*మహిళల లైంగిక వేధింపుల నివారణకు పోష్ యాక్ట్ కీలకం – జడ్జి కె. లత* గుంటూరు జిల్లా న్యాయసేవాధికార సంస్థ చైర్మన్ సాయి కళ్యాణ్ చక్రవర్తి ఆదేశాల మేరకు శనివారం గుంటూరు జిల్లా పోలీస్ కార్యాలయంలోని కాన్ఫరెన్స్ హాల్‌లో మహిళల లైంగిక వేధింపుల నివారణ, రక్షణ, పరిష్కారం అంశాలపై న్యాయ విజ్ఞాన సదస్సు నిర్వహించారు. ఐదవ అదనపు సివిల్ జడ్జి (జూనియర్ డివిజన్) కె. లత ముఖ్య వక్తగా పాల్గొన్నారు.ఈ సందర్భంగా జడ్జి కె. లత మాట్లాడుతూ, పనిచేసే ప్రదేశాల్లో మహిళలపై జరిగే లైంగిక వేధింపులు నేరమని, వాటి నివారణ, రక్షణ, పరిష్కారానికి పోష్ (POSH – Prevention of Sexual Harassment) యాక్ట్ పూర్తి చట్టపరమైన రక్షణ కల్పిస్తుందని తెలిపారు. మాటల ద్వారా, చూపుల ద్వారా, శారీరకంగా జరిగే అన్ని రకాల వేధింపులు లైంగిక వేధింపుల కిందకే వస్తాయని స్పష్టం చేశారు.ప్రభుత్వ–ప్రైవేట్ రంగాలు, వ్యవస్థీకృత–అవ్యవస్థీకృత రంగాలు, ఆసుపత్రులు, విద్యాసంస్థలు, కుటీర పరిశ్రమలు, కూలి పనులు చేసే మహిళల వరకు ఈ చట్టం వర్తిస్తుందని తెలిపారు. గుడ్ టచ్–బ్యాడ్ టచ్ మధ్య తేడాను వివరిస్తూ, ప్రతి మహిళ గౌరవప్రదమైన, సురక్షిత వాతావరణంలో పనిచేయాల్సిన హక్కు కలిగి ఉందని పేర్కొన్నారు. అవసరానికి మించి దగ్గరగా రావడం కూడా వేధింపులకే సమానమని చెప్పారు.పోష్ యాక్ట్ ప్రకారం 10 మందికి మించి ఉద్యోగులు ఉన్న ప్రతి సంస్థలో ఇంటర్నల్ కంప్లైంట్స్ కమిటీ తప్పనిసరిగా ఏర్పాటు చేయాలని, ఇందులో సీనియర్ మహిళ ప్రిసైడింగ్ ఆఫీసర్, ఇద్దరు సభ్యులు, ఒక ఎన్‌జీఓ ప్రతినిధితో నాలుగు మంది సభ్యులు ఉంటారని వివరించారు. జిల్లా స్థాయిలో లోకల్ కంప్లైంట్స్ కమిటీ ఉండి, జిల్లా కలెక్టర్/మేజిస్ట్రేట్/డిప్యూటీ కలెక్టర్ జిల్లా అధికారిగా, నోడల్ ఆఫీసర్‌గా వ్యవహరిస్తారని తెలిపారు.బాధిత మహిళలు 90 రోజుల్లోపు ఫిర్యాదు చేయాలని, కమిటీ విచారణ అనంతరం నివేదిక జిల్లా అధికారికి పంపుతుందని చెప్పారు. నేరం రుజువైతే ఐపీసీ సెక్షన్ల ప్రకారం కేసు నమోదు, నిందితుడిని ఉద్యోగం నుంచి తొలగించడం, బాధితురాలికి పరిహారం చెల్లించేలా చర్యలు ఉంటాయని తెలిపారు.కార్యక్రమ నిర్వహణకు సహకరించిన జిల్లా ఎస్పీ వకుల్ జిందల్ ఐపీఎస్‌కు జడ్జి లత కృతజ్ఞతలు తెలిపారు. ఈ కార్యక్రమంలో ఉమెన్ పోలీస్ స్టేషన్ డీఎస్పీ శ్రీనివాసరెడ్డి, సీఐ నారాయణ, రమేష్, ఉమెన్ ఎస్సైలు, ఉమెన్ కానిస్టేబుల్స్, సచివాలయ మహిళా పోలీసులు, ఇతర పోలీసు సిబ్బంది, కోర్టు సిబ్బంది పాల్గొన్నారు. #🆕షేర్‌చాట్ అప్‌డేట్స్ #🆕Current అప్‌డేట్స్📢 #📰ఈరోజు అప్‌డేట్స్