ചക്രവ്യൂഹം... പാർട്ട്‌ 1 "നിങ്ങളുടെ ഭർത്താവിന്റെ മരണം ആത്മഹത്യ തന്നെയാണ്. നമ്മൾ ആ കേസ് ക്ലോസ് ചെയ്തു. ദയവുചെയ്ത് നിങ്ങൾ ഇവിടെനിന്ന് പോയിത്തരണം." മുന്നിലിരിക്കുന്ന പോലീസുകാരൻ പറയുന്നത് കേട്ട് ജാൻവിക്ക് അവരോട് ഒന്നും പറഞ്ഞിട്ട് കാര്യമില്ലെന്ന് തോന്നി. അവൾ മുഖം അമർത്തി തുടച്ച് ഇരുന്നിടത്ത് നിന്ന് എഴുന്നേറ്റു. അവൾ പതിയെ നടന്നു. ഇടയ്ക്ക് കാൽ ഇടറി വീഴാൻ പോകുന്നുണ്ട്. അവൾ ബസ് സ്റ്റോപ്പിലെത്തി, അവിടെയിരുന്ന് മുഖം പൊത്തി കരഞ്ഞുകൊണ്ടിരുന്നു. ഇടയ്ക്ക് അവളുടെ വയറിൽ തടവി. അപ്പോഴാണ് ഒരു പെൺകുട്ടി ഓട്ടോയിൽ അവിടെ വന്നിറങ്ങിയത്. "ഡീ ജാൻവി, നീ ഇവിടെ വന്നിരിക്കുകയാണോ? ഞാൻ എവിടെയൊക്കെ തിരക്കി!" കരയുന്ന കൂട്ടുകാരിയുടെ അരികിലിരുന്നുകൊണ്ട് പാറു പറഞ്ഞു. "പാറു, എൻ്റെ വിക്രം ഒരിക്കലും ആത്മഹത്യ ചെയ്യില്ല. അങ്ങനെ എന്നെയും കുഞ്ഞിനെയും വിട്ടുപോകാൻ അവന് ആവില്ല," തന്റെ കൂട്ടുകാരി പാറുവിന്റെ കൈയ്യിൽ പിടിച്ച് കരഞ്ഞുകൊണ്ട് ജാൻവി പറഞ്ഞു. "ഡീ, എനിക്കറിയാം. നീ വിഷമിക്കാതെ... നീയിങ്ങനെ കരഞ്ഞുകൊണ്ടിരുന്നാൽ നിന്റെ കുഞ്ഞിന് തന്നെയാ മോശം." പാറു ഒരു വിധം പറഞ്ഞ് സമാധാനിപ്പിച്ച് ജാൻവിയെയും കൊണ്ട് വീട്ടിലേക്ക് ചെന്നു. ജാൻവിയും വിക്രമിന്റെയും പ്രണയവിവാഹമായിരുന്നു. അവരുടെ കല്യാണം കഴിഞ്ഞിട്ട് ഒരു വർഷമായി. അവളിപ്പോൾ ആറുമാസം ഗർഭിണിയാണ്. വിക്രമിനെ കുറച്ചു ദിവസങ്ങൾക്ക് മുമ്പാണ് കാണാതായത്. കാണാതായി മൂന്നു ദിവസങ്ങൾക്ക് ശേഷം അവന്റെ മൃതദേഹം റെയിൽവേ പാളത്തിൽ നിന്ന് കണ്ടെത്തി. പോലീസിന്റെ നിഗമനത്തിൽ അതൊരു ആത്മഹത്യയായിരുന്നു. ജാൻവിക്ക് ഒരു ചേട്ടൻ മാത്രമേ ഉള്ളൂ, അവൻ ഇപ്പോൾ ജയിലിലാണ്. കുറച്ചു ദൂരെ, ജയിലിനുള്ളിൽ നിന്ന് ചപ്പാത്തി പരത്തിക്കൊണ്ടിരിക്കുകയാണ് അർജുൻ. വാടകയ്ക്ക് വണ്ടിയെടുത്ത് മുങ്ങി നടക്കുന്നവരെ കണ്ടെത്തി തിരികെയെടുക്കുക, പലിശയ്ക്ക് പണം വാങ്ങി മുങ്ങുന്നവരെ പിടിക്കുക, പെൺകുട്ടികളെ ശല്യം ചെയ്യുന്ന പൂവാലന്മാരെ ഓടിക്കുക... അങ്ങനെ അലമ്പും അടിയും ഇടിയുമായി നടക്കുന്ന റൗഡിയാണ് അവൻ. ഇടയ്ക്ക് പോലീസുകാർക്ക് തലവേദന ഉണ്ടാക്കുന്നവരെ ഇടിച്ചുപിഴിഞ്ഞ് അവരുടെ മുന്നിൽ എത്തിക്കാറുള്ളതുകൊണ്ട് പോലീസുകാർക്കെല്ലാം അവനെ വലിയ കാര്യമാണ്. ഇപ്രാവശ്യം ഒരു കൊട്ടേഷനിടയിൽ, ഒരു പോലീസുകാരനുവേണ്ടി ഒരു വലിയ പുള്ളിയുടെ മകനെ ഇടിച്ചിട്ടപ്പോഴാണ് അവനെ പോലീസ് പിടിച്ചത്. ആ വലിയ പുള്ളി അവനെ എന്തെങ്കിലും ചെയ്‌താലോ എന്ന ഭയത്തിൽ, സഹായിച്ച പോലീസുകാരൻ തന്നെയാണ് അവനെ ജയിലിൽ കയറ്റിയത്. കുറച്ചു നാളുകൾ കഴിഞ്ഞു. ഇപ്പൊ അർജുൻ അടക്കവും ഒതുക്കവുമുള്ള ഒരു മര്യാദക്കാരനായി ഇതിന്റെ അകത്ത് ചപ്പാത്തി ചുട്ടുകൊണ്ടിരിക്കുന്നു. അവൻ അങ്ങനെ ഓരോ ചപ്പാത്തിയും ശ്രദ്ധയോടെ ചുട്ടുകൊണ്ടിരിക്കുമ്പോഴാണ് എന്തൊക്കെയോ സൗണ്ട് കേട്ടത്. "അവിടെ എന്താ ഇങ്ങനെ സൗണ്ട്?" എന്ന് വിചാരിച്ച് അവൻ ശബ്ദം കേട്ട ഭാഗത്തേക്ക് നടന്നു. അവിടെയെത്തിയതും കണ്ടത് പുതിയതായി വന്ന ഒരു ചെറുക്കൻ കുറച്ചുപേരെ ഇടിച്ചുതെറിപ്പിക്കുന്നതാണ്. "നിങ്ങളൊക്കെ എന്താ ഒന്നും ചെയ്യാതെ ഇങ്ങനെ നോക്കി നിൽക്കുന്നത്?" അതൊക്കെ കണ്ടു രസിച്ചുകൊണ്ടിരിക്കുന്ന വാർഡനോട് അർജുൻ ചോദിച്ചു. "അവർ തമ്മിലുള്ള പ്രശ്നം അവർ തന്നെ തല്ലി തീർക്കട്ടെ. വെറുതെ ഇടപെട്ട് തടി കേടാക്കാൻ ഞാൻ ഇല്ല." വാർഡൻ പറയുന്നത് കേട്ട് അയാളെ പുച്ഛിച്ച് അർജുൻ എല്ലാവരെയും തള്ളി മാറ്റി മുന്നിലേക്ക് ചെന്നു. "നിർത്തുന്നുണ്ടോ എല്ലാവരും!" അവന്റെ ശബ്ദം കേട്ട് പെട്ടെന്ന് അടി നിർത്തി എല്ലാവരും അവനെ പേടിയോടെ നോക്കി. അപ്പോഴാണ് താഴെ വീണുകിടക്കുന്നവൻ പെട്ടെന്ന് എഴുന്നേറ്റ് വന്ന് അർജുനെ തല്ലാനായി വന്നത്. അത് കണ്ടതും അർജുൻ അവന്റെ കഴുത്തിന് പിടിച്ച് പൊക്കി ചുമരിനോട് ചേർത്തുപിടിച്ചു. മൂക്കിനിട്ട് ഒന്ന് കൊടുക്കാൻ വരുമ്പോൾ അവിടേക്ക് സൂപ്രണ്ട് പോലീസായ വിനോദ് കുമാർ വന്നു. അയാളെ കണ്ടതും എല്ലാവരും പിരിഞ്ഞുപോയി. "മനുഷ്യന്റെ പണി മെനക്കെടുത്താൻ ഓരോന്ന് വന്നോളും," എന്നും പറഞ്ഞ് അർജുൻ അവനെ തുറിച്ചുനോക്കിക്കൊണ്ട് അവിടെനിന്ന് നടന്നു. അർജുൻ പോകുന്നതും നോക്കി ദേഷ്യത്തോടെ അവനും അവിടെ നിന്നു. ചായ കുടിക്കുന്നതിനിടയിൽ അർജുൻ വാർഡനോട് ചോദിച്ചു: "സർ, ഏതാണ് ആ പുതിയ ചെറുക്കൻ?" "റിട്ടയേർഡ് എ.എസ്.പി-യുടെ മകനാണ്, ശിവ കാർത്തികേയൻ... എസ്.ഐ. സെലക്ഷൻ പാസ്സായി നിൽക്കുകയായിരുന്നു. അപ്പോഴാണ് അവന്റെ കാമുകി അവനെ തേച്ച് അവന്റെ ഫ്രണ്ടുമായി റിലേഷനിലായത്. തന്നെ ചതിച്ച ഫ്രണ്ടിന്റെയും കാമുകിയുടെയും കല്യാണത്തലേന്ന് അവനെ ഇടിച്ചു ഒരു പരുവമാക്കി ഐ.സി.യു-വിൽ കയറ്റിയിട്ടുണ്ട്." "അപ്പോൾ നല്ല മുന്തിയ ഇനമാണ്." "പറയാനുണ്ടോ? അത് കണ്ടാൽ അറിയില്ലേ." "അല്ല, അപ്പോൾ അവന്റെ എസ്.ഐ. സെലക്ഷൻ...?" "അതൊക്കെ എന്താവോ എന്തോ. ഇങ്ങനെ ചെയ്തിട്ട് ആർക്ക് പോയി..." "അവൻ പോയി," അതും പറഞ്ഞ് ചിരിക്കുമ്പോഴാണ് സൂപ്രണ്ട് വിനോദ് കുമാർ ഇവരുടെ അടുത്തേക്ക് വന്നത്. അവൻ നേരെ ഒരു പേപ്പർ നീട്ടി. അർജുൻ അത് വാങ്ങി നോക്കി. > "മാധ്യമ പ്രവർത്തകൻ വിക്രമിന്റെ മൃതദേഹം കണ്ടെത്തി... ആത്മഹത്യയാണെന്ന് പോലീസ് സ്ഥിതീകരിച്ചു..." > ആ വാർത്ത കണ്ടതും അവന്റെ ഉള്ള് പിടഞ്ഞു. കുറച്ചു ദിവസങ്ങൾക്ക് മുമ്പ് അനിയത്തി ജാൻവി കാണാൻ വന്നപ്പോൾ വിക്രമിനെ കാണാനില്ലെന്ന് പറഞ്ഞ് കരഞ്ഞത് അവന്റെ ഓർമയിൽ തെളിഞ്ഞു. അവന്റെ കണ്ണുകൾ നിറഞ്ഞു. സൂപ്രണ്ട് പോലീസ് അവന്റെ തോളിൽ തട്ടി: "നിന്റെ പരോൾ ശരിയായിട്ടുണ്ട്. പുറത്തുപോയി ഒരു പ്രശ്നത്തിലും ചാടരുത്. പഴയ ജീവിതത്തിലേക്ക് തിരിച്ചു പോകരുത്. എന്ത് സഹായത്തിനും എന്നെ വിളിച്ചോ, ഞാൻ ഉണ്ടാവും കൂടെ." അതും പറഞ്ഞ് സൂപ്രണ്ട് പോയി. സൂപ്രണ്ടിന് അവനോട് ഒരു പ്രത്യേക ഇഷ്ടമുണ്ട്. അങ്ങേരുടെ ഒരേയൊരു മോളാണ് അഞ്ജന. അവൾ മെഡിക്കൽ കോളേജിൽ പഠിക്കുകയായിരുന്നു. അവിടെ ഒരു ചെറുക്കൻ ഇഷ്ടമാണെന്ന് പറഞ്ഞ് പിറകെ നടന്ന് ടോർച്ചർ ചെയ്യാൻ തുടങ്ങി. അവൻ ഒരു എം.എൽ.എയുടെ മകനാണ്. പോലീസിന്റെ വിരട്ടൽ ഒന്നും അവന്റെ അടുത്ത് നടന്നില്ല. അങ്ങനെ ഒരു ദിവസം ആസിഡുമായി അവളുടെ അടുത്തേക്ക് വന്ന അവന്റെ നട്ടെല്ല് തല്ലി ഓടിച്ചതിനാണ് അർജുൻ ഇപ്പോൾ ജയിലിൽ കിടക്കുന്നത്... #📙 നോവൽ #📝 ഞാൻ എഴുതിയ വരികൾ #📔 കഥ #💞 പ്രണയകഥകൾ