അബീയാമിന്റെ മകനായ ആസാ രാജാവായി അധികാരമേറ്റപ്പോൾ, തന്റെ പിതാവിനെപ്പോലെ ദൈവത്തെ അന്വേഷിക്കുന്ന ഹൃദയം അവനുണ്ടായിരുന്നു. ദൈവം ഏൽപ്പിച്ച രാജാധികാരത്തെ അവൻ ദൈവഹിതത്തിനും ദൈവത്തിന്റെ മഹത്വത്തിനുമായി ഉപയോഗിച്ചു. അതിന്റെ ഫലമായി, യഹോവ ആസായുടെ ദേശത്ത് പത്ത് വർഷം സമാധാനവും സ്ഥിരതയും നൽകി. എന്നാൽ, നാം പലപ്പോഴും ചെയ്യുന്നതുപോലെ സമാധാനത്തെ അനുഭവിച്ച് ദൈവത്തിന്റെ ഇഷ്ടം മറന്ന് ജീവിച്ചവനല്ലായിരുന്നു ആസാ. ദൈവം നൽകിയ സമയത്തെ അവൻ ജ്ഞാനത്തോടെ ഉപയോഗിച്ചു. രാജ്യത്തിന്റെ സുരക്ഷ ശക്തിപ്പെടുത്തുവാൻ അവൻ പട്ടണങ്ങൾ പണിതു, ഉറപ്പുള്ള മതിലുകളും ഗോപുരങ്ങളും വാതിലുകളും അരമനകളും നിർമ്മിച്ചു. എന്നിരുന്നാലും, ദൈവം നൽകിയ സമാധാനം അവന്റെ ജീവിതത്തിലെ അവസാന അനുഭവമായിരുന്നില്ല. അവന്റെ സൈന്യത്തേക്കാൾ ഇരട്ടിയോളം ശക്തിയുള്ള സൈന്യവുമായി ഒരു രാജാവ് യെഹൂദയെ ആക്രമിക്കാൻ വന്നു. ആ നിർണായക സമയത്ത് ആസാ തന്റെ സൈന്യത്തിന്റെ ശക്തി പ്രദർശിപ്പിച്ചില്ല; പകരം ദൈവത്തെ അന്വേഷിച്ചു. അവൻ യഹോവയെ വിളിച്ചപേക്ഷിച്ചു: “യഹോവേ, ബലവാനും ബലഹീനനും തമ്മിൽ കാര്യമുണ്ടായാൽ സഹായിപ്പാൻ നീയല്ലാതെ മറ്റാരുമില്ല, ഞങ്ങളുടെ ദൈവമായ യഹോവേ, ഞങ്ങളെ സഹായിക്കണമേ.” ആ പ്രാർത്ഥനയിൽ ആസാ തന്റെ ബലത്തെ ആശ്രയിച്ചില്ല; ദൈവത്തിന്റെ ശക്തിയെ ആശ്രയിച്ചു. അതുകൊണ്ട് യഹോവ അവനു ജയം നൽകി. ദൈവം ഏൽപ്പിച്ച അധികാരം ദൈവഹിതത്തിനായി ഉപയോഗിക്കുന്നവൻ, സമാധാനകാലത്തും വിശ്വസ്തനായി നിലകൊള്ളുകയും പ്രതിസന്ധികാലത്ത് ദൈവത്തെ അന്വേഷിക്കുകയും ചെയ്യും. അത്തരം ജീവിതം തന്നെയാണ് യഥാർത്ഥ ആരാധന✨ #✝ ബൈബിൾ വചനം #🏰 ക്രിസ്ത്യൻ സ്റ്റാറ്റസ് #🙏 കർത്താവിൻറെ കരം #⛪ ക്രിസ്തീയ വിശ്വാസം #😇 എന്റെ യേശു