സീതാദേവി കുട്ടിയായിരിക്കുമ്പോൾ ഒരു ദിവസം പൂന്തോട്ടത്തിൽ കളിക്കുകയായിരുന്നു. പൂന്തോട്ടത്തിലെ ഒരു മരത്തിലിരുന്ന് ഒരാൺ തത്തയും ഒരു പെൺ തത്തയും രാമൻ്റെ ഗുണഗണങ്ങളെപ്പറ്റിയും, സീതയും രാമനും ഒരുമിച്ചു വാഴുമെന്നുമൊക്കെ പറഞ്ഞു കൊണ്ടിരുന്നു. ഇപ്രകാരം സല്ലപിക്കുന്ന ശുകങ്ങൾ ദിവ്യരായിരിക്കുമെന്ന് മൈഥിലിക്ക് തോന്നി. അവ തന്നെപ്പറ്റിയാണല്ലൊ സംസാരിക്കുന്നത്. അതിനെപ്പറ്റി കൂടുതൽ അറിയണം. അവൾ ഒരു തോഴിയെ വിളിച്ച് തന്ത്രത്തിൽ അവയെ പിടിച്ചു കൊണ്ടുവരാൻ പറഞ്ഞു. ആ തോഴി ആ രണ്ട് തത്തകളെയും പിടിച്ച് സീതക്ക് കൊണ്ടുവന്നു കൊടുത്തു. ഭയപ്പെട്ട് പല തരം ശബ്ദങ്ങൾ പുറപ്പെടുവിച്ചിരുന്ന തത്തകളെ സമാധാനിപ്പിച്ച് സീത പറഞ്ഞു. ഭയപ്പെടേണ്ട. നിങ്ങൾ ആരാണ്? എവിടെ നിന്നു വരുന്നു? ഈ രാമൻ ആരാണ്? സീത ആരാണ്? അവരെപ്പററി നിങ്ങൾക്ക് എങ്ങനെ അറിവ് കിട്ടി? ഇതെല്ലാം പറയുവിൻ. ഞാൻ നിങ്ങളെ ഉപദ്രവിക്കുകയില്ല. പക്ഷികൾ പറഞ്ഞു തുടങ്ങി. ധർമ്മജ്ഞനായ വാൽമീകി മഹർഷിയുടെ മനോഹരമായ ആശ്രമത്തിലാണ് ഞങ്ങൾ താമസിക്കുന്നത്. ആ താപസൻ വരാൻ പോകുന്ന രാമായണം രാമനെ സദാ സ്മരിച്ചു കൊണ്ട് ശിഷ്യരെ പഠിപ്പിക്കുന്നു. അത് കേട്ട് കേട്ട് ഞങ്ങളും പഠിച്ചു. രാമൻ ആരെന്നും ജാനകി ആരെന്നും ഞങ്ങൾ പറയാം. ഋഷ്യശൃംഗൻ നടത്തുന്ന യാഗത്തിൽ നിന്ന് നാല് ശരീരങ്ങളായി വിഷ്ണു അവതാരമെടുക്കും. വിശ്വാമിത്രനോടൊപ്പം മിഥിലയിലെത്തി രാമൻ വിദേഹജയെ വിവാഹം കഴിച്ച് മഹാരാജ്യം ഭരിക്കും. പക്ഷികളുടെ മധുരകഥനം കേട്ട സീത സന്തോഷത്തോടെ വീണ്ടും ചോദിച്ചു. രാമൻ ആരുടെ മകനാകും? എവിടെ വാഴും? അവളെ എങ്ങനെ വേൾക്കും? രാമൻ്റെ വാക്കു കേട്ടപ്പോൾ മോഹിതയായ സീതയെക്കണ്ട് ഇത് ജാനകി തന്നെ എന്നുറപ്പിച്ച തത്ത തുടർന്നു പറഞ്ഞു. ദശരഥ മഹാരാജാവിന് മൂന്ന് ഭാര്യമാരിൽ നാല് മക്കൾ. ജ്യേഷ്ഠൻ രാമൻ, രണ്ടാമൻ ഭരതൻ, മുന്നാമൻ ലക്ഷ്മണൻ, നാലാമൻ ശത്രുഘ്നൻ. രാമൻ്റെ രുപം കണ്ട് മയങ്ങുന്ന സീത പതിനായിരം കൊല്ലം രാമനുമൊത്ത് രമിച്ചു വാഴും. ഇതുകേട്ട ജാനകി തത്തകളോട് പറഞ്ഞു. നിങ്ങൾ പറഞ്ഞ ജനകപുത്രിയായ സീത തന്നെയാണ് ഞാൻ. രാമൻ വന്ന് എന്നെ എന്ന് വേൾക്കുന്നുവോ അന്നേ ഞാൻ നിങ്ങളെ വിട്ടയക്കൂ. നിങ്ങൾക്ക് എൻ്റെ ഗൃഹത്തിൽ മധുര പലഹാരങ്ങൾ കഴിച്ച് സുഖമായി കഴിയാം. ഭയന്ന പക്ഷികൾ മുഖത്തോടു മുഖം നോക്കി. അവർ സീതയോട് പറഞ്ഞു. സാധ്വി, ഞങ്ങൾ പക്ഷികൾ കാട്ടിലും മരത്തിലും പറന്നു നടക്കുന്നവരാണ്. ഗൃഹത്തിൽ അടച്ചിട്ടാൽ ഞങ്ങൾ സുഖമുണ്ടാവുകയില്ല. മാത്രമല്ല, എനിക്ക് ഗർഭമുണ്ട്. ഞാൻ സ്വസ്ഥാനത്ത് പോയി പ്രസവിച്ചതിനു ശേഷം ഇവിടെ വരാം. സംശയിക്കേണ്ട. പെൺതത്ത ഇങ്ങനെ വാഗ്ദാനം ചെയ്തിട്ടും സീത വിട്ടയിച്ചില്ല. അപ്പോൾ ആൺ തത്ത താഴ്മയോടെ അപേക്ഷിച്ചു. ഞങ്ങളെ പോകാൻ അനുവദിക്കുക. എൻ്റെ ഭാര്യയെ പിടിച്ചു വക്കുന്നതെന്തിനാണ്? ഞങ്ങൾ കാട്ടിൽ സ്വച്ഛന്ദം സഞ്ചരിച്ചുകൊള്ളട്ടെ. ഇവളുടെ പ്രസവത്തിന് ശേഷം ഞങ്ങൾ ഇവിടെ വരാം. ഭവാൻ പൊയ്ക്കൊള്ളുക. ഇവൾ ഇവിടെ നിൽക്കട്ടെ. സീത ആൺ പക്ഷിയോട് പറഞ്ഞു. ദു:ഖിതയായ പെൺ തത്തയോട് ആൺ തത്ത പറഞ്ഞു. നമ്മൾ ശബ്ദിക്കാതിരുന്നുവെങ്കിൽ ഈ ബന്ധനം ഭവിക്കില്ലായിരുന്നു. മൌനമാണ് നല്ലത്. ഇത്രയുമായപ്പോൾ പെൺ തത്ത സീതയെ ശപിച്ചു. എന്നെ ഭർത്താവിൽ നിന്നും വേർപെടുത്തുകയാണല്ലൊ നീ ചെയ്യുന്നത്. അതിനാൽ നീയും ഗർഭമുള്ളപ്പോൾ രാമനോട് വേർപിരിയുക. ഇത്രയും പറഞ്ഞ് രാമനെ സ്മരിച്ച് അവൾ പ്രാണൻ ത്യജിച്ചു. ആ പെൺപക്ഷി തൽക്ഷണം വന്നു ചേർന്ന വിമാനത്തിൽ സ്വർഗ്ഗത്തിലേക്ക് ഗമിച്ചു. ആൺ തത്ത തൻ്റെ ഇണയുടെ മരണം കണ്ട് ദു:ഖം സഹിക്കാതെ ഗംഗയിൽ മുങ്ങി. ഞാൻ രാമൻ്റെ നഗരത്തിൽ ജനിക്കണം. ഈ സീത എൻ്റെ വാക്കുമൂലം വിരഹിതയായി വലയുമാറാകണം. എന്നിങ്ങനെ ക്രോധത്തോടെ ഉച്ചരിച്ച് അത് ഗംഗയിൽ മുങ്ങിച്ചത്തു. ക്രോധം, ദു:ഖം, ജാനകീ വിദ്വേഷം എന്നിവ നിമിത്തം ആൺതത്ത അയോദ്ധ്യയിൽ രജകനായി ജനിച്ചു !!!! #🙏ശ്രീരാമ കഥകൾ #📖 രാമായണം #📖 രാമായണമാസം 🙏🏻 #🏹 രാമായണമാസ സ്റ്റാറ്റസുകൾ 😇 #🙏ജയ് ശ്രീരാം🚩