#🤩 എന്റെ ആദ്യ പോസ്റ്റ് @Hridhayamenee Copyright protected© 1) കെ.ജി. പിള്ള കോണിപടികൾ സർവ്വതും കയറി വന്നത് കൊണ്ട് ഏഴാം നിലയിൽ നിന്ന് പട്ടിയെപ്പോലെ കിതച്ചു. ഏത് ഗുളികൻ പിടിച്ച നേരത്താണോ ആ കുട്ടികുരങ്ങന്മാർക്ക് റൂം വാടകയ്ക്ക് കൊടുക്കാൻ തോന്നിയത്.!! അയാൾ സ്വയം ശപിച്ചു കൊണ്ട് റൂം നമ്പർ 112 ന്റെ കതകിൽ തട്ടി. ഇളിച്ചു കൊണ്ട് വാതിൽ തുറന്നത് അഭിയാണ്. ആഹാ.. പിള്ള മാമനോ..? ഞാൻ അങ്ങ് പേടിച്ചു പോയി. കാശുകൊടുക്കാൻ ഉള്ള വല്ലവരും ആണെന്ന് കരുതി. അവൻ വാതിൽ ചാരി കൊണ്ട് തന്നെ പിള്ളയുടെ വഴി മുടക്കി നിന്നു. അതെന്താടാ ചെക്കാ.. എനിക്ക് നിങ്ങൾ കാശ് തരാനില്ലേ..?? അയാൾ അവനെ ഉന്തിക്കൊണ്ട് അകത്ത് കടന്നു. എന്റെ പരപ്പനക്കോട് ദേവി.. എന്താ ഈ കാണണേ.? എന്താടാ ഇത് കന്നാലി തൊഴുത്തോ..!! ഏഴ്മാസം മുൻപ് ഈ റൂം ഞാൻ നിങ്ങടെ കയ്യിൽ തരുമ്പോ ഇങ്ങനെ അല്ലായിരുന്നല്ലോ..! അയാളുടെ കപ്പടാമീശ നിന്ന് വിറച്ചു. പിള്ള മാമൻ ചൂടാവല്ലേ..! ഈ തണുപ്പത്ത്  ഇത്രേം പടി കേറി വന്നിട്ട്.. ഇരിക്ക് ഇരിക്ക്.. ഞാൻ ചായ എടുക്കാം. നീയാരാ എന്റെ ഭാര്യയോ.. മാറി നിക്കടാ അങ്ങോട്ട്. ഈ തൊഴുത്തിൽ നിന്ന് വല്ലതും കുടിച്ചിട്ട് വേണം എന്നെ തെക്കോട്ടെടുക്കാൻ. അയാൾ അടുത്ത് കണ്ട സോഫയിൽ തൊട്ടു തൊട്ടില്ല എന്ന മട്ടിൽ ഇരുന്നു. എവിടെ നിന്റെ  വാനരപ്പട. എല്ലാരേയും വിളിക്ക്‌! അയ്യോ.. അവരിവിടെയില്ല. വികാസ് നാട്ടിൽ പോയി. ശ്യാമേട്ടനും സഞ്ജുവും ജിമ്മിൽ പോയി. അഭി പുഞ്ചിരിച്ചു. നീയെന്തിനാടാ ഇങ്ങനെ ഇളിക്കണേ.. എപ്പോ വന്നാലാ  മഹാന്മാരെ നാലിനെയും ഒരുമിച്ച് ഒന്ന് കാണാൻ പറ്റുക? ഹ്മ്മ്.. അങ്ങനെയാണെൽ പിള്ള മാമൻ പോയിട്ട് നാളെ രാത്രി വായോ.. അതാ നല്ലത്. പ്ഫാ.. അഭി ആ ആട്ടലിൽ ഒന്ന് ഞെട്ടി. ഇക്കണ്ട കോണിപടികൾ ഇറങ്ങി കേറാൻ എന്നെകൊണ്ട് വയ്യാ. ഇനി ഞാൻ ഏമാന്മാരെ കാണാൻ നാളേം വരണം ലെ.. മാമനല്ലേ  സമയം ചോദിച്ചത്.!! ഹ്മ്മ്.. നിനക്ക് തമാശ ഇത്തിരി കൂടുന്നുണ്ട്. ഞാൻ ഒരു പ്രധാന കാര്യം പറയാൻ വന്നതാ. നാളെ തന്നെ നിങ്ങൾ ദാ.. ആ ഒരു മുറി ഒഴിവാക്കണം. ഞാൻ അത് മാത്രം വേറെ ഒരാൾക്ക് വാടകയ്ക്ക് കൊടുത്തു. ഹേ..!! വാടകയ്ക്ക് കൊടുത്തേന്നോ.. അതെങ്ങനെ?? ഞങ്ങൾ നാലാള് ആ റൂമിലും മറ്റേ റൂമിലും കൂടിയല്ലേ കിടക്കാറ്. ആഹ്‌ണോ.. അത് ഞാൻ അറിഞ്ഞില്ല. തൽക്കാലം ഇനി നാലാളും മറ്റേ റൂമിൽ മാത്രം കിടന്നാൽ മതി. കേട്ടോ..! അയ്യോ.. അങ്ങനെ പറയല്ലേ പിള്ളമാമ. മാത്രമല്ല, ഇനി ഒരാൾക്ക് കൂടി താമസിക്കാൻ ഇവിടെവിടാ സ്ഥലം..?? എങ്ങനെ സ്ഥലം ഉണ്ടാകും.!!? ഉള്ള ഇടത്ത് മുഴുവൻ നിന്റെയൊക്കെ ജട്ടിയും ട്രൗസറും  വിതറിയിട്ടേക്കുവല്ലേ..! ദേ.. ഞാനൊരു കാര്യം പറഞ്ഞേക്കാം.. ഇനി ഇമ്മാതിരി സാധനങ്ങൾ ഒന്നും ഇവിടെ എല്ലാവരും കാണാൻ പാകത്തിൽ വിതച്ചിടരുത്. വരുന്നത് ഒരു പെൺകൊച്ചാ.. ഞാൻ പറഞ്ഞില്ലെന്ന് വേണ്ട. ഹേ..!!!?????? പെങ്കൊച്ചോ..? അഭിയുടെ കണ്ണുകൾ വിടർന്നു. ആ.. പെൺകൊച്ചു തന്നെ. എന്തേ..? അല്ല, പെങ്കൊച്ചാണെങ്കിൽ കുഴപ്പമില്ല. എങ്ങനേലും സ്ഥലം ഉണ്ടാക്കാം. അതിന് നിന്റെ അനുവാദം വാങ്ങാൻ വന്നതല്ല ഞാൻ. നാളെ വൈകുന്നേരം ആ കൊച്ച് ഇങ്ങെത്തും. പിന്നെ... ഈ പ്രായത്തിലുള്ള ആണ്പിള്ളേർക്കുണ്ടാകുന്ന അല്ലറ ചില്ലറ ഞരമ്പ് പ്രശ്നങ്ങൾ എനിക്ക് മനസിലാവും. ഞാനും ആ പ്രായം കഴിഞ്ഞു വന്നവനാ . എന്ന് കരുതി അതെങ്ങാനും  ആ പെണ്ണിന്റെ അടുത്ത് എടുത്താൽ... അന്ന് നാലെണ്ണവും വേറെ വീട് നോക്കിക്കോണം. മനസിലായോ..? ഹ്മ്മ്.. ആയി. അഭി തലയാട്ടി. എന്നാൽ ഞാൻ ഇറങ്ങാ.. നാളെ ആ പെൺകുട്ടിയെയും കൊണ്ട് വരുമ്പോ വൃത്തിയായിരിക്കണം ഇവിടെ. കേട്ടല്ലോ..? കേട്ടു. എന്നാൽ ശെരി. പിള്ള യാത്ര പറഞ്ഞിറങ്ങി. അഭി ഫോണെടുത്ത് വികാസിനെ വിളിച്ചു. നീ എവിടെ എത്തി?? എപ്പോഴാ റൂമിലെത്തുകാ..?? ഒരു വലിയ സർപ്രൈസ് ഉണ്ട്. വേഗം വാ... പറയാം. അവൻ സന്തോഷം കൊണ്ട് തുള്ളിച്ചാടി. പെട്ടന്ന്  കോളിങ് ബെൽ മുഴങ്ങി. ബെൽ കേട്ട് അഭി വാതിൽ തുറന്നതും മുന്നിൽ കിതച്ചുകൊണ്ട് സഞ്ജുവും പിന്നിൽ ശ്യാമും. "ആഹാ.. എത്തിയോ..?" "എന്തേ എത്തണ്ടേ..??" സഞ്ജു അവനെ തള്ളി അകത്ത് കയറി. "ഹ്മ്മ്.. എത്തണം. എന്നിട്ട് എന്നെ ഒന്ന് സഹായിക്കണം." "എന്തിന്? ഫുഡ്‌ ഉണ്ടാക്കാനോ..?" ശ്യാം അവനെ പുരികം പൊക്കി നോക്കി. "ഓ.. ആകെ ഉണ്ടാക്കുന്നത് കാടിവെള്ളം പോലൊരു ചായയും രണ്ട് ഉണക്ക ദോശയും ആണ്. അതിന് ഇനി സഹായത്തിനാളും കൂടി വേണോ.?? സഞ്ജു ജിമ്മിൽ നിന്ന് കൊണ്ടുവന്ന ബാഗ് സെറ്റിയിലേക്കിട്ട് കൗച്ചിൽ ഇരുന്നു. "ഓ.. പുച്ഛം! ഇത്രകാലം ആ ചായയും ദോശയും അല്ലെ തട്ടി വിട്ടത്.അല്ലേലും എനിക്കൊരു ജോലി കിട്ടും വരെ ഈ അടുക്കള ഭരണം ഉണ്ടാവുകയുള്ളൂ എന്ന് ഞാൻ പറഞ്ഞിട്ടില്ലേ..? ഇനി ഇപ്പോൾ അതിന്റെ ആവശ്യം ഉണ്ടാവുമെന്ന് തോന്നുന്നില്ല. ഈ വീടിന് ഒരു അടുക്കും ചിട്ടയുമൊക്കെ വരാൻ പോകുവാ .." അഭി ചെറിയൊരു നാണം അഭിനയിച്ചു കൊണ്ട് പറഞ്ഞു. "അതെന്താ.. നീ ഈ അപാർട്മെന്റ് മാറുവാണോ..?" "ദേ.. സഞ്ജു. കളിക്കല്ലേ.. ഒരു സീരിയസ് മാറ്റർ പറയുമ്പോഴാ.." "നീ കാര്യം പറയടാ.." ശ്യാം ടി ഷർട്ട്‌ ഊരി മസിലും പെരുപ്പിച്ചു നിന്നു കൊണ്ട് പറഞ്ഞു. "ശ്യാമേട്ടൻ കേൾക്ക്‌.. നിങ്ങൾ രണ്ടാളും കിടക്കുന്ന റൂമില്ലേ.. അതിലെ സാധനങ്ങൾ എല്ലാം എടുത്ത് എന്റെയും വിക്സിന്റെയും മുറിയിൽ ഇന്ന് തന്നെ കൊണ്ട് വന്ന് വെക്കണം." "എന്തിന്..?" 'നാളെ അതിൽ പുതിയ ആള് വരും. താമസിക്കാൻ.." "എന്ത്..!??" അവർ രണ്ട് പേരും മുഖത്തോട് മുഖം നോക്കി. "അതേ... നമ്മടെ പന്നപിള്ള ഇപ്പോൾ വന്ന് പോയതേ ഉള്ളൂ.." "നീയിത് എന്തൊക്കെയാ പറയണേ..!അല്ലേൽ തന്നെ ഇവിടെ നാലാൾക്ക് വിസ്‌തരിച്ചു നിൽക്കാനുള്ള സ്ഥലമില്ല. അപ്പോഴാ അഞ്ചാമത് ഒരാൾ കൂടി." സഞ്ജു പല്ല് കടിച്ചു. "ഇവിടെ ഒന്ന് വൃത്തിയാക്കിയാൽ പത്ത് പേർക്ക് കഴിയാനുള്ള സ്ഥലമുണ്ടെന്നാ മിസ്റ്റർ പന്നപിള്ള  പറയുന്നത്." "എന്നാൽ അയാളോട് വന്ന് വൃത്തിയാക്കാൻ പറ..!! എന്തൊരു കഷ്ടമാ ശ്യാമേ.. നമ്മുടെ പ്രൈവസി പോവും. പിന്നെ വരുന്നവൻ ഏത് തരമാണെന്ന്  ആർക്കറിയാം. നമ്മുടെ ഒരു വൈബ് കിട്ടുമോ..??" "അവിടെ ഒരു ട്വിസ്റ്റ്‌ ഉണ്ടേ.." അഭി ഹാളിനോട് ചേർന്നുള്ള ഓപ്പൺ കിച്ചനിൽ നിന്നും ദോശ മറിച്ചിട്ടു കൊണ്ട് വിളിച്ചു പറഞ്ഞു. "എന്ത് ട്വിസ്റ്റ്‌!!" ശ്യാം അവനെ നോക്കി. "ആ ടി ഷർട്ട്‌ എടുത്തിട് ശ്യാമേട്ടാ.. ഇനി ഇങ്ങനെ നേക്കഡ് ബോഡിയും കാണിച്ച് നിൽക്കാൻ പറ്റില്ല കേട്ടോ.. നാളെ വരാൻ പോകുന്നതേ ഒരു പിടക്കോഴിയാ.." "ഏഹ്..!! പെണ്ണോ..?? ആ കിളവൻ ഇതെന്ത് ഭാവിച്ചാ..??" ശ്യാം ഫോൺ എടുത്ത് പിള്ളയുടെ നമ്പർ ഡയൽ ചെയ്തു. "ഹേ.. വിട് ശ്യാമേട്ടാ.. നമ്മൾ ഒന്ന് ശ്രദ്ധിക്കണം  അത്രയല്ലേ ഉള്ളൂ. ഇതൊരു സ്പോർട്സ്മാൻ സ്പിരിറ്റിൽ അങ്ങെടുക്ക്." അഭി ഇളിച്ചു കാട്ടി. "ദേ... മോന്തയ്ക്ക് ഒരു കുത്ത് വെച്ച് തരും ഞാൻ. പോയി ഫുഡ്‌ എടുത്ത് വെക്കടാ." പിള്ള ഫോൺ എടുക്കാത്ത ദേഷ്യത്തിൽ നിലത്ത് ചവിട്ടി കൊണ്ട് ശ്യാം ഹാളിൽ അങ്ങോട്ടും ഇങ്ങോട്ടും നടന്നു. സഞ്ജു അവനെ നോക്കി കൗച്ചിൽ ഇരുന്നു. "അയാൾ എടുക്കുന്നില്ല." "ഒരു കാര്യം ചെയ്യാം. നമുക്ക്‌ നേരിട്ട് പോയി പറയാം, ഇങ്ങോട്ട് ആരെയും പറഞ്ഞയക്കരുത് എന്ന്. എന്നിട്ട് പെന്റിങ് ഉള്ള റെന്റ് കയ്യോടെ കൊടുക്കാം. പണ്ടാരകാലൻ കൊണ്ട്പോയി തിന്നട്ടെ.." "അതുകൊണ്ട് രക്ഷയില്ല കേട്ടോ.. അങ്ങേരു സ്ട്രോങ്ങാ.. എന്തായാലും നാളെ ആ പെണ്ണിനേയും കൊണ്ട് വരുമെന്ന് കോല് മുറിച്ചിട്ടിരിക്കുകയാ. നമ്മളോട് ഇനി മുതൽ മാനേഴ്സിൽ ജീവിക്കാനും ഓർഡർ ഉണ്ട്. അതിന്റെ ഭാഗമാ ഈ വൃത്തിയാക്കൽ." "ആ.. പഷ്ട്. അപ്പൊ ഇനി വീക്കന്റിലെ വെള്ളമടിയും കട്ട്." സഞ്ജു സോഫയിൽ ഒരു കൊട്ട് കൊടുത്തു. "സഞ്ജു.. വണ്ടിയെടുക്ക്. പിള്ളയുടെ വീട്ടിൽ പോയിട്ട് തന്നെ ബാക്കി കാര്യം." ശ്യാം ടി ഷർട്ട്‌ എടുത്തിട്ടു. "ഹാ.. നിങ്ങൾ ഇങ്ങനെ തത്രപ്പെടല്ലേ.. നാളെ അങ്ങേര് ഇങ്ങോട്ട് വരും. അപ്പൊ പറഞ്ഞാൽ പോരെ..?" അഭി ഓടി വന്ന് പറഞ്ഞു. "മാറി നിക്കെടാ കാട്ടുകോഴി...!" സഞ്ജു അവനെ തള്ളിമാറ്റി. "ശ്യാമേട്ടാ..." അഭി അവനെ പ്രതീക്ഷയോടെ നോക്കി. "സോറി അഭി. ഒരുത്തിയെയും  ഈ അപാർട്മെന്റിൽ കാലുകുത്താൻ ഞാൻ സമ്മതിക്കില്ല." അവർ രണ്ടും ബുള്ളറ്റിന്റെ കീയുമെടുത്ത്  പോയി. "ഓ.. ഈശ്വരാ...സ്ത്രീ വിരോധിയായ ശ്യാമേട്ടൻ പറയുന്നത് മനസിലാക്കാം. ഈ സഞ്ജു എന്തിനാ കൂടെ തുള്ളുന്നത്??" അഭി പല്ല് കടിച്ചു. അടുക്കളയിൽ കുക്കർ വിസിലടിച്ചു. അഭി ചോറുണ്ടാക്കി, പരിപ്പ് കറിയും ഓംലറ്റും കൂടി തയ്യാറാക്കി ഗ്യാസ് ഓഫ് ചെയ്തു. ഒരു പ്ലേറ്റിൽ ദോശയും പരിപ്പ് കറിയും എടുത്ത് കൗച്ചിൽ പോയിരുന്ന് കഴിക്കാൻ തുടങ്ങി. കുറച്ച് കഴിഞ്ഞതും ശ്യാമും സഞ്ജുവും നിരാശരായി മടങ്ങി വന്നു. "എന്തായി.. പന്ന പിള്ള തല്ലിയോടിച്ചോ..?" 'പോടാ.." "എന്ത് പറഞ്ഞു ശ്യാമേട്ടാ..?" "രണ്ട് വർഷത്തേക്ക് എഗ്രിമെന്റ് എഴുതി പോലും. അതുവരെ ഉള്ള ഫുൾ റെന്റ് അവൾ അടച്ചു കഴിഞ്ഞെന്ന്. അതുകൊണ്ട് അയാൾക്ക് വാക്ക് മാറ്റി പറയാൻ പറ്റില്ല, അത്രയ്ക്ക് ബുദ്ധിമുട്ടാണ് എങ്കിൽ നമ്മളോട് ഇവിടുന്ന് പൊയ്ക്കോളാൻ..." "ഇപ്പൊ എങ്ങനെ ഇരിക്കണ്..!!" അഭി ഉണക്ക ദോശ കടിച്ചു പറിച്ചുകൊണ്ട് പറഞ്ഞു. "ഞാൻ അപ്പോഴേ പറഞ്ഞില്ലേ ഇതൊന്നും നടപടി ആവില്ലെന്ന്. അയാൾ എല്ലാം തീരുമാനിച്ചുറപ്പിച്ചാ വന്നത്. ഞാൻ എന്തായാലും അഡ്ജസ്റ്റ് ചെയ്യാൻ പോവാ. നിങ്ങൾ എന്താ പ്ലാൻ..?" "അഡ്ജസ്റ്റ് ചെയ്യാം.. അല്ലാണ്ട് വേറെന്താ മാർഗം.!?" സഞ്ജു തല ചൊറിഞ്ഞു. "പറ്റിയാൽ ഇന്ന് തന്നെ ഞാൻ ഇവിടുന്ന് ഇറങ്ങും.ഓഫീസിലെ മാനുവൽ താമസിക്കുന്ന ഒരു വില്ല ഉണ്ട്. ഒന്ന് വിളിച്ചു നോക്കട്ടെ." ശ്യാം ഫോൺ എടുത്തു. "എന്റെ പൊന്ന് ശ്യാമേ.. നീ ഒറ്റ ഒരാൾ ഉള്ളത്കൊണ്ടാ തട്ടിമുട്ടി എങ്കിലും റെന്റ് കൊടുക്കാൻ പറ്റുന്നത്. നീ പോയാൽ ഇവിടുത്തെ കാര്യങ്ങൾ ആകെ താളം തെറ്റും. പ്ലീസ്.. ഞങ്ങൾ അഡ്ജസ്റ്റ് ചെയ്യാൻ തയ്യാറായില്ലേ.. നീയും ഒന്ന് സഹകരിക്കെടാ.." സഞ്ജു അപേക്ഷിച്ചു. "അതേ. വെള്ളമില്ലാതെ എന്ത് വള്ളംകളി, ശ്യാമേട്ടൻ  ഇല്ലാതെന്ത് അപാർട്മെന്റ്!!" "ദേ.. അഭി, എനിക്ക് ചൊറിഞ്ഞു വരുന്നുണ്ടേ.." ശ്യാം കയ്യിൽ കിടന്ന ബ്ലാക്ക് അർബൻ ബാൻഡ് തിരിച്ചു. അഭി നൈസ് ആയി കാലിപ്ലേറ്റും  എടുത്ത് അടുക്കളയിലേക്ക് നടന്നു. "ഹേയ് ഗയ്‌സ്... ഞാൻ എത്തി." വികാസ് വാതിൽ തുറന്ന് അകത്തേക്ക് ചാടി കയറി. കയ്യിലിരുന്ന ട്രാവൽ ബാഗ് ഒരു മൂലയിലേക്കിട്ട് കൗച്ചിലേക്കിരുന്നു. "അഭീ...വൺ വാട്ടചായ പ്ലീസ്.." "നീയെന്താ വൈകിയേ..! ട്രെയിൻ ലേറ്റ് ആയോ..?" ശ്യാം കുളിക്കാനായി ടവൽ എടുത്ത് തോളത്തിട്ടുകൊണ്ട് ചോദിച്ചു. "ഹ്മ്മ്.. കുറച്ച്. ഷൊർണുർ വെച്ച് ട്രെയിൻ ഒരു മുക്കാൽ മണിക്കൂർ എക്സ്ട്രാ പിടിച്ചിട്ടു. വന്ദേ ഭാരത് പാസ്സ് ചെയ്യുവായിരുന്നു. പക്ഷെ, ഞാൻ വന്നിട്ട് കുറച്ച് നേരം ആയി." "എന്നിട്ട് ഇത്ര നേരം എവിടെയായിരുന്നു?" സഞ്ജു അവനെ സംശയത്തോടെ നോക്കി. "അത് പിന്നെ.. നമ്മടെ ലതികചേച്ചിയുടെ മിക്സിക്കെന്തോ ഒരു കംപ്ലയിന്റ്. ഞാൻ അതൊന്ന് നോക്കുവായിരുന്നു." "എന്ത്... ലതിക ചേച്ചിയുടെ അവിടെയാണോ....." അഭി ഒരു ഗ്ലാസ്‌ ചായയും കൊണ്ട് പാഞ്ഞു വന്നു. വികാസ് ചായ വാങ്ങി ഒരിറക്ക്‌ കുടിച്ചു. "ഹൗ..എന്റെ അഭി..ഇത്രയും ദിവസം നിന്റെയീ വാട്ട ചായ ഞാൻ മിസ്സ്‌ ചെയ്തു. ഇത് കുടിക്കുമ്പോ രാവിലത്തെ കാര്യങ്ങളൊക്കെ അങ്ങ് ഈസി ആയി നടക്കും. ശെരിക്കും ഇതിന്റെ ഔഷധഗുണമുണ്ടല്ലോ... അതൊന്ന് വേറെ തന്നെയാ. അല്ലെ സഞ്ജു?" വികാസ് സഞ്ജുവിനെ നോക്കി. "അതെയതെ. വ്യത്യസ്തമായ ആ വാട്ടചായയുടെ മഹത്വം സത്യത്തിൽ നമ്മളാരും തിരിച്ചറിഞ്ഞില്ല." സഞ്ജു അടുത്തിരുന്ന ഗിറ്റാറിന്റെ സ്ട്രിങ്സ് മുറുക്കികൊണ്ട് പറഞ്ഞു. "തമാശ കള,ബാക്കി പറ വിക്സേ..ലതിക ചേച്ചിയുടെ മിക്സി കേടായിട്ട്..." "കേടായിട്ട് എന്താ.. ഞാൻ നന്നാക്കാൻ പറ്റുമോ എന്ന് നോക്കുവായിരുന്നു." "എന്നിട്ട് നന്നാക്കിയോ..?" "എവിടുന്ന്..? അതിന്റെ മോട്ടർ കത്തിപോയെന്നെ.. ഇനി വേറെ വാങ്ങുന്നതാ നല്ലത്." "ഓ..അത്രേ ഉള്ളൂ.. ഞാൻ കരുതി...." അഭി പുച്ഛിച്ചു. "എന്ത് കരുതി എന്ന്..??" വികാസ് അവനെ നോക്കി. "അല്ല. ലതിക ചേച്ചി ആണല്ലോ.. സ്നേഹം കൊണ്ട് നിനക്ക് വല്ലതും തന്നോ എന്ന് അറിയാനാ.." "എന്ത് തന്നോന്ന്..??" സഞ്ജു അഭിയെ നോക്കി. "അല്ല, അവര് നന്നായി ഫുഡ്‌ ഉണ്ടാക്കും. അങ്ങനെ വല്ലതും..." "എന്റെ അഭി.. നിന്റെയീ മനസിലെ കുരുട്ട് ബുദ്ധി കൊണ്ടാ മോനീ അടുക്കളയിൽ തന്നെ കെട്ടിതിരിയുന്നെ.. കഥപിടിക്കാൻ നടക്കണ നേരം കൊണ്ട് വല്ല ഇന്റർവ്യൂ ക്രാക്ക് ചെയ്യാൻ പറ്റിയ യൂട്യൂബ് വീഡിയോസോ ബ്ലോഗോ വായിച്ച് രക്ഷപ്പെടാൻ നോക്ക്." സഞ്ജു അവന്റെ നേരെ പേപ്പർ ചുരുട്ടി എറിഞ്ഞു. "അവൻ കുഞ്ഞല്ലേ സഞ്ജു.. ഈ പ്രായത്തിൽ ഇങ്ങനെയൊക്കെ ഉണ്ടാവും." "ഹ്മ്മ്.. നാളത്തെ വിശേഷം അറിഞ്ഞില്ലേ വിക്സേ നീ.." സഞ്ജു വികാസിനെ നോക്കി. "ഒരു ചിക്ക് വരണ കേസ് അല്ലെ..? വരട്ടെ അളിയാ.. വന്ന് താമസിക്കട്ടെ, ഐആം എക്സൈറ്റഡ്!!" "ഞാനും." അഭി പുഞ്ചിരിച്ചു. "എന്നാ ഞാനും." സഞ്ജുവും കൂടെ കൂടി. "ഒക്കെ കണക്കാ.." ശ്യാം പല്ല് കടിച്ചു കൊണ്ട് കുളിക്കാനായി പോയി. "സ്വന്തം പല്ലാണെന്ന് ഓർത്തു കടിക്കെന്റെ ശ്യാമേട്ടാ.. നിങ്ങളെ ഒരു പെണ്ണ് പറ്റിച്ചു പോയി എന്ന് കരുതി ലോകത്തുള്ള സകല പെണ്ണുങ്ങളെയും വെറുത്താലോ..??" അഭി വിളിച്ചു ചോദിച്ചു. "ടാ..." സഞ്ജു അവനെ തടഞ്ഞു. ബാത്‌റൂമിലേക്ക് കയറാൻ തുടങ്ങിയ ശ്യാം, പെട്ടന്ന് നിന്നു. പിന്നെ തിരിഞ്ഞ് കോപത്തോടെ അഭിയുടെ അരികിലേക്ക് പാഞ്ഞടുത്തു. ( തുടരും ) #prathilipi ##prathilipi