കഥ നിഴലിലെ കൊലയാളി ************ ************* 2015 ലെ ആ ഓഗസ്റ്റ് മാസം പെയ്തൊഴിയാത്ത കനത്ത മഴയുടേതായിരുന്നു. 'നിഴലൂർ' എന്ന ശാന്തമായ ഗ്രാമം അപ്പോഴും ഉറക്കത്തിലേക്ക് വീണിരുന്നില്ല. പ്രകൃതി സൗന്ദര്യം തുളുമ്പുന്ന ആ നാട്ടിൻപുറത്തെ വലിയൊരു പുരയിടത്തിലായിരുന്നു 'മയൂഖം ' എന്ന ഇരുനില വീട് സ്ഥിതി ചെയ്തിരുന്നത്. വിദേശത്ത് എൻജിനീയറായ മാധവന്റെയും, ശാരദയുടെയും ചെന്നൈയിൽ പഠിക്കുന്ന മക്കളായ മാളവികയുടെയും അഭിജിത്തിന്റെയും സന്തുഷ്ടമായ ലോകം. അൻപത്തിയൊന്നുകാരിയായ ശാരദ മാധവൻ എന്ന വീട്ടമ്മയായിരുന്നു ആ വലിയ വീടിന്റെ ഏക ജീവൻ. മക്കളോടൊപ്പം ചെന്നൈയിലായിരുന്ന ശാരദ, നാട്ടിലൊരു അടുത്ത ബന്ധുവിന്റെ വിവാഹത്തിൽ പങ്കെടുക്കാനാണ് ഏതാനും ദിവസങ്ങൾക്ക് മുൻപ് തനിച്ചു നാട്ടിലെത്തിയത്. പകൽ സമയങ്ങളിൽ ബന്ധുവീടുകളിലും കല്യാണത്തിരക്കുകളിലും മുഴുകിയിരുന്ന അവർ രാത്രിയിൽ ആ വലിയ വീട്ടിൽ തികച്ചും ഒറ്റയ്ക്കായിരുന്നു. സംഭവം നടന്ന അന്ന് രാത്രി പത്തു മണി കഴിഞ്ഞിട്ടും ശാരദയുടെ ഫോൺ റിംഗ് ചെയ്തുകൊണ്ടേയിരുന്നു. വിദേശത്തുനിന്ന് ഭർത്താവ് മാധവനും ചെന്നൈയിൽ നിന്ന് മകൻ അഭിജിത്തും മാറിമാറി വിളിച്ചിട്ടും ഫോൺ എടുക്കുന്നില്ല. സമയം അർദ്ധരാത്രിയോടടുത്തു. മനസ്സിൽ ഭയം വിതറിയ ആ നിമിഷങ്ങളിൽ, അഭിജിത്ത് നാട്ടിലുള്ള തന്റെ സുഹൃത്തും അയൽവാസിയുമായ വിപിനെ ഫോണിൽ വിളിച്ചു. "വിപിൻ, അമ്മയെ വിളിച്ചിട്ട് കിട്ടുന്നില്ല, ഒന്നു വീട്ടിൽ പോയി നോക്കാമോ?" ഭയത്തോടെയുള്ള അഭിജിത്തിന്റെ വാക്കുകൾ കേട്ട് വിപിൻ ഉടൻ തന്നെ ആ വീട്ടിലേക്ക് തിരിച്ചു. രാത്രി പന്ത്രണ്ടരയോടെ വിപിൻ ആ വീടിന്റെ പടിവാതിൽക്കൽ എത്തുമ്പോൾ അന്തരീക്ഷത്തിൽ ഒരു നിഗൂഢമായ നിശബ്ദത പടർന്നിരുന്നു. ഗേറ്റ് തുറന്ന് ഉള്ളിലേക്ക് കയറിയ അവൻ കണ്ടത് വീടിന്റെ മുൻവാതിൽ പകുതി തുറന്നു കിടക്കുന്നതാണ്. പലതവണ വിളിച്ചിട്ടും കോളിംഗ് ബെൽ അടിച്ചിട്ടും അകത്തുനിന്ന് യാതൊരു അനക്കവുമുണ്ടായില്ല. വിറയ്ക്കുന്ന കൈകളോടെ വിപിൻ പൂമുഖത്തേക്ക് കയറി, വാതിൽ തള്ളി അകത്തേക്ക് പ്രവേശിച്ചു. കിടപ്പുമുറിയിലെ വെളിച്ചത്തിലേക്ക് നോക്കിയ അവൻ അക്ഷരാർത്ഥത്തിൽ മരവിച്ചുപോയി. രക്തത്തിൽ കുളിച്ചു കിടക്കുന്ന ശാരദയുടെ ചേതനയറ്റ ശരീരമായിരുന്നു അവിടെ. ഭയന്നുവിറച്ച വിപിൻ ഒച്ചവെച്ചുകൊണ്ട് പുറത്തേക്കോടി, നിമിഷങ്ങൾക്കകം അയൽക്കാരും പോലീസും ആ വീട്ടിലേക്ക് പാഞ്ഞെത്തി. നേരം പുലരുന്നതിന് മുൻപ് തന്നെ ജില്ലാ പോലീസ് മേധാവിയുടെ നേതൃത്വത്തിലുള്ള വൻ സംഘവും ഫോറൻസിക് വിദഗ്ധരും സ്ഥലത്തെത്തി. പ്രാഥമിക പരിശോധനയിൽ തന്നെ തലയ്ക്ക് പിന്നിൽ കനത്ത ഭാരമുള്ള ഏതോ വസ്തു കൊണ്ടുള്ള അടിയേറ്റതാണ് മരണകാരണമെന്ന് വ്യക്തമായി. മുറിക്കുള്ളിലെ അലമാരകൾ തുറന്നു കിടന്നിരുന്നു. ശാരദയുടെ കഴുത്തിലുണ്ടായിരുന്ന സ്വർണ്ണ മാലയും കയ്യിലെ വളകളും, നഷ്ടപ്പെട്ടിരുന്നു. എന്നാൽ വിചിത്രമെന്നു പറയട്ടെ, അവരുടെ കാതിലുണ്ടായിരുന്ന വിലപിടിപ്പുള്ള കമ്മലുകൾ കൊലയാളി തൊട്ടിട്ടുപോലുമില്ലായിരുന്നു. ഇതൊരു സാധാരണ മോഷണശ്രമമല്ലെന്നും, മോഷണമെന്ന് വരുത്തിത്തീർക്കാൻ മനപ്പൂർവ്വം ചെയ്തതാണെന്നും അന്വേഷണ ഉദ്യോഗസ്ഥനായ ഡി.വൈ.എസ്.പി. ആനന്ദ് ശങ്കറിന് മനസ്സിലായി. "ഈ കേസിൽ നമ്മൾ കാണുന്നതല്ല സത്യം. കൊലയാളിക്ക് ഈ വീടും ഇവിടുത്തെ ആളുകളെയും നന്നായി അറിയാം. നമുക്ക് ചുറ്റുമുള്ള ആരോ ഒരാളാണ് ഇതിന് പിന്നിൽ." - ഡി.വൈ.എസ്.പി. ആനന്ദ് ശങ്കർ തന്റെ സഹപ്രവർത്തകരോട് പറഞ്ഞു. തുടർന്ന് ഡോഗ് സ്ക്വാഡ് എത്തി പരിശോധന നടത്തി. എന്നാൽ പോലീസിനെ അത്ഭുതപ്പെടുത്തിക്കൊണ്ട് പോലീസ് നായ വീടിന്റെ മുറ്റത്തുനിന്ന് നേരെ ഗേറ്റ് വരെ ഓടി അവിടെ നിന്നു. അതിനർത്ഥം കൊലയാളി ഒരു വാഹനത്തിലാണ് അവിടെനിന്ന് രക്ഷപ്പെട്ടതെന്നാണ്. കൂടാതെ, ആ വീട്ടിൽ വളർത്തിയിരുന്ന നായ രാത്രിയിൽ കുരച്ചിരുന്നില്ല എന്നതും അയൽക്കാർ മൊഴി നൽകി. അപരിചിതരെ കണ്ടാൽ കുരച്ചുചാടുന്ന ആ പട്ടി അന്ന് രാത്രി ശാന്തനായിരുന്നുവെങ്കിൽ, കൊലയാളി ആ നായയ്ക്കും ശാരദയ്ക്കും അത്രമേൽ പരിചിതനായ ഒരാളായിരിക്കണം. ലോക്കൽ പോലീസിന്റെ അന്വേഷണം മാസങ്ങൾ പിന്നിട്ടിട്ടും വഴിമുട്ടിയതോടെ നാട്ടിൽ പ്രതിഷേധം ശക്തമായി. തുടർന്ന് കേസ് പ്രത്യേക ക്രൈംബ്രാഞ്ച് സംഘം ഏറ്റെടുത്തു. ക്രിമിനൽ അന്വേഷണങ്ങളിൽ വലിയ പരിചയസമ്പത്തുള്ള ഡി.വൈ.എസ്.പി. ആനന്ദ് ശങ്കറിന്റെ നേതൃത്വത്തിലുള്ള പുതിയ സംഘം ശാസ്ത്രീയ അന്വേഷണത്തിലേക്ക് തിരിഞ്ഞു. അവർ നാട്ടിൽ പലയിടങ്ങളിലായി 'ശാരദ കേസ്, information ബോക്സുകൾ' സ്ഥാപിച്ചു. രഹസ്യമായി വിവരങ്ങൾ നൽകാൻ നാട്ടുകാർക്ക് അവസരമൊരുക്കി. ഒപ്പം ആ പരിധിയിൽ വരുന്ന ലക്ഷക്കണക്കിന് ഫോൺ കോളുകളുടെ രേഖകൾ സൈബർ സെല്ലിന്റെ സഹായത്തോടെ അരിച്ചുപെറുക്കി. കൊലപാതകം നടന്ന ദിവസം ആതിര ഹൗസിന്റെ പരിസരത്ത് സജീവമായിരുന്ന ഫോൺ നമ്പറുകളുടെ പട്ടിക തയ്യാറാക്കി. അന്വേഷണം ഒടുവിൽ ചെന്നെത്തിയത് നിഴലൂർ ജംഗ്ഷനിൽ ഡിജിറ്റൽ സ്റ്റുഡിയോ നടത്തുന്ന പള്ളിപ്പാട് സ്വദേശിയായ വിനൂപ് ചന്ദ്രൻ എന്ന ഇരുപത്തിയേഴുകാരനിലാണ്. ശാരദയുടെ അയൽവാസിയായ രതീഷിന്റെ അടുത്ത സുഹൃത്തായിരുന്നു വിനൂപ്. നാട്ടുകാരെ ചോദ്യം ചെയ്ത കൂട്ടത്തിൽ വിനൂപിനെയും പോലീസ് രണ്ടുതവണ വിളിച്ചുവരുത്തിയിരുന്നു. എന്നാൽ വളരെ ശാന്തനായി പെരുമാറിയ അവൻ തനിക്ക് ഇതിനെക്കുറിച്ച് ഒന്നും അറിയില്ലെന്നാണ് പറഞ്ഞത്. പക്ഷേ, വിനൂപ് പോലീസിന് നൽകിയ മൊബൈൽ നമ്പറുകൾക്ക് പുറമെ, അവൻ രഹസ്യമായി ഉപയോഗിച്ചിരുന്ന മറ്റൊരു സിം കാർഡ് ഉണ്ടെന്ന് സൈബർ സെൽ കണ്ടെത്തി. ആ നമ്പറിന്റെ ടവർ ലൊക്കേഷൻ കൊലപാതകം നടന്ന ദിവസം ഉച്ചയ്ക്ക് ശാരദയുടെ വീടിന് തൊട്ടടുത്തായിരുന്നു! അതിനുശേഷം ആ നമ്പർ എന്നെന്നേക്കുമായി ഓഫാക്കപ്പെടുകയും ചെയ്തു. വിനൂപിനെ വീണ്ടും ചോദ്യം ചെയ്യാൻ പോലീസ് സ്റ്റുഡിയോയിൽ എത്തിയപ്പോൾ അവൻ അവിടെയുണ്ടായിരുന്നില്ല. അവൻ പോലീസിന്റെ കണ്ണ് വെട്ടിച്ച് ദുബായിലേക്ക് കടന്നിരുന്നു. എന്നാൽ തോറ്റുകൊടുക്കാൻ ആനന്ദ് ശങ്കർ തയ്യാറായിരുന്നില്ല. വിനൂപിന്റെ ട്രാവൽ ഏജന്റിനെയും ദുബായിലെ സ്പോൺസറെയും പോലീസ് രഹസ്യമായി ബന്ധപ്പെട്ടു. വിസയിൽ വലിയൊരു സാങ്കേതിക തകരാറുണ്ടെന്നും ഉടൻ നാട്ടിൽ എത്തിയില്ലെങ്കിൽ ജയിൽ ശിക്ഷ അനുഭവിക്കേണ്ടി വരുമെന്നും അവർ വിനൂപിനെ ധരിപ്പിച്ചു. പോലീസിന്റെ ആ തന്ത്രപരമായ കെണിയിൽ വിനൂപ് വീണു. 2017 ഡിസംബർ ഇരുപത്തിനാലിന് പുലർച്ചെ നെടുമ്പാശ്ശേരിയിൽ വിമാനമിറങ്ങിയ വിനൂപ് ഇമിഗ്രേഷൻ കൗണ്ടർ കടന്ന് പുറത്തേക്ക് നടന്നു. പെട്ടെന്നാണ് സിവിൽ വസ്ത്രം ധരിച്ച നാലുപേർ അവനെ വളഞ്ഞത്. ഒട്ടും ബഹളമുണ്ടാക്കാതെ അവർ അവനെ വാഹനത്തിലേക്ക് കയറ്റി. രഹസ്യ കേന്ദ്രത്തിൽ വെച്ചുള്ള സുദീർഘമായ ചോദ്യം ചെയ്യലിൽ, ശാസ്ത്രീയ തെളിവുകൾക്ക് മുന്നിൽ വിനൂപിന്റെ പ്രതിരോധം തകർന്നു. അവൻ തന്റെ കൊടുംക്രൂരത വിളിച്ചുപറഞ്ഞു. സംഭവം നടന്ന ദിവസം അവൻ സുഹൃത്തായ രതീഷിനെ തിരഞ്ഞാണ് അവിടെയെത്തിയത്. എന്നാൽ രതീഷ് വീട്ടിലുണ്ടായിരുന്നില്ല. ശാരദയുടെ വീട്ടിൽ ധാരാളം പണമുണ്ടെന്ന് അവൻ മനസ്സിലാക്കിയിരുന്നു. മദ്യലഹരിയിലായിരുന്ന വിനൂപ് സാമ്പത്തിക സഹായം ചോദിച്ചാണ് ശാരദയുടെ വീട്ടിലേക്ക് കയറിച്ചെന്നത്. തനിച്ചായിരുന്ന ശാരദയോട് അവൻ മോശമായി പെരുമാറാൻ ശ്രമിച്ചു. അവർ ശക്തമായി എതിർക്കുകയും ബഹളം വെയ്ക്കാൻ തുടങ്ങുകയും ചെയ്തപ്പോൾ, പൂജാമുറിയിൽ ഇരുന്ന വലിയ പിച്ചള നിലവിളക്കെടുത്ത് അവൻ അവരുടെ തലയ്ക്ക് പിന്നിൽ ആഞ്ഞടിച്ചു. ആ ഒറ്റയടിയിൽ അവർ ചോരയൊലിപ്പിച്ചു നിലത്തു വീണു. മരണം ഉറപ്പാക്കിയ ശേഷം ഇതൊരു മോഷണമാണെന്ന് വരുത്താൻ അവൻ ആഭരണങ്ങളും പണവും അപഹരിച്ചു. തുടർന്ന് മുകളിലത്തെ നിലയിലെ ബാത്ത്റൂമിൽ കയറി കുളിച്ച് ശരീരത്തിലെ രക്തക്കറകൾ കഴുകിക്കളഞ്ഞു. ശാരദയുടെ ഫോണും എടുത്തു അവൻ അവിടെനിന്നും രക്ഷപ്പെട്ടു. പിന്നീട് കടൽത്തീരത്ത് വെച്ച് ആ ഫോണും രക്തം പുരണ്ട വസ്ത്രങ്ങളും കടലിൽ എറിഞ്ഞു. തെളിവെടുപ്പിനായി വിനൂപിനെ ആതിര ഹൗസിലേക്ക് കൊണ്ടുവന്നപ്പോൾ വൻ ജനക്കൂട്ടമാണ് അവിടെ തടിച്ചുകൂടിയത്. സ്ത്രീകളടക്കമുള്ളവർ അവനെതിരെ ശാപവാക്കുകളുമായി മുറവിളി കൂട്ടി. വർഷങ്ങൾ നീണ്ട നിയമനടപടികൾക്കൊടുവിൽ കേസിന്റെ വിചാരണ തീയതി നിശ്ചയിക്കപ്പെട്ടു. 2022 ഓഗസ്റ്റ് മൂന്നിന് കോടതിയിൽ വിചാരണ ആരംഭിക്കാനിരിക്കുകയായിരുന്നു. ശക്തമായ ശാസ്ത്രീയ തെളിവുകളുള്ളതിനാൽ വിനൂപിന് കഠിനശിക്ഷ ഉറപ്പായിരുന്നു. എന്നാൽ കഥ അവിടെയും തീർന്നില്ല. വിചാരണയ്ക്ക് കൃത്യം ഒന്നര മാസം മുൻപ്, വിനൂപ് ചന്ദ്രനെ ജയിലിൽ തൂങ്ങിമരിച്ച നിലയിൽ കണ്ടെത്തി. ഒരു നിമിഷത്തെ സാമ്പത്തിക മോഹവും അവിവേകവും കാരണം ഒരു നിരപരാധിയായ സ്ത്രീയുടെ ജീവനെടുക്കുകയും, ഒടുവിൽ സ്വന്തം ജീവിതവും കുടുംബത്തിന്റെ സമാധാനവും പൂർണ്ണമായി ഇല്ലാതാക്കി അവൻ ഈ ലോകത്തോട് വിടപറഞ്ഞു. നിയമത്തിന്റെ കോടതിയിൽ വിചാരണ ചെയ്യപ്പെടും മുൻപേ കീഴടങ്ങിയിരുന്നു. മയൂഖത്തിന്റെ ജനാലകൾക്കിടയിലൂടെ അപ്പോഴും ആ പഴയ രാത്രിയുടെ ഭീതിദമായ ഓർമ്മകൾ നിഴലായി അവശേഷിച്ചു. **-ശുഭം-** #📙 നോവൽ #📔 കഥ #🕵️‍♀️ കുറ്റാന്വേഷണ കഥകൾ