UNDER WORLD ============= Algor Mortis : ============ 98.6°F ആണ് ജീവനുള്ളപ്പോൾ മനുഷ്യ ശരീര താപനില, ഒരാളുടെ മരണ ശേഷം അയാളുടെ ശരീര താപനില കുറഞ്ഞു അന്തരീക്ഷ താപനിലക്ക് തുല്യമാകും...! Postmortem Calorictiy : ==================== എന്നാൽ ചില പ്രത്യേക സാഹചര്യങ്ങളിൽ മരണത്തിന് ശേഷം രണ്ട് മൂന്ന് മണിക്കൂറുകൾ വരെ ശരീര താപനില കുറയുന്നില്ല. സൂര്യാഘാതം, ടെറ്റനസ്, കാഞ്ഞിരം വിഷബാധ, സെപ്റ്റിസീമിയ, തുടങ്ങിയ കാരണങ്ങൾ കൊണ്ട് ഉണ്ടാകുന്ന മരണ കാരണങ്ങളിൽ ആണ് സാധാരണയായി ഇങ്ങനെ സംഭവിക്കാറുള്ളത്... പക്ഷെ "പോസ്റ്റ്മോർട്ടം നടത്തിയാൽ പോലും കണ്ടെത്താൻ കഴിയാത്ത മാരക വിഷം ശരീരത്തിൽ ചെന്ന് മരണം സംഭവിച്ചാലും ശരീര താപനില കുറയാതെ നിൽക്കും" ഇത്തരം മരണങ്ങളിൽ ശരീരത്തിലെ ജൈവ പ്രക്രിയകളിലൂടെ കൂടുതൽ താപം ഉല്പാദിപ്പിക്കുന്നതാണ് താപനില കുറയാതിരിക്കുന്നതിനുള്ള കാരണം...! Postmortem Staining : ==================== ഗുരുത്വാകർഷണം മൂലം മൃതശരീരത്തിലെ രക്തം ശരീരത്തിന്റെ അടിഭാഗത്തേക്കൊഴുകുകയും ആ ഭാഗത്തെ ത്വക്കിന് നിറവ്യത്യാസം ഉണ്ടാവുകയും ചെയ്യുന്നു. മരണം സംഭവിക്കുമ്പോൾ തന്നെ ഈ ഒഴുക്ക് ആരംഭിക്കാൻ തുടങ്ങും 2 സെ.മീ വ്യാസം മതിക്കുന്ന ഭാഗത്ത് ഈ നിറവ്യത്യാസം ഉണ്ടാവാൻ രണ്ടുമണിക്കൂർ വേണ്ടിവരില്ല. എന്നാൽ ഇങ്ങനെയുണ്ടാകുന്ന പല ഭാഗങ്ങൾ സംയോജിച്ച് ശരീരത്തിന്റെ കീഴ്ഭാഗം ആകമാനം നിറവ്യത്യാസമുണ്ടാകാൻ 6 മണിക്കൂർ വരെയെടുക്കാം. ശരീരം അതേ അവസ്ഥയിൽ തുടർന്നാൽ 12 മണിക്കൂറിനകം സ്റ്റെയ്നിങ് കീഴ്ഭാഗത്ത് ഉറയ്ക്കുകയും ചെയ്യും. ഏകദേശ മരണസമയം കണ്ടുപിടിക്കാനും മരണ ശേഷം മൃതദേഹം മാറ്റിയിട്ടുണ്ടോ എന്നറിയാനും ചില സാഹചര്യങ്ങളിൽ മരണ കാരണത്തിലേക്കുള്ള സൂചനകൾ ലഭിക്കുന്നതിനും പോസ്റ്റ് മോർട്ടം സ്റ്റെയ്നിംഗ് സഹായകമാകാറുണ്ട്. ഉദാഹരണമായി തൂങ്ങി മരിച്ച ഒരു ശരീരത്തിൽ കൈകാലുകളുടെ താഴ്ഭാഗത്തായിരിക്കും ഈ നിറവ്യത്യാസം കാണപ്പെടുന്നത്...! Cadaveric Spasm : ================ വളരെ വിരളമായി മാത്രം കാണുന്ന ഒരു പ്രക്രിയയാണിത്. മരണശേഷം സാധാരണയുണ്ടാവുന്ന തളർച്ചയല്ലാതെ ഒരു കൂട്ടം പേശികളിൽ കാഠിന്യം അനുഭവപ്പെടുന്നു. അക്രമാസക്തമായ/ തീക്ഷ്ണമായ (Violent) മരണങ്ങളിലാണ് ഇത് കാണുക. ഉദാഹരണമായി തോക്കുപയോഗിച്ച് ആത്മഹത്യ ചെയ്യുന്ന ആളുടെ കൈയിൽ തോക്ക് ബലമായി പിടിച്ചിരിക്കുന്നതായി കാണുക, മുങ്ങിമരിച്ചവരുടെ കൈയിൽ ചെടികളും മറ്റും ബലമായി പിടിച്ചിരിക്കുന്നതായി കാണുക, തുടങ്ങിയവ. ഇങ്ങനെ മരണപെട്ട ആളുകളുടെ ശരീരത്തിൽ സൂക്ഷ്മജീവികളുടെ, പ്രധാനമായും ബാക്ടീരിയകളുടെ പ്രവർത്തനം കൊണ്ട് മൃതദേഹം ജീർണ്ണിക്കാനാരംഭിക്കുന്നു. ശരീരത്തിലെ കലകളും കോശങ്ങളും അവയിലെ അന്നജവും കൊഴുപ്പും മാംസ്യവും മറ്റും ശിഥിലീകരിക്കുകയും ചെയ്യുന്നു. ഹൈഡ്രജൻ സൾഫൈഡ്, സൾഫർ ഡയോക്സൈഡ്, അമോണിയ, മീഥേൻ തുടങ്ങിയ വാതകങ്ങൾ ശരീരത്തിൽ ഉണ്ടാവുന്നു. കൂടുതലായും കുടലിലാണ് ഇതുണ്ടാവുന്നത്. വയറ്, വൃഷ്ണസഞ്ചി എന്നിവ വീർക്കുകയും മുഖം ചീർക്കുകയും നാക്ക് പുറത്തേക്കുതള്ളുകയും ചെയ്യുന്നത് ഈ വാതകങ്ങളുണ്ടാവുന്നതിനാലാണ്. ചൂടുകാലത്ത് 12 മണിക്കൂറിന് ശേഷം കുടലുകളിൽ ഈ വാതകങ്ങൾ രൂപപ്പെടാനാരംഭിക്കും. 24 -36 മണിക്കൂർ സമയം കൊണ്ട് ഈ ഗ്യാസ് രൂപീകരണം മൂലം ശരീരം ചീർക്കുകയും നാക്കും കണ്ണും പുറത്തേക്ക് തള്ളുകയും ചെയ്യാം. ഈ മർദ്ദം മൂലം മൂക്കിൽ നിന്നും വായിൽ നിന്നും ചുവന്ന ദ്രാവകം പുറത്തേക്ക് വരികയും ചെയ്യാം. കൂടാതെ അഴുകുന്നതിന്റെ അസുഖകരമായ ഗന്ധവും ഉണ്ടാകാം. മരണത്തിന് 24 മണിക്കൂറിന് ശേഷം ശരീരത്തിലെ ചർമ്മത്തിൽ അവിടിവിടെയായി കുമിളകൾ രൂപപ്പെടുകയും ചർമ്മം ഇളകുകയും കൈപ്പത്തിയിലെയും പാദത്തിലെയും കട്ടിയുള്ള ചർമ്മഭാഗം വരെ ഇളകുകയും ചെയ്യും. 72 മണിക്കൂർ കഴിയുന്നതോടെ തലമുടി തലയിൽ നിന്നും വിട്ടുപോകാൻ തുടങ്ങും. കൂടാതെ ശരീരത്തിന്റെ നിറം മാറാൻ തുടങ്ങുകയും ചെയ്യും. ഏറ്റവും ആദ്യം നിറം മാറുന്നത് അടിവയറിന്റെ വലതുഭാഗത്തായിരിക്കും. മരണ ശേഷം ഏതാണ്ട് 18 മണിക്കൂറുകൾ മുതൽ ഈ ഭാഗത്ത് പച്ച നിറമാകാൻ തുടങ്ങും. കൂടുതൽ സമയം കഴിയുമ്പോൾ ശരീരമാസകലം പച്ചനിറം ബാധിക്കുകയും അതു പിന്നീട് പച്ച കലർന്ന കറുപ്പാകുകയും ചെയ്യും...! Marbling : ========= രക്തക്കുഴലുകളിലൂടെ സഞ്ചരിക്കുന്ന ബാക്ടീരിയകൾ സൃഷ്ടിക്കുന്ന ഹൈഡ്രജൻ സൾഫൈഡ് ഹീമോഗ്ലോബിൻ രൂപാന്തരം പ്രാപിച്ചുണ്ടായ (Methemoglobin) നുമായി കൂടിച്ചേർന്ന് (Sulphmethemoglobin) ഉണ്ടാവുന്നു. ബ്രാഞ്ചുകളായി പിരിയുന്ന രക്തക്കുഴലുകളിൽ പച്ച നിറത്തിലുള്ള ഈ സംയുക്തമുള്ളതിനാൽ കാഴ്ചയിൽ മാർബിൾ പോലെ തോന്നിക്കുന്നു. മരണത്തിന് 36 മണിക്കൂർ ശേഷമേ മാർബ്ലിംഗ് ഉണ്ടാവുകയുള്ളൂ. തോൾ, തുട, കൈകാലുകളുടെ പുറം ഭാഗം എന്നിവിടങ്ങളിലാണ് ആദ്യമായി ഈ അവസ്ഥ കാണപ്പെടുക. ഇതോടൊപ്പം തന്നെ ആന്തരാവയവങ്ങളും ജീർണ്ണിക്കും. പുരുഷന്മാരിൽ പ്രൊസ്റ്റേറ്റ് ഗ്രന്ഥിയും (Prostate gland) സ്ത്രീകളിൽ ഗർഭപാത്രവുമാണ് (Uterus) ഏറ്റവും അവസാനം അഴുകുന്ന ആന്തരാവയവങ്ങൾ. 12 മണിക്കൂറിന് ശേഷം ശ്വാസനാളിയുടെയും (Larynx and trachea) മഹാധമനിയുടെയും (Aorta) ഉൾവശം പിങ്ക് കലർന്ന ചുവപ്പുനിറമാകുന്നു. രണ്ട് ദിവസം കൊണ്ട് പ്ലീഹ (Spleen) കുഴമ്പുരൂപത്തിലാകാം. മരണത്തിന് 36 മണിക്കൂറിന് ശേഷം കരൾ (Liver) മൃദുവാകുകയും ശേഷം തേനീച്ചക്കൂട് (Honeycomb appearance) പോലെ ആവുകയും ചെയ്യും. ശ്വാസകോശം (Lungs) കുറച്ചുദിവസങ്ങൾ കൊണ്ട് ജീർണ്ണിച്ചു ചുരുങ്ങി ഒരു കറുത്ത പിണ്ഡമായി മാറും. തലച്ചോർ 3 മുതൽ 5 ദിവസം കൊണ്ട് പച്ച കലർന്ന നരച്ച നിറത്തിലുള്ള ദ്രാവക രൂപത്തിലാവും. ഹൃദയം, വൃക്ക തുടങ്ങി ആന്തരാവയവങ്ങൾ എല്ലാം മൃദുവാകുകയും ജീർണ്ണിക്കുകയും ചെയ്യുന്നു. എന്നാൽ മൂത്രസഞ്ചി താരതമ്യേന സാവകാശം മാത്രമേ അഴുകുകയുള്ളൂ. പുഴുക്കൾ അരിക്കുന്ന മൃതദേഹം കണ്ടിട്ടുണ്ടോ ? ഇതും ജീർണ്ണിക്കുന്നതിന്റെ ഭാഗമാണ്. ഉറുമ്പാണ് മൃതശരീരത്തിൽ ആദ്യമായെത്താൻ സാധ്യതയുള്ള ഷഡ്പദം. മരണത്തിന് ശേഷം മണിക്കൂറുകൾക്കുള്ളിൽ തന്നെ ശരീരത്തിൽ ഉറുമ്പിനെ കാണാറുണ്ട്. മരണത്തിന് ശേഷം അധികം താമസമില്ലാതെ തന്നെ ഈച്ചകളും മറ്റും മുട്ടയിടും. 24 മണിക്കൂർ കഴിഞ്ഞാൽ മുട്ടകളിൽ നിന്നും പുഴുക്കൾ ഉണ്ടാവുകയും 36 - 48 മണിക്കൂർ കൊണ്ട് അവ ശരീരത്തിൽ ഇഴയുന്നത് കാണാൻ സാധിക്കുകയും ചെയ്യും. പല തരം ഈച്ചകളുടെ മുട്ടകളിൽ നിന്നും പല സമയത്താണ് പുഴുക്കളുണ്ടാവുന്നത്. 10 ദിവസത്തിന് ശേഷമാണ് സാധാരണ ശരീരത്തിൽ വണ്ടുകൾ കാണപ്പെടാൻ തുടങ്ങുന്നത്...! Mummification : ============== ഈ ഒരു അവസ്ഥാന്തരം വളരെ വിരളമായേ കാണാറുള്ളൂ. ഈജിപ്തിൽ മരണമടഞ്ഞ രാജാക്കന്മാരെ മമ്മികളായി സൂക്ഷിച്ചുവെക്കാറുണ്ടായിരുന്നു എന്ന് കേട്ടിട്ടില്ലേ...? ഏതാണ്ട് അതേ കാര്യങ്ങളാണ് ഇവിടെയും സംഭവിക്കുന്നത്. ശരീരത്തിലെ ജലാംശം പൂർണ്ണമായി നഷ്ടപ്പെട്ട് ശരീരഭാഗങ്ങൾ ഉണങ്ങി വരണ്ട അവസ്ഥയിലാകുന്നു. ശാരീരികഘടനയും പ്രത്യേകതകളും നഷ്ടപ്പെടുന്നില്ല. വർഷങ്ങൾ കഴിഞ്ഞാലും വ്യക്തിയെ തിരിച്ചറിയാൻ സാധിക്കും. ഉയർന്ന അന്തരീക്ഷ താപനിലയും വരണ്ട കാലാവസ്ഥയും അത്യാവശ്യമാണിതിന്. മരണ ശേഷം ഏറ്റവും കുറഞ്ഞത് മൂന്ന് മാസമെങ്കിലും വേണം ശരീരം മമ്മി ആയിമാറാൻ. ശരീരം അസ്ഥികൾ മാത്രമായി മാറാൻ ഏതാണ്ട് ഒരു വർഷം വേണമെന്നാണ് മതിപ്പ്. എന്നാൽ ചില സാഹചര്യങ്ങളിൽ ഇതിൽ വ്യത്യാസം ഉള്ളതായി കണ്ടിട്ടുണ്ട്...! അന്തരീക്ഷ താപനില, അന്തരീക്ഷത്തിലെ ഈർപ്പം, മൃതശരീരത്തിലെ വസ്ത്രം, ശരീരത്തിലെ കൊഴുപ്പിന്റെ അളവ്, മരണ കാരണം, ശരീരം സ്ഥിതിചെയ്യുന്നത് കരയിലോ വെള്ളത്തിലോ എന്നിങ്ങനെ നിരവധി ഘടകങ്ങൾ ശരീരത്തിന്റെ ജീർണ്ണിക്കലിനെ ബാധിക്കുന്നു. വായു സഞ്ചാരമുള്ള സ്ഥലത്തായിരിക്കും ഏറ്റവും വേഗതയിൽ ഇത് സംഭവിക്കുക, അതിന്റെ ഇരട്ടി സമയം കൊണ്ടേ വെള്ളത്തിൽ മുങ്ങിക്കിടക്കുന്ന ശരീരത്തിൽ അതേ വ്യത്യാസങ്ങൾ ഉണ്ടാവുകയുള്ളു. ആഴത്തിൽ കുഴിച്ചിടുന്ന ശരീരങ്ങളിൽ എട്ട് മടങ്ങ് സമയവും വേണം അതേ വ്യത്യാസങ്ങൾ ഉണ്ടാവാൻ. തണുത്ത കാലാവസ്ഥയിൽ ഈ വിവരിച്ചിരിക്കുന്ന ജീർണ്ണിക്കൽ പ്രക്രിയ എല്ലാം മന്ദഗതിയിലാവും. 4°Cൽ താഴെയാണ് താപനിലയെങ്കിൽ ശരീരത്തിനുണ്ടാകാവുന്ന വ്യത്യാസങ്ങൾ വളരെ കുറവായിരിക്കും...!!! ********************** വായിച്ചുകൊണ്ടിരുന്ന പുസ്തകത്തിലെ പേജിന്റെ ഇടയിലേക്ക് തന്റെ വിരലുകൾ കടത്തി അടച്ചു വെച്ച ശേഷം ദീർഘമായൊന്ന് നെടുവീർപ്പിട്ടുകൊണ്ട് കിരൺ തലക്ക് കൈ കൊടുത്തിരുന്നു...! "ചേച്ചീ." പുറകെ നിന്നും വിളി വന്നതിന്റെ കൂടെ തന്നെ ഒരു കൈ കൂടി കിരണിന്റെ തോളിൽ പതിഞ്ഞതും ഞെട്ടിത്തരിച്ചുകൊണ്ട് ഇരുന്നിടത്ത് നിന്നും കിരൺ ചാടി എഴുന്നേറ്റു...! "അയ്യോ.... ഇതെന്നാ പറ്റി ചേച്ചി പേടിച്ചു പോയോ...?" ശ്വാസഗതി വർധിച്ചു... ചുവന്ന കണ്ണുകളുമായി നിൽക്കുന്ന കിരണിനെ നോക്കി ജുവൽ അമ്പരന്ന് നിന്നു...! "ചേച്ചീ.." വീണ്ടും ഉറക്കെ കിരണിനെ വിളിച്ചുകൊണ്ട് തോളിൽ പിടിച്ചു ജുവൽ കുലുക്കിയതും...! "ഹാ... വിട് പെണ്ണെ." "വലിയ IPS കാരിയാ... എന്നിട്ടാണ് ഇങ്ങനെ അന്തം വിട്ട് കുന്തം പോലെ നിൽക്കുന്നത്." അവളുടെ കളിയാക്കൽ കേട്ട് കയ്യിലിരുന്ന പുസ്തകം കിരൺ അവൾക്ക് നേരെ നീട്ടി...! "ഇതെന്താ...?" "വായിച്ചു നോക്ക്... അപ്പോ മനസിലാകും ഞാൻ എന്താ അങ്ങനെ ഇരുന്നത് എന്ന്." "എനിക്കെങ്ങും വേണ്ട... ഞാൻ ഈ വക കൂതറ സാധനങ്ങൾ ഒന്നും വായിക്കാറില്ല." "നല്ലതാ... 24 മണിക്കൂറും മൊബൈൽ കുത്തി ഇരുന്നാൽ മതി." "നമുക്ക് അത് മതിയേ." "നടക്കട്ടെ... നടക്കട്ടെ. ആട്ടെ മോള് എന്തിനാ ഇപ്പോ ഇങ്ങോട്ട് വന്നത്...? ഫോണിന്റെ ചാർജ് തീർന്നോ...?" "ചേച്ചി അത്ര കളിയാക്കുക ഒന്നും വേണ്ട. ഒന്നല്ലെങ്കിലും ഞാൻ ഒരു ലോ കോളേജ് സ്റ്റുഡന്റ് അല്ലെ...?" മറുപടി ഒന്നും നൽകാതെ മടക്കി വെച്ചിരുന്ന പുസ്തകം കിരൺ നിവർത്തി...! "ഇനിം ഇത് വായിക്കാൻ പോകുവാണോ...?" "അല്ലാതെ പിന്നെ ഞാൻ എന്ത് ചെയ്യാനാ...?" പുസ്തകത്തിൽ കാണിച്ചിരിക്കുന്ന ചിത്രത്തിലേക്ക് തന്നെ സൂക്ഷിച്ചു നോക്കികൊണ്ട് കിരൺ മറുപടി പറഞ്ഞതും ജുവലിന്റെ കണ്ണുകളും പതിയെ ചിത്രത്തിലൂടെ പരതി നടന്നു...! "ഇത് കണ്ടിട്ട് ചേച്ചിടെ...?" "അതെ... അത് തന്നെ ആണ് ഞാൻ ഒരു നിമിഷത്തേക്ക് വേറെ ഏതോ ലോകത്ത് ആയത്." കിരണിന്റെ മറുപടി കേട്ട് അവളുടെ തോളിൽ പിടിച്ചുകൊണ്ട് ജുവൽ പുസ്തകത്തിന്റെ അടുത്തേക്ക് മുഖം കുനിച്ചു...! """വൃത്തിഹീനമായ ഒരു ഇരുൾ മുറിയിൽ അങ്ങിങ്ങായി രക്തത്തിന്റെ പാടുകൾ. ഭിത്തിയിൽ ഒരു വശത്തായി കൈയിൽ പറ്റിയ രക്തം തേച്ചു പിടിപ്പിച്ച ശേഷം താഴേക്ക് ഒഴുകിയ നിലയിൽ കാണുന്നു. ഇതൊന്നും അല്ലാതെ ഒരു വൃത്തത്തിന്റെ അകത്തു നഗ്നയായി കിടക്കുന്ന സ്ത്രീ ശരീരം അതിലുപരി നഗ്ന ശരീരത്തിൽ ഇരുപതോളം വരകൾ ആ വരകൾ കത്തി പോലെ എന്തോ കൊണ്ട് വരച്ച് മുറിവേല്പിച്ച പോലെ തോനുന്നു. ആ ശരീരം അഴുകിയതാണെന്ന് തോന്നിക്കും വിധം ഈച്ചകൾ ചുറ്റിലും വട്ടമിട്ടു പറക്കുന്നു, കണ്ണിന്റെ ഭാഗത്തും ഓരോ മുറിവിലൂടെയും പുഴുക്കൾ അരിച്ചിറങ്ങുന്നതുപോലെ.""" "ഭയാനകം." അറിയാതെ ജുവൽ മൊഴിഞ്ഞതും... കിരൺ തല ഉയർത്തി അവളെ നോക്കി...! "ഒരു വ്യത്യാസവും ഇല്ല ജുവൽ. വർഷങ്ങൾക്ക് മുൻപ് അവളുടെ ശരീരം ഞാൻ എങ്ങനെ ആണോ നേരിൽ കണ്ടത് അതുപോലെ തന്നെ തോനുന്നു." "ഞാനും അത് തന്നെയാണ് ചേച്ചി ആലോചിച്ചത്. ചേച്ചി എന്നോട് പറഞ്ഞിട്ടുള്ളത് പോലെ തന്നെ ആണല്ലോ ഈ ചിത്രം എന്ന്." "ഒരെത്തും പിടിയും കിട്ടുന്നില്ല." തല താഴ്ത്തി ഒന്ന് നെടുവീർപ് ഇട്ടുകൊണ്ട് കിരൺ ആ ചിത്രത്തിലേക്ക് തന്നെ നോക്കി... അപ്പോഴും വർഷങ്ങൾക്ക് മുൻപ് അവൾ നേരിൽ കണ്ട കാഴ്ചകളും അവളുടെ മനസ്സിൽ മിന്നി മറയുന്നുണ്ടായിരുന്നു...! "ഇത് എഴുതിയ ആളെ കണ്ടെത്തിയാൽ സത്യം അറിയാൻ കഴിയില്ലേ...?" ജുവലിന്റെ സംശയം കേട്ട് പുസ്തകത്തിന്റെ ആമുഖം കിരൺ തുറന്നു...! """ചിലരിഹ പലവാസരം വസിക്കും ചിലരുടനേ നിജകർമണാ മരിക്കും മരണമൊരുവനും വരാത്തതല്ലെ ന്നറിക ഭവാനറിവുള്ള ചാരുബുദ്ധേ""" ആമുഖത്തിലെ വരികളും അതിനു താഴെ ആയുള്ള പേരും ജുവൽ വായിച്ചു...! """മുന്ന""" "ഇതാരാ...?" "അറിയില്ല ജുവൽ... ആ തൂലിക നാമം മാത്രമേ ഏവർക്കും അറിയൂ... ആരാണെന്നോ എന്താണെന്നോ അറിയില്ല. പക്ഷെ ഒരു കാര്യം അറിയാം... അയാൾ എഴുതുന്നത് യാതാർത്ഥ സംഭവങ്ങളെ അടിസ്ഥാനപ്പെടുത്തി മാത്രം ആയിരിക്കും." "കൊള്ളാമല്ലോ... എന്താ പുസ്തകത്തിന്റെ പേര്...?" "UNDER WORLD... a mystery in parallel life." "എന്നാ ചേച്ചി ആ പുസ്തകം ഒന്ന് തന്നെ ഞാൻ ഒന്ന് വായിച്ചു നോക്കട്ടെ." "അത് തരാം... അതിനു മുൻപ് നീ എന്തിനാ വന്നതെന്ന് പറഞ്ഞില്ലല്ലോ." "ആഹ് അതോ... അടുത്ത ആഴ്ച കോളേജിൽ നിന്നും ടൂർ പോകുന്നുണ്ട് അതിനൊരു 5000 രൂപ വേണം അത് ചോദിക്കാൻ വന്നതാ." പുസ്തകം നീട്ടിയ ശേഷം ടേബിളിന്റെ ഡ്രോയിൽ നിന്നും ATM കാർഡ് ജുവലിന്റെ നേരെ കിരൺ നീട്ടി...! "നാളെ കാഷ് എടുത്തിട്ട് വൈകിട്ട് തന്നാ മതി." "ഓക്കേ... താങ്ക്സ് മുത്തേ." കിരണിന്റെ കവിളിൽ ഒരു മുത്തം നൽകി ജുവൽ തിരിഞ്ഞു നടന്നു... വർഷങ്ങൾക്ക് മുൻപ് ചേച്ചിയുടെ ജീവിതത്തിൽ നടന്ന കാര്യങ്ങളും ആ പുസ്തകത്തിൽ കണ്ട ചിത്രവും അവളുടെ മനസ്സിൽ നിറഞ്ഞു നിന്നു... റൂമിൽ കയറി ഡോർ ലോക്ക് ചെയ്ത ശേഷം ബെഡ് ലാംപ് ഓൺ ചെയ്തുകൊണ്ട് അവൾ ആ പുസ്തകം തുറന്നു... ആമുഖം ഒന്നുകൂടി വായിച്ച ശേഷം ആ നിഗൂഢത നിറഞ്ഞ എഴുത്തുകാരനെ ഒരു നിമിഷം സ്മരിച്ചുകൊണ്ട് അടുത്ത പേജിലേക്ക് അവൾ കടന്നു...!!! ==== WAIT FOR THE MYSTERIOUS EPISODES ==== സുഹൃത്തുക്കളെ... ഈ ചെറിയ സ്റ്റോറിയുടെ ബാക്കി ഭാഗങ്ങൾ എല്ലാ ദിവസവും വൈകുന്നേരം 4 മണിക്ക് ഉണ്ടായിരിക്കുന്നതാണ്... ആയതിനാൽ നിങ്ങൾ ഏവരുടെയും അഭിപ്രായങ്ങളും, നിർദ്ദേശങ്ങളും, പോരായ്മകളും രേഘപെടുത്തുമെന്ന വിശ്വാസത്തോടെ നിങ്ങളുടെ സ്വന്തം കണ്ണൂർകാരൻ ❤️❤️❤️❤️❤️ #📔 കഥ #📙 നോവൽ #✍ തുടർക്കഥ #🧟 പ്രേതകഥകൾ! #🕵️‍♀️ കുറ്റാന്വേഷണ കഥകൾ