#😇My Status పంచుకోవడమే పండుగ! హడావుడిగా మెట్రో ఎక్కారు. సీట్లో కూర్చోబోతుంటే పక్కనే ఓ పుస్తకం కనిపించింది. 'అయ్యో, ఎవరో మర్చిపోయారు' అనుకుని పక్కన పెట్టేస్తారా? తీసుకెళ్లి చదువుతారా? ఒకప్పు డైతే ఎవరైనా మర్చిపోతేనే అలా పుస్తకాలు దొరికేవి. ఇప్పు డలా కాదు, తాము చదివిన పుస్తకాలను ఇతరులతో పంచుకోవడానికి రకరకాల మార్గాలను అన్వేషిస్తున్నారు. వాటిలో ఒకటి 'బుక్స్ ఆన్ ద మూవ్ ఉద్యమం. మలేషియాకి చెందిన కరోల్కి పుస్తకాలు చదవడమంటే చాలా ఇష్టం. 'ట్యూస్టస్ విత్ మోరీ' చదువుతున్నప్పుడు ఒక కొటేషన్ ఆమెకు బాగా నచ్చింది.ఇతరులను ప్రేమించడానికి, చుట్టూ ఉన్న సమాజానికి,జీవితానికి అర్ధాన్నిచ్చే పనికి... మిమ్మల్ని మీరు అంకితం చేసుకోండి' అన్న మాట ఆమెను ఆలోచింపజేసింది. పుస్తకాల ద్వారా తానెంతో లబ్దిపొందాననుకున్న కరోల్ ఆ ఆనందాన్ని మరికొందరితో పంచుకోవడానికి 'బుక్స్ ఆన్ ద మూవ్' ఉద్యమాన్ని ప్రారంభించారు. పుస్తకాలు లైబ్రరీల్లో, ఇంట్లోని పుస్తకాల అరల్లోనూ ఉంటే ఏంటి లాభం? అవి చేతులు మారాలి. ఒక్కో పుస్తకాన్నీ పదుల సంఖ్యలో ప్రజలు చదవాలి... అన్నది ఈ ఉద్యమ కారుల ఆశయం. అందుకే వారు రైల్వేస్టేషన్లలో,కాఫీ షాపుల్లో,కాలేజీల్లో, స్కూళ్లలో... తాము చదివిన పుస్తకాలను వదిలి పెడుతూ ఉంటారు. ఆ పుస్తకం దొరికిన వారు తెరిచి చూస్తే లోపల 'టేక్ ఇట్, రీడ్ అండ్ డ్రాప్ ఇట్ ఫర్ సమ్వన్ ఎల్స్ టు ఎంజాయ్' అని రాసిన స్టికర్ ఉంటుంది. వాళ్లు కూడా చదివి దాన్ని ఎక్కడో చోట వదిలిపెట్టాలి. అలాగే ఎవరైనా తాము చదివేసిన పుస్తకాల్ని ఇలా ఇతరులతో పంచుకోవచ్చు.ఈ ఉద్యమం ఇప్పుడు చాలా దేశాలకు వ్యాపించింది. మన దేశంలోనూ 'బుక్స్ ఆన్ ద దిల్లీ మెట్రో' ఏడెనిమిదేళ్లుగా విజయవంతంగా నడుస్తోంది.ఆసక్తి ఉన్న వాళ్లు సోషల్ మీడియాలో ఫాలో అవ్వచ్చు. పుస్తకం పెట్టిన వాళ్లు ఏ పుస్తకం పెట్టిందీ చెబుతూ, దొరికినవాళ్లు తమకే పుస్తకం దొరికిందో చెబుతూ పోస్టులు పెడుతుంటారు. పుస్తకాలు చదవడంలో ఆసక్తి ఉండాలే కానీ ఇలాంటి ఉద్యమం ఎవరైనా ఏ ఊళ్లో అయినా ప్రారంభించవచ్చు. మెట్రో కాకపోతే... కాలేజీలో, స్కూల్లో, బస్సుల్లో, కాఫీ షాపుల్లో... ఎక్కడైనా పుస్తకాలు పెట్టవచ్చు. లేదంటే పుస్తక ప్రేమికుల సంఘాలు పెట్టుకుని తమ దగ్గరున్న పుస్తకాలను ఎక్స్ఛేంజ్ చేసుకోవచ్చు. ఇప్పుడు వేసవి సెలవులు కూడా. పిల్లలకు పుస్తకపఠనం అలవాటు చేయడానికి తగిన సమయం ఇదే. విదేశాల్లో వీధుల్లోనే ఒక పక్కగా చిన్న బాక్స్ లాంటిది ఏర్పాటుచేసి పుస్తకాలు పెడుతుంటారు.ఎవరైనా వాటిని తీసుకుని చదవొచ్చు.తాము చదివేసిన పుస్తకాలు కూడా ఇతరులు చదవడానికి వీలుగా అక్కడ పెట్టొచ్చు. ఇలాంటి చిన్న లైబ్రరీలను ఆపార్ట్మెంట్ కాంప్లెక్సుల్లోనూ పెట్టి నిర్వహణ బాధ్యతల్ని పిల్లలకే అప్పజెప్పవచ్చు. చదవడంలోనే కాదు,పుస్తకాలను పంచుకోవడం లోనూ ఓ ఆనందం ఉంది! ఈరోజు ప్రపంచ పుస్తక దినోత్సవం. కాబట్టి ఆ ఆనందాన్వేషణ ప్రయత్నాన్ని ఇవాళే ప్రారంభించండి. ✍️విస్మయ @ఈనాడు దినపత్రిక నుండి సేకరణ