രദ്ധിച്ചിരുന്നു.” “താനെന്താ ശിവാ പറഞ്ഞു വരുന്നെ ? ” ആൽബിയുടെ കണ്ണുകളിൽ നിന്ന് തീ പാറി. “സോറി സർ! ഞാനൊന്നുമുദ്ദേശിച്ചല്ല പറഞ്ഞത്. ” ശിവൻ പെട്ടെന്നു തന്നെ മുറി വിട്ടിറങ്ങി. അയാൾ മുറി വിട്ട് പുറത്തേക്കിറങ്ങിയതും ആൽബി അപകടം മനസ്സിലാക്കി. ശിവൻ തന്റെ മേലുദ്യോഗസ്ഥരെ ആരെയെങ്കിലും വിളിക്കാനുള്ള സാധ്യതയുണ്ട്. അവന്‌ തന്നെ നല്ല സംശയമുണ്ട് ഇനി ഈ കളി താൻ സൂക്ഷിച്ച് കളിച്ചില്ലെങ്കിൽ അപകടമാണെന്ന് ആൽബിക്കുറപ്പായി. ഡെയ്സി താൻ ഊഹിച്ചതിനേക്കാളൊക്കെ എത്ര വലിയൊരു വിഷമാണെന്ന് അയാൾ തിരിച്ചറിഞ്ഞുകൊണ്ടിരിക്കുകയായിരുന്നു. പ്ലാൻ ചെയ്ത് നടത്തിയ ബുദ്ധിപരമായൊരു കൊലപാതകമായിരുന്നു അയ്യരുടേത്. ആൽബി പല്ലു ഞെരിച്ചു. എന്തു വില കൊടുത്തും അവൾക്ക് അർഹിക്കുന്ന ശിക്ഷ വാങ്ങിക്കൊടുത്തേ ഒക്കൂ. പക്ഷേ... അവസാന നിമിഷം വരെ സൂക്ഷിച്ചു തന്നെ മുൻപോട്ടു പോകാൻ അയാൾ തീരുമാനിച്ചു. തന്റെ കുടുംബം അപ്പാടെ തകർത്തെറിയാൻ ശേഷിയുള്ള അത്യുഗ്ര സ്ഫോടന ശേഷിയുള്ള ഒരു ബോംബാണ്‌ ഡെയ്സി സെബാസ്റ്റ്യൻ എന്ന സ്ത്രീ! കണ്ണൂർകാരൻ ❤️❤️❤️ #📚 ട്വിസ്റ്റ് കഥകൾ #💞 പ്രണയകഥകൾ #✍ തുടർക്കഥ #📙 നോവൽ #📔 കഥ