https://sharechat.com/post/X69baWKO?d=n&ui=v64j8rk&e1=c ആദ്യ ഭാഗങ്ങൾ മുകളിൽ ഉണ്ട് 💞ദേവനന്ദിനി.... Part 26💞 Previous Part രണ്ട് പേരും എഴുന്നേറ്റു സ്നാക്ക്സ് സെന്ററിന് പുറത്തിറങ്ങി. ബൈക്കിനടുത്തു വരെ രുദ്രൻ ഗൗരിയുടെ തോളിലൂടെ കയ്യിട്ട് തന്നോട് ചേർത്തു പിടിച്ചു. ഗൗരിയൊന്നു കൂടി അവനോടിഴുകി ചേർന്നു നിന്നു…. തുടർന്ന് ബൈക്ക് സ്റ്റാർട്ട്‌ ചെയ്ത രുദ്രനും ഗൗരിയും തങ്ങളുടെ മുന്നോട്ടുള്ള പ്രയാണം തുടർന്നു….വജ്ര നിർമാണത്തിന് പ്രശസ്തിയാർജ്ജിച്ച സൂറത്തിലോട്ട്… -------------------------------------------------------- നവസാരിയിൽ നിന്നും പുറപ്പെട്ട രുദ്രനും ഗൗരിയും ഏകദേശം അരമണിക്കൂറോളം എടുത്ത് കരാല ജംഗ്ഷനിൽ എത്തി. എൻ എച് 48 ഇൽ നിന്നും സൂറത്ത് സിറ്റിയിലേക്ക് തിരയുന്നത് ഇവിടെ നിന്നാണ്. ഇവിടെ നിന്നും പിന്നെയും അര മണിക്കൂറോളം പോയാൽ സൂറത്ത് നഗരത്തിന്റെ ഹൃദയഭാഗത്തെത്തും... അവിടെ നിന്നും ആറു കിലോമീറ്ററോളം പോയിട്ട് സർദാർ ബ്രിഡ്ജ് കടന്നു അഡാജൻ - ഹജിറ റോഡ് എത്തണം. അവിടെയൊരു കേരള റെസ്റ്റോറന്റ് ഉണ്ട്. സർദാർ ബ്രിഡ്ജ് സർക്കിളിൽ നിന്നും വലത്തോട്ട് തിരിഞ്ഞു കുറച്ചങ്ങോട്ട് മാറി അഡാജൻ സർക്കിളിലോട്ട് പോകുന്ന വഴിയിൽ ആണ് രുദ്രൻ തങ്ങൾക്കുള്ള സ്റ്റേ ബുക്ക്‌ ചെയ്തിരിക്കുന്നത്…. സിറ്റിയിൽ വൈകുന്നേരമായതിനാൽ കുഴപ്പമില്ലാത്ത ഒരു തിരക്കുണ്ട്. ഇരുള് വീണു തുടങ്ങിയിട്ടില്ല. നഗരത്തിന്റെ ഹൃദയഭാഗത്ത് കുറച്ചു നിമിഷങ്ങൾ ബ്ലോക്കിൽ പെട്ട് വണ്ടി നിർത്തിയപ്പോൾ ചുറ്റുമൊന്നു കൗതുകത്തോടെ ഗൗരി ഒന്നു കണ്ണുകളോടിച്ചു... ഈ നഗരത്തിന്റെയൊക്കെ പേര് പറഞ്ഞു കേട്ടിട്ടേ ഉള്ളൂ. ഇത് പോലെ എന്നെങ്കിലും കാണാൻ പറ്റുമെന്നു വിചാരിച്ചതല്ല. തന്റെ ദേവേട്ടനെ തിരിച്ചു കിട്ടിയത് യാത്രയെ കൂടുതൽ മധുരതരമാക്കുന്നു. ഒരു പുഞ്ചിരിയോടെ ഗൗരി മനസ്സിൽ ചിന്തിച്ചു… അവൾ രുദ്രനെ ഒന്നു കൂടി നന്നായി കെട്ടിപ്പിടിച്ചു. അവളുടെ ഭാവങ്ങൾ റിയർ വ്യൂ മിററിലൂടെ രുദ്രൻ ശ്രദ്ധിക്കുന്നുണ്ടായിരുന്നു. അതെല്ലാം ആസ്വദിച്ചു ഉള്ളിൽ ഒന്നൂറിച്ചിരിച്ചു… വൈകാതെ രുദ്രൻ വണ്ടി മുന്നോട്ട് എടുത്തു. രണ്ട് കിലോമീറ്ററോളം മുന്നോട്ട് പോയപ്പോൾ ബൈക്ക് ഒരു പാലത്തിലേക്ക് പ്രവേശിച്ചു… വലിയൊരു നദിയുടെ മുകളിലെ പാലത്തിൽ കയറിയതും പാലത്തിന്റെ വലിപ്പവും ഒക്കെ ഗൗരിയിൽ കൗതുകവും ആകാംഷയും ജനിപ്പിച്ചു കൊണ്ടിരുന്നു… "ദേവേട്ടാ….ഇതേതാ നദി.. നല്ല വലിപ്പമുണ്ടല്ലോ"….. ആകാംഷയടക്കാൻ കഴിയാതെ ഗൗരി രുദ്രനോട് ചോദിച്ചു... "ഇത് തപ്തി നദി. ഈ പാലം സർദാർ ബ്രിഡ്ജ്. സൂറത്തിലെ നമ്മൾ ഇപ്പോൾ വന്ന റിംഗ് റോഡിനെയും അഡാജനെയും ബന്ധിപ്പിക്കുന്ന പാലമാണ് "…. രുദ്രൻ വിവരിച്ചു കൊടുത്തു.. "തപ്തി നദി… പുസ്തകങ്ങളിൽ വായിച്ചു കേട്ടിട്ടേ ഉള്ളൂ. നേരിട്ട് ഒന്നു കാണാൻ പറ്റി. അന്നൊന്നും ഇത് കാണാൻ പറ്റുമെന്നു കരുതിയില്ല "….. ഗൗരിയുടെ വാക്കുകളിൽ ആനന്ദം നിറഞ്ഞു നിന്നു…. "അതിന്റെ ക്രെഡിറ്റ്‌ ഈയുള്ളവനാ…" രുദ്രാനൊരു ഗമയോടെ പറഞ്ഞു.. "ആയിക്കോട്ടെ… അതിനുള്ള സമ്മാനം ഞാൻ തരുന്നുണ്ട്. പോരെ "….ഗൗരിയുടെ ചിരിയോടെയുള്ള മറുപടി.. പാലം കടന്നു കുറച്ചു ദൂരം കൂടി പോയപ്പോൾ അഡാജൻ - ഹജിറ റോഡിലേക്ക് കയറുന്ന സർക്കിൾ എത്തി. രുദ്രൻ അവിടെ നിന്നും വണ്ടി വലത്തോട്ട് തിരിച്ചു. നിമിഷങ്ങൾക്കകം അവർ തങ്ങൾ ബുക്ക്‌ ചെയ്ത സ്റ്റേയിൽ എത്തി… ഗൗരിയെ മുന്നിൽ ഇറക്കിയിട്ട് ഉള്ളിലേക്ക് കയറിയിരുന്നോളാൻ പറഞ്ഞു രുദ്രൻ ബൈക്ക് അണ്ടർഗ്രൗണ്ട് പാർക്കിംഗ് യാർഡിലേക്ക് കൊണ്ട് പോയി. രുദ്രൻ ബൈക്ക് പാർക്ക്‌ ചെയ്തു ഗൗരിയുടെ അടുത്തെത്തി. റീസെപ്ഷനിൽ ബുക്കിങ് ഡീറ്റെയിൽസ് കാണിച്ചു ഐഡി കാർഡുകളുടെ കോപ്പികളും കൊടുത്തു തങ്ങൾക്കായുള്ള റൂമിന്റെ കീ വാങ്ങി രുദ്രനും ഗൗരിയും ലിഫ്റ്റിൽ കയറി. തേർഡ് ഫ്ലോറിൽ ആണ് അവർക്ക് കിട്ടിയ റൂം… റൂം തുറന്നു അകത്തു കയറിയ ഗൗരിയ്ക്ക് റൂം വളരെയിഷ്ടപ്പെട്ടു. എല്ലാ സൗകര്യവുമുള്ള ഒരു ലഷ്വറി ഡബിൾ ബെഡ്‌റൂം… റൂമിൽ കയറിയ രുദ്രൻ ജാക്കറ്റ് അഴിച്ചു ബെഡിലേക്ക് മലർന്നു വീണു. അവൻ കിടക്കുന്നത് ഒരു പുഞ്ചിരിയോടെ ഗൗരി നോക്കി നിന്നു. ബാഗുകൾ ഒക്കെ ടേബിളിൽ വച്ചു ജാക്കറ്റ് ഊരി തന്റെ മുടിയഴിച്ചു ഗൗരി രുദ്രന്റെ അടുത്തേക്ക് വന്നു. മലർന്നു കിടക്കുന്ന അവന്റെ മേലേക്ക് അവൾ പതിയെ വീണു. അവനവളെ കെട്ടിപ്പിടിച്ചു… "ദേവേട്ടാ… താങ്ക്സ് "… അവൾ അവന്റെ നെറ്റിയിൽ ചുണ്ടുകൾ അമർത്തി അവന്റെ മുഖത്തേക്ക് ഒരു പുഞ്ചിരിയോടെ നോക്കി.. എന്തിനെന്നു രുദ്രൻ കണ്ണുകളാൽ ആംഗ്യം കാട്ടി… "ഈ യാത്ര തുടങ്ങിയതിനു, ഇത് പോലെ ഈ യാത്ര ആസ്വാദ്യകരമാക്കി തന്നതിന് ഒക്കെ"….. ഗൗരിയുടെ മിഴികളിൽ നിറഞ്ഞ പ്രണയം രുദ്രൻ ആസ്വദിച്ചു… അവനൊന്നു മന്ദഹസിച്ചു…. "ഈ യാത്ര സന്തോഷം മാത്രം നിറഞ്ഞതായിരിക്കും നന്ദു "…. അവളുടെ കവിളിൽ ചുണ്ടമർത്തിക്കൊണ്ട് രുദ്രൻ പറഞ്ഞു… ഗൗരിയുടെ അധരങ്ങൾ രുദ്രന്റെ അധരങ്ങളിൽ അമർന്നു…. "നദിയുടെ മുകളിൽ കയറിയപ്പോൾ ഒരു സമ്മാനം തരാമെന്നു പറഞ്ഞില്ലേ… എങ്ങനുണ്ട് "…. രുദ്രന്റെ തലയിൽ തലോടിക്കൊണ്ട് അവന്റെ മിഴികളിലേക്ക് ഗൗരി പ്രണയാർദ്രയായി നോക്കി നിന്നു… രുദ്രൻ ഗൗരിയെ പിടിച്ചു തന്റെ നെഞ്ചിലേക്ക് ചേർത്ത് പുൽകി. അവളുടെ നെറ്റിയിൽ അമർത്തി ചുംബിച്ചു…. കുറച്ചു നേരം പുണർന്നിരുന്നു ഇരുവരും. രുദ്രൻ ഗൗരിയെ തട്ടി വിളിച്ചു…. "ഫ്രഷ് ആവാം… രാവിലെ തുടങ്ങിയ യാത്രയല്ലേ. എന്തെങ്കിലും കഴിക്കണം. ആ കേരള റെസ്റ്റോറന്റിലേക്ക് പോകാം…." അവർ തുടർന്ന് ഫ്രഷ് ആവാനുള്ള തയ്യാറെടുപ്പ് തുടങ്ങി… 🌸🌸🌸🌸🌸🌸🌸🌸🌸🌸🌸🌸🌸🌸🌸 ഫ്രഷ് ആയിറങ്ങിയ രുദ്രനും ഗൗരിയും അഡാജൻ - ഹജിറ റോഡിലുള്ള കേരള റെസ്റ്റോറന്റിലേക്ക് നടന്നു. ഏകദേശം ഒന്നര കിലോമീറ്ററോളം ദൂരമുണ്ട് അവരുടെ സ്റ്റേയിൽ നിന്നു. കൈ കോർത്തു പിടിച്ചു നടക്കുമ്പോൾ രുദ്രൻ ഗൗരിയോട് മുൻപ് അവൻ സൂറത്തിൽ വന്നപ്പോഴുള്ള വിശേഷങ്ങൾ ഒക്കെ പറഞ്ഞു കൊണ്ടിരുന്നു... ആദ്യമായി പരിചയമില്ലാത്ത കേട്ടറിവ് മാത്രമുള്ള ഒരു വലിയ സിറ്റിയിൽ എത്തിയതിന്റെ ആവേശത്തിൽ ആയിരുന്നു ഗൗരി…. വൈകാതെ അവർ കേരള റെസ്റ്റോറന്റിൽ എത്തി. ഒരു ടേബിളിൽ അവർ സ്ഥലം പിടിച്ചു. ഓർഡർ എടുക്കാൻ ആള് വന്നപ്പോൾ കേരള പൊറോട്ടയും ചിക്കൻ ഉലർത്തിയതും ഓർഡർ ചെയ്തു അവർ… വൈകാതെ ഭക്ഷണം വന്നപ്പോൾ അവർ കഴിക്കാൻ തുടങ്ങി…. "ദേവേട്ടൻ കുറെ കാലത്തിനു ശേഷമായിരിക്കുമല്ലേ ഇങ്ങനത്തെ കേരള സ്റ്റൈൽ ഭക്ഷണം ഹോട്ടലിൽ നിന്നും കഴിക്കുന്നത് "….. കഴിച്ചു കൊണ്ടിരിക്കെ ഗൗരി ചോദിച്ചു… "ഇടയ്ക്ക് ഇഘാത്പുരിയിൽ മൊയ്‌തൂട്ടിക്കയുടെ ഹോട്ടലിൽ പോകുമ്പോൾ കഴിക്കും. അത് കൂടുതലും മലബാർ സ്റ്റൈൽ ആണ്. അവിടെ പോയിട്ടും മാസങ്ങളായി "… രുദ്രൻ മറുപടി നൽകി… "മറാട്ടി ഭക്ഷണം കഴിച്ചു അത് ശീലമായിട്ടുണ്ടാകും അല്ലെ "… ഗൗരി "ഏകദേശം അങ്ങനൊക്കെ തന്നെ…. വളരെ കാലത്തിനു ശേഷം കേരള വിഭവങ്ങൾ ഒക്കെ കഴിക്കുന്നത് നീയന്നു സദ്യ ഉണ്ടാക്കി തന്നപ്പോഴാ "…. രുദ്രൻ അത് കേട്ടതും ഗൗരിയുടെ മിഴികൾ നിറഞ്ഞു… "ദേ നന്ദു…കണ്ണു തുടയ്ക്ക്… ഭക്ഷണം കഴിക്കുമ്പോൾ കരഞ്ഞാൽ നീ നല്ല തല്ല് വാങ്ങിക്കും "… രുദ്രൻ സ്നേഹപൂർവ്വം ശാസിച്ചുകൊണ്ട് പറഞ്ഞു…. ഗൗരി കണ്ണ് തുടച്ചു രുദ്രന്റെ നേരെ നോക്കി ചിരിച്ചു… "ഇത് പോലെ ചിരിച്ചോണ്ട് നിന്നോണം കേട്ടല്ലോ "… രുദ്രൻ ഗൗരി ചിരിച്ചു കൊണ്ട് തലയാട്ടി… "ദേവേട്ടാ… ആദ്യമായി നമ്മൾ കോളേജ് ക്യാന്റീനിൽ നിന്നും പൊറോട്ടയും ബീഫും കഴിച്ചത് ഓർമ വരുന്നു. ദേവേട്ടനും മറക്കാൻ പറ്റില്ലല്ലോ അത് "…. ഗൗരി ചിരിയോടെ ചോദിച്ചു… "എങ്ങനെ മറക്കാൻ….എന്റെ രണ്ട് ദിവസത്തെ ബഡ്ജറ്റ് അല്ലെ നീയും രേഷ്മയും കൂടി തീർത്തു തന്നത് "…. രുദ്രൻ "പറഞ്ഞപ്പോഴാ രേഷ്മയെ ഓർമ വന്നത് അവളിപ്പോൾ എവിടെയാ….. കോൺടാക്ട് ഉണ്ടോ തനിക്കിപ്പോൾ"… രുദ്രൻ ഗൗരിയോട് തിരക്കി…. "ഉണ്ട്… അവളുടെ കല്യാണമൊക്കെ കഴിഞ്ഞു ഇപ്പോൾ കുടുംബമായി മുവാറ്റുപുഴ തന്നെ. ഗവണ്മെന്റ് സർവിസിൽ ആണ് "…. ഗൗരി മറുപടി നൽകി… അപ്പോഴേക്കും അവർ കഴിച്ചു കഴിഞ്ഞിരുന്നു. അവിടുന്ന് അവർ വേഗം ഇറങ്ങി. നിർത്താതെയുള്ള യാത്ര കാരണം രണ്ട് പേരും ക്ഷീണിതരായിരുന്നു… തിരിച്ചു സ്റ്റേയിൽ എത്തിയ രുദ്രൻ ബെഡിൽ ചാരിയിരുന്നു മൊബൈൽ നോക്കിക്കൊണ്ടിരുന്നു…. ഗൗരി അവന്റെ അടുത്തിരുന്നു അവന്റെ നെഞ്ചിലേക്ക് ചാരിയിരുന്നു. രുദ്രനവളെ ചേർത്തു പിടിച്ചു... "ദേവേട്ടാ… ഞാൻ കാരണം നമ്മൾ ഇവിടെയെത്താൻ വൈകിയല്ലേ. ഇനി നാളെ നേരത്തെ പോകണ്ടേ. ഈ സിറ്റിയിലെ ഒന്നും കാണാൻ പറ്റിയില്ല "….. ഗൗരിയുടെ വാക്കുകളിൽ വിഷാദം കലർന്നു.. "നന്ദു "… രുദ്രൻ പതിയെ അവളെ വിളിച്ചു.. ഗൗരിയവന്റെ നേരെ തലയുയർത്തി നോക്കി… "ഞാനൊരു കാര്യം പറയട്ടെ "…. രുദ്രനിൽ ഒരു ചെറുചിരി വിടർന്നു.. എന്താണെന്ന് ഗൗരി കണ്ണുകൾ കൊണ്ട് ആംഗ്യം കാണിച്ചു.. "നമ്മൾ നാളെ പോകുന്നില്ല… നാളെ ഇവിടെ സ്റ്റേ ചെയ്തിട്ട് മറ്റന്നാൾ ആണ് പോകുന്നത്"… രുദ്രനൊരു കള്ളച്ചിരിയോടെ പറഞ്ഞു.. "സത്യമാണോ "…. ഗൗരിയുടെ മുഖം അത്ഭുതപരതന്ത്രമായി.. "അതേടോ… നാളെ രാവിലെ നമുക്ക് ഇവിടുത്തെ അംബിക ദേവി ക്ഷേത്രം ഒന്നു കാണാൻ പോകാം. നിനക്ക് തപ്തി നദി ഒന്നു അടുത്തു നിന്നും കാണുകയും ചെയ്യാം.. പോരെ "…. രുദ്രൻ അവളുടെ മുഖത്തേക്ക് നോക്കിക്കൊണ്ട് പറഞ്ഞു.. "എന്നിട്ട് ദേവേട്ടൻ ഇവിടെ ഒരു ദിവസം സ്റ്റേ ചെയ്യുന്ന കാര്യം പറഞ്ഞില്ലല്ലോ ഈ ട്രിപ്പിന്റെ പ്ലാൻ പറയുമ്പോൾ "… ഗൗരിയുടെ മുഖത്ത് നിന്നും അത്ഭുതം വിട്ടിരുന്നില്ല.. "അത് നിനക്കൊരു സർപ്രൈസ് തരാമെന്ന് കരുതി "… രുദ്രൻ😜 "അഹ്‌മദാബാദ് സ്റ്റേ ബുക്ക്‌ ചെയ്തതും ഇത് പോലെയുള്ളതാണോ "… ഗൗരി "അതെ…." "അതൊന്നു കാണിച്ചു തരാമോ "… ഗൗരി "നീ നിന്റെ ലാപ് എടുക്ക്. അതിൽ ഇവിടുത്തെ വൈഫൈ കൂടിയാവുമ്പോൾ രണ്ട് പേർക്കും കൂടി നന്നായി എല്ലാം നോക്കാം. കൂട്ടത്തിൽ നാളെ ഇവിടെ കാണാൻ പോകുന്നതും കൂടി കാണിച്ചു തരാം "… രുദ്രൻ ഗൗരിയോട് പറഞ്ഞു… "ഓഹോ… അതെടുത്തു വയ്ക്കുമ്പോൾ എന്തായിരുന്നു മോന്റെ ഡയലോഗ്. സ്ഥലം മുടക്കാൻ വേണ്ടി വയ്ക്കുന്നു എന്നൊക്കെ പറഞ്ഞു. ഏതായാലും അതിൽ നോക്കാം…" ഗൗരിയതും പറഞ്ഞു ബെഡിൽ നിന്നുമിറങ്ങി ബാഗിൽ നിന്നും ലാപ്ടോപ് എടുത്ത് രുദ്രന്റെ കയ്യിൽ കൊടുത്തു… രുദ്രൻ അത് വാങ്ങി തന്റെ മടിയിൽ വച്ചു തുറന്നു. ഗൗരിയവന്റെ തോളിലേക്ക് ചാഞ്ഞിരുന്നു…. രുദ്രൻ ലാപ്ടോപ്പ് ഓൺ ചെയ്തു… "നന്ദു… എന്താ ഇതിന്റെ പാസ്സ്‌വേർഡ്‌….." "ദേവനന്ദിനി ( Devanandhini )…. ഡി ക്യാപിറ്റൽ "… ഗൗരി മറുപടി നൽകി.. രുദ്രനത് കേട്ട് ഞെട്ടിത്തരിച്ചു…. അവൻ തല തിരിച്ചു ഗൗരിയുടെ നേരെ നോക്കി… പ്രണയാർദ്രമായ മുഖത്തോടെ ഒരു പുഞ്ചിരിയണിഞ്ഞു കൊണ്ട് ഗൗരിയവന്റെ മുഖത്തേക്ക് നോക്കിനിന്നു… അവളുടെ മുഖത്തേക്ക് നോക്കിനിൽക്കെ രുദ്രന്റെ മിഴികൾ നിറഞ്ഞു തുളുമ്പാൻ തുടങ്ങി…. ( തുടരും ) കണ്ണൂർകാരൻ❤️❤️❤️ #📙 നോവൽ #📔 കഥ #✍ തുടർക്കഥ #📚 ട്വിസ്റ്റ് കഥകൾ #💞 പ്രണയകഥകൾ