പ്രതീക്ഷയുടെ കനലുകൾ ഭാഗം 2 അന്ന് രാത്രി സുകുമാരൻ അധികം ഉറങ്ങിയില്ല. നാലുമണിക്ക് മുൻപേ അയാൾ ഉണർന്നു. കൂടെ വീണയും. മകളുടെ ഫീസ് അടയ്ക്കാനുള്ള പണം അരികിലുണ്ടെന്ന ബോധം അവരിലുണ്ടാക്കിയ ഉന്മേഷം ചെറുതല്ലായിരുന്നു… തട്ടുകടയിലെ അടുപ്പിൽ തീ പുകഞ്ഞു തുടങ്ങി. വലിയ പാത്രങ്ങളിൽ ചായ തിളച്ചു. വീണ പലഹാരങ്ങൾ ഉണ്ടാക്കാൻ സുകുമാരനെ സഹായിച്ചു. വിനിതയും നേരത്തെ ഉണർന്ന് അവർക്കൊപ്പം കൂടി. അച്ഛനും അമ്മയും തനിക്ക് വേണ്ടി നടത്തുന്ന ഈ അധ്വാനം കാണുന്തോറും അവളുടെ ഉള്ളിൽ പഠിക്കാനുള്ള വാശി ഏറുകയായിരുന്നു…. എട്ടു മണിയോടെ ശിവൻ പറഞ്ഞ സ്ഥലത്ത് സുകുമാരൻ വിഭവങ്ങളുമായി എത്തി. കമ്പനിയിലെ ഉദ്യോഗസ്ഥർക്കും അതിഥികൾക്കും സുകുമാരൻ ഉണ്ടാക്കിയ പലഹാരങ്ങളും സ്പെഷ്യൽ ചായയും വലിയ ഇഷ്ടമായി…. "സുകുമാരൻ, നിന്റെ ചായയ്ക്ക് ഒരു പ്രത്യേക രുചി തന്നെയാണല്ലോ" കമ്പനിയുടെ ഉടമയായ മേനോൻ സാർ ചായ കുടിച്ചുകൊണ്ട് പറഞ്ഞു….. ആ വാക്കുകൾ സുകുമാരന് ലഭിച്ച വലിയൊരു അംഗീകാരമായിരുന്നു. പണി കഴിഞ്ഞപ്പോൾ ശിവൻ ബാക്കി തുക കൂടി സുകുമാരന്റെ കൈകളിൽ വെച്ചു കൊടുത്തു….. തിരികെ വീട്ടിലെത്തിയ സുകുമാരൻ വിനിതയെയും കൂട്ടി കോളേജിലേക്ക് തിരിച്ചു. ക്യൂവിൽ നിന്ന് ഫീസ് അടച്ച് രസീത് വാങ്ങുമ്പോൾ വിനിതയുടെ കണ്ണുകൾ സന്തോഷം കൊണ്ട് തിളങ്ങി…. "അച്ഛാ... ഇനി എനിക്ക് പേടി കൂടാതെ പഠിക്കാമല്ലോ," അവൾ അച്ഛന്റെ കൈ പിടിച്ചു പറഞ്ഞു…. "പഠിക്കണം മോളെ... നല്ല നിലയിൽ എത്തണം," സുകുമാരന്റെ വാക്കുകളിൽ ഉറച്ച വിശ്വാസമുണ്ടായിരുന്നു….. അന്ന് വൈകുന്നേരം തട്ടുകടയിൽ പതിവിലും കൂടുതൽ തിരക്കായിരുന്നു. കമ്പനിയിലെ ചായയുടെ രുചി അറിഞ്ഞ പലരും സുകുമാരന്റെ കട അന്വേഷിച്ചു വന്നു തുടങ്ങിയിരുന്നു…. രാഘവൻ നായർ കടയിലേക്ക് വന്നു.. "എന്താ സുകു, ഇന്ന് നിന്റെ മുഖത്ത് വലിയൊരു തെളിച്ചം ഉണ്ടല്ലോ".... സുകുമാരൻ ചിരിച്ചു, "മോളുടെ കാര്യം ശരിയായി നായരേ... പണിയെടുത്തു തന്നെ അവളെ പഠിപ്പിക്കാൻ പറ്റുമെന്നൊരു ധൈര്യം ഇപ്പോഴുണ്ട്.".... കോളേജിൽ നിന്ന് മടങ്ങി വന്ന വിനിത തന്റെ പുസ്തകങ്ങൾക്കിടയിൽ ഒരു ചെറിയ കുറിപ്പ് എഴുതി വെച്ചു.. "സ്വപ്നങ്ങളിലേക്ക് നടക്കാൻ അച്ഛൻ പണിത ഈ കനലുകൾ എന്നും എനിക്ക് വെളിച്ചമാകും.".... കഷ്ടപ്പാടുകൾക്കിടയിലും തളരാതെ അധ്വാനിച്ചാൽ ഏതൊരു പ്രതിസന്ധിയെയും മറികടക്കാമെന്ന് ആ തട്ടുകടയിലെ പുകയ്ക്കപ്പുറം സുകുമാരൻ തെളിയിച്ചു കൊണ്ടിരുന്നു…. #✍ തുടർക്കഥ #കഥ,ത്രില്ലെർ,ഹൊറർ #📔 കഥ #💞 പ്രണയകഥകൾ #📙 നോവൽ തുടരും.. ✍️സന്തോഷ്‌ ശശി….