ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/6r7vk64?d=n&ui=v64j8rk&e1=cബൊമ്മലാട്ടം ((11)) കഷ്ടി കാര്‍ സഞ്ചരിക്കാന്‍ പാകത്തില്‍ പണി കഴിച്ച ഇടുങ്ങിയ റോഡുകളില്‍ കയറിയിറങ്ങി ആ ബൊലേറോ മെല്ലെ ചലിച്ചു. ഒരു വെളിമ്പ്രദേശത്തായിരുന്നു കടക്കുന്നത്. കരണ്‍ അവിടം ചുറ്റുമായി നോക്കി. ചുവന്ന മണല്‍പ്പിരപ്പില്‍ പരന്നു കിടക്കുന്ന ആ പ്രദേശത്ത് ഇടിഞ്ഞു വീഴാറായ രണ്ടു നില കെട്ടിടമല്ലാതെ പേരിനൊരു വീട് പോലുമില്ല. വഴിവിളക്കുകളുടെ മഞ്ഞ വെളിച്ചം അവിടെ വല്ലാത്ത ഭുതിയുളവാക്കി. "കണ്ടിട്ട് ഇതൊരു പ്രേതാലയം പോലെയുണ്ടല്ലോ?!" ഉള്ളിലെ സംശയം സഞ്ജനയില്‍ നിന്നും അടര്‍ന്നു വീണു. "ഹിമേഷ് എന്തായിത്? ആരുടേതാണ് ഈ കെട്ടിടം.?" കരണ്‍ ഹിമേഷിനെ നേരിട്ടു നോക്കി. "ലക്നൗ നേപ്പാള്‍ അതിര്‍ത്തിയില്‍ വെച്ചുണ്ടായ മാവോയിസ്റ്റ് ഏറ്റു മുട്ടലില്‍ എന്‍റെ സംഘത്തിലെ ചിലരുടെ ആയുധങ്ങള്‍ ഒളിപ്പിച്ചത് ഇവിടെയാണ് സര്‍.!" ഹിമേഷ് പറഞ്ഞു. "ഇവിടെയോ?!" "അതെ സര്‍.." റസാഖ് ഇടയില്‍ കയറി. കരണിന്‍റെ കണ്ണുകള്‍ റസാഖില്‍ തിരിഞ്ഞു. "വളരെ സീക്രട്ട് ഓപ്പറേഷന്‍ ആയിരുന്നുവത്. ഹിമേഷിന്‍റെ നേതൃത്തില്‍. മാവോയിസ്റ്റ് അപകടകാരികള്‍ ഗാസിയാബാദില്‍ ഉണ്ടെന്ന വിവരം ലഭിച്ചതും ഡിപ്പാര്‍ട്ടുമെന്‍റിന് മറ്റു വഴികള്‍ അസാധ്യമായിരുന്നു. ടീം നാലായി പിളര്‍ന്ന് നാലു ദിശകളിലേക്ക് ചലിച്ചു. അന്നത്തെ മിഷനില്‍ പതിനൊന്ന് മാവോയിസ്റ്റുകളെ ഈ ഗാസിയാബാദില്‍ വെച്ച് ഷൂട്ട് ചെയ്തു തീര്‍ത്തു. ശത്രുക്കള്‍ക്ക് രഹസ്യ വിവരം കിട്ടാതിരിക്കുവാനായി ലക്നൗവില്‍ നിന്നും അല്‍പ്പം അകലെയായി ഇവിടെയാണ് ആയുധങ്ങള്‍ ഒളിപ്പിച്ചത്. ഒരീച്ച പോലും അറിയാതെ അത് കൃത്യമായി വേണ്ടയിടങ്ങളില്‍ എത്തിച്ച് കൊടുക്കുകയും ചെയ്തു. മുപ്പത്തിരണ്ട് ദിവസത്തെ രക്തച്ചൊരിച്ചിലുകള്‍ക്ക് ശേഷം നമ്മള്‍ വിജയിക്കുകയും ചെയ്തു." റസാഖ് പറഞ്ഞു നിര്‍ത്തിയതും ഹിമേഷ് തുടര്‍ന്നു : "അന്നേ നോട്ടമിട്ടതാണ് ഈ കാലീന്‍ ഭായിയെ. അയാളില്‍ നല്ല പോലെ സംശയം ഉണ്ടായിരുന്നു. പക്ഷേ അയാള്‍ക്കും മാവോയിസ്റ്റുകള്‍ക്കും തമ്മില്‍ യാതൊരു ബന്ധമില്ലെന്ന റിപ്പോര്‍ട്ട് കിട്ടിയതിനാല്‍ എന്‍റെ തോക്കിന് ഇരായാവാതെ അയാള്‍ രക്ഷപ്പെട്ടു." ഇതെല്ലാം കേട്ട് കരണ്‍ ശക്തമായി ഒന്നു ശ്വാസം വിട്ടു. തന്‍റെ ബഡ്ഡികളെ കുറിച്ച് അവന്‍ അഭിമാനം പൂണ്ടു. എങ്കിലും മനസ്സിന്‍റെ കോണില്‍ വല്ലാതെ വിങ്ങി. "ഈ യുദ്ധവും രക്തച്ചൊരിച്ചിലുമൊക്കെ എന്നാണ് അവസാനിക്കുക? എപ്പോഴാണ് ലോകം സമാധാനത്തെ പുല്‍കുക???!!" കരണിന്‍റെ വാക്കുകളില്‍ മൂവരും മൗനിയായി. ബൊലേറോ മെല്ലെ ചലിച്ച് ആ കെട്ടിടത്തിന് മുന്നിലെത്തി നിശ്ചലമായി. കരണ്‍ തന്‍റെ ഇരയുടെ മുടിക്ക് പിടിച്ച് ഡോര്‍ തുറന്നിറങ്ങി. അപ്പോഴേക്കും ഹിമേഷ് കെട്ടിടത്തിന്‍റെ വാതില്‍ തുറന്നു കഴിഞ്ഞിരുന്നു. "ഇവനെ അകത്തു കൊണ്ടു പോകൂ..." റസാഖിന്‍റെ നേര്‍ക്ക് ഇരയെ ഇട്ടു കൊടുത്ത് കാറിലിരിക്കുന്ന സഞ്ജനയെ കരണ്‍ നോക്കി. "സഞ്ജനാ??" "യെസ് സര്‍..!" മനസിലായ പോലെ തലയാട്ടി അവള്‍ ബൊലേറോ റിവേഴ്സെടുത്ത് ഇരുളിലേക്ക് പാര്‍ക്ക് ചെയ്തു. കരണ്‍ വീണ്ടും ചുറ്റുപാടും കണ്ണാടിച്ചു. ആകാശംമുട്ടെ പൊക്കത്തില്‍ ഉയര്‍ന്നു നില്‍ക്കുന്ന ഏതാനും കെട്ടിടങ്ങള്‍ അല്‍പ്പം ദൂരെയായി കാണാം. എന്നാല്‍ തങ്ങള്‍ നില്‍ക്കുന്ന പ്രദേശത്തിന് ചുറ്റും ശൂന്യമായിരുന്നു. സഞ്ജനയും കരണും കെട്ടിടത്തിനകത്തേക്ക് പ്രവേശിച്ചു. ഇരുമ്പും തുരുമ്പും പാട്ടകളും മറ്റുമൊക്കെ കുട്ടം കൂടി വികൃതമായി കിടക്കുന്ന രണ്ടാം നിലയില്‍ ആ വ്യക്തിയെ കസേരയിലുത്തി മുറുകി ബന്ദിച്ചിരുന്നു. അയാളെ കണ്ട് കരണിന്റെ സമനില തെറ്റി. പിടിച്ചു നിർത്തിയ കോപം സിരകളിലൂടെ പാഞ്ഞ് വലതു കൈയ്യിലേക്ക് വ്യാപിച്ചതും കരൺ ചീറി വന്ന് അയാളുടെ മുഖം നോക്കി രണ്ടെണ്ണം പൊട്ടിച്ചു. അയാളുടെ വായില്‍ നിന്നും രക്തക്കട്ടകള്‍ പുറത്തേക്ക് തെറിച്ചു. കരണിന്‍റെ ആ ഉഗ്രകോപം സഞ്ജനയ്ക്ക് താങ്ങാവുന്നതിലും അപ്പുറമായിരുന്നു. അശ്വിനി മാഡം ഇതെങ്ങനെ മാനേജ് ചെയ്യുന്നു??! കരണ്‍ സര്‍ ഒരേ സമയം ശാന്തനും രൗദ്രനുമാണ്. നിശ്ചയം, അശ്വിനി മാഡത്തിനല്ലാതെ ഈ മനുഷ്യന്‍റെ കോപത്തെ മറ്റൊരാള്‍ നിയന്ത്രിക്കണമെങ്കില്‍ അത് തീര്‍ച്ചയായും മകള്‍ ശിവാനി മാത്രമായിരിക്കും. അവള്‍ ഭിത്തിയില്‍ ചാരി നിന്ന് ആ കാഴ്ചയെ വല്ലാതെ വീക്ഷിച്ചു. അയാളുടെ കവിളില്‍ ബലത്തോടെ പിടിച്ച് കരണ്‍ ശക്തമായി ഗര്‍ജ്ജിച്ചു : "നാ** മോനേ..! നിരപരാധിയായ കുട്ടികളും സ്ത്രീകളുമാണ് ചിന്നിച്ചിതറിയത്..! പറയടാ നിന്‍റെയൊക്കെ പിന്നില്‍ ആരാണുള്ളത്? ആരാണ് നിന്നെയൊക്ക അയച്ചത്? അത് പറയാതെ നീ ജീവനോടെ അടുത്ത പുലരി കാണില്ല." കരണ്‍ അയാളിലെ പിടിത്തം ഒഴിവാക്കി. വായില്‍ നിന്നും ഒലിച്ചിറങ്ങുന്ന രക്തം അയാള്‍ തറയിലേക്ക് നീട്ടി തുപ്പി. "എന്താടാ നിന്‍റെ പേര്?!" ഹിമേഷ് ക്രൂധത്തോടെ ചോദിച്ചു. അയാള്‍ മിണ്ടിയില്ല. "റസാഖ്?!" കരണ്‍ ഉറക്കെ ഗര്‍ജ്ജിച്ചു. "With Youre Permission Sir.." കരണിന്‍റെ മനസ്സിലിരുപ്പ് ഊഹിച്ചെടുത്ത റസാഖ് അയാള്‍ക്കു നേരെ വന്നു. "എന്താടാ നിന്‍റെ പേര്??" റസാഖ് മുഷ്ടി ചുരുട്ടി ചോദ്യം ആവര്‍ത്തിച്ചതില്‍ നല്ലൊരു ഇളിയായിരുന്നു പ്രതികരണം. "പന്ന ക*** മോനേ..!" റസാഖ് തന്‍റെ ഉരുക്കു പോലെയുള്ള കൈ കൊണ്ട് അയാളുടെ മുഖം നോക്കി തുടരെ തുടരെ ഇടിച്ചു. സഞ്ജന അത് വിരലില്‍ എണ്ണം പിടിച്ചു. ഒന്ന്.. രണ്ട്.. മൂന്ന്.. നാല്.. അവസാനം പത്തെന്ന കണക്ക് സഞ്ജനയ്ക്ക് കിട്ടിയതും റാസാഖ് ഇടി നിര്‍ത്തി. ഏതാനും പല്ലുകള്‍ അയാളുടെ വായില്‍ നിന്നും അടര്‍ന്നു വീണു. ഇടതു കണ്ണ് ഉന്തി വീര്‍ത്ത് മൂടപ്പെട്ടു. രക്തത്തില്‍ മുഖം പാടേ മുങ്ങി. റസാഖിന്‍റെ അടുത്ത ഇടിയും ഏറ്റാല്‍ ചിലപ്പോള്‍ അയാള്‍ കഴുത്തൊടിഞ്ഞ് ചത്തു പോകും. ആ രംഗത്തെ കരണ്‍ കൈ കെട്ടി നിന്നു വീക്ഷിച്ച് തുടർന്നു : "നിന്നെ അത്ര പെട്ടെന്ന് ഞങ്ങള്‍ കൊല്ലില്ല. തല്ലി ചതച്ച്, തല്ലി ചതച്ച് മരണം എത്രയും വൈകിക്കാന്‍ പറ്റുമോ അത്രയും വൈകിച്ചിട്ടേ നിന്നെ ഞങ്ങള്‍ കൊല്ലൂ... റസാഖ് അവനെ അങ്ങ് തീര്‍ത്തേക്ക്. നമുക്ക് അടുത്ത വഴി നോക്കാം." "Sir.." ഉത്സാഹഭരിതനായി തന്‍റെ ഉരുക്ക് മുഷ്ടിയില്‍ പരമാവധി ബലം ചേര്‍ത്ത് അയാളുടെ മുഖം നോക്കി റസാഖ് ആഞ്ഞു വീശിയതും "വീരു.. വീരു..!" അയാള്‍ ഉറക്കെ പറയുകയായിരുന്നു. റസാഖിന്‍റെ മുഷ്ടി വീരുവില്‍ തൊട്ടു തൊട്ടില്ലെന്ന പോലെ നിശ്ചലമായി. വിടര്‍ന്ന കണ്ണുകളോടെ റസാഖ് കരണിനെ തിരിഞ്ഞു നോക്കി. കരണ്‍ ഒന്നു തലയനക്കി മുന്നോട്ട് വന്നതും റസാഖ് അല്‍പ്പം മാറി കൈ കെട്ടി നിന്നു. "വീരു., അതാണോ നിന്‍റെ പേര്?!" കരൺ ചോദിച്ചു. "ഹാ..!" തളര്‍ന്ന മട്ടില്‍ കിതപ്പോടെ അയാള്‍ തലയാട്ടി. സഞ്ജന തന്‍റെ മുബൈല്‍ എടുത്ത് വീഡിയോ റെക്കോര്‍ഡ് ചെയ്തു. "വെള്ളം.. വെള്ളം.." അയാള്‍ യാചിച്ചതും കരണ്‍ ഹിമേഷിനെ വിളിച്ചു. ഉടനെ ഹിമേഷ് ഭിത്തിയുടെ മൂലയില്‍ കണ്ണുകള്‍ പായ്ച്ചു നോക്കി. പണ്ടെങ്ങോ ശുദ്ധ ജലം നിറച്ചു വെച്ച കൂജയില്‍ ഹിമേഷിന്‍റെ ശ്രദ്ധ പെട്ടു. അവനത് തുറന്നു നോക്കി. ക്രിമികീടങ്ങളാല്‍ അത് മലിന ജലത്തിലേക്ക് രൂപപ്പെട്ടിരുന്നു. മറുത്തൊന്നും ചിന്തിക്കാതെ അത് ഉയര്‍ത്തിയെടുത്ത് വീരുവിന്‍റെ ശിരസിലൂടെ ഹിമേഷ് ഒഴിച്ചു കൊടുത്തതും ആര്‍ത്തിയോടെ അതില്‍ നിന്നും കുറേയേറെ അയാള്‍ വലിച്ചു കുടിച്ചു. ഏതാനും ക്രിമികീടങ്ങള്‍ അയാളുടെ മുഖത്ത് അരിച്ചു കളിക്കുകയുണ്ടായി. "പറ വീരൂ.. പുതുവര്‍ഷ രത്രിയില്‍ ഡല്‍ഹിയിലും കേരളത്തിലും അരങ്ങേറിയ ബോംബ് ബ്ലാസ്റ്റിന് പിന്നില്‍ ആരാണ് പ്രവര്‍ത്തിക്കുന്നത്?" ഗൗരവപൂര്‍വ്വം കരണ്‍ ചോദിച്ചു. "അതിന് പിന്നില്‍ പ്രവര്‍ത്തിച്ചവരെ എനിക്ക് കൃത്യമായി അറിയില്ല സര്‍." ഉമിനീർ ഇറക്കി തളര്‍ച്ചയോടെ വീരു പറഞ്ഞതും "നീ കള്ളം പറയരുത്. അന്നു രാത്രി ഈ ഗാസിയാബാദില്‍ നിന്നും കേരളത്തിലേക്കും ക്രിസ്റ്റല്‍ മാളിലേക്കും കണക്ടായ ഒരേയൊരു കോള്‍ നിന്‍റെ സുഹൃത്ത് സഞ്ജുവിന്‍റേതാണ്." കരണ്‍ ആക്രോഷിച്ചു. "സഞ്ജു?!" വീരു ദയനീയമായി നോക്കി. "അതെ, നിന്‍റെ സുഹൃത്തിനെ കഴിഞ്ഞ രാത്രി ഞങ്ങള്‍ ഷൂട്ട് ചെയ്ത് കൊന്നു." ആ വാര്‍ത്ത വല്ലാത്ത നടുക്കമായി തലയിൽ പെയ്തിറങ്ങുന്നത് വീരുവിന്‍റെ കണ്ണുകളിലൂടെ കരണ്‍ കാണുകയായിരുന്നു. അവന്‍ തുടര്‍ന്നു : "എന്തായിരുന്നു നിങ്ങളുടെ ഡീല്‍? ആരാണ് ഈ ദൗത്യം നിങ്ങളെ ഏല്‍പ്പിച്ചത്?" മറുപടിക്കായി ക്ഷമയോടെ കരണ്‍ കൈ കെട്ടി കാതോര്‍ത്തു. "അത്.. അത്.." വീരു തപ്പി തടഞ്ഞതും റസാഖ് മുന്നോട്ടു വന്ന് കൈ ഉയര്‍ത്തി. "പറയടാ നാ** മോനേ..!" "അയ്യോ..! ഇനിയും എന്നെ ഉപദ്രവിക്കരുത്.. ഞാന്‍ ചത്തുപോകും.. പറയാം.. എല്ലാം ഞാന്‍ പറയാം.." കരച്ചിലോടെ അയാള്‍ യാചിച്ചു. "എങ്കില്‍ പറ. ഈ കണ്ടതിനും കേട്ടതിനും അപ്പുറമുള്ള സത്യങ്ങള്‍ എന്താണ്??" കരണ്‍ ചോദ്യം ആവര്‍ത്തിച്ചതും വീരു ചുരുളുകള്‍ അഴിക്കാന്‍ തുടങ്ങുകയായിരുന്നു. "ഞാനും സഞ്ജുവും ബീഹാര്‍ സ്വദേശികളാണ്. മയക്കു മരുന്നുകളും മറ്റുമൊക്കെയായി നടന്ന ഞങ്ങള്‍ക്ക് ഒരു വിധത്തിലും അവിടെ ജീവിക്കാന്‍ പറ്റില്ലെന്ന സാഹചര്യമായപ്പോള്‍ നേരേ ഉത്തര്‍ പ്രദേശിലേക്ക് കടന്നു. കുറേയേറെ തെണ്ടിത്തിരിഞ്ഞാണ് ഗാസിയാബാദിലേക്ക് എത്തിയത്. ഇവിടെ വെച്ചാണ് അവിചാരിതമായി ഞങ്ങള്‍ അയാളെ കണ്ടു മുട്ടിയത്." "ആരെ?!" കരണ്‍ പുരികമുയര്‍ത്തി. "MISTER X.!" "മിസ്റ്റര്‍ എക്സ്??!!" നാലുപേരും ഒരുപോലെ മന്ത്രിച്ചു. "അതെ.. അങ്ങനെയാണ് അയാള്‍ ഞങ്ങളോട് പേര് പറഞ്ഞത്. റഷ്യാക്കാരന്‍.! പന്ത്രണ്ട് വര്‍ഷമായി അയാള്‍ ഇന്ത്യയിലുണ്ട്. ഹിന്ദിയും മറാഠിയും ഉള്‍പ്പെടെ വിവിധ ഭാഷകള്‍ അയാള്‍ സംസാരിക്കും. ആരുടേയും ശ്രദ്ധയില്‍ പെടാതെ പലയിടങ്ങളിലായി അതിസമര്‍ത്ഥമായി അയാള്‍ ഈ രാജ്യത്ത് ജീവിക്കുന്നുണ്ട്. ഇപ്പോള്‍ കുറച്ചു കാലമായി ഇയാള്‍ ഗോവയിലാണ്." "നിങ്ങള്‍ എങ്ങനെയാണ് അയാളെ പരിചയപ്പെട്ടത്??" "ലക്ഷ്മി ബാറില്‍ വെച്ച് യാദൃശ്ചികമായി അയാളെ കണ്ടു മുട്ടുകയും സൗഹൃദത്തിൽ ആവുകയും തുടര്‍ന്ന് ഞങ്ങള്‍ മൂവരും ഒരുപോലെ മദ്യപിക്കുകയും ചെയ്തു. എന്‍റെയും സഞ്ജുവിന്‍റേയും അവസ്ഥ അറിഞ്ഞപ്പോള്‍ അയാള്‍ ഇങ്ങോട്ട് ഒരു ഓഫര്‍ തരികയായിരുന്നു." "എന്തായിരുന്നു ആ ഓഫര്‍??" "രണ്ടു പേരെ കൊല്ലണം. അതും രണ്ട് വിദേശികളെ." "ഉം..! അപ്പോള്‍ സഞ്ജുവിന്‍റെ നമ്പരില്‍ നിന്നും കേരളത്തിലേക്കും ഡല്‍ഹിയിലേക്കും കോള്‍ പോയതോ?!" "അതെല്ലാം എക്സിന്‍റെ കളി ആയിരുന്നു സര്‍. മൂന്നു വർഷമായി ഞങ്ങൾ ഇവിടെ ഉണ്ട്. ഗാസി കോളനിയിലെ അഡ്രസും മറ്റും വെച്ച് സഞ്ജു ഒരു ഫേക്ക് സിം അന്നേ എടുത്തിരുന്നു. ഞങ്ങളെ നല്ല രീതിയിൽ സഹായിക്കണമെങ്കിൽ സഞ്ജുവിന്റെ സിം കുറച്ചു ദിവസത്തേക്ക് വേണമെന്ന നിര്‍ദേശം എക്സ് മുന്നോട്ടു വച്ചു. കാര്യങ്ങള്‍ കഴിഞ്ഞാല്‍ അത് നശിപ്പിക്കുമെന്നും അയാള്‍ പറഞ്ഞു." "അപ്പോള്‍ കൊലപാതകത്തിനും സിം ഉപയോഗിക്കാനും നിങ്ങള്‍ സമ്മതിച്ചു. അല്ലേ?!" ഹിമേഷ് കണ്ണുകള്‍ ചുരുക്കി ചോദിച്ചു. "അതല്ലാതെ ഞങ്ങളെ മുന്നില്‍ വേറെ വഴിയില്ലായിരുന്നു. തുടര്‍ന്നുള്ള കാര്യങ്ങള്‍ എന്‍റെ നമ്പരില്‍ വിളിച്ച് ബോധ്യപ്പെടുത്താമെന്നും അയാള്‍ കുട്ടിച്ചേര്‍ത്തു." "എത്രയായിരുന്നു പ്രതിഫലം??" റസാഖ് ചോദിച്ചു. "പത്തു ലക്ഷം രൂപ! അഞ്ച് സഞ്ജുവിനും അഞ്ച് എനിക്കും. തുകയുടെ വലിപ്പം കൂടിയപ്പോൾ അയാൾ പറഞ്ഞതും ചെയ്തതും എതിർത്തൊരു വാക്ക് പറയാതെ ഞങ്ങൾ അനുസരിച്ചു.." "അതുകഴിഞ്ഞ് എന്ത് സംഭവിച്ചു?" കരണ്‍ താടി ചുരണ്ടി ചോദിച്ചു. "പിന്നീട് ഏതാനും ദിവസങ്ങള്‍ മിസ്റ്റര്‍ എക്സ് ഞങ്ങള്‍ക്കൊപ്പം ഉണ്ടായിരുന്നു. പെട്ടെന്നൊരു ദിവസം രണ്ട് ലക്ഷം രൂപ അഡ്വാന്‍സ് തന്നിട്ട് അയാള്‍ പോവുകയും ചെയ്തു. അടുത്ത ദിവസമാണ് അത് സംഭവിച്ചത്. ഡല്‍ഹിയിലും കേരളത്തിലും ഇരട്ട സ്ഫോടനങ്ങള്‍. ശേഷം മൂന്ന് ദിവസങ്ങള്‍ കഴിഞ്ഞപ്പോള്‍ എന്‍റെ ഫോണിലേക്ക് അയാളുടെ കോള്‍ വന്നു. സഞ്ജു മംഗലാപുരത്തേക്കും ഞാന്‍ തൊട്ടടുത്ത ലക്നൗവിലേക്കും ചെല്ലണമെന്നായിരുന്നു ആ കോള്‍. കൊല്ലേണ്ട വിദേശികളുടെ ഫോട്ടോയും അവര്‍ താമസിക്കുന്ന ലോഡ്ജിന്‍റെ അഡ്രസ്സും തന്നു." "അപ്പോള്‍ ഗണ്‍?!" "അത് തന്നു വിട്ടില്ല..! ഇരുവരും താമസിക്കുന്ന ലോഡ്ജിന്‍റെ മറ്റൊരു ഭാഗത്ത് തോക്ക് ഒളിപ്പിച്ചു വച്ചിട്ടുള്ള സ്ഥലം വ്യക്തമായി വിശദീകരിച്ചു തന്നു. ലോഡ് ചെയ്തു വച്ചിരിക്കുന്ന ആ തോക്കില്‍ ആകെ രണ്ട് ബുള്ളറ്റ് ഉള്ളുവെന്നും അത് പാഴാക്കരുതെന്നും പറഞ്ഞു. അതൊരു സൈലന്‍സര്‍ ഫിറ്റ് ചെയ്ത തോക്കായിരുന്നു. അതുപയോഗിച്ച് ഞാനും സഞ്ജുവും കൃത്യമായി എതിരാളിയുടെ ശിരസ്സിലേക്ക് നിറയൊഴിച്ചു. കൃത്യം നടത്തിയതിനു ശേഷം ഈ ഗാസിയാബാദില്‍ തന്നെ രണ്ടിടത്തായി ഞങ്ങള്‍ കഴിയണമെന്നും അയാള്‍ നിര്‍ദേശിച്ചിരുന്നു. കേസും പൊല്ലാപ്പുമൊക്കെ സ്വയം നോക്കിക്കോളാം എന്നൊരു ഉറപ്പും." "വല്ലാത്തൊരു കളിയാണല്ലോ സര്‍ ഇവിടെ സംഭവിച്ചിരിക്കുന്നത്!!" കരണിനെ നോക്കി റസാഖ് അഭിപ്രായപ്പെട്ടതില്‍ കരണ്‍ ഒന്നു തലയാട്ടി. "ഈ ബോംബ് ബ്ലാസ്റ്റിന് പിന്നില്‍ മിസ്റ്റര്‍ എക്സ് ആണെന്ന കാര്യം നിങ്ങള്‍ക്കറിയാമായിരുന്നോ?!" "ഇല്ല.. അയാളാണ് ഇതിനു പിന്നില്‍ പ്രവര്‍ത്തിച്ചതെന്ന് ഞാന്‍ ഇപ്പോഴാണ് മനസ്സിലാക്കുന്നത്. കഴിഞ്ഞ രാത്രി വരെ സഞ്ജുവിനും അതറിയില്ലായിരുന്നു." "ദൗത്യം കഴിഞ്ഞ് ഇത്ര നാളുകളായിട്ടും നിങ്ങളെന്താ ഗാസിയാബാദ് ഉപേക്ഷിക്കാതിരുന്നത്?" കരണ്‍ ചോദിച്ചു. "ഞങ്ങള്‍ക്ക് പറഞ്ഞ തുക മുഴുവനായി കിട്ടുന്നതു വരെ ഇവിടെ കഴിയണമെന്നും അതുവരെ എവിടേക്ക് തിരിയരുതെന്നും എക്സ് പിന്നീട് അറിയിച്ചു." "എന്നിട്ട് ആ തുക മുഴുവനും കിട്ടിയോ?!" "പലപ്പോഴായി അമ്പതിനായിരം ഇരുപതിനായിരമൊക്കയായി തന്നെങ്കിലും കരാര്‍ പ്രകാരമുള്ള തുക ഇപ്പോഴും പൂര്‍ണ്ണമായിട്ടില്ല." "ലോകത്തില്‍ ഇല്ലാത്ത മണ്ടന്മാരണല്ലോടാ നീയൊക്കെ! സമര്‍ത്ഥമായി അയാള്‍ നിങ്ങളെ പറ്റിച്ചു എന്ന് മാത്രമല്ല, വിദഗ്ധമായി നിങ്ങളെ കുടുക്കുകയും ചെയ്തു." ഹിമേഷ് പരിഹാസമായി പറഞ്ഞു. "ശരി, ഇന്ന് റിസോര്‍ട്ടില്‍ വെച്ച് എന്തിനായിരുന്നു സഞ്ജുവിനെ കാണേണ്ട ആവശ്യം? ഈ മീറ്റിംഗിന് എന്തിനാണ് ക്ലൌഡി റിസോര്‍ട്ട് തിരഞ്ഞെടുത്തത്?" കരണ്‍ അടുത്ത ചോദ്യം തൊടുത്തു. "അതും എക്സിന്‍റെ നിര്‍ദേശ പ്രകാരം ആയിരുന്നു. രണ്ടു ദിവസങ്ങള്‍ക്കു മുമ്പ് മിസ്റ്റര്‍ എക്സിന്‍റെ ശിങ്കിടി റിസോര്‍ട്ടിന്‍റെ കാര്‍ഡുമായി എന്നെയും സഞ്ജുവിനെയും കാണുവാനെത്തി. മുഴുവന്‍ തുകയും പാസ്സ്പോര്‍ട്ടും റെഡി ആയിട്ടുണ്ടെന്നും പറഞ്ഞ സമയത്ത് റിസോര്‍ട്ടില്‍ എത്തണമെന്നും അറിയിച്ചു." "എവിടേക്ക് കടക്കാനായിരുന്നു പ്ലാന്‍?!" "മെക്സിക്കോ..!" "മെക്സിക്കോ..!!!" അതിശയത്തോടെ നാലുപേരും പരസ്പരം മിഴിച്ചു നോക്കി. സഞ്ജന തലയനക്കി. "അവിടെ ആരാണ് നിങ്ങളെ കാത്തിരിക്കുന്നത്??!".വേഗത്തിലായിരുന്നു കരണിന്‍റെ ചോദ്യം. "അറിയില്ല. അതൊന്നും ഞങ്ങളെ വ്യക്തമാക്കിയില്ല. ഈ രണ്ട് കൊലപാതകങ്ങൾ മാത്രമേ ഞാനും സഞ്ജുവും ചെയ്തുള്ളു സർ. ബോംബ് ബ്ലാസ്റ്റുമായി എനിക്കും അവനും യാതൊരു ബന്ധവുമില്ല.." ദയനീയമായി വീരു നാലുപേരെയും മാറി മാറി നോക്കി. കരണ്‍ വല്ലാതെ ചിന്തിക്കുകയായിരുന്നു. അപ്പോള്‍ അവസാനത്തെ കൂടിക്കാഴ്ച്ച ജെനുവിന്‍ ആയിരിക്കണം. ഇരുവരേയും മെക്സിക്കോയിലേക്ക് കടത്താനുള്ള പ്ലാന്‍! കൊല്ലപ്പെട്ട വ്യക്തികളുടെ നെഞ്ചില്‍ പതിച്ചു വെച്ച ആ തലയോട്ടി ചിഹ്നത്തിലേക്ക് താന്‍ അടുത്തു കൊണ്ടിരിക്കുന്നു. "ഇങ്ങനെയൊക്കെ ആണെങ്കിൽ ഇതിനു പിന്നിൽ മെക്സിക്കന്‍ സംഘമാണെന്ന ഊഹം നമുക്ക് ഏതാണ്ട് ഉറപ്പിക്കാം. അല്ലേ സര്‍.?!" കരണിന്‍റെ ചിന്തയിലേക്ക് കടന്ന് സഞ്ജന ചോദിച്ചു. അവൻ ഒന്നു തലയനക്കി. "ശരി, നീ അയാളെ വെടിവെച്ചിടുമ്പോള്‍ എവിടേക്കാണ് അയാള്‍ വീണത്??" കരണ്‍ ചോദിച്ചു. "അത്.. അത്.. ശിരസ്സിലേക്കാണ് ഞാന്‍ നിറയൊഴിച്ചത്. തൊട്ടടുത്ത മേശയില്‍ക്കിടയിലേക്കാണ് അയാള്‍ വീണത്. അതും കമഴ്ന്ന്." ഓർത്തെടുത്ത് വീരു പറഞ്ഞു. കരണ്‍ വീണ്ടും സഞ്ജനയെ നോക്കി. മനസ്സിലായെന്നര്‍ത്ഥത്തില്‍ അവള്‍ ശിരസ്സനക്കി. സഞ്ജന തനിക്ക് കാണിച്ചു തന്ന ഫോട്ടോ പ്രകാരം വിക്ടിം കിടക്കുന്നത് കട്ടിലിലായിരുന്നു. അതും കൈകള്‍ മുകളിലേക്ക് ഉയര്‍ത്തി. നെഞ്ചിലെ തലയോട്ടി ചിഹ്നം വ്യക്തമായി കാണത്തക്ക വിധം. അതിനര്‍ത്ഥം വീരുവും സഞ്ജുവും അയാളെ വെടിവെച്ച് കൊലപ്പെടുത്തി പോയ ശേഷം മറ്റാരോ അവിടേക്ക് കടന്നിരിക്കുന്നു. മംഗലാപുരത്തും ലക്നൗവിലും ഒരുപോലെ എത്തിയ രണ്ടുപേര്‍. വീണ്ടും രണ്ടുപേര്‍..! തെളിവുകള്‍ അവശേഷിപ്പിക്കാതെ വിദഗ്ദമായി അയാളെ കട്ടിലില്‍ അവര്‍ കിടത്തിയിരിക്കുന്നു. ഊഹം ശരിയാണെങ്കില്‍ എക്സിന്‍റെ ആളുകള്‍ എല്ലായിടത്തുമുണ്ട്. അല്ലെങ്കില്‍ അയാള്‍ക്കും മുകളില്‍ മറ്റാരോ ഒളിഞ്ഞു നില്‍പ്പുണ്ട്. ഇതൊക്കെ എന്തിലൊക്കെയോ ചൂണ്ടുകയാണ്. കേസ് അന്വേഷിക്കുന്ന ടീമിന് മനപ്പൂര്‍വ്വം പഴുതുകള്‍ ഇട്ട് കൊടുക്കുകയാണ്. സഞ്ജുവും വീരുവും ഉള്‍പ്പെടെ.! ഒരുപക്ഷേ റഷ്യാക്കാരനായ മിസ്റ്റര്‍ എക്സ് തന്നെ ആയിരിക്കുമോ ആ തലച്ചോര്‍?! എങ്കില്‍ എന്തിനാണ് അയാള്‍ മെക്സിക്കോയെ ബന്ധിപ്പിക്കുന്നത്?? ചോദ്യങ്ങള്‍ കരണിന്‍റെ തലച്ചോറിനെ വിങ്ങല്‍പ്പെടുത്തി. "സര്‍..??" റസാഖിന്‍റെ വിളിയാണ് അവനെ ഉണര്‍ത്തിയത്. കരണ്‍ വീരുവിലേക്ക് ചൂഴ്ന്നു നോക്കി. "നിന്നെ തട്ടിക്കൊണ്ട് പോന്നപ്പോള്‍ പിന്തുടര്‍ന്നവരൊക്കെ ആരാണ്??" "എക്സിന്‍റെ ആളുകള്‍ എല്ലായിടത്തുമുണ്ട്. ചിലപ്പോള്‍ ഇവരൊക്കെ അയാളുടെ ആളുകള്‍ ആയിരിക്കാം." "എന്തായിരുന്നു അവരുടെ ഉദ്ധേശം??" അറിയില്ലെന്നര്‍ത്ഥത്തില്‍ വീരു തലയാട്ടി. "ശെരി, എന്താണ് ഈ 52726 കൊണ്ട് അർത്ഥമാക്കുന്നത്??!!" "52726ഓ?? എന്താണത്??" വീരു മറുത്ത് ചോദിച്ചു. "അതെ..! അങ്ങനെയൊരു നമ്പര്‍ ഇതിനിടയിലുണ്ട്. ആ നമ്പറിനെ EBGBFലേക്ക് കൊണ്ടു വന്നെങ്കിലും കൃത്യമായ ഉത്തരം ഞങ്ങള്‍ക്ക് കിട്ടിയിട്ടില്ല. എന്താണ് ഇതൊക്കെ?" "അറിയില്ല.. സത്യമായും എനിക്കോ സഞ്ജുവിനോ ഇതിനെ കുറിച്ച് ഒന്നും അറിയില്ല." കരണ്‍ ശക്തമായി തല ചൊറിഞ്ഞു. "Damn It...! ശരി.., ഈ എക്സ് എവിടെയൊക്കെ ഉണ്ടാവാനാണ് സാധ്യത?" "അയാള്‍ കൂടുതലായും ഗോവയില്‍....." ഠേ..!! അടുത്ത നിമിഷം വെടി പൊട്ടുന്ന ശബ്ദം.! ശിരസ്സ് രണ്ടായി പിളര്‍ന്ന് വീരു നിശ്ചലമായതു കണ്ട് നാല് പേരും പകച്ചു പോയി. "𝗛𝗲𝘆 𝗜𝗻𝗰𝗼𝗺𝗶𝗻𝗴... 𝗚𝗲𝘁 𝗗𝗼𝘄𝗻...!!" ആക്രോഷത്തോടെ കരണ്‍ ചാടി മറിഞ്ഞു. സഞ്ജന ഭിത്തിയുടെ മറവില്‍ ചേര്‍ന്നു നിന്നു. റസാഖ് തറയിലേക്ക് കമഴ്ന്നു കിടന്നു. ഠേ..! അടുത്ത വെടി പൊട്ടിയതും കരണ്‍ വെട്ടി തിരിഞ്ഞു നോക്കി. വെടിയുണ്ട ശരീരത്തിൽ തറച്ച് ഹിമേഷ് നിലം പതിക്കുന്ന കാഴ്ച..! 𝗡𝗢𝗢𝗢𝗢𝗢𝗢𝗢𝗢.....!!! സഞ്ജന വലിയ വായില്‍ അലറുകയായിരുന്നു.. ((തുടരും))🔥 കണ്ണൂർകാരൻ 🌹🌹🌹🌹🌹 #📙 നോവൽ #📔 കഥ #✍ തുടർക്കഥ #🕵️‍♀️ കുറ്റാന്വേഷണ കഥകൾ #🧟 പ്രേതകഥകൾ!