కొన్నేళ్ల క్రితం వచ్చిన "ఆకాశమంత" అనే సినిమాలో ఒక పాట ఉంటుంది. "కాలేస్తే కందుననీ దోసిట్లో పెంచారు.. ఎండకన్ను సోకకుండా గుండెల్లో దాచారు" అంటూ ఒక over protective తండ్రి -- తన కూతురిని ఎంత అపురూపంగా చూసుకున్నాడో ఆ పాటలో చెబుతారు. ఆడపిల్లలు గడపదాటితే ఏ సమస్యలు ఎదుర్కోవాల్సి వస్తుందో, వారికి ఎందుకు అనవసరంగా అంత కష్టం, నేను ఉన్నాగా.. అని అన్నీ అమర్చిపెడుతూ; వారంతటవారిని ఏ పనీ చేయనీయకుండా, ప్రతి చిన్న విషయానికీ తమపై ఆధారపడేలా చేసుకుని.. దానినే ప్రేమగా చూసుకోవడం -- అనుకునే తండ్రులు, భర్తలు మన చుట్టూ కోకొల్లలు. అందుకు భిన్నమైన తండ్రి ఈ ‘బ్లాస్ట్’ సినిమాలో కరాటే మాస్టారు రాజారాం (మన యాక్షన్ కింగ్ అర్జున్). చిన్నవయసులోనే తన కూతురు ఒక అబ్బాయి నన్ను కొట్టాడు అని ఏడ్చుకుంటూ ఇంటికొస్తే ఎవడ్రా వాడు నా కూతురిని కొట్టింది అని గొడవకి వెళ్లకుండా నీ తప్పు లేకుండా వాడు నిన్ను కొడితే నువ్వు కూడా తిరిగి వాడిని కొట్టు అని కూతురికి తన సమస్యను తానే సాధించుకోవాలనే విలువైన పాఠం నేర్పుతాడు. ఆ అమ్మాయి వాడిని కొట్టడానికి వెళ్లి మళ్ళీ దెబ్బలు తిని వస్తే అలా ఎదుటి వాళ్ళ చేతిలో దెబ్బలు తినడం కాదు తనను తాను రక్షించుకునే శక్తి ఆ అమ్మాయికి ఉండాలని కరాటే నేర్పుతాడు. ఒక సీన్ లో ఆ పిల్ల ఒంటరిగా కూర్చుని అన్నం తింటూ ఉంటుంది. ఒక్క క్షణకాలపు సన్నివేశమే అయినా నాకు బలంగా నాటుకుపోయింది. ఆ అమ్మాయి తినే కంచం నిండుగా అన్నం, మూడు ఉడికించిన గుడ్లు కనిపిస్తాయి. దాని వెంటనే ఒక బౌల్ లో డ్రై ఫ్రూట్స్ లాంటివేవో పెట్టుకుని తింటూ ఉంటుంది. ఒక ఆడపిల్ల స్వతంత్రంగా, ధైర్యంగా బతకగలగాలంటే పుష్టికరమైన ఆహారం ఎంతో అవసరం. వొళ్ళు వచ్చేస్తుందేమో అని నాజూకుగా అన్నం తినే ఆడపిల్లలలో చాలామంది ఉద్యోగం వచ్చాక ఆఫీస్ లో ఎక్కువసమయం నిలబడి పనిచేయాల్సి వస్తే అందుకు ఓపిక లేక ఉద్యోగాలు మానేసిన సందర్భాలు ఉన్నాయి. కాలేస్తే కందుతుందని ఆడపిల్లలని సున్నితంగా పెంచే తల్లితండ్రులకు ఈ సినిమాలో రాజారామ్ పాత్ర ఒక పేరెంటింగ్ రోల్ మోడల్. మానసికంగా, శారీరకంగా దృఢమైన ఆడపిల్ల నీల (ప్రీతి ముకుందన్). రాజారాం వంటి తండ్రి పెంపకంలో ఉన్నతమైన వ్యక్తిత్వం రూపుదిద్దుకున్న అమ్మాయి. చూడడానికి నాజూకుగా, అందంగా, లక్షణంగా ఉన్న పిల్ల తన జోలికి ఎవరైనా వస్తే మాత్రం బేలగా, భయంగా ఒకరి ఆశ్రయం కోరక తనకోసం తాను నిలబడగలిగే ధీర. చిన్నప్పుడు ఆటలో తనని కొట్టిన పిల్లవాడైనా, చదువు పూర్తి చేసుకుని ఉద్యోగంలో చేరాక తనతో తప్పుగా ప్రవర్తించిన సహోద్యోగి అయినా తన సమస్యను తానే ఎదుర్కొంది. వాళ్లకి నాలుగు తగిలించి అయినా తనకు వారి నుండి మళ్ళీ సమస్య ఎదురుకాకుండా చూసుకుంది. తనకోసం తాను నిలబడటం మాత్రమే కాదు, తన కళ్ళ ముందు అన్యాయానికి గురవుతున్న వారెవరికోసమైనా తెగించి నిలబడగలిగే ఉన్నత వ్యక్తిత్వం కలిగిన అమ్మాయి నీల. చిన్నపిల్లే కదా నీలని అడిగేదేముందిలే అని నిర్ణయాలన్నీ తామే తీసుకోకుండా కుటుంబంలో ఏ విషయమైనా కూతురిని సంప్రదించి ఆ అమ్మాయి అభిప్రాయం తీసుకుంటాడు రాజారాం. తమ అభిప్రాయానికి తల్లితండ్రి గౌరవం ఇస్తారు అని తెలిసిన ఏ అమ్మాయి అయినా మరింత బాధ్యతతో ప్రవర్తిస్తుంది. నీల కూడా అటువంటి అమ్మాయే. అందం, చదువు, తెలివి, ధైర్యం, శారీరక బలం అన్నీ కలిసిన ఒక దృఢమైన పాత్ర నీలది. కూతురి పాత్ర చూసి ప్రేక్షకులు మురిసిపోతుండగానే తల్లి పాత్రధారిణి నీలవేణి (అభిరామి) ప్రేక్షకులను మరింత విస్మయానికి గురిచేస్తుంది. తమ కుటుంబంలోకి అనుకోకుండా వచ్చిన ఒక కార్పొరేట్ సిండికేట్ తాలూకా మనుషులతో నీలవేణి, నీల పాత్రల ఫైట్లు చూస్తుంటే ఆడపిల్లలంటే ఇట్లా ఉండాలిరా అనిపించకమానదు. రాజారామ్, అతని తమ్ముడి ఫైట్లు ఉన్నా కూడా నీలవేణి, నీల యాక్షన్ సీక్వెన్స్ లు మాత్రం కన్నులపండుగగా ఉన్నాయి. అంటే ఏంటండీ ఇప్పుడు ఆడవాళ్ళందరూ ఫైట్లు చేయాలంటారా అంటారేమో. ఇక్కడ అసలు విషయం ఫైట్లు చేయడం కాదు. సమస్య వచ్చినప్పుడు తనకు తానుగా ఎదుర్కోగలిగే ధైర్యం, శక్తి ప్రతి ఆడపిల్లకూ ఖచ్చితంగా ఉండాలి. సమస్యలు ఎప్పుడు, ఎక్కడ, ఏ రూపంలో ఎదురవుతాయో తెలియదు. ఎంత గుండెల్లో పెట్టుకుని చూసే తండ్రి అయినా ఎప్పుడూ వారికి అందుబాటులో ఉండలేడు. అందుకే అమ్మాయిలు తమంతట తాముగా ఎక్కడికైనా వెళ్లగలగాలి. సమస్య ఎదురైతే సాధించుకోగలగాలి. అందుకు తగిన చదువు, చైతన్యం, శారీరక దృఢత్వం వారికి తల్లిదండ్రులు అందివ్వగలగాలి. అదే సరైన పెంపకం. తమమీద నిరంతరం ఆధారపడేలా చేసుకోవడం కాదు ప్రేమంటే అని ప్రతి తల్లి, తండ్రికి గుర్తుచేసే సినిమా ఇది. ఆడపిల్లని బాగా చూసుకోవడం అంటే మీ రెక్కల కింద వాళ్ళని దాచిపెట్టి కాపాడుకోవడం కాదు, వాళ్ళ రెక్కలు చాచి వారిని ఎగరనివ్వడం. ఒక్కసారి బ్లాస్ట్ సినిమా చూడండి. రెక్కలు విప్పుకుని స్వేచ్ఛగా, ధైర్యంగా ఎగిరే ఆడపిల్ల ఎంత అందంగా ఉంటుందో తెలుస్తుంది. --- Bharathi Kode madam facebook wall #😇My Status #💪పాజిటీవ్ స్టోరీస్ #✌️నేటి నా స్టేటస్ #😎ఆటిట్యూడ్ కోట్స్ #🙆 Feel Good Status