#📙 നോവൽ " നിങ്ങൾ എന്താ എന്നെ ഭീഷണിപെടുത്തുകയാണോ..? പണം കൊണ്ട് സകലതും വിലക്ക് വാങ്ങാം എന്നൊരു ഉദ്ദേശം നിങ്ങൾക്ക് ഉണ്ടെങ്കിൽ അത് വേണ്ട...! പ്രത്യേകിച്ച് എന്റെ അടുത്ത് ഒട്ടും വേണ്ട... "  മുന്നിൽ നിൽക്കുന്നവളുടെ കണ്ണുകളിൽ തീ ഗോളം ഉരുണ്ടു കൂടി വന്നു... സിതാര പകയോടെ അവനെ തന്നെ നോക്കി നിന്നു.. എന്നിട്ടും തനിക്ക് അഭിമുഖം നിൽക്കുന്നവനിൽ പരിഹാസം ആണ്.... ഞാനൊന്ന് വിചാരിച്ചാൽ അത് നേടി എടുക്കും... നിനക്ക് സംശയം ഉണ്ടോ? എന്നൊരു വെല്ലുവിളി അയാൾ മൗനമായി തനിക്ക് നേരെ തൊടുത്തു വിടുന്നുണ്ട്... ഒത്ത പൊക്കവും അതിനൊത്ത് വണ്ണവും ആയി ഒരുവൻ.. മുഖം ഒട്ടാകെ ആവരണം ചെയ്തിരിക്കുന്ന താടി നന്നായി വെട്ടി ഒതുക്കി വെച്ചിരിക്കുന്നു... ഷർട്ടും മുണ്ടും ആണ് വേഷം... ആ നീല കണ്ണുകൾക്ക് വല്ലാത്ത ഒരു വശ്യത ഉണ്ട്... " സ്വന്തം ആയി ഒരു മേൽവിലാസം പോലും ഇല്ലാത്ത നീ തമ്പുരാനെ വെല്ലുവിളിക്കാൻ നോക്കണ്ട.... " അവനൊപ്പം നിന്നിരുന്ന വാൽ സിതാരയേ നോക്കി പുച്ഛത്തോടെ പറഞ്ഞു... " തമ്പുരാനോ...? ഏത് തമ്പുരാൻ.. താൻ ഒക്കെ ഇത് ഏത് നൂറ്റാണ്ടിൽ ആടോ ഇപ്പോഴും ജീവിക്കുന്നത്... ഏഹ്? " സിതാര അങ്ങേ അറ്റം പരിഹാസത്തോടെ ചോദിച്ചു പോയി... " പണ്ടത്തെ രാജഭരണം ഒക്കെ കഴിഞ്ഞിട്ട് നാളേറെയായി... താനും തന്റെ തമ്പുരാനും ഒന്നുo അതറിഞ്ഞില്ലേ...? ഇപ്പോൾ ജനാധിപത്യo ആണ്... ഇനി കോവിലകം എന്നുo തമ്പുരാൻ എന്നും പറഞ്ഞു എന്റെ വഴിയേ വന്നാൽ.. സിതാര ഇരുവർക്കും നേരെ വിരൽ ചൂണ്ടി കൊണ്ട് പല്ല് ഞെരിച്ചു... വെട്ടി തിരിഞ്ഞു പോവുന്നവളെ നോക്കി ഇരുവരും അല്പം നേരം മൗനമായി നിന്നു.. " നീ വരും സിതാര..! എന്റെ ഭാര്യയായി എന്റെ കാൽ കീഴിൽ തന്നെ നീ വരും... അതിനുള്ള വഴി എന്താണെന്ന് എനിക്ക് നന്നായിട്ട് അറിയാം.. ചേതൻ കുടിലമായി ഉള്ളാലെ ഒന്നു ചിരിച്ചു... ചേതന്റെ ചിന്തകളിലേക്ക് അന്നേരം മുത്തച്ഛന്റെ വാക്കുകൾ തിങ്ങി നിറഞ്ഞു തുടങ്ങി... ⭐⭐⭐⭐⭐⭐⭐⭐⭐⭐⭐⭐⭐⭐⭐ " നിനക്ക് പറ്റില്ലെങ്കിൽ പറ്റില്ലെന്ന് പറഞ്ഞാൽ പോരെ എന്റെ താര... ഇത് ഇപ്പോൾ അയാളെ വെല്ലുവിളിക്കും പോലെ ആയില്ലേ..." അനന്തൻ അല്പം വേവലാതിയോടെ പറഞ്ഞു... " പിന്നെ ഞാൻ എന്ത് വേണമായിരുന്നു..? അയാളുടെ മുന്നിൽ ഭയന്നു വിറച്ചു നിൽക്കണമായിരുന്നോ... ആത്മാഭിമാനം എന്നൊരു കാര്യം ഇല്ലെങ്കിൽ മരിക്കുന്നതാ നല്ലത്... താര മടുപ്പോടെ മുഖം വെട്ടിച്ചു... " ദേ.. നീ പിണങ്ങാൻ വേണ്ടി പറഞ്ഞത് അല്ല... നിനക്ക് അറിയാലോ വീട്ടിലെ സ്ഥിതി... അവരൊക്കെ ഈ കാര്യത്തിൽ നിന്നെ പിന്തുണക്കുമെന്ന്  തോന്നുന്നുണ്ടോ...? " അനന്തൻ അവളിൽ നിന്നും കണ്ണെടുക്കാതെ തന്നെ ചോദിച്ചു.. സിതാരക്ക് ഒരു നിമിഷം അച്ഛന്റെയും അമ്മയുടെയും സ്മിതയുടെയും എല്ലാം മുഖം ഓർമ്മ വന്നു.... അവരൊന്നും തനിക്ക് ഒപ്പം നിൽക്കില്ല... അത് തനിക്ക് ഉറപ്പുണ്ട്... അവർക്ക് എല്ലാം ചേതനെ ഭയമാണ്...! സിതാരയുടെ മനസ് വല്ലാത്ത സംഘർശത്തിൽ ആയി... " അനന്തേട്ടൻ ഉണ്ടാവില്ലേ എന്റെ കൂടെ...? അതോ അയാളെ ഭയന്നു അനന്തേട്ടനും എന്നെ വേണ്ടന്ന് വെക്കുമോ..? " ചോദിക്കുമ്പോൾ അത് വരെ ജ്വലിച്ചു നിന്നവൾ തണുത്തുറഞ്ഞു പോയിരുന്നു... ഒറ്റപെട്ട് പോവുമോ എന്നൊരു ഭയം അവളുടെ കണ്ണുകളിൽ നിഴലിച്ചു തുടങ്ങി... " നിനക്ക് എന്നെ വിശ്വാസം ഇല്ലെ താരേ... മരണം വരെ ഞാൻ ഉണ്ടാകും നിന്റെ കൂടെ... ഈ ലോകത്തു നിന്നെ കഴിഞ്ഞേ ഒള്ളു എനിക്ക് മറ്റാരും... " അനന്തു പ്രണയാർദ്രമായി അവളെ  ഒന്നു നോക്കി... സിതാര ഒരു നെടുവീർപ്പോടെ അവന്റെ തോളിലേക്ക് ചാഞ്ഞു... ആ തണൽ മാത്രം മതിയായിരുന്നു അന്നേരം അവൾക്ക് പിടിച്ചു നിൽക്കാൻ.. ⭐⭐⭐⭐⭐⭐⭐⭐⭐⭐⭐⭐⭐⭐⭐ പടിപ്പുര കടന്ന് ചെല്ലുമ്പോൾ താരയുടെ കണ്ണിൽ ഉടക്കിയത് ഉമ്മറത്ത് ഇരിക്കുന്ന അച്ഛനിലേക്ക് ആണ്... ആ മുഖം ചോര വറ്റി വിളർത്തിരിക്കുന്ന പോലെ സിതാരക്ക് ഒറ്റ നോട്ടത്തിൽ തോന്നി... സിതാര പതിയെ ഉമ്മറത്തേക്ക് കയറി .. ചാരു കസേരയിൽ ഇരുന്നിരുന്ന കേശവൻ മുഖം ഉയർത്തി മകളെ ഒന്നു നോക്കുക കൂടെ ചെയ്യാതെ വിദൂരതയിലേക്ക് കണ്ണും നട്ട് തന്നെ ഇരുന്നു... താരക്ക് അച്ഛനോട് എന്തൊക്കെയോ ചോദിക്കണം എന്ന് ഉണ്ടായിരുന്നു എങ്കിലും കേൾക്കാൻ പോവുന്നത് അത്ര ശുഭകരം അല്ലാത്ത വാർത്ത ആയിരിക്കും എന്ന തോന്നലിൽ അവൾ മൗനം പാലിച്ചു... " അച്ഛന്റെ ജോലി പോയടി മോളെ.. ഒരു വിങ്ങലോടെ പറഞ്ഞു കൊണ്ട് അകത്തു നിന്നും ലക്ഷ്മി അമ്മ പുറത്തേക്ക് ഇറങ്ങി വന്നു...ഒപ്പം സ്മിതയും.. " ജോലി പോയെന്നോ...? താര അവിശ്വസനീയമായി അച്ഛനെ ഒന്നു നോക്കി... " വെറുതെ അങ്ങ് പോയത് അല്ല...! മുകളിൽ നിന്ന് നല്ല കളികൾ നടന്നിട്ടുണ്ട്... എല്ലാത്തിനും പിന്നിൽ അയാളുടെ കൈകൾ ഉണ്ട്... ചേതന്റെ...! " കേശവൻ ഈർശ്യത്തോടെ പറഞ്ഞു... " ചേച്ചിക്ക് അത് അങ്ങ് സമ്മതിച്ചാൽ എന്താ...? എന്ത് കുറവാണ് അയാൾക്ക് ഉള്ളത്... ഇട്ടു മൂടാൻ ഉള്ള സ്വത്ത്‌..പിന്നെ കാണാനും നല്ലതാ..." സ്മിത കെറുവോടെ പറഞ്ഞു... " നീയായിരുന്നു എങ്കിൽ അയാളെ സ്വീകരിക്കുമായിരുന്നോ...?  നീ പറഞ്ഞത് എല്ലാം ശരിയാ... നമ്മൾക്ക് സ്വപ്നം കാണാൻ പോലും പറ്റാത്ത ബന്ധം ആണ് അത്... പക്ഷെ എനിക്ക് താല്പര്യം ഇല്ലെന്ന് പറഞ്ഞിട്ടും അയാൾ എന്റെ പിന്നാലെ കൂടിയിട്ട് ഉണ്ടെങ്കിൽ അതിനു പിന്നിൽ മറ്റു പല ലക്ഷ്യങ്ങളും ഉണ്ട്... എനിക്ക് അത് ഉറപ്പാണ്...! അയാൾക്ക് വാശി പിടിച്ചു നേടാൻ മാത്രം എന്നിൽ പ്രത്യേകതകൾ ഒന്നുമില്ല..കൊല്ലാനോ വളർത്താനോ എന്ന് ആർക്ക് അറിയാം... " " പിന്നെ നീ ഈ പറഞ്ഞതിൽ ഉള്ള ഉദ്ദേശം എന്താണെന്ന് എനിക്ക് വ്യക്തമായി അറിയാം... ചേച്ചിക്ക് ഒരു നല്ല ജീവിതം ഉണ്ടാവാനുള്ള ആഗ്രഹം കൊണ്ടൊന്നുമല്ല നീ ഈ പറഞ്ഞു കൊണ്ടിരിക്കുന്നത് എന്നും എനിക്ക് അറിയാം... ഇന്നേ വരെ ഉണ്ട ചോറിനുള്ള നന്ദി കാണിച്ചിട്ട് ഒള്ളു ഞാൻ... അത് കൊണ്ട് അത്രമേൽ പ്രിയപ്പെട്ടത് എന്തും നിനക്ക് വിട്ട് തന്നിട്ടേ ശീലം ഉണ്ടായിരുന്നൊള്ളൂ.. പക്ഷെ ഇപ്പോൾ നീ എന്റെ കയ്യിൽ നിന്നും തട്ടി പറിക്കാൻ നോക്കുന്നത് എന്റെ കൊക്കിനു ജീവൻ ഉണ്ടെങ്കിൽ ഞാൻ സമ്മതിച്ചു തരില്ല സ്മിതേ...!" സിതാര പറഞ്ഞു നിർത്തിയപ്പോഴേക്കും സ്മിതയുടെ മുഖം വിളറി വെളുത്തു പോയി... അനന്തൻ...! അത് തന്നെയാണ് സ്മിതയുടെയും ഇഷ്ടം... നാളിത് വരെ എല്ലാം അവൾക്ക് വേണ്ടി വിട്ടു കൊടുത്തു തന്നെയായിരുന്നു ശീലം... പക്ഷെ ഇത് മാത്രം തന്നെ കൊണ്ട് കഴിയുന്നില്ല.. അനാഥയായ തന്നെ ചിറ്റേടത്തെ ദമ്പതികൾ ആയ കേശവനും ലക്ഷ്മിയും എടുത്തു വളർത്തിയത് ആണെന്നാണ് ഓർമ്മ വെച്ച നാൾ മുതൽ ഉള്ള കേട്ടറിവ്.. തന്നെ ദത്തു എടുത്തതിനു ശേഷം അവർക്ക് ജനിച്ച പെൺകുഞാണ് സ്മിത... ഇതൊക്കെ നാട്ടിൽ പാട്ട് ആണ്... സാധാരണ കുടുംബങ്ങളിൽ ഉണ്ടാകുന്ന ക്രൂര പീഡനങ്ങൾ ഒന്നും ദത്തു പുത്രിയായ തനിക്ക് ഇവിടെ നിന്ന് ഉണ്ടായിട്ടില്ല... പക്ഷെ തരo തിരിവ് ആവോളം അനുഭവിച്ചിട്ടുണ്ട്... ദാനം കിട്ടിയ പശുവിന്റെ പല്ല് എണ്ണരുത് എന്ന് ഒരു ചൊല്ല് ഉണ്ടല്ലോ... അത് കൊണ്ട് സിതാര അത്തരത്തിലുള്ള തരo തിരിവ് ഒന്നും വക വെക്കാറില്ല... താൻ എന്ത് ഇഷ്ടപെട്ടാലും അത് സ്മിതക്ക് വേണം... അത് അവളുടെ കുഞ്ഞുനാൾ തൊട്ടുള്ള ശീലം ആയിരുന്നു... അങ്ങനെ എല്ലാം ചോദിച്ചു വാങ്ങി ഏറ്റവും ഒടുവിൽ അവൾ ചോദിച്ചത് അനന്തനെ ആണ്... അതും താനും അനന്തനും കൂടെ ഉള്ള ഇഷ്ടം അറിഞ്ഞു വെച്ചിട്ട് തന്നെ... എനിക്ക് അനന്തേട്ടനെ വിട്ട് തരാൻ പറ്റില്ല എന്ന് തീർത്തു തന്നെ പറഞ്ഞു... അതോടെ കാര്യം നടക്കാൻ എങ്കിലും സ്വല്പം ഇഷ്ടം കാണിച്ചിരുന്നവൾ അത് കൂടെ നിർത്തി വെച്ചു പൂർണമായും സിതാരയുടെ ശത്രു സ്ഥാനത്തേക്ക് തിരിഞ്ഞു... സിതാര ഉള്ളിലേക്ക് കയറി പോവുമ്പോഴും സ്മിത അവളെ പകയോടെ നോക്കുന്നുണ്ടായിരുന്നു... " അച്ഛന്റെ ജോലി പോയി എന്ന് പറഞ്ഞിട്ട് ചേച്ചിക്ക് വല്ല കൂസലും ഉണ്ടോ എന്ന് നോക്ക്...! ചേച്ചിക്ക് ചേച്ചിയുടെ കാര്യം മാത്രം.. ഇങ്ങനെ തലയിൽ കയറ്റി നടക്കാൻ മാത്രം അവൾ ഇവിടെത്തെ ആരാ... ഏഹ്‌..? " സ്മിത അച്ഛനോടും അമ്മയോടും തട്ടി കയറി കൊണ്ടിരുന്നു... പുറത്തു നിന്നും കേൾക്കുന്ന സ്മിതയുടെ കടപ്പാടിന്റെ പ്രസംഗം കേൾക്കാൻ മനസ്സില്ലാത്ത പോലെ സിതാര തന്റെ ചെവി രണ്ടും കൊട്ടി അടച്ചു കൊണ്ട് കട്ടിലിലേക്ക് ചാഞ്ഞു... അന്നേരവും മുന്നിൽ തെളിഞ്ഞു വരുന്നത് ചേതന്റെ മുഖം ആയിരുന്നു..! എത്രയൊക്കെ താൻ വെല്ലുവിളിച്ചാലും അയാളുടെ കണ്ണിൽ കാണുന്ന ആത്മ വിശ്വാസം... " തോറ്റു കൊടുക്കേണ്ടി വരുമോ താൻ ചേതന് മുന്നിൽ...? സിതാര സ്വയം ചോദിച്ചു പോയി... അതിലും നല്ലത് മരിക്കുന്നതാ... അവൾ തന്നെ അവളുടെ ചിന്തകളെ നിമിഷ നേരം കൊണ്ട് തിരുത്തുകയും ചെയ്തു... പക്ഷെ അന്നേരവും ചേതൻ എന്ന മനുഷ്യൻ ഒരു ഭീതി സ്വപ്നം പോലെ അവളിലേക്ക് പടർന്നു തുടങ്ങിയിരുന്നു... അയാളെ ആദ്യം കണ്ട നിമിഷം...! അപരിചിതനായ ഒരാളെ ആദ്യം കണ്ട പോലെ ആണോ തനിക്ക് തോന്നിയത്...! അല്ല... ഒരിക്കലും അല്ല...! എത്രയോ വർഷങ്ങൾ ആയി നേരിട്ട് അറിയുന്ന ഒരാളെ പോലെ തോന്നി...എവിടെയൊക്കെയോ കണ്ട് മറന്ന ഒരു മുഖം... സിതാരയുടെ ഓർമ്മയിലേക്ക് കുറച്ച് ദിവസങ്ങൾ മുന്നേ നടന്ന കാര്യങ്ങൾ എല്ലാം പുക മറ നീക്കി കടന്ന് വന്നു കൊണ്ടിരുന്നു... ⭐⭐⭐⭐⭐⭐⭐⭐⭐⭐⭐⭐⭐⭐ അന്ന് ജോലി കഴിഞ്ഞു വരുമ്പോൾ പതിവിലും വൈകിയിരുന്നു... ഇരുട്ട് വീണു എന്ന തോന്നൽ ഉള്ളത് കൊണ്ട് നടത്തതിന്റെ വേഗതയും അല്പം കൂടുതൽ ആയിരുന്നു... ഇട വഴി തിരിഞ്ഞു ചെന്ന് ചാടിയത് ഒരു കാറിന്റെ മുന്നിൽ ആയിരുന്നു... വണ്ടി ദേഹത്തു ഒന്ന് തട്ടി താര വഴിയിലേക്ക് തെറിച്ചു വീണു... വണ്ടിക്ക് വേഗത കുറവായത് കൊണ്ട് കാര്യമായി ഒന്നും പറ്റിയില്ല എങ്കിലും കൈ മുട്ടിലെ തൊലി അല്പം നീങ്ങി പോയിരുന്നു.. ഒറ്റ നോട്ടത്തിൽ അത് കോവിലകത്തെ വണ്ടി ആണെന്ന് താര തിരിച്ചറിഞ്ഞു കഴിഞ്ഞിരുന്നു... തമ്പുരാനെ ഇടക്ക് എല്ലാം ദൂരെ നിന്ന് കണ്ടിട്ട് ഉണ്ട് എങ്കിലും...ഡ്രൈവർ സീറ്റിൽ നിന്നും അന്ന് ഇറങ്ങി വന്നത് മറ്റൊരാൾ ആയിരുന്നു... ഇത് വരെ കാണാത്ത പുതിയ മുഖം..! ചേതൻ..! അതായിരുന്നു ആദ്യത്തെ കൂടി കാഴ്ച്ച... പക്ഷെ അന്ന് താര തിരിച്ചറിഞ്ഞില്ല തന്റെ മനസ്സിനും ശരീരത്തിനും അവകാശിയായി ഈ ഭൂമിയിൽ ദൈവം സൃഷ്ടിച്ചത് ചേതനെ ആണെന്ന്...! " തനിക്ക് കണ്ണ് കണ്ടുകൂടെ... " ചേതന്റെ ദേഷ്യത്തോടെ ഉള്ള ചോദ്യം ആണ് ആദ്യം ചെവിയിൽ വന്നു തറഞ്ഞത്... " ഇയാളുടെ മുഖത്തും ഉണ്ടല്ലോ രണ്ട് മത്തങ്ങാ കണ്ണ്...! താരയുടെ എടുത്തടിച്ച പോലുള്ള മറുപടി ചേതൻ ഒട്ടും പ്രതീക്ഷിച്ചിരുന്നില്ല... ഉടനെ കാറിൽ നിന്നും ഒരുത്തൻ ചാടി ഇറങ്ങി... ചേതന്റെ അതെ പ്രായം തോന്നിക്കുമെങ്കിലും അയാളുടെ വേഷവും നടപ്പും എല്ലാം എൺപതുകളിലെ ആണ്.. തമ്പുരാന്റെ കൂടെ വാല് പോലെ പലവട്ടം അവനെയും കണ്ടിട്ടുണ്ട്... " കുട്ടി ഏത് തറവാട്ടിലെയാ... തമ്പുരാനോട് ഇങ്ങനെ ആണോ സംസാരിക്കുന്നെ.. " വാല് താരയെ രൂക്ഷമായി ഒന്ന് നോക്കി... " തമ്പുരാനോ... ഏത് തമ്പുരാൻ... ഞാൻ ഈ ഡ്രൈവറോട്‌ അല്ലെ സംസാരിച്ചത്... താര ചേതന് നേരെ വിരൽ ചൂണ്ടി... ഒറ്റ നോട്ടത്തിൽ തന്നെ വല്ലാത്ത ഒരു ദൈവികത തോന്നി ചേതന്റെ മുഖത്ത് . അതും കൂടാതെ ഒരു ക്ഷത്രിയന്റെ ശരീരവും...അയാൾ വെറും ഡ്രൈവർ അല്ലെന്ന് ഉറപ്പാണ്... എന്നാലും അങ്ങനെ പറയാൻ ആണ് താരക്ക് അപ്പോൾ തോന്നിയത്... തന്റെ മറുപടിയിൽ ചേതന്റെ മുഖത്തേക്ക് ദേഷ്യം ഇരച്ചു കയറുന്നത് താര ഒരു കുസൃതി ചിരിയോടെ നോക്കി നിന്നു... തുടരും സൂര്യകാന്തി റിവ്യൂ റേറ്റിംഗ് ഫോളോ പ്ലീസ് ❤️ ഇതൊരു പരീക്ഷണമാണ്... ❤️ സ്വല്പം ക്ലിഷേ... സ്വല്പം കാര്യം.. സ്വല്പം അറിവ്... 😌 അങ്ങനെ അങ്ങനെ...