*ഇസ്ലാമിക സംശയങ്ങളും മറുപടിയും* ചോ : ഖബറിലെ ഭാഷ അറബിയാണോ.?റൂഹിനു ജീവിച്ചിരിക്കുന്നവരുടെ അവസ്ഥ മനസ്സിലാക്കാനാകുമോ ? ഉ :മൂന്ന് അഭിപ്രായമാണ് ഈ വിഷയത്തില്‍ പണ്ഡിതര്‍ക്കിടയിലുള്ളത്. സുരിയാനി ഭാഷയിലാണ് ഖബ്റിലെ ചോദ്യങ്ങള്‍ക്കു മറുപടി പറയുകയെന്ന് ഇമാം ബുല്ഖൈനി പറഞ്ഞതായി ഇമാം സുയൂഥി ശര്‍ഹുസ്സുദൂറില്‍ രേഖപ്പെടുത്തിയിട്ടുണ്ട്. "ഹദീസുകളില്‍ നിന്ന് മനസ്സിലാവുന്നത് അറബി ഭാഷയിലാണ് ഖബ്റില്‍ മലക്കുകള്‍ ചോദിക്കുകയെന്നാണ്, ഓരോരുത്തരോടും അവര്‍ക്കു മനസ്സിലാവുന്ന ഭാഷയിലാവാനും സാധ്യതയുണ്ട്" എന്ന് ഇമാം ഇബ്നു ഹജറില്‍ അസ്ഖലാനി അദ്ദേഹത്തിന്റെ അല്‍ ഇംതാഅ് എന്ന കിതാബില്‍ പറഞ്ഞിട്ടുണ്ട്. റൂഹിന് ജീവിച്ചിരിക്കുന്നവരുടെ അവസ്ഥ മനസ്സിലാക്കാനാവുമെന്നാണ് ഹദീസുകളില്‍ നിന്ന് മനസ്സിലാവുന്നത്. തന്റെ മകന്റെ നല്ല പ്രവര്‍ത്തനങ്ങള്‍ കണ്ട് ഖബ്റില്‍ കിടന്ന് പിതാവ് സന്തോഷിക്കുമെന്ന് ഹദീസില്‍ വന്നിട്ടുണ്ട്. തന്നെ സിയാറത് ചെയ്യുന്നവരെ ഖബ്റിലുള്ളവര്‍ അറയുമെന്ന് ഇബ്നു ഖയ്യിം തന്റെ റൂഹ് എന്ന കിതാബില്‍ ഹദീസുകളുടെ അടിസ്ഥാനത്തില്‍ രേഖപ്പെടുത്തിയിട്ടുണ്ട്. ചോ : തടി കുറയ്ക്കുക എന്നാ ഉദ്ദേശത്തോടെ സുന്നത് നോമ്പ് അനുഷ്ടിക്കാമോ? ഉ : ഇബാദത് ചെയ്യുമ്പോള്‍ ഇബാദതിനോടൊപ്പം മറ്റു വല്ല ഉദ്ദേശവും കൂടെ കരുതിയാല്‍ ആ ഇബാദത് സ്വഹീഹാവുകയില്ലയെന്ന് ഒരു വിഭാഗം പണ്ഡിതര്‍ക്കഭിപ്രായമുണ്ട്. എന്നാല്‍ അങ്ങനെ ദുന്‍യവിയ്യായ ലക്ഷ്യവും ഇബാദതിനോടൊപ്പമുണ്ടെങ്കിലും അത് ശരിയാകുമെന്നാണ് പ്രബലാഭിപ്രായം. അത് കൊണ്ട് തന്നെ നോമ്പിനോടൊപ്പം തടികുറക്കുകയെന്ന് കൂടെ കരുതിയാല്‍ നോമ്പ് ശരിയാവുന്നതാണ്. എന്നാല്‍ ദുന്‍യവിയ്യായ ലക്ഷ്യങ്ങളെല്ലാം ഒഴിവാക്കി പൂര്‍ണ്ണമായ ഇഖ്‍ലാസോടെയാണ് ഇബാദതുകള്‍ നിര്‍വഹിക്കേണ്ടത്. അത്തരം ഇബാദതുകളാണ് പ്രതിഫലാര്‍ഹമായത്. ചോ : നോമ്പ് നോൽകല്‍ നിര്‍ബന്ധം ആണോ ? ഉ : റമളാന്‍ മാസം നോമ്പ് നോല്‍കല്‍ നിര്‍ബന്ധമാണ്. സുറതുല്‍ ബഖറ 185-ാം ആയതില്‍ അല്ലാഹു വ്യക്തമായി പറയുന്നു. ((ആ മാസം (റമദാനില്‍) നിങ്ങളില്‍ നിന്ന് ആരെങ്കിലും സന്നിഹിതരായാല്‍ അവന്‍ നോമ്പു നോറ്റു കൊള്ളട്ടേ.)) നോമ്പ് നിര്‍ബന്ധമാണെന്ന് ഇജ്മാഅ് കൊണ്ട് സ്ഥിരപ്പെട്ടതുമാണ്. അത് നിര്‍ബന്ധമല്ലെന്ന് പറയുന്നവന്‍ കാഫിറാണ്.وَعَلَى الَّذِينَ يُطِيقُونَهُ فِدْيَةٌ طَعَامُ مِسْكِينٍ فَمَنْ تَطَوَّعَ خَيْرًا فَهُوَ خَيْرٌ لَهُ وَأَنْ تَصُومُوا خَيْرٌ لَكُمْ إِنْ كُنْتُمْ تَعْلَمُونَ അതിന് (നോമ്പിന്) കഴിയാത്തവര്‍ പ്രായശ്ചിത്തം-ഒരു ദരിദ്രന് ആഹാരം കൊടുക്കുക എന്നത്-കടമയാകുന്നു. ആരെങ്കിലും സ്വമേധയാ നന്മ ചെയ്താല്‍ അതവന് ഏറ്റവും നല്ലതാണ്. അറിയുന്നവരാണെങ്കില്‍ നിങ്ങള്‍ക്ക് നോമ്പ് നോല്‍ക്കുന്നതാണ് ഉത്തമം. ഈ ആയത്തില്‍ وعلى الذين يطيقونه എന്നതിന് 'അതിന് (നോമ്പിന്) കഴിയാത്തവര്‍' എന്നാണ് അര്‍ത്ഥമെന്ന് ഇബ്നു അബ്ബാസ് (റ) പറഞ്ഞിട്ടുണ്ട്. എന്നാല്‍ സലമത്തുബ്‌നുല്‍ അക്‌വഅ്, ഇബ്‌നു ഉമര്‍(റ) എന്നിവര്‍ പറയുന്നത് ഈ വാക്യാംശം ദുര്‍ബലപ്പെടുത്തപ്പെട്ടിട്ടുണ്ടെന്നാണ്. അത് ഇമാം ബുഖാരി(റ) ഉദ്ധരിച്ചിട്ടുണ്ട്. അവരുടെ വിവരണപ്രകാരം വ അലല്ലദീന യുത്വീഖൂനഹു എന്നതിന് 'നോമ്പ് നോല്‍ക്കാന്‍ കഴിവുള്ളവര്‍ക്ക്' എന്നാണര്‍ഥം. അവര്‍ വ്യക്തമാക്കുന്നു: ഈ വാക്യം അവതരിച്ചപ്പോള്‍ നോമ്പിന് കഴിവുള്ളവര്‍ തന്നെ ചിലര്‍ നോല്‍ക്കുകയും ചിലര്‍ നോല്‍ക്കാതെ പ്രായശ്ചിത്തം കൊടുത്തുവരികയും ചെയ്തുവന്നു. പിന്നീട് 'ആ മാസത്തില്‍ സന്നിഹിതരായവര്‍ നോമ്പനുഷ്ഠിക്കട്ടെ...' എന്ന ആയത്ത് അവതരിച്ചപ്പോള്‍ ഇതിന്റെ വിധി നസ്ഖ് ചെയ്യപ്പെട്ടുപോയി. ചോ : യാത്ര പുറപ്പെടുന്നതിന് ദിവസങ്ങളുടെയും സമയങ്ങളുടെ പ്രാധാന്യം ഒന്ന് വ്യക്തമാക്കാമോ? ഉ : വ്യായാഴ്ചയാണ് യാത്ര പുറപ്പെടാന്‍ ഏറ്റവും നല്ല ദിവസം. യാത്ര ഉദ്ദേശിക്കുന്നവന്‍ വ്യായാഴ്ച തെരെഞ്ഞെടുക്കല്‍ സുന്നതുമാണ്. വ്യായാഴ്ച സൌകര്യപ്പെട്ടില്ലെങ്കില്‍ തിങ്കളാഴ്ചയാണ് നല്ലത്. ഏത് ദിവസം യാത്ര പുറപ്പെടുകയാണെങ്കിലും രാവിലെ പോകുന്നതാണുത്തമം. വ്യായാഴ്ച യാത്ര പുറപ്പെടല്‍ നബി തങ്ങള്‍ ഇഷ്ടപ്പെട്ടിരുന്നുവെന്നും വളരെ കുറച്ച് മാത്രമേ വ്യായാഴ്ച അല്ലാത്ത ദിവസം നബി യാത്രക്കു തെരെഞ്ഞെടുത്തിട്ടുള്ളൂവെന്നും ബുഖാരിയും മുസ്‍ലിമും റിപ്പോര്‍ട്ട് ചെയ്ത ഹദീസില്‍ കാണാം. നബി മക്കയില്‍ നിന്ന് ഹിജ്റ പോയത് തിങ്കളാഴ്ച ദിവസമാണെന്ന ഹദീസ് ഇമാം നവവി (റ) മജ്മൂഇല്‍ ഉദ്ധരിച്ചിട്ടുണ്ട്. രാവിലെകളില്‍ തന്റെ ഉമ്മതിന് ബറകത് ചെയ്യണേയെന്ന് നബി (സ) പ്രാര്‍ത്ഥിച്ചിരുന്നു. നബി യുദ്ധത്തിനായി സൈന്യത്തെ അയക്കുകയാണെങ്കില്‍ രാവിലെയാണ് പറഞ്ഞയക്കാറ്. സ്വഖ്‍റ് എന്ന ആള്‍ ഒരു കച്ചവടക്കാരനായിരുന്നു. തന്റെ കച്ചവട സംഘത്തെ അദ്ദേഹം രാവിലെയാണ് അയക്കാറുള്ളത്.അദ്ദേഹത്തന് നല്ല ലാഭവും ലഭിക്കാറുണ്ടായിരുന്നു. ഈ ഹദീസ് അബൂ ദാവൂദ് (റ) തുര്‍മുദി (റ) തുടങ്ങിയവര്‍ ഉദ്ധരിച്ചിട്ടുണ്ട്. ചോ : അഞ്ച് വഖ്ത് നിസ്കാരത്തിനു ശേഷമുള്ള ദുആ വിശദീകരിച്ച് തരുമോ? ഉ : നിസ്കാരത്തില്‍ നിന്ന് വിരമിച്ചാല്‍ ഹംദും സ്വലാതും ചൊല്ലിയതിനു ശേഷം ഉദ്ദേശിച്ചതെന്തും ദുആ ചെയ്യണമെന്ന് നബി തങ്ങള്‍ പറഞ്ഞിട്ടുണ്ട്. എല്ലാ നിസ്കരാത്തിനു ശേഷവും നബി (സ) തങ്ങള്‍ കല്‍പിച്ച ഏതാനും ചില ദൂആകളാണിവ : اللَّهُمَّ اغْفِرْ لي ذُنُوبي وَخَطايايَ كُلَّها، اللَّهُمَّ انْعِشْنِي واجْبُرْنِي، وَاهْدِنِي لِصَالِح الأعْمالِ وَالأخْلاقِ، إنَّهُ لاَ يَهْدِي لِصَالِحها وَلاَ يَصْرِفُ سَيِّئَها إِلاَّ أَنْت ‏اللَّهُمَّ اجْعَلْ خَيْرَ عُمُرِي آخِرَهُ، وَخَيْرَ عَمَلِي خَواتِمَهُ، وَاجْعَلْ خَيْرَ أَيَّامي يَوْمَ ألْقاكَ‏ اللَّهُمَّ إني أعُوذُ بِكَ مِنَ الكُفْرِ وَالفَقْرِ وَعَذَابِ القَبْرِ സുബ്ഹ് നിസ്കാരത്തിനു ശേഷം നബി (സ്വ) തങ്ങള്‍ ഇങ്ങനെ ദുആ ചെയ്യാറുണ്ടായിരുന്നു:‏اللَّهُمَّ إني أسألُكَ عِلْماً نافِعاً، وعَمَلاً مُتَقَبَّلاً، وَرِزْقاً طَيِّباً‏. ഓരോ നിസ്കാരത്തിനു ശേഷവും പ്രത്യേകം ദുആ ഹദീസുകളില്‍ വന്നിട്ടില്ല. ചോ : ഞാന്‍ ജോലി ചെയ്യുന്ന വീട്ടിലെ (ഗള്‍ഫില്‍) വീട്ടുവളപ്പിലെ പഴവര്‍ഗ്ഗങ്ങള്‍ വീണു കിടക്കുന്നത് ഏടുത്ത് അനുവാദം ചോദിക്കാതെ ഭക്ഷിക്കാമോ ? ഓരോ പ്രവശ്യവുംഅനുവാദം ചോദിക്കല്‍ ആവശ്യമാണോ? ഉ : ഉടമസ്ഥന്റെ സമ്മതമുണ്ടെങ്കില്‍ അത്തരം പഴങ്ങള്‍ ഭക്ഷിക്കാവുന്നതാണ്. തന്റെ ബന്ധുവിന്റെയോ സുഹൃത്തിന്റെയോ ഭക്ഷണങ്ങള്‍ അവന്‍ തൃപ്തിപ്പെടുമെന്ന് പ്രതീക്ഷിച്ചാല്‍ അനുവദനീയമാണ്. നാം ഭക്ഷിക്കുന്ന സാധനങ്ങള്‍ക്കനുസരിച്ചായിരിക്കുമല്ലോ ഉടമസ്ഥന്റെ തൃപ്തിയും തൃപ്തി ഇല്ലായ്മയും. അപ്പോള്‍ എന്താണോ നാം ഭക്ഷിക്കുന്നത് അത് ഉടമസ്ഥന് തൃപ്തിയായിരിക്കുമെന്ന് വിചാരിക്കുന്നുവെങ്കില്‍ ഭക്ഷിക്കാവുന്നതാണ്. ചോ : ഇസ്ലാമിക ശരീഅത്ത് നിലവിലില്ലാത്ത ഒരു രാജ്യത്ത് അനിസ്ലാമിക പരമായ ഒരു നിയമം നിലവിൽ വന്നാൽ അല്ലെങ്കിൽ ഇസ്‍ലാം ഹറാം ആക്കിയ ഒരു കാര്യം നിയമ വിധേയമായാൽ ഒരു മുസ്ലിം ന്റെ നിലപാട് എന്തായിരിക്കണം....?. ചോദ്യത്തിന്റെ വ്യക്തതക്ക് വേണ്ടി ..അടുത്തിടെ പരസ്പര സമ്മതത്തോട് കൂടി സ്വർഗ്ഗരതി ഇന്ത്യയിൽ കുറ്റകരമല്ല എന്ന വിധി ഉണ്ടായല്ലോ ..ഇവിടെ ഒരാൾ ഒരു മുസ്ലിമിനോട് ഈ വിധിയെ എങ്ങനെ കാണുന്നു എന്ന ചോദ്യത്തിന് ..മുസ്ലിമിന്റെ മറുപടി എന്തായിരിക്കണം ..? അനുകൂലിക്കണോ (യഥാർത്ഥ വിശ്വാസി ഇതിനു പോകില്ലല്ലോ ...അമുസ്ലിംസിനു അവരുടെ താൽപര്യയം പോലെ ആകാലോ എന്ന വീക്ഷണത്തിൽ ആണ് അനുകൂലിക്കണോ എന്ന് ചോദിച്ചത് )...അതോ എതിർക്കണോ ...? ഉ : ഇസ്ലാം നിഷിദ്ധമാക്കിയ ഒരു കാര്യം അനുവദനീയമാക്കുകയോ ആരെങ്കിലും അങ്ങനെ അനുവദനീയമാക്കിയാല്‍ അതിനെ അനുകൂലിക്കുകയോ ചെയ്യാന്‍ ഒരു മുസ്ലിമിന് പാടില്ല. കാരണം ഒരു വിശ്വാസി വിശ്വാസിയായി നിലനിൽക്കണമെങ്കിൽ അല്ലാഹുവിന്റെ നിയമങ്ങളെ അണുകിട തെറ്റാതെ അംഗീകരിക്കുകയും സാഹചര്യങ്ങൾ നിർബ്ബന്ധിക്കുന്നതിനനുസരിച്ച് ദൈവിക നിയമങ്ങളെ പുറംകാലു കൊണ്ട് തട്ടാതിരിക്കുകയും വേണം. ഏതെങ്കിലും രാജ്യത്ത് അത്തരം നിയമ നിര്‍മ്മാണങ്ങള്‍ നടത്തപ്പെട്ടാല്‍ അത് നിയമപരമായും ജനാധിപത്യ രീതിയിലും തിരുത്താനുള്ള ശ്രമങ്ങള്‍ നടത്തുകയാണ് വേണ്ടത്. നിലവിലെ രാഷ്ട സംവിധാനത്തിൽ കൂട്ടായ അത്തരം ശ്രമങ്ങൾ വിജയിക്കുന്നത് സർവ്വസാധാരണവുമാണ്. അതിനാൽ ആ രാജ്യത്തെ വിശ്വസികൾക്ക് അവർ വ്യക്തികൾ എന്ന നിലയിലും ഉമ്മത്ത് എന്ന നിലയിലും ഇക്കാര്യം നിർവ്വഹിക്കൽ ബാധ്യതയാണ്. എന്നാൽ ഇസ്ലാം നിഷിദ്ധമാക്കിയ ഇത്തരം ഒരു കാര്യത്തില്‍ രാജ്യത്ത് വ്യത്യസ്തമായ നിയമമുണ്ട് എന്ന് സമാധാനിച്ചു കൊണ്ട് അത് ചെയ്യാൻ ശ്രമിക്കുന്നതും അനുകൂലിക്കുന്നതും അല്ലാഹുവിന് ഇഷ്ടമില്ലാത്തതും അവന്റെ കോപവും ശിക്ഷയും ക്ഷണിച്ചു വരുത്തുന്നതുമാണ് (സൂറത്തുന്നൂർ, സൂറത്തു യൂസുഫ്, സൂറത്തുന്നിസാഅ്, സൂറത്തുൽ മാഇദഃ). ചോ : White gold ആണുങ്ങൾക്ക് ഇടാൻ പറ്റുമോ? ഉ : വൈറ്റ് ഗോൾഡ് എന്നത് കൊണ്ട് ഉദ്ദേശിക്കപ്പെടുന്നത് സാദാ സ്വർണ്ണത്തിൽ വെള്ളിയോ നിക്കലോ സിങ്കോ പ്ലാറ്റിനമോ ഒരു പ്രത്യേക അളവിൽ ചേർത്തോ മറ്റോ അതിന്റെ കളർ മാറ്റുന്നതാണെങ്കിൽ അത് ധരിക്കൽ പുരുഷന്മാർക്ക് ഹറാമാണ്, സ്ത്രീകൾക്ക് ഹലാലുമാണ്. എന്നാൽ സ്വർണ്ണം കലരാത്ത പ്ലാറ്റിനമാണ് ഉദ്ദേശിക്കുന്നതെങ്കിൽ അത് സ്വർണ്ണത്തേക്കാൾ വിലപിടിപ്പുള്ളതാണെങ്കിലും അത് ധരിക്കൽ പുരുഷനും സ്ത്രീക്കും അനുവദനീയമാണ് (തുഹ്ഫ) നാളെ മീസാനിൽ നന്മ ഭാരം കൂടാൻ വേണ്ടിയെങ്കിലും നിങ്ങളോട് ബന്ധപ്പെട്ടവർക്കും, നിങ്ങളുള്ള മറ്റു ഗ്രൂപ്പിലേക്കും ഈ അറിവ് ഫോർവേർഡ് ചെയ്ത് കൊടുക്കുക.. അറിയാനും, പഠിക്കാനും, അതിനനുസരിച്ചു പ്രവർത്തിക്കാനും അല്ലാഹു നമുക്ക് തൗഫീഖ് നൽകട്ടെ... ആമീൻ *صَلَّى اللّٰه عَلَى مُحَمَّدْ صَلَّى اللَّهُ  عَلَيْهِ وَسَلَّمْ* *صَلَّى اللّٰه عَلَى مُحَمَّدْ صَلَّى اللَّهُ  عَلَيْهِ وَسَلَّمْ* *اَللّٰهُمَّ صَلِّ عَلَى مُحَمَّدْ يٰارَبِّ صَلِّ عَلَيْهِ وَسَلِّمْ* ദുആ വസിയ്യത്തോടെ.... #🕌 ഇസ്ലാമിക് ഭക്തി #🕋 ഇസ്ലാമിക് സ്റ്റാറ്റസ് #🙋‍♀️ എൻ്റെ സ്റ്റാറ്റസുകൾ