ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/61PPeM0?d=n&ui=v64j8rk&e1=c Part 6തുടരുന്നു പിടിച്ച് വലിച്ച് ബിൽഡിങ്ങിന്റെ പടവുകൾ കയറി. പ്രിൻസിപ്പാളച്ചന്റെ ഓഫീസിലേക്കു കടക്കാനാഞ്ഞതും, ഒരു പെൺകുട്ടി വന്ന് തടഞ്ഞു. “പുതിയ അഡ്മിഷനാണെങ്കിൽ ഈ ഫോം ഫിൽ ചെയ്യു. എന്നിട്ട് പുറത്ത് വെയ്റ്റ് ചെയ്യണം.” “ഓക്കേ മാഡം! ” ആൻസി ഭവ്യതയോടെ ആ പേപ്പർ വാങ്ങുന്നതു കണ്ടപ്പോൾ ആൽബിക്ക് അത്ഭുതം തോന്നി. ഇത്ര ഭയങ്കര സംഭവമാണോ ഈ സ്കൂൾ ? ഏതാണ്ട് അര മണിക്കൂറോളം വെയ്റ്റ് ചെയ്തിട്ടാണ് അവരെ പ്രിൻസിപ്പാൾ വിളിച്ചത്. “മിസ്റ്റർ ആൽബർട്ട് സാമുവൽ! ” മനോഹരമായി പുഞ്ചിരിച്ചുകൊണ്ട് ആ വൈദികൻ എഴുന്നേറ്റ് ഹസ്തദാനത്തിനായി കൈ നീട്ടി. “ഗുഡ് മോണിങ്ങ് ഫാദർ! ” ആൽബി അദ്ദേഹത്തിന്റെ കൈ പിടിച്ചു കുലുക്കി. “ആൽബർട്ട് എന്തു ചെയ്യുന്നു ? ഫോമിൽ ഗവണ്മെന്റ് എമ്പ്ലോയി എന്നു മാത്രമേ എഴുതിയിട്ടുള്ളൂ. ഏതു ഡിപ്പാർട്ട്മെന്റാണ് ? ” തന്റെ ഭർത്താവിനെ അച്ചൻ തിരിച്ചറിഞ്ഞില്ല എന്ന് ആൻസിക്ക് വിശ്വസിക്കാനേ കഴിഞ്ഞില്ല. ഇയാൾ പത്രമൊന്നും വായിക്കാറില്ലേ ? “ഞാൻ പോലീസിലാണ്. സർക്കിൾ ഇൻസ്പെക്ടർ.” അൽപ്പം ജാള്യതയോടെയാണ് ആൽബിയത് പറഞ്ഞത്. നിസ്സാര കാര്യമാണെങ്കിൽ പോലും തന്റെ ഔദ്യോഗിക പദവി ദുരുപയോഗം ചെയ്യേണ്ടി വരുന്നത് അയാൾക്ക് സഹിക്കാനാകില്ലായിരുന്നു. പക്ഷേ കഴിഞ്ഞ കുറേ ദിവസങ്ങളായി താൻ കാത്തു സൂക്ഷിച്ചിരുന്ന തന്റെ മൂല്യങ്ങളൊക്കെ ഓരോന്നായി നഷ്ടപ്പെട്ടുകൊണ്ടിരിക്കുകയാണ്. ജോലി എന്താണെന്ന് കേട്ടതും, അച്ചന്റെ മുഖം ഇരുളുന്നത് അയാൾ ശ്രദ്ധിച്ചു. വെറുതേ എന്റെ സമയം മിനക്കെടുത്താതെ പൊയ്ക്കോളൂ എന്ന് പറയാതെ പറയുന്ന ഒരു മുഖഭാവം. “ഓക്കേ... റെഫറൻസിനായിട്ട് എഴുതിയിരിക്കുന്ന ഈ ഡോ. ജേക്കബിനെ എനിക്ക് പരിചയമില്ല. അദ്ദേഹത്തിന്റെ കുഞ്ഞ് ഇവിടെ പഠിക്കുന്നുണ്ടോ ? ” “ഉവ്വ്! അലീന മോൾ സെക്കൻഡ് സ്റ്റാൻഡേർഡിലാ.” “ഓക്കേ! എനിക്കത് പരിശോധിക്കണം. പിന്നെ, നിങ്ങൾ ഫീ സ്ട്രക്ചർ നോക്കിയിരുന്നോ ? ഇവിടെ ഫീസ് അൽപ്പം കൂടുതലാണ്. മന്ത്ലി 1200 + ബസിന്റെ 800 ഒക്കെക്കൂടി ഏതാണ്ട് 2000 രൂപ വരും.“ ”അതു പ്രശ്നമില്ലച്ചോ.“ ”പിന്നെ സ്റ്റാർട്ട് ചെയ്യുമ്പൊ...“ അച്ചൻ ഒന്ന് നിർത്തി തന്റെ കണ്ണടയുടെ ഫ്രെയ്മിനു മുകളിലൂടെ അവരെ രണ്ടു പേരെയും ഒന്നു സൂക്ഷിച്ചു നോക്കി. ”ചെറിയൊരു ഡൊണേഷൻ വേണ്ടിവരും. പൊതുവേ എല്ലാടത്തും ഉള്ളതു പോലൊക്കെ തന്നെ. “ ”അതെത്ര വരും ഫാദർ ? “ ”അതിപ്പൊ, നിങ്ങൾക്ക് ഒന്നുകിൽ ഒറ്റയടിക്ക് ഫുൾ എമൗണ്ട് ഇൻവെസ്റ്റ് ചെയ്യാം. പിന്നെ, കുഞ്ഞ് ട്വെൽത്ത് കഴിയുന്ന വരെ ഞങ്ങൾ ഒന്നും ചോദിക്കില്ല. അതാകുമ്പൊ എട്ടു രൂപ വരും. എട്ടു ലക്ഷം.“ ആൽബി ഞെട്ടി ഒന്ന് മുൻപോട്ടാഞ്ഞു പോയി. ”അല്ലെങ്കിൽ 3 പ്രാവശ്യമായി കൊടുത്താൽ മതി. പക്ഷേ അപ്പൊ ഓരോ ഗഡു എത്രയാ ചോദിക്കുക എന്ന് ഇപ്പൊ പറയാനൊക്കില്ല. അറിയാമല്ലോ, 10 കൊല്ലം കഴിഞ്ഞ് നോക്കുമ്പൊ രണ്ടു ലക്ഷത്തിന് ഇന്നത്തെ രണ്ടായിരം രൂപേടെ വെലയേ കാണൂ.“ അച്ചൻ ക്രൂരമായൊരു ചിരിയോടു കൂടി തുടരുകയാണ്. “കാശ്, ഏതു തരത്തിലായാലും പ്രശ്നമില്ല. സ്കൂൾ ചർച്ചിന്റെ അണ്ടറിലാണ്. ഓഡിറ്റിങ്ങൊന്നുമില്ല. ലിക്വിഡ് കാഷ് ഉണ്ടങ്കിൽ അത് അങ്ങനെ തന്നെ കൊണ്ടു പോരെ. ഒരു പ്രശ്നവുമില്ല.” ” എന്റെ അഞ്ചു വയസ്സു കാരി മകളെ എൽ. കെ. ജി. യിൽ ചേർക്കുന്ന കാര്യം തന്നെയാണോ അച്ചനീ പറയുന്നത് ? “ ആൽബിയുടെ മുഖത്ത് ഒരു വിളറിയ ചിരിയുണ്ടായിരുന്നു. “ആൽബർട്ട്...നിങ്ങൾ ഈ സ്കൂൾ തിരഞ്ഞു പിടിച്ച് വരണമെങ്കിൽ അതിനെന്തെങ്കിലും കാരണം കാണുമല്ലോ. ഇല്ലേ ? ഒന്നാമത് നിങ്ങൾക്ക് നല്ലൊരു റെഫറൻസ് ഇല്ല. സാധാരണ, അറിയപ്പെടുന്ന ആരെങ്കിലും പരിചയപ്പെടുത്തിയെങ്കിലേ നമ്മൾ കുട്ടിയെ അഡ്മിറ്റ് ചെയ്യുകയുള്ളൂ. അതു ഞാൻ വേണ്ടെന്നു വെക്കാം. കാരണം താങ്കൾ ഒരു സർക്കിൾ ഇൻസ്പെക്ടറാണല്ലോ.” ആൻസി എന്തോ പറയാനഞ്ഞതാണ്. ആൽബി ഉടനെ തന്നെ അവളുടെ കൈ പിടിച്ചമർത്തി. “ശരിയച്ചോ. ഞങ്ങൾ ഒന്ന് ആലോചിച്ചിട്ട് പറയാം. ”ആൽബി എഴുന്നേറ്റു. “ഇന്നു തന്നെ പറയണം കേട്ടോ. ഇനി ആകെ നാലോ അഞ്ചോ സീറ്റേ ബാക്കിയുള്ളൂ.” പുറത്തേക്കിറങ്ങാൻ തുടങ്ങിയ ആൽബർട്ട് ഒന്ന് തിരിഞ്ഞു നിന്നു. മുഖം ഗൗരവം നിറഞ്ഞു. “അച്ചൻ ആ ലിക്വിഡ് കാഷിന്റെ കാര്യം പറഞ്ഞില്ലേ. അങ്ങനാണോ ഇവിടെ കൂടുതലും ട്രാൻസാക്ഷൻ നടക്കാറ് ? ” “പോലീസ് ചോദ്യം എനിക്ക് മനസ്സിലായി.” അച്ചൻ ചിരിച്ചു കൊണ്ട് എഴുന്നേറ്റു. “നമ്മളിവിടെ ഇല്ലീഗലായി ഒന്നും ചെയ്യുന്നില്ല സുഹൃത്തേ. നിങ്ങൾ തരുന്ന പണം, എട്ടു ലക്ഷമായാലും, എട്ടു കോടിയായാലും നമുക്ക് സ്വീകരിക്കുന്നതിന് തടസ്സമില്ല. കാരണം ചർച്ചാണ് ഇത് വാങ്ങുന്നത്. നമുക്ക് ടാക്സ് കൊടുക്കണ്ട. സോ, ഓഡിറ്റിങ്ങില്ല.” “ചുരുക്കി പറഞ്ഞാൽ, എന്റെ കയ്യിൽ ഒരു എട്ടുലക്ഷം രൂപ കള്ളപ്പണമുണ്ടെങ്കിൽ എനിക്കതിവിടെ കൊണ്ടെ തന്ന് എന്റെ കൊച്ചിനെ ചേർക്കാം. ആരും ചോദിക്കാൻ വരില്ല. എന്ന്. അല്ലേ ? ” “സീ മിസ്റ്റർ ആൽബർട്ട്, അങ്ങനെ ചെയ്താൽ, നിങ്ങളാണ് തെറ്റു ചെയ്യുന്നത്. വാങ്ങുന്ന ചർച്ച് അല്ല. മനസ്സിലായോ ? ” “താങ്ക് യൂ ഫാദർ! എനിക്ക് മനസ്സിലായി എന്താണ് ഈ സ്കൂളിൽ ഇത്ര തിരക്കെന്ന്. സ്കൂളിന്റെ പേരു മാറ്റി സെന്റ് സ്റ്റീഫൻസ് മണി ലൗണ്ടറിങ്ങ് സർവ്വീസ് എന്ന് വെക്കണം! അതാണ് കുറച്ചു കൂടി ചേരുക. പാവപ്പെട്ടവർക്കു മാത്രമല്ലല്ലോ, മുതലാളിമാർക്കും മക്കളെ പഠിപ്പിക്കണ്ടെ.” തീഷ്ണമായിരുന്ന ആൽബിയുടെ വാക്കുകൾ അച്ചനെ ശരിക്കും ഇരുത്തിക്കളഞ്ഞു. “ഒന്നു ചോദിച്ചോട്ടെ ഫാദർ... ഈ കാശു മുഴുവൻ വാങ്ങിയിട്ട് നിങ്ങൾ എന്താണിവിടെ ചെയ്യുന്നത് ? എന്താണ് ഈ സ്കൂളിനിത്ര ചിലവു വരുന്നത് ? ” ആൽബി നിർത്താനുള്ള ഭാവമുണ്ടായിരുന്നില്ല. “മിസ്റ്റർ ആൽബർട്ട്...” അച്ചന്റെ സ്വരം പതറിയിരുന്നു. “ഞാനൊരു ഉദാഹരണം മാത്രം പറയാം. ഈ സ്കൂളിന്റെ മുൻപിൽ ഹൈവേ അല്ലേ ? ഇങ്ങോട്ട് കയറണമെങ്കിൽ സർവ്വീസ് റോഡിലൂടെ വന്നെങ്കിലേ ഒക്കൂ. ശരിയല്ലേ ? അതു കൊണ്ടാണ് മാനേജ്മെന്റ് ഒരു ഓവർ ബ്രിഡ്ജും അണ്ടർ പാസും പണിയാൻ തീരുമാനിച്ചത്. കഴിഞ്ഞ ആറു മാസമായി അതിന്റെ പേപ്പർ വർക്കുകളായിരുന്നു. ഹൈവേ അതോറിറ്റിയുടെ അപ്പ്രൂവലെല്ലാം കിട്ടിക്കഴിഞ്ഞു. ഇനി ആകെ വേണ്ടത് പണമാണ്. ഏതാണ്ട് 9 കോടി രൂപ.” “അച്ചോ...” ആല്ബിയുടെ സ്വരത്തിൽ പുച്ഛം നിറഞ്ഞു. “ 1200 രൂപ വെച്ച് 3000 സ്റ്റുഡൻസിന്റെ ഫീസ് തന്നെ ഒരു മാസം എത്ര കോടി വരുമച്ചോ ? ” “അത് സ്കൂൾ നടത്തിപ്പിനുള്ള ചിലവുകൾ. ഇതെന്താ നിസ്സാര കാര്യമാണോ ? ” അച്ചനു കുറേശ്ശേ ദേഷ്യം വന്നു തുടങ്ങിയിരിക്കുന്നു. “അല്ലച്ചോ... നിസ്സാര കാര്യമല്ല. അച്ചന്മാർക്ക് ബെൻസും കാഡില്ലാക്കും വാങ്ങണ്ടേ ? ബിഷപ്പുമാർക്ക് ഫൈവ് സ്റ്റാർ ഹോട്ടലിൽ … വേണ്ട ! ഞാനൊന്നും പറയുന്നില്ല! ! ” “മിസ്റ്റർ ആൽബർട്ട്, എനിക്ക് അടുത്ത മീറ്റിങ്ങ് തുടങ്ങാൻ സമയമായി. പ്ലീസ്.” അച്ചൻ വാതിൽ ചൂണ്ടിക്കാണിച്ചു. പുറത്തേക്കിറങ്ങിയ ആൽബിയുടെ ശരീരമാസകലം ദേഷ്യം കൊണ്ട് വിറക്കുന്നുണ്ടായിരുന്നു. ഇങ്ങോട്ടു പുറപ്പെടാനുള്ള തീരുമാനം വലിയൊരു തെറ്റായിരുന്നെന്ന് ആൻസിക്കും തോന്നിത്തുടങ്ങിയിരുന്നു. “എന്നാലും അങ്ങനൊന്നും പറയണ്ടാരുന്നു. ഒരച്ചനല്ലേ ? ” അവളുടെ മുഖത്തെ സകല പ്രസന്നതയും നഷ്ടമായിരിക്കുന്നു. “എന്റെ കുട്ടൻ വിഷമിക്കണ്ടാട്ടോ. നമുക്ക് ഇതിലും നല്ല അടിപൊളി സ്കൂളിൽ ചേരാം.” ആൽബി മോളെ എടുത്തുയർത്തി തോളിൽ വെച്ചുകൊണ്ട് തിരിച്ചുള്ള നടത്തം തുടങ്ങി. “എന്നാലും... ആ അച്ചന് ചേട്ടായീനെ കണ്ടിട്ട് മനസ്സിലായില്ലെന്ന്! എനിക്കതാ മനസ്സിലാകാത്തെ.” ആൻസിക്ക് ഇതത്ര എളുപ്പത്തിൽ വിട്ടുകളയാനാകില്ല. “പിന്നേ. അങ്ങേർക്ക് മനസ്സിലാവാണ്ടാണോ. ചുമ്മാ ഓരോ ഉഡായിപ്പ്. അല്ലാണ്ടെന്താ ? ‘നിന്റെ പേരിൽ ഞങ്ങൾ ചെയ്യും വേലകൾ...’ ന്നൊരു പാട്ടു കേട്ടിട്ടില്ലേ നീ ? ഇതാണാ വേലകൾ. ഒക്കെ കർത്താവിന്റെ പേരിലായതു കൊണ്ട് ഒരു സമാധാനമുണ്ട്.” “ചുമ്മാ ദൈവദോഷം പറയല്ലേ . കഷ്ടമായിപ്പോയി. ഞനൊത്തിരി ആഗ്രഹിച്ചതാ. വേണെങ്കി എന്റെ സ്വർണ്ണമെല്ലാം എടുത്ത് വിറ്റ്-” “എന്തിനാടി പെണ്ണേ ? എനിക്കതാ മനസ്സിലാകാത്തത്. ഇത്രേം കാശു മൊടക്കി പഠിപ്പിച്ചിട്ടെന്നാ കിട്ടാനാ ? നീ ഒന്ന് ശരിക്കാലോചിച്ചു നോക്കിക്കേ. ഇതെന്നാ വല്ല എം ബി ബി എസിനാണോ ചേർക്കുന്നെ ? എൽ കെ ജീലല്ലേ ? ” “എന്നാലും...” ആൻസി ഇത് അടുത്തെങ്ങും വിടാനുദ്ദേശമില്ലെന്നയാൾക്കു മനസ്സിലായി. കാറിനടുത്തെത്തിക്കഴിഞ്ഞിരുന്നു അവർ. അപ്പോൾ... “എക്സ്ക്യൂസ് മി സർ! ” കാറ്റു പോലൊരു വിളിയൊച്ച. തിരിഞ്ഞു നോക്കിയതും മനം മയക്കുന്ന അവളുടെ പെർഫ്യൂം സുഗന്ധം അയാളുടെ മൂക്കിലേക്ക് തുളച്ചുകയറി. അവിടെ... തൊട്ടു മുൻപിൽ അഭിമുഖമായി നില്ക്കുകയാണവൾ. ആ വെണ്ണക്കൽ ശില്പ്പം. “ഞാൻ ഡെയ്സി. ഡെയ്സി സെബാസ്റ്റ്യൻ.” അവൾ ഹസ്തദാനത്തിനായി കൈ നീട്ടി. “സർ, മോളെ ചേർക്കാൻ വന്നതാണോ ഇവിടെ ? ” “അതേ...” ആൽബി മറുപടി കൊടുക്കുമ്പോൾ ഭാര്യയെ ഏറുകണ്ണിട്ടൊന്നു നോക്കി. മുഖം കടന്നൽ കുത്തിയതു പോലിരിക്കുന്നു. “മോളുടെ പേരെന്താ ? ” അപ്പോഴും ആല്ബിയുടെ മാറിൽ പറ്റിച്ചേർന്നു കിടന്ന മാളൂട്ടിയോടാണ് ചോദ്യം. “വാട്ട്സ് യോർ നെയ്ം സ്വീറ്റി ? ” മോൾ സംശയത്തോടെ പപ്പായുടെ മുഖത്തേക്ക് ഒന്നു നോക്കി എന്നിട്ട്. “മൈ നേം ഈസ് മെലിൻഡ. പി. ആൽബർട്ട്! ” തലേന്നു രാത്രി മുഴുവൻ ഇരുന്ന് അമ്മ പഠിപ്പിച്ചു കൊടുത്തതാണ്. “വൗ! മിടുക്കിക്കുട്ടി! ” യുവതി കുനിഞ്ഞ് മോളുടെ കവിളിൽ ഒരു മുത്തം കൊടുത്തു. ആൻസി പൊട്ടിത്തെറിക്കാൻ സാധ്യതയുണ്ടെന്ന് മനസ്സിലാക്കിയ ആൽബി കരുതലോടെ, അവളുടെ ശരീരത്തെങ്ങും സ്പർശിക്കാതെ പ്രത്യേകം ശ്രദ്ധിച്ചാണ് നിന്നത്. “എന്നിട്ട് മോളെ ചേർത്തോ ? ” യുവതി വിടാനുള്ള ഭാവമില്ല. “ഇല്ലന്നേ. നമുക്ക് ശരിയാകില്ല. എന്തൊരു ഡൊണേഷനൊക്കെയാ ചോദിക്കുന്നത്. ഒരു മര്യാദ വേണ്ടേ ? ” “അയ്യൊ! ” യുവതിയുടെ കണ്ണുകളിൽ അത്ഭുത ഭാവം. “ അച്ചന് സാറിനെ മനസ്സിലായില്ലേ ? സാറാരാന്ന് പറയാരുന്നില്ലേ ? അച്ചൻ ഇന്നലെ സ്റ്റേറ്റ്സീന്ന് വന്നേയുള്ളൂ. ഇവിടെ നടന്നതൊന്നും അറിഞ്ഞു കാണുകേല.” “എന്തായാലും ഇത്രേം കാഷ് കൊടുത്ത് എന്റെ കുഞ്ഞിനെ ഇവിടെ പഠിപ്പിക്കാൻ എനിക്ക് താല്പ്പര്യമില്ല. അച്ചനെന്നെ അറിഞ്ഞതുകൊണ്ടിപ്പൊ പ്രത്യേകിച്ച് പ്രയോജനമൊന്നുമില്ലല്ലോ.” “ഒരു മിനിറ്റ് സർ. അങ്ങനെ വിട്ടാൽ പറ്റില്ലല്ലോ.” യുവതി മുടി പയ്യെ കോതിയൊതുക്കിക്കൊണ്ട് തന്റെ ഫോണിൽ ആരെയോ ഡയൽ ചെയ്തുകൊണ്ട് ഓഫീസ് ലക്ഷ്യമാക്കി നടക്കാനാരംഭിച്ചു. ഫോൺ സംസാരം നിർത്തിയതും അവൾ തിരിഞ്ഞ് അവരെ നോക്കി മനോഹരമായി പുഞ്ചിരിച്ചു. “ധൈര്യായിട്ടു പൊയ്ക്കോട്ടോ. മെലിൻഡ മോൾക്ക് ഇവിടൊരു സീറ്റ് എന്റെ വക! ഞാൻ പ്രിൻസിപ്പാളിനെ ഒന്നു കണ്ട് സംസാരിക്കട്ടെ. സാറാരാന്ന് പുള്ളിക്കറിയില്ലെങ്കി ഞാനത് ശരിക്കും അറിയിച്ചു കൊടുത്തോളാം. സി. ഐ. ആല്ബർട്ട് സാമുവലിന്റെ മോൾക്കൊരു സീറ്റ് കൊടുത്തിട്ട് ഇവിടെ വേറേ പിള്ളേരെ ചേർത്താൽ മതി.” എന്താണ് മറുപടി പറയേണ്ടതെന്നറിയാതെ ആൽബി കുഴങ്ങി. ആൻസിയുടെ മുഖത്തെ ദേഷ്യഭാവം മാറി പതിയെ പ്രതീക്ഷ തെളിഞ്ഞു വരുന്നത് കാണാമായിരുന്നു. യുവതി കാഴ്ച്ചയിൽ നിന്നകന്നതും, അവർ കാറിനകത്തു കയറി. “ഏതാ ചേട്ടായീ ആ പെണ്ണ് ? ” ആൻസിയുടെ ആദ്യത്തെ ചോദ്യം. “ആ. എനിക്കെങ്ങനെ അറിയാം ? ഞാനാദ്യായിട്ട് കാണുവാ.” “ടീവീലൊക്കെ നെറഞ്ഞു നിക്കുവല്ലേ. നാടു മുഴുവൻ ആരാധികമാരായിരിക്കും.” സ്വരത്തിൽ ചെറിയൊരു കെറുവുണ്ടെങ്കിലും അഭിമാനത്തോടെയാണ് ആൻസി സംസാരിച്ചത്. “എന്തായാലും നടന്നാ മതിയാരുന്നു. അവൾടെ നടപ്പും ഭാവോം കണ്ടിട്ട് സ്കൂളു വിഴുങ്ങാനുള്ള കാശുണ്ടെന്നു തോന്നുന്നു.” “ഉം... എനിക്കെന്തോ ഇത് ശരിയല്ലെന്നൊരു തോന്നൽ. നമുക്ക് പറ്റിയ സ്കൂളല്ല ഇത്. മോള് ഒറ്റപ്പെട്ടു പോകും.” “പിന്നേ! ഇനി അതു പറ. എന്റെ മനുഷ്യാ, നമ്മടെ കാലമാണോ ഇത്. കൊച്ചിന്റെ ഭാവി നോക്കണ്ടേ ? ഇവിടെ ഒരു സീറ്റ് കിട്ടുവാണെങ്കി പിന്നെ 12ത് വരെ എന്റെ മോളുടെ കാര്യം പെർഫക്റ്റ്! ” “ഉം” “എന്നാലും ആ പെണ്ണൊരുത്തീടെ നടപ്പു കണ്ടാർന്നോ ? അവളെന്നതാ ആ സാരിയുടുക്കുന്നേനു പകരം കാണിച്ചേക്കുന്നെ ? ഇതിലും ഭേദം അതുടുക്കാണ്ടു വന്നാ പോരാർന്നോ. അതു കണ്ട് വെള്ളമെറക്കി നടക്കാനും കൊറെയെണ്ണം. വെറുത്തു പോയി പിശാചിനെ.” “ഉം” “ചേട്ടായിക്കെന്തു തോന്നുന്നു ? സീറ്റ് കിട്ടുവോ ? ” “നിന്നോട് പറഞ്ഞിട്ട് കാര്യമില്ല മോളൂ. നമുക്ക് പോകാം. കിട്ടിയാ കിട്ടട്ടെ.” അയാൾ വണ്ടിയെടുത്തു. ഹൈവേയിലെ പാലത്തിനടിയിലൂടെ ക്രോസ്സ് ചെയ്ത് പോകുമ്പോൾ സൈഡിലെ ഭിത്തിയിൽ തന്റെ ഫോട്ടോയുള്ള നോട്ടീസുകൾ പതിച്ചിരിക്കുന്നത് ആൽബി ഭാര്യക്ക് കാണിച്ചു കൊടുത്തു. “എന്നാണോ ഇങ്ങനെ പൊക്കിക്കൊണ്ടു നടന്നിട്ട് പൊത്തോന്ന് താഴേക്കിടുക. നാട്ടുകാരുടെ കാര്യല്ലേ. ഒന്നിനേം വിശ്വസിക്കാൻ പറ്റില്ല.” അയാൾ പൊട്ടിച്ചിരിച്ചു. “പെണ്ണുങ്ങളൊക്കെ ഇങ്ങനെ ഒരുമ്പെട്ടിറങ്ങിയേക്കുവാണെങ്കി, അധികം താമസിയാതെ അതുണ്ടാകും.” ഒപ്പത്തിനൊപ്പിച്ചാണ് ആൻസിയുടെ മറുപടി. ആൽബിക്ക് കലി വന്നു. “നിനക്കാ പെണ്ണിനെ തീരെ പിടിച്ചില്ല! പക്ഷേ അവൾടെ ഫേവർ വേണം താനും. നല്ല ബെസ്റ്റ് സ്വഭാവം മോളേ. കീപ് ഇറ്റ് അപ്പ്! ” വീടിനോടടുത്തു കാണും. പെട്ടെന്ന് ആൽബിയുടെ ഫോണിലൊരു മെസേജ്. **“Congratulations! Your child, Melinda P Albert has been admitted to L.K.G Div. B. Please visit school on Monday at 10:00 AM to take Uniform measurements and to collect his/her Text books! Welcome to St. Stephen's family! " (അഭിനന്ദനങ്ങൾ! താങ്കളുടെ മകൾ മെലിൻഡ പി ആൽബർട്ടിനെ എൽ കെ ജി - ഡിവിഷൻ ബി യിൽ ചേർത്തിരിക്കുന്നതായി അറിയിക്കുന്നു.* തുടരും കണ്ണൂർകാരൻ ❤️❤️❤️❤️ #💞 പ്രണയകഥകൾ #📚 ട്വിസ്റ്റ് കഥകൾ #✍ തുടർക്കഥ #📙 നോവൽ #📔 കഥ