#💖ਦਿਲ ਦੇ ਜਜ਼ਬਾਤ' ਲੇਖ : ਆਪਣੇ ਅੰਦਰ ਝਾਤੀ ਮਾਰੋ — ਅਸਲ ਸੱਚਾਈ ਦੀ ਖੋਜ ਇਹ ਸੰਸਾਰ ਹਮੇਸ਼ਾਂ ਸਾਨੂੰ ਕਿਸੇ ਨਾ ਕਿਸੇ ਨਾਂ ਨਾਲ ਪਹਿਚਾਣਦਾ ਰਹਿੰਦਾ ਹੈ। ਕੋਈ ਸਾਨੂੰ ਗਰੀਬ ਕਹਿੰਦਾ ਹੈ, ਕੋਈ ਕੰਜੂਸ। ਕੋਈ ਸਾਨੂੰ ਚੁਸਤ ਆਖਦਾ ਹੈ, ਤਾਂ ਕਿਸੇ ਦੀ ਨਜ਼ਰ ਵਿੱਚ ਅਸੀਂ ਮੂਰਖ ਜਾਂ ਲਾਲਚੀ ਹੁੰਦੇ ਹਾਂ। ਕਿਸੇ ਨੂੰ ਅਸੀਂ ਚਲਾਕ ਦਿਸਦੇ ਹਾਂ, ਕਿਸੇ ਨੂੰ ਨਿਕੰਮੇ। ਪਰ ਇਹ ਸਭ ਸ਼ਬਦ ਸਿਰਫ਼ ਹੋਰਾਂ ਦੀਆਂ ਸੋਚਾਂ ਦਾ ਪ੍ਰਤੀਬਿੰਬ ਹੁੰਦੇ ਹਨ — ਇਹ ਸਾਡੀ ਅਸਲ ਪਹਚਾਣ ਨਹੀਂ ਹੁੰਦੇ। ਸਭ ਤੋਂ ਵੱਡਾ ਦੁੱਖ ਇਹ ਹੈ ਕਿ ਅਸੀਂ ਦੂਜਿਆਂ ਦੀਆਂ ਰਾਇਆਂ ਨੂੰ ਤਾਂ ਬਹੁਤ ਮਹੱਤਵ ਦਿੰਦੇ ਹਾਂ, ਪਰ ਕਦੇ ਆਪਣੇ ਆਪ ਨਾਲ ਸੱਚਾਈ ਨਾਲ ਨਹੀਂ ਬੈਠਦੇ। ਅਸੀਂ ਕਦੇ ਆਪਣੇ ਅੰਦਰ ਝਾਤੀ ਮਾਰ ਕੇ ਇਹ ਨਹੀਂ ਸੋਚਦੇ ਕਿ "ਅਸਲ ਵਿੱਚ ਮੈਂ ਕੌਣ ਹਾਂ?"। ਜਦ ਤੱਕ ਇਨਸਾਨ ਆਪਣਾ ਅਸਲੀ ਚਿਹਰਾ ਆਪਣੇ ਮਨ ਦੇ ਦਰਪਣ ਵਿੱਚ ਨਹੀਂ ਵੇਖਦਾ, ਤਦ ਤੱਕ ਉਹ ਦੂਜਿਆਂ ਦੀਆਂ ਗੱਲਾਂ ਦੇ ਸਾਏ ਹੇਠ ਜੀਉਂਦਾ ਰਹਿੰਦਾ ਹੈ। ਸੱਚਾਈ ਇਹ ਹੈ ਕਿ ਲੋਕ ਸਾਨੂੰ ਆਪਣੇ ਤਜਰਬੇ, ਆਪਣੀਆਂ ਸੋਚਾਂ ਅਤੇ ਆਪਣੀਆਂ ਹੱਦਾਂ ਦੇ ਆਧਾਰ 'ਤੇ ਤੌਲਦੇ ਹਨ। ਪਰ ਅਸਲੀ ਇਨਸਾਨ ਉਹ ਹੁੰਦਾ ਹੈ ਜੋ ਆਪਣੀ ਕੀਮਤ ਦਾ ਅੰਦਾਜ਼ਾ ਖ਼ੁਦ ਲਗਾਉਂਦਾ ਹੈ, ਨਾ ਕਿ ਹੋਰਾਂ ਦੀ ਜ਼ੁਬਾਨ ਤੋਂ ਸੁਣ ਕੇ। ਆਪਣੇ ਮਨ ਦੇ ਅੰਦਰ ਡੂੰਘਾਈ ਵਿੱਚ ਝਾਤੀ ਮਾਰਨਾ ਇਕ ਕਲਾ ਹੈ — ਇਕ ਐਸੀ ਕਲਾ ਜੋ ਸਾਨੂੰ ਸਾਡੀਆਂ ਕਮਜ਼ੋਰੀਆਂ ਵੀ ਦਿਖਾਉਂਦੀ ਹੈ ਅਤੇ ਸਾਡੀ ਤਾਕਤ ਵੀ। ਜਦ ਅਸੀਂ ਆਪਣੇ ਅੰਦਰ ਦੀਆਂ ਗਲਤੀਆਂ ਨੂੰ ਮੰਨਣ ਦੀ ਹਿੰਮਤ ਕਰ ਲੈਂਦੇ ਹਾਂ ਅਤੇ ਆਪਣੇ ਗੁਣਾਂ ਨੂੰ ਪਛਾਣ ਲੈਂਦੇ ਹਾਂ, ਤਦ ਅਸੀਂ ਉਹ ਇਨਸਾਨ ਬਣ ਜਾਂਦੇ ਹਾਂ ਜੋ ਕਿਸੇ ਦੀ ਰਾਇ ਨਾਲ ਨਹੀਂ, ਸਗੋਂ ਆਪਣੇ ਸੱਚ ਨਾਲ ਜੀਉਂਦੇ ਹਾਂ, ਸੰਸਾਰ ਦਾ ਸ਼ੋਰ ਕਦੇ ਖ਼ਤਮ ਨਹੀਂ ਹੋਵੇਗਾ। ਲੋਕ ਹਮੇਸ਼ਾਂ ਕੁਝ ਨਾ ਕੁਝ ਕਹਿੰਦੇ ਰਹਿਣਗੇ। ਪਰ ਜੇ ਤੁਸੀਂ ਆਪਣੇ ਆਪ ਨਾਲ ਜਾਣ-ਪਛਾਣ ਕਰ ਲਈ, ਤਾਂ ਫਿਰ ਕਿਸੇ ਦੀ ਆਵਾਜ਼ ਤੈਨੂੰ ਹਿਲਾ ਨਹੀਂ ਸਕੇਗੀ। ਆਪਣੀ ਪਹਚਾਣ ਦਾ ਫ਼ੈਸਲਾ ਤੂੰ ਖ਼ੁਦ ਕਰ — ਕਿਉਂਕਿ ਜੋ ਆਪਣੇ ਆਪ ਨੂੰ ਜਾਣ ਲੈਂਦਾ ਹੈ, ਉਹੀ ਸਾਰੀ ਦੁਨੀਆ ਨੂੰ ਸਮਝ ਲੈਂਦਾ ਹੈ। ਲਿਖਤ:ਗੁਰਦੀਪ ਸਿੰਘ ਲਵਲੀ ਖੱਟਰਾਂ