58അയലത്തെ അമ്പിളി ഉഴുന്ന് അരച്ച് വച്ചിട്ടാണ് അമ്പിളി അപ്പുറത്തേക്ക് പോയത്. തിരികെ രുദ്രന്റെ വീട്ടിലേക്ക് വന്ന ഉടനെ തന്നെ ഒരു ചെറിയ കഷ്ണം കാബേജ്ഉം സവോളയും ഇഞ്ചിയും പച്ച മുളകും ഒക്കെ കൂടി എടുത്തു അരിഞ്ഞു വച്ചു. അപ്പുവിന്റെ സ്കൂൾ ബസ് വരാൻ ഇനി അധികം സമയം ഇല്ല. അതിന് മുന്നേ ഇത് ഉണ്ടാക്കി വച്ച് രണ്ടെണ്ണം കിഷോറിന് കൊണ്ട് കൊടുത്തിട്ട് വേണം അപ്പുവിനെ കൂട്ടാൻ പോകാൻ. കഴിഞ്ഞ ഒരാഴ്ചയായി സ്കൂൾ ബസ്സിലാണ് അപ്പുവിന്റെ പോക്കും വരവും ഒക്കെ. രാവിലെ ബസ്സിൽ കയറ്റി വിടുന്നത് രുദ്രനാണ്. ഇനി മുതൽ വൈകിട്ട് ബസ് സ്റ്റോപ്പിലേക്ക് ചെന്ന് അവളെ കൂട്ടി വരുന്ന കാര്യം അമ്പിളി ഏറ്റിട്ടുണ്ട്. ഇല്ലെങ്കിൽ രുദ്രൻ കടയിൽ നിന്നും ഓടിപ്പിടിച്ച് ഇങ്ങു വരണ്ടേ? നല്ല മൊരിഞ്ഞ ഉഴുന്ന് വട എണ്ണയിൽ നിന്നും കോരിയെടുത്ത് പാത്രത്തിൽ ഇടുമ്പോൾ അമ്പിളിക്ക് കിഷോർ ചോദിച്ചത് ഓർമ്മ വന്നു. ' ഉഴുന്ന് വട കൊണ്ടുവരുവോ ' ന്ന്.... അവൾ രണ്ടു ഉഴുന്നുവട എടുത്ത് ഒരു പാത്രത്തിലാക്കി മാറ്റിവെച്ചു. കിഷോറിനെ കുറിച്ച് ചിന്തിക്കവേ അമ്പിളിയുടെ ചുണ്ടിൽ ഒരു ചിരി വിരിഞ്ഞു. അവനോടുള്ള സ്നേഹം കൊണ്ട് ഉള്ള് നിറഞ്ഞു. കണ്ണ് നിറഞ്ഞു. കിഷോറിന് ഇപ്പോൾ നല്ല മാറ്റമുണ്ട്. ഇപ്പോ കുറച്ചായിട്ട് എപ്പോഴും അവനെ ചിരിച്ചേ കാണാറുള്ളൂ..... നിരാശയൊക്കെ വിട്ടകന്നു. തങ്ങൾ ഒന്നിച്ചുള്ള ഭാവി ജീവിതത്തെ കുറിച്ചുള്ള പ്രതീക്ഷകൾ ഒക്കെ പങ്കുവയ്ക്കാറുണ്ട് ഇപ്പൊ... " ഞാൻ ഒന്ന് എണീറ്റ് നിന്നോട്ടെ. നിന്നെ ഇങ്ങനെ കഷ്ടപ്പെടാൻ വിടില്ല ഞാൻ.... " എന്ന് ഇടയ്ക്കിടെ പറയും.... തന്നോട് സ്നേഹമാണ്... ഉള്ള് നിറയെ.... മുൻപും അങ്ങനെ ആയിരുന്നല്ലോ? കല്യാണം കഴിഞ്ഞ ശേഷമുള്ള കുറച്ചു നാളുകൾ കൊണ്ട് ഒരായുസ്സിലേക്കുള്ള സ്നേഹം പകർന്ന് തന്നിട്ടില്ലേ തനിക്ക്? കിടന്നു പോയപ്പോൾ എത്രയോ വട്ടം പറഞ്ഞിട്ടുണ്ട് വിട്ടിട്ട് പൊക്കോളാൻ.... അതും തന്നോടുള്ള സ്നേഹം കൊണ്ടായിരുന്നില്ലേ? പക്ഷേ തനിക്ക് എങ്ങനെ കഴിയും വിട്ടിട്ടു പോകാൻ? ആ മനുഷ്യനാണ് തന്റെ ജീവനും ജീവിതവും എല്ലാം... കിഷോർ ഇല്ലായിരുന്നുവെങ്കിൽ ഇന്ന് അമ്പിളി ഉണ്ടാകുമായിരുന്നില്ല. സ്വന്തം അച്ഛന് പോലും വേണ്ടാതിരുന്നപ്പോ കൂടെ നിന്നതും കൂടെ കൂട്ടിയതും അവനാണ്. അവനൊന്നു കിടന്ന് പോയാൽ ഇല്ലാതായി പോകുന്നതല്ല അമ്പിളിക്ക് കിഷോറിനോടുള്ള സ്നേഹം.... അമ്പിളിക്ക് ഇന്നും കിഷോറേ ഉള്ളൂ... അമ്പിളിയുടെ ഉള്ള് നിറയെ അവനോടുള്ള സ്നേഹമേ ഉള്ളൂ.... മനസ്സ് നിറയെ.... ഹൃദയം നിറയെ.... ശരീരത്തിന്റെ ഓരോ അണുവിലും അമ്പിളിക്ക് കിഷോറിനോടുള്ള സ്നേഹം മാത്രമാണ്..... ഓരോന്ന് ഓർത്ത് നിന്ന് അമ്പിളി വട മുഴുവൻ ഉണ്ടാക്കി തീർത്തു. നിറഞ്ഞു തുളുമ്പി നിന്ന കണ്ണുകൾ തുടച്ച് മാറ്റിക്കൊണ്ട് ഉണ്ടാക്കി വച്ച വട മുഴുവൻ മറ്റൊരു പാത്രത്തിൽ ആക്കി മൂടി വയ്ക്കുമ്പോഴും അമ്പിളിയുടെ ചുണ്ടിൽ ഒരു ചിരി ഉണ്ടായിരുന്നു... ആ ചിരിയിലാകെ കിഷോറിനോടുള്ള സ്നേഹവും... 🌜 ഭയാനകമായൊരു സ്വപ്നം കണ്ട് കൊണ്ടാണ് കിഷോർ കണ്ണുകൾ വലിച്ച് തുറന്നത്. അവനാകെ വിയർത്തു കുളിച്ചിരുന്നു..... കണ്ണ് തുറന്ന് നോക്കിയത് തൊട്ട് മുന്നിലുള്ള ക്ളീറ്റസിന്റെ മുഖത്തേക്കാണ്. കിഷോർ കണ്ണ് തുറന്നെന്ന് കണ്ടതും ക്ളീറ്റസ് നന്നായൊന്ന് ചിരിച്ചു കാണിച്ചു. കിഷോറിന്റെ കണ്ണുകൾ മിഴിഞ്ഞു. അവൻ ആകെ ഒന്ന് വിറച്ചു. " കിഷോർ സാറേ.... സുഖമാണോ? " ക്ളീറ്റസ് പല്ല് മുഴുവൻ കാണിച്ചൊന്ന് കൂടി ചിരിച്ചു. ആ ചിരി പക്ഷെ കിഷോറിനെ ഭയപ്പെടുത്തുകയാണ് ചെയ്തത്. " എന്നേ തീരെ പ്രതീക്ഷിച്ചില്ല അല്ലെ....? " വീണ്ടും അതേ ചിരി. തനിയെ എഴുന്നേൽക്കാൻ ഇപ്പോഴും കഴിയില്ല എന്ന് മറന്ന് കൊണ്ട് കിഷോർ പിടഞ്ഞെഴുന്നേൽക്കാൻ തുടങ്ങി. " ഹ...! കിടന്നോ സാറേ... എനിക്ക് പറയാനൊള്ളതൊക്കെ സാറ് കിടന്നോണ്ട് കേട്ടാ മതി. " ക്ളീറ്റസ് തന്നെ കിഷോറിനെ തിരികെ കിടത്തി. " സാറ് എന്നേ തീരെ പ്രതീക്ഷിച്ചില്ല അല്ലെ? എന്താ കരുതിയെ? ഞാൻ ഇനി ഒരിക്കലും ജയിലിന്ന് ഇറങ്ങൂല്ലന്നോ? ജീവിതകാലം മുഴുവൻ ജയിലി കിടക്കുമെന്നോ? സാറേന്നെ കുടുക്കിയ കള്ളക്കേസില് ആറേഴു കൊല്ലത്തിൽ കൂടുതൽ കിടക്കാനുള്ള വകുപ്പൊന്നും ഇല്ലാരുന്നു സാറേ.... " " ക്ളീറ്റസ്.... നീ പോ.... ഉപദ്രവിക്കരുത്. അപ്പോഴത്തെ ദേഷ്യത്തിൽ ഞാൻ അങ്ങനെ ഒക്കെ ചെയ്തതാണ്. " കിഷോറിന്റെ സ്വരം വിറച്ചു. ക്ളീറ്റസ് ഉറക്കെ ചിരിച്ചു. " അയ്യോടാ. കിഷോർ സാറ് ഈ പാവം ക്ളീറ്റസിനോട് അപേക്ഷിക്കുന്നോ? അന്ന് അവസാനം കാണുമ്പോ ഇങ്ങനെ ഒന്നും അല്ലല്ലോ പറഞ്ഞത്. ഞാൻ ഇനി പുറം ലോകം കാണില്ലന്നോ.... അങ്ങനെ എന്തൊക്കെ അല്ലെ? അന്ന് നീ വലിയ രാഷ്ട്രീയക്കാരൻ ആയിരുന്നു. ഇന്നോ? എന്നേ ഒന്ന് കൈ വീശി അടിക്കാൻ പറ്റുമോ നിനക്ക്? ഞാൻ കൊന്നാൽ കിടന്ന കിടപ്പിൽ ചാവാനെ പറ്റൂ.... " ക്ളീറ്റസ് കിഷോറിന്റെ നേർക്ക് മുഖം അടുപ്പിച്ചു. " അന്ന് നീ എന്താ പറഞ്ഞത്? നിന്റെ പെണ്ണിനെ ഉപദ്രവിക്കാൻ നോക്കിയ എന്നേ നീ എന്തൊക്കെയോ ചെയ്തു കളയും എന്നല്ലേ? അന്ന്..... കുടിച്ച് ബോധം ഇല്ലാതിരുന്ന എന്നേ സ്നേഹിക്കുന്ന പെണ്ണിന്റെ അടുത്തേക്ക് ആ രാത്രിയിൽ പറഞ്ഞു വിട്ടത് ആരാടാ? അന്ന് നിനക്ക് അറിഞ്ഞു കൂടായിരുന്നോ ഞാൻ കെട്ടവൻ ആണെന്ന്.... ഗുണ്ട ആണെന്ന്..... " ക്ളീറ്റസിന്റെ ചുണ്ടുകൾ പുച്ഛത്തിൽ ഒന്ന് കോടി. " പറയട്ടെ ഞാൻ അവളോട്.... അമ്പിളിയോട്.... പഴയതൊക്കെ... പറയട്ടെ.....? " ക്ളീറ്റസ് രഹസ്യം പോലെ ചോദിച്ചു. കിഷോർ ഞെട്ടിപ്പോയി. അമ്പിളി ഒക്കെ അറിഞ്ഞാൽ....? അവനത് ഓർക്കാൻ കൂടി വയ്യ. അമ്പിളി അവനെ വെറുക്കുന്നത് കിഷോറിനു സഹിക്കാൻ ആവില്ല.... " വേണ്ട... അവളോട് ഒന്നും പറയരുത്. ഞാൻ നിനക്ക് എന്ത് വേണോ തരാം.... " കിഷോർ പെട്ടെന്ന് പറഞ്ഞു. " അനങ്ങാൻ വയ്യാതെ കിടക്കുന്ന നീ എനിക്ക് എന്ത് തരും എന്നാ? " ക്ളീറ്റസിന്റ മുഖത്ത് പിന്നെയും പുച്ഛം. " പഴയ പ്രതാപം ഓർത്ത് പറഞ്ഞതാവും അല്ലെ? ഞാനും നീയും കൂടെ ചേർന്ന് ചെയ്തു കൂട്ടിയതിന് ഒക്കെ എന്നെ മാത്രം പ്രതിയാക്കി അന്ന് നിനക്ക് ഉണ്ടായിരുന്ന രാഷ്ട്രീയ സ്വാധീനം വച്ച് എന്നെ നീ ജയിലിൽ ആക്കിയില്ലേ...? അന്നേ ഞാൻ മനസ്സിൽ കരുതി വച്ചതാ നിനക്കൊരു സമ്മാനം....! ജയിലീന്ന് ഇറങ്ങിയപ്പോഴല്ലേ ഞാൻ അറിഞ്ഞത് എണീക്കാൻ പോലും വയ്യാത്ത വിധം നീ കിടപ്പിലാണെന്നും.... ഒരുത്തനും നിന്നെ തിരിഞ്ഞു നോക്കുന്നില്ല എന്നും... ആ പെണ്ണാണ് നിന്നെ നോക്കുന്നത് എന്നും.... എണീക്കാൻ പോലും വയ്യാതെ കിടന്ന കിടപ്പിൽ കിടക്കുന്ന, ഇങ്ങനെ കിടക്കുന്നേൽ ഭേദം ചത്തു പോകുന്നതാണ് എന്ന് കരുതി കിടക്കുന്ന നിന്നെ കൊല്ലുന്നതിൽ അന്ന് എനിക്ക് ഒരു ത്രില്ല് തോന്നിയില്ല....? പക്ഷെ ഇപ്പൊ.... ഇപ്പോ നിനക്ക് ജീവിക്കാൻ ആശയുണ്ട് അല്ലെ? മരിക്കാൻ പേടിയുണ്ടല്ലേ? " ക്ളീറ്റസിന്റെ മുഖത്ത് ക്രൂരമായ ഒരു ചിരി തെളിഞ്ഞു. അയാൾ കൈ പിറകിലേക്ക് മടക്കി ഉടുപ്പിനിടയിൽ തിരുകിയിരുന്ന കത്തി പുറത്തേക്ക് എടുത്തു. " ഇനി എനിക്ക് നിന്നെ കൊല്ലാം. ജീവിക്കാൻ ആശയുള്ള കിഷോറിനെ.... " കിഷോറിന്റെ കണ്ണുകൾ പിടഞ്ഞു. നെഞ്ചിടിപ്പേറി... അവനാകെ വിയർത്തു.... വിറച്ചു..... " എനിക്ക് കാണേണ്ടത് നിന്റെ കണ്ണിലെ ഈ പേടിയാണ്. ചാവാനുള്ള പേടി.... ഇതിന് വേണ്ടിയല്ലേ നീ സുഖപ്പെടുന്നത് വരെ ഞാൻ കാത്ത് കാത്തിരുന്നത്? " ക്ളീറ്റസ് ആ കത്തിയുടെ പിടിയിൽ മുറുകെ പിടിച്ചു. 🌜 🌜 🌜 🌜 🌜 പാവം കിഷോർ ല്ലേ? 😒 എന്നാപ്പിന്നെ ഞാൻ അങ്ങോട്ട്.... 😁😁 നാളെ വരാം. നിങ്ങളുടെ വിലയേറിയ അഭിപ്രായങ്ങൾ പോന്നോട്ടെ.... 😌 #📙 നോവൽ #💞 പ്രണയകഥകൾ #✍ തുടർക്കഥ #📔 കഥ #📚 ട്വിസ്റ്റ് കഥകൾ