മടക്കം....Part 2 കുവൈറ്റിൽ നിന്നും എക്സിറ്റ് അടിക്കുന്നതിന്റെ നടപടിക്രമങ്ങൾ പൂർത്തിയാക്കാൻ കമ്പനിയിലേക്ക് എത്തിയത് വരെയായിരുന്നു ഇന്നലെ പറഞ്ഞത്... കമ്പനി എച് ആറിൽ പോയി എല്ലാ സംഗതികളും പൂർത്തിയാക്കിയതിന് ശേഷം അക്കൗണ്ടിൽ കമ്പനി ഇട്ട ക്യാഷ് എടുക്കാനായി ഞാൻ ഓഫീസ് പരിസരത്തുള്ള ബുർഗാൻ ബാങ്കിന്റെ എടിഎം വരെ പോയ്‌. ക്യാഷ് വലിക്കുവാൻ നോക്കുമ്പോൾ അക്കൗണ്ടിൽ ഉള്ളതിന്റെ ബാക്കി മാത്രമേ എടുക്കുവാൻ പറ്റുന്നുള്ളൂ. എന്താണ് പ്രശ്നമെന്ന് ഒരെത്തും പിടിയും കിട്ടാതെ വന്നപ്പോൾ ഞാൻ വീണ്ടും എച് ആറിന്റെ അടുത്തേക്ക് പോയി. അവർ ബാങ്കിലേക്ക് വിളിച്ചു ചോദിച്ചപ്പോൾ ആണ് ടാക്സി ഡ്രൈവറോട് അറബി അറിയാതെ ബുദ്ധിമുട്ടിയതൊക്കെ ട്രെയിലർ ആയിരുന്നെന്നും പിക്ചർ അഭി ഭി ബാക്കി ആണെന്നും മനസിലായത്... 120 ദിനാർ ക്രെഡിറ്റ്‌ കാർഡ് ബില്ല് അടക്കാൻ ഉള്ളത് കൊണ്ട് എനിയ്ക്ക് ട്രാവൽ ബാൻ നൽകിയിരിക്കുകയാണ് ബാങ്ക് എന്ന്. പിറ്റേന്ന് പന്ത്രണ്ടരയോടെ എയർപോർട്ടിൽ എത്തേണ്ട എനിക്ക് കുവൈറ്റ്‌ വിടാൻ പറ്റില്ല എന്ന്. സാധാരണ ക്രെഡിറ്റ്‌ കാർഡ് ബില്ല് അകൗണ്ടിൽ ക്യാഷ് വരുമ്പോൾ ഓട്ടോ ഡെബിറ്റ് നടക്കുകയാണ് ചെയ്യാറ്. ഇത്തവണ വിസ ക്യാൻസൽ ആയതിനാൽ സിവിൽ ഐഡി (ഇക്കാമ, പത്താക്ക എന്നൊക്കെ മറ്റിടങ്ങളിൽ പറയും ) ക്യാൻസൽ ആയതിനാൽ ബാങ്കിന് ഡെബിറ്റ് ചെയ്യാൻ കഴിയുന്നില്ല. അക്ഷരാർത്ഥത്തിൽ പെട്ടു പോയി ഞാൻ. എനിയ്ക്ക് പിറ്റേ ദിവസം കയറാൻ പറ്റിയില്ലെങ്കിൽ കമ്പനിയ്ക്കും നഷ്ടമാണ്... എച് ആർ മന്ദൂപ്പിനെ (പബ്ലിക് റിലേഷൻ ) കൊണ്ട് വിളിപ്പിച്ചു. മന്ദൂപ്പ് എന്തൊക്കെയോ അറബിയിൽ അന്ത കലാം ഹബീബി ഇന്ത കലാം ഹബീബി എന്നൊക്കെ ഉച്ചത്തിൽ ഫോണിൽ സംസാരിക്കുന്നു. പ്രതീക്ഷയോടെ മന്ദൂപ്പിനെ സാകൂതം വീക്ഷിച്ചു കൊണ്ട് ഞാനും.... ഫോൺ ചെയ്തു കഴിഞ്ഞ മന്ദൂപ്പ് എച് ആറിനോട് എന്റെ പാസ്സ്പോർട്ടു എനിയ്ക്ക് നല്കാനും വേഗം പത്ത് കിലോമീറ്ററോളം അപ്പുറമുള്ള ഫഹഹീൽ എന്ന സ്ഥലത്തെ ബാങ്കിന്റെ ബ്രാഞ്ചിലേക്ക് പോകുവാനും നിർദേശിച്ചു. സാധാരണ എക്സിറ്റ് അടിച്ച് പോകുമ്പോൾ കമ്പനി എയർപോർട്ടിൽ വച്ചാണ് പാസ്പോർട്ട്‌ കൊടുക്കാറ്. അല്ലാതെ കൈയിൽ കൊടുക്കാറില്ല. എന്റെ കാര്യം അത്രയ്ക്ക് ഗൗരവമുള്ളതായതിനാൽ പാസ്പോർട് കൈയിൽ തന്നു... വേഗം പുറത്തിറങ്ങി ഒരു ടാക്സി പിടിച്ചു ഞാൻ ബാങ്കിൽ എത്തി മാനേജർ അറബിയെ കണ്ടു. ഈ ട്രാവൽ ബാൻ ഗൗരവമേറിയത് ആണെന്നും പിറ്റേന്ന് പോകാൻ കഴിയുമോ എന്ന് ഉറപ്പില്ലെന്നും തന്നാൽ കഴിയുന്നത് എല്ലാം ചെയ്യാമെന്നും അറബി ഉറപ്പ് നൽകി. കൈയിൽ ഉള്ളത്തിൽ നിന്നും ക്രെഡിറ്റ്‌ കാർഡ് ബില്ല് അടക്കാമെന്ന് വച്ചപ്പോൾ അപ്പോഴേക്കും ബാങ്കിന്റെ നേരിട്ടുള്ള ട്രാൻസക്ഷന്റെ ടൈം കഴിഞ്ഞെന്നും പിറ്റേന്ന് എട്ട് മണിയോടെ എത്താനും മാനേജർ നിർദേശിച്ചു.... മാനേജറുടെ വാക്കുകൾ നൽകിയ പ്രതീക്ഷയിൽ ഞാൻ പുറത്തിറങ്ങി അവിടുത്തെ ലുലുവിലും ഗ്രാൻഡ് മാളിലും ഒക്കെ കയറി നാട്ടിലേക്ക് കൊണ്ട് പോകാനുള്ള സാധനങ്ങൾ ഒക്കെ വാങ്ങി രാത്രി ഒമ്പത് മണിയോടെ റൂമിൽ വന്ന് കിടന്നു... പിറ്റേന്ന് എട്ട് മണിയ്ക്ക് മുമ്പ് തന്നെ ബാങ്കിന്റെ മുമ്പിൽ ഞാനെത്തി. എന്നാൽ ബാങ്ക് തുറന്നത് ഒമ്പതര ആയപ്പോൾ. ഇനി മൂന്ന് മണിക്കൂർ മാത്രമാണ് ബാക്കി. ഇന്ന് പോകാൻ കഴിഞ്ഞില്ലെങ്കിൽ പിന്നെ ഞാൻ ടിക്കറ്റ് സ്വന്തമായി എടുക്കണം. അതെപ്പോൾ കിട്ടുമെന്ന് പറയാൻ പറ്റില്ല. പിന്നെ വിസ ക്യാൻസൽ ചെയ്തതിനു ശേഷം പാസ്‌പോർട്ടിൽ അടിച്ച താത്കാലിക വിസയ്ക്ക് പതിനഞ്ച് ദിവസം മാത്രമാണ് വാലിഡിറ്റി ഉള്ളത്. കുവൈറ്റിൽ നിന്ന് എക്സിറ്റ് അടിക്കുമ്പോഴും ആദ്യമായ് എൻട്രി ചെയ്യുമ്പോഴും ജി പി ടിക്കറ്റിൽ (ഗവണ്മെന്റ് പ്രൊജക്റ്റ്‌.. കൂടുതൽ വിശദമായി ഇതിനെ കുറിച്ച് അറിയില്ല) മാത്രമേ പറ്റൂ. അതാണെങ്കിൽ എയർ ഇന്ത്യ, കുവൈറ്റ്‌ എയർവേസ് പിന്നെ ജസിറാ ഈ വിമാനങ്ങളിൽ മാത്രമേ ഉള്ളൂ. ആ ടിക്കറ്റിനു മുടിഞ്ഞ റേറ്റ് മായിരിക്കും എമർജൻസി ആയി എടുക്കുമ്പോൾ... എല്ലാമാലോചിച്ചു ഒരു വഴിയ്ക്കായപ്പോൾ മാനേജർ കേബിനിലേക്ക് വിളിപ്പിച്ചു. ഒരു ഫോം തന്നു കൈയിലേക്ക്. കേബിനു വെളിയിൽ കൗണ്ടറിൽ ഇരിക്കുന്ന യുവതിയായ ഒരു സ്റ്റാഫിന്റെ അടുത്തേക്ക് ഫോമുമയി ചെല്ലാൻ മാനേജർ എന്നോട് നിർദേശിച്ചു.... ഫോമുമായി ആ യുവതിയുടെ അടുത്ത് എത്തുമ്പോഴേക്കും മാനേജർ ഇന്റർകോമിലൂടെ എല്ലാം അവളെ ധരിപ്പിച്ചിട്ടുണ്ടായിരുന്നു. അവളുടെ മുന്നിൽ ഇരുന്ന ഞാൻ ടേബിളിന് മേലെയുള്ള നെയിം ബോർഡിലേക്ക് ഒന്ന് നോക്കി... മുനീറ എന്നാണ് അവളുടെ പേര് ( മുനീറയ്ക്ക് ശേഷം കടിച്ചാൽ പൊട്ടാത്ത രണ്ട് പേര് കൂടി വാലായി ഉണ്ട്. ഇപ്പോൾ ഓർമ വരുന്നില്ല)... ഗഗന നീലിമ നയനങ്ങളിലേക്ക് ആവാഹിച്ച വെണ്ണയുടെ നിറമുള്ള സുന്ദരിയായൊരു യുവതി... മറ്റൊരു ഘട്ടത്തിൽ ആയിരുന്നെങ്കിൽ ആ നീലകണ്ണിന്റെ സൗന്ദര്യമൊക്കെ ഞാനൊന്ന് ആസ്വദിച്ചേനെ. ഈയൊരു അവസ്ഥയിൽ അതൊന്നും തോന്നില്ലല്ലോ. മുനീറ ഘനരുധിര വർണ്ണമണിഞ്ഞ പാണിജങ്ങൾ നിറഞ്ഞ കൈരവദല കരാംഗുലികൾ കൊണ്ട് ചൂണ്ടി കാണിച്ച സ്ഥലത്തൊക്കെ ഞാനൊപ്പിട്ട് കൊടുത്തു്. എനിയ്ക്ക് ഉള്ളിൽ നല്ല ടെൻഷൻ ഉള്ളത് കൊണ്ടാവണം ഏസിയിലും ഞാൻ നന്നായി വിയർത്തു കൊണ്ടിരുന്നു.. മുനീറ ദോന്ത് വറി ദോന്ത് വറി എന്നൊക്കെകിളി നാദം മുഴക്കുന്നുണ്ട്. അതൊന്നും എനിക്കാശ്വസം പകർന്നില്ല എന്നതായിരുന്നു വാസ്തവം... ഫോം ഫിൽ ചെയ്തു കഴിഞ്ഞപ്പോൾ മുനീറ എന്നോട് കൌണ്ടറിൽ പോയി ക്രെഡിറ്റ്‌ കാർഡിന്റെ ബില്ല് അടച്ചു കൊള്ളാൻ പറഞ്ഞു... മന്ദസ്മേരവദനയായി ഇരിക്കുന്ന മുനീറയെ ഒന്ന് നോക്കിയിട്ട് ബില്ല് അടയ്ക്കുവാനായി ഞാനെഴുന്നേറ്റു കൗണ്ടറിനു അടുത്തേക്ക് നടന്നു... തുടരും... #📚 ട്വിസ്റ്റ് കഥകൾ #📔 കഥ #✍ തുടർക്കഥ #📙 നോവൽ #💞 പ്രണയകഥകൾ