#🏞️లైఫ్ is బ్యూటీఫుల్
నీ కౌగిలిలో తల దాచి నీ చేతులలో కను మూసి
జన్మ జన్మకు జతగా మసలే వరమే నన్ను పొందనీ
........................................
జంతువులు పక్షులు చేపలు కౌగిలించుకుంటాయా ?
కౌగిలింత అనగానే మనకు ప్రేమ ఆప్యాయత ఓదార్పు గుర్తుకు వస్తాయి. అయితే ఈ తరహా శారీరక సాన్నిహిత్యం మనుషులకే పరిమితం కాదు. జంతువులు, పక్షులు కొన్ని చేపలు కూడా ఒకదానికొకటి దగ్గరగా చేరడం తాకడం హత్తుకున్నట్లుగా ప్రవర్తించడం కనిపిస్తుంది. అయితే వాటి వెనుక ఉన్న ఉద్దేశాలు మనుషుల భావోద్వేగ కౌగిలింతలతో పూర్తిగా సమానం కావు.
చింపాంజీలు బోనోబోలు కోతులు వంటి ప్రైమేట్లు భయపడినప్పుడు, ఒత్తిడికి గురైనప్పుడు లేదా గొడవల తర్వాత రాజీపడే సందర్భాల్లో ఒకదాన్నొకటి గట్టిగా హత్తుకుంటాయి. శాస్త్రవేత్తలు దీనిని ఎంబ్రేస్ గా వర్ణిస్తారు. ఇది పరస్పర విశ్వాసాన్ని పెంపొందించడానికీ, ఓదార్పు కలిగించడానికీ ఉపయోగపడుతుంది. తల్లికోతి తన పిల్లను గుండెలకు హత్తుకుని సంరక్షించడం కూడా ఇదే అనుబంధానికి ఉదాహరణ.
ఏనుగులు తమ తొండాలను ఒకదానికొకటి చుట్టుకోవడం ద్వారా ఆప్యాయతను వ్యక్తం చేస్తాయి. గాయపడిన లేదా ఆందోళనలో ఉన్న ఏనుగును మిగిలినవి తొండంతో తాకుతూ, దగ్గరగా నిలబడి ఓదార్చే ప్రయత్నం చేస్తాయి. ఇది జంతు ప్రపంచంలో అత్యంత హృద్యమైన సామాజిక ప్రవర్తనల్లో ఒకటిగా భావిస్తారు.
కుక్కలు మనుషుల్లా కౌగిలించుకోవడం సాధారణం కాదు. చాలామంది కుక్కలు గట్టిగా హత్తుకోవడాన్ని అసౌకర్యంగా భావిస్తాయి. అయినప్పటికీ అవి ప్రేమను చూపించడానికి యజమాని ఒడిలో చేరడం శరీరాన్ని ఆనించడం, తలను మోపడం వంటి చర్యలు చేస్తాయి. పిల్లులు కూడా విశ్వసనీయమైన వ్యక్తుల పక్కన ఒదిగి పడుకోవడం కాళ్లకు చుట్టుకోవడం ద్వారా తమ అనుబంధాన్ని తెలియజేస్తాయి.
పక్షులకు చేతులు లేకపోవడంతో కౌగిలింత అనే భావన ప్రత్యక్షంగా కనిపించదు. కానీ చిలుకలు, లవ్బర్డ్లు, పెంగ్విన్లు వంటి జంట పక్షులు ఒకదానికొకటి దగ్గరగా చేరి ఒరుసుకోవడం మెడలు పెనవేసుకోవడం, ముక్కులతో ఈకలను సవరించుకోవడం చేస్తాయి. ఈ ప్రవర్తనను అల్లోప్రీనింగ్ అంటారు. ఇది పరస్పర నమ్మకం, బంధం మరియు జంట అనుబంధానికి సూచిక.
చేపలకు కౌగిలించుకునే అవయవాలు లేకపోయినా, స్పర్శ ఆధారిత ప్రవర్తనలు కనిపిస్తాయి.
కిస్సింగ్ గౌరామి చేపలు ఒకదానికొకటి నోళ్లు తగిలించుకోవడం చేస్తాయి. ఇది కొన్నిసార్లు ప్రేమ సంకేతం మరికొన్నిసార్లు ఆధిపత్య పోటీ.
క్లౌన్ ఫిష్ మరియు సిచ్లిడ్లు జంటలుగా ఈదుతూ శరీరాలను దగ్గరగా ఉంచుతాయి. సంతానోత్పత్తి సమయంలో వీటి మధ్య అత్యంత సన్నిహిత స్పర్శ కనిపిస్తుంది.
షార్క్లు మరియు స్టింగ్ రే చేపలు సంభోగ సమయంలో భాగస్వామిని అదిమిపట్టడం లేదా కొరకడం చేస్తాయి.
సీ హార్సులు తమ తోకలను ఒకదానికొకటి చుట్టుకుని ప్రత్యేకమైన నృత్యం చేస్తాయి. దీనిని సముద్ర ప్రపంచంలోని కౌగిలింతగా వర్ణిస్తారు.
ఈ చర్యల వెనుక ప్రధానంగా సామాజిక బంధం లైంగికబంధం లేదా ప్రాంత రక్షణ వంటి జీవశాస్త్రీయ కారణాలు ఉంటాయి.
సింహాలు ఎలుగుబంట్లు ఆటల సమయంలో ఒకదానిపై ఒకటి పడుతూ ఆడుకుంటాయి. సముద్రపు ఓటర్లు నీటిలో కొట్టుకుపోకుండా నిద్రపోతున్నప్పుడు ఒకదాని చేయిని మరొకటి పట్టుకుంటాయి. కంగారూలు, వాలబీలు తమ పిల్లలను పొట్టమీద సంచిలో ఉంచి రక్షిస్తాయి. ఇవన్నీ శారీరక సమీపత ద్వారా బంధాన్ని వ్యక్తపరిచే విధానాలే.
జంతువులు మనుషులను కౌగిలించుకుంటాయా?
మనుషులతో సుదీర్ఘంగా కలిసి పెరిగిన జంతువులు కొన్నిసార్లు కౌగిలించుకున్నట్లుగా ప్రవర్తిస్తాయి.
కుక్కలు యజమానిపైకి ఎగిరి నిలబడటం లేదా ఒడిలోకి చేరడం చేస్తాయి.
చింపాంజీలు, ఒరంగుటాన్లు తమకు ఇష్టమైన సంరక్షకులను హత్తుకోవడం గమనించబడింది.
గుర్రాలు నమ్మకమైన వ్యక్తి భుజంపై లేదా ఛాతీపై తల ఆనిస్తాయి.
ఆవులు తమకు మచ్చికైన మనుషుల వద్దకు చేరి ఒరుసుకోవడం, నాకడం చేస్తాయి.
మనుషుల కౌగిలింత ఎందుకు ప్రత్యేకమంటే !
మనుషుల కౌగిలింతలో ప్రేమ, అనురాగం భద్రత ఓదార్పు సానుభూతి వంటి సంక్లిష్ట భావోద్వేగాలు మిళితమై ఉంటాయి. జంతువులలో కనిపించే హత్తుకోవడం తరచుగా రక్షణ సామాజిక బంధం వెచ్చదనం రాజీ ఆట లేదా సంతానోత్పత్తికి సంబంధించినదిగా ఉంటుంది. అయినప్పటికీ ఒక విషయం మాత్రం స్పష్టం స్పర్శ ద్వారా అనుబంధాన్ని వ్యక్తపరచడం కేవలం మనుషులకే పరిమితం కాదు. ప్రకృతిలో ప్రతి జీవి తనదైన భాషలో ప్రేమను నమ్మకాన్ని సాన్నిహిత్యాన్ని వ్యక్తం చేస్తూనే ఉంటుంది .
🫂🫂🫂🫂🫂🫂🫂🫂🫂🫂🫂🫂🫂🫂🫂🫂
