ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/637qP4w?d=n&ui=v64j8rk&e1=cമരുമകൾ 45 ഒടുവിൽ വിട്ട് മാറുമ്പോൾ രണ്ട് പേരും ചിരിക്കുന്നുണ്ടായിരുന്നു. എന്നെ ആശ്വസിപ്പിക്കേണ്ട ആളാണ്‌. ഇതിപ്പോ ഞാൻ ഹരിയേട്ടനെയാ ആശ്വസിപ്പിച്ചത്. അത് ഓർത്തിട്ടാണ് എനിക്ക് ചിരി വന്നത്. ആളിപ്പോ എന്തിനാണാവോ ചിരിച്ചത്? " എന്നാലും നീ ചിന്തിച്ച് ചിന്തിച്ച് ഏത് വരെ പോയെന്റെ ദേവൂ ? " താടിക്ക് കൈ താങ്ങി ഇരുന്ന് എന്നെ നോക്കി പറയവേ എനിക്കും ചിരി വന്നു. അപ്പൊ അതാണ്‌ ഈ ചിരിക്ക് കാരണം. " മ്മ്... ഈ പ്രശ്നം വളർന്ന് വളർന്ന് വലുതായി അമ്മ എന്നെ അടിച്ചിറക്കുന്നത് വരെ... അത്രയല്ലേ ഞാൻ ചിന്തിച്ചുള്ളൂ? " ഞാൻ കൈ മലർത്തി. " ഓവർ തിങ്കിങ് ഒരു പ്രശ്നം തന്നെ ആണല്ലേ? " എന്റെ നേർക്ക് കണ്ണയച്ചാണ് ചോദ്യം. " എനിക്കും ഉണ്ടത്. ഇതാണ് ചേരേണ്ടവരെ ചേരൂ എന്ന് പറയണത്. " അതും പറഞ്ഞാള് കണ്ണടച്ച് ചിരിക്കുന്നുണ്ട്. ആ കൈക്ക് ഇടയിലൂടെ കൈ കോർത്തിരുന്ന് ഞാനും ചിരിച്ചു. " ആ ചേട്ടൻ എന്ത് കരുതിക്കാണും ഹരിയേട്ടാ? " എനിക്കത് ആലോചിച്ചിട്ടും ഉണ്ടായിരുന്നു ടെൻഷൻ. " ഞാൻ അമ്മയോട് സംസാരിച്ചോണ്ട് നിന്നപ്പോ രാജേഷ് വിളിച്ചിരുന്നു. അവര് തമ്മിൽ ഉള്ളത് അവര് തീർക്കട്ടെ... നമുക്ക് ഒന്ന് പുറത്ത് പോയി വരാമെന്നു പറഞ്ഞിട്ട്.... " " ഞാൻ വലിയ പ്രശ്നക്കാരി ആണെന്ന് കരുതിക്കാണും അല്ലെ? " എനിക്കത് ഓർത്തിട്ട് നാണക്കേട് തോന്നി. " നിങ്ങൾ തമ്മിൽ പ്രശ്നം ഒന്നും ഇല്ലാന്ന് ഞാൻ പറഞ്ഞിട്ടുണ്ട് അവനോട്. " ഞാൻ ഒന്നും മിണ്ടിയില്ല. അതൊക്കെ പുള്ളിക്കാരൻ വിശ്വസിച്ചത് തന്നെ...! " വിശക്കുന്നു... കഴിക്കണ്ടേ? " ഹരിയേട്ടൻ എഴുന്നേറ്റ് നിന്നു. " ഇപ്പൊ എന്നെ കണ്ടാൽ അമ്മ ചൂലെടുക്കും. ഹരിയേട്ടൻ പൊക്കോ... എനിക്ക് അല്ലെങ്കിലും വിശക്കുന്നില്ല. വയറു നിറഞ്ഞു. " വീണ്ടും ഒരു മന്തത വന്നേനെ പൊതിഞ്ഞു. " മ്ച്ചും.... കഴിക്കാതെ കിടക്കാനോ? വന്നെ ഇങ്ങോട്ട്.... " കയ്യിൽ പിടിച്ച് എഴുന്നേൽപ്പിക്കാൻ നോക്കുന്നുണ്ട് ഹരിയേട്ടൻ. " വേണ്ട ഹരിയേട്ടാ.... വയറൊക്കെ വല്ലാതെ.... വേണ്ടാഞ്ഞിട്ടാ... പോയി കഴിച്ചിട്ട് വായോ.... " പറയുന്നതിനൊപ്പം ചാഞ്ഞു കിടന്നിരുന്നു ഞാൻ. എന്നെ ഒന്നൂടെ നോക്കി ഹരിയേട്ടൻ ഡോർ തുറന്ന് ഇറങ്ങിപ്പോയി. 🦋 🦋 🦋 🦋 🦋 മൂക്കിൽ ദോശയുടേം കറിയുടേം മണം അടിച്ചപ്പോഴാണ് കണ്ണ് തുറന്ന് നോക്കിയത്. മുന്നിൽ ഒരു കയ്യിൽ പ്ളേറ്റും മറു കയ്യിൽ ഗ്ലാസും പിടിച്ച് ഹരിയേട്ടൻ. " അവര് കഴിച്ചിട്ട് കിടന്നു. എനിക്ക് ഉണ്ടാക്കി വച്ചിരുന്നു... " പറഞ്ഞിട്ട് ഗ്ലാസ്സ് ടേബിളിൽ വച്ച് കട്ടിലിലേക്കിരുന്നു. " എണീക്ക്... കഴിക്കാം. " ഒരു കൈ കൊണ്ട് എന്നെ വലിച്ച് പൊക്കി. " പോയി കൈ കഴുകീട്ട് വാ.... " " എനിക്ക് വേണ്ടാന്നെ... ഹരിയേട്ടൻ കഴിച്ചോ... " ഞാൻ അത് പറഞ്ഞു തീരും മുന്നേ കറിയിൽ മുക്കിയ ദോശ എന്റെ വായിലേക്ക് നീണ്ടു വന്നിരുന്നു. എനിക്ക് കണ്ണ് നിറഞ്ഞു. അമ്മേ ഓർമ്മ വന്നു.... കുഞ്ഞിലേ അച്ഛന്റെ അടിയോ വഴക്കോ ഒക്കെ കിട്ടീട്ട് ഒന്നും കഴിക്കാതെ പിണങ്ങി കിടക്കുമ്പോ അമ്മ ആഹാരം വായിലേക്ക് വച്ച് തരുന്നത് ഓർത്ത് പോയി ഞാൻ.... അറിയാതെ വായ് തുറന്നു. എടുത്തിട്ട് വന്ന ദോശയിൽ അധികവും ഞാൻ തന്നെ കഴിച്ച് തീർത്തു. അല്ലെങ്കിലും സ്നേഹം ചാലിച്ചു തരുന്ന ആഹാരത്തിന് രുചി കൂടുമല്ലോ? അത് കഴിക്കാൻ വിശപ്പും..... കഴിച്ച് കഴിഞ്ഞിട്ട് എച്ചിൽ വാ പോലും കഴുകാതെ ആ കവിളിൽ അമർത്തി ചുംബിക്കുമ്പോ എന്റെ മനസ്സ് അത്ര കണ്ട് നിറഞ്ഞു നിന്നിരുന്നു. എന്റെ മുന്നിൽ ഇരിക്കുന്ന ഈ മനുഷ്യനോടുള്ള സ്നേഹം കൊണ്ട്...... 🦋 🦋 🦋 🦋 🦋 അമ്മ പിന്നീട് കുറേ നാള് മൗന വൃതത്തിൽ ആയിരുന്നു. എന്നോട് മിണ്ടില്ല എന്ന് മാത്രമല്ല, ഞാൻ നിൽക്കുന്ന സ്ഥലത്ത് പോലും നിൽക്കില്ല ആള്. ഈ 'കുരിശ് കണ്ട ചെകുത്താനെപ്പോലെ' എന്നെ കാണുമ്പോഴേ ഇറങ്ങി ഒറ്റ പോക്കാണ്. അവരെ സംബന്ധിച്ച് ഞാൻ ഒരു കുരിശാണല്ലോ? ഹരിയേട്ടനോടും അങ്ങനെ മിണ്ടാറില്ല. ഹരിയേട്ടൻ എന്തെങ്കിലും പറഞ്ഞാൽ കേൾക്കും. ചോദിക്കുന്നതിനു മറുപടി പറയും. അത്ര തന്നെ. അച്ഛൻ പക്ഷെ ഹരിയേട്ടനോട് മുന്നത്തെ പോലെ തന്നെ മിണ്ടാറുണ്ട്. എന്നോട് പിന്നെ പണ്ടേ മിണ്ടാറില്ലല്ലോ? ഇങ്ങനെ പോയാലും വേണ്ടില്ല പ്രശ്നങ്ങൾ ഒന്നും ഇല്ലാത്തിരുന്നാൽ മതി എന്ന് ഞാനും കരുതി. അമ്മ എപ്പോഴത്തെയും പോലെ രാവിലെ ഉണർന്ന് ആഹാരം ഉണ്ടാക്കും. പുതിയ കാര്യം എന്താണെന്ന് വച്ചാൽ, തലേന്ന് അരിഞ്ഞു വയ്ക്കുന്നതൊക്കെ രാവിലെ എഴുന്നേറ്റ പാടേ ഡൈനിംഗ് ടേബിളിൽ നിരത്തി വയ്ക്കും ആയമ്മ. ഞാനത് നോക്കി എന്തൊക്കെയാണ് ഉണ്ടാക്കുന്നത് എന്ന് മനസ്സിലാക്കി തേങ്ങ ചിരകി അരച്ച് വയ്ക്കണം. അതാണ് ആ നിരത്തലിന്റെ ഉദ്ദേശം. ആദ്യത്തെ ദിവസം തേങ്ങ എന്തിനൊക്കെ വേണമെന്ന് ഞാൻ ചോദിച്ചിരുന്നു. ചോദ്യം കേട്ടിട്ട് അവര് അടുക്കളേന്ന് ഇറങ്ങി ഒറ്റ പോക്ക്. അതോടെ ചോദ്യം നിർത്തി. അത് കഴിഞ്ഞ് തുടങ്ങിയ പരിപാടിയാണിത്. ഇതാകുമ്പോ എന്റെ ജോലി ഞാൻ ചെയ്യേം ചെയ്യും അവർക്ക് എന്നോട് മിണ്ടേം വേണ്ട. എങ്ങനെയുണ്ട് അമ്മായീടെ ബുദ്ധി...?? അത് കൂടാതെ പുതിയ ഒരു പരിപാടി കൂടി തുടങ്ങുകയും ചെയ്തു. ഞാൻ വൈകിട്ട് കോളേജിൽ നിന്നും വരുന്നത് വരെ ഉച്ചയ്ക്കലത്തെ പാത്രങ്ങൾ ഒക്കെ കഴുകാതെ സിങ്കിൽ തന്നെ ഇട്ടേക്കും. സാധാരണ അതൊക്കെ കഴുകി വയ്ക്കാറുണ്ടായിരുന്നു. രാത്രിയുള്ള പാത്രങ്ങൾ കഴുകേണ്ട ഡ്യൂട്ടി മാത്രമേ എനിക്ക് ഉണ്ടായിരുന്നുള്ളൂ.... ഇതിപ്പോ വഴക്കിനു ശേഷം പുതിയതായി തുടങ്ങിയതാണ്. അത് പോലെ വീടും തൂത്ത് വൃത്തിയാക്കാതെ അങ്ങനെ കിടക്കും. ദേഷ്യം വരുമെങ്കിലും രാത്രി പാത്രങ്ങൾ കഴുകുന്ന കൂടെ അതൂടെ കഴുകി വയ്ക്കും ഞാൻ. വീടൊന്നും തൂക്കാൻ നിൽക്കില്ല. വീട് വൃത്തിയാക്കുന്ന പരിപാടി ശനിയും ഞായറും മാത്രമായി ഒതുങ്ങി. അമ്മായീടെ മൗനവൃതം ഒഴികെ മറ്റ് പ്രശ്നങ്ങൾ ഒന്നും ഇല്ലാതെ ദിവസങ്ങൾ കടന്ന് പോയി. 🦋 🦋 🦋 🦋 🦋 അന്നത്തെ ബഹളം നടന്നിട്ട് ഒരു മാസത്തിനു ശേഷമുള്ളൊരു തിങ്കളാഴ്ച..... കോളേജിൽ നിന്ന് വന്ന് അടുക്കളയിലേക്ക് കയറിയ ഞാൻ അന്തിച്ചു നിന്ന് പോയി. സിങ്കിൽ പാത്രങ്ങൾ ഒന്നും ഇല്ല എന്ന് മാത്രമല്ല, വീടൊക്കെ തൂത്ത് വൃത്തിയാക്കി ഇട്ടിരിക്കുന്നു. " ചായ ഇട്ട് വച്ചിട്ടുണ്ട്. എടുത്തു കുടിച്ചോ... " പിറകിൽ അശരീരി പോലെ കേട്ട് ഞെട്ടി തിരിഞ്ഞു നോക്കുമ്പോഴുണ്ട് തൊട്ട് പിന്നിൽ അമ്മായി. എന്റെ കണ്ണ് ഊരി വീഴാത്തത് എന്റെ ഭാഗ്യം. " കുടിക്ക്.... " കൂടെ ഒരു ചിരിയും. ഇനി ഞെട്ടാൻ എനിക്ക് വയ്യെന്നത് പോലെ കൈ അടുക്കള സ്ലാബിലേക്ക് താങ്ങി നിന്നു. ഇവരുടെ തലയിലിനി തേങ്ങ വല്ലോം വീണോ ആവോ? 'അമ്മായി പുതിയ എന്തോ പണി അണിയറയിൽ ഒരുക്കുന്നുണ്ട്. Be careful!' എന്റെ ഉള്ളിലെ ഞാൻ എനിക്ക് മുന്നറിയിപ്പ് തന്നു. അന്ന് പിന്നെയും എന്തൊക്കെയോ ചോദിച്ചും പറഞ്ഞും പഴയത് പോലെ പെരുമാറാൻ തുടങ്ങി അമ്മ. പെട്ടെന്ന് ഒരു ദിവസം ഒക്കെ മറന്ന് ഇവര് നന്നായോ? ആലോചിച്ചു തല പുകച്ച് എനിക്ക് വട്ടായി എന്ന് പറഞ്ഞാൽ മതിയല്ലോ? എത്ര പുകച്ചിട്ടും അമ്മായീടെ ഉദ്ദേശം മാത്രം മനസ്സിലായില്ല. എന്തായാലും ഹരിയേട്ടൻ അതോടെ ഹാപ്പിയായി. പ്രശ്നങ്ങൾ ഒക്കെ ഒഴിഞ്ഞു പോയിക്കാണുമെന്ന് കരുതിക്കാണും പാവം. " നീയും അമ്മയും പരസ്പരം സംസാരിക്കുന്നത് കാണുമ്പോ വല്ലാത്ത ആശ്വാസം ഉണ്ട് ദേവൂ.... പഴയത് പോലെ ആവില്ല എന്നറിയാം. എന്നാലും.... മിണ്ടുന്നുണ്ടല്ലോ? അത്രേം സമാധാനം. " ഇടയ്ക്ക് ആള് പറയുകേം ചെയ്തു. എന്നാലും ഞാൻ സദാ ജാഗരൂകയായിരുന്നു. അന്നത്തേതിലും വലുതെന്തോ വരാൻ പോകുന്നു എന്നൊരു തോന്നൽ എനിക്ക് എപ്പോഴും ഉണ്ടായിരുന്നു. അങ്ങനെ അമ്മായീടെ പുതിയ ഭാവമാറ്റത്തേക്കുറിച്ച് ചർച്ച ചെയ്യാനാണ് മീനൂനെ വിളിച്ചത്. " നീ സൂക്ഷിച്ചോടി... അവരെന്തോ മുട്ടക്കാട്ടൻ പ്ലാൻ ഉണ്ടാക്കുന്നുണ്ട്. സംശയിക്കേ വേണ്ട... " " എന്തോന്ന്? മുട്ട.... കാട്ടോ....? " ഇവളിതൊക്കെ എവിടുന്ന് പഠിക്കുന്നോ? " മുട്ട കാട്ടം അല്ല.. കോഴിക്കാട്ടം.... എടീ.... മുട്ടക്കാട്ടൻ.... എന്ന് വച്ചാ വലിയ പ്ലാൻ.... മലയാളം ഡിക്ഷണറിയിലെ പുതിയ വാക്കുകൾ ഒന്നും അറിയാത്ത സില്ലി ഗേൾ... " അവൾക്ക് എന്നെ പുച്ഛം. " വോ.... പഴയതൊക്കെ അറിഞ്ഞാ മതി എനിക്ക്. നീ വല്ല ഊഹോം ഉണ്ടെങ്കി പറ. " " അങ്ങനെ ചോദിച്ചാൽ... കുറെയുണ്ട്.... അതിൽ ഫസ്റ്റ് ഒൺ........ ഇനി അവരുണ്ടാക്കുന്നതൊക്കെ ആദ്യം വല്ല പൂച്ചയ്ക്കോ പട്ടിക്കോ കൊടുത്തിട്ട് നീ കഴിച്ചാൽ മതി.... അല്ലേൽ വേണ്ട... അമ്മാവന് കൊടുക്ക്. നിന്റെ അമ്മായി എന്തായാലും അങ്ങേർക്ക് പട്ടീടേം പൂച്ചെടേം ഒക്കെ വില തന്നല്ലേ കൊടുത്തിട്ടുള്ളൂ...? അങ്ങേര് ചത്തില്ലേല് നീ കഴിച്ചോ.... സ്നേഹം നടിച്ചു ആഹാരത്തിൽ വിഷം ചേർത്ത് തരാൻ ഞാൻ സാധ്യത കാണുന്നുണ്ട്. ആ പിന്നേ.... അമ്മായിക്ക് തന്നെ കൊടുത്ത് പരീക്ഷിക്കാൻ നിക്കണ്ട. അവര് തന്നെ സയനൈടാ... അതില് വേറെ വിഷം ഒന്നും ഏക്കൂല്ല. ഇനി സെക്കന്റ്‌ ഒൺ..... പറ്റുമെങ്കി വീട്ടിൽ ഒരു കീരിയെ വളർത്തിക്കോ.... പാമ്പിനെക്കൊണ്ട് കടിപ്പിച്ചു കൊല്ലുന്നതൊക്കെയാ ഇപ്പോഴത്തെ ട്രെൻഡ്... " അവള് പറയുന്നതൊക്കെ കേട്ടന്റെ കണ്ണ് മിഴിഞ്ഞു പോയി. അത് അങ്ങനെ ഒരു ദുരന്തം എക്സ്പ്രസ്സ്‌....! " ഇനീം ഉണ്ട്. കേക്കണോ? " അവള് ആവേശത്തിലാണ്. " യ്യോ... വേണ്ടായേ.... മതിയായി. " ഇവളെ വിളിക്കാൻ പോയ എന്നെ പറഞ്ഞാൽ മതിയല്ലോ എന്ന് സ്വയം പരിതപ്പിച്ചു ഞാൻ കാൾ കട്ടാക്കി. 🦋 🦋 🦋 🦋 🦋 ഈ ഒരു മാസത്തിനിടയ്ക്ക് മറ്റൊരു സംഭവം കൂടി ഉണ്ടായി. ഞാൻ പറയാൻ വിട്ട് പോയൊരു പ്രധാന സംഭവം. ഇടയ്ക്ക് ഒരു ദിവസം അമ്മ വിളിച്ചു. എനിക്ക് ഹരിയേട്ടൻ പുതിയ ഫോൺ വാങ്ങിത്തന്നപ്പോ ഞാൻ എന്റെ പഴയ ഫോൺ അമ്മയ്ക്ക് കൊടുത്തിരുന്നു. സാധാരണ അങ്ങനെ അമ്മേടെ ഫോണിൽ നിന്ന് ഇങ്ങോട്ട് വിളിക്കാറില്ല. അതില് ബാലൻസ് ഉണ്ടാവില്ല എന്നത് തന്നെ കാരണം. അച്ഛൻ ചാർജ് ചെയ്തു കൊടുക്കാതെ എങ്ങനെ ഉണ്ടാവാനാ? അത് അറിയുന്നോണ്ട് ഞാൻ അമ്മേ അങ്ങോട്ട് വിളിക്കാറാണ് പതിവ്. ഇനി എന്തെങ്കിലും അത്യാവശ്യം ഉണ്ടെങ്കിൽ മാത്രം അമ്മ മീനുവിന്റെയോ മധുവിന്റെയോ ഫോണിൽ നിന്ന് ഇങ്ങോട്ട് വിളിക്കും. അന്നെന്നെ വിളിച്ചതും മധുവിന്റെ ഫോണിൽ നിന്ന് തന്നെയാണ്. ഇതെന്ത് പറ്റി എന്ന് അത്ഭുതപ്പെട്ടാണ് കാൾ എടുത്തത്. അപ്പഴോ.... അമ്മയ്ക്ക് പതിവില്ലാത്ത വിധം സന്തോഷം.... കാരണം വേറെ ഒന്നും അല്ല.... അമ്മമ്മ.... അതായത് അമ്മേടെ അമ്മ വീട്ടിലേക്ക് വന്നിരുന്നു അത്രേ... അതും മൂത്ത മാമന്റെ കൂടെ. ഇതിൽപ്പരം സന്തോഷം അമ്മയ്ക്ക് വേറെ ഉണ്ടാവാനുണ്ടോ? എനിക്ക് പക്ഷെ അത് കേട്ടപ്പോ ആദ്യം ആധി ആണ് കയറിയത്. അച്ഛനും അച്ഛമ്മേം അവരോട് മോശമായി പെരുമാറിക്കാണും എന്ന് ഉറപ്പല്ലേ? ആദ്യം അവരോട് നീരസം കാണിച്ചങ്കിലും അവര് വന്ന ഉദ്ദേശം അറിഞ്ഞപ്പോ അതൊക്കെ മാറി ഭയങ്കര സ്നേഹവും സൽക്കാരവും ഒക്കെ ആയിരുന്നു എന്നും പറഞ്ഞു അമ്മ ചിരിക്കുന്നുണ്ടായിരുന്നു. അപ്പൂപ്പൻ സ്വത്തു ഭാഗം വച്ചത്രേ.... അപ്പൂപ്പന്റെയും അമ്മമ്മേടേം ഭാഗം ഒരുമിച്ചായിരുന്നു. അതിൽ അമ്മമ്മേടതിൽ ഒരു ഭാഗം അമ്മയ്ക്ക് കൊടുക്കണമെന്ന് അമ്മമ്മ കട്ടായം പറഞ്ഞു ന്ന്.... അപ്പൂപ്പൻ കുറേ മുട്ടാപ്പോക്ക് ന്യായം ഒക്കെ പറഞ്ഞ് നോക്കി എങ്കിലും അമ്മമ്മ ആളുടെ സ്റ്റാൻഡിൽ തന്നെ ഉറച്ചു നിന്നപ്പോ വേറെ നിവൃത്തി ഇല്ലാതെ സമ്മതിക്കേണ്ടി വന്നൂന്ന്... മാമനും അമ്മമ്മേ സപ്പോർട്ട് ചെയ്തു എന്നും പറഞ്ഞ് അമ്മ നിലത്തൊന്നും അല്ലായിരുന്നു... സ്വത്തു കിട്ടിയതിൽ ഒന്നുമല്ല, അവര് രണ്ടാളും വന്നതിൽ ആയിരുന്നു അമ്മയ്ക്ക് സന്തോഷം. അൻപതു സെന്റ് വസ്തു അമ്മേടെ പേരിലേക്ക് എഴുതിയതിന്റെ പ്രമാണം കൊടുക്കാനായിട്ടാ രണ്ടാളും വന്നത്. അത് അറിഞ്ഞേ പിന്നെ അച്ഛമ്മേം അച്ഛനും തേനും പാലും ഒലിപ്പിക്കയായിരുന്നു അത്രേ.... അവർക്ക് അല്ലേലും സ്വത്തും പണോം മതിയല്ലോ? മാമനും അമ്മയോട് മിണ്ടുകയൊക്കെ ചെയ്തു ന്ന്... ഇടയ്ക്ക് ഇനിയും വരാന്ന് ഒക്കെ പറഞ്ഞാണ് രണ്ടാളും പോയത്. പറഞ്ഞിട്ടും പറഞ്ഞിട്ടും മതിയാവാത്തത് പോലെ അമ്മ പിന്നേം പിന്നേം വിശേഷങ്ങൾ പറയുന്നുണ്ടായിരുന്നു. ഞാൻ ജനിച്ചിട്ട് ഇന്നേ വരെ അമ്മേടെ സൗണ്ടിൽ ഇത്രേം സന്തോഷം അറിഞ്ഞിട്ടില്ല എന്ന് തോന്നി എനിക്ക്.... എന്തായാലും ഇക്കാര്യം അമ്മായിയേം അമ്മാവനേം കൂടി അറിയിക്കാൻ തന്നെ ഞാൻ തീരുമാനിച്ചു. അമ്മേടെ സ്വത്തെന്ന് പറഞ്ഞാൽ ഭാവിൽ അത് എന്റേതല്ലേ? ഈ പറഞ്ഞ property ആണേൽ സിറ്റിയിൽ റോഡ് സൈഡിലാണ് താനും. സെന്റിന് കുറഞ്ഞത് ഇരുപത് ലക്ഷം ഒക്കെ കിട്ടുമെന്നാണ് മാമൻ പറഞ്ഞത് എന്നും കൂടി അമ്മ പറഞ്ഞിരുന്നു. അഷ്ടിക്ക് വകയില്ലാത്ത എന്നെ ധർമ്മ കല്യാണം ചെയ്തതാണ് എന്നൊക്കെ ആയിരുന്നല്ലോ പറച്ചില്.? അതങ്ങനെ അല്ല എന്ന് അറിയിച്ചു കൊടുക്കണ്ടേ? അത് കൊണ്ട് അവരൂടെ കേൾക്കെ തന്നെയാണ് ഞാനിത് ഹരിയേട്ടനോട് പറഞ്ഞത്. എന്നാലേ അവര് രണ്ടിന്റെയും റിയാക്ഷൻ പ്രതീക്ഷിച്ചത് പോലൊന്നും ആയിരുന്നില്ലന്നേ.... രണ്ടാളും കേട്ട ഭാവം കാണിച്ചില്ല....! അവർക്ക് ഞാനിപ്പോ പുകഞ്ഞ കൊള്ളി ആണല്ലോ? അതിനെ എങ്ങനേം പുറത്താക്കാൻ നോക്കുന്നവരോട് ഇനി എന്ത് പറഞ്ഞിട്ടും കാര്യം ഇല്ല എന്നാണ് ഞാൻ അന്ന് കരുതിയത്. അതറിഞ്ഞ് ഒരാഴ്ച കൂടി കഴിഞ്ഞാണ് അമ്മായി മൗന വൃതം അവസാനിപ്പിച്ചത്. സ്വഭാവികമായും ഇതാവും കാരണം എന്ന് ഞാൻ കരുതി. ഇപ്പൊ ഞാൻ കോടീശ്വരി ആണല്ലോ? പണക്കാരിയായ മരുമകളോട് പിണക്കം കാണിക്കണ്ട എന്ന് കരുതിക്കാണും എന്ന് തന്നെ ഞാൻ ചിന്തിച്ചു. എന്നാൽ അമ്മായി മിണ്ടിത്തുടങ്ങിയതിന്റെ യദാർത്ഥ കാരണം അറിഞ്ഞത് പിന്നെയും ഒരാഴ്ച കൂടി കഴിഞ്ഞാണ്. 🦋 🦋 🦋 🦋 🦋 നിങ്ങളുടെ പ്രതീക്ഷയ്ക്കും അപ്പുറം ആണ് ഈ അമ്മായി. അടിയും പിടിയും കരച്ചിലും ഒന്നും അല്ല അവരുടെ ആയുധം. കുരുട്ട് ബുദ്ധിയാ.... 😁 പിന്നേ ഇത് അമ്മായീടേം മരുമകളുടെയും കഥയാണ്. മറ്റുള്ളവർക്ക് റോൾ അത്രേ കാണൂ..... തുടരും കണ്ണൂർകാരൻ ❤️❤️❤️❤️ #💞 പ്രണയകഥകൾ #📔 കഥ #📚 ട്വിസ്റ്റ് കഥകൾ #✍ തുടർക്കഥ #📙 നോവൽ