പതിനൊന്നു രൂപ ""അമ്മേ ഇതെന്താ ഈ കിഴി കെട്ടി വെച്ചിരിക്കുന്നത്... കുഞ്ഞൊരു കിഴി... പൈസ ആണെന്ന് തോന്നുന്നു.."" എന്തുവാ മണിക്കുട്ടി... എന്താ കിട്ടിയേ... അതേയ് ഓപ്പോളേ ആ അലമാരയില്ലേ അച്ഛന്റേം അമ്മേടേം റൂമിലെ... അതിൽ നിന്ന് കിട്ടിയതാ... എന്തുവാ ആവോ... നോക്കട്ടെ... ഞാനും കാണട്ടെ.. ഓപ്പോൾക്ക് മാത്രേ നീ കാണിക്കുള്ളോ... ഓ എന്റെ കുഞ്ഞോപ്പോളെ അതല്ല.. ഇതൊന്ന് അഴിച്ചു നോക്കട്ടെ എന്ന് അമ്മയോടൊന്ന് ചോദിക്ക്... ഈ കുഞ്ഞോപ്പോൾടെ കാര്യം അപ്പളേക്കും കുശുമ്പായി... വീട്ടിൽ വൃത്തിയാക്കൽ മഹാമഹം... എന്റെ കൂടെ മൂന്നും കൂടിയിട്ടുണ്ട്...അതിനിടയിൽ ഇളയവൾക്ക് ചുവന്ന പട്ടിൽ പൊതിഞ്ഞു ചെറിയൊരു കിഴി കിട്ടി... അതിന്റെ കോലാഹലം... എന്താണെന്ന് അറിയാൻ മൂന്നും കൂടി എന്റടുത്തു എത്തി... ഞാൻ ചെറിയൊരു പുഞ്ചിരിയോടെ അത് വാങ്ങിച്ചു... പൊതിയഴിച്ചു കാണിച്ചു... ഒറ്റരൂപ തുട്ട് പതിനൊന്ന് എണ്ണം... അല്ല ഇതെന്താ അമ്മേ... വല്ല നേർച്ചയും ആണോ... അല്ല മക്കളെ നിങ്ങള്ടെ മുത്തശ്ശൻ അച്ഛന് കൊടുത്ത സ്ത്രീധനം ആണ്... മൂന്നും കൂടി പൊട്ടിച്ചിരിക്കുന്നു...ഇതോ എന്നും ചോദിച്ചുകൊണ്ട്... ഞാൻ ഒന്നും മിണ്ടാതെ അന്നത്തെ കാലത്തേക്ക് ഒന്ന് തിരിച്ചു പോയി... ആ ദിവസത്തിന്റെ ഓർമയിലേക്ക്... എന്റെ വേളി ദിവസം.... നാട്ടിലാകെ ഇളക്കി മറിച്ചൊരു വേളി... ഇല്ലത്തെ ആകെയുള്ള പെൺതരി...മുറ്റത്തെ പന്തലിൽ തന്നെ... ഓഡിറ്റോറിയം ബുക്ക്‌ ചെയ്യേണ്ടെന്ന് അച്ഛന് നിർബന്ധം..ഇല്ലത്തെ മുറ്റത്ത് തന്നെ പെൺകൊട (പെണ്ണിനെ കൊടുക്കൽ )ഗംഭീരം ആക്കണം... ഒരുപാട് ചടങ്ങുകൾ ഉണ്ട്... മൂന്നോനാലോ മണിക്കൂർ...മുൻപൊക്കെ  നാലു ദിവസം വരെ നീണ്ടു നിക്കും...പിന്നത് കുറഞ്ഞു മൂന്നു നാലു മണിക്കൂർ ആക്കി ചുരുക്കി..ഇപ്പൊ വീണ്ടും നാലു ദിവസത്തെ അതെല്ലാം കുറച്ചൊക്കെ തിരികെ വന്നിട്ടുണ്ട്... അച്ഛന്റെ മടിയിൽ ഇരുത്തി അച്ഛൻ തന്നെ പെണ്ണിന്റെ കഴുത്തിൽ താലി കെട്ടുന്നു... പിന്നീട് കന്യാദാനം... ആ സമയത്ത് സ്ത്രീധനം ആയി കൊടുക്കുന്നതാണ് ഈ കിഴി... ആദ്യം ചെറുക്കന്റെ വലതു കൈ പിടിച്ചു മലർത്തി കൈയിൽ വെള്ളം ഒഴിച്ച്  ശുദ്ധി വരുത്തി യഥാക്രമം വെറ്റില പാക്ക് പിന്നെ പണം  എന്നിവ കൊടുക്കുന്നു...കൂടെ പെൺകുട്ടിയുടെ വലം കൈയും...ഇനിയെന്റെ മകളെ നീ കാത്തോളണം സംരക്ഷിക്കണം എന്നുള്ള മന്ത്രത്തോടെ...ആ പണം വെച്ചതാണ് ഈ കിഴി... ഓർത്തപ്പോൾ വീണ്ടും നെഞ്ചിലൊരു നീറ്റൽ... സ്വന്തമായിട്ടുള്ള ഹൃദയം മറ്റൊരാൾക്ക്‌ കൊടുക്കുമ്പോൾ ആ അച്ഛന്റെ മനസ്സിലെ പിടപ്പ്... അത് വല്ലാത്തൊരു അവസ്ഥയല്ലേ...മന്ത്രജപത്തിൽ അച്ഛന്റെ സ്വരമൊന്ന് ഇടറിയോ... കണ്ണൊന്നു നിറഞ്ഞുവോ... അറിയില്ല... വീണ്ടും  ഹോമങ്ങൾക്ക് ചെറുക്കന്റെ കൂടെയിരിക്കുമ്പോൾ അച്ഛൻ കുറച്ചപ്പുറത്ത് മിണ്ടാതെ ഇരിക്കുന്നത് കണ്ടു... സാധാരണ അങ്ങനെ പതിവില്ല.. എന്തോ ആ ചടങ്ങ് വല്ലാതെ വേദനിപ്പിച്ചിട്ടുണ്ടാവാം...  ആ കണ്ണുകൾ നിറഞ്ഞിട്ടുണ്ട്... ഞാൻ വ്യക്തമായി കണ്ടിരുന്നു.. അന്നത്തെ അച്ഛന്റെ ആ ഹൃദയ വേദനയെയാണ് ഇന്ന് മക്കൾ കളിയാക്കുന്നത് എന്നോർത്തപ്പോൾ ഒരു സങ്കടം ഒപ്പം ദേഷ്യവും വന്നു... പെട്ടെന്ന് എഴുനേറ്റ് ചെന്ന് അതെടുത്ത് വീണ്ടും കിഴികെട്ടി പഴയപോലെ ഭദ്രമായി അലമാരയിൽ വെച്ചു... അതിന്റെ വില നിങ്ങൾക്ക് അറിയില്ല മക്കളെ.... എന്റെ ജീവനാണ്....നിങ്ങളുടെ മുത്തശ്ശന്റെയും... അവസാന വാചകം പറഞ്ഞപ്പോ തൊണ്ടയൊന്ന് ഇടറിപ്പോയി... സോറി അമ്മേ... ഞങ്ങൾ വെറുതെ... പോട്ടെ... ഇനി പറയില്ല... സാരമില്ല.. നിങ്ങൾ ബാക്കി നോക്ക്.. അവർ വീണ്ടും ജോലിയിലേക്ക് തിരിഞ്ഞു.. ഓ ഇനി ഓപ്പോൾക്കും ഇങ്ങനൊക്കെ ഉണ്ടാവുമല്ലോ... ശരിക്കും ഈ സ്ത്രീധനം എന്തിനാ ഓപ്പോളേ... അതിപ്പോ പെൺകുട്ടികളെ വിവാഹം കഴിപ്പിക്കുമ്പോ അങ്ങനെ വേണംന്ന്... ഇളയവളുടെ ചോദ്യത്തിന് മൂത്തവളുടെ മറുപടി... അപ്പോൾ ഓപ്പോളും സമ്മതിക്കുവോ സ്ത്രീധനം കൊടുക്കാൻ... രണ്ടാമത്തെ മോളുടെ സംശയം... ഇല്ല അമ്മിണി... ഞാൻ സമ്മതിക്കില്ല... അതൊക്കെ ഞാൻ തീരുമാനിച്ചിട്ടുണ്ട്... മൂത്തയാളുടെ മറുപടി കേട്ടപ്പോൾ ഞാനൊന്ന് ഞെട്ടിയെന്ന് ഉറപ്പ്... എന്തായിരിക്കും അവളുടെ തീരുമാനം... അമ്മു... നീയെന്താ പറയണേ... എന്ത് തീരുമാനിച്ചിട്ടുണ്ട് എന്നാ.... അതോ... അമ്മേ എനിക്കിപ്പോ നല്ല വിദ്യാഭ്യാസം ജോലി ഒക്കെ ഉണ്ട്... എന്നിട്ടും ഇനി സ്ത്രീധനം വേണം എന്നും പറഞ്ഞു വരുന്നവരെ നോക്കണ്ട..... അല്ലാതെ തന്നെ എത്ര പേര് വരും... പിന്നെ മാസത്തിൽ പകുതി ചെക്കന്റെ വീട്ടിൽ പകുതി പെണ്ണിന്റെ വീട്ടിൽ... അങ്ങനെ കഴിയാന്ന്... അപ്പൊ എല്ലാം തുല്യം ആവില്ലേ... ഇതെല്ലാം ആദ്യം തന്നെ അവരോട് പറയണം കേട്ടോ... എങ്ങനെ ഉണ്ട് എന്റെ ഐഡിയ... അവളുടെ മറുപടി കേട്ട് എന്ത് പറയും എന്നറിയാതെ ഞാൻ മറ്റവരെ നോക്കി. അപ്പൊ മൂന്നും കൂടി ഒരു പറച്ചില്.... അമ്മേ ഞങ്ങൾക്കും ഇതുപോലെ പതിനൊന്നു രൂപ കെട്ടി കിഴി കെട്ടി സ്ത്രീധനം തന്നാൽ മതി.. കൂടുതൽ ഒറ്റ പൈസ ആർക്കും കൊടുക്കരുത് കേട്ടോ... എന്റെ കിളി നാലുപാടും ഇപ്പോളും പറന്നു നടക്കുന്ന് 🤭🤭🤭🤭 ✍️പവിഴമല്ലി സ്ത്രീധനം എന്ന വിഷയത്തിൽ തോന്നിയ ഒരെഴുത്ത് #📝 ഞാൻ എഴുതിയ വരികൾ #😔 ഇമോഷണൽ സ്റ്റാറ്റസ് 😍 #💌 പ്രണയം #❤️ പ്രണയം സ്റ്റാറ്റസുകൾ #📖 കുട്ടി കഥകൾ