#📙 നോവൽ #📔 കഥ #💞 പ്രണയകഥകൾ MY DOCTOR❤️13 ''ചാടാനോ ....?"അഞ്ജു ഞെട്ടലോടെ ചോദിച്ചു . "ആ ഡോ .....തന്റെ റൂം എവിടന്നുവച്ച അതിനറ്റത്തേക്ക് വാ ......ഞാൻ ഈ റോഡിലുണ്ട്." സിറി പറഞ്ഞു. " ഓർത്തിട്ട് തന്നെ എനിക്ക് പേടിയാകുന്നു .." "താൽക്കാലത്തിന് ഓർക്കാതെ വാ ,ഞാൻ മതില് ചാടാം എന്നിട്ട് ഹെല്പ് ചെയ്യാം" എല്ലാം കൂടെ കേട്ടിട്ട് അഞ്ജുവിനു തലചുറ്റുന്ന പോലെ തോന്നി. എങ്കിലും ഇതിലൊക്കെ ഒരു ത്രില്ല് ഇല്ലേ.....എന്ന തോന്നൽ ഉള്ളിൽ ശക്തമാകുന്നുണ്ടായിരുന്നു. "ഞാൻ ഒന്ന് പല്ലുതേക്കട്ടെ ഒരു 5 മിനിറ്റു ." അഞ്ചു ഫോൺ കട്ട് ചെയ്ത് ബാത്‌റൂമിൽ കയറി വേഗം ഫ്രഷ് ആയി ഇറങ്ങി. മഞ്ഞയിൽ വെള്ള പൂക്കൾ വരുന്നൊരു ഷോർട് ടോപ്പും , ബ്ലാക്ക് ജീൻസും ധരിച്ചു . ടോപ്പിന് മുകളിലെയൊരു ബ്ലാക്ക് hoodie എടുത്തിട്ടവൾ. മുടി മുഴുവനായും മുകളിലേക്ക് ബൺ ചെയ്ത് വച്ചു. ഒരു വൈറ്റ് ഷൂ ധരിച്ചു .ഹൂഡിയുടെ ക്യാപ് എടുത്ത് തലയിലിട്ടവൾ ഫോൺ എടുത്ത് പോക്കറ്റിലേക്കിട്ട് റൂം തുറന്ന് പുറത്തിറങ്ങി. റൂം ലോക്ക് ചെയ്ത് കീ പോക്കറ്റിലിട്ടു . "കൃഷ്ണാ....... തരികിട ആണെന്നറിയാം ,എന്നാലും കാത്തോണേ........" നെഞ്ചിൽ കൈ വച്ച് പറഞ്ഞു വരാന്തക്കറ്റത്തേക്ക് നടന്നു.റോഡിലായി സിറി ബൈക്കിൽ ഇങ്ങോട്ടു നോക്കിയിരിക്കുന്നത് കണ്ടു .അവൻ അവളെ കണ്ടതും കൈ വീശി കാണിച്ചു.അവൾ തിരിച്ചും.ബൈക്കിൽ നിന്നിറങ്ങി സിറി മതിലിനടുത്തേക്ക് വരുന്നതും അനായാസം മതിൽ ചാടി കടക്കുന്നതും അത്ഭുതത്തോടെ നോക്കി നിന്നു അഞ്ജു . അഞ്ജുവിന്റെ റൂം ഫസ്റ്റ് ഫ്ലോറിൽ തന്നെ ആയിരുന്നു.സിറി ഭിത്തിയിലായുള്ള വലിയ പൈപ്പിലൂടെ അനായാസം വലിഞ്ഞു കയറി. കയറി നേരെ അവൾ നിന്നിടത്തേക്ക് ചാടി. അവൻ ചാടിയത് പക്ഷെ..... അവൻ ചെയ്യുന്നതും നോക്കി അന്തം വിട്ട് നിൽക്കുന്ന അഞ്ജുവിന്റെ മേലേക്കായിരുന്നു. രണ്ടുപേരും നിലത്തേക്ക് മറിഞ്ഞു വീണു. സിറി അഞ്ജുവിന് മുകളിലായിട്ടായിരുന്നു വീണത് . "അമ്മേ........."അഞ്ചു വേദനകൊണ്ട് അറിയാതെ നിലവിളിച്ചു പോയി. "ശ്....മിണ്ടല്ലേ...." ഇതും പറഞ്ഞു അഞ്ജുവിന്റെ വായ വലതു കൈ കൊണ്ട് പൊത്തിപിടിച്ചവൻ . എന്നിട്ട് , ആരും വരുന്നില്ലല്ലോ എന്ന് വരാന്തയിലേക്ക്  നോക്കി. തിരിച്ചവളെ നോക്കിയതും പകപ്പോടെ ഉറ്റു നോക്കുന്ന കണ്ണുകളിൽ കുരുങ്ങി സിറി ഒരു നിമിഷം ശില പോലെ നിന്നു . അവളുടെ കൃഷ്ണമണി പിടക്കുന്നത് കണ്ടതും പെട്ടന്ന് നോട്ടം തിരിചു സിരി അപ്പുറത്തേക്ക് ഉരുണ്ടു നീങ്ങി , അവിടുന്ന് എണീറ്റ് നിന്നു. അഞ്ചു ആഞ്ഞു ശ്വാസം വലിച്ചു. "വാ എണീക്ക് ...." അവൾക്ക് നേരെ കൈ നീട്ടി സിറി പറഞ്ഞു. സിറിയുടെ കൈ പിടിച്ചു അഞ്ചു എണീറ്റു " പ്രായം 18 ഉള്ളെങ്കിലും ഹിപ്പോപൊട്ടാമസിന്റെ തൂക്കം കൊണ്ട് വന്നിരിക്കാ .. പന്നി..." വേദന കൊണ്ട് ഇടുപ്പിൽ കൈവെച്ചു ഒന്ന് വളഞ്ഞു കൊണ്ട് അഞ്ചു അവനെ കൂർപ്പിച്ചു നോക്കി . "സോറി ..." സിറി നീട്ടി ഇളിച്ചു  . ഒരു തരി ആത്മാർത്ഥ ആ സോറിയിൽ ഇല്ലെന്ന് കേൾക്കുന്ന ഏത് പൊട്ടനും മനസിലാവും . " നിന്നെയൊക്കെ ......." എന്നും പറഞ്ഞു, അഞ്ചു നിവർന്നു നിന്നു . "വേഗം വായോ ....സമയത്തിന് എത്തിയില്ലെങ്കിൽ സൺ ഒക്കെ അതിന്റെ പാട്ടിന് പോകും ." അതും പറഞ്ഞു സിറി അവളുടെ കൈ പിടിച്ചു . സിറിയുടെ സഹായത്തോടെ അഞ്ചു എങ്ങനൊക്കെയോ പൈപ്പ് വഴി താഴേക്കിറങ്ങി.  ജീവിതത്തിൽ ആദ്യമായി ചെയ്യുന്ന അങ്കലാപ്പോടെ അഞ്ചു ഇറങ്ങിയപ്പോൾ ,ഇതൊക്കെ എന്ത് എന്നപോലെ ആയിരുന്നു സിറി. രണ്ടു പേരും താഴെ ഇറങ്ങി. "ഇത് സ്ഥിരം പരിപാടി ആണല്ലേ " സംശയത്തോടെ അവനെ നോക്കി അഞ്ചു ചോദിച്ചു. " അതേ..... എനിക്ക് ഡെയ്‌ലി 3 നേരം ഇതാണല്ലോ പണി " സിറിക്ക് പുച്ഛം അവനെ നോക്കി പല്ലിളിച്ചു കാണിച്ചു അഞ്ചു മതിലിനടുത്തേക്ക്  നടന്നു. സിറിയും കുഞ്ഞൊരു പുഞ്ചിരിയോടെ അവൾക്കൊപ്പം നടന്നു. "ഞാൻ കുനിഞ്ഞു നിൽക്കാം എന്റെ പുറത്തു ചവിട്ടി മതിലിൽ കയറി അപ്പുറത്തേക്ക് ചാടിക്കോ..." ഇതും പറഞ്ഞവൻ മതിലിനടുത്തായി കുനിഞ്ഞു നിന്നു. അഞ്ചു സിറിയുടെ പുറത്തു ചവിട്ടി കയറി "കർത്താവേ....." അവൻ പതിഞ്ഞ സ്വരത്തിൽ വിളിച്ചുപോയി . ഷൂ ഇട്ടു അഞ്ചു ചവിട്ടി കയറിയതും സിറിക്ക് നല്ല വേദന എടുക്കുന്നുണ്ടായിരുന്നു. അഞ്ചു മതിലിലേക്ക് വലിഞ്ഞു കയറി അപ്പുറത്തേക്ക് ചാടി. അവൾ ചാടിയതും സിറിയും മതിലിൽ കയറി ചാടി. "കണ്ടാൽ ഒരു ലുക്ക് ഇല്ലെന്നേ ഉള്ളു ... ഒടുക്കത്തെ weight ആണല്ലേ." അഞ്ജുവിനെ നോക്കി സിറി ദയനീയമായി ചോദിച്ചു. "എന്തായലും നിന്റെ അത്ര ഇല്ല,ഞാൻ ചത്ത് പോവാഞ്ഞത് വല്യ ഭാഗ്യം . ലോറിക്കടിയിൽ പെട്ട തവളയെ പോലെയല്ലേ ഞാൻ കിടന്നത് ......" അഞ്ചു ചുണ്ടൊരു വശത്തേക്ക് കോട്ടി പറഞ്ഞു. "പുള്ളിനത്ത് " അവളെ നോക്കി സിറി പറഞ്ഞു. "എന്താ?" "ഒന്നൂല്ല .... വണ്ടിയിലോട്ട് കയറ് ഒരുപാട് ദൂരം പോകാനുള്ളതാ ...."അതും പറഞ്ഞവൻ ബൈക്കിനടുത്തേക്ക് നടന്നു.സിറി ഹൂഡിയുടെ ക്യാപ് എടുത്ത് തലയിലിട്ട് ഹെൽമെറ്റ് എടുത്ത് വെച്ചു.അവൾക്കും ഒരു ഹെൽമെറ്റ് കൊടുത്തവൻ ബൈക്കിലേക്ക് കയറി . ഹെൽമെറ്റ് എടുത്ത് വച്ച് അഞ്ജുവും കയറി. ഇരുട്ടിനെ കീറിമുറിച്ചവരുടെ ബൈക്ക് ലക്ഷ്യത്തിലേക്ക് കുതിച്ചു.. ********************************** കടലിൽ നിന്നും സൂര്യൻ ഉദിച്ചു വരുന്നതേ ഉണ്ടായിരുന്നുള്ളു. അഞ്ജു ഹൂഡി ഊരി ബൈക്കിൽ വച്ചു. രണ്ടു പേരും  നടന്ന് അവിടൊരു പാറക്കല്ലിൽ പോയിരുന്നു . അവിടം മുഴുവനും ആളുകളെ കൊണ്ട് നിറഞ്ഞിരുന്നു. കൂടുതലും തമിഴ് നാട്ടുകാരാണ് . അഞ്ജുവിന് വല്ലാത്ത സന്തോഷം തോന്നി . പുതിയ മനുഷ്യർ ,പുതിയ അനുഭവങ്ങൾ ... എല്ലാം പുതിയത് .   ഉദയ സൂര്യനിലേക്കുറ്റു നോക്കുന്ന അഞ്ജുവിനെ കൗതുകത്തോടെ സിറി നോക്കിയിരുന്നു .  ആ വിടർന്ന കണ്ണുകളിൽ സൂര്യോദയം മനോഹരമായി പ്രതിഫലിച്ചു .  അവളുടെ മുഖം മുഴുവൻ ഓറഞ്ചു കളറിൽ തിളങ്ങി നിൽക്കുന്നുണ്ടായിരുന്നു.  "goddess beauty " സിറി മനസ്സിലോർത്തു . സൂര്യൻ മുഴുവനായും ഉദിച്ചുയർന്നു. അഞ്ചു മൊബൈൽ എടുത്ത് അതിന്റെയൊരു ഫോട്ടോ എടുത്തു .  "thankyou " അഞ്ചു കടലിൽ നിന്നും കണ്ണെടുക്കാതെ പറഞ്ഞു . "എന്തിന് ?" സിറി അത്ഭുതത്തോടെ അവളെ നോക്കി  " ഇങ്ങനൊരു ദിവസം എനിക്ക് സമ്മാനിച്ചതിന് ...... ഒരിക്കലും മറവിക്ക് വിട്ടുകൊടുക്കാതെ എന്റെ നല്ല ഓര്മകള്ക്കിടയിൽ ഈ ദിവസം ഞാൻ സൂക്ഷിച്ചു വക്കും " "പുസ്തകങ്ങൾ വായിക്കാറുണ്ടോ ?" അവളുടെ വാക്കുകളുടെ ഭംഗിയിൽ സിറി ചോദിച്ചു . "മ്മ്................" "തോന്നി " അവൻ പുഞ്ചിരിച്ചു. ഇരുവർക്കിടയിലും കരണമില്ലാത്തൊരു നിശബ്ദത തളം കെട്ടി നിന്നു . " പ്രണയിചിട്ടുണ്ടോ ?" സിറി അവളെ ചെരിഞ്ഞു നോക്കികൊണ്ട്‌ ചോദിച്ചു. മുന്നിലുള്ള കാഴ്ചകളിൽ നിന്നും കണ്ണ് പിൻവലിച്ചു അഞ്ചു അവനെ നോക്കി .... ഒന്ന് പുഞ്ചിരിച്ചു. "പ്രണയിച്ചിട്ടുണ്ട്.......പ്രണയിക്കപ്പെട്ടിട്ടുണ്ട്.............വിരഹത്തിന്റെ തീ കൊണ്ട് ഹൃദയം പൊള്ളിയടർന്നിട്ടുണ്ട് ....... " മിഴിച്ചു നോക്കുകയായിരുന്നവൻ . അഞ്ചു ആദർശിനെ കുറിച്ച് പറഞ്ഞു ,അവരുടെ പ്രണയത്തെ കുറിച്ച് പറഞ്ഞു , നഷ്ട്ടപെടലിനെ കുറിച്ചും പറഞ്ഞു. " അന്നൊരു ഞായറാഴ്ച ആയിരുന്നു . എന്നും രാവിലെ 6 മണിക്ക് മുന്നേ വിളിച്ചെണീപ്പിക്കുന്ന അമ്മ 7 മണി കഴിഞ്ഞിട്ടും വിളിച്ചില്ലല്ലോ എന്നോർത്താണ് ഞാൻ അന്ന് എണീറ്റത്. ഉമ്മറത്തേക്ക് നോക്കിയപ്പോൾ ലയ അമ്മായിയും അയൽപക്കത്തുള്ള 3 ചേച്ചിമാരും സാരിയൊക്കെ ഉടുത്തു മുറ്റത്തു നിൽപ്പുണ്ട് .വേഗത്തിൽ സാരി ഉടുക്കുന്ന അമ്മയോട് എവിടെ പോകുകയാണെന്ന് ചോദിക്കുമ്പോഴും അമ്മ തരാൻ പോകുന്ന ഉത്തരത്തിന് എന്റെ പ്രാണന്റെ വില ഉണ്ടാകുമെന്ന് എനിക്ക് അറിയില്ലായിരുന്നു  ' ഞാൻ നമ്മുടെ കൃഷ്ണ ക്ഷേത്രത്തിനടുത്തുള്ള മരിച്ചുപോയ വേണുവില്ലേ ........ ആ അവിടെ വരെ പോകുകയാണ് . നിന്റെ കൂടെ പഠിച്ച ആ പയ്യനില്ലേ ..... അവന്റെ മോൻ . ആ പയ്യനെ ഇന്നലെ വൈകീട്ട് മുതൽ കാണാനില്ലായിരുന്നു. ഇന്ന് രാവിലെ കുളിക്കാൻ പോയ പെണ്ണുങ്ങൾ പുഴവക്കത് മരിച്ചു കിടക്കുന്നത് കണ്ടത്രേ ..... അജു അറിഞ്ഞ ഉടനെ പോയിട്ടുണ്ട് .  പോസ്റ്റ്മോർട്ടം കഴിഞ് 8 മണിക്ക് കൊണ്ടുവരും . കുളിച്ചിട്ട് നീയും അങ്ങ് പോരെ. പാവം ആ ശ്രീജക്കും മോൾക്കും ഇനി ആരുണ്ട്  എന്റെ കൃഷ്ണ.......'  ഇതും പറഞ്ഞു 'അമ്മ അവരുടെ കൂടെ പോയി . കേട്ടതൊക്കെയും എന്റെ തോന്നലാണോ എന്ന് പോലും ഓർത്തു പോയി ഞാൻ. തലേന്നു പോലും കണ്ടതല്ലേ ഞാൻ അവനെ.  ഞാനൊരു ഭ്രാന്തിയെ പോലെ അലറി കരഞ്ഞു. അവന്റെ ജീവനറ്റ ശരീരത്തിൽ പിടിച്ചു ആർത്തു കരഞ്ഞു. ആരൊക്കെയോ ചേർന്ന് എന്നെ പിടിച്ചു വലിച്ചു ഒരു റൂമിലാക്കി .  ഇന്നും പേടിയാണ് സിറി എനിക്ക് ആ അഞ്ജുവിനെ ഓർക്കാൻ .ഒരുവന്റെ വിയോഗത്തിൽ തകർന്നു പോയൊരു അഞ്ചു ...... അവന്റെ ഓർമകളാണ് ഇവിടെ  കോളേജിൽ എന്നെ എത്തിച്ചത് പോലും . അവൻ പഠിച്ചിടത്തേക്കു മനപൂര്വ്വം വന്നതാണ് ഞാൻ "   നിറ കണ്ണുകളോടെ അവൾ പറയുന്നത് ശ്വാസം അടക്കിപിടിച്ചവൻ കേട്ടു .  എങ്ങനെ ആയിരിക്കും ആ കൊച്ചു പെൺകുട്ടി അതൊക്കെ അതിജീവിച്ചിട്ടുണ്ടാകുക എന്നോർക്കേ അവനു വല്ലാത്ത വേദന തോന്നി. ഇനി ഒരിക്കലും നിന്നെ കരയാൻ ഞാൻ അനുവദിക്കില്ല എന്ന് പറഞ്ഞു അഞ്ജുവിനെ ചേർത്തു പിടിക്കാൻ അവന്റെ മനസ് വെമ്പൽ കൊണ്ടു . "4 വർഷമായി .... എല്ലാ റിയാലിറ്റിയും ഞാൻ ഇപ്പോൾ ഉൾക്കൊണ്ട് കഴിഞ്ഞു . " പുഞ്ചിരിയോടവൾ പറഞ്ഞു നിർത്തി. "ഇനി പ്രണയിക്കുമോ ? " സിറി ചോദിച്ചു . അഞ്ചു ഒരു നിമിഷം ഏഥനെ ഓർത്തു .... ഒന്ന് ചിരിച്ചു . "ഞാൻ എൻഗേജ്ഡ് ആണ് "  "what " സിറി അഞ്ജുവിനെ ഞെട്ടി നോക്കി  ''ഈ ലോകത്തിൽ ഞാൻ ഏറ്റവും വെറുക്കുന്ന ഒരാളുമായി എന്റെ കല്യാണം ഉറപ്പിച്ചതാണ് . " അഞ്ചു കടലിലേക്ക് തന്നെ നോട്ടം തിരിച്ചു . "ആരുടെ കൂടെ ?" " my cousin............ mahesh " അഞ്ജു മഹേഷിനെ കുറിച്ചുള്ള കാര്യങ്ങൾ ഒക്കെ സിറിയോട് പറഞ്ഞു . സിറിയുടെ കണ്ണുകളിൽ ആകാംഷ വെറുപ്പിന് വഴി മാറി. മഹേഷിനോളം തന്നെ അവളുടെ വീട്ടുകാരോടും അവനു വെറുപ്പ് തോന്നി. "ആ പ്രൊപോസിംഗ് വീഡിയോ കണ്ടു എന്നെ വിളിച്ചിരുന്നു .... കരുതിയിരുന്നോ , ഉറപ്പായും അയാൾ നിന്നെ തേടി വരും ?" അഞ്ചു പറഞ്ഞു. "വരട്ടെ...... അയാൾ എന്നെ തേടി വന്നില്ലെങ്കിൽ ഞാൻ അയാളെ തേടി പോയിരിക്കും ." അത്രയും വെറുപ്പോടെ സിറി പറഞ്ഞു . "നീ ആരാ ഗുണ്ടയാണോ ?" അഞ്ചു പുരികം ചുളിച്ചു . "അതേന്നേ ...... " സിറി ഒറ്റകണ്ണിറുക്കി കാണിച്ചു . "നന്നായി .....,  അല്ല.....നീ വീട്ടീന്ന് ഇറങ്ങിയപ്പോ വല്ല കല്ലും വിഴിങ്ങിയിരുന്നോ ?"   "അതെന്ത അങ്ങനെ ചോദിച്ചേ " അവളുടെ ചോദ്യം കേട്ട് കൺഫ്യൂഷനോടെ സിറി ചോദിച്ചു . " വിശക്കില്ലേ നിനക്കൊന്നും ...........? "  "അതാണോ .... എന്നാ വായോ നല്ല ദോശേം സാമ്പാറും കിട്ടും തമിഴ്‌നാട് സ്പെഷ്യൽ ...." സിറി എണീറ്റു . അഞ്ജുവും എണീറ്റവനൊപ്പം നടന്നു.  രണ്ടുപേരും ഭക്ഷണം കഴിക്കാൻ ഒരുമിച്ച് നടന്നു പോയി. തുടരും........ എന്നും അഭിപ്രായം പറയാൻ പറഞ്ഞാലേ പറയുള്ളോ 🥹